1. How David feel about Jehovah, and wetin this one move David to do?

KING DAVID write for Bible say “Jehovah dey great” and “e suppose to really get all the praise.” (Ps. 145:3) E love Jehovah, and because of that love, e praise God “for inside the congregation.” (Ps. 22:22; 40:5) True-true, you love Jehovah and you agree with the thing wey David talk, when e say: “Make they praise you forever, O Jehovah the God of our papa Israel.”​—1 Chron. 29:10-13.

2. (a) How we fit praise Jehovah? (b) Which problems some people de face, and wetin we go first talk about?

² Today, one way wey we de praise Jehovah na when we de give comment for meeting. But e no de really easy for some of our brothers and sisters to answer question for meeting. This one na one problem wey them de face. They want give comment for meeting, but them de fear. Wetin they fit do about this fear? And another thing be say, which things we fit do wey go help all of us de give fine comment to encourage people? Before we go answer this questions, make we first talk about four important reasons why we de give comment for meeting.

3-5. (a) According to Hebrews 13:15, why we de give comment for meeting? (b) Na the same kind of comment all of us must give? Explain.

³ We get chance to praise Jehovah, and na special thing as e allow us. (Ps. 119:108) We de “praise God” when we give comment for meeting and na “sacrifice.” Nobody fit do this sacrifice for us. (Read Hebrews 13:15.) Na the same sacrifice, or comment, Jehovah want from each of us? No, no be the same.

⁴ Jehovah know say you fit no get power to do the thing  wey another person get power to do. And e know say all of us no dey the same condition. But e really value any sacrifice wey we fit give. Make we talk about the kind of sacrifice wey Jehovah accept from people of Israel. Some of them that time give lamb or goat as sacrifice, because their power reach that one. But some of them dey poor. This ones fit give “two turtledoves or two young pigeons.” And if person no fit bring any of this two birds, Jehovah accept small amount of “fine flour” (about 1 kilogram). (Lev. 5:7, 11) Flour no too cost, but Jehovah still value-am as sacrifice, as long as na “fine flour.”

⁵ Our God Jehovah still de feel the same way today and e get good-heart. When we de give comment, e no de expect all of us to talk like Apollos wey sabi give talk well-well, or like Paul wey e talk de move person. (Acts 18:24; 26:28) Jehovah just want make we give comment as our power reach. You remember the widow for Bible wey give two small coins? The woman dey precious to Jehovah because e give the best wey e get, as e power reach.​—Luke 21:1-4.

6. (a) According to Hebrews 10:24, 25, how other people their comment fit affect us when we hear-am? (b) When other people give answer wey encourage you, how you fit show say you like-am?

⁶ We de use our comments encourage each other. (Read Hebrews 10:24, 25.) All of us de enjoy to hear different-different kind of comment for meeting. When we hear young children de give their fine and simple comment from their heart, we de enjoy-am. E de touch us when we hear person de comment about any of the truth wey e just learn for Bible, and we fit feel-am for the person voice say e dey happy. E de sweet us too when people “gather courage” to give their comment, even though say them de shame or they just start to learn our language. (1 Thess. 2:2; ftn.) Wetin we fit do to show say we like as they try give fine comment wey encourage people? We fit thank them after meeting. Another thing wey we fit do na for us to give our own comment. So e no go be like say na only people de encourage us, but we de encourage other people with our comment too.​—Rom. 1:11, 12.

7. How we de benefit when we give comment?

 ⁷ We de get benefit when we give comment. (Isa. 48:17) How? The first thing be say, if we plan to answer question for meeting, e de push us make we prepare well for the meeting. When we prepare well, we go understand the Bible pass before. And the more our understanding de deep, the way we de do the things wey we learn go de better. Number two, we fit enjoy the meeting more because we join for the discussion. Number three, long time after the meeting, we go still de remember the answer wey we give because to give comment no easy.

8-9. (a) As e dey for Malachi 3:16, how Jehovah de feel about our comment? (b) Which other thing fit de make some people fear?

⁸ We de make Jehovah glad when we talk about our faith. We fit dey sure say Jehovah de listen to us, and e really like wetin we do to give comment for meeting. (Read Malachi 3:16.) When we do everything wey we fit do to make God glad, e de bless us to show say e like-am.​—Mal. 3:10.

⁹ E dey clear say, we get good reasons to give comment for meeting. But even with that one, some people fit de fear to raise their hand. If na so you de feel, no allow make e tire you. Some Bible verse them fit guide us, we go talk about them. We go still see some examples for Bible and some advice. They fit help us de give comment more for meeting when we follow them.

10. (a) Which fear many of us get? (b) If you de fear to give comment, which fine character this one de show say you get?

¹⁰ How you de feel anytime you even think-am say you want raise your hand to give comment? Your heart de cut because of fear? If na so, know say no be only you de feel like that. The truth be say, almost all of us de get small fear anytime wey we want give comment. Before you fit manage this your fear, you need to know wetin de cause the fear. You de fear say you fit forget the  thing wey you want talk, or your answer fit no correct? You de worry say your comment fit no sweet reach other people their own? The truth be say, this things wey de make you fear de show say you get one better character. Them de show say you dey humble and you de see other people say they better pass you. Jehovah like this character no be small. (Ps. 138:6; Phil. 2:3) But you need to praise Jehovah and encourage your brothers and sisters for meeting, na the thing wey Jehovah want. (1 Thess. 5:11) E love you and e go give you the courage wey you need.

11. Which Bible verse them fit help us?

¹¹ Make we talk about some Bible verse. This Bible verse them fit help us. Bible talk say all of us de make mistake for wetin we de talk and the way we de talk-am. (Jas. 3:2) Jehovah no de expect us to do everything correct, and even our brothers and sisters no de expect-am too. (Ps. 103:12-14) Na one family we be, and they love us. (Mark 10:29, 30; John 13:35) They know say sometimes, the thing wey we want talk no de come out as we want-am.

12-13. Wetin we learn from the example of Nehemiah and Jonah?

¹² Make we see some examples for Bible. This examples fit help you manage your fear. You remember Nehemiah? E work for inside the palace of one powerful king. Nehemiah dey sad because e hear say the walls and the gates for Jerusalem scatter. (Neh. 1:1-4) How you think say Nehemiah go feel when the king say make e talk why e dey sad? E heart fit don de cut because of fear! Nehemiah pray quick-quick and then e answer the king. The king come do plenty things to help God’s people. (Neh. 2:1-8) What of Jonah? When Jehovah send Jonah to people for Nineveh, e begin fear sotey e try to run go another place. (Jonah 1:1-3) But Jehovah help Jonah, and e go give them the message. The message wey Jonah carry go meet the people of Nineveh really help them. (Jonah 3:5-10) We learn from Nehemiah say e dey important make we pray before we give answer. And wetin we learn from Jonah? No matter how our fear big reach, we fit continue to serve Jehovah if e help us. And even think-am, only Jonah go preach to people for Nineveh. People for your congregation plenty reach people for Nineveh?

¹³ Some advice fit help you give fine comment for meeting to encourage brothers and sisters. Wetin be some of this advice? Make we talk about some of them.

14. Why e dey good make we prepare well for our meeting, and which time we fit do-am?

¹⁴ Prepare for each meeting. When you get plan to de prepare meeting and you prepare well, your heart go strong more to answer question for meeting. (Prov. 21:5) The truth be say, no be the same plan all of us de follow to prepare for meeting. One widow  wey e name na Eloise, don pass 80 years. E de start to prepare for Watchtower Study when the week just start. The sister talk say, “I de enjoy the meeting more if I study before the day.” Joy na another sister, and e de work full-time to care for e self. This sister de study e Watchtower on Saturday, the day before meeting. E talk say, “I de like-am if the things wey I study still dey fresh for my mind.” One busy elder wey e name na Ike na pioneer. E talk say, “I don see say e better for me if I study small-small throughout the week instead of me to just do-am at once.”

15. How you fit prepare well for meeting?

¹⁵ Which kind things we fit do to prepare well for meeting? Make you always pray for holy spirit before you start your study. (Luke 11:13; 1 John 5:14) Then take small time check the title, the small topic, the illustrations, and the teaching box, so that you go understand them. As you de study each of the paragraph, make you read plenty Bible verse wey they no quote, as you fit. Think deep about wetin you de read, especially the things wey you plan to answer for meeting. If you prepare well, you go benefit more and e go fit dey easy for you to give your comment.​—2 Cor. 9:6.

16. Which things fit help you for your study, and how you de use them?

¹⁶ If you fit, use the websites and programs wey the organization don give us for language wey you know. Jehovah don use e organization give us websites and programs wey fit help us prepare for meeting. JW Library^® app na one of them. This one de help us download study publications for our phone. Then we fit study-am anytime and for any place. We fit still read or listen to wetin we download. Some people de use JW Library^® app to study when break reach for their workplace or for school, or when them de travel. Another one na Watchtower Library and the Watchtower ONLINE LIBRARY^™. This ones de make-am dey very easy for us to do research about anything for the topic wey we want study more about.

17. (a) Why e dey good make we prepare different-different comment? (b) Wetin you learn from the video Become Jehovah’s Friend​—Prepare Your Comment?

¹⁷ Make you prepare different-different comment for each study, if you fit. Why? Because they fit no call you everytime wey you raise your hand. Other brothers and sisters fit raise their hand for that same time, and the brother wey de conduct fit call one of them. So that the meeting no go go overtime, the brother fit call only small number of people for some part of the study. So, make you no vex or tire if e no call you quick for the study. If you prepare different-different comment, you go get more chance to answer for the study. One of the comments wey you fit prepare na to read Bible  verse. But if you fit, make you still prepare to give comment for your own word. *

18. Why e dey good make our comment dey short?

¹⁸ Give short comment. Many times, na short and simple comment de encourage people pass. So make you try de give short answer. Make you try so that e no go pass about 30 seconds. (Prov. 10:19; 15:23) If you don de answer questions for meeting for many years, e dey important make your comment dey short. If you do like that, you de show fine example. If you de make long comment and de talk plenty things, other people fit de fear say they no go fit answer question fine like you. Another thing be say, more people go fit give comment if you make your own short. Make your answer dey simple and make e dey direct, especially if na you they first call. Make you no talk all the points wey dey one paragraph. After the main idea for the paragraph don come out, you fit comment about other points.​—Check the box “ Wetin I Fit Talk for My Comment?”

19. How the brother wey de conduct fit help you, but wetin you go need to do?

¹⁹ Tell the brother wey de conduct the study the paragraph wey you go like to give your comment. If na wetin you want do, make you go tell the brother before meeting start. When time don reach to comment for that paragraph, no waste time to raise your hand. Make your hand dey high so that the brother wey de conduct go see you.

20. How our congregation meeting be like friends wey them de chop together?

²⁰ E good make you see congregation meeting like good friends wey them de chop together. Think-am say some friends for congregation invite you to come small party, and they say make you prepare small food come. Wetin you go do? Fear fit catch you small, but you go try carry food wey everybody go enjoy, no be so? Na Jehovah invite us come our meeting, and e don prepare plenty good things for table for us. (Ps. 23:5; Matt. 24:45) But e go like-am when we bring simple gift, as we fit. So prepare well and give many comment as you fit. You no go only chop from the things wey Jehovah prepare, but you go still bring gift wey you go share with the congregation.