1. David sente oinsá kona-ba Jeová? Ida-neʼe book nia atu halo saida?

LIURAI DAVID hakerek: “Jeová mak boot liu no merese duni atu simu hahiʼi.” (Sal 145:3) David hadomi Jeová, no neʼe book nia atu fó hahiʼi ba Maromak “iha kongregasaun nia leet”. (Sal 22:22; 40:5) Loos duni, ita hadomi Jeová no konkorda ho David nia liafuan neʼebé dehan: “Oh Jeová, ami-nia aman Izraél nia Maromak, Ita sei simu hahiʼi ba nafatin.”​—1 Krón 29:10-13.

2. (a) Ita bele fó hahiʼi ba Jeová iha dalan saida? (b) Susar saida deʼit mak irmaun-irmán balu hasoru? Ita sei koʼalia kona-ba saida?

² Ohin loron, dalan ida atu hahiʼi Maromak mak liuhusi fó komentáriu durante reuniaun. Maski nuneʼe, irmaun-irmán balu sente susar atu fó komentáriu. Sira hakarak atu fó komentáriu, maibé sira sente taʼuk. Saida mak sira bele halo atu manán sira-nia sentimentu taʼuk? Sujestaun saida deʼit mak bele ajuda ita hotu atu fó komentáriu neʼebé anima malu? Antes ita hatán ba pergunta sira-neʼe, mai ita haree razaun importante haat tanbasá mak ita fó komentáriu iha reuniaun sira.

3-5. (a) Hanesan temi iha Ebreu 13:15, tanbasá mak ita fó komentáriu iha reuniaun? (b) Ita hotu tenke fó komentáriu iha dalan neʼebé hanesan ka lae? Esplika toʼok.

³ Jeová fó ba ita ida-idak priviléjiu atu hahiʼi nia. (Sal 119:108) Ita-nia komentáriu sira iha reuniaun mak parte husi ita-nia “sakrifísiu hahiʼi nian”, no só ita rasik deʼit mak bele fó sakrifísiu neʼe. (Lee Ebreu 13:15.) Jeová haruka ita  ida-idak atu fó sakrifísiu ka komentáriu neʼebé hanesan ka lae? Lae duni!

⁴ Jeová hatene katak ita ida-idak iha kbiit no situasaun neʼebé la hanesan, no nia hafolin tebes sakrifísiu neʼebé ita bele fó. Hanoin toʼok kona-ba sakrifísiu oioin neʼebé nia simu husi ema Izraél. Ema Izraél balu iha kbiit atu fó bibi-malae ida ka bibi-timur ida. Maibé ema Izraél neʼebé kiak, karik bele fó deʼit “manu-lakateu rua ka manu-pombu oan rua”. No se ema Izraél ida la iha kbiit atu hola manu rua, Jeová mós simu “trigu uut neʼebé diʼak gomor isin ida”. (Lev 5:7, 11) Maski trigu uut la karun, maibé Jeová nafatin hafolin sakrifísiu neʼe, naran katak ida-neʼe mak “trigu uut neʼebé diʼak”.

⁵ Toʼo ohin loron, Maromak la troka. Bainhira ita fó komentáriu, nia la haruka ita atu koʼalia iha dalan neʼebé matenek hanesan Apolo ka book ema nia laran hanesan Paulo. (Após 18:24; 19:8) Jeová hakarak ita fó komentáriu neʼebé diʼak liu tuir ita-nia kbiit. Hanoin toʼok kona-ba feto-faluk neʼebé fó kontribuisaun osan kiʼik rua. Jeová hafolin tebes nia tanba nia fó buat neʼebé diʼak liu tuir nia kbiit.​—Lc 21:1-4.

6. (a) Tuir Ebreu 10:24, 25, oinsá mak komentáriu sira neʼebé ita rona bele book ita? (b) Oinsá mak Ita bele hatudu agradese ba komentáriu sira neʼebé anima Ita?

⁶ Ita fó aten-brani ba malu liuhusi komentáriu. (Lee Ebreu 10:24, 25.) Ita hotu kontente hodi rona komentáriu oioin iha reuniaun. Ita sente kontente bainhira rona labarik ida fó komentáriu neʼebé simples. Bainhira ema ruma fó komentáriu ho laran-manas hodi fó sai pontu ruma neʼebé nia foin mak aprende, neʼe mós book ita-nia laran. No ita mós admira tebes sira neʼebé “sai aten-brani” atu fó komentáriu, maski sira mak moedór ka foin mak aprende ita-nia língua. (1 Tes 2:2) Oinsá mak ita bele hatudu agradese ba sira-nia hakaʼas an? Kuandu reuniaun remata, ita bele fó obrigadu ba sira tanba fó komentáriu neʼebé anima Ita. Dalan seluk mak ita rasik fó komentáriu. Hodi halo nuneʼe, laʼós deʼit ita hetan anima, maibé ita mós anima ema seluk.​—Rom 1:11, 12.

7. Oinsá mak ita bele hetan benefísiu bainhira fó komentáriu?

⁷ Ita hetan benefísiu bainhira fó komentáriu. (Isa 48:17) Oinsá? Primeiru, se ita hakarak atu fó komentáriu, neʼe sei  book ita atu prepara didiʼak ba reuniaun. No bainhira ita prepara didiʼak, ita sei komprende liután Maromak nia Liafuan. Bainhira ita komprende didiʼak, fasil liu ba ita atu aplika buat neʼebé ita aprende. Segundu, ita sei sente kontente liu atu tuir reuniaun se ita hola parte. Terseiru, tanba ita prepara didiʼak antes fó komentáriu, neʼe sei ajuda ita atu hanoin-hetan nafatin pontu importante husi ita-nia komentáriu.

8-9. (a) Hanesan fó sai iha Malaquias 3:16, tuir ita-nia hanoin Jeová sente oinsá ho ita-nia komentáriu sira? (b) Susar saida mak ema balu hasoru?

⁸ Ita halo Jeová kontente bainhira ita fó sai ita-nia fiar. Ita bele fiar katak Jeová rona ita no hafolin tebes ita-nia hakaʼas an atu fó komentáriu iha reuniaun sira. (Lee Malaquias 3:16.) Nia hatudu katak nia hafolin ita hodi fó bensaun ba ita-nia hakaʼas an atu halo nia kontente.​—Mal 3:10.

⁹ Ita iha razaun diʼak oioin atu fó komentáriu iha reuniaun. Maski nuneʼe, ema balu karik taʼuk atu foti liman. Se Ita mós sente nuneʼe, keta sai laran-kraik. Mai ita haree prinsípiu balu husi Bíblia, ezemplu balu, no sujestaun balu neʼebé bele ajuda ita hotu atu fó komentáriu barak liután iha reuniaun.

10. (a) Ita barak sente taʼuk kona-ba saida? (b) Se Ita taʼuk atu fó komentáriu, neʼe katak Ita iha hahalok diʼak saida?

¹⁰ Ita sente nakdedar bainhira atu foti liman hodi fó komentáriu ka lae? Se nuneʼe, Ita la mesak. Tuir loloos, ita barak sente taʼuk uitoan bainhira fó komentáriu. Atu bele manán sentimentu taʼuk neʼe, Ita presiza buka-hatene uluk razaun tanbasá Ita sente taʼuk. Ita sente taʼuk tanba Ita sei haluha buat neʼebé Ita atu hatete ka taʼuk Ita sei koʼalia sala ka lae? Ita hanoin resin Ita-nia komentáriu sei la furak hanesan ema seluk nian ka lae? Tuir loloos, la sala atu sente hanesan neʼe. Neʼe hatudu katak Ita haraik an no haree ema seluk boot liu fali Ita. Jeová gosta tebes hahalok haraik an. (Sal 138:6; Flp 2:3) Maibé Jeová mós hakarak Ita atu hahiʼi nia no fó laran-manas ba irmaun-irmán sira iha reuniaun.  (1 Tes 5:11) Nia hadomi Ita no nia sei fó aten-brani ba Ita.

11. Prinsípiu saida deʼit husi Bíblia bele ajuda ita?

¹¹ Hanoin toʼok prinsípiu balu husi Bíblia. Bíblia hatete katak ita hotu halo sala ho ita-nia liafuan no dalan neʼebé ita koʼalia. (Tgo 3:2) Jeová komprende katak ita mak ema neʼebé la perfeitu, irmaun-irmán sira mós komprende. (Sal 103:12-14) Sira mak ita-nia família, no hadomi ita. (Mc 10:29, 30; João 13:35) Sira komprende katak dala ruma ita koʼalia liafuan neʼebé sala bainhira ita fó komentáriu.

12-13. Saida mak ita bele aprende husi Neemias no Jonas nia ezemplu?

¹² Hanoin toʼok kona-ba ezemplu balu husi Bíblia neʼebé bele ajuda ita atu manán sentimentu taʼuk. Mai ita koʼalia kona-ba Neemias. Nia serbí iha liurai kbiit boot ida nia palásiu. Neemias sente triste tanba nia rona katak sidade Jeruzalein nia moru no portaun sira rahun hela. (Neem 1:1-4) Imajina toʼok oinsá Neemias sente bainhira liurai husu nia atu esplika tanbasá nia triste. Neemias halo kedas orasaun no tuirmai nia hatán ba liurai. Rezultadu mak liurai halo buat oioin atu ajuda Maromak nia povu. (Neem 2:1-8) Hanoin mós kona-ba Jonas. Bainhira Jeová haruka nia atu koʼalia ba ema neʼebé hela iha Nínive, Jonas sente taʼuk tebes toʼo nia halai ba fatin seluk. (Jonas 1:1-3) Maibé ho Jeová nia ajuda, Jonas bá haklaken iha Nínive. No liafuan neʼebé nia fó sai book duni ema Nínive. (Jonas 3:5-10) Ita aprende husi Neemias katak importante tebes atu halo orasaun uluk antes hatán. No ita aprende husi Jonas katak Jeová bele ajuda ita atu serbí nia maski ita sente taʼuk tebes. Tuir loloos, fasil liu atu fó komentáriu iha reuniaun duké koʼalia ba ema Nínive, loos ka lae?

¹³ Sujestaun saida deʼit mak bele ajuda ita atu fó komentáriu neʼebé anima ema seluk iha reuniaun sira? Mai ita haree sujestaun balu.

14. Tanbasá mak ita presiza prepara didiʼak ba ita-nia reuniaun sira no bainhira mak tempu diʼak atu prepara?

¹⁴ Prepara ba reuniaun ida-idak. Kuandu Ita halo planu nanis no prepara didiʼak, Ita sei fiar an atu fó komentáriu. (Prov 21:5) Ita ida-idak iha oráriu neʼebé la hanesan. Irmán faluk ida naran Eloise neʼebé tinan 80 liu, prepara ninia Livru Haklaken estudu nian iha semana nia hahú. Nia hatete: “Bainhira haʼu prepara sedu, haʼu sente kontente liu atu tuir reuniaun.” Irmán Joy neʼebé serbisu husi loron-segunda toʼo loron-sesta, prepara ninia Livru Haklaken iha loron-sábadu. Nia hatete: “Fasil liu atu hanoin-hetan informasaun se prepara loron ida antes reuniaun.” Irmaun ida naran Ike neʼebé serbí nuʼudar katuas kongregasaun no pioneiru ida, hatete: “Fasil liu ba haʼu atu fahe informasaun ba parte balu no prepara durante loron balu iha semana ida duké prepara tomak iha loron ida deʼit.”

15. Oinsá mak Ita bele prepara didiʼak ba reuniaun?

 ¹⁵ Prepara didiʼak ba reuniaun envolve saida deʼit? Sempre halo orasaun uluk antes estuda hodi husu Jeová haraik ninia espíritu santu ba ita. (Lc 11:13; 1 João 5:14) Tuirmai uza minutu balu hodi hanoin didiʼak kona-ba lisaun nia títulu, subtítulu sira, dezeñu sira, no kaixa sira. Bainhira estuda parágrafu ida-idak, hakaʼas an atu lee eskritura hotu. Hanoin kleʼan kona-ba informasaun, no tau atensaun ba pontu sira neʼebé ita hakarak atu fó komentáriu. Kuandu Ita prepara didiʼak, Ita sei hetan benefísiu no fasil liu ba Ita atu fó komentáriu.​—2 Kor 9:6.

16. Aplikasaun ka programa saida mak Ita bele uza, no oinsá mak Ita rasik uza buat sira-neʼe?

¹⁶ Se bele, uza aplikasaun eletróniku ka programa neʼebé iha ita-nia língua. Jeová uza ninia organizasaun atu prepara aplikasaun ka programa sira neʼebé bele ajuda atu prepara ba reuniaun sira. Liuhusi aplikasaun JW Library^®, ita bele download livru estudu nian iha ita-nia sasán eletróniku. Tuirmai ita bele estuda, lee ka rona ba informasaun iha tempu no fatin naran deʼit. Ema balu uza aplikasaun neʼe atu estuda durante tempu deskansa iha serbisu-fatin ka eskola ka bainhira sira halo viajen. Watchtower Library no Watchtower BIBLIOTEKA ONLINE ajuda ita atu halo riset kona-ba pontu sira neʼebé ita hakarak atu estuda liután husi lisaun neʼe.

17. (a) Tanbasá mak diʼak atu prepara komentáriu balu? (b) Saida mak Ita aprende husi vídeo Sai Jeová nia Belun​—Prepara atu fó komentáriu?

¹⁷ Se bele, prepara komentáriu balu ba kada lisaun. Tanbasá? Tanba dala ruma, irmaun neʼebé dirije Livru Haklaken la hili ita bainhira ita foti liman. Karik, ema seluk mós foti liman iha tempu neʼebé hanesan ho ita, no irmaun neʼebé dirije hili sira. Atu reuniaun bele remata tuir tempu, dala ruma irmaun neʼebé dirije sei hili deʼit ema balu atu fó komentáriu kona-ba parte balu iha lisaun neʼe. Entaun, keta sai laran-kanek ka laran-kraik kuandu irmaun neʼe la hili ita. Se ita prepara komentáriu balu, ita iha oportunidade barak liu atu fó komentáriu. Komentáriu neʼebé ita prepara bele inklui mós lee eskritura ida. Maibé se bele, prepara mós komentáriu ida neʼebé uza ita-nia liafuan rasik. *

18. Tanbasá mak diʼak atu fó komentáriu neʼebé badak?

¹⁸ Fó komentáriu neʼebé badak. Baibain, komentáriu neʼebé fó anima mak badak no simples. Tan neʼe, halo ita-nia komentáriu badak. Koko hatoʼo komentáriu ba segundu 30 deʼit. (Prov 10:19; 15:23) Se ita mak tinan barak ona iha lia-loos,  hatudu ezemplu diʼak hodi fó komentáriu neʼebé badak. Se ita koʼalia ba minutu balu kona-ba buat oioin, karik ema seluk sei sente taʼuk tanba sira hanoin katak sira labele fó komentáriu diʼak hanesan ita. No mós komentáriu neʼebé badak fó tempu ba ema barak liután atu hola parte iha reuniaun. Liuliu, se ita mak fó komentáriu primeiru, ita presiza fó komentáriu neʼebé simples, no hatán deʼit ba pergunta. Keta koko atu temi pontu hotu iha parágrafu. Se ema seluk fó ona resposta kona-ba pontu importante, ita bele fó komentáriu kona-ba pontu seluk.​—Haree kaixa “ Haʼu bele fó komentáriu kona-ba saida?”

19. Oinsá mak irmaun neʼebé dirije bele ajuda Ita, maibé saida mak Ita rasik presiza halo?

¹⁹ Fó-hatene ba irmaun neʼebé dirije kona-ba parágrafu neʼebé Ita hakarak atu fó komentáriu. Atu halo nuneʼe, Ita presiza hakbesik ba irmaun neʼebé dirije antes reuniaun komesa. Bainhira toʼo tempu atu fó komentáriu ba parágrafu neʼebé Ita hili, foti liman kedas no aas atu irmaun bele haree.

20. Oinsá mak reuniaun sira hanesan tempu atu han hamutuk ho belun diʼak sira?

²⁰ Ita presiza haree reuniaun sira hanesan han hamutuk ho belun diʼak sira. Imajina toʼok kolega balu iha kongregasaun arranja festa kiʼik ida, no sira husu ita atu prepara hahán ruma neʼebé simples. Saida mak ita sei halo? Karik ita sei sente laran-taridu uitoan, maski nuneʼe ita sei hakaʼas an atu prepara ai-han ruma neʼebé ema hotu sei gosta. Jeová mak hanesan festa-naʼin, nia prepara meza neʼebé nakonu ho ai-han espirituál iha reuniaun sira. (Sal 23:5; Mt 24:45) No nia sente kontente bainhira ita lori prezente simples ida, tuir ita-nia kbiit. Tan neʼe, mai ita prepara didiʼak no fó komentáriu tuir ita-nia kbiit. Hodi halo nuneʼe, Ita laʼós deʼit han iha Jeová nia meza, maibé Ita mós lori prezente ida atu fahe ba kongregasaun.