1. Xana Davhida a a titwisa kuyini hi Yehovha, nakone leswo swi mu susumetele ku yentxa yini?

HOSI DAVHIDA a tsrale leswi: ‘Yehovha i nkulu, a fanela ku dzrumisiwa ngopfu’. (Ps 145:3) A a zrandzra Yehovha, nakone lizrandzru ledzro dzri mu susumetele ku dzrumisa Xikwembu Nkulukumba ‘a makazri ka nhlengeletanu’. (Ps 22:22; 40:5) Handle ka ku ganaganeka, wene wa mu zrandzra Yehovha nakone wa pfumelelana ni mazritu ya Davhida lama liki: ‘A ku khensiwe hi masiku ni masiku, Yehovha, Xikwembu Nkulukumba wa Israyele tatana wezru.’​—1Mk 29:10-13.

2. a) Hi nga swi kotisa kuyini ku dzrumisa Yehovha? b) Hi swini swihinga leswi van’we va nga naswu, nakone i yini leswi hi taka swi kambisisa?

² Namunhla, yin’we ya tindlela leti hi dzrumisaka Yehovha ha tone i ku hlamula a mintlhanganwini ya wukriste. Kambe, vamakwezru va ku hlawa va ni xihinga lexikulu. Va swi djula ku nyikela tinhlamulo a mintlhanganwini, kambe va sivela hi ku txhava. Va nga swi kotisa kuyini ku lwa ni ku txhava koloko? Handle ka leswo, hi tini tindlela leti tizraka leti nga pfunaka hine hinkwezru ku nyikela tinhlamulo leti tiyisanaka? Na hi nga sanga na hlamula swivutiso leswo, a hi zrangeni hi ku kambisisa mune wa swivangelo leswikulu leswi hi yentxaka hi hlamula a mintlhanganwini.

3-5. a) Hi lani swi tlhamuxeliwaka ha kone ka Ba-Heberu 13:15, ha yini hi nyikela tinhlamulo a mintlhanganwini? b) Xana hinkwezru hi boheka ku nyikela muxaka lowu fanaka wa tinhlamulo? Tlhamuxela.

³ Yehovha a nyike hinkwezru ndjombo ya ku mu dzrumisa. (Ps 119:108) Tinhlamulo tezru a mintlhanganwini i xiyenge xa ‘switlhavelo swezru swa lidzrumu’, nakone a nga kone a nga hi  humexelaka swone. (Dondzra Ba-Heberu 13:15, Testamente Ledrimpswha) Xana Yehovha a sindzrisa leswaku mun’wana ni mun’wana wezru a nyikela muxaka lowu fanaka wa switlhavelo, kumbe tinhlamulo ke? Im-him, a swi tanu!

⁴ Yehovha awa swi tiva leswaku a hi fani hi wuswikoti ni swiyimu, nakone a tlangela hi mbilu switlhavelo leswi hi kotaka ku mu nyika swone. Yanakanya hi muxaka wa switlhavelo leswi a a swi yamukela ka va-Israyele. Va-Israyele van’wana a va kota ku nyikela xihambana kumbe mbuti. Kambe mu-Israyele lwa nga xisiwana a a pfumeleliwa ku nyikela ‘swivambalana swibidzri, kumbe mapfinyana mabidzri ya matuva’. Nakone loko mu-Israyele a hluleka ku humexa tinyanyana tibidzri, Yehovha a a mu tsrhika a nyikela ‘swa vukhume swa efa dzra mapa laya hombe’. (Lv 5:7, 11) Mapa a ma nga duli ngopfu, kambe Yehovha a a ma tlangela magandzrelo lawo, ntsena loko ma li ‘mapa laya hombe’.

⁵ Xikwembu Nkulukumba wezru lweyi a nga ni wumbilu a titwisa xiswoswo ni namunhla. Loko hi nyikela tinhlamulo, a nga sindzrisi leswaku hinkwezru hi va ni nyiko ya ku vulavula swanga ha Apolosi kumbe ya ku kholwisana swanga ha Pawulo. (Min 18:24; 26:28) Leswi Yehovha a djulaka swone ngopfu-ngopfu i kuva hi nyikela tinhlamulo ta ku yampswa leti hi nga ti kotaka​—ndzreni ka swiyimu swezru. Dzrimuka mufelwa lwa humexiki swimalinyana swibidzri. Ka Yehovha a a zrandzreka swinene hikusa a hanane hinkwaswu swa lisima leswi a a li naswu.​—Lk 21:1-4.

6. a) Hi ku ya hi Ba-Heberu 10:24, 25, xana tinhlamulo leti hi ti twaka ti nga hi khumba hi ndlela yini? b) U nga swi kombisa kuyini leswaku wa tlangela tinhlamulo leti ku nyikaka ntamu?

⁶ Hi tiyisanana hi tinhlamulo tezru. (Dondzra Ba-Heberu 10:24, 25.) Hinkwezru ha swi tlangela ku twa tinhlamulo ta ku siyana-siyana a mintlhanganwini yezru. Hi nyonxa swinene hi ku twa xin’wanana loko xi hlamula hi mazritunyana ya ku huma mbilwini. Ha kutxeka hi ku yingela zritu dzra makwezru wa kukazri na a hlamula hi ku hiseka mayelanu ni mhaka ya kukazri leyi a ha ka ku yi tsrumbula. Nangweso ha va hlamala lava vo ko yentxa hi ‘ku tiyisela’ ku za va nyikela yangulo, hikusa hi ntumbuluku wavu va ni tingana kumbe va ha ku sungula ku dondzrela lidzrimi dzrezru. (1Te 2:2) Xana hi nga va kombisa kuyini leswaku ha ku tlangela ku tikazrata kwavu? Loko wu helile ntlhanganu hi nga va byela leswaku ha khensa tinhlamulo tavu leti nyikaka ntamu. Ndlela yin’wana hi kuva hine ha byezru hi  yangula. Lanu-ke a hi hine wuswezru hi taka khongoteliwa a mintlhanganwini yezru kambe na hine hi ta khongotela van’wana.​—Ro 1:11, 12.

7. Hi pfunekisa kuyini loko hi yangula?

⁷ Ha pfuneka loko hi yangula. (Eza 48:17) Hi ndlela yini? Xa ku sungula, loko hi kunguhata ku nyikela yangulo, hi kone hi susumetelekaka ngopfu ku lulamisela ntlhanganu ha hombe. Loko hi lulamisela ha hombe, hi kuma ku twisisa loku yentiki ka Zritu dzra Xikwembu Nkulukumba. Nakone loko hi li ni ku twisisa loku yentiki, hi kone hi kotaka ku tizrisa ku yampswa leswi hi swi dondzraka. Xa wubidzri, swi ta yentxa hi wu zrandzra ntlhanganu wa kone hikusa na hine hi ta hlengela hi ku hlaya xantxhumu. Xa wuzrazru, leswi ku yangula swi djulaka ku tikazrata, hakanyingi hi kota ku dzrimuka tinhla leti hi khaneliki ha tone hi nkama wa ku leha a ntsrhaku ka ntlhanganu wolowo.

8-9. a) Hi lani swi hlayiwaka ha kone ka Malaki 3:16, u vona leswaku Yehovha a titwisa kuyini hi tinhlamulo tezru? b) Hi xini xihinga lexi van’wana va nga ha tamaka va li naxu?

⁸ Hi nyonxisa Yehovha loko hi kombisa lipfumelo dzrezru. Hi nga da byi yehla ka leswaku Yehovha awa hi yingiseta a tlhela a tlangela swinene loko hi tikazrata akuva hi yangula a mintlhanganwini. (Dondzra Malaki 3:16.) A kombisa ku tlangela kwakwe hi ku hi tovokisa loko hi tikazrata swinene akuva hi mu nyonxisa.​—Mlk 3:10.

⁹ Nakunene, hi ni swivangelo leswi twalaka swa ku yangula a mintlhanganwini. Kambe, van’wana va nga ha txhava ku tlakula voko. Loko na wene u titwa hi ndlela yoleyo, u nga hele ntamu. A hi vonisaneni minsinya ya milawu ya Bibele ya kukazri, swikombiso swi nge swingani ni tindlela leti tizraka leti nga pfunaka hinkwezru ku dzringisa ku yangula ngopfu a mintlhanganwini.

10. a) Hi kwini ku txhava loku ku tala kwezru hi nga naku? b) Ha yini ku txhava ku yangula swi nga ha vaka xikombiso lexinene?

¹⁰ Xana u yingela mbilu yi ku gilhi minkama hinkwayu loko u pimisa ku tlakula voko akuva u yangula? Loko swi li tanu, a wu wuswaku. Ntiyiso wa mhaka hi leswaku ku tala kwezru ha txhavanyana loko hi yangula. Na u nga sanga na hlula ku txhava ka muxaka lowu, ku djuleka u tiva lexi  ku yentxaka u txhava. Wo txhava leswaku u ta dzrivala leswi u djulaka ku swi hlaya kumbe u txhava leswaku u ta phazama? U txhava leswaku yangulo yaku a yi nge ti nyonxisa ku fana ni tinhlamulo ta vambenyana? Phela-ka, ku txhava koloko ku nga va xikombiso lexinene. Ku komba leswaku wa titsrongahata nakone u vona van’wana swanga lava ku tlulaka. Yehovha awa va zrandzra lava titsrongahataka. (Ps 138:6; Flp 2:3) Kambe Yehovha a tlhela a djula leswaku u mu dzrumisa u va u tiyisa vamakwenu a mintlhanganwini. (1Te 5:11) Awa ku zrandzra nakone a ta ku nyika xixixi lexi u xi vilelaka.

11. Hi swini leswi Matsralwa ma hi dzrimuxaka swone leswi nga hi pfunaka?

¹¹ Vona swi nge swingani leswi Matsralwa ma hi dzrimuxaka swone. Bibele dzri li hinkwezru ha hoxa hi mazritu. (Yk 3:2) Yehovha a nga laviseli swone leswaku hi va lava hetisekiki, na vone vamakwezru swi tanu. (Ps 103:12-14) Vamakwezru i maxaka yezru ya moya, nakone va hi zrandzra. (Mr 10:29, 30; Yh 13:35) Va swi twisisa leswaku tinhlamulo tezru ti pfa ti nga bi kone lomu ku djulekaka.

12-13. Hi dondzra yini ka swikombiso swa Nehemiya na Yona?

¹² Pimisa hi swikombiso swa kukazri swa Bibele leswi nga ku pfunaka ku hlula ku txhava. Dzrimuka Nehemiya. A a tizrela mutini wa hosi ya ku txhavisa swinene. Nehemiya a a xukuvalile hikusa a a yingele leswaku lihlampfu ni timhazrana ta Yerusalema a ti sale hi mazrumbi. (Neh 1:1-4) Yanakanya leswi a ta ka va na a txhukise xiswone loko hosi yi mu vutise leswaku i yini a xi mu yentxa a xukuvala! Nehemiya hi ku hatlisa a hambe xikhongoto a gama a hlamula. Loko hosi yi twi nhlamulo ya kone, yi yentxe swinyingi kuva yi pfuna tiko dzra Xikwembu Nkulukumba. (Neh 2:1-8) Tlhela u yanakanya hi Yona. Loko Yehovha a mu kombele ku ya khanela ni vayaki va le Ninivha, Yona a txhave ngopfu lakakuva a tsrutsrume a ya ka ku hambana ni lomu a zrumiwiki kone. (Yn 1:1-3) Kambe hi ku pfuniwa ha Yehovha, Yona a swi kotile ku yentxa ntizro lowu a nga nyikiwa. Nakone mazritu yakwe ma va pfune swinene vhanu va Ninivha. (Yn 3:5-10) Ka xikombiso xa Nehemiya hi dondzra lisima dzra ku hamba xikhongoto na hi nga si hlamula. Kasi ka xikombiso xa Yona hi dondzra leswaku Yehovha a nga hi pfuna ku mu tizrela nambi loko hi txhava swinene. Nakone ho bula hi swi siya, i njhe dzri kone bandla dzra ku txhavisa ku fana ni vhanu va le Ninivha?

¹³ Hi tini tindlela leti tizraka leti nga ku pfunaka ku nyikela tinhlamulo leti tiyisanaka a mintlhanganwini? A hi vonisaneni maqhinga ma nge mangani.

14. Ha yini hi fanela ku lulamisela ha hombe mintlhanganu, nakone hi nga wu kumisa kuyini nkama wa ku yentxa leswo?

¹⁴ Lulamisela ntlhanganu wun’wana ni wun’wana. Loko u zranga hi ku hamba makungu u va u lulamisela ha hombe, u ta tiya ku hlamula. (Pr 21:5) Swone swa twala leswaku leswi hi swi yentxaka siku ni siku a swi fani. Eloise, mufelwa lwa nga ni ku tlula 80 wa malembe, a sungula ku  lulamisela Xidondzro xa Xihondzro Xa Ku Zrindzra na vhiki dzro ho sungula. A li: “Loko ni zranga hi ku dondzra na ke he nkama hi kone ni twaka ku nyonxisa ka mintlhanganu.” Joy, lwa tizraka siku hinkwadzru a ntizrweni wa mavoko, a tinyika nkama hi Muqgivela akuva a dondzra Xihondzro Xa Ku Zrindzra. A li: “Ni zrandzra ku famba na na ha dzrimuka hinkwaswu swi taka dondzriwa.” Ike, nkulu tlhelo phayona lwa tsrhamaka na a nge na nkama, a li: “Ka mine lexi ni yampswelaka i ku dondzra hi swiyenge swa ku gomanyana a ku fambeni ka vhiki a matsrhan’wini ya ku dondzra xiyenge xa xikulu hi nkama wun’we.”

15. U nga lulamiselisa kuyini mintlhanganu ha hombe?

¹⁵ Ku lulamisela ha hombe mintlhanganu swi yentxisiwa kuyini? Sungula xidondzro xin’wana ni xin’wana hi ku kombela kuva Yehovha a ku nyika moya wa ku xwenga. (Lk 11:13; 1Yh 5:14) Gama u heta nkamanyana na u valanga dondzro hinkwayu. Yanakanya hi nhloko-mhaka, swinhlokwana-mhaka, swifaniso ni mabokisi ya mpfuxeto. Loko kutani u dondzra yava ni yava, dondzra ku tala ka tindzrimana ta Bibele leti u nga ti kotaka. Yanakanyisisa hi leswi u swi dondzraka, na u zreyela ngopfu ndleve tinhla leti u djulaka ku yangula ka tone. Loko u lulamisela ha hombe, u ta pfunekisisa nakone swi ta ku vevukela swinene ku hlamula.​—2Ko 9:6.

16. Hi swini switizro leswi u nga naswu, nakone u swi tizrisa hi ndlela yini?

¹⁶ Loko swi koteka, tizrisa switizro swa eletroniku swa lidzrimi ledzri u dzri tivaka. Yehovha, hi kola ka nhlengeletanu yakwe, a hi nyike switizro swa eletroniku ku hi pfuna ku lulamisela mintlhanganu. A JW Library^® dzri hi pfumelela ku xixa mabuku ni marevhixta ka selulari. Xileswo, hi nga swi kota ku dondzra​—nambi a ngo va ku hlaya ntsena kumbe ku yingiseta leswi taka dondzriwa​—nkama wini na wini ni mbangu wini na wini. Van’we va tizrisa xitizro lexi ku dondzra hi nkama wa ku wisanyana na va fihlula a ntizrweni kumbe a xikole kumbe loko va li xibombeni. A Watchtower Library ni BIBLIYOTEKA DZRA INTERNET^™ dzra Watchtower swi hi nabyalisela ku setxha tinhla leti nga ka dondzro, leti hi navelaka ku ti twisisa hi wuyenti.

17. a) Ha yini swi pfuna ku lulamisela tinhlamulo ta ku talanyana? b) U dondzre yini ka vhidiyu ledzri liki Torna-te Amigo de Jeová—Prepara o Teu Comentário?

¹⁷ Loko swi koteka, lulamisela tinhlamulo ta ku talanyana ka dondzro yin’wana ni yin’wana. Hi mhaka muni? Hikusa a hi minkama hinkwayu va taka ku nyiketa loko u tlakula voko. Swi nga yentxeka van’wana na vone va tlakula voko hi nkama wun’we, kutani mufambisi wa xidondzro a nga ha hlawula mun’we wa vone. Akuva ntlhanganu wu hela ndzreni ka nkama, mufambisi a nga ha sindzriseka ku nyika vatsrongo ku hlamula ka yinhla ya kukazri. Xileswo u nga kwati kumbe u godola loko a nga ku nyiketi na xidondzro xo ho sungula. Loko u lulamisela tinhlamulo ta ku talanyana, u ta va ni mikhandlu ya ku yengeteleka ya ku hlamula na wene. Yin’we ya tinhlamulo leyi u nga yi lulamiselaka ku nga va ku dondzra ndzrimana ya Bibele. Kambe loko u swi  kota, tlhela u tilulamisela akuva u yangula hi ku tizrisa mazritu yaku. *

18. Ha yini hi fanela ku gomisa loko hi hlamula?

¹⁸ Nyikela tinhlamulo ta ku goma. Hakanyingi, tinhlamulo leti kutxaka swinene hi leti gomiki ni leti kongomiki. Xileswo lwela ku hlamula hi ku gomisa. Dzringisa ku hlamula hi 30 wa masegundu. (Pr 10:19; 15:23) Loko u ni malembe na u hlamula a mintlhanganwini, u ni ntsrhwalu lowukulu wa mfanelo​—ku nga ku beka xikombiso lexinene hi ku nyikela tinhlamulo ta ku goma. Loko u nyikela tinhlamulo ta ku leha leti tekaka maminutunyana, vambeni va ta txhava hi ku pimisa leswaku va nge ti swi kota ku hlamula ku fana na wene. Handle ka leswo, tinhlamulo ta ku goma ti nyika nkama vhanu va ku tala kuva va hlaya xantxhumu a ntlhanganwini. Ngopfu-ngopfu loko u li wene u zrangaka ku hlamula, nyikela nhlamulo ya ku nabyala ni ya ku kongoma. U nga dzringeti ku heta tinhla hinkwatu ta yava. Loko kutani ku buliwile hi mongo wa yava, u nga swi kota ku yengetela tinhla tin’wana.​—Vona bokisi ledzri liki “ Ni Nga Hlamula Kwini”.

19. Xana mufambisi wa xidondzro a nga ku pfunisa kuyini, kambe i mpswini leswi u fanelaka ku swi yentxa?

¹⁹ Tivisa mufambisi wa xidondzro leswaku u navela ku yangula ka yava dzra kukazri. Loko u hlawula ku yentxa tanu, ku djuleka u byela mufambisi wa xidondzro ha hombe na ku nga si na sungula ntlhanganu. Loko ku tlhasa nkama wa ku hlamula ka yava dzra kone, kahlula u tlakula voko u va u dzri tlakuxeta swinene akuva mufambisi a ta ku vona.

20. Xana ntlhanganu wa bandla wu fanisa kuyini ni swakuda leswi hi daka ni vanghanu?

²⁰ Vona mintlhanganu ya wukriste ku fana ni swakuda swa ku swi da ni vanghanu. A hi nge vanghanu van’wana a bandleni va djula ku hungata na wene, va ku kombela ku lulamiselanyana xa ku ntxakunha. A wu ta ku yini ke? Kumbexana u nga talatalekanyana, kambe ha dumba leswaku a wu ta tikazratela ku buya ni xantxhumu lexi hinkwavu va taka xi zrandzra. Yehovha, Lweyi hi nga vayeni vakwe, a lulamisele tafula dzra ku tala hi mintxhumu leyinene a mintlhanganwini yezru. (Ps 23:5; Mt 24:45) Nakone a nyonxa ngopfu loko hi buya ni xihanano xa xitsrongo kambe na xi li xone xa ku yampswa xa kone. Kutani ke, lulamisela ha hombe u va u yangula hi ku ntsrhunxeka swinene. Lanu-ke a wu nge ti da tafuleni dzra Yehovha ntsena kambe na wene u ta buyisa xihanano xa ku nyika van’wana a bandleni.