1. Fa a matifasi fu David nanga Yehovah ben de èn san David ben e du?

KOWNU DAVID ben skrifi: „Yehovah bigi èn a musu kisi furu grani” (Ps. 145:3). A ben lobi Yehovah èn dati meki a ben prèise en „na mindri den sma di kon makandra” (Ps. 22:22; 40:5). Wi de seiker taki yu lobi Yehovah tu èn yu e agri nanga David di ben prèise Yehovah nanga den wortu disi: „Blesi fu yu Yehovah, a Gado fu Israel, wi tata, fu ala ten, iya, fu têgo.”​—1 Kron. 29:10-13.

2. (a) Fa wi kan prèise Yehovah? (b) Sortu problema furu brada nanga sisa abi èn san wi o luku na ini na artikel disi?

² Wan fasi fa wi kan prèise Yehovah na ini a ten disi na te wi e gi piki na den Kresten konmakandra. Ma furu brada nanga sisa feni en muilek fu gi piki. Den wani gi piki na den konmakandra, ma den e frede. San kan yepi den fu no frede moro? Èn san kan yepi wi alamala fu gi piki na den konmakandra so taki wi kan gi makandra deki-ati? Fosi wi piki den aksi disi, wi o go luku fo prenspari reide fu san ede wi e gi piki na den konmakandra.

3-5. (a) Soleki fa Hebrewsma 13:15 e sori, dan fu san ede wi e gi piki na den konmakandra? (b) Fu san ede wi alamala no abi fu gi den srefi sortu piki? Fruklari dati.

³ Yehovah gi wi alamala a grani fu prèise en (Ps. 119:108). Den piki di wi e gi na den konmakandra na wan ’ofrandi di wi e tyari nanga wi mofo’. Nowan sma kan tyari na ofrandi dati gi wi. (Leisi Hebrewsma 13:15.) Ma a de so taki Yehovah e fruwakti taki wi alamala e tyari den  srefi sortu ofrandi? A wani taki wi alamala e gi den srefi sortu piki? Nôno, a no dati a wani!

⁴ Yehovah sabi taki wi e difrenti fu makandra èn wi situwâsi a no a srefi. A e warderi iniwan ofrandi di wi e tyari gi en. Prakseri sortu ofrandi den Israelsma ben mag tyari gi en. Son Israelsma ben man tyari wan skapu noso wan bokoboko. Ma den pôti Israelsma sma ben kan tyari „tu stondoifi noso tu yongu osodoifi”. Efu wan Israelsma no ben abi nofo moni fu bai tu fowru, dan a ben kan tyari „wán koba fini blon” leki ofrandi gi Yehovah (Lef. 5:7, 11). Blon no ben diri so, ma toku Yehovah ben feni en bun taki sma ben tyari en leki ofrandi solanga a ben de „fini blon” di ben de a moro bunwan.

⁵ Na so Gado e denki te now ete. Te wi e gi piki, dan a no e fruwakti taki wi alamala musu man taki bun neleki Apolos noso taki wi man overtoigi sma neleki Paulus (Tori 18:24; 26:28). San Yehovah e fruwakti na taki wi e du ala san wi man fu gi piki. Prakseri na uma di ben gi den tu sensi di no ben warti furu. Yehovah ben lobi na uma disi fu di a ben gi ala san a man.​—Luk. 21:1-4.

6. (a) Soleki fa Hebrewsma 10:24, 25 e sori, dan fa den piki di wi e yere na den konmakandra e gi wi deki-ati? (b) Fa yu kan sori warderi gi den piki di trawan e gi?

⁶ Wi e gi makandra deki-ati te wi e gi piki. (Leisi Hebrewsma 10:24, 25.) Wi alamala lobi en te wi e yere difrenti piki na den konmakandra. Wi e prisiri te wi e yere den yonguwan e gi piki awinsi na wan pikin sani nomo den e taki. Wi e kisi deki-ati te wi e yere fa wan sma e fruteri fayafaya sortu nyun sani a leri. Èn wi feni en wan moi sani te wi e si taki wan sma e teki a „deki-ati” fu gi piki aladi a e syen noso aladi a no sabi taki a tongo so bun ete (1 Tes. 2:2). Fa wi kan sori warderi gi a muiti di trawan e du fu gi piki? Baka a konmakandra wi kan taki den tangi gi den piki fu den. Boiti dati wi srefi kan gi piki. Te wi e du dati, dan wi e gi trawan deki-ati tu.​—Rom. 1:11, 12.

7. Sortu wini wi e kisi te wi e gi piki?

⁷ Wisrefi e kisi wini te wi e gi piki (Yes. 48:17). Fa so? A fosi sani na taki efu  wi wani gi piki, dan wi musu meki muiti fu sreka wisrefi bun gi den konmakandra. Te wi e du dati, dan wi e kon frustan Gado Wortu moro bun. O moro wi e frustan Gado Wortu, o moro a o makriki gi wi fu du san wi leri. A di fu tu sani na taki wi o firi moro bun te wi de na den konmakandra fu di wi e teki prati na den. A di fu dri sani na taki te wi e du muiti fu sreka wan piki, dan wi no o frigiti den sani di wi taki.

8-9. (a) Soleki fa Maleaki 3:16 e sori, dan fa Yehovah feni en te wi e gi piki na den konmakandra? (b) San son sma e frede fu du ete?

⁸ Yehovah e prisiri te wi e taki fu a bribi fu wi. Wi kan de seiker taki Yehovah e arki wi èn taki a e warderi a muiti di wi e du fu gi piki. (Leisi Maleaki 3:16.) Yehovah e blesi wi te a e si a muiti di wi e du fu gi piki.​—Mal. 3:10.

⁹ Sobun, wi abi bun reide fu gi piki na den konmakandra. Toku son sma e frede ete fu sutu den finga go na loktu. Efu yu e frede, dan no lasi-ati. Wi o taki fu wan tu Bijbeltekst, wan tu sma na ini Bijbel èn wan tu tra sani di wi alamala kan du fu gi moro piki na den konmakandra.

10. (a) San furu fu wi e frede fu du? (b) Efu yu e frede pikinso, dan san dati e sori fu yu?

¹⁰ Yu bere e koti te yu wani sutu yu finga go na loktu fu gi wan piki? Efu dati de so, dan a no yu wawan e firi so. Furu fu wi e senwe pikinso te wi musu gi wan piki. Fu no senwe tumusi furu moro, yu musu kon sabi fosi fu san ede yu e frede fu gi piki. Yu frede taki yu o frigiti san yu wani taki, noso taki yu o taki wan fowtu sani? Yu e broko yu ede taki den piki fu yu no o bun leki di fu trawan? A bun taki yu e broko yu ede nanga den sani disi. Disi e sori taki yu abi sakafasi èn taki yu e si trawan moro hei leki yusrefi. Yehovah lobi sma di abi sakafasi (Ps. 138:6; Fil. 2:3). Ma Yehovah wani tu taki yu prèise en èn taki yu gi yu brada nanga sisa deki-ati na den konmakandra  (1 Tes. 5:11). A lobi yu èn a o gi yu a deki-ati di yu abi fanowdu fu du dati.

11. Sortu Bijbel rai kan yepi wi?

¹¹ Meki wi luku wan tu Bijbel rai. Bijbel e taki dati wi alamala e sondu nanga wi mofo. A kan de den sani di wi e taki noso a fasi fa wi e taki (Yak. 3:2). Yehovah no e fruwakti taki wi no o meki fowtu èn den brada nanga sisa no e fruwakti dati tu (Ps. 103:12-14). Den na wi famiri èn den lobi wi (Mark. 10:29, 30; Yoh. 13:35). Den e frustan taki son leisi wi o misi te wi e gi piki.

12-13. San wi e leri fu na eksempre fu Nehemia nanga Yona?

¹² Wi o taki fu wan tu Bijbel eksempre di kan yepi yu fu no frede moro. Prakseri Nehemia. A ben e wroko na ini a palèisi fu wan makti kownu. Nehemia ben e sari fu di a ben yere taki den skotu nanga den portu fu Yerusalem ben broko (Neh. 1:1-4). Kande Nehemia bere koti en di a kownu aksi en fu san ede a e sari so. Ma wantewante Nehemia begi èn baka dati a piki a kownu. A kownu arki en èn a du furu fu yepi Gado pipel (Neh. 2:1-8). Prakseri Yona tu. Di Yehovah ben aksi en fu go taki nanga den sma fu Ninefei, Yona ben frede so te taki a lowe go na wan tra sei (Yona 1:1-3). Ma Yehovah yepi Yona èn te fu kaba a go preiki gi den Ninefeisma. Den sani di a taigi den sma disi yepi den fu sori berow (Yona 3:5-10). Na eksempre fu Nehemia e leri wi taki a prenspari fu begi fosi wi gi wan piki. A tori fu Yona e leri wi taki Yehovah kan yepi wi fu dini en, awinsi san e meki wi frede. A no de fu taki dati den sma fu yu gemeente no ogri leki den Ninefeisma.

¹³ Sortu tra sani kan yepi yu fu gi piki di e gi trawan deki-ati? Meki wi go luku wan tu.

14. Fu san ede wi musu sreka wisrefi bun gi den konmakandra, èn o ten wi kan du dati?

¹⁴ Sreka yusrefi gi ibri konmakandra. Tu yu e sreka yusrefi na fesi, dan yu no o frede so furu fu gi piki (Odo 21:5). A no de fu taki dati a situwâsi fu ala sma e difrenti. Elise, * wan sisa di masra dede kaba èn di pasa 80 yari, e bigin sreka ensrefi gi A Waktitoren-studie na a bigin fu a wiki. A e taki: „Mi e leri furu fu den konmakandra te mi e sreka misrefi wan tu dei na fesi.” Joyce, di e wroko feifi dei na ini a wiki e sreka en Waktitoren tapu satra. A e taki: „Efu mi sreka misrefi tumusi langa na fesi, dan mi o frigiti san mi studeri.” Maikel, wan owruman di abi furu fu du èn di e pionier tu e taki: „Mi si taki a moro bun gi mi fu meki ten fu studeri syatu ibri dei, na presi fu studeri ala sani na ini wán leisi.”

15. Fa yu kan sreka yusrefi bun gi den konmakandra?

 ¹⁵ Fa wi kan sreka wisrefi bun gi den konmakandra? A fosi sani di yu musu du, na fu begi Yehovah fu gi yu en santa yeye (Luk. 11:13; 1 Yoh. 5:14). Baka dati, teki wan tu miniti fu luku a tori di yu o studeri. Luku a nen fu na artikel, den edeprakseri, den prenki, den faki nanga den aksi fu luku baka san yu leri. Te yu e studeri den paragraaf, dan pruberi fu leisi furu fu den tekst di kari na ini den paragraaf. Denki dipi fu san yu e studeri èn poti moro prakseri na den paragraaf pe yu wani gi piki. O moro yu e sreka yusrefi bun, o moro yu o kisi wini fu den konmakandra èn a o moro makriki gi yu fu gi piki.​—2 Kor. 9:6.

16. Sortu sani wi abi di kan yepi wi fu studeri èn fa yu e gebroiki den?

¹⁶ Efu a kan, yu kan gebroiki na app, a website, nanga den library fu wi efu den de na ini yu tongo. Yehovah gi wi den sani disi so taki wi kan sreka gi den konmakandra. Efu wi abi a JW Library^® app, dan wi kan download den buku nanga tijdschrift fu wi na tapu wi tablet noso telefon. Te wi du dati, dan wi kan leisi noso arki den na iniwan ten noso iniwan presi pe wi de. Son sma e gebroiki a JW Library^® app fu studeri te den abi pauze na skoro, na wrokope noso te den de na pasi e go na wan presi. A Sranantongo Watchtower Library na tapu DVD nanga a Waktitoren LIBRARY TAPU INTERNET^™, kan meki en makriki gi wi fu ondrosuku sani moro fini te wi e studeri.

17. (a) Fu san ede a bun fu sreka yusrefi fu gi moro leki wán piki? (b) San yu leri fu a felem Tron wan mati fu Yehovah​—Sreka yusrefi fu gi piki?

¹⁷ Efu a kan, dan sreka yusrefi fu gi moro leki wán piki. Fu san ede? Fu di a no ala ten te yu sutu yu finga, yu o feni wan piki. Kande trawan sutu den finga tu èn a brada di e hori a studie kan gi den a piki. A kan tu taki a brada di e hori a studie no o meki tumusi furu sma gi piki tapu wan paragraaf, fu di a wani sorgu taki a konmakandra kaba biten. Sobun, no mandi èn no lasi-ati efu a no gi yu wan piki na a bigin fu a studie. Efu yu sreka yusrefi fu gi moro leki wán piki, dan yu o abi moro okasi fu gi piki. Yu kan sreka yusrefi fu leisi wan tekst. Ma efu a kan, sreka yusrefi tu fu gi wan piki nanga yu eigi wortu. *

18. Fu san ede yu musu gi syatu piki?

¹⁸ Gi syatu piki. Nofo tron wi e kisi moro deki-ati te wan sma e gi wan syatu piki di makelek fu frustan. Sobun, meki  muiti fu gi syatu piki. Pruberi fu no pasa 30 sekonde (Odo 10:19; 15:23). Efu yu e gi piki na den konmakandra omeni yari kaba, dan trawan kan leri furu fu yu. Yu kan de wan bun eksempre gi den te yu e gi syatu piki. Efu yu e gi langa piki èn yu e taki fu tumusi furu sani, dan trawan kan denki taki den no o man gi piki fu di den no man taki so bun leki yu. Boiti dati te yu e gi syatu piki, dan moro sma kan kisi na okasi fu gi piki. Spesrutu efu yu e gi a fosi piki fu wan paragraaf, dan a prenspari fu gi wan syatu piki di e piki na aksi wantewante. No suku fu taki fu ala den sani na ini a paragraaf. Baka te a prenspari penti fu a paragraaf kon na krin, yu kan taki fu tra moi sani di yu feni.​—Luku a faki „ Sortu piki mi kan gi?”

19. Fa a brada di e hori a studie kan yepi yu, ma san yu musu du?

¹⁹ Taigi a brada di e hori a studie na sortu paragraaf yu wani gi piki. Efu yu wani du disi, dan yu musu go na a brada di e hori a studie, fosi a konmakandra bigin. Te a doro a paragraaf di yu wani gi piki, dan wantewante yu musu sutu yu finga hei nofo so taki a brada kan si yu.

20. Fa wi musu si den gemeente konmakandra èn fu san ede?

²⁰ Te yu e go na den konmakandra, dan yu musu si en leki yu e go nyan nanga wan tu mati. Kon meki wi taki dati wan tu mati na ini a gemeente e orga wan pikin fesa èn den e aksi yu fu tyari wan pikin sani tu fu nyan. San yu ben o du? Kande yu ben o broko yu ede nanga san yu musu tyari, ma seiker yu ben o meki muiti fu tyari wan sani di ala sma lobi. Yehovah, a sma di gi yu wan kari fu kon na den konmakandra, sreka wan tafra gi yu nanga furu bun nyanyan (Ps. 23:5; Mat. 24:45). A breiti te wi e tyari wan pikin sani kon, solanga a de a moro bun sani di wi abi. Sobun, sreka yusrefi bun èn gi so furu piki leki yu man. Te yu e du dati, dan yu no e go nyan nomo na a tafra fu Yehovah, ma yusrefi e tyari wan sani fu prati nanga a gemeente.