1. Davide bekativa njani ngaJehova, futsi loko kwamkhutsata kutsi enteni?

INKHOSI DAVIDE yatsi: “Mkhulu Simakadze, ufanele kudvunyiswa kakhulu.” (Hla. 145:3) Davide bekamtsandza Jehova futsi loko kwamkhutsata kutsi amdvumise “emkhatsini welibandla.” (Hla. 22:22; 40:5) Asingabati kutsi nawe uyamtsandza Jehova futsi uyavumelana nemavi aDavide latsi: “Ludvumo alube kuwe, Simakadze, Nkulunkulu wababe wetfu Israyeli, kusukela phakadze kuze kube phakadze.”—1 Khr. 29:10-13.

2. (a) Singamdvumisa njani Jehova? (b) Ngutiphi tinkinga labanye labahlangabetana nato, futsi sitawucoca ngani kulesihloko?

² Lamuhla, lenye indlela yekudvumisa Jehova kutsi siphendvule nasisemihlanganweni yebuKhristu. Nanobe kunjalo, labanye bazalwane nabodzadze bakutfola kumatima kuphendvula. Bayafisa kuphendvula, kodvwa abakhoni ngenca yekutsi bayesaba. Yini lengabasita bancobe kwesaba? Yini sonkhe lengasisita kutsi sisho timphendvulo latakhako nangabe sisemihlanganweni? Ngaphambi kwekutsi siphendvule lemibuto, ase sicale sicoce ngetizatfu letine letisenta siphendvule nasisemihlanganweni.

3-5. (a) UmBhalo waHebheru 13:15 utsi kubaluleke ngani kutsi siphendvule nasisemihlanganweni? (b) Sonkhe kufanele siphendvule ngendlela lefanako yini? Chaza.

³ Sonkhe Jehova usinikete lilungelo lekumdvumisa. (Hla. 119:108) Kuphendvula emihlanganweni kuyincenye  yemihlatjelo yetfu futsi kute lomunye longasentela yona. (Fundza Hebheru 13:15.) Jehova ufuna sinikele ngemihlatjelo lefanako yini nobe sisho timphendvulo letifanako? Cha.

⁴ Jehova uyati kutsi sinemakhono lahlukahlukene, futsi timo tetfu atifani. Konkhe lesimentela kona kuligugu kuye. Cabanga ngemihlatjelo leyehlukahlukene ema-Israyeli lebekanikela ngayo kuJehova. Lamanye ema-Israyeli bekakhona kunikela ngemvu nobe ngembuti. Kodvwa um-Israyeli lobekaphuyile bekanganikela ‘ngematuba lamabili nome emazini lamabili elivukutfu.’ Jehova bekavuma kutsi um-Israyeli lebekete tinyoni letimbili anikele ngafulaha. (Lev. 5:7, 11) Fulaha bekashiphile, kodvwa Jehova bekawemukela lomnikelo nangabe bekungufulaha locolisakele.

⁵ Nkulunkulu wetfu lonemusa solo utiva ngendlela lefanako nalamuhla. Nasiphendvula, akalindzeli kutsi sonkhe sibe nelikhono lekukhuluma njenga-Apholosi noma njengaPawula. (Imis. 18:24; 26:28) Jehova akalindzeli kutsi sente intfo lesingeke sikhone kuyenta. Cabanga ngemfelokati lowanikela ngetinhlavu letimbili telinani lelincane. Bekaligugu kuJehova ngobe wanikela ngako konkhe labenako.—Luk. 21:1-4.

6. (a) Ngekusho kwemBhalo waHebheru 10:24, 25, timphendvulo lesitiva emhlanganweni tingasisita njani? (b) Ungakhombisa njani kutsi uyabonga ngetimphendvulo letikukhutsatako?

⁶ Nasiphendvula sisuke sikhutsata labanye. (Fundza Hebheru 10:24, 25.) Sonkhe siyajabula nasiva timphendvulo letehlukahlukene emhlanganweni. Siyajabula nasiva umntfwana asho imphendvulo lemelula nalecacile. Sikhutsateka kakhulu nasiva lotsite asho emaciniso lasandza kuwafundza. Sijabula kakhulu nangabe umuntfu lonemahloni noma lowetama kufundza lulwimi lwetfu aba nesibindzi sekuphendvula. (1 Thes. 2:2) Singakhombisa njani kutsi siyabonga ngemetamo labayentako? Nakuphela imihlangano singababonga ngetimphendvulo tabo letikhutsatako. Lenye indlela yekukhombisa kutsi siyababonga kutsi natsi siphendvule. Nasenta njalo sitawukhutsateka nasisemihlanganweni futsi sitawubakhutsata labanye.—Rom. 1:11, 12.

7. Kusisita ngani kuphendvula?

 ⁷ Siyazuza nangabe siphendvula. (Isa. 48:17) Kanjani? Kwekucala, nangabe sitibekela umgomo kuphendvula emihlanganweni siyakhutsateka kutsi siyilungiselele kahle. Nasilungiselela kahle, sitalicondza kancono liVi laNkulunkulu. Kutawuba melula kusebentisa tintfo lesitifundzako nangabe silicondza kahle. Kwesibili, sitayijabulela kakhulu imihlangano nangabe sihlanganyela kuyo. Kwesitsatfu, sitawuhlale siwakhumbula emaphuzu lesiwashito nasisemihlanganweni, ngobe kudzinga imetamo kuwalungiselela.

8, 9. (a) Ngekusho kwemBhalo waMalakhi 3:16, ucabanga kutsi Jehova utiva njani ngetimphendvulo tetfu? (b) Yini lenye labanye labayesabako?

⁸ Jehova uyajabula nangabe sikhuluma ngetintfo lesitikholelwako. Singaciniseka kutsi Jehova uyasilalela futsi ujabula kakhulu ngemetamo lesiyentako kute siphendvule emihlanganweni. (Fundza Malakhi 3:16.) Loko ukwenta ngekutsi asibusise nangabe setama kamatima kumjabulisa.—Mal. 3:10.

⁹ Sinetizatfu letinhle tekuphendvula emihlanganweni. Nanobe kunjalo labanye bayesaba kuphakamisa. Nangabe utiva kanjalo akukafaneli ulahle litsemba. Ase sicoce ngetimiso teliBhayibheli, ngetibonelo letimbalwa kanye netintfo lesingatenta letingasisita sikhone kuphendvula kanyenti emihlanganweni.

10. (a) Yini labanyenti betfu labayesabako? (b) Nangabe wesaba kuphendvula, loko kuveta kutsi ungumuntfu lonjani?

¹⁰ Kuyenteka yini ushaywe luvalo njalo nawucabanga kuphakamisa? Nangabe kunjalo, awusiwedvwa. Liciniso likutsi labanyenti betfu baba neluvalo nabaphendvula. Ngaphambi kwekutsi uncobe kutiva ngalendlela, kufanele utfole sizatfu lesikwenta wesabe. Wesaba kutsi utakukhohlwa loko lofuna kukusho yini, noma kutsi utawusho imphendvulo lengasiyo? Wesaba kutsi timphendvulo takho ngeke tibe tinhle njengetalabanye yini? Akusikubi kutiva  ngaleyondlela. Loko kukhombisa kutsi utfobekile futsi ubona labanye njengalabakhulu kunawe. Jehova uyabatsandza bantfu labatfobekile. (Hla. 138:6; Fil. 2:3) Kodvwa ufuna kutsi umdvumise uphindze ukhutsate bazalwane nabodzadze emihlanganweni. (1 Thes. 5:11) Uyakutsandza futsi utakuniketa sibindzi losidzingako.

11. Ngutiphi tikhumbuto letisemiBhalweni letingasisita?

¹¹ Cabanga ngaletinye tikhumbuto letiseBhayibhelini. LiBhayibheli litsi sonkhe siyona ngaloko lesikushoko kanye nendlela lesikusho ngayo. (Jak. 3:2) Jehova uyati kutsi ngaletinye tikhatsi sitawenta emaphutsa futsi nebazalwane betfu bayakwati loko. (Hla. 103:12-14) Bangumndeni wetfu futsi bayasitsandza. (Mak. 10:29, 30; Joh. 13:35) Bayati kutsi ngaletinye tikhatsi tintfo lesitishoko sisuke singakacondzi kutisho.

12-13. Yini lesiyifundza esibonelweni saNehemiya nakuJona?

¹² Cabanga ngetibonelo letiseBhayibhelini letingakusita kutsi uncobe kwesaba. Cabanga ngaNehemiya. Bekasebenta esigodlweni senkhosi lenemandla. Nehemiya weva buhlungu nakeva kutsi lubondza nemagede aseJerusalema kubhidlitiwe. (Neh. 1:1-4) Cabanga ngeluvalo lolwamshaya ngesikhatsi aphendvula inkhosi nayimbuta kutsi kungani angajabuli. Ngekushesha Nehemiya wathantaza, wabese uyaphendvula. Inkhosi yabese yenta tintfo letinyenti kute isite bantfu baNkulunkulu. (Neh. 2:1-8) Cabanga nangesibonelo saJona. Ngesikhatsi Jehova amcela kutsi ayokhuluma nebantfu baseNineve, Jona wesaba futsi waya eThashishi. (Jona 1:1-3) Kodvwa ngelusito lwaJehova, Jona wakhona kwenta loko Jehova labetsite akakwente. Emavi Jona lawasho kubantfu baseNineve abasita kakhulu. (Jona 3:5-10) Sibonelo saNehemiya sisikhombisa kutsi kubalulekile kutsi sithantaze ngaphambi kwekutsi siphendvule. Indzaba yaJona isifundzisa kutsi Jehova angasisita simkhonte ngisho noma kunetintfo lesitesaba kakhulu. Kuphendvula emihlanganweni kumelula kakhulu nakucatsaniswa nekushumayela umlayeto wesehlulelo.

¹³ Yini lengakusita usho timphendvulo letakhako emihlanganweni? Ase sicoce ngetintfo letimbalwa letingakusita.

14. Kungani kufanele siyilungiselele kahle imihlangano, futsi singayilungiselela nini?

¹⁴ Yilungiselele yonkhe imihlangano. Nangabe ulungiselela kusengaphambili futsi uyilungiselele kahle imihlangano, utawuba nesibindzi nawuphendvula. (Taga 21:5) Kuliciniso kutsi sonkhe silungiselelela imihlangano ngetikhatsi letehlukene. Eloise longumfelokati loseminyakeni yabo-80 ulungiselela Sifundvo se-Sicongosekulindza nakucala liviki. Utsi: “Ngiyijabulela kakhulu imihlangano nangabe  ngidadishe kusenesikhatsi.” Joy losebenta onkhe malanga udadisha Sicongosekulindza ngeMgcibelo. Utsi: “Ngifuna kuya emihlanganweni ngisakukhumbula loko lengikudadishile.” Ike longulomdzala welibandla lomatasa futsi lolihlahlandlela utsi: “Ngikujabulela kakhulu kudadisha kancane kancane emkhatsini weliviki kunekutsi ngidadishe sikhatsi lesidze ngelilanga linye.”

15. Yini longayenta kute uyilungiselele kahle imihlangano?

¹⁵ Yini lokufanele uyente kute ulungiselele kahle imihlangano? Kufanele ucale ngekuthantaza kuJehova umcele akuphe umoya longcwele. (Luk. 11:13; 1 Joh. 5:14) Tinikete sikhashana sekuhlatiya sihloko, tihlokwana, imifanekiso kanye nemabhokisi. Njengobe udadisha sigaba yetama kufundza yonkhe imibhalo lebekiwe. Cabangisisa ngalokufundzako uphindze unake kakhulu emaphuzu lofisa kuwasho nawuphendvula. Nangabe udadisha kahle utawuzuza kakhulu futsi kutawuba melula kuphendvula.—2 Khor. 9:6.

16. Ngumaphi emathuluzi longawasebentisa, futsi wena uwasebentisa njani?

¹⁶ Nangabe ungakhona, sebentisa i-JW Library^® application letfolakala ngelulwimi loluva kancono. Asebentisa inhlangano yakhe, Jehova usinikete emathuluzi lasisita siyilungiselele kahle imihlangano. I-JW Library^® application isisita sikhone kufaka tincwadzi lesingatidadisha etintfweni tetfu tebuchwepheshe. Ungabese uyakhona kutidadisha ngekutsi utifundze futsi utilalele noma kunini. Labanye basebentisa i-JW Library application ngesikhatsi selikhefu emsebentini, esikolweni noma nabahamba. I-Watchtower Library kanye ne-Watchtower ONLINE LIBRARY^™ yenta kube melula kucwaninga ngendzaba lesifisa kuyati kahle.

17. (a) Kungani kuyintfo lenhle kulungiselela timphendvulo letinyenti? (b) Yini loyifundzile nawubukela i-video letsi, Bani Ngumngani WaJehova—Lungiselela Imphendvulo Yakho?

¹⁷ Nangabe ungakhona, lungiselela timphendvulo letinyenti etincenyeni letehlukene. Leni? Kungoba ngeke bakukhombe njalo nawuphakamisile. Nalabanye batawuphakamisa, futsi umchubi akhombe munye wabo. Kute imihlangano iphele ngesikhatsi, umchubi kungahle kudzingeke akhombe labambalwa. Ngako ungadvumali noma uphatseke kabi nangabe ephuta kukukhomba. Nangabe ulungiselele timphendvulo letinyenti, utawuba nematfuba lamanyenti ekutsi uphendvule. Ungakulungiselela nekufundza umbhalo. Nangabe ungakhona, lungiselela kuphendvula usebentisa emavi akho. *

18. Kubaluleke ngani kusho timphendvulo letimfisha?

 ¹⁸ Shano timphendvulo letimfisha. Ngalokuvamile, labanyenti bayakhutsateka ngetimphendvulo letimfisha naleticacile. Ngako tibekele umgomo wekusho timphendvulo letimfisha. Yetama kuphendvula ngemizuzwana lengu-30. (Taga 10:19; 15:23) Nangabe sekuphele iminyaka leminyenti uphendvula, kubalulekile kutsi ubekele labanye sibonelo lesihle ngekutsi usho timphendvulo letimfisha. Nangabe usho timphendvulo letindze labanye bangahle besabe kuphendvula ngoba bacabanga kutsi angeke babe nelikhono lekukhuluma njengawe. Kusho timphendvulo letimfisha kuniketa bantfu labanyenti litfuba lekuphendvula. Nangabe lochubako akhombe wena kucala, shano imphendvulo lelula, lecondzile, nalephendvula umbuto. Ungetami kusho onkhe emaphuzu lasesigabeni. Nangabe labanye sebalishito liphuzu leliyinhloko esigabeni, ungahle ukhulume ngalamanye emaphuzu lakulesigaba.—Buka libhokisi lelitsi “ Lengingakusho Nangiphendvula.”

19. Lochubako angakusita njani kutsi uphendvule, kodvwa yini lokufanele uyente?

¹⁹ Tjela lochubako kutsi ufise kuphendvula kusiphi sigaba. Kufanele umtjele ngaphambi kwekutsi kucale imihlangano. Nasekabuta umbuto walesigaba, phakamisa kakhulu kute akubone.

20. Umhlangano welibandla ufana njani nekudla lesikudla nebangani betfu?

²⁰ Imihlangano yelibandla yitsatse njengekudla lenikudla ndzawonye nebangani bakho. Nasi sibonelo,cabanga kutsi ungativa njani bakho nangabe bangani bakho bakumema kutsi uyodla nabo futsi bakucela kutsi ulungise kudla lokumelula labatakudla? Ungativa wetfukile, kodvwa ungatimisela kutsi ulungiselele kudla labatakujabulela. Nasisemihlanganweni, Jehova usuke asilungiselele kudla lokumnandzi lesitakujabulela. (Hla. 23:5; Mat. 24:45) Uyajabula nangabe sinikela ngalokuncono kakhulu kulesinako. Ngako lungiselela kahle, futsi wetame kuphendvula kanyenti. Nawenta njalo utayijabulela imfundvo Jehova lasilungiselele yona futsi utawubakhutsata labanye.