1. Kerea pěndang i Daud soal i Yehuwa, kụ ene nakatul᷊ung si Daud někoạ apa?

DATU DAUD němohẹ, ”Yehuwa ene mawantugẹ̌ dingangu sěbạe dẹ̌daloěng.” (Mz. 145:3) I Daud makěndagẹ̌ si Yehuwa, kụ kakěndagẹ̌ ene nakakoạ si sie mapulu mẹ̌dalo Mawu ”su tal᷊oarang jamaatẹ̌”. (Mz. 22:22; 40:5) I kau lai tantu makěndagẹ̌ si Yehuwa dingangu setuju su bawerang i Daud: ”Karimạko i Kau, Yehuwa Mawung Israel i upung i kami, daloěng sarang karěngụe.”​—1 Taw. 29:10-13.

2. (a) Kerea i kitẹ botonge mẹ̌dalo si Yehuwa? (b) Apa nikapěndangengu pirang katau anạu sěmbaụ, kụ apa sarung ěndungang i kitẹ?

² Orasẹ̌ ini, sěmbaụ cara i kitẹ mẹ̌dalo si Yehuwa ute měgělị komentarẹ̌ su pěngangibadang. Katewe, piạ anạu sěmbaụ nakapěndang tawe gampang měkoạ ene. I sire mapulu měgělị komentarẹ̌, katewe pěndang matakụ nakasahaghe si sire. Apa wotonge koateng i sire? Kụ těgu apa botonge makatul᷊ung si kitẹ gunang měgělị komentarẹ̌ makatoghasẹ̌? I kitẹ sarung mědeạ sasimbahe, katewe kal᷊imona i kitẹ měmanda ěpạ alasang dasarẹ̌ i kitẹ měgělị komentarẹ̌.

3-5. (a) Kere nilahẹ su Ibrani 13:15, kawe nụe i kitẹ měgělị komentarẹ̌ su pěngangibadang? (b) Apa i kitẹ harusẹ̌ měgělị komentarẹ̌ mẹ̌sul᷊ung? Lahẹko.

³ Yehuwa něgělị si kitẹ hak istimewa gunang mẹ̌dalo si Sie. (Mz. 119:108) Komentarẹ̌ i kitẹ su pěngangibadang kai bageang bọu ”sasěmbah daralo”, kụ taumata wal᷊inẹ tawe makaghanti si kitẹ měgělị sasěmbah ene. (Basa Ibrani 13:15.) Apa Yehuwa mědẹ̌dorong sasěmbah, arau komentarẹ̌, mẹ̌sul᷊ung bọu i kitẹ kěbị? Tala!

 ⁴ Yehuwa masingkạ kemampuan dingangu situasing i kitẹ nẹ̌tatěntang, kụ i Sie sěbạe měngẹ̌ngarěga sasěmbah botonge gělịkang i kitẹ si Sie. Pẹ̌tiněna haghing sasěmbah seng nitarimạ’E bọu tau Israel. Pirang katau tau Israel nakaghělị kambing arau domba. Katewe tau Israel apang masusah aramanung kětạeng nakaghělị ”darua burung tekukur arau burung paluma mangudạ”. Kụ mạeng tau Israel tawe makasadia burung, Yehuwa měnarimạ ”sepersepuluh efa tapoěng al᷊usẹ̌”. (Im. 5:7, 11) Tapoěng tawe mal᷊ěghadẹ̌, katewe Yehuwa tatapẹ̌ měngẹ̌ngarěga sasěmbah ene, asal᷊ẹ̌ ene ”tapoěng al᷊usẹ̌” mangal᷊ene tapoěng kapaelange.

⁵ Mawung kitẹ mapia lai bědang tawe nẹ̌bal᷊ui sarang orasẹ̌ ini. Su tempong i kitẹ měgělị komentarẹ̌, i Sie tawe mẹ̌dorong i kitẹ kěbị mapande mẹ̌bisara kere i Apolos arau pande měmahansang taumata kere i Paulus. (Kis. 18:24; 26:28) Yehuwa mapulu i kitẹ měgělị komentarẹ̌ kapaelange, tuhụ kemampuan i kitẹ. Pẹ̌tahěndung wawine wal᷊u něgělị darua doitẹ̌ logam kadodọ. Yehuwa měngẹ̌ngarěga si sie ual᷊ingu i sie něgělị kapaelange bọu apa wotonge ikaghělịe.​—Luk. 21:1-4.

6. (a) Tumuhụ Ibrani 10:24, 25, kerea komentarẹ̌ nikaringihi kitẹ piạ pěngarune si kitẹ? (b) Kerea i kitẹ měnodẹ pěngangarěga ual᷊ingu komentarẹ̌ seng nakatoghasẹ̌ si kitẹ?

⁶ Komentarẹ̌ i kitẹ makatoghasẹ̌ taumata wal᷊inẹ. (Basa Ibrani 10:24, 25.) I kitẹ kěbị puluang dumaringihẹ̌ haghing komentarẹ̌ su pěngangibadang. I kitẹ puluang dumaringihẹ̌ komentarẹ̌u anạ kadodọ ual᷊ingu ene sederhana dingangu bọu dal᷊ungu naung. I kitẹ natoghasẹ̌ nakaringihẹ̌ piạ u masěmangatẹ̌ mẹ̌běke kerea i sie něngěndung katěngadẹ̌. Kụ i kitẹ lai mal᷊uasẹ̌ nakaringihẹ̌ anạu sěmbaụ nẹ̌těngkawahani něgělị komentarẹ̌, maning i sire mamea arau buhudeng něngěndung bawerang i kitẹ. (1 Tes. 2:2.) Kerea i kitẹ měngarěga apa seng nikoạ i sire? I kitẹ botonge makitarimakasẹ si sire masueng ibadane ual᷊ingu komentarẹ̌ i sire nakatoghasẹ̌. Cara wal᷊inẹ ute i kitẹ lai měgělị komentarẹ̌. Mạeng měkoạ ene, i kitẹ bal᷊inẹ kětạeng toghaseng, katewe i kitẹ lai měnoghasẹ̌ taumata wal᷊inẹ.​—Rm. 1:11, 12.

7. Apa gunane si kitẹ mạeng měgělị komentarẹ̌?

⁷ Měgělị komentarẹ̌ ene piạ gunane si kitẹ. (Yes. 48:17) Kawe nụe? Humotong, mạeng i kitẹ měkoạ rencana gunang  měgělị komentarẹ̌, i kitẹ limembong mapulu měkoạ persiapan mapaelẹ̌. Mạeng i kitẹ měkoạ persiapan mapaelẹ̌, i kitẹ sarung makaěna mapia Hengetangu Mawu. Kụ ual᷊ingu nakaěna mapia, i kitẹ limembong gampang měkoạ apa seng niěndungang. Karuane, i kitẹ limembong puluang měngibadah ual᷊ingu i kitẹ lai něgělị komentarẹ̌ su pembahasan. Katělune, ual᷊ingu nẹ̌tawakal᷊i něgělị komentarẹ̌, biasane i kitẹ makatahěndung apa nikomentarẹ̌ i kitẹ maning ene seng marěngụ nal᷊iu.

8-9. (a) Kere nilahẹ su Maleakhi 3:16, tumuhụ si kau kerea pěndang i Yehuwa su komentarẹ̌ i kitẹ? (b) Soal u měgělị komentarẹ̌, aramanung apa nikapěndangengu pirang katau?

⁸ I kitẹ makal᷊uasẹ̌ si Yehuwa su tempong mẹ̌bisara soal u pangangimang i kitẹ. I kitẹ mangimang Yehuwa dumaringihẹ̌ si kitẹ dingangu sěbạe měngẹ̌ngarěga tawakal᷊ing i kitẹ gunang měgělị komentarẹ̌. (Basa Maleakhi 3:16.) I Sie měngẹ̌ngarěga kụ měgělị al᷊amatẹ̌ su tempong i kitẹ mẹ̌tawakal᷊i makal᷊uasẹ̌ si Sie.​—Mal. 3:10.

⁹ Nal᷊ahẹ, i kitẹ piạ alasang mapaelẹ̌ gunang měgělị komentarẹ̌ su pěngangibadang. Katewe, pirang katau aramanung matakụ měhengkẹ limang i sire. Mạeng i kau nakapěndang kerene, abe makadodọ naung. Mahịe i kitẹ mẹ̌tiněna piram baụ prinsip Alkitapẹ̌, contoh, dingangu těgu makatul᷊ung si kitẹ limembong mal᷊awọ měgělị komentarẹ̌ su pěngangibadang.

10. (a) Pěndang matakụ apa piạ si kitẹ? (b) Kawe nụe piạ pěndang matakụ sumimbahẹ̌ ene kai tatiala sipatẹ̌ mapaelẹ̌?

¹⁰ Apa i kau lẹ̌liaghang matěho su tempong mẹ̌sasadia měhengkẹ limanu gunang měgělị komentarẹ̌? Mạeng ene nariadi, i kau tawe sẹ̌sanu. Sěběnarẹ̌e lawọ bọu i kitẹ lai matakụ su tempong měgělị komentarẹ̌. Tadeạu makailang pěndang ene, i kitẹ harusẹ̌ měmarikěsa apa makatakụ si kitẹ. Apa i kau matakụ tawe makatahěndung apa ul᷊ịkangu arau mẹ̌sal᷊a simbahẹ̌? Apa i kau gụgěnggang tawe makaghělị sasimbahẹ̌ mẹ̌sul᷊ung kapaele dingangu taumata wal᷊inẹ? Sěběnarẹ̌e pěndang matakụ ene kai  tatiala sipatẹ̌ mapaelẹ̌. Ene něnodẹ i kau masanạ naung kụ němanda taumata wal᷊inẹ limembong kapaelange wọu watangengu. Yehuwa puluang sipatẹ̌ kerene. (Mz. 138:6; Flp. 2:3) Katewe Yehuwa lai mapulu i kitẹ mẹ̌dalo si Sie dingangu měnoghasẹ̌ anạu sěmbaụ su pěngangibadang. (1 Tes. 5:11) I Sie makěndagẹ̌ si kau dingangu sarung měgělị katatoghasẹ̌ si kau.

11. Apa laingatẹ̌ niwohẹ su Alkitapẹ̌?

¹¹ Pẹ̌tiněna piram baụ laingatẹ̌ su Alkitapẹ̌. Alkitapẹ̌ naul᷊ị i kitẹ kěbị měsẹ̌sal᷊a wera. (Yak. 3:2) Yehuwa tawe něnuntụ i kitẹ harusẹ̌ masukụ, kerene lai anạu sěmbaụ i kitẹ. (Mz. 103:12-14) I sire kai keluarga rohaning i kitẹ, kụ i sire makěndagẹ̌ si kitẹ (Mrk. 10:29, 30; Yoh. 13:35) I sire makaěna mạeng pẹ̌sěnsul᷊ẹ sasimbahi kitẹ nẹ̌tatěntang bọu apa mapulu paul᷊ịkang i kitẹ.

12-13. Apa kaěndungang i kitẹ bọu contoh i Nehemia dingangi Yunus?

¹² Pẹ̌tiněna soal u piram baụ contoh makatul᷊ung si kau tadeạu tawe matakụ. Pẹ̌tahěndung si Nehemia. I sie mělẹ̌hal᷊ẹ̌ su istanang sěngkatau datu makawasa. I Nehemia nasusah naunge ual᷊ingu nakaringihẹ̌ těndạ dingangu gerbang su Yerusalem seng narusa. (Neh. 1:1-4) I sie tantu sěbạe natakụ su tempong datu nẹ̌kiwal᷊o si sie kawe i sie kakělaěng nasusah naung! I Nehemia masahawụ nẹ̌doa bọu ene simimbahẹ̌. Hasile, datu někoạ limembong mal᷊awọ gunang mẹ̌tul᷊ung manga ělangu Mawu. (Neh. 2:1-8) Pẹ̌tiněna lai contoh i Yunus. Su tempong i Yehuwa nẹ̌dorong si sie gunang pẹ̌bisara su tau Niniwe, Yunus sěbạe natakụ hakị u ene i sie timal᷊ang sarang tampạ bal᷊inẹ. (Yun. 1:1-3) Katewe ual᷊ingu tul᷊umang i Yehuwa, Yunus nakakoạ tugase. Kụ apa niwerang i Yunus piạ hasile mapaelẹ̌ su tau Niniwe. (Yun. 3:5-10) Bọu i Nehemia i kitẹ něngěndung mẹ̌doa ene penting těntal᷊ang bědang tawe sumimbahẹ̌. Kụ bọu i Yunus i kitẹ něngěndung Yehuwa botonge mẹ̌tul᷊ung si kitẹ měkoạ kapulu-Ne tawẹ soale kerea kaguwạe pěndang matakụ nikapěndangeng i kitẹ. Sěběnarẹ̌e, apa piạ sidang makatakụ si kitẹ kere Niniwe?

¹³ Těgu apa makatul᷊ung si kau měgělị komentarẹ̌ makatoghasẹ̌ su pěngangibadang? Mahịe i kitẹ měmanda piram baụ těgu.

14. Kawe nụe i kitẹ harusẹ̌ měkoạ persiapan pakapia gunang pěngangibadang, kụ kange i kitẹ měkoạ ene?

¹⁴ Pěkoạ persiapan. Mạeng i kau měkoạ rencana kal᷊imona dingangu měkoạ persiapan pakapia, i kau sarung limembong bahani měgělị komentarẹ̌. (Amsl. 21:5) Tantu jadwal i kitẹ kěbị gunang měkoạ persiapan ene nẹ̌tatěntang. Eloise, sěngkatau wawine wal᷊u umure nal᷊iu wọu 80 su taunge, měkẹ̌koạ persiapan Měhabarẹ̌ měnětạ Mandakẹ̌. I sie naul᷊ị, ”Iạ mal᷊uasẹ̌ su pěngangibadang mạeng seng něngěndung kal᷊imona.” I Joy, ěllo-ěllo masibukẹ̌ měhal᷊ẹ̌ hakị u ene i sie něnadia tempone  měngěndung Měhabarẹ̌ su Kaehẹ̌. ”Iạ puluang mạeng bahan ene kẹ̌katahěndungang ual᷊ingu buhudeng niěndungangku,” ěngkuěnge. I Junior, sěngkatau penatua dingangu perintis masibukẹ̌, nẹ̌bera, ”Iạ limembong mapulu měkoạ persiapan kadodọ-kadodọ su ral᷊ungu sěngkamisa sul᷊ungu sěnsul᷊ẹ měngěndung kụ mal᷊awọ.”

15. Kerea tadeạu i kau měkoạ persiapan mapaelẹ̌ gunang pěngangibadang?

¹⁵ Apa harusẹ̌ koateng su tempong měkoạ persiapan? Humotong, pẹ̌doạe mẹ̌dorong rohkẹ̌ masusi si Yehuwa. (Luk. 11:13; 1 Yoh. 5:14) Bọu ene, pakẹ tempo kadodọ gunang měmarikěsa tatěmbọe, subjudul, gambarẹ̌, dingangu kotak. Su tempong měngěndung paragraf, pẹ̌tawakal᷊ịe mẹ̌basa kěbị ayate. Pẹ̌tiněna lohone dingangu bageang sude su ayatẹ̌ ene sarung simbahengu. Kakạpaele i kau měkoạ persiapan, i kau limembong makaěbạ lawọ gunane kụ i kau limembong gampang měgělị komentarẹ̌.​—2 Kor. 9:6.

16. Aplikasi apa seng nasadia su baweranu, kụ kerea i kau měpakẹ ene?

¹⁶ Mạeng piạ, pakẹe alat bantu elektronik seng piạ su baweranu. Bọu organisasi-Ne, Yehuwa něnadia alat bantu elektronik gunang mẹ̌tul᷊ung si kitẹ měkoạ persiapan. Aplikasi JW Library^® makakoạ si kitẹ botonge měn-download publikasi gunang pěngangěndungang su HP arau tablet. Hakị u ene i kitẹ botonge měngěndung, arau tala mẹ̌basa arau dumaringihẹ̌ bahan ene su haghing tampạ dingangu tempo. Pirang katau něpakẹ aplikasi ini gunang měngěndung su tempong měngirul᷊e su pělahal᷊ẹ̌kang arau su sikol᷊ah arau su tempong mẹ̌daral᷊eng. Watchtower Library dingangu PERPUSTAKAAN ONLINE Watchtower^™ makakoạ si kitẹ limembong gampang měkoạ riset soal u topik mapulu ěndungang i kitẹ.

17. (a) Kawe nụe mapaelẹ̌ měnadia piram baụ komentarẹ̌? (b) Apa kaěndungangu bọu video Menjadi Sahabat Yehuwa—Persiapkan Komentarmu?

¹⁷ Mạeng botonge, sadia piram baụ komentarẹ̌. Kawe nụe? Ual᷊ingu i kau tawe sěntiniạ těbọkang su tempong měhengkẹ lima. Taumata wal᷊inẹ ěndịu lai měhengkẹ lima, kụ pemandu měněbọ si sire. Tadeạu pěngangibadang masue su tempone, pemandu aramanung měgělị batasẹ̌ pira kal᷊awọe komentarẹ̌ su piram baụ pokok. Hakị u ene abe pẹ̌pědu arau makadodọ naung mạeng tawe nitěbọ su bageang humotong pěngangěndungang. Mạeng i kau měnadia piram baụ komentarẹ̌, si kau sarung piạ lawọ kesempatan gunang měgělị komentarẹ̌. Sěmbaụ komentarẹ̌ botonge sadiangu ute mẹ̌basa ayatẹ̌. Katewe mạeng botonge, pěnadia lai komentarẹ̌, kụ pẹ̌pakẹ baweranu hala. *

18. Kawe nụe penting měgělị komentarẹ̌ manibu?

 ¹⁸ Pěgělị komentarẹ̌ manibụ. Kasauange, komentarẹ̌ makatoghasẹ̌ ene kai komentarẹ̌ manibụ dingangu sederhana. Hakị u ene, koạ komentarẹ̌ manibụ. Pẹ̌tawakal᷊ịe měgělị komentarẹ̌ karěngụe 30 dětikẹ̌. (Amsl. 10:19; 15:23) Mạeng seng taunge i kau měgẹ̌gělị komentarẹ̌ su pěngangibadang, i kau harusẹ̌ makoạ pẹ̌tatěnong soal u měgělị komentarẹ̌ manibụ. Mạeng i kau mẹ̌bisara pira měnitẹ̌ soal u lawọ hal᷊ẹ̌, taumata wal᷊inẹ aramanung makadodọ naung, ual᷊ingu nẹ̌pikirẹ̌ i sire tawe makakoạ mẹ̌komentarẹ̌ kere i kau. Bọu ene lai, komentarẹ̌ manibụ makakoạ taumata wal᷊inẹ botonge měgělị komentarẹ̌ ual᷊ingu bědang piạ lawọ tempo. Mạeng i kau nitěbọ kal᷊imona, pěgělị komentarẹ̌ sederhana, kụ simbahe kakiwal᷊one. Abe mělahẹ kěbị pokok su paragraf ene. Mạeng pokok utama su paragraf ene seng nisimbahẹ̌, pěgělịe koměntarẹ̌ soal u pokok bal᷊inẹ.​—Pěmanda kotak ” Iạ Botonge Měgěli Komentarẹ̌ soal u Apa?”

19. Kerea pemandu botonge makatul᷊ung si kau, katewe apa harusẹ̌ koatengu?

¹⁹ Paul᷊ị su pemandu su bageang sude i kau sarung měgělị komentarẹ̌. Mạeng i kau mapulu kerene, i kau harusẹ̌ maul᷊ị kal᷊imona su pemandu těntal᷊ang pěngangibadang bědang tawe nitětạ. Mạeng seng tempone měgělị komentarẹ̌ su bageang ene, pakasahawụ dingangu pakarangẹ měhengkẹ limanu tadeạu pemandu botonge makasilo si kau.

20. Kerea pěngangibadang mẹ̌sul᷊ungu kumaěng sěngkasio dingangu hapị?

²⁰ Pẹ̌tiněnạe pěngangibadang ene mẹ̌sul᷊ungu kumaěng sěngkasio dingangu hapị mapia. Mạeng i kau niparingang kumaěng sěngkasio, kụ i sire nẹ̌dorong si kau pẹ̌bawa kaěng sederhana, apa koatengu? I kau aramanung sahene gụgěnggang, katewe i kau tantu mẹ̌tawakal᷊i mẹ̌bawa kaěng botonge katemangengu kěbị. Yehuwa něgausẹ̌ si kitẹ sarang pěngangibadang, sene i Sie seng něnadia lawọ barang mapia gunang i kitẹ. (Mz. 23:5; Mat. 24:45) Kụ, i Sie mal᷊uasẹ̌ mạeng i kitẹ mẹ̌bawa hadiah sederhana, kapaelange bọu apa wotonge ikaghělị i kitẹ. Hakị u ene, pěkoạ persiapan pakapia kụ mạeng botonge pakal᷊awọ měgělị komentarẹ̌. Mạeng měkoạ ene, i kau tawe kětạeng kumaěng su medang i Yehuwa katewe lai mẹ̌bawa hadiah gunang pahiạkeng su sidang.