1. Ndiéjunʼ nixkaxi̱i̱ maʼni David ga̱jma̱a̱ numuu rí nandoo kaʼyoo Jeobá rá.

REY DAVID niʼnirámáʼ: “Jeobá nindxu̱u̱ mba̱a̱ ga̱jma̱a̱ gíʼmaa rí mbuʼyamajkuíí” (Sal. 145:3). Ikhaa nindoo kaʼyoo Jeobá, ga̱jma̱a̱ ngajua rúʼko̱ nixkaxi̱i̱ mbaʼyámajkuu “náa taphu̱ún mbaʼin xa̱bu̱” (Sal. 22:22; 40:5). Xúʼko̱ má mangáán nandulú kuʼyáá Jeobá ga̱jma̱a̱ nambánii xó má ajngáa rí niʼthí David: “Gaguma mba̱a̱n, oh Jeobá Dios ndrígóo Israel bi̱ nindxu̱u̱ Anu̱xu, asndu nákha ginii ga̱jma̱a̱ asndu kámuu mbiʼi” (1 Crón. 29:10-13).

2. a) Xú káʼnii gándoo gúxná gamajkhu Jeobá rá. b) Ndiéjunʼ eguáʼnii tikhun a̱ngiu̱lú ga̱jma̱a̱ ndiéjunʼ gúʼyáá rá.

² Mbáa rí xóo ma̱ndoo mbuʼyamajkuíí Jeobá rí mbiʼi xúgi̱, nindxu̱u̱ rí muxná comentario náa reunión. Mú mbaʼin a̱ngiu̱lú naʼniún mingíjyúuʼ muni. Nandún muni, mú namiñun. Xú káʼnii gándoo gúʼni mú xámiñulu rá. Ga̱jma̱a̱ xú káʼnii ikha gambáyulú xúgiáanʼ mu muxná comentarios rí maxnún tsiakii eʼwíínʼ rá. Nákha xóo tseriʼña̱a̱ graxe̱ rígi̱, mbuʼyáá a̱jkhu̱ numuu rí nuxná comentarios náa reunión.

3-5. a) Xó má eʼthí náa Hebreos 13:15, náa numuu rí nuxná comentarios náa reunión rá. b) Náa numuu rí Jeobá na̱nguá endu̱ʼu̱lúʼ muxná ikháá má comentarios xúgiáanʼ rá.

³ Jeobá nandoo rí xúgiáanʼ mbuʼyamajkuíí (Sal. 119:108). Comentarios rí nuxná nindxu̱u̱ xóo “tsigijñaʼ mu maʼga̱ gamajkhu náa inuu Dios”, ga̱jma̱a̱ nimbáa xándoo maxná tsigijñaʼ rúʼko̱ ga̱jma̱a̱ numulúʼ (atraxnuu Hebreos 13:15). * Lá na̱ndu̱ʼu̱lú  Jeobá rí muxná ikhaa má tsigijñaʼ, xó rí nuxná eʼwíínʼ rá. Na̱nguá.

⁴ Jeobá ndaʼyoo rí mámbáa dí ikháanʼ mixtiʼkhu xóo ejmañuluʼ ma̱ngaa xóo kuwáanʼ, ga̱jma̱a̱ ndaʼyamajkuu wéñuʼ tsigijñaʼ rí naʼngo̱o̱ nuxnáá. Gundxaʼwamíjna̱ ga̱jma̱a̱ numuu tsigijñaʼ rí nigruigú náa israelitas. Bi̱ guáʼdáá nuxnaa mbáa aʼdá múgú o mbáa aʼdá tsújtuunʼ. Xa̱bu̱ bi̱ ninindxu̱ún gíníi ma̱ndoo muxnáá “a̱jmi̱i̱n gúgu̱ o a̱jmi̱i̱n paloma”. Ga̱jma̱a̱ á mu mbáa xa̱bu̱ na̱nguá gíʼdoo nditháan rí maxníin a̱jmi̱i̱n ñu̱ʼu̱, Jeobá nagruigú “mbá décimo efá ri̱ʼi̱ ndrígóo harina” (Lev. 5:7, 11). Maski ajndu harina na̱nguá minumuu rí maratsi, Dios ndaʼyamajkuu tsigijñaʼ rúʼko̱, i̱ndó á mu nindxu̱u̱ “ri̱ʼi̱ ndrígóo harina”, xóo muʼthá harina rí itháan májánʼ.

⁵ Dios ndrígúlú nandxa̱ʼwáminaʼ ikhaa má kayúʼ rí mbiʼi xúgi̱. Índo̱ nuxná comentarios, ikhaa na̱nguá etsudáanʼ rí xúgiáanʼ muxná májánʼ comentarios xóo Apolos o manindxu̱lúʼ xóo Pablo (Hech. 18:24; 26:28). Xúgíʼ rí gándu̱ʼu̱lú guʼni asndu xó má eʼngo̱o̱. Garmáʼáan a̱jkiu̱lú ga̱jma̱a̱ numuu mbáa a̱ʼgú xuáʼa̱ bi̱ nixná a̱jma̱ mbújkha̱a̱ dí ragíʼdoo numuu. Jeobá ndiʼyamajkuu numuu rí nixná ga̱jma̱a̱ xúgíʼ a̱jkiu̱u̱n rí gíʼdoo (Luc. 21:1-4).

6. a) Xó má eʼthí náa Hebreos 10:24, 25, xú káʼnii embáyulú ikháanʼ comentarios rí nuʼdxuun náa reunión rá. b) Xú káʼnii gándoo gatasngajmá rí natayamajkuíí comentarios rí nuxná a̱ngiu̱lú rá.

⁶ Comentarios ndrígúlú naxnún tsiakii eʼwíínʼ (atraxnuu Hebreos 10:24, 25). * Xúgiáanʼ nanigulúʼ muʼdxawíín mixtiʼkhu comentarios dí narígá náa reunión. Mbá xkri̱da, nanigulúʼ wéñuʼ muʼdxawíín mbá ajngáa dí ramíʼskhoo dí naʼthí mbáa ada̱. Ma̱ngaa ra̱ʼkhá tháán enigulúʼ índo̱ mbáa ndxájulú naʼthí ga̱jma̱a̱ gagi rí ndiʼkhún nikro̱ʼo̱o̱. Ga̱jma̱a̱ nduʼyamajkhún xúgínʼ bi̱ nuni tsiakimijna mu muxna comentarios ndrígu̱ún maski ajndu namiñun o bi̱ kuwa rajmañún ajngáa ndrígúlú (1 Tes. 2:2). Xú káʼnii gándoo gusngájma rí nduʼyamajkuíí tsiakii rí nuni xá. Mbá rí xó ma̱ndoo muʼni nindxu̱u̱ rí muxníin núma̱aʼ nda̱wa̱á rí niguámbá reunión ga̱jma̱a̱ rí muʼthún rí comentarios ndrígu̱ún nixnúlú tsiakii. I̱mba̱ rí xóo ma̱ndoo muʼni mangáanʼ nindxu̱u̱ rí muxná comentarios ndrígúlú. Ra̱ʼkháa i̱ndó mundrígú tsiakii rí asndu mangáanʼ mbaʼyóoʼ muxnún tsiakii eʼwíínʼ (Rom. 1:11, 12).

7. Xú káʼnii embáyulú rí muxná comentarios rá.

 ⁷ Rí muxná comentarios mambáyulúʼ (Is. 48:17). Xú káʼnii gándoo gúʼni rá. Timbá, á mu nuʼgíʼ muxuxí ñawúnlú, nuʼniratamijná itháan májánʼ índo̱ gúʼgua̱ náa reunion, rúʼko̱ gambáyulú makru̱ʼu̱lú májánʼ Ajngá rawunʼ Dios ga̱jma̱a̱ muʼgíʼ muʼnimbánii náa vida ndrígúlú. Raga̱jma̱, mbáa manigulúʼ wéñuʼ reunión, numuu rí makuwáanʼ ruxná itháan comentarios. Ga̱jma̱a̱ ragajtsú, rí muxná comentarios mbaʼyóoʼ wéñuʼ tsiakii, ga̱jma̱a̱ ajngáa rí gúʼthá maguanúu itháan náa edxu̱lúʼ.

8, 9. a) Xó má eʼthí náa Malaquías 3:16, xú káʼnii ku̱ma̱ʼ ikháán rí Jeobá ndaʼyoo tsiakii rí nu̱ʼni̱ mú muxná comentarios rá. b) Maski ajndu xúʼko̱, xú káʼnii gándoo gákumu̱ún eʼwíínʼ rá.

⁸ Jeobá naniguʼ rí muʼthá ga̱jma̱a̱ fe ndrígúlú. Nakumulú gajkhun rí ikhaa naʼdxun ga̱jma̱a̱ ndaʼyamajkuu tsiakii rí nuʼni índo̱ nuxná comentario náa reunión (atraxnuu Malaquías 3:16). * Ma̱ngaa, nasngájma rí ndaʼyamajkulú índo̱ naʼni tsajkurámáanʼ (Mal. 3:10).

⁹ Rígá mbá numuu májánʼ rí muxná comentarios. Maski ajndu xúʼko̱, kuwa tikhun a̱ngiu̱lú bi̱ namiñun muxuxi ñawúunʼ mu muxna comentarios ndrígu̱ún. Á mu xúʼko̱ xtaa ratagíʼnii, xátani guabaminaʼ. Mbuʼyáá tikhu ikha ga̱jma̱a̱ xkri̱da rí na̱ʼkha̱ náa Biblia, xúʼko̱ má ma̱ngaa tikhu ikha rí mambáyulúʼ xúgiáanʼ mu muxná itháan comentarios.

10. a) Ndiéjunʼ kumulú mbaʼánʼ dí ikháanʼlu rá. b) Náa numuu rí nindxu̱u̱ mbá tsinaʼ májánʼ rí namíñulú índo̱ nuxná comentarios rá.

¹⁰ Lá namíñaʼ índo̱ natatsaʼwáminaʼ mataxuxí ñawáanʼ náa reunión rá. Á mú xúʼko̱, raʼkháa i̱ndó ikháán etagíʼnii xúʼko̱ kaʼnii. Gajkhun rí mbaʼánʼ dí ikháanʼ namiñulu índo̱ muxná comentarios. Á mu rúʼko̱ eʼni rí xáraxna comentario, mbaʼyóoʼ ma̱ta̱ya̱a̱ náa numuu rí xúʼko̱ ekumaʼ. Lá jma̱a̱ numuu rí namíñaʼ maʼni rí mambumaʼ rí maratha o maratha mbá dí raʼkhí rá. Lá naxmiéjuanʼ rí comentario ndrígáʼ xánindxu̱u̱ májánʼ ki xóo rí nuxna  eʼwíínʼ ráʼ. Rí phú gajkhun, gamíi rúʼko̱ nandoo gáʼthi rí nindxu̱u̱ mbá tsinaʼ májánʼ, nasngájma rí nindxa̱a̱ʼ mbá xa̱bu̱ guabaaʼ ga̱jma̱a̱ natañún rí eʼwíínʼ itháan guáʼdáá numún ki xóo ikháán. Jeobá naniguʼ rí manindxu̱lúʼ xa̱bu̱ guabáanʼ (Sal. 138:6; Filip. 2:3). Ikhaa ma̱ngaa nandoo rí mbuʼyamajkuíí ga̱jma̱a̱ rí muxnún tsiakii eʼwíínʼ a̱ngiu̱lú náa reunión (1 Tes. 5:11). Ikhaa nandoo kaʼyaʼ ga̱jma̱a̱ maxnáʼ tsiakii rí nda̱yáaʼ.

11. Ndiéjunʼ ikha rí na̱ʼkha̱ náa Biblia ma̱ndoo mambáyulúʼ rá.

¹¹ Guʼyáá tikhu ikha rí na̱ʼkha̱ raʼthí náa Biblia. Ajngá rawunʼ Dios naʼni marmáʼáan a̱jkiu̱lúʼ rí xúgiáanʼ nakiéʼkhulu índo̱ nuʼthá (Sant. 3:2). Jeobá na̱nguá gíʼthu̱u̱n rí ikháanʼ manindxu̱lúʼ xa̱bu̱ jmbi ni má a̱ngiu̱lú (Sal. 103:12-14). Ni̱ndxu̱ún a̱ngiu̱lú bi̱ nduyamajkuíí Jeobá ga̱jma̱a̱ nandún kuyulúʼ (Mar. 10:29, 30; Juan 13:35). Ikhiin nakru̱ʼu̱u̱n rí comentarios ndrígúlú nguáná tségajnuu májánʼ xó má eyulú magajnúu.

12, 13. Ndiéjunʼ eʼsngúlúʼ xkri̱da ndrígóo Nehemías ga̱jma̱a̱ Jonás rá.

¹² Guʼyáá tikhuu xkri̱da rí na̱ʼkha̱ náa Biblia rí mambáyulúʼ mú xámiñulu. Mugíʼdi̱i̱ muʼthá ga̱jma̱a̱ numuu Nehemías, bi̱ niñajunʼ náa goʼwóo mbáa rey. Índo̱ niʼdxuun rí xtátsí ga̱jma̱a̱ xkrugua ndrígóo Jerusalén niguámbáa, ikhú nixtáa gíná (Neh. 1:1-4). Ma̱ndoo mundxaʼwamíjna̱ xú kaʼnii nikumu̱u̱ índo̱ rey nindo̱ʼo̱o̱ rí maʼthí náa numuu xtáa gíná wéñuʼ. Nákha xóo tsériʼña̱a̱, Nehemías nacha̱ niʼtákáñuu Jeobá. Ga̱jma̱a̱ numuu rúʼko̱, rey nimbáyúu wéñuʼ xuajñu Dios (Neh. 2:1-8). Xkri̱da ndrígóo Nehemías naʼsngúlú rí gíʼdoo wéñuʼ numuu muʼtájkáan nákha xóo tsériʼña̱a̱. Ma̱ngaa gundxaʼwamíjna̱ ga̱jma̱a̱ numuu Jonás. Índo̱ Jeobá niʼthúunʼ rí maʼga̱ gáʼthún xa̱bu̱ bi̱ kuwa náa Nínive, nimiñuu wéñuʼ rí asndu nigáyúu ni̱jkha̱ náa i̱mba̱ xuajen (Jon. 1:1-3). Mú, numuu rí Dios nimbáyúu, niʼngo̱o̱ niʼnimbánuu ñajunʼ kiejunʼ rí nigiʼdoo ga̱jma̱a̱ ajngáa rí niʼthí nimbáñun wéñuʼ xa̱bu̱ bi̱ nikuwa náa xuajen rúʼko̱ (Jon. 3:5-10). Xkri̱da ndrígóo Jonás naʼsngúlúʼ rí Jeobá ma̱ndoo mambáyulúʼ muʼni ñajunʼ maski ajndu namíñulú wéñuʼ. Gajkhun rí a̱ngiu̱lú na̱nguá enimiñúlú xóo xa̱bu̱ bi̱ nikuwa náa Nínive, lá ragájkhun ráʼ.

¹³ Ndiéjunʼ rí ma̱ndoo mambáyulúʼ mu muxná májánʼ comentarios rí maxnún tsiakii a̱ngiu̱lú rá. Guʼyáá tikhuu.

14. a) Náá numuu rí gíʼmaa muʼniratamijná májánʼ índo̱ na̱jkua̱ náa reunión rá. b) Nguáná gándoo guʼniratamijná rá.

¹⁴ Guʼniratamijná rí mbuʼyáá náa xúgíʼ reunión. Xámiñulu muxná comentarios a mu nuríyaʼ mbiʼi ndrígúlú mu muʼniratamijná májánʼ (Prov. 21:5). Gajkhun, raʼkháa mbríguu kuwáanʼ xúgiáanʼ. Eloise, mbáa a̱ʼgú xuáʼa̱ bi̱ gíʼdoo itháan rí 80 tsiguuʼ, nagíʼdu̱u̱ naʼnirataminaʼ ga̱jma̱a̱ i̱yi̱i̱ʼ Bi̱ Nayejngoo índo̱ nagi̱ʼdu̱u̱ xmáná. Naʼthí: “Naniguʼ itháan reunión índo̱ nanirataminaʼ nguáthá mbiʼi guapháá”. Imba̱a̱ ndxájulú bi̱ mbiʼyuu Joy, bi̱ nañejunʼ xúgíʼ mbiʼi, naʼnigajmaa̱ i̱yi̱i̱ʼ Bi̱ Nayejngoo mbóo mbiʼi guapháá nákha xóó  tserígá reunión numuu rí xúʼko̱ nandoo narmáʼáan a̱jkiu̱u̱n rí najmañuu. Ike, nindxu̱u̱ mbáa bi̱ kayá edxu̱u̱ bi̱ nañajunʼ wéñuʼ ga̱jma̱a̱ nindxu̱u̱ precursor, naʼthí: “Ikhúúnʼ nda̱yo̱o̱ rí gíʼdoo wéñuʼ numuu rí manigajmaa mbá xngaa xúgíʼ xmáná, ki xóo rí manigajmaa mbá kañiʼ mbiʼi”.

15. Xú káʼnii eʼniratamijná índo̱ na̱jkua̱ náa reunión rá.

¹⁵ Xú káʼnii eʼniratamijná índo̱ na̱jkua̱ náa reunión rá. Timbá rí gíʼmaa muʼni nindxu̱u̱ rí munda̱ʼa̱a̱ Jeobá xi̱ʼ kaʼwu ndrígóo (Luc. 11:13; 1 Juan 5:14). Nda̱wa̱á, guríyaaʼ mbá nguáthá minutos mu mundxaʼwamíjna̱ rí na̱ʼkha̱ raʼthí náa artículo. Guʼyáá títulos ga̱jma̱a̱ subtítulos, xtiʼkhu ga̱jma̱a̱ náa kúguamáʼa̱. Ikhú, mugíʼdi̱i̱ muʼnigajmaa mámbá kutriga̱ ga̱jma̱a̱ muraxnuu texto xó má eʼngo̱o̱. Gundxaʼwamíjna̱ náa rí nuraxnuu, ga̱jma̱a̱ guʼyáaʼ comentarios kiejunʼ rí manigulúʼ muʼthá. Á mu nuʼniratamijná májánʼ, itháan gambáyulú ga̱jma̱a̱ xáʼniulu miʼskhaa muxná comentarios ndrígúlú (2 Cor. 9:6).

16. Ndiéjunʼ herramientas xtaʼdáá ikháán, ga̱jma̱a̱ xú káʼnii ejmaʼ rá.

¹⁶ Gájmulúʼ májánʼ herramientas dí rígá náa internet. Jeobá najmuu organización ndrígóo mu maxnúlúʼ mixtiʼkhu herramientas electrónicas mu mambáyulúʼ muʼniratamijná májánʼ índo̱ gúʼnigajmaa. Xóo aplicación JW Library^® naniñulú mundrígú i̱yi̱i̱ʼ rí muʼnigajmaa náa celular o náa tablet. Xúʼko̱, ma̱ndoo muʼnigajmaa májánʼ índo̱ gúraxnuu o índo̱ guʼdxawíín, asndu náa mbi̱ʼi̱i̱ ga̱jma̱a̱ náa gaʼndulúʼ. Kúwi̱i̱n tikhun bi̱ najmún aplicación rígi̱ mu munigajmaa índo̱ ndu̱ya̱a̱ xu̱únʼ náa nuñajunʼ o náa escuela o índo̱ nagún i̱mba̱ xuajen. Ma̱ngaa, nayambáá wéñuʼ munigajmaa náa Watchtower Library ga̱jma̱a̱ náa ináa ndrígóo internet BIBLIOTECA NÁA INTERNET Watchtower^™, na̱nguá mingíjyúuʼ rí muʼnigajmaa itháan tikhuu puntos rí nanigulúʼ.

17. a) Ndíjkha jngó dí ra̱ʼkhá tháán májánʼ nindxu̱u̱ rí muʼniratáá mbaʼa comenterios rá. b) Ndiéjunʼ nijmañaaʼ náa video Gambaxáʼ májánʼ ga̱jma̱ʼ Jeobá: Ataniratháá dí marata̱ rá.

¹⁷ Á mu nandoo, guʼniratáá mbaʼa comentarios náa mámbá artículo. Náa numuu rá. Numuu rí índo̱ guxuxí ñawúnluʼ raʼkháa xúgíʼ comentarios gakánulú. Mbáa nguáná makuwa mbaʼin bi̱ muxuxi ñawúunʼ mu mbáwíi bi̱ gúxnáá comentario. Ma̱ngaa, bi̱ naxná reunión xándoo maxnún xúgínʼ comentarios numuu rí nda̱a̱ tiempo. Ikha jngó xákiʼnáanʼ á mu tséxnulu comentarios náa timbá kutriga̱. Rí muʼniratáá mbaʼa rí muʼthá rúʼko̱ gáʼni rí ma̱ndoo muxná mbá comentario. Mbáa rí ma̱ndoo muʼni nindxu̱u̱ rí muraxnuu tikhu texto ndrígóo Biblia. Mú, á mu nandoo, guʼniratáá mú muʼthá ga̱jma̱a̱ ajngúlú. *

18. Náa numuu gíʼmaa muxná comentarios ma̱jkha̱ʼ rá.

 ¹⁸ Xáraxna comentarios mba̱a̱ wéñuʼ. Rí Comentarios ma̱jkha̱ʼ ga̱jma̱a̱ dí ra̱mingíjyúuʼ makruaʼaʼ nindxu̱u̱ rí naxnáʼ itháan tsiakii. Ikha jngó guʼni comentarios rí mbajyúuʼ mbá skíñúʼ gu̱wa̱ʼ segundos (Prov. 10:19; 15:23). Gíʼdoo wéñuʼ numuu rí a̱ngiu̱lú bi̱ kuwa má mba̱yu̱ʼ tsiguʼ ruxná comentarios náa nagimbáanʼ gíʼmaa muʼgíʼ mbá májánʼ xkri̱da ga̱jma̱a̱ numuu rígi̱. Á mu nuxná comentarios rí gakhi̱i̱ rí ndajyúuʼ mba̱yu̱ʼ wéñuʼ, mbáa eʼwíínʼ xáʼndun guxuxí ñawun, mundxaʼwamíjna̱ rí ikhiin xájmañún gúriʼña̱a̱ xó má eni eʼwíínʼ. Ikha jngó, índo̱ comentarios nindxu̱u̱ chíʼgíʼ, itháan mbaʼin a̱ngiu̱lú ma̱ndoo muxna comentarios. Á mu ikháanʼ gúxná comentarios náa timbá kutriga̱, gíʼdoo numuu rí muʼthá kaʼwu ga̱jma̱a̱ mbájmbu, ma̱ngaa xáʼyóoʼ maratha xúgíʼ rí naʼthí náa kutriga̱, índo̱ niguámbá nijuiʼthá mbá ku̱ma̱ rí itháan gíʼdoo numuu ma̱ndoo muxná i̱ʼwáʼ comentarios (atayáá kúgumaʼá “Ndiéjunʼ gándoo gáthá náa comentarios ndrígóʼ rá.”)

19. Xú káʼnii gándoo gambáyulú ndxájulú bi̱ naxná reunión, ga̱jma̱a̱ ndiéjunʼ gáʼyóóʼ muʼni rá.

¹⁹ Guʼtháán ndxájulú bi̱ naxná reunión rí nandulúʼ muxná mbá comentario náa mbá kutriga̱ rí nanigulúʼ. Á mu nuraʼwíí muni rígi̱, guʼtháán guapháá ndxájulú nákha xóo tségi̱ʼdu̱u̱ reunión. Índo̱ gáʼga̱nú náa kutriga̱ rúʼko̱ ma̱ndoo muxuxí nacha̱ ñawúnlú ga̱jma̱a̱ mitsídaanʼ mu mbaʼyulú.

20. Xú káʼnii embríguii reunión ga̱jma̱a̱ mbá ganitsu rí naʼphu̱ bi̱ nambáxu̱u̱n rá.

²⁰ Reunión dí narígá náa guʼwá nagimbáanʼ nakujmaa xóo mbá ganitsu rí naʼphu̱ bi̱ nambáxu̱u̱n. Á mu tikhun a̱ngiu̱lú nutulúʼ rí mu̱ʼgua̱ gúʼphu̱ gajmiúlú xuwiʼ ma̱ngaa nutulúʼ rí muyéʼgua ganitsu rí na̱nguá minumuu, ndiéjunʼ gúʼni rá. Mbáa asndu mati̱yu̱lú, asndu muʼni xó má eʼngoʼ mu muyéʼgua rí nanigu̱nʼ mu̱phu̱ xúgínʼ. Xúʼko̱ má náa reunión, bi̱ naʼtulúʼ mu̱ʼgua̱ nindxu̱u̱ Jeobá, bi̱ naʼni mújúnʼ ganitsu rí trámáʼ náa mesa (Sal. 23:5; Mat. 24:45). Ikhaa naniguʼ muxná rí na̱nguá minumuu wéñuʼ, rí itháan májánʼ rí ma̱ndoo muxnáá. Ikha jngó, guʼniratamijná májánʼ ga̱jma̱a̱ gúxná comentario rí asndu xó má eʼngo̱o̱. Xúʼko̱, raʼkháa i̱ndó muphiʼtsu náa mesa ndrígóo Jeobá, ma̱ngaa mambáñun eʼwíínʼ muʼni xúʼko̱ káʼnii.