1. Davhida a atitwisa kuyini hi Yehovha naswona ndlela leyi a atitwa ha yona yimu susumetele kuyendla yini?

HOSI DAVHIDA a vule leswi: “Yehovha i lwenkulu naswona afaneliwa hi kudzunisiwa ngopfu.” (Pis. 145:3) Lirhandzu leli Davhida a ali na lona hi Yehovha limu susumetele kudzunisa Xikwembu “axikarhi ka nhlengeletano.” (Pis. 22:22; 40:5) Ha tiyiseka leswaku na wena wamu rhandza Yehovha naswona wa pfumelelana ni marito ya Davhida lamange: “Oh Yehovha, Xikwembu xa Israyele, tatana wa hina, akudzunisiwe wena hi minkama leyingaheliki.” — 1 Tikro. 29:10-13.

2. a) Hi yihi yin’wana ya tindlela ta kudzunisa Yehovha? b) I xikarhato xihi lexi vanyingi va kumanaka na xona naswona i yini leswi hingataswi vona kusungula?

² Yin’wana ya tindlela leti hinga dzunisaka Yehovha ha tona namuntlha i kunyikela tinhlamulo loko hi li minhlanganwini. Kambe vamakwerhu vanyingi va tsandzeka kuyendla leswo. Hambileswi vaswi lavaka kuhlamula, kuchava kuva yendla va miyela. Xana vangaswi kotisa kuyini kuhlula kuchava? I yini leswingava pfunaka kunyikela tinhlamulo leti khutazaka? Hingase hlamula swivutiso leswi, ahi voneni 4 wa swivangelo leswi faneleke swihi susumetela kuhlamula loko hi li minhlanganwini.

3-5. a) Hilaha Vaheveru 13:15 yi kombaka ha kona, hayini hi nyikela tinhlamulo aminhlanganwini? b) Xana hi fanele hi nyikela tinhlamulo hi ndlela leyi fanaka? Hlamusela.

³ Yehovha a nyike hinkwerhu lunghelo la kumu dzunisa. (Pis. 119:108) Tinhlamulo leti hi tinyikelaka aminhlanganwini i xiphemu xa “magandzelo ya kudzunisa” lawa himu yendlelaka wona. Anga kona lweyi anga nyikelaka magandzelo lawa ka ndhawu ya hina. (Lerha Vaheveru 13:15, NM.) Kambe, xana Yehovha a nyimela leswaku  hinkwerhu hi nyikela magandzelo kumbe tinhlamulo hi ndlela leyi fanaka? Doo!

⁴ Yehovha waswi tiva leswaku wuswikoti ni swiyimo swa hina swa hambana. Hikolaho, ama nyika lisima hintamu magandzelo lawa hi kotaka kumu nyika wona. Pimisa hi magandzelo lawa Yehovha aama yamukela ankameni wa Vayisrayele. Van’wana avaswi kota kunyikela hi xinyimpfana kumbe mbuti ya psele. Kambe swinga yendleka Muyisrayele lweyi a ali xisiwana owo kota kunyikela “matuva mambirhi kumbe swituvana swimbirhi” ntsena. Naswona loko a tsandzeka hambi kunyikela swituvana, Yehovha a ayamukela “mapa lamangasiliwa kahle hi mpimo wa wukhume la efa”. (Lev. 5:7, 11) Mapa amanga durhi. Hambileswo, Yehovha aama nyika lisima loko ma li “mapa lamanene”.

⁵ Yehovha anga cincanga. A lava leswaku hi nyikela tinhlamulo aminhlanganwini. Hambileswo, anga nyimelanga leswaku hi ve li swivulavuli leswinene kufana na Apolo kumbe leswi kotaka kukhumba timbilu ta van’wana kufana na Pawulo. (Mint. 18:24; 26:28) Leswi aswi lavaka i kuva hi nyikela tinhlamulo hilaha hinga kotaka ha kona. Khumbuka mufelakazi lweyi a nyikeleke swimalana swimbirhi swa nsimbi. Yehovha aswi nyike lisima swimalana leswiyani hikusa aaswi tiva leswaku hi leswi anga kota kunyikela swona. — Luk. 21:1-4.

6. a) Hikuya hi Vaheveru 10:24, 25, tinhlamulo ta vamakwerhu tingahahi khumbisa kuyini? b) Ungava tlangelisa kuyini vamakwerhu hi tinhlamulo ta vona leti khutazaka?

⁶ Ha khutazana loko hi nyikela tinhlamulo. (Lerha Vaheveru 10:24, 25.) Hinkwerhu haswi rhandza kutwa tinhlamulo ta ku hambanahambana aminhlanganwini. Ha tsaka loko hi twa xin’wanana xi hlamula hi marito ya xona n’winyi. Ha khutazeka loko makwerhu lweyi a hlamulaka a hlamula hi kutsaka hi nchumu lexi axi djondzeke. Naswona ha khumbeka loko vamakwerhu lavanga ni tingana kumbe lavanga karhi va djondza lirimi la hina va va ni “xivindzi” xa kuhlamula. (1 Tes. 2:2.) Xana hingaswi kombisa kuyini leswaku hayi tlangela minzamu ya vona? Yin’wana ya tindlela i kuva bumabumela ndzhaku ka minhlangano hi tinhlamulo ta vona leti khutazaka. A ndlela yin’wanyana i kuva hina hi hoxe hi nyikela tinhlamulo. Loko hi yendla leswo, hita khutazeka hi tlhela hi khutaza van’wana. — Rhom. 1:11, 12.

7. Hi wahi mavuyelo lawa hima kumaka hi kunyikela tinhlamulo aminhlanganwini?

⁷ Ha tivuyelisa loko hi hlamula minhlanganwini. (Esa. 48:17) Hayini hi vula leswo?  Xosungula, kutsakela kuhlamula aminhlanganwini kuhi yendla hi lulamisela minhlangano. Kululamisela kuhi yendla hi twisisa hi wuyenti a Rito la Xikwembu. I loko hi twisisa Bibele hi ndlela leyi, haswi tiva leswaku hingaswi tirhisisa kuyini awuton’wini la hina leswi hiswi djondzaka. Xawumbirhi, minhlangano yitahi tsakisa hikusa hita va ni swa kuswi vula ka yona. Xawunharhu, tani hileswi kululamisela swi lavaka minzamu ya yikulu, leswi hiswi hlamulaka swi tolovela kutshama amiyanakanywini ya hina hambiloko minhlangano se yi khalutile.

8-9. a) Hilaha Malakiya 3:16 yi vulaka ha kona, xana Yehovha a titwisa kuyini hi tinhlamulo leti hi tinyikelaka minhlanganwini? b) I yini leswi van’wana va chavaka kuswi yendla?

⁸ Loko hi kombisa lipfumelo la hina ka Yehovha hi kunyikela tinhlamulo, hi tsakisa mbilu ya yena. Ahi tiyisekeni leswaku Yehovha wahi vona loko hi hlamula minhlanganwini naswona wayi nyika lisima minzamu leyi hiyi yendlaka. (Lerha Malakiya 3:16.) A kombisa kutlangela ka yena hi kuhi katekisa loko hi yendla hinkwaswo leswi hiswi kotaka leswaku himu tsakisa. — Mal. 3:10.

⁹ Hilaha hi voneke ha kona, hi ni swivangelo leswi twalaka swa kunavela kuhlamula aminhlanganwini. Hambiswilitano, van’wana vangaha chava kutlakusa voko. Xana na wena u tshuka u titwa hi ndlela leyo? Loko swi li tano, unga heli ntamu. Djondzo leyi yitahi komba matshinya ya minawu ya Bibele, swikombiso swa le Bibeleni ni swiringanyeto leswi tirhaka swa leswi hingaswi yendlaka leswaku hi susumeteleka kuhlamula aminhlanganwini.

10. a) I yini lexi sivelaka vanyingi kutlakusa voko? b) Kuchava kuhlamula swi kombisa leswaku u ni wumunhu la kutshamisa kuyini?

¹⁰ Xana u tshuka u teliwa hi kuchava loko u lava kutlakusa voko leswaku u hlamula? Loko swi tshame swiku yendlekela, awu wexe. Votala va hina hi tshuka hi titwisa xileswo. Kambe leswaku u hlula kuchava ka wena, u fanele u tsumbula leswiku yendlaka u chava. Xana u chava kurivala leswi u lavaka kuswi hlamula kumbe u pimisa leswaku leswi u lavaka kuswi hlaya swi hoxile? U karhateka hileswi u pimisaka leswaku nhlamulo ya wena ahi ya nchumu loko yi  pimanisiwa ni ya van’wana? Kuva u titwa hi ndlela leyi swi kombisa leswaku u ni wumunhu la kahle. Swi kombisa leswaku wa titsongohata naswona u vona van’wana va li lava tlakukeke kuku tlula. Yehovha wava rhandza vanhu va kutshamisa xileswo. (Pis. 138:6; Filp. 2:3) Hambileswo, Yehovha a lava leswaku umu dzunisa ni kukhutaza van’wana aminhlanganwini. (1 Tes. 5:11) Waku rhandza naswona ataku nyika xivindzi lexi uxi lavaka leswaku u hlula kuchava ka wena.

11. Hi wahi matshinya ya minawu ya Bibele lawa mangahi pfunaka?

¹¹ Hi lawa matshinya man’wana ya Bibele lawa mangaku pfunaka. Bibele li vula leswaku hinkwerhu ha phazama loko hi vulavula. Hingaha vula swilo leswi ahinga fanelanga hiswi vula kumbe kuvulavula hi ndlela leyinga liki yona. (Yak. 3:2) Hambileswo, Yehovha anga langutelanga leswaku hi hetiseka. Hambi vamkwerhu ava langutelanga leswo ka hina. (Pis. 103:12-14) Vona i maxaka ya hina ya Wukreste lawa mahi rhandzaka. (Marka 10:29, 30; Yoh. 13:35) Vaswi twisisa leswaku leswi hiswi vulaka minkama yin’wana ahi swona leswi hi lavaka kuvula swona.

12-13. Swikombiso swa Nehemiya na Yonasi swihi djondzisa yini?

¹² Hi leswi swikombiso swin’wana swa le Bibeleni leswingaku pfunaka. Wahamu khumbuka Nehemiya? A atirha ndlwini ya hosi ya matimba swinene. Hambileswo, a akhunguvanyekile hikusa swipfalu ni makhumbi ya Yerusalema aswi hohlokelile. (Neh. 1:1-4) Uswi vonisa kuyini? Xana swimu vevukelile kubyela hosi leswi aswimu khunguvanyisa loko yimu vutisa? Nikatsongo. A achava naswona a akarhatekile. Hikolaho, a yendle xikhongelo ivi a gama a hlamusela hosi leswi aswi humelela. Xana hosi yi hlamulise kuyini? Yi yendle swotala leswaku yi pfuna vanhu va Xikwembu. (Neh. 2:1-8) Xikombiso xin’wana lexi unga pimisaka hi xona i xa Yonasi. Loko Yehovha amu rhumile kuya vulavula ni Vaninivha, Yonasi a chave hintamu la kakuva a baleka. (Yon. 1:1-3) Kambe hi kupfuniwa hi Yehovha, Yonasi a yile a ya chumayela Vaninivha. Naswona marito lawa ava byeleke wona mava pfunile hintamu vahanyi va Ninivha. (Yon. 3:5-10) Xana swikombiso leswi swihi djondzisa yini? Xikombiso xa Nehemiya xihi djondzisa lisima la kukhongela loko hi lava kuhlamula. A xa Yonasi xihi djondzisa leswaku Yehovha angahi pfuna kuhlula kuchava hambi kova kukulu kufikela kwihi. Kuvula ntiyiso, xana li kona bandla leli swirho swa lona swi chavisaka swinene kufana ni vanhu va Ninivha?

¹³ Hi swihi swin’wana leswingaku pfunaka kunyikela tinhlamulo leti khutazaka aminhlanganwini? Ahi kambisiseni swin’wana swa swona.

14. Hayini hi fanele hi lulamisela kahle minhlangano, naswona hingaswi yendla hi nkama muni?

¹⁴ Lulamisela minhlangano. Loko u tilulamisela kahle ni kuyanakanyisisa hi marito lawa ungatama tirhisa, uta pumba kuchava loku ungaha vaka na kona konyikela tinhlamulo. (Swiv. 21:5) I ntiyiso leswaku nkama lowu mun’wana ni mun’wana wa hina a tivekelaka wona leswaku a lulamisela minhlangano wa hambana. Hi xikombiso, Heloisa, mufelakazi lweyi anga ni kolomuya ka 80  wa malembe, a sungula kupfuxeta Murindzi na vhiki laha sungula. A vula leswi: “Minhlangano yini nandzihela hintamu loko ni lulamiselile.” Joy, lweyi a yaka ntirhweni axikarhi ka vhiki, a lulamisela djondzo ya Murindzi loko kuchota siku leswaku a ya minhlanganwini. Na yena a vula leswi: “Swani vevukela kukhumbuka tipontu loko ni lulamisela na kuyo sala siku leswaku hi va ni minhlangano.” Ike, doda leli tshamaka li khomekile naswona linga phayona, li hlamusela leswi: “Ni pfuneka hintamu loko ni lulamisela minhlangano hi kutsongokutsongo matshan’wini ya kuveka siku lin’we leswaku ni lulamisela minhlangano hinkwayo hi nkama wun’we.”

15. I yini leswi u faneleke uswi yendla leswaku u lulamisela kahle minhlangano?

¹⁵ I yini leswi ungaswi yendlaka leswaku u lulamisela kahle minhlangano? Kusungula, yendla xikhongelo u kombela Yehovha aku nyika moya lowokwetsima. (Luk. 11:13; 1 Yoh. 5:14) Ndzhaku, kambisisa nhlokomhaka, swinhlokwanamhaka, mifoto ni makwadru. Loko u li karhi u lerha maparagrafu, djondza ni matsalwa lama kombisiwaka. Anakanyisisa hi rungula leli uli djondzaka, na u nyikela yingiso hintamu ka tipontu leti u tsakelaka kuhlamula ka tona. Loko u lulamisela kahle, uta pfuneka hintamu aminhlanganwini naswona aswingataku karhatela kuhlamula. — 2 Kor. 9:6.

16. Hi swihi switirho leswingaku pfunaka kululamisela minhlangano naswona wena uswi tirhisa hi ndlela yihi?

¹⁶ Loko swi koteka, tirhisa switirho swa eletroniku leswi kumekaka hi lirimi leli uli tivaka. Hi kutirhisa nhlengeletano ya yena, Yehovha ahi nyika switirho swa eletroniku leswaku swihi pfuna kululamisela minhlangano. Hi xikombiso, hi kutirhisa telefoni hinga baxara mabuku ka JW Library^®. Ndzhaku, hingaha lerha kumbe kuyingisela rungula la djondzo ka nkama wun’wana ni wun’wana lowu hiwu lavaka. Van’wana va tirhisa JW Library leswaku va pfuxeta minhlangano ka nkama wa kuhumula axikolweni, antirhweni kumbe loko va li karhi va yendza. A Watchtower Library ni BIBLIYOTEKA KA INTERNETI la Watchtower^™ swahi pfuna kukambisisa tipontu leti hi tsakelaka kuti djondza hi wuyenti.

17. a) Hayini swi li swinene kululamisela tinhlamulo ta tinyingi? b) U djondze yini ka vhidiyo lelinge Vana Munghana Wa Yehovha — Lunghiselela Nhlamulo Ya Wena?

¹⁷ Loko swi koteka, lulamisela tinhlamulo ka maparagrafu ya manyingi. Hayini? Hikuva swinga yendleka unga tekeli kuvitaniwa loko u tlakusa voko. Van’wana na vona vangaha va va tlakuse mavoko naswona mufambisi wa nhlangano angaha hlawula mun’wana wa vona. Swinga yendleka mufambisi a hunguta nhlayo ya lava hlamulaka pontu yokarhi leswaku anga yivi nkama ka xiyenge xa yena. Hikolaho, unga heli ntamu kumbe kugodola loko unga tekeli kuvitaniwa. Loko u lulamisa tinhlamulo ka maparagrafu ya manyingi, uta va ni mukhandlu wotala wa kuhlamula. Ungaha tilulamisela kudjondza ndzimana yokarhi kumbe kuhlamula hi marito ya wena n’winyi loko uswi kota. *

18. Hayini hi fanele hi nyikela tinhlamulo leti gomeke?

 ¹⁸ Nyikela tinhlamulo leti gomeke. Hi ntolovelo, tinhlamulo leti gomeke ni leti vevukaka kuti twisisa hi tona ti khutazaka. Hikolaho, lwela kugomisa tinhlamulo ta wena. Tivekeli xikongometo xa kunga tluli 30 wa masegundu loko u hlamula. (Swiv. 10:19; 15:23) Loko kuli leswaku se i khale na u nyikela tinhlamulo, i swinene kuvekela van’wana xikombiso lexinene hi kugomisa tinhlamulo ta wena. Loko u heta nkama wa wunyingi na u vulavula hi swilo swa swinyingi uta chavisa van’wana. Vata pimisa leswaku avangataswi kota kuhlamula hilaha wena u hlamulaka ha kona. Kambe loko u gomisa tinhlamulo ta wena, uta nyika mukhandlu wa leswaku vamakwerhu van’wana va katseka ka nhlangano. Loko u li wa kusungula kuvitaniwa, nyikela nhlamulo yowolova ni leyi kongomaka. Unga lweli kurarambuxa paragrafu hinkwalo. Loko nhlamulo leyi kongomeke se yi nyikeliwile, ungaha tlhantekela swin’wana. Vona kwadru lelinge “ Leswi Ningaswi Hlamulaka”.

19. Xana mufambisi angaku pfunisa kuyini? Kambe i yini leswi u faneleke uswi yendla?

¹⁹ Byela mufambisi wa nhlangano leswaku u tsakela kuhlamula ka paragrafu lokarhi. Loko u boha kuyendla leswo, lavetela mufambisi wa xiyenge na nhlangano wungase sungula. Loko paragrafu leli u tsakelaka kuhlamula ka lona li fika, hantlisela kuli tlakusa kahle voko la wena leswaku mufambisi a kota kuku vona.

20. Hayini hinga fanisaka minhlangano ya hina ni swakudla leswi hi yavelanaka ni vamakwerhu ka pikiniki?

²⁰ Minhlangano ya hina yinga fanisiwa ni swakudla leswi u yavelanaka ni vanghanu. Xana awuta yangulisa kuyini loko vanghanu va wena lavanga karhi va lulamisela pikiniki avoku kombela leswaku u lulamisela swokarhi? Kumbexana awuta karhateka nyana hi leswi ungaswi lulamiselaka. Hambileswo, awuta yendla hinkwaswo leswaku u lulamisela leswi aswita tsakeliwa hi hinkwavo. Hi ndlela leyi fanaka, Yehovha ahi lulamisele tafula leli taleke hi “swakudla” swonandziha ka minhlangano ya hina. (Pis. 23:5; Mat. 24:45) Hambileswo, a tsaka swinene loko hi ta ka minhlangano na hi lulamisele nchumu wokarhi lowu hingata nyikela ha wona. Hikolaho, haku khutaza leswaku u lulamisela minhlangano u tlhela u katseka ka yona hi kunyikela tinhlamulo makhambi yotala hilaha unga kotaka ha kona. Loko u yendla leswo, awungata va na wodla ntsena ka meza wa Yehovha, kambe uta va na u yavelana ni vamakwerhu leswi uswi lulamiseleke.