1. Ia ahn Depit pepehm ong Siohwa, oh dahme met kamwakid ih en wia?

NANMWARKI DEPIT ntingihedi: “KAUN-O me roson kowahlahpie, me pwung en ketin ale kaping koaros.” (Mel. 145:3) Depit poakohng Siohwa, oh limpoak wet kamwakid ih en kapinga Koht “nan pokon en aramas akan.” (Mel. 22:22; 40:5) Ei, ke pil uhdahn poakohng Siohwa oh kin pwungki dahme Depit nda: “KAUN-O, Koht en atail pahpa Seikop, kapingpomwi en kin wiawi met oh pil kohkohlahte!”​—1 Kron. 29:10-13.

2. (a) Ia duwen atail kak kapinga Siohwa? (b) Kahpwal dah kan me ekei ahneki, oh dahme kitail pahn kousapahlih?

² Rahnwet, ehu ahl me kitail kin kapinga Siohwa iei sang ni atail kin iang pasapeng nan mihting kan. Ahpw mie riatail Kristian tohto me uhdahn ahneki kahpwal ehu. Irail kin men iang pasapeng nan mihting kan, ahpw pepehm en masak kin kauhiraildi. Dahme re kak wiahiong kahpwal wet? Oh sawas mwahu dah kan me kak sewese kitail koaros en kihda pasapeng kangoang kan? Mwohn atail pahn sapengala peidek pwukat, kitail pahn kousapahlih mahs kahrepe pahieu ong dahme kahrehda kitail kin iang pasapeng nan mihting kan.

3-5. (a) Nin duwen me Ipru 13:15 kawehwehda, dahme kahrehda kitail kin iang pasapeng ni mihting kan? (b) Atail iang pasapeng anahne duwehte ahn meteikan? Menlau kawehwehda.

³ Siohwa ketikihong kitail koaros pwais kaselel en kapinga ih. (Mel. 119:108) Atail pasapeng nan mihting kan wia kisehn atail “meirong en kaping,” oh sohte emen kak wiliandi kitail oh kihda soangen meirong wet. (Wadek Ipru 13:15.) Ia duwe, Siohwa  kin ketin idingkihong emenemen kitail en wia soangen meirong de pasapeng me duwepenehte? Uhdahn soh!

⁴ Siohwa ketin mwahngih me atail koahiek oh pil irair kan wekpeseng, oh e kin uhdahn ketin kesempwalki meirong kan me kitail kak patohwanohng ih. Medewehla soangen meirong kan me e kupwurperenki ale sang mehn Israel ko. Ekei mehn Israel ko kak meirongki sihmpwul de kuht men. Ahpw mehn Israel men me semwehmwe kak meirongki “mwuroi riemen de pitsin riemen.” Ma mehn Israel men sohte kak pwainda soangen menpihr riemen pwukat, Siohwa pahn kupwurki ale “paun riau en pilawa [“pilawa amas mwahu,” NW].” (Lip. 5:7, 11) Pilawa amas sohte kin pweilaud, ahpw Siohwa ketin kupwurperenki ale meirong wet, ma e wia “pilawa amas mwahu.”

⁵ Atail Kohto me ketin kadek kin duduwehte rahnwet. Ni atail kin iang pasapeng, e sohte ketin kasik me kitail koaros en duwehte Apolos me kadek kapahrek de duwehte Pohl me eh lokaia kan kin kamwakid meteikan. (Wiewia 18:24; 26:28) Siohwa ketin kupwurki kitail en iang pasapeng ni uwen me kitail kak. Tamanda liohdio me meirongki sent mwaramwer riau. Siohwa ketin kesempwalki ih pwehki e patohwanda dahme e kak.​—Luk 21:1-4.

6. (a) Nin duwen me Ipru 10:24, 25 kasalehda, ia duwen pasapeng kan me kitail kin rong ar kamwakid kitail? (b) Ia duwen omw kak kasalehda omw kalahnganki pasapeng kan me kin kangoangeiuk?

⁶ Kitail kin kangoange emenemen sang atail pasapeng kan. (Wadek Ipru 10:24, 25.) Kitail koaros kin perenki rong soangsoangen pasapeng kan ni atail mihting kan. Kitail kin perenki rong seri men eh kihda pasapeng mengei. Kitail kin uhdahn mwekidkihda ngilen peren me emen kasalehda ni eh koasoia duwen padahk mehlel ehu me e ahpwtehn sukuhlki. Oh kitail pil kapinga irail kan me kin kasalehda “eimah” oh iang pasapeng, mendahki re namenek de ahpwtehn tepida sukuhlki atail lokaia. (1 Des. 2:2) Ia duwen atail kak kasalehda atail kalahnganki arail nannanti? Kitail kak kalahngankihong irail arail pasapeng kangoang kan mwurin mihtingo. Pil ehu ahl iei sang ni atail kin pein iang pasapeng. Eri kitail sohte kin ihte alehdi kangoang sang atail mihting kan ahpw kitail pil kin kihda kangoang.​—Rom 1:11, 12.

7. Ia duwen atail kin paiekihda ni atail iang pasapeng?

⁷ Kitail kin paiekihda atail iang pasapeng.  (Ais. 48:17) Ia duwen? Keieu, ma atail mehn akadeio iei en iang pasapeng, met kin kalaudehla atail men kaunopada mwahu ong mihtingo. Ni atail kin kaunopada mwahu, atail wehwehkihla Mahsen en Koht pil kin laudla. Oh ni atail wehwe eh laudla, atail doadoahngki soahng kan me kitail sukuhlki pil mwahula. Keriau, kitail pahn perenki iang mihtingo pwehki kitail kin iang pidada koasoakoasoipeneo. Kesiluh, pwehki atail nanti laud en iang pasapeng, kitail kin kalapw tamataman dahme kitail koasoia nan atail pasapengo pil mwurin mihtingo eh nekier.

8-9. (a) Nin duwen me Malakai 3:16 kasalehda, ia omw madamadau ong sapwellimen Siohwa pepehm ong atail pasapeng kan? (b) Dahme ekei kin masak en wia?

⁸ Kitail kin kaperenda Siohwa ni atail koasoia duwen atail pwoson. Kitail kak kamehlele me Siohwa kin ketin karonge kitail oh uhdahn ketin kesempwalki atail nannanti en iang pasapeng ni mihting kan. (Wadek Malakai 3:16.) E kin ketin kasalehda sapwellime kalahngan sang ni eh ketin kapaikitailda ni atail kin nantihong laud en kaperenda ih.​—Mal. 3:10.

⁹ Eri e sansal me kitail ahneki kahrepe mwahu en iang pasapeng nan mihting kan. Ahpw, ekei ele kin masak en kauwada pehrail. Ma ke ahneki soangen pepehm wet, dehr nsensuwed. Kitail pahn koasoiapene ekei kaweid oh ire mehlel kan en Paipel, ekei mehn kahlemeng, oh pil ekei iren sawas mwahu me kak sewese kitail koaros en song en iang pasapeng ni mihting kan.

10. (a) Soangen pepehm en masak dahieu me me tohto rehtail ahneki? (b) Dahme kahrehda en ahneki pepehm en masak ni atail iang pasapeng kakete wia kilelepen mehkot mwahu?

¹⁰ Ke kin saloh de masak en kauwada pehmwen ehuehu ahnsou me ke men iang pasapeng? Ma ei, kaidehn kowe kelehpw. Ni mehlel, pali laud en kitail kin saloh de masak ni atail iang pasapeng. Ahpw mwohn omw kak powehdi soangen pepehm wet, ke anahne kasawihada dahme kin kahrehda omw masak. Ia duwe, ke masak ke de manokehla dahme ke men nda de nda mehkot sapwung? Ke kin pwunodki me omw pasapengo sohte pahn mwahu duwehte ahn meteikan? Ni mehlel, soangen pepehm pwukat kakete wia kilelepen mehkot mwahu. E  kin kasalehda me ke aktikitik oh ke kin wiahki meteikan me re lapalap sang uhk. Siohwa kin ketin kupwurperenki irair kaselel wet. (Mel. 138:6; Pil. 2:3) Ahpw Siohwa pil ketin kupwurki ken kapinga ih oh pil kangoange riomw Kristian kan ni mihting kan. (1 Des. 5:11) E ketin poakohng uhk oh pahn ketikihong uhk eimah me ke anahne.

11. Mehn kataman dah kan sang Paipel me kak sewese kitail?

¹¹ Medewehla ekei mehn kataman kan sang nan Paipel. Paipel mahsanih me kitail koaros kin sapwungala ni lokaia de mwomwen atail kin nda mehkot. (Seims 3:2) Siohwa sohte ketin kasik me kitail unsek, oh riatail Kristian kan pil sohte kin. (Mel. 103:12-14) Irail wia atail peneinei oh re kin poakohng kitail. (Mark 10:29, 30; Sohn 13:35) Re wehwehki me ekei pak kitail sohte kin ndahla dahme kitail uhdahn men nda.

12-13. Dahme kitail sukuhlkihsang mehn kahlemeng en Nehmaia oh Sona?

¹² Medewehla duwen ekei mehn kahlemeng en Paipel me kak seweseiuk en powehdi omw pepehm en masak. Tamanda Nehmaia. E kin papah nan tehnpas en nanmwarki lapalap emen. Nehmaia nsensuwedkihla eh rong me dihd oh ewen kehl en Serusalem ohlahr. (Neh. 1:1-4) Medewehla uwen eh salohda ni ahnsou me nanmwarkio idek reh en kawehwehda dahme kahrehda e nohn nsensuwedki! Nehmaia mwadangete kapakap oh sapengala nanmwarkio. Nanmwarkio mwekidki eh pasapengo oh kihda sawas laud pwehn sewese sapwellimen Koht aramas akan. (Neh. 2:1-8) Pil medewehla Sona. Ni ahnsou me Siohwa ketin mahsanihong ih en kohla oh kalohk ong mehn Ninipe kan, Sona uhdahn masepwehkada oh tangala ni ehu wasa tohrohr. (Sona 1:1-3) Ahpw pwehki sapwellimen Siohwa sawas, Sona kohla Ninipe oh kalohk ong aramas ako. Dahme Sona padahngki wia kamwahu laud ong mehn Ninipe kan. (Sona 3:5-10) Kitail sukuhlkihsang Nehmaia duwen kesempwalpen en kapakap mwohn atail iang pasapeng. Oh sang Sona, kitail sukuhlki me Siohwa kak ketin sewese kitail en papah ih sohte lipilipil uwen laud en pepehm en masak me kitail ahneki. Ni mehlel, atail iang pasapeng nan mwomwohdiso ele sohte nohn kamasepwehk duwehte en kalohki rohng en kadeik ong mehn Ninipe kan, kaidehn?

¹³ Soangen sawas mwahu dah me kak seweseiuk en kihda pasapeng kangoang kan ni mihting? Kitail pahn koasoiapene ekei sawas pwukat.

14. Dahme kahrehda kitail en kaunopada mwahu ong atail mihting kan, oh iahd me kitail kak wia onop?

¹⁴ Kaunopada ong ehuehu mihting. Ni omw wiahda mahs koasoandi kan oh kaunopada mwahu, omw eimah en iang pasapeng pahn laudla. (Lep. Pad. 21:5) Ei mehlel, atail koasoandi ong kaunopada ong mihting kan kin wekpeseng. Eloise, emen liohdi me sounpar 80 samwa, kin tepida kaunopada ong Onop en Kahn Iroir ni tepin wihko. E nda, “I kin uhdahn perenki mihtingo ma I kaunopada mwowe.”  Joy, me kin doadoahk awa 40 nan wihk ehu, kin koasoanehdi ahnsou ni Rahn Kaunop kan pwehn onop nah Kahn Iroir. E nda: “E mengei ong ie en taman ire kan ma I onop ekis mwohn mihtingo.” Ike, emen elder oh pioneer me uhdahn kin soupisek, nda, “I diarada me e kin keieu mwahu ong ie en onop ekisekis ahnsou erein wihko ahpw kaidehn en onop erein ahnsou laud.”

15. Ia duwen omw kak kaunopada mwahu ong mihting?

¹⁵ Dahme kin pidada atail en kaunopada mwahu ong mihting? Ahnsou koaros kapakapki sapwellimen Koht manaman mwohn omw tepida onop. (Luk 11:13; 1 Sohn 5:14) Doadoahngki ekis ahnsou en medewe duwen oaralapo, sawaspen oaralap kan, kilel kan, oh koakon en kasukuhl kan. Ni omw tepida onopki ehuehu parakrap, wadekala ni uwen me ke kak iren Paipel kan me kileldi. Doudouloale ire ko, ahpw mehlel ire kesempwal kan me ke men koasoia nan omw pasapengo. Ma ke kaunopada mwahu, ke pahn paiekihda laud oh pil pahn mengei ong uhk en iang pasapeng.​—2 Kor. 9:6.

16. Mehn sawas dah kan me ke kak doadoahngki, oh ia duwen omw kin doadoahngki?

¹⁶ Ma kak, doadoahngki neitail website de app kan pwehn kilang sawaspen Paipel kan ni omw lokaia. Siohwa kin ketin doadoahngki sapwellime pwihn en kihda mehn sawas pwukat pwehn sewese kitail en kaunopada ong mihting kan. Kitail kak download sawaspen Paipel kan ong onop sang JW Library^® app ong nan neitail cellphone de tablet ape. Eri, kitail kak onop, wadek de rong iren onop kan ahnsou de wasa sohte lipilipil. Ekei kin doadoahngki JW Library pwehn wia arail onop erein ahnsoun mwengehn souwas ni wasahn doadoahk de sukuhl de pil ni arail seiloakseli. Watchtower Library oh pil Watchtower ONLINE LIBRARY^™ kin uhdahn kamengeila atail wia roporop ong ire ehu me kitail men esehla mwahu nan iren onopo.

17. (a) Dahme kahrehda e mwahu en kaunopada pasapeng tohto? (b) Dahme ke sukuhlkihsang kisin kasdo Become Jehovah’s Friend​—Prepare Your Comment?

¹⁷ Ma kak, kaunopada pasapeng tohto ong ehuehu iren onop. Dahme kahrehda? Pwehki brother me wia onopo ele sohte pahn ahnsou koaros likwerihuk ni ahnsou me ke kihda pehmwen. Meteikan ele pahn kihda pehrail ni ahnsowohte, oh brothero ele pahn pilada emen irail. Pwe mihtingo en imwisekla ni ahnsou me kileldiong, brother me wia onopo ele pahn kamalaulaula pasapeng kan ni ekei wasa nan onopo. Eri dehr nsensuwedla de mworusala ma e sohte mwadang likwerihuk erein onopo. Ma ke kaunopada pasapeng tohto, e pahn mie ahnsou laud en iang pasapeng. Ehu pasapeng me ke kaunopada kak pidada wadawad en iren Paipel ehu. Ahpw ma ke kak, pil kaunopada en pasapeng ni pein omw lokaia. *

18. Dahme kahrehda kitail en pasapeng ni mwotomwot?

 ¹⁸ Pasapeng ni mwotomwot. Pasapeng kan me kin keieu kangoange kitail iei me kin mwotomwot oh mengei. Eri nantihong en iang pasapeng ni mwotomwot. Nantihong pwe omw pasapeng en reireikihte mpen seken 30. (Lep. Pad. 10:19; 15:23) Ma ke kin iang pasapeng nan mihting kan erein sounpar tohto, e kesempwal ken wiahda mehn kahlemeng mwahu en kihda pasapeng ni mwotomwot. Ma ke koasoi minit kei duwen soahng tohto, meteikan pahn medewe me re sohte pahn kak kihda pasapeng mwahu duwehte kowe. Pil ehu, pasapeng ni mwotomwot kin mweidohng me tohto en kak iang pasapeng nan mihtingo. Ma brother me wia onopo likwerihuk mahs, ndahla uhdahn pasapengpen peideko ni mengei. Dehr ndahla ire kan koaros nan parakrapo. Mwurin mouren parakrapo eh kasansalda, ke kak kihda ire teikan.​—Menlau kilang koakon me oaralap “ Dahme I Kak Koasoia?”

19. Ia duwen brother me pahn wia onopo eh kak seweseiuk, ahpw dahme ke anahne wia?

¹⁹ Padahkihong brother me pahn wia onopo me ke men kihda pasapeng nan ehu parakrap ko. Ma ke pilada en wia met, ke anahne tuhwong ih mwohn mihtingo tepida. Ni ahnsou me lelehr ken kihda pasapengpen parakrapo, mwadang kihda pehmwen ni sansal pwe brothero en kak kilang.

20. Ia duwen mihting en mwomwohdiso eh duwehte omw iang mwenge rehn kompoakepahmw kan?

²⁰ Ken kilangwohng mihting kan en mwomwohdiso duwehte omw kin iang kompoakepahmw kan mwengepene. Medewehla me ekei tohnmwomwohdiso pilahnehda en mwengepene oh re peki rehmw ken wiahda kisin mwenge pwehn wahla. Dahme ke pahn wia? Ele ke pahn ekis pwunodkihda, ahpw ke uhdahn pahn wia uwen omw kak pwehn wahla mehkot me koaros pahn perenki kang. Siohwa me ketin lukei kitail oh ketikihdahr kamadipw ehu me diren soahng mwahu ni atail mihting kan. (Mel. 23:5; Mad. 24:45) Oh e kin kupwurperenkihda ni atail wahdo kisin kisakis kis me keieu mwahu me kitail kak kihda. Eri kaunopada mwahu oh iang kihda pasapeng tohto ni uwen omw kak. Eri ke sohte pahn ihte paiekihda soahng mwahu kan me Siohwa ketikihda ahpw ke pil iangete kihda kisakis pwehn ehukihong mwomwohdiso.