1. Ginihe Davide adu na ni koyo du Yekova ni na si asako ko mangi ginipai?

BAKINDO DAVIDE akepai ki ya: “Yekova nga bahe, rengbe na tambua ko ni bakere he gbe.” (Tam. 145:3) Ko aima kpinyemu Yekova, na gu nyemuse re nasako ko tambua Mbori “dagba rimbasa . . . aboro.” (Tam. 22:22; 40:5) Zanga kapa, mo ima kpinyemu Yekova na mo ima ida kuti agu afugo Davide nga: “Ako Yekova, ga Yisaraere Mbori nga barani, i sámbua ro nye anye kindi.”—1 Peka 29:10-13.

2. (a) Waigu rengbe ani ka tambua Yekova? (b) Gini akpakarapai gu kura aboro agbiatiyo na ni, na ginipai ani nika fugöpai tipaha?

² Areme, gene sa ani atambua Yekova ngbaha nga, ni fu ani karagapai ti regbo gu gaani adunguratise nga ga aKristano. Ono tie, badungu awirinarani nga akumba na adee nagbiatiyo na kpakarapai. I nakpinyemu kaa fu akaragapai ba adunguratise yo, ono gunde naká aká na yo ti ni. Ginipai rengbe yo ka mangaha ka diabe gi gunde re? Na ginipai rengbe ka undo rani dunduko tipa ani naafu agu akaragapai nangarasa aboro ba adunguratise yo? Mbata fu ani karagapai kuti agu asanahe re, ani fugungo pai mbata tipa nyanyakipa nduapai biama ani naafu akaragapai ti ni ba adunguratise yo.

3-5. (a) A wa i nasakihe rogo AEbere 13:15, tipagine ani naafu akaragapai ti ni ba adunguratise yo? (b) Ya mo si naida ani naafu akaragapai dunduko kina sa? Oni sakingo rogoyo.

³ Ani dunduko Yekova naima fu gu momu furani nga ga tambua ko. (Tam. 119:108) Gaani akaragapai ba adunguratise yo nga papara gaani “motumo tambuahe,” na boro ho rengbe ka fu gu motumo re ku barani te. (Oni gedi AEbere 13:15.) Ya mo Yekova naida na gupai nga gaani amotumo watadu gaani akaragapai du dunduko kina sa? Oó, ko aidanga ha wo te!

⁴ Yekova ima ino gupai nga gaani abiri inohe na agu apai du tipa rani ni bakiakia, na ko nabi agu amotumo du ani na rengba ka fuhe fuko na nyanyakipaha. Mo berẽnga pa ngbatunga agu  amotumo ko anaaidaha be aYisaraere. Gu kura aYisaraere anidu na rengba beyo tipa ka fu kandoro watadu meme. Ono rungorungo Yisaraere anirengbe ka fu “ambipo ue . . . watadu paranga agbungu ue.” Na ho si anidu ni nga rengba be Yisaraere ka fu azire ue te, Yekova anaaida ni fu “fufũru ngungo wa aritere biata na beberehe.” (Pa Mot. 5:7, 11) Geno ngungo anidu kusende, ono Yekova anaabi gu motumo re na nyanyakipaha, ka si du nga si aningia wene “fufũru ngungo.”

⁵ Gaani wenesino Mbori areme kina wai ko adu ti gu regbo re. Ho ani afu karagapai ni ba adunguratise yo, anga gupai Yekova aidaha nga ani ini fugo wenengai wakina Aporo watadu Pauro te. (Amo. 18:24; 26:28) Yekova naida gupai berani nga ani naafu agu akaragapai rengbe omerani na ni angianga gu susi omerani ya. Oni tingidipa gu dekurugbo nafu zau-marã ue. Yekova abi ri na nyanyakipa ri bambiko ri afu guhe ri adu na rengba ka fuhe.—Rk. 21:1-4.

6. (a) Ringbisihe kuti AEbere 10:24, 25, waigu rengbe agu akaragapai ani agiaha kadu na maapai kurii rani? (b) Waigu rengbe mo ka yugo gamo tambuahe tipa gu karagapai ngarasi ro?

⁶ Ho ani afu akaragapai ni, ani nangarasa akuarani. (Oni gedi AEbere 10:24, 25.) Ani dunduko ninaakpinyemu kaa gia ngbatunga akaragapai ni bakiakia ba adunguratise yo. Ani nidu na ngbarago ka gia gu karagapai nga ga tooni gude. Ani ninaagbia ngarasaro ho ani agia fugo boro ni ni nifu karagapai na ngbarago tipa gu rengo ni nawirikihe. Na ani nidu na ngbarago ho gu boro du na zee watadu tona wirika gaani fugo agbia [“ngara,” NW] ni ka fu karagapai. (1 Tesa. 2:2) Waigu rengbe ani ka yugo gaani tambuahe tipa gu ome ni namangihe? Ani ima rengba ka fu tambuahe fu ni tipa gani wene akaragapai tifuo dunguratise. Gu kura gene rengbe ani ka yugo gaani tambuahe fuyo ngbaha nga ni fu ani karagapai a. Anga kina ngarasaro sa ani agbiaha ba dunguratise yo te, ono ani nafu ngarasaro afu a.—Rom. 1:11, 12.

7. Wai du ani agbia undo ho ani afu karagapai ni?

⁷ Ani nagbia undo ho ani akaragapai ni ba adunguratise yo. (Yes. 48:17) Wai du duhe wo? Bambatapai nga, ka si du nga ani na gu sasa nga ga fu karagapai, si nika fõngbadu rani yo ani mbakadi dunguratise wenengai. Ho ani ambakada dunguratise ni wenengai, si nasarani ani rugutirani na Fugo Mbori dudunguro. Na pa ruga ani tirani na ni dudunguro nika sa gupai nga ani mangi gupai ani awirikaha. Uepai nga, si nawira gupai gbe nga ani nika gbia bakere ngbarago agbia  ti dunguratise bambiko ani nafu akaragapai afu. Biatapai nga, mbiko gupai nga bakere asadatise du ani amangaha tipa ka fu karagapai, gu karagapai ani afuhe nanye rirani yo tipa gbanga regbo tifuo dunguratise.

8-9. (a) A wa yuguyo ho rogo Maraki 3:16, wai du Yekova abi gaani akaragapai? (b) Gini kpakarapai rengbe gu kura aboro kaa gbiatiyo kindi na ni?

⁸ Ani nasa ngbarago ti Yekova ho ani afura ni tipa gaani idapase. Ani ima rengba kadu na gu kido nga Yekova nadegatuko adega furani na ko nabi gu ome ani amangaha ka fu karagapai ba adunguratise yo na nyanyakipaha. (Oni gedi Maraki 3:16.) Ho ani aˈasada ni nyanyaki ka sa ngbarago tiko, ko nayugo gako tambuahe ni fuko amaku furani.—Mara. 3:10.

⁹ Si tie ziazia nga, wene nduapai kina berani tipa ka fu akaragapai ba adunguratise yo. Ono wa vura duhe wo, kura aboro ima rengba ka gunde tipa ka tumba beyo ka fu karagapai. Ka si du nga wo du duhe tipa ro, ka rago gberẽnga tiro ya. Ani makianga abangua arengo nga ga Ziazia Kekeapai, bete akpiapai, na agu apai rengbe ka undo rani dunduko tipa ani asadi kaa karagapai ni dunguhe ba adunguratise yo.

10. (a) Gini gunde du badungu rani na ni? (b) Ka si du nga gunde namanga ro amanga tipa ka fu karagapai, gini wenepai si ayugopaha?

¹⁰ Ya mo mo naakio akio be gunde ti ai gu regbo mo aberãpa tumba bero kuari ka fu karagapai? Ka si du nga pai ni naamanga ro wo, mo ni saro te. Gu rengo duho nga ani dunduko wiri bete gunde ninaamanga rani amanga ho ani afu karagapai ni. Tipa mo dibe gi gunde nasa ro ka mo naafunga karagapai re ya, si naida mo ini ginipai du nasa ro mo naagunde. Ya mo mo nagunde nga bangiro nika go ago ti gu karagapai mo naaida ka fuhe re watadu mo nagunde nga mo nika fu iraira karagapai? Ya mo mo nabaka bangiro nga gamo karagapai angbanga wa ga kura aboro te? Ka pe guhe nga rengo, ngbatunga agu agunde re ima rengba ka yugopa wenepai. Si nayugo gupai nga mo nga boro umbasitise na mo nabi aboro na nyanyakipa yo kisusi ro. Yekova ima kpinyemu gi sino nga ga umbasitise re. (Tam. 138:6; Frp. 2:3) Ono tie, Yekova naida gupai  aida a nga mo tambua ko na ki ngarasi akuaro ho du mo ni ba adunguratise yo. (1 Tesa. 5:11) Ko ima kpinyemu ro na ko nika fu gu wingbaduse afu foro si aida mo du na ni.

11. Gini bete apai Ziazia Kekeapai atingida rani na ni rengbe ka undo rani?

¹¹ Ani bingo bete agu apai Ziazia Kekeapai atingida rani na ni. Ziazia Kekeapai nagumba gupai nga ani dunduko namanga aingahe rogo gupai yo ani apehe na wai ani apehe. (Yak. 3:2) Yekova aberãnga gupai nga si naida ani du ni rengberengbe rani te, na zavura awirinarani aberãnga ha wo a te. (Tam. 103:12-14) I nga gaani aborokporo nga ga toroyo, na i ima kpinyemu rani. (Mk. 10:29, 30; Yo. 13:35) I ima rugatiyo na gupai nga, ti kura aregbo ani agumbanga gupai ani aida nzunzu ka gumbaha te.

12-13. Ginipai ani awirikaha ti gu kpiapai nga ga Nemaya na Yona?

¹² Mo berẽnga pa akpiapai rogo Ziazia Kekeapai yo nga gu rengbe ka undo ro mo dibe gunde. Mo tingidinga pa Nemaya. Ko amangisunge rogo gu bambu gumba-ngbanga naadu kua gu bakindo yo naadu na bakere ome tiko. Nemaya adu na gberãrago bambiko ko agi gupai nga i aima gbarasa agu angapa na angbadimo nangia ga Yerusarema. (Nem. 1:1-4) Mo berẽnga pa gu gunde naamanga ko ho bakindo asanako ni tipa ndu gupai ko adu ti ni na gberãrago! Nemaya amangi kparakpee ni ipo na fuani, ko ki karagapai fu bakindo. Ni sangbana gipai re, bakindo aundo ga Mbori aboro bakere gbe. (Nem. 2:1-8) Mo berẽnga pa Yona a. Ho Yekova asana Yona ni ko fura fu aboro Nineve, ko aima gunde ni kerehe na ko ki oro ku rogo kura rago kia. (Yona 1:1-3) Ono mbiko gu undo nga ga Yekova, Yona aima ndu ki tungusipai fu aboro Nineve. Na agu afugo ko agumbaha aima undo aboro Nineve bakere gbe. (Yona 3:5-10) Ani nawirika pa wai nyakipa kparakpee mbata fu karagapai ti gu kpiapai nga ga Nemaya. Na ti gu kpiapai nga ga Yona, ani nawirika gupai nga Yekova ima rengba ka undo rani tipa ani irisiko ka ani vura du na bakere gunde vurũ. Ni rengo, karagapai ba dunguratise yo akpakaranga kisusi wai si akpakara ka tungusa pangbanga sapangbanga fu aboro Nineve te.

¹³ Gini apai rengbe ka undo ro mo naafu akaragapai ti regbo adunguratise? Ani bingo bete aberãpai nga gu rengbe ka undo.

14. Tipagine si aida ti ni ani mbakadi gaani adunguratise wenengai, na ani rengbe ka mangaha wo ti gini regbo?

¹⁴ Mo naambakada adunguratise wenengai. Ho mo ambakada adunguratise ni mbu regbo kumbatayo kindi, mo adunga na gunde tipa ka fu karagapai te. (Snz. 21:5) Ono tie, gaani aregbo mbakada adunguratise ni bakiakia. Eloise nga dekurugbo garãri naima susa 80, ninaatona mbakada gu Ngbaõbambu Sinziri du tipa wisigoho ho poso atona atona ni. Ri aya, “Mi naagbia ngbarago ti adunguratise ho mi ambakadaha ni mbu regbo koyo kindi.” Joy, nga guri namangasunge ti aregbo dunduko, ninaasia regbo Rago Nzengu, tipa kaa wisigo gari Ngbaõbambu Sinziri. Ri aya, “Ho mi ambakada dunguratise ni mbembedi na uru he, si nadu fere taata mi tingidi agu apai mi nambakadihe.” Ike, nga bakumba rogo dungurati kidu berewe ni  bazakigene aya, “Si nidu fere taata kaa wisigopai guruguru vuru poso yo, kuba gupai nga kaa wisigo dungu apai ti bangisa regbo sa.”

15. Waigu rengbe mo ka mbakada dunguratise wenengai?

¹⁵ Gini pai pa mbakada dunguratise wenengai akodaha? Mo nikpari tipa ga Yekova ziazia toro mbata fu mo tona wisigopai. (Rk. 11:13; 1 Yo. 5:14) Mo di bete aminiti ka ngera rii gupai mo awisigoho. Mo bi gu riipai, umba riipai, akpiapai, na agu asanduki nga ga yugopai. Wa mo nikaa wisigo agene waraga ni basasa, mo gedi agu averesi du rogoho wa rengbe omero na ni. Mo berẽkurii gupai si apehe, na ki moiberã ro tipa agu apai mo aida ka fu karagapai tipaha. Ka mo mbakadi gamo dunguratise wenengai, mo nika gbia undo ti ni bakere gbe na si nika du foro taata mo fu karagapai.—2 Kor. 9:6.

16. Gini aũsunge duho tipa mo mangisunge na ni, na wai du mo naamanga sunge na ni?

¹⁶ Ka rengba du bero, mo mangisunge na agu aũsunge nga ga Internet du rogo gu fugo mo nainihe. Yekova ima fu agu aũsunge furani nga ga Internet vurube gako riigbu tipa si undo rani ani naambakada adunguratise. Gu ũsunge nga JW Library^® app naundo rani ani zogo agu awaraga rogo Internet du tipa wisigoho ku rogo gaani aterefuni. Ani ima rengba ka wisigo agu awaraga ani azogaha re, ka gedaha, watadu ka gia dede fugoho ti ai regbo na rogo ai ba. Gu kura aboro namangasunge na gi ũsunge nga JW Library app re tipa ka wisigopai ti regbo ongoda basunge yo, sukuru yo, watadu ho i andu nunguro ni. Agu aũsunge nga Watchtower Library gbiati GU BA AWARAGA DU ROGO INTERNET^™ nga ga Ngbaõbambu Sinziri nasaha furani taata ani mangi wetekapai rii agu apai ani akpinyemu ka wisigopai tipaha sirisiri.

17. (a) Tipagine ngba gupai ti ni nga ka mbakada dungu akaragapai? (b) Ginipai mo awirikihe ti gu vidio nga, Become Jehovah’s Friend—Prepare Your Comment?

¹⁷ Ka rengba du bero, mo mbakadi dungu akaragapai. Tipagine? Bambiko si ima rengba kadu nga mo arengbanga ka gbia momu nibasa ti gu regbo mo atumba bero te. Gu kura aboro nika tumba beyo atumba ti kina gu bangisa regbo re, na gu boro nanungusapai ima rengba ka sia boro sa dagbayo yo. Banungusipai ima rengba ka dia akaragapai ni betehe kuti kura asanahe tipa gupai nga dunguratise nyasi ti regbo. Sidu, ka si du nga ko afunga momu foro ni ipo tipa mo karagapai te, ka rago gberẽnga tiro ya. Ka mo mbakadi dungu akaragapai, mo ima rengba kadu na dungu amomu bero ka fu akaragapai ti regbo dunguratise. Karagapai sa dagba agu akaragapai yo rengbe mo ka mbakadaha ima rengba ka koda geda Ziazia Kekeapai. Ono ka rengba du bero, mo mbakadi gu karagapai a nga gu mo agedanga ha ageda ya. *

18. Tipagine si aida ti ni ani fu guruguru akaragapai?

¹⁸ Mo fu guru karagapai. Dedede, wene akaragapai ningia gu i afuhe ni guruhe na ni  taataha. Sidu, mo moihe ni gamo sásá kaa fu guru karagapai. Mo asadi ka fu gamo karagapai tipa he wa asekonde 30. (Snz. 10:19; 15:23) Ka si du nga mo aima digo nifu akaragapai ba adunguratise yo tipa dungu agarã, si ni nyanyakipa pai foro ka maa wene kpiapai nifu mo guru karagapai. Ka mo fura tipa dungu aminiti na tipa dungu apai, gu kura aboro ima rengba ka gunde, kini berẽ gupai nga ka i funga karagapai ni wenehe wa mo te. Na berewe a, fu karagapai ni guruhe nambu regbo fu dungu aboro tipa i karagapai ba adunguratise yo a. Gbe, ka si du nga mo ya bero i ki fu momu foro ni bambata boro, mo fu gu karagapai du taata, na du kina kuti gu sanahe re. Si aidanga mo fura tipa agu apai dunduko du rogo gu genewaraga re te. Fuo i sakipai tipa gu memepai du rogo gu genewaraga re, mo ima rengba ka karagapai tipa gu kura apai.—Oni bi gu sanduki nga, “ Gini Apai Rengbe Mi ka fu Karagapai Tipaha?”

19. Waigu rengbe banungusipai ka undo ro, ono ginipai si aida mo mangihe?

¹⁹ Mo pehe fu banungusipai nga mo naida ka fu karagapai rogo gu kura genewaraga. Ka mo sia ka mangaha wo, si naida mo ndu fuo banungusipai ka pehe fuko mbata fu dunguratise tona. Ho regbo nika da ni tipa mo fu karagapai kuti gu genewaraga re, mo ya bero ni ipo kuari ngba gu gene nika sa banungusipai ko bihe abi.

20. Waigu du agu adunguratise nga ga dungurati wakina gu riahe mo arihe na wene abakureamo?

²⁰ Mo naabi agu adunguratise nga ga dungurati wa gu riahe mo arihe na wene abakureamo. Mo berẽnga gupai nga abakureamo rogo dungurati yambu ro tipa riahe na i kini sanaro tipa mo mangi wiri taata riahe tipa oni rihe. Ka pai mangi wa gure, mo du wai? Mo ima rengba ka gunde tooni, ono si nawira gupai gbe nga mo mangi gupai amanga rengbe omero na ni nga gu rengbe aboro dunduko kadu na ngbarago na ni. Yekova nga gu boro nayamba rani tipa adunguratise ima mbakada mbisa furani nga gu naima hi be wene ahe tipa rani. (Tam. 23:5; Mt. 24:45) Na ko na ngbarago ho ani aye ni na gu gamahe du taata, ono kidu ni bawenehe wa rengbe omerani na ni. Sidu, mo mbakadi tiro wenengai na ki fu karagapai wa rengbe omero na ni. Ngba gi gene re, mo andunga ka ri kina riahe gbua rii ga Yekova mbisa te, ono mo nika nduandu a na gamahe tipa ka fuhe fu dungurati.