1. So osetingja o David bašo Jehova, hem ko so pottikningja le adava?

O CARI O DAVID pišingja: „Baro tano o Jehova hem zaslužinela i najbari falba“ (Ps. 145:3). Ov manglja e Jehova hem adava mangipe pottikningja le te falinel le „maškar o khedimo narodo“ (Ps. 22:22; 40:5). Sigurno tu da mangea e Jehova hem složinea tut e lafencar so vakergja len o David: „Ov falimo Jehova, Devla amare dadeskoro o Izrael, ki celi večnost!“ (1. Let. 29:10-13).

2. a) Sar šaj te falina e Jehova? b) Soj tano nekaske amendar pharo te kerel, hem so ka dikha akana?

² Jekh način sar avdive falinaja e Jehova tano agjaar so komentirinaja ko amare sostanokija. Ama, bute amare phralenge hem phenjenge adava tano čače pharo. Ola mangena te komentirinen, ama i dar čhinavela len ko adava. Sar šaj te pobedinen pumari dar? Kola praktična sovetija šaj te pomožinen amenge te da komentarija so ka ohrabrinen e javeren? Angleder te odgovorina ko akala pučiba, te dikha štar važna pričine soske komentirinaja ko sostanokija.

3-5. a) Sprema Evreite 13:15, soske komentirinaja ko sostanokija? b) Dali mora sarine te komentirina ko isto način? Objasnin.

³ O Jehova sarinenge amenge dengja i čest te falina le (Ps. 119:108). O komentarija so daja len ko sostanokija tane delo tari amari žrtva kolaja so falinaja e Devle, hem nikoj javer našti te del akaja žrtva  amenge ko than. (Čitin Evreite 13:15.) Dali o Jehova rodela sekova jekh te del isto vrsta „žrtva“, javere lafencar te komentirinel ko isto način? Na, na rodela adava!

⁴ O Jehova džanela kaj sarinen isi amen različna sposobnostija hem okolnostija, hem but ceninela o žrtve so šaj te da len leske. Razmislin save žrtve prifatingja taro Izraelcija. Nesave lendar šaj sine te prenesinen bakhro ili buzni. Ama, ako nekoj sine čorolo šaj sine te del „duj grlice ili duj terne gulubija“. A ako našti sine te del ni adava, o Jehova prifatinela sine jekh „desetok tari efa šukar melimo varo“ (3. Moj. 5:7, 11). Iako o varo na sine doborom skupo, o Jehova ceninela sine adaja žrtva ako sine „šukar melimo varo“.

⁵ Amaro milostivo Devel avdive da dikhela ko amare žrtve ko isto način. Keda komentirinaja, ov na adžikerela sarine amen te džana te kera šukar lafi sar o Apolo ili te ova uverliva sar o Pavle (Dela 18:24; 26:28). Sa so mangela o Jehova tano te trudina amen te komentirina najšukar so šaj. Setin tut ki udovica so dengja duj tikne pare. Oj sine skapoceno e Jehovaske soske dengja o najšukar so šaj sine (Luka 21:1-4).

6. a) Sprema Evreite 10:24, 25, sar šaj e javerengere komentarija te vlijajnen upri amende? b) Sar šaj te sikave kaj ceninea o komentarija so ohrabrinena tut?

⁶ Amare komentarencar ohrabrinaja amen jekh jekhea. (Čitin Evreite 10:24, 25.) Sarine amen uživinaja keda šunaja različna komentarija ko amare sostanokija. Uživinaja keda o tikne čhave komentirinena ednostavna hem iskrena lafencar. Ohrabrime siem keda nekoj taro vilo komentirinela bašo nesavo biblisko čačipe kova so halilo le. A vooduševinaja amen okolenge so khedena hrabrost te komentirinen iako tane ladžutne ili samo so počmingje te sikljoven amari čhib (1. Sol. 2:2). Sar šaj te sikava kaj ceninaja lengoro trudo? Otkeda ka završinel o sostanok šaj te blagodarina lenge bašo ohrabruvačka komentarija. Javer način tano agjaar so amen da ka komentirina. Tegani na samo so amen ka ova ohrabrime, nego amen da ka ohrabrina e javeren (Rim. 1:11, 12).

7. Savi korist isi amen taro amare komentarija?

⁷ Amen da isi amen korist keda komentirinaja (Isa. 48:17). Ko kova način? Prvo, ako čhivaja amenge cel te komentirina,  tegani isi amen panda jekh pričina šukar te spremina amen bašo sostanokija. Keda šukar spreminaja amen, pohor haljovaja e Devleskoro Lafi hem ka džana sar te ikera amen ko adava so sikljovaja le. Dujto, verojatno panda poviše ka uživina ko sostanokija soske učestvujnaja ki lende. Hem trito, keda trudinaja amen te komentirina, obično poviše vreme pamtinaja adava so vakergjem.

8-9. a) Sar so pišinela ko Malahija 3:16, sar osetinela pe o Jehova keda komentirinaja? b) So šaj ponadari da te ovel nekaske pharo te kerel?

⁸ O Jehova tano bahtalo keda keraja lafi baši amari vera. Šaj te ova uverime kaj o Jehova šunela amen hem but ceninela o trudo so daja le te šaj te komentirina ko sostanokija. (Čitin Malahija 3:16.) Ov sikavela adava agjaar so dela amen bereketi keda dikhela kaj trudinaja amen te kera leskiri volja (Mal. 3:10).

⁹ Čače isi amen šukar pričine te komentirina ko sostanokija. Ama, nesave šaj ponadari da darana te vazden plo vas. Ako tu da osetinea tut agjaar, ma obeshrabrin tut. Te dikha nesave bibliska načelija hem nekobor primerija, a isto agjaar nesave praktična sovetija so šaj sarinenge amenge te pomožinen panda poviše te komentirina ko sostanokija.

10. a) Soske nesave darana te komentarinen? b) Ako daraja te komentarine koja šukar osobina šaj isi tut?

¹⁰ Dali kočingjovea tari dar sekova puti keda mislinea te vazde tlo vas? Ako oja, na osetinea tut samo tu agjaar. Ustvari, poviše džene amendar džinegde darana keda komentirinena. Te šaj te pobedine i dar, najangle valjani te haljove i pričina soske daraja. Dali daraja kaj ka bistre adava so mangea te vakere ili kaj nane te de o točno odgovor? Dali mislinea kaj tlo komentari nane te ovel doborom šukar sar e javerengere komentarija? Asavki dar šaj te ovel šukar znako, soske sikavela kaj sian ponizno hem kaj dikhea e javeren sar pobare tutar. O Jehova but mangela i poniznost  (Ps. 138:6; Fil. 2:3). Ama, ov isto agjaar mangela te faline le hem te ohrabrine tle phralen hem phenjen ko sostanokija (1. Sol. 5:11). Ov mangela tut hem ka del tuke i hrabrost so valjani tuke.

11. Kola misle tari Biblija šaj te pomožinen amenge?

¹¹ Razmislin bašo nekobor bukja kolende so setinkerela amen i Biblija. Oj vakerela kaj sarine amen grešinaja. Ponekogaš ka vakera nešto so na valjani ili ka vakera nešto ko pogrešno način (Jak. 3:2). Ni o Jehova ni amare phralja hem phenja na adžikerena amendar te ova sovršena (Ps. 103:12-14). Ola tane amari duhovno familija hem čače mangena amen (Mar. 10:29, 30; Jovan 13:35). Ola haljovena kaj keda komentirinaja, nane sekogaš te vakera agjaar sar so mangaja.

12-13. So sikljovaja taro Neemija hem taro Jona?

¹² Razmislin bašo nesave primerija tari Biblija so šaj te pomožinen tuke te pobedine tli dar. Setin tut ko Neemija. Ov služinela sine ki palata jekhe mokjno careskiri. O Neemija sine razočarimo soske šungja kaj o zidija taro Erusalim sine rušime hem o porte sine thare (Neem. 1:1-4). Sigurno kočindilo tari dar keda o cari pučlja le soske tano doborom razočarimo! O Neemija sigate molingja pe hem palo adava odgovoringja leske. Keda šungja soj i buti, o cari kergja but bukja te šaj te pomožinel e Devleskere narodoske (Neem. 2:1-8). Razmislin isto agjaar bašo Jona. Keda o Jehova bičhalgja le te predupredinel e manušen ki Ninevija, o Jona doborom but darandilo so našlja ki sprotivno strana (Jona 1:1-3). Ama, adaleske so pomožingja le o Jehova, o Jona gelo hem propovedingja lenge. A o lafija so vakergja len sine bašo lengoro šukaripe (Jona 3:5-10). Taro Neemija sikljovaja kaj tano važno te molina amen angleder te odgovorina. A taro Jona sikljovaja kaj o Jehova ka pomožinel amen te služina leske bizi razlika kobor but daraja. Ustvari, nijekh sobranie nane postrašno taro Ninevijcija!

¹³ Kola praktična sovetija šaj te pomožinen tuke te de ohrabruvačka komentarija ko sostanokija? Te dikha nekobor predlogija.

14. Soske valjani šukar te spremina amen bašo sostanokija, hem keda šaj te kera adava?

¹⁴ Spremin tut bašo sekova sostanok. Ako angleder planirinea hem šukar spreminea tut, ka osetine tut posigurno keda ka mange te komentirine (Izr. 21:5). Džangjola pe, sekole jekhe amendar isi le različno raspored keda spreminela pe bašo sostanokija. I Eloiz, jekh udovica so isi la poviše taro 80 berš, počminela te spreminel pe baši Stražarsko kula panda ko početok taro kurko. Oj vakerela: „Poviše uživinava ko sostanokija ako dovolno angleder proučinava o materijali“. I Džoj, koja so kerela buti celo rabotno vreme, odvojnela vreme sabota te spreminel i statija tari  Stražarsko kula. Oj vakerela: „Mangava o materijali te ovel mange svežo ko misle“. O Ajk, jekh starešina kova soj zafatimo hem služinela sar pioneri vakerela: „Haliljum kaj mange pošukar te proučinav nekobor puti ko kurko namesto te nakhavav celo materijali taro jekh puti“.

15. Sar šaj šukar te spremine tut bašo sostanokija?

¹⁵ Sar šaj šukar te spremine tut bašo sostanokija? Angleder te počmine te proučine, molin e Jehova te del tut sveti duh (Luka 11:13; 1. Jov. 5:14). Tegani odvojn nekobor minutija te dikhe o materijali — o naslov, o podnaslovija, o slike hem o ramke. Džikote proučinea sekova pasus, čitin kobor so šaj poviše taro stihija soj dende. Razmislin hor bašo informacie hem posebno koncentririn tut ko misle bašo kola so mangea te komentirine. Kobor pošukar spreminea tut, doborom pobari korist ka ovel tut hem ka ovel tuke polokhe te komentirine (2. Kor. 9:6).

16. Kola elektronska alatke isi ki čhib so haljovea la, hem sar koristinea len?

¹⁶ Ako isi tut prilika, koristin o elektronska alatke kola so isi ki čhib so haljovea la. Preku pli organizacija, o Jehova dela akala bukja te šaj te pomožinel amenge te spremina amen bašo sostanokija. I aplikacija JW Li­brary^® pomožinela amenge te perava publikacie proučibaske ko amaro mobilno ured. Tegani šaj te proučina len — ili barem te čitina len ili te šuna len — ko bilo kova vreme hem ko bilo kova than. Nesave koristinena akaja aplikacija te šaj te proučinen džikote tane ki pauza ki buti, ko odmor ki škola ili džikote tane ko drumo. Ki kompjutersko programa Watchtower Li­brary ili ki ONLAJN BIBLIOTEKA Watchtower šaj but lokhe te arakha informacie bašo nesave misle taro materijali kova so mangaja pohor te proučina le.

17. a) Soske tano šukar te spremine nekobor komentarija? b) So sikliljan taro videoklipi Ov e Jehovaskoro amal — spremin tuke komentari?

¹⁷ Ako šaj, spremin nekobor komentarija bašo materijali so proučinela pe. Soske? Adaleske so o voditeli šaj nane te del tut te komentirine sekova puti keda ka vazde tlo vas. O javera verojatno ka vazden plo vas ko isto vreme hem o voditeli šaj ka vazdel nekas javere. Te šaj o sostanok te završinel ko vreme, o voditeli šaj ka valjani te ograničinel kobor komentarija ka den pe ko jekh pasus. Adaleske, ma holjan ili ma razočarin tut ako na komentirinea panda ko početok. Ako spremingjan tuke nekobor odgovorija, ka ovel tut poviše prilike te komentirine. Na primer, šaj te vazde tlo vas te čitine nesavo stiho. Ama, ako šaj, spremin tut te de komentari tle lafencar. *

18. Soske valjani te da kratka komentarija?

 ¹⁸ De kratka komentarija. But puti o komentarija kola so najviše ohrabrinena tane kratka hem ednostavna. Adaleske, čhiv tuke cel te de kratka komentarija. Probin te na oven poviše taro 30 sekundija (Izr. 10:19; 15:23). Ako beršencar redovno komentirinea ko sostanokija, važno tano tle odgovorija te oven kratka hem adalea te de šukar primer e javerenge. Ako tle komentarija trajnena nekobor minutija hem kerea lafi bašo but bukja, o javera šaj te oven obeshrabrime hem te mislinen kaj našti te komentirinen sar tute. Isto agjaar, ako amare komentarija tane kratka, ka šaj poviše džene te učestvujnen ko sostanok. Posebno ako prvo odgovorinea ko nesavo pučibe, trudin tut tlo odgovor te ovel ednostavno hem direktno. Ma raskažin celo pasus. Otkeda ka kerel pe lafi baši glavno misla, šaj te komentirine bašo javera da bukja. (Dikh i ramka „ Bašo so šaj te komentirinav?“)

19. Sar šaj o voditeli te pomožinel tuke te komentirine, ama so valjani tu te kere?

¹⁹ Vaker e voditeleske ko kova pasus mangea te komentirine. Šukar tano te vakere leske akava angleder o sostanok. Keda ka avel vreme te komentirine ko adava pasus, vazde tlo vas sigate hem dovolno upre te šaj o voditeli te dikhel tut.

20. Ki koja smisla o sostanokija tane sar jekh ručko šukar amalencar?

²⁰ Dikh ko sostanokija sar jekh ručko šukar amalencar. Zamislin tuke kaj nesave phralencar taro sobranie dogovoringjen tumen te han zaedno hem sekoj te anel nešto. Šaj ka ovel tut hari stres, ama sigurno ka kere nesavo hajbe kova so ka svidžinel pe sarinenge. O Jehova, amaro Domakjini, spremingja amenge pherdi sofra šukar bukjencar ko amare sostanokija (Ps. 23:5; Mat. 24:45). Ov tano bahtalo keda amen da anaja ednostavno poklon, o najšukar so šaj te da. Adaleske, spremin tut šukar hem komentirin kobor so šaj poviše ko sostanokija. Tegani na samo so ka ha tari e Jehovaskiri sofra nego isto agjaar ka ane poklon te deline e sobraniea.