1. ¿Ambe pʼikuarherasïreni Dabidi Jeoba jimbo ka inde ambe, ambe úspi eska Dabidi úpiringa?

REI DABIDI karaspti: “Jeoba kʼéri ambesti ka jatsisti para kʼéri ambe arhinhani” (Sal. 145:3). Ima xénchasïrendi Jeobani ka inde uékperakua úspti eska kʼéri ambe arhipiringa “kúnguarhikuarhu” (Sal. 22:22; 40:5). Ka seguruchi jarhaska eskachi juchajtu xénchasïnga Jeobani ka eska ísïska ambe enga Dabidi uandapka: “Eskari kʼéri ambe arhinhaaka, oh Jeoba, Israeliri Tata Diosï enga juchari tátika, para méntkisï” (1 Crón. 29:10-13).

2. a) ¿Nénachi úa kʼéri ambe arhini Jeobani? b) ¿Ambeksï pʼikuarherasïni máru erachicha, ka ambechi exea ménderu?

² Ini jurhiatikuecha jimbo, ma ambe engachi úaka úni para kʼéri ambe arhini Jeobani, jindesti komentarini tánguarhikuecharhu. Peru uánikua erachichaksï kánikua úkua jukanchasïndi komentarini. Tsitisïndiksï, peruksï no tarhatasïndi jájki. ¿Nénaksï úa paraksï nóteru chénia? ¿Ka ambejtsïni jarhuataa iáminduechani parachi ambakiti komentariuechani íntspiani? Ante dechi mókuantani ini kurhamarhikuechani, ju je ménderu exeani tʼámu rasonichani engaksï jukaparhakueka engachi jimbo komentarijka tánguarhikuecharhu.

3-5. a) Seguni Ebreu 13:15, ¿andichisï komentarijki tánguarhikuecharhu? b) ¿Nénachi mítiski eska Jeoba no erokuarhisïnga eskachi iáminduecha májkueni komentariuaka?

³ Jeobajtsïni iáminduechani íntskusti sésikua parachi kʼéri ambe arhini (Sal. 119:108). Engachi íntspiajka komentariuechani, ístuksï jindesti komu “kéjtsïtakua úkuni Diosïni” ka no nema uáti úni indeni ambe juchantsïni jimbo (arhinta je Ebreu 13:15). ¿Jeoba afuersa uékasïni eskachi iáminduecha  májku járhati komentariuechani íntspiauaka? Nómbe.

⁴ Jeoba mítisti eskachi no iáminduecha májkueni ambe jorhenaska úni, ni eskachi májkueni ambe nitamanchasïnga ka kánikua jukaparharasïndi ambe engachi újka íntskuni. Ju je eratsintani na enga jásï kéjtsïtakua jiókuarhienga israelitecheri. Imecha engaksï jatsikuarheripka, karichi o chibu sapichu maksï íntspisïrendi. Ka engaksï no jatsikuarheripka, úsïrendiksï tsimani palomasï o pájaruechani íntspiani. Peru enga israelita ma no uénga íntspiani tsimani palomasï sapirhatichani, Jeoba jiókuarhisïrendi sánititu jarina enga ambakitipiringa (Lev. 5:7, 11). Nájkiruka jarina sánderu baratuepka, Tata Diosï kánikua jukaparharasïrendi indeni kéjtsïtakuani, peru kʼóru jatsisïrendi para ambakiti jarineni.

⁵ Iásï jamberi, juchari Tata Diosï seguirixati májkueni eratsini. Engachi íntspiajka komentariuechani, imajtsïni kurhanguchesïndi ka no erokuarhisïndi eskachi xáni sési uandaaka eska Apolusi o ísï seguru uandani eska Pablu enga uénga eskaksï máteruecha jakajkukupiringa (Uku. 18:24; 19:8). Ambe engajtsïni kʼóru kurhachijka, jindesti eskachi jánguarhintaaka xáni eskachi xáni úaka. Ju je miántani imani uarhiiti tsïndini enga íntspipka tsimani monedechani engaksï no jukaparhakuepka. Jeoba jeiapanhintaspti, jimboka íntspispka iámindu enga xáni jatsikuarhipka (Luk. 21:1-4).

6. a) Seguni Ebreu 10:24, 25, ¿nénajtsïni úa pʼikuastani komentariuecha engachi tánguarhikuecharhu kurhauajka? b) ¿Nénajtsï úa xarhatani eskajtsï jukaparharaasïnga erachicheri mókuntskuechani?

⁶ Juchari komentariuecha jingoni, úsïngachi iáminduecha uinhaperperantani (arhinta je Ebreu 10:24, 25). Iáminduechachi tsitisïnga mámaru járhati komentariuechani kurhauani tánguarhikuecharhu. Por ejemplu, tsitisïngachi kurhajchani sapini ma enga mintsita jingoni komentarijka ka uandakuecha jingoni engaksï no úkua jukajka para kurhanguni. Kánikuachi sési pʼikuarherasïnga enga nema tsípikua jingoni eksplikarijka ambakiti ambe enga exentajka. Ka ískujtsïni pakatasïndi imecha engaksï balori jukajka para komentarini, nájkirukaksï timiduejka o engaksï apenasi uénani jaka juchari idioma jorhenguarhini (1 Tes. 2:2). ¿Nénachi uá xarhatakuani eskachi jukaparharasïnga na engaksï xáni jánguarhintajka? Ma ambe engachi úaka úni, jindesti diosmeiamukua íntsaani jiáni enga tánguarhikua kʼamakurhiakia ka arhiani eskajtsïni imecheri komentariu kánikua uinhaperantaska. Ístu, máteru ambe jindesti eskachi juchajtu komentariuaka. Ísï úparini,  no solu juchachi uinhaperanhantaaka, sino ístuchi uinhaperpentaaka (Rom. 1:11, 12).

7. ¿Nénajtsïni marhuachisïni komentarini?

⁷ Marhuachisïndijtsïni komentarini (Is. 48:17). ¿Néna? Primeru, engachi jatsikukuarhiska meta para tarhatani jájki, sánderuchi sési prepararikuarheaka para tánguarhikuecha, sánderuchi sési kurhanguaka Tata Diosïri Karakatani ka sánderuchi úraaka juchari irekuarhu imani ambe engachi jorhenguarhiaka. Segundu, jamberichi sánderu sési pʼikuarheraaka tánguarhikuarhu jarhani, jimbokachi sánderu komentariuaka. Ka terseru, jimboka uétarhisïnga eskachi kánikua jánguarhintaaka para komentarini, nochi sóntku mirikurhiaka ambe engachi uandaaka.

8, 9. a) Seguni Malaquías 3:16, ¿na exejki Jeoba engachi jánguarhintajka para komentarini? b) ¿Peru máruksï néna pʼikuarherasïni?

⁸ Jeoba kánikua sési pʼikuarherasïndi engachi uandajka na engachi xáni jakajkujka. Úakachi seguru jarhani eska imajtsïni kurhaasïnga ka kánikua jukaparharani na engachi xáni jánguarhintajka para komentarini tánguarhikuecharhu (arhinta je Malaquías 3:16). Ístu, újchakurasïndijtsïni parajtsïni xarhatacheni eska jukaparharasïnga engachi jánguarhintajka ísï úni (Mal. 3:10).

⁹ Úsïngachi exeni eskaksï ambakiti rasonicha jarhaska para komentarini. Peru nájkiruka ísïka, jamberiksï máru útasï chéjti tarhatani jájki. Enga cha ísï pʼikuarherajka, asï jáma je desanimarikuarhini. Exeauakachi uánikua Bibliaeri prinsipiuechani ka ejempluechani ka ístu máru konsejuechani engajtsïni iáminduechani jarhuataaka para sánderu komentarini.

10. a) ¿Nénachi pʼikuarherasïni uánikuecha? b) ¿Andichisï úa uandani eska chéni komentarini ambakiti ambe xarhatasïnga?

¹⁰ ¿Kánikuajtsï chésïni méntkisï engajtsï eratsijka tarhatani jájki tánguarhikuarhu? Engajtsï ísï pʼikuarherajka, nójtsï chájkueska. Sáno iáminduechachi sánisï chésïnga engachi komentarijka. Peru enga inde ambe újka eskajtsï no úaka komentarini, uétarhisïndi eskajtsï exeaka andijtsïsï ísï pʼikuarherajki. ¿Jindeski jimbokajtsï chésïnga eskajtsï ma repentku nóteru jánhaskaaka ambe uandani o eskajtsï támisï uandaaka ambe ma? ¿Uandanhiasïntsï eskajtsï no úaka  xáni sési komentarini eskaksï máteruecha? Inde ambe ambakiti ambe xarhatasïndi, jimboka arhikuekasïnga eskajtsï kaxumbitiska ka eskajtsï máteruechani sánderu kʼéri ambe exeasïnga. Jeoba kánikua jeiapanhintasïndi enga nema kaxumbitijka (Sal. 138:6; Filip. 2:3). Peru ístu uékasïndi eskajtsï imani kʼéri ambe arhiaka ka eskajtsï uinhaperantauaka chári erachichani tánguarhikuecharhu (1 Tes. 5:11). Imaksïni xénchasïndi ka íntskuatiksïni balori engajtsï uétarhinchajka.

11. ¿Náki Bibliaeri prinsipiuechajtsïni úa jarhuatani?

¹¹ Ju je exeani máru Bibliaeri prinsipiuechani. Tata Diosïri Karakatajtsïni miátantasïndi eskachi iáminduecha ménisï támisï arhisïnga ambe ma (Sant. 3:2). Jeoba no erokuarhisïndi eskachi perfektueuaka, níjtuksï juchari erachicha erokuarhijki indeni ambe (Sal. 103:12-14). Juchari familia espiritualistiksï ka uékasïndijtsïni (Mar. 10:29, 30; Juanu 13:35). Kurhangusïndiksï eskachi ménisï no úsïnga meru imani ambe uandani engachi uéjka.

12, 13. ¿Ambejtsïni jorhendasïni Neemiasiri ka Jonasiri ejemplu?

¹² Ju je ménderu exeani tsimani Bibliaeri ejempluechani engajtsïni jarhuataaka nóteru chénia. Ju je orheta Neemiasiri ambe exeni enga rei ma jingoni ánchikuarhenga enga kánikua juramukua jatsipka. Enga kurhaapka eskaksï Jerusaleni anapu bardecha ka puertecha xerenhantaspka, Neemiasi kómu pʼikuarheraspti (Neh. 1:1-4). Úakachi jánhaskani na enga xáni chépka enga rei arhipka eska eiangupiringa andisï xáni kómu pʼikuarherani japi. Antesi de aianguni, Neemiasi jirejiresï kómarhikua ma úspti. Indeni ambe jimbo, rei kánikua jarhuataspti Tata Diosïri iretani (Neh. 2:1-8). Neemiasiri ejemplujtsïni jorhendasïndi eskachi jatsiska para kómarhini ante de mókuntani. Ístu, ju je exeni Jonasiri ejemplu. Enga Jeoba arhipka eska Nínibe nipiringa aianhpini, Jonasi xáni chéspti enga máteru ladu jimbo nípka (Jon. 1:1-3). Peru Tata Diosïri jarhuajperata jingoni, úspti úni imeri ánchikuarhitani ka ambe enga aianguapka ninibitechani, uánikuechani marhuakuaspti (Jon. 3:5-10). Jonasiri ejemplujtsïni jorhendasïndi eskajtsïni Jeoba úaka jarhuatani parachi marhuakuni, no arhiparini na engachi xáni chéni jauaka. ¿A no eskajtsïni juchari erachicha no xáni chérasïnga komu ninibitecha?

¹³ ¿Náki konsejuechajtsïni jarhuataa íntspiani komentariuechani engaksï uinhaperantauaka juchari erachichani? Ju je exeani máru.

14. a) ¿Andichisï jatsi para sési prepararikuarhini para tánguarhikuecha? b) ¿Na jatinchi úa prepararikuarhini?

¹⁴ Ju je prepararikuarhini para iámindu tánguarhikuecha. Engachi arhutaska tiempu parachi sési prepararikuarhini, sánderuchi seguru pʼikuarheraaka para komentarini (Prov. 21:5). Ísïsti, nochi iáminduecha májku jandora úsïnga prepararikuarhini. Eloise enga tsïndi máeka enga jukari 80 jatirikia, uénasïndi prepararikuarhini rebista Aianhpiri jingoni enga uénani jarhajka semana. Uandasïndi: “Sánderuni sési pʼikuarherasïnga tánguarhikuecharhu engani máru jurhiatikuechani antesi prepararikuarhijka”. Pirenchi ma enga Joy arhinhajka ka tiempu kompletueri ánchikuarhini, prepararikuarhisïndi rebista Aianhpiri  jingoni ma jurhiatikua ante deksï tánguarhini, jimboka uandasïnga eska tsitisïnga sési miáni jarhani informasionini. Ike, orhejtsïkuti ma enga kánikua okupadu jarhajka ka enga ístu prekursorika, uandantasïndi: “Kuenta íntskukuarhiska eska para ji, sánderu sésiska mándani ratu estudiarini interu semana, enbesi de mátirku iámindu”.

15. ¿Ambechi úa parachi sési prepararikuarhini para tánguarhikua ma?

¹⁵ ¿Ambechi úa parachi sési prepararikuarhini para tánguarhikua ma? Ambe engachi orheta jatsika para úni, jindesti Jeobani kurhakuni imeri espiritu santu (Luk. 11:13; 1 Juanu 5:14). Tátsekua, ju je exeni tituluni, subtituluechani, imajenichani ka rekuadruechani parachi kuenta íntskukuarhini ambe engachi exeaka artikulurhu. Jimajkani, ju je uénani estudiarini mándani párrafu jingoni ka arhiantani tekstuechani na engachi xáni úaka. Ju je eratsintani ambe enga arhijka informasioni ka sánderu imani ambe engachi uékapiringa komentarini. Engachi sánderu sési prepararikuarheaka, sánderujtsïni marhuachiati ka sánderu fásiliuati eskachi komentariuaka (2 Kor. 9:6).

16. ¿Cha náki jarhuajperatechani jatsiaski ka nénajtsï úraasïni?

¹⁶ Ju je úraani programechani ka aplikasionichani engaksï jaka. Úraparini imeri organisasionini, Jeobajtsïni uánikua jarhuajperatechani íntsaasti parachi úni sési prepararikuarhini. Aplikasioni JW Library^® jimbo, úsïngachi késkuani telefonurhu o tabletarhu publikasionichani engaksï jindeka para estudiarini. Ísïchi úsïnga estudiarini informasionini o solu arhintani o audiu jimbo kurhaani, káni ka nani engachi uékaaka. Jarhastiksï máru engaksï úrajka ini aplikasionini paraksï estudiarini engaksï mintsikuarhini jarhajka ánchikuarhitarhu, eskuelarhu o engaksï biajarini jarhajka. Ístu, programa Watchtower Library, ka BIBLIOTEKA INTERNETIRHU Watchtower^™ jimbo, sánderu fásilisti sési inbestigarini máru ambe.

17. a) ¿Andisï xáni sésii uánikua komentariuecha jingoni prepararikuarhini? b) ¿Ambejtsï jorhenguarhiski bideu jingoni Jeobaeri amigu úkuarhi: Sési preparari chíti komentariuni?

¹⁷ Engachi úaka, ju je mándani artikulu jimbo uánikua komentariuechani preparariuani. ¿Andi? Jimbokajtsïni no méntkisï íntskuaka komentariu ma engachi tarhataaka jájki. Jamberiksï máteruechajtu tarhataati jájki ka ima enga orhejtsïkuni jauaka, nójtsïni juchantsïni íntskuni komentariu. Ístu, orhejtsïkuti jamberi jatsiati para no xáni uáni komentariuechani íntspiani para no jukari tiempu úrani. Ísï jimbo, ju je no no sési exeni o no sési pʼikuarherani engachi no úaka primeru párrafuecha jimbo komentarini. Engachi uánikua komentariuecha jingoni prepararikuarhiska, sánderuchi oportunidadi jatsiaka para komentarini. Ambe ma engachi úaka úni, jindesti tarhatani jájki parachi Bibliaeri tekstu ma arhintani. Peru engachi úska, ístu ju je prepararini komentariu ma juchari uandakuecha jingoni. *

18. ¿Andichisï jatsi para no xáni kʼérati komentariuechani íntspiani?

 ¹⁸ Ju je namunitu uandakuecha jingoni komentarini. Sáno méntkisï, komentariuecha engaksï sánderu uinhaperpintajka, jindestiksï engaksï no xáni kʼérajka ka sésiksï kurhangukuarhini. Ísï jimbo, ju je jánguarhintani íntspiani mókuntskuechani engaksï treinta segundu durariuaka o menusi (Prov. 10:19; 15:23). Jukaparhakuesti eska imecha engaksï ióni páni jakaia komentarini tánguarhikuecharhu, ambakiti ejempluksï ma xarhataaka para ísï komentarini. Engaksï íntspiauaka komentariuechani engaksï ióni durariuaka, inde ambe úati eskaksï máteruecha chéaka tarhatani jájki, eratsiparini eskaksï no úaka xárhati komentariuechani íntspiani eskaksï imecha. Ístu, engaksï komentariuecha no xáni kʼérajka, uánikua erachichaksï jatsisïndi oportunidadi para komentarini. Enga ma párrafu jimbo jucha uénaska intsïnhani komentariu ma, uétarhisïndi eska juchari komentariu sési kurhangukuarhiaka ka eska mókuntaaka kurhamarhikuani, ka no iámindu párrafueri ambe uékani uandani. Enga exekuarheakia ima ambe enga sánderu jukaparhakueka, úakajtsï máteru ambe kuturhutani (exe je rekuadruni “ ¿Ambe ka ambe úa komentarini?”).

19. ¿Nénajtsïni úa jarhuatani orhejtsïkuti, peru ambechi jatsiski para úni?

¹⁹ Ju je arhini imani enga orhejtsïkuaka, eskachi uékapiringa párrafu ma jimbo komentarini. Engachi eratsiska ísï úni, eianguakachi erachini antesi de uénakuarhini tánguarhikua. Engachi imani párrafu jimbo niáraakia, ju je sóntku ka sési tarhatani jájki parajtsïni erachi exeni.

20. ¿Tánguarhikuechaksï néna sáno májkueniski komu amiguecha jingoni tʼireni?

²⁰ Tánguarhikuechaksï ísïsti komu amiguecha jingoni tʼireni. Engajtsïni máru erachicha pʼímarhiska barbakoa nirani arhani ka arhintsïni eskachi paaka ambe ma enga no xáni úkua jukaka para úntani, ¿ambechi úa? Jamberichi sánisï chéni pʼikuarheraaka, peru kʼóruchi kánikua jánguarhintaaka para imani ambe páni engaksï iáminduecha anhenchaaka. Tánguarhikuecharhu, Jeoba jindesti engajtsï pʼímarhijka, uánikua ambakiti ambejtsïni pérachisïndi mesa ma jimbo (Sal. 23:5; Mat. 24:45). Ima kánikua sési pʼikuarherasïndi engachi juchajtu íntskujka ambe ma enga no xáni kʼéri ambejka, peru engachi kánikua jánguarhintajka. Ísï jimbo, ju je sési prepararikuarhini ka jánguarhintani komentarini xáni eskachi xáni úaka. Indeni ambe úparini, no soluchi Jeobaeri mesa jimbo tʼireaka, sino ístuchi jarhuatauaka máteruechani ísï úni.