1. So osetija o David premalo Jehova hem ko so podstaknija lje odova?

O KRALJ DAVID pisija: „Baro tano o Jehova hem zaslužini i najbari hvala“ (Ps. 145:3). Ov manglja e Jehova hem odova mangipe podstaknija lje te hvalini lje „maškaro čedimo narodo“ (Ps. 22:22; 40:5). Sigurno hem tu mangeja e Jehova hem složineja tut e lafenca so vačerdža ljen o David: „Ov hvalimo Jehova, Devla amare dadeso e Izraeleso, ki celo večnost“ (1. Let. 29:10-13).

2. (a) Sar šaj te hvalina e Jehova? (b) Soj tano nekase pharo hem so ka dikha akana?

² Jekh način sar avdije hvalinaja e Jehova tano adžahar so daja komentarija ko amare sastankija. Ama, bute amare phraljendže hem phenjendže odova tano čače pharo. On mangena te den komentarija, ama i dar čhinavi ljen. Sar šaj te pobedinen piklji dar? Hem kola korisna savetija šaj te pomožinen amen te da komentarija kola ka ohrabrinen averen? Angljeder te odgovorina ko akala pučiba, te dikha štar važna razlogija sose daja komentarija ko sastankija.

3-5. (a) Premalo Jevrejendže 13:15, sose daja komentarija ko sastankija? (b) Da li mora sare ko isto način te da komentarija? Objasnin.

³ O Jehova dija svakonese amendar čast te hvalina lje (Ps. 119:108). O komentarija so daja ko sastankija tane deo kotar amari žrtva kolaja hvalinaja e Devlje, hem niko aver našti te del akija žrtva ko amaro than. (Čitinen Jevrejendže 13:15.) Da li o Jehova rodela svakonestar amendar te del isto vrsta „žrtva“, avere lafenca te da komentarija ko isto način? Na, na rodela odova!

 ⁴ O Jehova džanela so sare isi amen različita sposobnostija hem okolnostija, hem but cenini o žrtve so šaj te da oljese. Razmislin save žrtve prihvatija ando Izraelcija. Nesave oljendar šaj hine te den bakre ja jarco. Ama, ako neko hine čororo šaj hine te del „duj gugutke ja duj terne golubija“. A ako našti hine te del ni odova, o Jehova prihvatini hine jekh „desetak andi efa šukar meljimo varo“ (3. Moj. 5:7, 11). Iako o varo na hine odoborom skupo, o Jehova cenija odija žrtva ako hine „šukar meljimo varo“.

⁵ Amaro milostivo Devel hem avdije dikhela ko amare žrtve ko isto način. Ked daja komentarija, ov na adžičeri amendar te džana te čera šukar lafi sar o Apolo ja te ova uverljiva sar o Pavle (Čer. 18:24; 26:28). Sa so mangela o Jehova tano te trudina amen te da komentarija najšukar so šaj. Setin tut ki udovica so dija duj tikne pare. Oj hine vredno e Jehovase sose dija najviše so hinela (Luka 21:1-4).

6. (a) Premalo Jevrejendže 10:24, 25, sar upro amende utičinena averenge komentarija? (b) Sar šaj te mothove so cenineja o komentarija kola ohrabrije tut?

⁶ Amare komentarenca ohrabrinaja jekh jekhe. (Čitinen Jevrejendže 10:24, 25.) Sare amen uživinaja ked šunaja različita komentarija ko amare sastankija. Uživinaja ked o tikne čhave dena komentarija jednostavno hem iskreno lafenca. Ohrabrime hijam ando komentarija kola kotar vilo vačeri ljen džiko so haljilo disavo nevo biblijako čačipe. A oduševinaja amen okoljenca so čedena hrabrost te den komentarija iako tane ladžutne ja samo so počmije te sikljon amari čhib (1. Sol. 2:2). Sar šaj te mothova so ceninaja oljengo trud? Palo sastanko šaj te zahvalina amen so ohrabrije amen peklje komentarenca. Aver način tano adžahar so amen ka da komentarija. Tegani na samo so amen ka ova ohrabrime, nego hem amen ka ohrabrina averen (Rim. 1:11, 12).

7. Savi korist isi amen ando amare komentarija?

⁷ Hem amen isi amen korist ked daja komentarija (Isa. 48:17). Ko kova način? Sar jekhto, ako isi amen cilj te da komentarija, tegani isi amen pana jekh razlog šukar te spremina amen e sastankondže. Ked šukar spremina amen, pohor haljovaja e Devljeso Lafi hem ka džana sar te ičera amen ko odova so sikljovaja. Sar dujto, ked učestvujinaja ko sastanko pana  pobuter ka uživina koro ljeste. Sar trito, odoljese so dindžam sa amendar te da komentari, obično pobuter vreme pamtinaja odova so vačerdžam.

8-9. (a) Sar so pisini ko Malahija 3:16, sar o Jehova dikhela ko amare komentarija? (b) Sostar disave ipak darana?

⁸ O Jehova tano bahtalo ked čeraja lafi andi amari vera. Šaj te ova uverime so o Jehova šunela amen hem but cenini amaro trud kova daja te šaj te komentarišina ko sastankija. (Čitinen Malahija 3:16.) Ov mothovi odova adžahar so dela amen berečeti ked dikhela so daja sa amendar te čera oljesi volja (Mal. 3:10).

⁹ Čače isi amen šukar razlogija te da komentarija ko sastankija. Ama, disave palje darana te vazden po vas. Ako hem tu osetineja tut adžahar, ma obeshrabrin tut. Te dikha nekobor načelija andi Biblija, nekobor primerija hem disave korisna savetija kola šaj te pomožinen sarinen amen pana pobuter te da komentarija ko sastankija.

10. (a) Savi dar isi bute dženen amendar? (b) Ako daraja te de komentarija, koja šukar osobina šaj isi tut?

¹⁰ Da li kočineja tu andi dar svako puti ked mislineja te vazde to vas? Ako po, na osetineja tut samo tu adžahar. Bute dženendže nane sa jekh ked dena komentarija. Te šaj te pobedine i dar, najangljeder valjani te haljove o razlog sose daraja. Da li daraja so ka bistre odova so mangeja te vačere ja ka phene diso pogrešno? Da li mislineja so toklo komentari nane te ovel odobor šukar sar averenge komentarija? Asavki dar šaj te ovel šukar znak, sose mothovi so hijan ponizno hem so dikheja averen sar pobare tutar. O Jehova but mangela i poniznost (Ps. 138:6; Fil. 2:3). Ama, ov isto adžahar mangela te hvaline lje hem te ohrabrine teklje phraljen hem phenjen ko sastankija (1. Sol. 5:11). Ov mangela tut hem ka del tut hrabrost te čere odova so valjani.

11. Kola mislija andi Biblija šaj te pomožininen amen?

 ¹¹ Razmislin ando nekobor buča ko kola setinčeri amen i Biblija. Oj vačeri so sare amen grešinaja. Disavo puti ka vačera diso so na valjani ja ka vačera diso ko pogrešno način (Jak. 3:2). Ni o Jehova ni amare phralja hem phenja na adžičerena amendar te ova savršena (Ps. 103:12-14). On tane amari duhovno familija hem čače mangena amen (Mar. 10:29, 30; Jov. 13:35). On haljovena so ked daja komentarija, našti uvek te vačera odova sar so mangljam.

12-13. So sikljovaja kotar Nehemija hem kotar Jona?

¹² Razmislin ando disave primerija kotar Biblija so šaj te pomožinen tuče te pobedine tiklji dar. Setin tut ko Nehemija. Ov služindža ko dvoro ando jekh moćno kralj. O Nehemija hine tužno sose šundža so o zidija ando Jerusalim hine rušime hem o udara hine tharde (Neh. 1:1-4). Sigurno kočija pe andi dar ked o kralj pučlja olje sose tano odobor tužno. O Nehemija ki sig molija pe ano peste hem palo odova odgovorija oljese. Ked šundža soj tani i buti, o kralj čerdža but buča te šaj te pomožini e Devljese narodose (Neh. 2:1-8). Isto adžahar, razmislin ando Jona. Ked o Jehova bičaldža olje te upozorini e manušen ki Niniva, o Jona odoborkha darandilo so našlja ki aver strana (Jona 1:1-3). Ama, odoljese so pomožija lje o Jehova, o Jona dželo hem propovedija oljendže. A o lafija so vačerdža hine oljenge šukaripase (Jona 3:5-10). Kotar Nehemija sikljovaja soj tano važno te molina amen angljeder so ka da komentarija. A ando Jona sikljovaja so o Jehova ka pomožini amen te služina oljese kobor god te dara. Razmislin, da li amare phralja tane odobor strašna sar o manuša ki Niniva?

¹³ Kola korisna savetija šaj te pomožinen tuče te de ohrabrujuća komentarija ko sastankija? Te dikha nekobor predlogija.

14. Sose valjani šukar te spremina amen sastankondže hem ked šaj te čera odova?

¹⁴ Spremin tut svakone sastankose. Ked angljeder planirineja hem šukar spremineja tut, ka osetine tut posigurno ked ka mange te de komentarija (Godž. 21:5). Džandžola pe, svako amendar isi lje različito raspored ked spremini pe sastankose. I Eloiz, jekh udovica so isi la pobuter ando 80 berš, počmini te spremini i Stražarsko kula pana ko početko ando kurko. Oj vačeri: „Pobuter uživinava ko sastankija ako angljeder spremina man.“ I Džoj, koja čerela buti celo dive, odvojini vreme ko savato (subota) te spremini o članko andi Stražarsko kula. Oj vačeri: „Maje tano polokho te setinav man so proučindžum ako spremina man odova dive ked tano o sastanko.“ O Ajk, jekh starešina kova isi lje but obaveze hem služini sar pioniri, vačeri:  „Haljiljum so maje pošukar te proučinav nekobor puča ko kurko, nego te nakhav celo materijali kotar jekh puti.“

15. Sar šaj šukar te spremine tut sastankondže?

¹⁵ Sar šaj šukar te spremine tu sastankondže? Angljeder te počmine te proučine, molin e Jehova te del tut sveti duh (Luka 11:13; 1. Jov. 5:14). Palo odova, odvojin nekobor minutija te dikhe o materijali – o naslov, o podnaslovija, o slike hem o okvirija. Dži proučineja svako odlomko, ako šaj čitin sa o stihija kola tane dinde. Razmislin odoljestar soj tano pisimo, a posebno ando mislija kola mangeja te komentarišine. Kobor pošukar spremineja tut, odobor pobari korist ka ovel tut hem ka ovel tuče polokho te de komentarija (2. Kor. 9:6).

16. Kola elektronska alatija isi ki čhib so haljoveja hem sar koristineja ljen?

¹⁶ Ako isi tut prilika, koristin o elektronska alatija kola isi ki čhib koja haljoveja. Prekalo piklji organizacija, o Jehova dela akala buča te šaj te pomožini amen te spremina amen sastankondže. I aplikacija JW Library^® pomožini amen te huljava o publikacije proučibase ko amaro telefoni ja tablet. Tegani šaj te proučina ljen, ja barem te čitina ljen ja te šuna ljen, ko bilo kova vreme hem ko bilo kova than. Nesave koristinena akija aplikacija te šaj te proučinen dži tane ki pauza ki buti, ko odmor, ki škola ja dži tane ko drumo. Sebepi so isi amen biblioteka ko CD (Watchtower Library) hem amari onlajn biblioteka koja isi amen ko internet, šaj but polokho te arakha informacije ando nesave mislija kotar materijali kola mangaja pohor te proučina.

17. (a) Sose tano šukar te spremine nekobor komentarija? (b) So sikljiljan ando crtani Ov e Jehovaso amal – Čer to komentari?

¹⁷ Ako šaj, spremin nekobor komentarija. Sose tano odova šukar? Odoljese so o voditelj šaj nane uvek te del tut te komentarišine ked ka vazde to vas. Avera verovatno ka vazden po vas ko isto vreme hem o voditelji šaj ka del džikase averese. Te šaj o sastanak te završini pe ko vreme, o voditelji šaj ka valjani te ograničini kobor komentarija ka den pe ko jekh odlomko. Odoljese, ma holjan ja ma obeshrabrin tut ako na deja komentari odma ki početka. Ako spremijan nekobor komentarija, ka ovel tut pobuter prilike te komentarišine. Na primer, šaj te vazde to vas te čitine disavo stih. Ama, ako šaj, spremin tut te de komentarija teklje lafenca. *

18. Sose valjani te da kratka komentarija?

¹⁸ De kratka kometarija. But puča o najohrabrujuća komentarija tane kratka hem jednostavna. Odoljese, neka ovel tut  cilj te de kratka komentarija. Probin te na trajinen pobuter ando 30 sekundija (Godž. 10:19; 15:23). Ako već beršenca redovno deja komentarija ko sastankija, važno tano teklje komentarija te oven kratka hem odoljeja te de šukar primer averendže. Ako teklje komentarija trajinena nekobor minutija hem čereja lafi ando but buča, avera šaj te oven obeshrabrime hem te mislinen so našti te den komentarija sar tute. Isto adžahar, ako amare komentarija tane kratka, tegani šaj pobuter džene te učestvujinen ko sastanak. Posebno ako odgovorineja prvo ko nesavo pučibe, trudin tut toklo odgovor te ovel jednostavno hem direktno. Dži deja komentarija ma vačer sa so pisini ko odlomko. Ked ka vačeri pe koja tani i glavno misao ko odlomko, tegani šaj te komentarišine ando avera buča. (Dik o okvir „ So šaj te komentarišina?“)

19. Sar šaj o voditelji te pomožini tut, ama so valjani tu te čere?

¹⁹ Vačer e voditeljese ko kova odlomko mangeja te de komentari. Šukar tano te vačere oljese akava angljeder o sastanak. Ked ka avel o vreme te de komentari ko odova odlomko, vazde to vas sigate hem dovoljno upre te šaj o voditelj te dikhel tut.

20. Sar tane o sastankija sar jekh šukar ručko e amaljenca?

²⁰ Dikh ko sastankija sar jekh ručko teklje šukar amaljenca. Zamislin so disave teklje amala kotar dvorana planirinena te čeren skara hem pučlje tut te ane diso ando habe. So ka čere? Šaj ka ovel tut hari stres, ama sigurno ka čere disavo habe kova ka sviđini pe sarinendže. O Jehova, amaro Domačini, spremija amendže pherdi sofra šukar bučenca ko amare sastankija (Ps. 23:5; Mat. 24:45). Ov tano bahtalo ked hem amen anaja jednostavno poklon, amaro najšukar so šaj te da. Odoljese, spremin tut šukar hem komentarišin kobor šaj pobuter ko sastankija. Tegani na samo so ka ha kotar e Jehovasi sofra, nego isto adžahar ka ane poklon te deline e skupština.