1. Uw rogon Jehovah u wan’ David, ma mang e n’en ni k’aring ni nge rin’ e re n’ey?

KE YOLOY David ni Pilung ni gaar: “I Somol e ba sorok, ma ri ir e thingar ni pining e sorok ngak.” (Ps. 145:3) Bochan nib t’uf Jehovah rok ma aram e n’en ni k’aring ni nge pining e sorok ngak Got “u lan e muulung.” (Ps. 22:22; 40:5) Mmudugil nib t’uf Jehovah rom mab m’agan’um ko re thin ney ni yog David ni gaar: “Somol ni Got rok e chitamangimad i Jakob, nguun pining e sorok ngom ni manechibog ko pi chibog!”​—1 Kron. 29:10-13, BT.

2. (a) Uw rogon nrayog ni ngad pininged e sorok ngak Jehovah? (b) Mang magawon e ma mada’nag boch e girdi’, ma mang e gad ra weliy murung’agen?

² Ngiyal’ ney e fulweg ni gad ma pi’ u nap’an e muulung ko Kristiano ni gad ma tay e ireram reb e kanawo’ ni gad ma pining e sorok riy ngak Jehovah. Machane bay boch pi walagdad nib mo’maw’ ngorad ni ngar rin’ed e re n’ey. Ya yad baadag ni ngar pied e fulweg u nap’an e muulung machane darur rin’ed ni bochan e yad be rus. Ere mang e rayog ni ngar rin’ed ko re magawon ney? Mang boch ban’en nrayog ni nge ayuwegdad ni ngad pied e fulweg nra pi’ e athamgil nga laniyan’ e pi walag? U m’on ni ngad weliyed e fulweg ko gal deer ney, ma som’on e ngad weliyed aningeg i fan nib ga’ fan ni ngad pied e fulweg u nap’an e muulung.

3-5. (a) Mang fan ni gad ma pi’ e fulweg u nap’an e muulung nrogon ni kan tamilangnag ko Hebrews 13:15? (b) Gur, ngari taareb rogon e fulweg ni ngad pied? Mu weliy.

³ Gad gubin ma ke pi’ Jehovah reb e tow’ath ngodad ni aram e rayog ni ngad pininged e sorok ngak. (Ps. 119:108) Fulweg rodad u nap’an e muulung e bang ko “maligach rodad” ni gad ma pining e sorok riy ngak Jehovah, ma dariy be’ nrayog ni nge pi’ e re maligach nem ni fan ngodad, ya kemus ni yigoo gadad. (Mu beeg e Hebrews  13:15.) Ere gur, baadag Jehovah nra be’ ma nge pi’ e fulweg nib taareb ko bin ni ke pi’ be’, fa? Danga’!

⁴ Manang Jehovah nib thilthil e tin nrayog ni ngad rin’ed nge rarogodad, ma rib ga’ fan u wan’ e tin nrayog ni ngad ognaged ngak. Am lemnag e re miti maligach nib m’agan’ ngay ni nge ognag piyu Israel ngak. Bay boch piyu Israel nrayog rorad ni ngar ognaged e saf ara kaming ni maligach. Machane be’ nu Israel nib gafgow e rayog ni nge ognag “l’agruw e arche’ ni dove ara l’agruw i bulogol.” Ma faanra ku dabiyog ni nge chuw’iy l’agruw e arche’ mab m’agan’ Jehovah ngay ni nge ognag “l’agruw e pawn e flour” nib manigil. (Lev. 5:7, 11, BT) De tolang puluwon e merikengko, machane ba ga’ fan u wan’ Jehovah e re maligach nem ni faanra ba “flour” nib manigil.

⁵ Ere ngiyal’ ney e ku taareb rogon e re n’ey u wan’ e Got rodad nib gol. Nap’an ni gad ra pi’ e fulweg ma der lemnag ni gad gubin ni ngad nonad ni bod rogon Apollos ni ir be’ nib salap ko welthin, ara Paul nrayog ni nge pingeg laniyan’ e girdi’. (Acts 18:24; 26:28) Kemus ni n’en ni baadag Jehovah e ngad pied e fulweg u rogon nrayog rodad, ma der lemnag ni ngad pied ban’en ngak ndabiyog rodad. Dab mu pag talin fare pin ni ke yim’ figirngin ni yin’ l’agruw chi kobre’ nrow nib achig nga lan tafen e salpiy. Rib ga’ fan e re ppin ney u wan’ Jehovah ni bochan e ke pi’ e bin nrayog rok.​—Luke 21:1-4.

6. (a) Mang angin ngom e fulweg ni ga ma rung’ag u nap’an e muulung nrogon ni kan tamilangnag ko Hebrews 10:24, 25? (b) Uw rogon nrayog ni ngam dag nib ga’ fan u wan’um e fulweg ni ma pi’ e athamgil nga lanin’um?

⁶ Gad ma pi’ e athamgil nga lanin’dad u daken e fulweg ni gad ma pi’. (Mu beeg e Hebrews 10:24, 25.) Gad gubin ni gad baadag ni ngad rung’aged e fulweg nib thilthil u nap’an e muulung. Gad baadag ni gad ma motoyil ko fulweg rok e piin bitir nib mom ni ngan nang fan ni ke yib u gum’ircha’rad. Ku ma yib e athamgil nga lanin’dad u nap’an ni gad ra rung’ag ni ke pi’ be’ e fulweg u murung’agen e tin riyul’ ni ka fini fil ni ke felfelan’ ngay. Ku gad ma felfelan’ ngak e piin ni kar athamgilgad ndab ra rusgad ni ngar pied reb e fulweg ni yugu aram rogon ni yad ba tamra’ ara fin yad be fil e thin rodad. Ere uw rogon ni ngad daged ngorad nib ga’ fan u wan’dad e athamgil ni yad be tay? Rayog ni ngad pininged e magar ngorad u tomuren e muulung ko fulweg ni kar pied ni ke pi’ e athamgil nga lanin’dad. Ku reb e kanawo’ nrayog ni ngad pininged e magar riy e ngkud pied e fulweg. Ya faan gad ra rin’ ni aray rogon, ma gathi kemus ni yibe pi’ e athamgil nga lanin’dad u nap’an e muulung, ya ku gad be pi’ e athamgil nga laniyan’ boch e girdi’.​—Rom. 1:11, 12.

7. Uw rogon ni ma yib angin ngodad e fulweg ni gad ma pi’?

⁷ Ra yib angin ngodad ni faan gad ra pi’ e  fulweg. (Isa. 48:17) Ni uw rogon? Som’on e faanra gad be nameg ni ngad pied e fulweg, ma aram e n’en nra k’aringdad ni ngad fal’eged rogodad ni fan ko muulung. Ma faan gad ra fal’eg rogodad, ma aram e gad be ga’nag e tamilangan’ rodad ko Thin rok Got. Ma ra be ga’ e tamilangan’ rodad ma aram e ra mom ni ngad folgad ko tin ni gad be fil. Bin l’agruw e, rayog ni ngad felfelan’gad ni bochan e gad be un ko tin ni yibe rin’ u nap’an e muulung. Bin dalip e, bochan ni gad be athamgil ni ngad pied e fulweg, ma aram fan nib ga’ ndarud paged talin e tin ni kad weliyed ni yugu aram rogon ni ke n’uw nap’an ni kan mu’ ko muulung.

8, 9. (a) Uw rogon u wan’ Jehovah e fulweg ni gad ma pi’ nrogon ni kan tamilangnag ko Malaki 3:16? (b) Ku mang boch ban’en ni be rus boch e girdi’ ngay?

⁸ Gad ma felfelan’nag Jehovah u nap’an ni gad ra weliy rogon e michan’ rodad. Rayog ni nge pagan’dad ni ma motoyil Jehovah ngodad mab ga’ fan u wan’ e athamgil ni gad ma tay ni ngad pied e fulweg u nap’an e muulung. (Mu beeg e Malaki 3:16.) Ma ma dag nib ga’ fan u wan’ e athamgil ni gad ma tay ni aram e ma tow’athnagdad u nap’an ni gad ra athamgil ni ngad felfelan’naged.​—Mal. 3:10.

⁹ Ba tamilang ni bay fan nib manigil ni ngad pied e fulweg u nap’an e muulung. Machane rayog ni ka bay boch e girdi’ ni yad be rus ni ngar tininged pa’rad nga lang. Faanra ireray e magawon rom ma dabi mulan’um. Ngad weliyed boch e kenggin e motochiyel u Bible, nge murung’agen boch e girdi’, nge boch e kanawo’ nrayog ni nge ayuwegdad ni ngad gayed rogon ni nge yoor e fulweg ni ngad pied u nap’an e muulung.

10. (a) Mang boch ban’en ni be rus boor i gadad ngay? (b) Faanra ga be rus ma mang fel’ngin e bay rom?

¹⁰ Gur, gubin yay ni ga ra lemnag ni ngam tining paam nga lang ni ngam pi’ e fulweg ma ga ma rus? Faanra arrogon, me ere gathi yigoo gur e ma buch e re n’ey rom. Bin riyul’ riy e, yooren i gadad e ma rus ni nge pi’ e fulweg. Ere ra ngam athamgil ni nge dab kum rus ni ngam pi’ e fulweg mab t’uf ni ngam nang ko mang e be k’aring e marus ngom. Gur, ga be rus ni ga ra pagtalin e n’en ni ga baadag ni nga mog, ara mog ban’en nde puluw, fa? Ma gur, be magafan’um ndabiyog ni ngam pi’ e fulweg nib fel’ ni bod rogon yugu boch e girdi’? Bin riyul’ riy e, pi n’ey ni ga be rusnag e be m’ug riy ni aram ban’en nib manigil. Ya be m’ug riy ni gur be’ ni gab sobut’an’  ma ga ma tay ni bay boch e girdi’ ni ka yad ba fel’ ngom. Ma Jehovah e ri baadag e re fel’ngin ney ni sobut’an’. (Isa. 57:15; Fil. 2:3) Machane baadag Jehovah ni ngad pininged e sorok ngak ma gad pi’ e athamgil nga laniyan’ e pi walag u nap’an e muulung. (1 Thess. 5:11) Gab t’uf rok ma ra ayuwegem ni nge dab kum rus.

11. Mang boch e thin nu Bible ni be puguran ngodad boch ban’en nrayog ni nge ayuwegdad?

¹¹ Am lemnag boch e thin nu Bible ni be puguran boch ban’en ngodad. Be yog e Bible ni gad gubin ma gad ma oloboch ko tin ni gad ma yog nge rogon ni gad ma yog ban’en. (Jas. 3:2) Der ma lemnag Jehovah nge pi walagdad ni gubin ban’en ni ngad rin’ed mab fel’. (Ps. 103:12-14) Pi walagdad e gadad girdien taab tabinaw ma gad ba t’uf rorad. (Mark 10:29, 30; John 13:35) Ma yad manang ni fulweg ni gad ma pi’ e yu ngiyal’ e der ma puluw nga rogon ni kad lemnaged.

12-13. Mang e gad be fil ko n’en ni ke buch rok Nehemiah nge Jonah?

¹² Mu lemnag boch e girdi’ ni bay murung’agrad u lan e Bible nrayog ni nge ayuwegem ni ngam athamgil ni nge dab mu rus. Am lemnag Nehemiah. I pigpig u tafen reb e pilung nib gel gelngin. Ke kireban’ Nehemiah ni bochan e ke rung’ag ni kan gothey e yoror nge garog ko binaw nu Jerusalem. (Neh. 1:1-4) Am lemnag gelngin e marus ni tay u nap’an ni yog fare pilung ngak ni nge weliy fan ni ke kireban’! Ka chingiyal’ nem me meybil Nehemiah ngemu’ me fulweg lungun fare pilung. Ere n’en ni buch e boor ban’en ni rin’ fare pilung ni nge ayuweg e girdi’ rok Got. (Neh. 2:1-8) Kum lemnag e n’en ni buch rok Jonah. Nap’an ni yog Jehovah ngak Jonah ni nge yan i non ngak e girdi’ ko fare binaw nu Nineveh mi ri rus me mil nge yan nga bang ni gathi ir e nge yan ngay. (Jonah 1:1-3) Machane u daken e ayuw rok Jehovah me yag ni nge yan Jonah i machibnag piyu Nineveh. Ma thin ni i weliy e yib angin ngorad. (Jonah 3:5-10) Ere kad filed feni ga’ fan ni ngad meybilgad u m’on ni ngad pied e fulweg ko n’en ni ke buch rok Nehemiah. Ma kad filed rok Jonah nrayog ni nge ayuwegdad Jehovah ni ngad pigpiggad ngak ndemtrug ko mang e ri gad be rus ngay. Ere ba mudugil ni fulweg ni gad ma pi’ u nap’an e muulung e ba mom ko bin ni nga dogned ngak piyu Nineveh ni bay ni thangrad.

¹³ Mang boch e kanawo’ nrayog ni nge ayuwegdad ni ngad pied e fulweg u nap’an e muulung nra pi’ e athamgil nga lanin’uy? Ngad weliyed boch e pi n’ey.

14. Mang fan ni ngad fal’eged rogodad u m’on ko muulung? Ma mingiyal’ e rayog ni ngad rin’ed e re n’ey?

¹⁴ Mu fal’eg rogom u m’on ko muulung. Nap’an ni ga ra tanomnag ban’en u m’on mag fal’eg rogom, ma aram e rayog ni nge pagan’um ko fulweg ni ga ra pi’. (Prov. 21:5) Riyul’ nra bagadad ma bay e ngiyal’ ni ke tay ni nge fal’eg rogon ni fan ko muulung. Bod Eloise ni ke pag 80 e duw rok ni ke yim’ e pumoon rok, ma tabab ni nge fil fare ke Wulyang ko Damit ko pi rran nib m’on u reb e wik. Ke yog ni gaar, “Ba gel e felfelan’ ni gu ma tay u nap’an e muulung ni faanra kug fal’eg rogog u m’on.” Me Joy ni ma maruwel ni gubin e rran u lan e wik e ma tay ni Sabado e aram e rofen ni nge fil e ke rok e Wulyang ko Damit. Ke yog ni gaar, “Ba mom rogon ni nge dab gu pagtalin e tin ni kug fil ni faanra gu fil nde n’uw nap’an u m’on ko rofen ni muulung.” Ike e reb e piilal ni ku ma pioneer maku boor ban’en ni ma rin’ e yog ni gaar, “Kug pirieg nib fel’ ni nggu fil  ban’en nib ngoch nap’an ni in yay u lan e wik ko bin ni nggu fil boor ban’en u taab ngiyal’.”

15. Uw rogon nrayog ni ngam fal’eg rogom ni fan ko muulung?

¹⁵ Mang e ba muun ngay ni ngan fal’eg rogoy u m’on ko muulung? U m’on ni ngam tabab ni ngam fil e babyor rom ma ngam ning gelngin Jehovah nib thothup ni nge ayuwegem. (Luke 11:13; 1 John 5:14) Ma aram mag tay bochi tayim ni ngam man u daken e n’en ni ngan fil. Mu fal’eg i lemnag kenggin, nge subheading, nge pi fanathin ni bay riy, nge pi kahol ni bay boch ban’en nrayog ni ngan fil riy. Ma nap’an ni ga ra tabab ni ngam fil reb nge reb e paragraph mag gay rogon ni ngam beeg gubin e thin nu Bible ni bay riy nrayog ni ngam beeg. Mag fal’eg i lemnag e tin ni ga be fil mag tiyan’um ko tin ni bay riy ni ga baadag ni ngam pi’ e fulweg riy. Ra kam fal’eg rogom ma aram e rayog ni nge yib angin ngom me mom ngom ni ngam pi’ e fulweg.​—2 Kor. 9:6.

16. Mang boch ban’en ni bay ko cellphone ara tablet nrayog ni ngam fanay, ma uw rogon ni ngam fanay e pi n’ey?

¹⁶ Faanra rayog rom mag fanay e pi n’en ni bay ko cellphone ara tablet rom ni bay ko thin ni ga manang. Ke pi’ Jehovah boch ban’en u daken e ulung rok nrayog ni ngad ted ko cellphone ara tablet rodad ni nge ayuwegdad ni ngad fal’eged rogodad ni fan ko muulung. Fare app ni JW Library^® e bay e pi babyor ni ngan fil riy nrayog ni ngad downloadnaged ko cellphone rodad. Gad ra rin’ ni aray rogon, ma aram e rayog ni ngad filed e babyor rodad, ara da beeged ara da motoyilgad ko pi n’en ni bay riy ndemtrug e ngiyal’ ara gin ni gad bay riy. Bay boch e girdi’ ni yad ma fanay e re app ney ni ngar filed e babyor rodad u nap’an ni yibe toffan ko misiw’ u tabon e maruwel ara skul. Ku bay boch e girdi’ ni yad ma fanay u nap’an ni yad be milekag. Fare Watchtower Library nge LIBRARY U ONLINE^™ ni Fan ko Wulyang ko Damit e ke momnag ngodad nrayog ni ngad gayed murung’agen boch ban’en nib fel’ rogon ni gad baadag ni ngad filed ko fare ke babyor ni gad be fil.

17. (a) Mang fan nib fel’ ni ngam fal’eg in e fulweg ni ngam pi’? (b) Mang e kam fil ko fare video ni kenggin e Become Jehovah’s Friend​—Prepare Your Comment?

¹⁷ Faanra rayog mag fal’eg in e fulweg ko n’en ni ngan fil. Mang fan? Bochan e gathi gubin ngiyal’ ni ga ra tining paam nga lang ma yira piningem. Ya rayog ni bay boch e girdi’ ni ke tining pa’ nga lang ni taareb rogon ngom, ma aram me pining e en ni be yarmiy e muulung bagayad. Cha’ ni ir e be yarmiy e muulung e bay urngin e fulweg nra pag ni ngan pi’ u reb e paragraph ya nge yag ni nge yan e muulung nib puluw e tayim riy. Ere dabi kireban’um ara mulan’um ni faanra dan piningem u nap’an ni kan tabab ko n’en ni yibe fil. Faanra mu fal’eg in e fulweg rom ma aram e rayog ni nge yoor e fulweg ni ngam pi’. Reb e fulweg nrayog ni ngam fal’eg rogom riy e ba muun ngay ni ngam beeg reb e thin nu Bible. Machane faanra rayog rom ma rayog ni ngam fal’eg rogon e fulweg ni ngam pi’ ni ke yib u gum’irchaem. *

18. Mang fan ni ngam pi’ e fulweg nib ngoch mab mom ni ngan nang fan?

¹⁸ Mu pi’ e fulweg nib ngoch. Fulweg ni gad ma  pi’ nib ngoch mab mom ni ngan nang fan e ma pi’ athamgil nga lanin’dad. Ere mu nameg ni ngam pi’ e fulweg nib ngoch. Mu gay rogon ni ngam pi’ u lan 30 e second. (Prov. 10:19; 15:23) Faanra ke yoor e duw ni kam pi’ e fulweg ma aram e ba ga’ fan ni ngam dag e kanawo’ nib fel’ ni aram e ngam pi’ e fulweg nib ngoch. Faanra mu pi’ e fulweg rom nib n’uw u murung’agen boch ban’en, ma aram e rayog ni nge lemnag boch e girdi’ ndabkiyog ni ngar pied e fulweg ni bod rogon e birom. Maku reb e, faanra mu pi’ e fulweg nib ngoch, ma aram e rayog ni ngki pi’ e tayim ngak boch e girdi’ ni ngkur pied boch e fulweg u nap’an e muulung. Ere faanra gur e kan piningem nsom’on ma ngam pi’ e fulweg rom nib ngoch mab mom ni yira nang fan nib puluw ko fare deer. Dab mu gay rogon ni ngam weliy gubin ban’en u lan fare paragraph. Tomuren ni kan mu’ i weliy e tin nib ga’ fan ko fare paragraph, ma aram e rayog ni ngkum pi’ boch e fulweg u murung’agen ban’en nib l’ag ko fare paragraph.​—Mu guy fare kahol ni kenggin e “ Mang e Rayog ni Nggu Pi’ e Fulweg Riy?”

19. Uw rogon nrayog ni nge ayuwegem e cha’ nra yarmiy e n’en ni ngan fil, machane mang e thingar mu rin’?

¹⁹ Mog ngak e cha’ nra yarmiy e n’en ni ngan fil ko mang paragraph e ga baadag ni ngam pi’ e fulweg riy. Ra kam dugliy ni ngam rin’ e re n’ey, ma thingar mu non ngak u m’on ni nge tabab e muulung. Ma aram e ra taw ko ngiyal’ ni ngam pi’ e fulweg rom mag gurnagem ngam tining paam nga lang ya nge guy facha’ ni be yarmiy e n’en ni ngan fil.

20. Uw rogon ma muulung rodad e bod e abich ni gad ma tay e pi fager u taabang?

²⁰ Mu sap ko pi muulung ni bod rogon e abich ni ngam ted e pi fager rom. Am lemnag ni faanra kan piningem ni ngam abichgad e pi walag u taabang, ma ka nog ngom ni ngam fal’eg rogon buchuuw e ggan ni ngam fek. Mang e ga ra rin’? Rayog ni nge magafan’um, machane ga ra rin’ e tin rayog rom ni ngam fek ban’en nra adag gubin e girdi’ ni ngar ked. Ere Jehovah e Ir e Be Piningdad nga reb e abich ni boor e ggan ni ke tay ko tebel rok nrayog ni ngad ked u nap’an e muulung. (Ps. 23:5; Matt. 24:45) Mab felfelan’ ngay ni ngad feked i yib ba tow’ath nib achig machane aray e bin nrayog rodad ni ngad pied. Ere mu fal’eg rogom u m’on ko muulung mag pi’ e fulweg u rogon nrayog rom. Ga ra rin’ ni aray rogon, ma gathi kemus ni ga ra kay ban’en u tebel ku Jehovah, ya kam fek reb e tow’ath nra yib angin ngak e pi walag u lan e ulung.