1. Unfa Dafiti bi ta si Jehovah, nöö andi di soni dë bi mbei a bi ta kë du?

KÖNU DAFITI bi sikifi taa: „Jehovah bigi, nöö hën wanwan fiti gafa” (Ps. 145:3). A bi lobi Jehovah, nöö di soni dë bi ta mbei a bi ta gafëën „a dee sëmbë dee ko makandi mindi” (Ps. 22:22; 40:5). Wë iseei lobi Jehovah, nöö i piki ku dee soni dee Dafiti bi taki. A bi taki taa: „Jehovah o, di Gadu u Isaëli, u tata, sëmbë musu gafa i u teego”.​—1 Klon. 29:10-13.

2. (a) Unfa u sa ta gafa Jehovah? (b) Andi ta taanga da so fuu, nöö andi woo luku a di woto aki?

² Wan fasi fa u sa ta gafa Jehovah a di ten aki, hën da te u ta da piki a dee komakandi. Ma di soni aki ta dë wan gaan taanga soni da sömëni baaa ku sisa. De ta kë da piki te de dë a komakandi, ma de ta fëëë. Andi sa heepi de u de an ta fëëë möön? Söseei andi da wantu soni di sa heepi hiniwan fuu fuu sa ta da piki di ta da wotowan taanga? Ma ufö u piki dee hakisi aki, boo luku fö fanöudu soni di mbei u musu ta da piki te u dë a komakandi.

3-5. (a) Faandi mbei u ta da piki a dee komakandi te u luku di soni di sikifi a Hebelejën 13:15? (b) Hii u tuu musu u ta da piki a di wan seei fasi ö? Konda wan woto.

³ Jehovah da hii u tuu di gaandi fuu sa ta gafëën (Ps. 119:108). Dee piki dee u ta da a dee komakandi dë kuma wan „peesenti” di u ta tja go da Gadu, nöö na wan sëmbë sa du ën da u. (Lesi Hebelejën 13:15.) A dë sö taa Jehovah kë taa hii u tuu musu tja di wan seei peesenti go dëën u, nasö taa hii u tuu musu ta da piki a di wan seei fasi ö? Wë nönö!

 ⁴ Jehovah sabi taa di fasi fa hiniwan fuu sa du soni tooka, söseei a sabi taa di fasi fa di libi fuu dë seei tooka tu. Fëën mbei a ta tei ën u bigi seei taa u ta tja peesenti go dëën kumafa u sa. Pakisei dee peesenti di dee Isaëli sëmbë bi ta tja go Jehovah. So u dee Isaëli sëmbë bi ta tja wan njönku sikapu nasö wan kaabita go dëën kuma peesenti. Ma wan Isaëli sëmbë di bi pooti bi sa tja „tu pomba nasö tu njönku bakaa pomba” go dëën. Ma ee tu fou seei wan Isaëli sëmbë an bi sa tja kuma peesenti go da Gadu, tökuseei Jehovah bi ta tei ën u bigi te di sëmbë aki bi tja wan „komiki ku boon” go dëën kuma peesenti (Leif. 5:7, 11). Boon an bi dë wan dii soni, ma tökuseei Jehovah bi ta tei ën u bigi solanga di sëmbë bi tja di möön bunu „boon” go dëën.

⁵ Di wan seei fasi di lobihati Gadu fuu ta si soni a di ten aki jeti. Te u ta da piki a dee komakandi, nöö Jehovah an ta dë ku di mëni taa hii u tuu musu sa fan kumafa Apolo ku Paulosu bi ta fan (Tjab. 18:24; 26:28). Di soni di Jehovah kë, hën da fuu da di möön bunu piki di u sa da. Na fëëkëtë taa di mujëë di manu fëën bi dëdë bi buta tu köpö sensi nöö a di möni këdë. Jehovah bi tei di soni di a bi du aki u bigi seei, u di a bi da andi a bi sa da.​—Luk. 21:1-4.

6. (a) Unfa u ta fii te wotowan ta da piki, te u luku di soni di sikifi a Hebelejën 10:24, 25? (b) Unfa i sa lei taa i tei dee piki dee wotowan ta da, di ta da i taanga, u bigi?

⁶ U ta da useei taanga te u ta da piki. (Lesi Hebelejën 10:24, 25.) Hii u tuu lobi ën te u ta jei peipei sëmbë ta da piki a dee komakandi fuu. U ta fii bunu seei te wan njönkuwan da wan piki kumafa hënseei fusutëën. A ta da u taanga seei te u jei wan sëmbë da wan piki u wan njunjun soni di a lei. U ta tei ën u bigi seei te dee sëmbë dee ta sen nasö dee sëmbë dee ta lei di töngö fuu ta tai „hati” u da wan piki (1 Tes. 2:2). Unfa u sa lei taa u ta tei di möiti di de ta mbei u bigi? Wë u sa da de tangi u di piki di de da, baka di komakandi. Wan woto soni di u sa du, hën da useei musu ta da piki tu. Nöö an o dë taa u wanwan nöö ta feni taanga a dee piki di wotowan ta da, ma useei o ta da wotowan taanga tu.​—Lom. 1:11, 12.

7. Un wini useei ta feni te u ta da piki?

⁷ Useei ta feni wini te u ta da piki (Jes. 48:17). Na un futu? Di fosu soni, hën da te u buta taa woo da wan piki a komakandi, nöö di soni dë ta da u taanga fuu seeka useei bunu  da di komakandi. Te u ta seeka bunu da di komakandi, nöö u ta ko fusutan di Wöutu u Gadu möön bunu. Möön u ko ta fusutan di Wöutu u Gadu, möön woo sa du dee soni dee u ta lei. Di u tu soni hën da, woo möön lobi dee komakandi u di useei ta da piki tu. Di u dii soni hën da, u di u musu mbei möiti fuu da wan piki, mbei wa o fëëkëtë dee soni dee u bi taki hesihesi.

8, 9. (a) Unfa i si kuma Jehovah ta fii te u ta da piki, te u luku di tëkisi u Maleaki 3:16? (b) Andi sa ta taanga da so sëmbë jeti?

⁸ Jehovah ta wai ku u te u ta konda soni u di biibi fuu. U sa dë seiki taa Jehovah ta haika u, söseei taa a ta tei ën u bigi te u ta mbei möiti fuu ta da piki te u dë a dee komakandi. (Lesi Maleaki 3:16.) A ta lei u taa a ta wai ku u u di a ta mbei u feni gaan bunu, te u ta mbei möiti fuu du soni di ta kai ku ën.​—Mal. 3:10.

⁹ A dë gbelingbelin u si taa a bunu fuu ta da piki a dee komakandi. Ma so sëmbë sa ta fëëë u de hopo maun u de da piki. Ee iseei ta fëëë tu, nöö na lasi hati. Boo buta pakisei a wantu mama wëti u Bëibel ku woto soni, di sa heepi hii u tuu fuu sa ta da möön hia piki te u dë a komakandi.

10. (a) Faandi mbei sömëni fuu ta fëëë u da piki te u dë a dee komakandi? (b) Ee i ta fëëë u da piki, nöö un bunu fasi a sa dë taa i abi?

¹⁰ Senuwe ta naki i te i pakisei fii hopo maun u da wan piki ö? Ee sö a ta miti i, nöö hoi a pakisei taa na i wanwan a ta miti. Gaansë fuu ta fëëë pikisö te u musu da wan piki. Di soni di sa heepi i fu ja ta fëëë sö möön, hën da i musu ko sabi andi ta mbei i ta fëëë. I ta fëëë taa joo fëëkëtë dee soni dee i bi kë taki ö, nasö taa di piki fii an o bunu ö? I ta si kuma di piki di joo da an o bunu kuma di dee wotowan ta da u? Wë an föutu te i ta fëëë u dee soni aki hedi. Dee soni aki ta lei taa i abi sakafasi, söseei de ta lei taa i ta si wotowan hei möön i. Jehovah lobi sëmbë di abi sakafasi (Ps. 138:6; Fil. 2:3). Ma Jehovah kë fii ta gafëën tu, söseei a kë fii ta da dee baaa ku dee sisa fii taanga te i dë a komakandi  (1 Tes. 5:11). A lobi i, nöö a o da i di kaakiti di i abi fanöudu fii sa ta da piki.

11. Un tëkisi u Bëibel sa da u taanga fuu ta da piki?

¹¹ Boo buta pakisei a wantu tëkisi u Bëibel. Di Bëibel ta taki taa hii u tuu ta mbei föutu te u ta fan. So juu a ta dë di soni di u ta taki, nasö di fasi fa u ta taki ën (Jak. 3:2). Jehovah sabi taa so juu woo ta mbei föutu, söseei dee baaa ku dee sisa fuu seei sabi taa woo ta mbei föutu tu (Ps. 103:12-14). U ku de da famii, nöö de lobi u (Maik. 10:29, 30; Joh. 13:35). De sabi taa so juu a sa pasa taa u taki wan soni, hii fa na di soni dë u bi kë taki.

12, 13. Andi u ta lei a di woto u Nehemia ku di woto u Jona?

¹² Pakisei wantu woto u Bëibel di sa heepi i fu ja ta fëëë sö möön. Pakisei Nehemia. A bi ta wooko a wan könu wosu, nöö di könu dë bi abi makiti seei. Nehemia bi ta tjali u di a bi jei taa dee peni ku dee gaan döö u Jelusalen bi booko kaba a sösö (Neh. 1:1-4). Pakisei unfa a bi ta fëëë di di könu bi hakisi ën faa konda dëën faandi mbei a bi ta tjali. Wantewante dë Nehemia begi, hën a piki di könu. Hën di könu du sömëni soni u heepi dee sëmbë u Gadu (Neh. 2:1-8). Pakisei di woto u Jona tu. Di Jehovah hakisi ën faa go fan ku dee sëmbë u Ninifei, hën Jona fëëë tee taa a fusi go a wan woto kamian (Jona 1:1-3). Ma u di Jehovah bi heepi ën, mbei te u kaba fëën a bi sa go peleiki a di foto Ninifei. Nöö dee soni dee a bi taki bi tja wini ko da dee sëmbë u Ninifei (Jona 3:5-10). A di woto u Nehemia u ta lei taa a dë fanöudu fuu begi bifö u da wan piki. Nöö a di woto u Jona u ta lei taa Jehovah sa heepi u fuu dini ën aluwasi u ta fëëë u du so soni a di dini fëën. I si kuma di da di u musu da piki a komakandi taanga möön di paaja di Jona bi musu paaja di kuutu bosikopu a Ninifei ö?

¹³ Andi sa heepi i fii ta da piki a dee komakandi? Boo luku wantu soni di sa heepi u.

14. Faandi mbei u musu seeka useei bunu da dee komakandi, nöö na un ten u sa du di soni aki?

¹⁴ Seeka iseei da hiniwan u dee komakandi. Te i ta seeka iseei bunu da dee komakandi, nöö a ta heepi i fii sabi andi i musu taki te joo da wan piki (Nöng. 21:5). An dë u taki taa hiniwan fuu ta seeka hënseei a peipei daka da dee komakandi. Wan sisa de kai Eloise, di manu fëën dëdë, di pasa 80 jaa kaa, ta bigi seeka di Hei Wakitimawosu a bigi u di wiki. Di sisa aki ta taki taa: „Di komakandi ta möön suti da mi te mi ta seeka miseei sömëni ten a fesi.” Wan woto sisa de kai Joy, di ta wooko hiniwan daka a di wiki, ta seeka di Hei Wakitimawosu fëën a sata. Di sisa aki ta taki taa: „Di soni dë ta heepi mi u ma fëëkëtë dee soni dee mi lei.” Wan baaa de kai Ike, di dë wan gaanwomi, söseei di ta du di pioniliwooko ta taki taa: „Mi ta si kuma a ta möön bunu da mi te mi ta seeka di Hei Wakitimawosu pikipiki a di wiki dendu u te mi kaba, ka u mi sindo wantu juu longi u mi seeka ën”.

15. Andi ku andi i sa du fii sa seeka iseei bunu da wan komakandi?

 ¹⁵ Andi ku andi i musu du fii sa seeka iseei bunu da dee komakandi? Ufö i bigi seeka iseei da dee komakandi, nöö a bunu fii hakisi Jehovah faa da i di santa jeje fëën (Luk. 11:13; 1 Joh. 5:14). Baka di dë, nöö luku fuun soni di woto ta taki. Luku di në u di woto, dee hedi pakisei, dee peentje, ku hii dee pisi dee nama ku di woto. Te i ta seeka wan palaklafu, nöö ee a sa, nöö lesi hii dee tëkisi dee sikifi a di palaklafu. Pakisei fundu u dee soni dee i ta lesi, möönmöön a dee pisi dee i bi o kë da piki. Möön i seeka iseei bunu, möön joo feni wini u dee soni dee i ta lei a di woto, söseei an o ta taanga da i sö möön fii da wan piki.​—2 Kol. 9:6.

16. Ku undi u dee soni di di ölganisaasi fuu da u i ta wooko, nöö unfa i ta wooko ku ën?

¹⁶ Ee a sa, nöö wooko ku dee soni dee i sa download buta a wan tëlëfön nasö a wan tablet dee dë a wan töngö di i ta fusutan. Jehovah seeka soni sö taa di ölganisaasi fëën sa da u soni di u sa download buta a di tëlëfön nasö a di tablet fuu, di sa heepi u fuu seeka useei bunu da dee komakandi. Di JW Library^® app ta mbei u sa download buku a di tëlëfön nasö a di tablet fuu. Di soni aki mbei u sa ta lei soni u Bëibel hii juu aluwasi ka u dë. Söseei u sa haika dee woto. So sëmbë ta wooko ku di app aki u lei soni u Bëibel a böö juu te de dë a wooko nasö a siköö. Nöö so sëmbë ta du ën te de nango a wan kamian. U sa wooko ku di Watchtower Library ku di Watchtower ONLINE LIBRARY^™ te u kë öndösuku soni u di woto di u ta seeka.

17. (a) Faandi mbei a bunu fii seeka iseei fii sa da möön leki wan piki? (b) Andi i lei u di fëlön Ko toon Jehovah mati​—Seeka di piki di i kë da?

¹⁷ Ee a sa, nöö seeka iseei fii sa da möön leki wan piki. Faandi mbei? Wë u di na hii juu te i hopo i maun di baaa o sa da i wan piki. Kandë woto sëmbë o hopo maun a di wan seei ten tu, nöö di baaa sa mbei wan woto baaa nasö wan woto sisa da di piki. U di di baaa an kë pasa di juu di de dëën fa hoi di Hei Wakitimawosu-lei, mbei an o sa da hia sëmbë wan piki a wan palaklafu. Fëën mbei hati fii an musu boonu te an da i wan piki wantewante, söseei ja musu lasi hati tu. Ee i bi seeka iseei fii sa da möön leki wan piki, nöö joo feni möön okasi fii sa da piki. I sa lesi wan Bëibel tëkisi tu. Ma ee a sa, nöö mbei möiti fii da wan piki di ta kumutu a i hati. *

18. Faandi mbei dee piki fii an musu ta langa poi?

¹⁸ I musu da piki di an langa poi. Sëmbë ta feni taanga a dee piki fuu möön gaanfa te dee piki fuu an langa, söseei te de an taanga u fusutan.  Fëën mbei i musu mbei möiti fii da piki di an langa poi. Mbei möiti fii sa da di piki fii a 30 sekonde dendu (Nöng. 10:19; 15:23). Ee sömëni jaa kaa i guwenti u da piki, nöö a dë fanöudu fii dë wan sëmbë di wotowan sa djeesi, u di dee piki fii an o ta langa. Ee dee piki fii ta langa poi, söseei ee i ta taki u sömëni soni a di piki fii, nöö dee woto baaa nasö sisa sa ta fëëë u da wan piki. Kandë de o ta fii kuma de an o sa ta da piki kumafa i ta da. Te dee piki fii an ta langa poi, nöö möön hia baaa ku sisa sa ta da piki. Ee ju da di fosu sëmbë di o da piki a wan hakisi di de buta, nöö da di piki fii kölö sö, söseei a wan fasi di an taanga u fusutan. Na taki u hii soni di dë a di palaklafu. Te de taki u dee möön fanöudu soni kaa, nöö i sa taki u wan woto soni.​—Luku di pisi „ Un piki mi sa da?”

19. Unfa di baaa di ta tei fesi a di Hei Wakitimawosu-lei sa heepi i fii da wan piki, ma andi iseei musu du tu?

¹⁹ Be di baaa di ta tei fesi a di Hei Wakitimawosu-lei sabi taa i kë da wan piki a wan u dee palaklafu. Ee i kë du di soni aki, nöö i musu go piki di baaa di o tei fesi a di Hei Wakitimawosu-lei, bifö di komakandi bigi. Te di juu dou fii da di piki fii, nöö hopo i maun a liba wantewante sö taa di baaa sa si i.

20. Faandi mbei u sa taki taa dee komakandi dë kuma wan njanjan di u ta njan makandi ku dee mati fuu?

²⁰ I musu ta si dee komakandi kuma wan njanjan di i ta njan makandi ku wanlö mati fii. Pakisei taa wanlö baaa ku sisa u di kemeente fii kai i fii ko njan wan soni makandi ku de, nöö de bi hakisi i fii tja wan piki soni ko tu. Andi i bi o du? Kandë i bi o ta booko i hedi pikisö, ma i bi o mbei möiti u seeka wan soni di hii sëmbë o lobi. Jehovah dë kuma wan sëmbë di ta kai u fuu ko njan makandi ku ën. Dee komakandi dë kuma njanjan di Jehovah buta a tafa da u fuu njan (Ps. 23:5; Mat. 24:45). Nöö Jehovah ta wai te useei ta tja wan piki soni ko tu, ma a musu dë di möön bunu soni di u sa dëën. Fëën mbei a bunu fii seeka iseei bunu da dee komakandi, nöö da hia piki kumafa i sa. Te i ta du sö, nöö na njan nöö joo ta njan a di tafa di Jehovah seeka da i, ma joo sa tja wan soni ko tu u paati da di kemeente.