1. Мар шӧдӥз Давид Иегова пумысен? Мар карыны солэсь мылкыдзэ ӝутӥз со шӧдон?

 ДАВИД ЭКСЭЙ гожтӥз: «Кузё-Инмар быдӟым, ушъянлэсь ушъямон» (Пс. 144:3). Со Иеговаез яратӥз, но яратон солэсь мылкыдзэ ӝутӥз «калык люкаськон пӧлын» Инмарез данъяны (Пс. 21:23; 39:6). Веранэз ӧвӧл, тӥ но Иеговаез яратӥськоды но тӥляд шӧдонъёсты Давидлэн кадь ик, кудӥз вераз: «Тон, атаймылэн, Израильлэн Инмарез, Кузё-Инмар, данлыко, дауръёс кутсконысен, пумтэм дауръёс ӵоже» (1 Пар. 29:10—13).

2. а) Кызьы ми Иеговаез данъяны быгатӥськомы? б) Кыӵе шуг-секытэн куд-ог христианъёс пумисько? Мае ми эскеромы таяз статьяын?

² Кызьы ми Иеговаез данъяны быгатӥськомы? Кылсярысь, христиан пумиськонъёсын эскеронэ пыриськыса. Нош куд-ог вын-агайёслы но сузэр-апайёслы со туж секыт сётӥське. Соослэн валэктонъёс сётъямзы потэ, но соослы кышкан люкетэ. Кызьы сое вормоно? Кыӵе пайдаё визь-кенешъёс юрттозы котькудмылы, эскеронэ пыриськыса, ог-огмылэсь мылкыдмес ӝутыны? Та юанъёслы валэктонъёс тодэмлэсь азьло, ойдолэ эскеромы ньыль валтӥсь мугъёсты, малы ми пумиськонъёсамы эскеронэ пыриськиськомы.

3—5. а) Малы ми пумиськонъёсамы эскеронэ пыриськиськомы, кызьы адӟиське Еврейёслы 13:15? б) Кулэ-а пумиськонъёсын котькудмылы огвыллемесь валэктонъёс сётъяны? Валэктэ.

³ Иегова котькудмылы сое данъяны луонлык сётӥз (Пс. 118:108). Кенешлэн пумиськоназ сётэм валэктонъёсмы — «ушъян-данъян курбонлэн» люкетэз, но ми интые сое нокин  уз вайы. (Лыдӟе Еврейёслы 13:15.) Но куре-а Иегова, солэн ужась-тыршисьёсыз огкадь «ушъян-данъян курбон» мед ваёзы шуыса? Уг, уг куры!

⁴ Иегова тодэ, быгатонлыкъёссы но югдуръёссы ваньмызлэн одӥг кадь ӧвӧл шуыса, но туж дунъя курбонъёсты, кудъёссэ ми солы вайыны быгатӥськомы. Тодамы ваёмы, кыӵе курбонъёсты Иегова израиль калыклэсь басьтэ вал. Кин ке но курбонлы сётыны быгатэ вал егит ыжез яке кечез. Но израиль калыкысь адями куанер вал ке, со «кык кыр дыдыкъёсты яке кык пинал гурт дыдыкъёсты» вайыны быгатэ вал. Нош куке со кык тылобурдоез но вайыны ӧз быгаты, Иегова солэсь «ефа чабей пызьлэсь дасэтӥ люкетсэ» басьтыны дась вал (Лев. 5:7, 11). Пызь дунтэмгес вал, нош куке курбонлы самой умой пызез вайылӥзы, соку Иегова сое дунъялляз.

⁵ Милям ӟеч сямо Инмармы ӧз воштӥськы. Со уг возьма, ми христиан пумиськонъёсамы Аполлос кадь кыллы устоесь луомы но Павел кадь адямиосты оскытӥсь кылъёсын вераськыны быгатомы шуыса (Ап. уж. 18:24; 26:28, ВД). Иеговалэн потэ, ми быгатэммыя эскеронэ мед пыриськомы шуыса. Лэсьтыны быгатонтэмзэ со милесьтым уг возьма. Тодады вае куанер палкышноез, кудӥз курбонлы кык лепта сётӥз. Иегова дунъяз солэсь курбонзэ, малы ке шуоно со сётӥз самой умойзэ, маиз солэн вал (Лука 21:1—4).

6. а) Кызьы ми вылын шӧдӥськыны быгато пумиськонын сётэм валэктонъёс, Еврейёслы 10:24, 25 кылъёсты лыдэ басьтыса? б) Кызьы возьматоно, эскеронэ пыриськисьёслэсь тыршемзэс дунъяськомы шуыса?

⁶ Валэктонъёс сётъяса, ми ог-огмылэсь мылкыдмес ӝутӥськомы. (Лыдӟе Еврейёслы 10:24, 25.) Ваньмылы асьмелы туж кельше кылыны вын-агайёсмылэсь но сузэр-апайёсмылэсь пӧртэм валэктонъёссэс. Милемлы мусо кылӥсько нылпиослэн огшоры кылъёсын но сюлмысь верам валэктонъёссы. Куке зэмлык сярысь ӝутскем мылкыдын верало соос, кинъёс сое алигес тодӥзы, соослэн кылъёссы милям сюлмамы ик пыро. Ми туж шумпотӥськомы кылыны соосты, кинъёс «чик кышкатэк» валэктон сётыны быгатӥзы, возьдаськемзы яке кылэз урод тодэмзы шоры учкытэк (1 Фес. 2:2). Кызьы возьматоно, ми соослэсь тыршемзэс дунъяськомы шуыса? Пумиськон бере валэктон сётэмзы понна соосты тау кареммы луэ. Озьы ик ми асьмеос но эскеронэ пыриськыны быгатӥськомы. Соку милям гинэ уз, нош мукетъёсызлэн но мылкыдзы ӝутскоз (1 Фес. 2:2).

7. Кыӵе пайда вае эскеронэ пыриськон?

 ⁷ Эскеронэ пыриськыса, ми асьмеос но пайда басьтӥськомы (Ис. 48:17). Малы? Нырысь ик, ми валэктон сётыны малпаськомы ке, соку пумиськонлы умой дасяськыны тыршомы. Умой дасяськыса, ми Инмарлэсь Кылзэ мургес валаськомы. Но макем мургес ми сое валаськомы, сокем умойгес быгатӥськомы тодэммес улонамы кутыны. Кыкетӥез, ми эскеронэ пыриськиськомы ке, соку пумиськонъёс милемлы тросгес шумпотон ваёзы. Куинетӥез, валэктонэз дасян понна тыршыны кулэ. Соин ик, эскеронэ пыриськыку верам малпанъёс кемалыгес тодамы кылёзы.

8, 9. а) Мар, тӥ малпамъя, шӧдэ Иегова, куке ми пумиськонъёсын валэктонъёс сётъяськомы, кызьы адӟиське Малахиялэн 3:16? б) Малы куд-ог христианъёс эскеронэ уг пырисько?

⁸ Осконмы сярысь вераса, ми Иеговаез шумпоттӥськомы. Оскыны луэ: Иегова кылэ милемыз но дунъя пумиськонын валэктонъёс сётъяны тыршеммес. (Лыдӟе Малахиялэсь 3:16.) Ми вань кужмысьтымы сое шумпоттыны тыршиськомы ке, со милемыз бакель каре (Мал. 3:10).

⁹ Озьыен, милям трос мугъёсмы вань христиан пумиськонъёсамы эскеронэ пыриськыны. Озьы ке но, тросэз кизэс ӝутыны кышкало. Тӥляд но сыӵе ик шӧдонъёсты вань ке, мылкыдды медаз куашка. Ойдолэ эскеромы Библиысь возетъёсты, улонысь примеръёсты но пайдаё визь-кенешъёсты, кудъёсыз котькудмылы юрттозы пумиськонъёсын валэктонъёс ӵемгес сётъяны.

10. а) Малэсь кышкало тросэз ми пӧлысь? б) Мар сярысь вераны быгатэ сыӵе кышкан?

¹⁰ Куке тӥляд сюлэмды жугиськыны кутске, кидэс ӝутоно но валэктон сётоно шуыса малпамысь гинэ, тодады возе: тӥ огнады ӧвӧл. Зэмзэ вераса, тросэз ми пӧлысь пумиськонъёсын валэктонъёс сётъяны кӧня ке кышкало. Со кышканэз вормон понна, валаны кулэ, малы со кылдэ. Кышкаськоды-а тӥ, малпандэс вунэтоды яке шонертэм валэктон сётоды шуыса? Яке тӥ сюлмаськиськоды, мукетъёсыныз ӵошатыса, тӥляд валэктонды сокем тунсыко уз луы шуыса? Зэмзэ вераса, со умоез сярысь вера. Сыӵе шӧдонъёс возьмато, тӥ  зӥбыт-востэм адями но мукетъёссэ асьтэ сярысь умоесьгес лыдъяськоды шуыса. Иегова яратэ зӥбыт-востэм ужась-тыршисьёсты (Пс. 137:6; Флп. 2:3). Нош со дыре ик солэн потэ, кенешлэн пумиськонъёсаз тӥ сое мед данъялоды но вын-агайёслэсь но сузэр-апайёслэсь мылкыдзэс мед ӝутоды шуыса (1 Фес. 5:11). Инмар яратэ тӥледыз но одно ик юрттоз тӥледлы кышкасьтэм луыны.

11. Библиысь кыӵе малпанъёс юрттозы милемлы кышканмес вормыны?

¹¹ Эскеромы Библиысь куд-ог малпанъёсты. Отын валэктӥське, куддыръя ми ваньмы вераськомы сое, мае вераны кулэ ӧвӧл, но озьы, кызьы кулэ ӧвӧл (Иак. 3:2). Иегова уг возьма милесьтым тырбыдэс луэммес. Уг возьмало сое вын-агайёсмы но, сузэр-апайёсмы но (Пс. 102:12—14). Соос милям духовной семьямы луо но туж ярато милемыз (Марк 10:29, 30; Иоанн 13:35). Соос валало: милям котьку ик уг пӧрмы вераммы сое, мае вераммы потэ вал.

12, 13. Малы дышето милемыз Неемиялэн но Ионалэн примеръёссы?

¹² Нош табере малпаськомы Библиысь примеръёс вылын, кудъёсыз кышканэз вормыны юрттозы. Тодамы ваёмы Неемияез. Со кужмо кивалтӥсьлэн юртаз ужаз-тыршиз. Одӥг пол, куке Неемия тодӥз, Иерусалимлэн борддоръёсыз но капкаез куашкатэмын шуыса, солэн мылкыдыз туж куашказ (Неем. 1:1—4). Куке эксэй юаз, малы солэн ымнырыз ӝож тусъем шуыса, солэн сюлмыз зол жугиськыны кутскиз, дыр. Неемия соку ик Инмарлы вӧсяськиз но эксэйлы ваньзэ валэктӥз. Мар со бере луиз? Эксэй Инмарлэн калыкезлы юрттӥз (Неем. 2:1—8). Озьы ик Ионалэсь примерзэ тодэ вайыны луоз. Куке Иегова сое Ниневияын улӥсьёслы тодытыны косӥз, Иона, туж зол кышкаса, Фарсисэ кошкиз, чылкак мукет пала (Иона 1:1—3). Но Иеговалэн юрттэменыз, со та ужез быдэстӥз. Ионалэсь верам кылъёссэ кылыса, Ниневияын улӥсьёс ӧпкелизы но утиськизы (Иона 3:5—10). Неемиялэн примерез дышетэ милемыз, макем кулэ вӧсяськыны валэктон сётон азьын. Нош Ионалэн примерез возьматэ: ми туж зол кышкаськомы ке но, Иегова юрттоз милемлы, ми солы ужаны-тыршыны мед быгатомы шуыса. Малпалэ: вын-агайёсмы но сузэр-апайёсмы Ниневияын улӥсьёс кадь ик кышкытэсь-а?

¹³ Кыӵе пайдаё визь-кенешъёс юрттозы милемлы пумиськонъёсын мылкыдэз ӝутӥсь валэктонъёс сётъяны? Ойдолэ эскеромы куд-огъёссэ.

14. Малы пумиськонъёслы умой дасяськоно но ку сое лэсьтыны луэ?

¹⁴ Котькуд пумиськонлы дасяське. Куке тӥ дасяськон понна дыр висъяськоды но умой дасяськиськоды, соку тӥ эскеронэ пыриськыны туж ик уд кышкалэ (Еф. 5:16). Зэм но, ми ваньмы пӧртэм дыре дасяськиськомы. Кылсярысь, Элоиз нимо палкышно, кудӥзлы 80 ареслэсь тросгес, «Возьмаськон башняысь» статьяез арнялэн кутсконаз эскерыны кутске. Со валэктэ: «Куке мон азьло ик дасяськыны кутскисько, пумиськонъёс  мыным тросгес шумпотон ваё». Джой нимо сузэр, кудӥз быдэс нунал ужа, «Возьмаськон башняез» эскеронлы дыр висъя пумиськонлэн азьвыл нуналаз. Со вера: «Мыным кельше, куке статьяысь малпанъёс йырысьтым ӧз потэ на». Нош тани мар вера тӧро но пионер луыса ужась-тыршись Айк, кудӥзлэн кенешын трос ужъёсыз вань: «Мыным умойгес потэ арня куспын пичиен дасяськыны, ваньзэ огдыре дасям интые».

15. Мар кароно, пумиськонлы умой дасяськон понна?

¹⁵ Мар кароно, пумиськонлы умой дасяськон понна? Дасяськыны кутскемдылэсь азьло котьку но куре Иеговалэсь святой духсэ (Лука 11:13; 1 Иоанн 5:14). Собере статьяен тодматскыны кӧня ке минут висъялэ: малпаське статьялэн нимыз, подзаголовокъёс, суредъёс но рамкаос вылын. Котькуд абзацез эскерыкуды, Библиысь сётэм кылбуръёс пӧлысь троссэгес лыдӟыны тырше. Лыдӟемды вылын малпаське. Нимысьтыз саклык висъялэ малпанъёслы, кудъёссэ тӥляд эскерон дыръя верамды потэ. Умой дасяськыса, тӥ тросгес пайда басьтоды но тӥледлы капчигес луоз валэктон сётыны (2 Кор. 9:6).

16. Кыӵе электрон пособиосты тӥляд уже кутэмды луэ но кызьы тӥ соосты кутӥськоды?

¹⁶ Луэ ке, уже кутэ электрон пособиосты, кудъёсыз тӥледлы валамон кылын вань. Иеговалы но солэн организациезлы луыса милям электрон пособиосмы вань, кудъёсыз юртто милемлы пумиськонъёслы дасяськыны. JW Library приложение юрттэ электрон тӥрлыкамы эскерон понна материалэз скачать карыны. Соку ми со материалэз котькыӵе дыре но котькыӵе интыын эскерыны быгатомы (лыдӟыны яке кылзыны ке но). Куд-ог вын-агайёс но сузэр-апайёс та приложениез уже куто, уж дорын яке школаын нуназезэ сиськыкузы яке кытчы ке мыныкузы. Милям кыӵе ке юанэз мургес эскереммы потэ ке, сое капчи лэсьтыны, электрон библиотекаез яке «Возьмаськон башнялэсь онлайн библиотеказэ» уже кутыса.

17. а) Малы умойгес луоз кӧня ке валэктонъёсты дасяны? б) Мае тӥ тодӥды «Стань другом Иеговы. Подготовь свой комментарий» видеороликысь?

¹⁷ Луэ ке, котькуд статьялы кӧня ке валэктонъёс дасялэ. Малы со кулэ? Юанлы, кудӥзлы тӥ валэктон дасяды, мукетъёсызлэн но валэктон сётэмзы потоз, вылды. Соин ик агай, кудӥз эскеронэз ортчытэ, тӥ интые, кинэ ке мукетсэ юаны быгатоз. Пумиськонэз дырыз дыръя йылпумъяно бере, куддыръя вань мылкыд карисьёсты юаны уг луы. Соин ик кӧтты ӝож медаз луы, тӥледыз кутсконаз ик ӧз юалэ ке. Тӥ кӧня ке валэктонъёсты дасяды ке, эскеронэ пыриськыны тросгес луонлыкты луоз. Библиысь кылбур лыдӟонэз но кыӵе ке юанлы ас кылъёсыныд верам валэктонэз дасяны луэ b.

18. Малы умойгес луоз вакчиесь валэктонъёс сётъяны?

 ¹⁸ Вакчиесь валэктонъёс сётэ. Ӵем дыръя тужгес но мылкыдэз ӝуто сыӵе валэктонъёс, кудъёссэ ми огшоры кылъёсын но вакчияк вераськомы. Соин ик асьтэлы ужпум пуктэ вакчиесь валэктонъёс сётъяны. Валэктондэс 30 секунд куспын вераны тырше (Мад. 10:19; 15:23). Тӥ кенешлэн пумиськонъёсаз трос аръёс ӵоже валэктонъёс сётъяськоды ини ке, тӥляд кулэ луись ужпумды вань — вакчиесь валэктонъёс сётъяса, мукетъёсызлы адӟем карымон луыны. Куке вын-агайёс но сузэр-апайёс кӧня ке минут ӵоже секыт кылъёсын верам валэктонъёсты кыло, соос малпаны быгато, озьы вераны ноку но уз быгатэ шуыса. Со сяна, вакчиесь валэктонъёс луонлык сёто тросгес адямилы эскеронэ пыриськыны. Вакчи но шонерак валэктон сётыны кулэ тужгес но соку, куке тӥ юанлы нырысетӥ валэктон сётӥськоды. Абзацысь вань малпанъёсты вераны эн тырше. Валтӥсь малпан эскеремын ини ке, абзацысь мукет малпанъёслы саклыкез висъяны луоз. (Учке « Кыӵеесь луыны быгато валэктонъёс?» рамкаез.)

19. Мар тӥледлы кароно, тӥляд нимысьтыз юанлы валэктон сётэмды потэ ке?

¹⁹ Вералэ эскеронэз ортчытӥсь агайлы, кыӵе юанлы тӥляд валэктон сётэмды потэ. Умойгес луысал сое пумиськон кутскытозь лэсьтыны. Куке агай быръем абзацтылы юан сётоз, соку ик кидэс вылӥе ӝутэ, агай тӥледыз мед адӟоз шуыса.

20. Малы кенешлэсь пумиськонзэ эшъёсын ӵош сиськонэн ӵошатыны луэ?

²⁰ Кенешлэсь пумиськонзэ эшъёсын ӵош сиськонэн ӵошатыны луоз. Пуктэ син азяды, тӥледыз куное ӧтизы но азьло ик кыӵе ке сиён дасяны куризы шуыса. Мар тӥ кароды? Тӥ кӧня ке сюлмаськоды, дыр, но тыршоды дасяны сое, мар ваньмызлы кельшоз. Кенешлэн пумиськонъёсаз Иегова, куно карись кузё выллем, ӝӧк выл тыр сиён пуктэ (Пс. 22:5; Матф. 24:45). Но со шумпотэ, куке ми со понна быгатэммыя мае ке лэсьтӥськомы но сётӥськомы самой умойзэ, мармы милям вань. Соин ик пумиськонъёслы умой дасяське но ӵемгес кидэс ӝутъялэ. Соку тӥ асьтэос гинэ Иеговалэн ӝӧк вылысьтыз сиёнэзлы шум уд потэ, нош быдэс кенеш понна мае ке умойзэ лэсьтыны быгатоды.