NKHANI YAKUSAMBIRA 2
Lumbani Yehova Mukati mu Mpingo
“Nimulumbaninge mukati mu mpingo.”—SAL. 22:22.
SUMU 59 Lumbani Ya Pamoza na Ine
CHILATO CHA NKHANI IYI *
1. Kasi Davide wakamuwonanga wuli Yehova, ndipo vikamupangiska kuchitachi?
THEMBA DAVIDE likalemba kuti: “Yehova ni mukuru, ngwakwenelera chomene kulumbika.” (Sal. 145:3) Iyo wakamutemwanga chomene Yehova ndipo ichi chikamupangiska kuti walumbe Chiuta “mukati mu mpingo.” (Sal. 22:22; 40:5) Tikukayika yayi kuti mukumutemwa Yehova ndipo mukukolerana na mazgu gha Davide ghakuti: “Mulumbike imwe, a Yehova Chiuta wa Israyeli dada withu, muyirayira wose.”—1 Mid. 29:10-13.
2. (a) Kasi tingamulumba wuli Yehova? (b) Kasi ŵanyake ŵali na suzgo wuli, ndipo tidumbiskanenge vichi?
2 Nthowa yimoza iyo tikulumbira Yehova mazuŵa ghano nkhuzgorapo pa maungano gha mpingo. Kweni ŵabali na ŵadumbu ŵanyake ŵali na suzgo pa nkhani iyi. Ŵakukhumba kuzgorapo pa maungano, kweni ŵakutondeka chifukwa cha wofi. Kasi ŵangamazga wuli wofi uwu? Ndipo ni fundo wuli izo zingatovwira kuti mazgoro ghithu ghakhozgenge ŵanji? Pambere tindazgore mafumbo agha, tiyeni tidumbiskane dankha vifukwa vikuru vinayi ivyo tikuzgolerapo pa maungano.
CHIFUKWA ICHO TIKUZGOLERAPO PA MAUNGANO
3-5. (a) Kuyana na ivyo lemba la Ŵahebere 13:15 likuyowoya, chifukwa wuli tikuzgorapo pa maungano? (b) Kasi tose tikwenera kuzgora mwakuyana? Longosorani.
3 Tose Yehova watipa mwaŵi wa kumulumba. (Sal. 119:108) Mazgoro ghithu pa maungano ntchigaŵa cha “sembe ya malumbo” ndipo palije uyo wangatipelekera sembe iyi. (Ŵazgani Ŵahebere 13:15.) Kasi Yehova wakukhumba kuti tose tipelekenge sembe yakuyana, panji tizgorenge mwakuyana pa maungano? Yayi.
4 Yehova wakumanya kuti tili na maluso ghakupambana ndipo ivyo vikutichitikira pa umoyo navyo ni vyakupambana. Iyo wakuwonga chomene sembe izo tikukwaniska kumupa. Ghanaghanirani sembe zakupambanapambana izo wakapokeleranga ku Ŵaisrayeli. Ŵaisrayeli ŵanyake ŵakakwaniskanga kupeleka mberere panji mbuzi. Kweni Muisrayeli mukavu wakapelekanga “njiŵa ziŵiri panji viwunda viŵiri.” Ndipo para Muisrayeli wangakwaniska yayi kupeleka njiŵa ziŵiri panji viwunda viŵiri, Yehova wakazomeranga “ufu uwemi wakukwana chimoza cha vigaŵa 10 vya efa.” (Lev. 5:7, 11) Ufu ukaŵanga wakudura yayi, kweni Yehova wakawonganga sembe iyi, chikuru ni “ufu uwemi.”
5 Chiuta withu walusungu ndimo wakuwoneraso vinthu mazuŵa ghano. Panyengo yakuzgora pa maungano, wakukhazga kuti tose timanyenge kuyowoya nga ni Apolo panji ŵakukopa nga ni Paulosi yayi. (Mil. 18:24; 26:28) Icho Yehova wakukhumba ntchakuti tipelekenge zgoro liwemi ilo tingafiska. Kumbukani chokoro icho chikapeleka tundalama tuŵiri twakuzirwa pachoko. Yehova wakakondwa na chokoro ichi chifukwa chikapeleka ivyo chingakwaniska.—Luka 21:1-4.
Tikusanga chandulo usange tikuzgorapo pa maungano ndipo ŵanyithu nawo ŵakusanga chandulo (Wonani ndime 6-7) *
6. (a) Kuyana na lemba la Ŵahebere 10:24, 25, kasi mazgoro agho tikupulika pa maungano ghangatikhwaska wuli? (b) Kasi mungalongora wuli kuti mukuwonga mazgoro agho ghamukhozgani?
6 Tikukhozgana na mazgoro ghithu. (Ŵazgani Ŵahebere 10:24, 25.) Tose tikukondwa para tikupulika mazgoro ghakupambanapambana pa maungano. Tikukondwa na mazgoro ghapusu, kweniso agho mwana wakuzgora kufumira pasi pa mtima. Tikukhozgeka chomene para munyake wakulongosora unenesko unyake uwo wabowozga waka sono. Kweniso tikukondwa para ŵanyake ‘ŵakuchita chikanga’ kuti ŵazgorepo nangauli mwakawiro mbasoni panji ŵakusambira waka chiyowoyero. (1 Tes. 2:2) Kasi tingalongora wuli kuti tikuwonga ivyo ŵakuchita? Para maungano ghamara, tingaŵawonga chifukwa cha mazgoro ghawo ghakukhozga. Nthowa yinyake njakuti nase tizgorengepo pa maungano. Ichi chikovwira kuti tileke kukhozgeka waka pa maungano, kweni nase tikhozgenge ŵanyithu.—Rom. 1:11, 12.
7. Kasi tikusanga chandulo wuli para tikuzgorapo pa maungano?
7 Nase tikusanga chandulo para tikuzgorapo. (Yes. 48:17) Mwawuli? Chakwamba, tikunozgekera makora maungano para tikukhumba kukazgorapo. Para tikunozgekera makora, tikughapulikiska makora Mazgu gha Chiuta. Ndipo usange taghapulikiska makora mazgu gha Chiuta, chikuŵa chipusu kulondezga ivyo tasambira. Chachiŵiri, maungano ghakutinozgera chomene para tanozgekera chifukwa nase tikuzgorapo. Chachitatu, pakuti tikwenera kuchitapo kanthu kuti tizgorepo, tikuluwa bweka yayi ivyo tanguzgora pa maungano.
8-9. (a) Nga umo pakulongolera pa Malaki 3:16, kasi mukughanaghana kuti Yehova wakughawona wuli mazgoro ghithu? (b) Kasi ŵanyake ŵali na suzgo wuli?
8 Tikukondweska Yehova para tikulongosora chipulikano chithu. Tikukayika yayi kuti Yehova wakutegherezga para tikuzgorapo pa maungano ndipo wakuwonga chomene para tikuyezgayezga kuti tizgorengepo. (Ŵazgani Malaki 3:16.) Kuti walongore kuwonga, wakutitumbika apo tikuyezgayezga kumukondweska.—Mal. 3:10.
9 Ntchakuwonekerathu kuti tili na vifukwa viwemi vyakuzgolerapo pa maungano. Kweni ŵanyake ŵakopa kuwuska woko kuti ŵazgorepo. Para namwe mukopa, kugongowa yayi. Tiyeni tidumbiskane fundo zinyake za mu Baibolo, na masachizgo agho ghangatovwira kuti tizgorengepo pa maungano.
KUMAZGA WOFI
10. (a) Kasi taŵanandi tili na wofi wuli? (b) Chifukwa wuli para munthu wakopa kuzgora pa maungano ndikuti wali na mukhaliro uwemi?
10 Kasi munthumbo mukusungunuka nyengo yiliyose para mukughanaghana vya kuwuska woko kuti muzgore? Para ndimo viliri, muli mwekha yayi. Unenesko ngwakuti taŵanandi mtima ukutimba para tikuzgora. Kuti mumazge wofi uwo ukumutondeskani kuti muzgorengepo pa maungano, mukwenera kumanya dankha icho chikumupangiskani kuti muŵe na wofi. Kasi mukopa kuti muluwenge ivyo mukukhumba kuyowoya panji mutetenge zgoro? Kasi mukopa kuti zgoro linu liŵenge liwemi yayi pakuyaniska na mazgoro gha ŵanyinu? Wofi uwu nguwemi waka. Ukulongora kuti ndimwe ŵakujiyuyura ndipo mukuwona kuti ŵanyinu ŵakumuluskani. Yehova wakutemwa ŵanthu ŵakujiyuyura. (Sal. 138:6; Fil. 2:3) Kweni Yehova wakukhumbaso kuti mumulumbenge kweniso mukhozgenge ŵabali na ŵadumbu ŵinu pa maungano. (1 Tes. 5:11) Wakumutemwani ndipo wamupaninge chikanga icho mukukhumbikwira.
11. Ni ulongozgi wuli wa mu Baibolo uwo ungatovwira?
11 Wonani ulongozgi unyake wa mu Baibolo. Baibolo likuti tose tikubudiska ivyo tikuyowoya na umo tikuyowoyera. (Yak. 3:2) Yehova wakulindizga kuti vyose tichitenge makora pera yayi, ndipo ŵabali na ŵadumbu ŵithu nawo ndimo ŵakuwonera. (Sal. 103:12-14) Iwo ni mbumba yithu yauzimu, ndipo ŵakutitemwa chomene. (Mrk. 10:29, 30; Yoh. 13:35) Iwo ŵakumanya kuti nyengo zinyake ivyo takhumbanga kuyowoya ndivyo tikuyowoya yayi.
12-13. Kasi tikusambirako vichi kwa Nehemiya na Yona?
12 Ghanaghanirani nkhani za ŵanthu ŵanyake ŵa mu Baibolo izo zingamovwirani kumazga wofi. Kumbukani Nehemiya. Wakateŵeteranga mu nyumba ya themba lankhongono. Zuŵa linyake Nehemiya wakaŵa na chitima chomene chifukwa wakapulika kuti viliŵa na vipata vya Yerusalemu vili kubwanganduka. (Neh. 1:1-4) Ghanaghanirani waka umo matumbo ghakasungunukira apo themba likamufumbanga kuti walongosore chifukwa icho wakawonekeranga wambura kukondwa. Mwaluŵiro Nehemiya wakalomba na kulongosora. Themba likati lapulika, likachita vinthu vinandi kuti lovwire ŵanthu ŵa Chiuta. (Neh. 2:1-8) Ghanaghaniraniso za Yona. Apo Yehova wakamutuma kuti wakayowoye na ŵanthu ŵa ku Nineve, Yona wakawopa chomene mwakuti wakachimbilira kunyake. (Yona 1:1-3) Kweni Yehova wakamovwira, ndipo Yona wakafiska uteŵeti wake. Ndipo mazgu agho wakayowoya, ghakawovwira chomene ŵanthu ŵa ku Nineve. (Yona 3:5-10) Kwa Nehemiya tikusambirako kuti ntchiwemi chomene kuti tilombenge pambere tindazgore. Ndipo kwa Yona tikusambirako kuti Yehova wangatovwira kuti timuteŵetere nanga tingaŵa na wofi. Kasi ulipo mpingo uwo ngwakofya chomene kujumpha umo ŵakaŵira Ŵanineve?
13 Ni ulongozgi wuli uwo ungamovwirani kuti muzgorenge mazgoro ghakukhozga pa maungano? Tiyeni tiwone masachizgo ghachoko waka.
14. Chifukwa wuli tikwenera kunozgekera makora maungano, ndipo tingachita wuli?
14 Munozgekerenge maungano. Para mwanozgekerathu maungano, muŵavyenge wofi pakuzgora. (Zinth. 21:5) Mbunenesko kuti tose tikunozgekera nyengo yakuyana yayi. Eloise, mudumbu wa vyaka 80 uyo mfumu wake wali kufwa, wakwamba kunozgekera Gongwe la Mulinda kukwambilira kwa sabata. Iyo wakuti, “Maungano ghakuninozgera chomene para nanozgekerathu.” Joy, uyo wakugwira ntchito yakulembeka, wakupatura nyengo pa Chisulo kuti wanozgekere Gongwe la Mulinda. Iyo wakuti: “Nkhukumbuka makora vinthu para zuŵa la maungano lili kufupiko.” Ike, uyo ni munthu wakutangwanika chomene chifukwa ni mulara kweniso mupayiniya wakuti: “Kwa ine vikunendera makora para nkhusambira vinthu vichoko waka zuŵa lililose mu sabata kuluska kusambira vinandi nyengo yimoza.”
15. Kasi mungachita wuli kuti munozgekere makora maungano?
15 Ni vichi vinyake ivyo tingachita kuti tinozgekerenge makora maungano? Nyengo yiliyose pambere mundambe kusambira pamwekha, mukwenera kulomba dankha Yehova kuti wamupani mzimu utuŵa. (Luka 11:13; 1 Yoh. 5:14) Kufuma apo, woneranithu ivyo musambirenge. Wonani mutu wa nkhani, mitu yichokoyichoko, vithuzi, na bokosi lakuweleramo. Apo mukusambira ndime yiliyose, ŵazgani malemba ghose agho mungafiska. Ghanaghaniranipo ivyo mukuŵazga, na kuwona mwakupwelelera fundo izo mukukhumba kukazgorapo. Para mwanozgekera makora, musangenge chandulo chikuru ndipo vyamumusuzgani yayi kuzgorapo.—2 Kor. 9:6.
16. Kasi muli na vichi ivyo vingamovwirani pakusambira, ndipo mukuvigwiliskira wuli ntchito?
16 Usange ntchamachitiko, gwiliskirani ntchito mapulogiramu gha pa kompyuta agho gulu lapeleka mu chiyowoyero icho mukuchimanya. Kwizira mu gulu lake, Yehova watipa mapulogiramu gha pa kompyuta kuti ghatovwire pakunozgekera maungano. JW Library app yikutovwira kuti tichite dawunilodi mabuku agho tikusambira pa maungano kuti ghaŵe mu foni panji pa tabuleti yithu. Ndipo tingasambira, kuŵazga, panji kutegherezga nyengo yiliyose ndiposo kulikose uko tingaŵa. Ŵanyake ŵakugwiliskira ntchito pulogiramu iyi kuti ŵasambirenge panyengo yakupumura ku ntchito, ku sukulu, panji para ŵali paulendo. Watchtower Library na LAYIBULARE YA PA INTANETI ya Watchtower vikutovwira kuti chiŵe chipusu kupenjerezga fundo zakusazgikira pa nkhani iyo tikukhumba kuyipulikiska makora.
Mphawuli apo mukupatura nyengo kuti munozgekere maungano? (Wonani ndime 14-16) *
17. (a) Chifukwa wuli ntchiwemi chomene kunozgekera mazgoro ghanandi? (b) Kasi mwasambira vichi mu vidiyo yakuti Ŵani Ŵabwezi ŵa Yehova—Kunozgekera Kukazgorapo?
17 Para mungakwaniska, nozgekerani mazgoro ghanandi pa sambiro lililose. Chifukwa wuli? Chifukwa ni nyengo zose yayi apo wakulongozga wamuwuskaninge para mwawuska woko. Ntchakuwonekerathu kuti ŵanyinu ŵanyake nawo ŵamuwuska mawoko, ndipo uyo wakulongozga wangakawuska iwo. Kuti maungano ghamare pa nyengo yake, wakulongozga wakuŵawuska yayi ŵanthu ŵanyake. Ntheura lekani kukhuŵara panji kugongowa para wandamuwuskani kukwambilira kwa sambiro. Para mwanozgekera mazgoro ghanandi, mukuŵa na m’pata unandi wakuti muzgorepo. Chinyake icho mungachita kuti muzgorepo, nkhuŵazga lemba. Kweni usange mungakwaniska, nozgekerani kuzgorapo mu mazgu ghinu na ghinu. *
18. Chifukwa wuli ntchiwemi kuzgora mwakudumura?
18 Zgorani mwakudumura. Kanandi mazgoro ghakukhozga chomene ghakuŵa ghakudumura ndiposo ghapusu. Ntheura muzgorenge mwakudumura. Yezgayezgani kuti mazgoro ghinu ghaleke kujumpha masekondi 30. (Zinth. 10:19; 15:23) Usange mwazgora pa maungano kwa vyaka vinandi, ntchakuzirwa chomene kuti muŵe chakuwonerapo chiwemi pa nkhani iyi. Muzgorenge mazgoro ghapusu ndiposo ghakudumura. Para mukuyowoya vinthu vinandinandi kwanyengo yitali, mupangiskenge ŵanyinu kuti ŵawopenge kuzgora chifukwa ŵaghanaghanenge kuti ŵangafiska yayi kuzgora nga ndimwe. Kweniso para mukuzgora mwakudumura, musidengeko nyengo yakuti ŵanandi ŵazgorepo. Ntchiwemi kuzgora zgoro lipusu na lakudunjika, chomenechomene para ndimwe wakwamba kuzgorapo pa fumbo ilo lafumbika. Lekani kuzgora fundo zose izo zili mu ndime. Para fundo yikuru ya mu ndime yazgoreka, ndipo mungasazgapo fundo zinyake.—Wonani bokosi la mutu wakuti Kasi Ningazgora Vichi?”
19. Kasi uyo wakuchitiska sambiro wangamovwirani wuli kuti muzgorepo, kweni kasi mukwenera kuchita wuli?
19 Mungamuphalira uyo wakulongozga kuti mukukhumba kuzakazgorapo pa ndime yinyake. Usange ndivyo mukukhumba kuzakachita, mungamuphalilirathu uyo wakuchitiska pambere maungano ghandambe. Para nyengo yakwana yakuti muzgore ndime iyo mwangumuphalira, muzakawuske luŵiro woko linu muchanya kuti wamuwonani.
20. Kasi mpingo ukuyana wuli na chakurya chakulyera lumoza na ŵabwezi ŵinu?
20 Muwonenge maungano gha mpingo nga ntchakurya icho tikulyera lumoza na ŵabwezi ŵithu. Tiyelezgere kuti ŵabwezi ŵinu ŵanyake mu mpingo ŵanozga chiphikiro ndipo ŵamupemphani kuti pakwiza muyegheko chakurya chilichose chichoko waka, kasi mungachita wuli? Pakwamba mungawopa dankha. Mungajifumba kuti muyeghenge vichi, kweni mungayezgayezga kuyegha chakurya icho waliyose wangachitemwa. Yehova, uyo wakutichemera ku chiphikiro wakutinozgera vinthu viwemi chomene pa maungano. (Sal. 23:5; Mat. 24:45) Ndipo wakukondwa chomene para tikuyeghako kachakurya kachoko waka ako tingakwaniska. Ntheura nozgekerani makora maungano na kuzgorapo nyengo yiliyose iyo mungakwaniska. Para muchitenge nthena, ndikuti mukurya waka yayi pa thebulu la Yehova, kweni mukuyeghakoso kachakurya kachoko kuti ŵanyinu nawo mu mpingo ŵaryeko.
SUMU 2 Zina Linu Ndimwe Yehova
^ ndime 5 Nga ni wamasalimo Davide, tose tikumutemwa Yehova ndipo tikukondwa para tikumulumba. Para tawungana na mpingo withu kuti tisope Chiuta, tikuŵa na mwaŵi wapadera wakulongolera kuti tikumutemwa. Kweni taŵanyake vikutisuzga kuzgorapo pa maungano. Usange muli na suzgo ili, nkhani iyi yimovwiraninge kuti mumanye chifukwa icho mukopera kuzgorapo pa maungano na ivyo mungachita kuti mumazge wofi.
^ ndime 17 Pa Jw.org/tum, wonelerani vidiyo yakuti Ŵani Ŵabwezi ŵa Yehova—Kunozgekera Kukazgorapo. Wonani pa IVYO BAIBOLO LIKUSAMBIZGA > ŴANA.
^ ndime 63 MAZGU GHAKULONGOSORA CHITHUZI: Ŵabali na ŵadumbu mu mpingo ŵakuzgorapo pa Gongwe la Mulinda.
^ ndime 65 MAZGU GHAKULONGOSORA CHITHUZI: Ŵabali na ŵadumbu awo ŵangulongoreka pakwamba ŵakunozgekera Gongwe la Mulinda. Nangauli waliyose wali na nthangwanika zake, kweni wose ŵapatura nyengo ya kunozgekera sambiro ilo lamusambirika ku maungano.
