1. Иегованыҥ Керечилериниҥ Кудайга канайып чындык арткан учуралдарын куучындап беригер.

ИЕГОВАНЫҤ КЕРЕЧИЛЕРИЛЕ болуп турган ӱч учурал кӧрӱп ийектер. 1) Ӱредӱчи удабас байрам болор, оныҥ учун ончо ӱренчиктерди турушсын деп, класстыҥ балдарына айдат. Је бу класста ӱренип турган јиит сыйын Кудайга бу байрам јарабай турганын оҥдоп, ого турушпазым деп, ӱредӱчиге тоомјылу айдып салат. 2) Уйалчаҥ јиит карындаш айылдар сайын јарлап јат. Јарлап турган туралардыҥ бирӱзинде оныла кожо ӱренип турган бала јадат деп билер болгон. Бу бала Иегованыҥ Керечилерине каткырып туратан. Је бу карындаш тӱҥей ле оныҥ туразыныҥ эжигине базып келеле, токулдадып јат. 3) Билезин јеткилдеерге акага кӧп иштеерге келижет. Бир катап иштиҥ јааны оны тӧгӱнденип ийзин эмезе јасак бузатан иш этсин деп сураган. Ака оныҥ айтканын бӱдӱрбезе, иш јок артып каларын билип те турган болзо, Кудай бойыныҥ ишчилерин тӧгӱндебезин ле јасак буспазын деп кӱӱнзеп турганынаҥ улам, бу ишти бӱдӱрбезим деп јартап берет (Рим. 13:1—4; Евр. 13:18).

2. Бис кандый сурактар кӧрӧрис, нениҥ учун?

² Бу христиандар кандый кылык-јаҥын кӧргӱскен? Слер олордыҥ јалтанбазын ла тӧгӱндебей турганын ајаруга алган болороор. Је олордыҥ анчада ла бир кылык-јаҥы — јек јок болоры — сӱреен баалу. Бу ӱч учуралда олор ончозы Иеговага чындык артып, Кудайдыҥ нормаларын буспаган. Нениҥ учун дезе олор Кудайдыҥ кӧзинде јек јок артарга кӱӱнзеген. Иегова олордыҥ кажызына ла оморкоп турган болор. Теҥеридеги Адабыс бисле де оморкоп турзын деп кӱӱнзейдис. Оныҥ учун ӱч сурак кӧрӱп ийектер: јек јок болоры ол не дегени? Биске нениҥ учун јек јок болор керек? Кӱч ӧйлӧрдӧ јек јок артарга биске не болужар?

3. а) Кудайдыҥ ишчилериниҥ јек јогы недеҥ кӧрӱнет? б) Немениҥ једикпес јогын ла бийик кеминде болгонын оҥдоп аларга, кандый темдер болужат?

³ Кудайдыҥ ишчилери јек јок болгонын канайып кӧргӱзип јат? Олор Иегованы акту јӱректеҥ сӱӱп, јӱк ого чындык болот, анайып, јаантайын Кудайдыҥ табын бӱдӱрип јат. Агару Бичикте «јек јок болоры» деген еврей сӧс једикпес јогын ла бийик кеминде болгонын кӧргӱзет. Анайып, јасак аайынча Иеговага экелип турган тындулар «једикпес јок» болор учурлу болгон * (Лев. 22:21, 22). Темдектезе, јасак аайынча, колы-буды јок, кулагы эмезе кӧзи јок тындуны Кудайга экелерге јарабас болгон. Иегованыҥ табы аайынча, тынду јектӱ эмезе оору болбос учурлу (Мал. 1:6—9). Мында кайкаар неме јок. Не дезе, бис качан да ӱрелип калган курсак, јыртылып калган бичик эмезе кандый бир немези јетпей турган эдим садып албазыс эмей. Биске јектӱ неме керек јок. Анайып ла Иегованы сӱӱп турганыс ла ого чындык артып турганыс јек јок болор учурлу.

4. а) Толо кеминде эмес улуста јек јок болор аргазы бар ба? Јартап беригер. б) Сарын 103:12—14-лӧ болзо, Иегова бисти кандый болзын деп кӱӱнзейт?

⁴ Јӱк ле толо кеминде улус јек јок болор аргалу деп сананганы чын болор бо? Не дезе, бис ончобыс јастырып јадыс ла бисте кӧп једикпестер бар. Мындый санаа нениҥ учун јастыра деп кӧрӱп ийектер. Баштапкызында, Иегова бистиҥ једикпестеристи ле јастыраларысты ундып салат. Агару Бичикте айдылат: «О Иегова, сен јастыраларды чотойтон болзоҥ, сениҥ алдыҥа кем чыдажып артар?» (Сар. 130:3). Ол бисти толо кеминде эмес, кинчектӱ улус деп билер, оныҥ учун бистиҥ јастыраларысты акту кӱӱнинеҥ таштап койот (Сар. 86:5). Экинчизинде, Иегова бистиҥ кӱчис неге једерин, неге јетпезин оҥдоп јат, оныҥ учун кӱчис јетпес неме некебей јат. (Сарын 103:12—14 кычырыгар *.) Айдарда, Кудайдыҥ кӧзинде јек јок болоры нени темдектейт?

5. Јек јок болорго, нениҥ учун Иегованы сӱӱр керек?

⁵ Кудайдыҥ кӧзинде јек јок болуп артарга, оны бастыра јӱрегисле сӱӱр керек. Анайда ок Кудайга сӱӱжис једикпес јок болор керек ле ого бӱткӱлинче чындык артар керек. Бис Кудайды ченелтелердиҥ ӧйинде де мынайып сӱӱзеес, Кудайдыҥ кӧзинде јек јок артадыс (1 Лет. 28:9; Матф. 22:37). Эмди јӧрмӧлдиҥ бажында айдылган ӱч темди ойто катап сананып ийектер. Јиит сыйын кожо ӱренип турган балдарла јакшы ӧй ӧткӱрерге кӱӱнзебей турган эмеш пе? Јиит карындашка кожо ӱренип турган баланыҥ шоодып каткырганын угарга јакшы ба? Билелӱ ака ижин јылыйтып саларына санааркабай турган эмеш пе? Олор Иеговада чындык нормалар бар деп билер, оныҥ учун теҥеридеги Адазын сӱӱндирерге кӱӱнзейт. Иегованы сӱӱп турганынаҥ улам оныҥ кӧрӱм-санаазын ајаруга алып, чын тӱп-шӱӱлте эдет. Анайып олор Кудайдыҥ кӧзинде јек јок болгонын кӧргӱзет.

6. а) Биске нениҥ учун јек јок болор керек? б) Нениҥ учун Адам ла Ева јек јок артып болбогон?

⁶ Ончо христиандарга нениҥ учун јек јок болор керек? Нениҥ учун дезе бир ангел Иеговага удура тӱймеен кӧдӱрип, бистиҥ чындыгысты алаҥзуга тургускан. Анайып ол Эдем садтаҥ ала Сатана эмезе «удурлажаачы» болуп калган. Ол Иегованы јаман, јаҥыс бойын сананган ла тӧгӱнчи башкараачы деп бурулап, Кудайдыҥ адын јамандап салган. Адам ла Ева  да Сатанага биригип, Кудайга удура барган (Баш. 3:1—6). Олор экӱде Эдем садта Иеговага сӱӱжин тыҥыдатан јӱзӱн-башка аргалар болгон. Је Сатана Иеговага удура тӱймеен кӧдӱрерде, олордыҥ Кудайды бастыра јӱрегиле сӱӱбей турганы кӧрӱне берген. Соондо, Иовтыҥ кӱндеринде база бир сурак кӧдӱрилген: кандый бир кижи Иегованы чыннаҥ сӱӱп, ого чындык артар ба? Ӧскӧртӧ айтса, улус Кудайдыҥ кӧзинде јек јок болор аргалу ба?

7. Иов 1:8—11-ле болзо, Иов керегинде Иегова нени сананган, Сатана нени сананган?

⁷ Иов Израиль албаты Египетте јӱрерде јаткан. Ол ӧйдӧ Кудайга Иовтый чындык кижи болбогон. Иов бистий ок толо кеминде эмес, јастырып турар кижи болгон. Је Иегова Иовты јек јок артып турганы учун сӱӱген. Сатана мынаҥ да озо улустыҥ јек јогы керегинде сурак кӧдӱрип, Иегованы јамандаган болор. Оныҥ учун Иегова Сатананы Иовко ајарып кӧрзин деп айткан. Иовтыҥ јӱрӱми тӱймеен кӧдӱрген ангелдиҥ тӧгӱнин илезине чыгарып турган. Оныҥ учун Сатана Иеговага Иовты ченеерге турганын айткан. Је Иегова бойыныҥ најызына, Иовко, алаҥзыбаган, оныҥ учун Сатананы токтотпогон. (Иов 1:8—11 кычырыгар *.)

8. Сатана Иовты чындык артпазын деп канайып ченеген?

⁸ Сатана коркышту калју тын. Ол кижи ӧлтӱреечи. Ол Иовтыҥ јӧӧжӧзин ле јалчыларын  айрып, керек дезе јакшы адын да јамандап салган. Анайда ок Сатана Иовтыҥ сӱӱген он балазын ӧлтӱрген. Иовты дезе, бажынаҥ ала будына јетире ириҥдӱ баалуларла — коркышту јаман оорула оорыдып салган. Мынаҥ улам Иовтыҥ ӱйи ачу-коронго чыдашпай, ого: «Кудайды каргап, ӧлӱп калзаҥ торт!» — деп айткан. Иов бойы да ӧлӧргӧ кӱӱнзеген, је Иегованыҥ кӧзине јек јок арткан. Ол тушта Сатана Иовты најылары ажыра ченеерге албаданган. Олор Иовко келип, оныҥ јанында кӧп кӱндер болгон до болзо, Иовко токунал бербеген. Олор Иовтыҥ сезимдерин сананбай, оны бурулап, ӱредип баштаган. Олордыҥ айтканыла болзо, мындый тӱбекти ого Кудай эткен, Кудай Иовтыҥ јек јогын ајаруга албай да јат. Керек дезе олор Иовты кинчектеринеҥ улам, мындый тӱбекке тӱшкен деп бурулаган (Иов 1:13—22; 2:7—11; 15:4, 5; 22:3—6; 25:4—6).

9. Ченелтелер болордо, Иов нени этпеген?

⁹ Мындый јаан тӱбекке тӱжӱп, Иов нени эткен? Ол толо кеминде эмезинеҥ улам, најы болоочыларга ӧнӧтийин айдарга сананбаган кату сӧстӧр айткан. Иов Кудайды актаардыҥ ордына, бойын актап баштаган (Иов 6:3; 13:4, 5; 32:2; 34:5). Је ол эҥ ле кӱч ӧйлӧрдӧ Иегованаҥ јана баспаган. Ол најылар болоочылардыҥ тӧгӱнине бӱтпей, олорго: «Мен качан да слерди чындык улус деп айтпазым. Ӧлӧрдиҥ ӧлгӧнчӧ јек јок болуп артарым!» — деп айткан (Иов 27:5). Бу тереҥ учурлу сӧстӧр. Иов кандый да кӱч болгон болзо, Кудайга чындык арткан, оныҥ учун бис те анайып чындык артар аргалу.

10. Иовтыҥ ӧйинде кӧдӱрилген Сатананыҥ сурагы нениҥ учун бистерге де ачык турат?

¹⁰ Иовтыҥ ӧйинде кӧдӱрилген Сатананыҥ сурагы бистерге де ачык турат. Сатананыҥ айтканыла болзо, бис Иегованы чыннаҥ сӱӱбей јадыс, бис ого акту јӱректеҥ иштебей јадыс, анайда ок јӱрӱмисти аргадаарга болуп, оноҥ јана болорыс (Иов 2:4, 5; Ачыл. 12:10). Сатананыҥ мындый бурулажы биске ачу јетирет. Је Кудай бисти чындык артар деп алаҥзыбай јат, оныҥ учун Сатанага бисти ченеер арга берет. Бис јек јок артып, Сатананы тӧгӱнчи деп кӧргӱзерис деп, Иегова бир де алаҥзыбай јат. Анайда ок Иегова биске болужар деп сӧзин берет (Евр. 13:6). Биске Јер-телекейдиҥ Бийи бӱдӱп турганы сӱреен јаан кӱндӱ! Эмди, нениҥ учун Кудайдыҥ кӧзинде јек јок болор керек деп оҥдоп турыгар ба? Нениҥ учун дезе анайып бис Сатананыҥ бурулажы тӧгӱн деп кӧргӱзерис, анайда ок Адабыстыҥ адын макка чыгарарыс ла оныҥ башкарузына јӧмӧжӧрис. Кудайдыҥ кӧзинде јек јок артарга нени эдер керек?

11. Бис Иовтыҥ теминеҥ неге ӱренедис?

¹¹ Бу телекейдиҥ «калганчы кӱндеринде» Сатана Кудайдыҥ ишчилерине оноҥ тыҥ табарулар эдет (2 Тим. 3:1). Оныҥ учун Иегованыҥ кӧзинде јек јок артатан ийде-кӱчти кайдаҥ алатан? Биске ойто ло Иовтыҥ теми болужар. Иов ченелтелердеҥ озо до Кудайга јаҥыс катап чындык артпаган. Оныҥ теминеҥ Иеговага чындык артарга болужатан јаан учурлу ӱч ӱредӱ аларга јараар. Олорды кӧрӱп ийектер.

12. а) Иов 26:7, 8, 14-лӧ болзо, Иов нениҥ учун Иегованаҥ айап, оны тоогон? б) Биске Иов чылап Иегованаҥ айап турарга не болужар?

¹² Иовко Иегованы оноҥ тыҥ сӱӱрге, оноҥ айап турары болушкан. Иов Иегованыҥ јайаандары керегинде шӱӱп сананарга, ӧй табып туратан. (Иов 26:7, 8, 14 кычырыгар *.) Иов јер, теҥери, булуттар ла кӱкӱрт керегинде сананып турза, акту јӱрегинеҥ Кудайдаҥ айап баштайтан. Је тӱҥей ле Кудайдыҥ  јайаандары керегинде оныҥ билгирлери коркышту ас болгонын билер болгон. Анайда ок Иов Иегованыҥ сӧстӧрин баалап: «Оныҥ оозынаҥ чыккан сӧстӧрин кичееп јадым» — деп айткан (Иов 23:12). Иов Иеговала оморкоп, оны тереҥ тооп туратан. Ол бойыныҥ Адазын сӱӱген, оныҥ учун оны сӱӱндирерге кӱӱнзеген. Бу ончо неме Кудайга чындык артарга болушкан. Бистерге Иовтоҥ тем алар керек. Бис Иовтыҥ ӧйинде јаткан улуска кӧрӧ, Кудайдыҥ јайаандары керегинде канча катапка кӧпти билерис. Анайда ок бисте Иегованы јакшы билип аларга, Кудайдыҥ тыныла бичилген Агару Бичик бар. Мынаҥ улам бис Јайаачыбыстаҥ айап, оны тооп јадыс. Анайып, бис Кудайды сӱӱрине, оныҥ сӧзин угарына, анайда ок оныҥ кӧзинде јаантайын јек јок артарына кӱӱнзедиледис (Иов 28:28).

13, 14. а) Иов 31:1-ле болзо, Иов Кудайга неде сӧсуккур болгон? б) Бис оноҥ кандый тем алар аргалу?

¹³ Иовко јек јок артарга, Кудайга сӧсуккур болгоны болушкан. Кудайды укпаза, кижиде јек јок болор аргазы јок деп, Иов билер болгон. Оныҥ учун Иегованы угуп турзаас, оныҥ кӧзинде јек јок болорго турганыс тыҥып јат. Иов Кудайды кандый ла айалгада угарга албаданган. Анайып ол ӱй улусла куучындашкан ӧйдӧ, бойын ӧйинеҥ ӧткӱре бош тудунбас деп сананып алган. (Иов 31:1 кычырыгар *.) Иов ӱйлӱ болгон. Ол ӱйинеҥ ӧскӧ кижиге кӱӱнзеп кӧрӧри јастыра деп билер болгон. Бӱгӱнги де кӱнде Сатананыҥ телекейи бисти балыр јӱрӱмге кӱӱнзедет. Је биске Иовтыҥ темиле, эш-нӧкӧрис эмес кижиге ӧйинеҥ ӧткӱре ајару эдерге јарабас. Анайда ок биске кайда ла кӧрӱнип турган јескинчилӱ јуруктарды ла порнографияны кӧрбӧс керек (Матф. 5:28). Бу јанынаҥ бис кажы ла кӱн бойысты тудунып турган болзоос, биске Кудайдыҥ кӧзинде јек јок артарга јеҥил болор.

¹⁴ Иов акча-јӧӧжӧ дӧ јанынаҥ Кудайга сӧсуккур болгон. Ол бойыныҥ јӧӧжӧзине иженип баштаза, јаан кинчек эдерин ле кату каруузына тургузыларын оҥдоп туратан (Иов 31:24,  25, 28). Бӱгӱнги кӱнде улус акча-јӧӧжӧгӧ коркышту јаан ајару эдет. Је бис библиялык принциптердеҥ тудунып, акча-јӧӧжӧгӧ чын кӧрӱмдӱ болзоос, Кудайдыҥ кӧзинде јек јок артарыс (Укаа 30:8, 9; Матф. 6:19—21).

15. а) Иов неде алаҥзыбаган? Бу ого јек јок артарга канайып болушкан? б) Андый ла ижемји биске нениҥ учун керек?

¹⁵ Иовко Кудайдаҥ кайрал алатан ижемјизи јек јок артарга болушкан. Кудай оныҥ јек јок болгонын баалап турган деп, Иов алаҥзыбаган (Иов 31:6). Ол ченелтелерге де табартарда, Иегова оны кайралдаар деп бӱткен. Андый ижемји ого јек јок артарга болушкан. Иовтыҥ андыйын кӧрӧлӧ, Кудай сӱӱнип, ишчизи толо кеминде эмес те болзо, ого арбынду алкыштар берген (Иов 42:12—17; Иак. 5:11). Иовты келер ӧйдӧ оноҥ кӧп алкыштар сакыйт. Иегова слерди де јек јок артканаар учун кайралдаар деп, алаҥзу јогынаҥ бӱдедигер бе? Бистиҥ Кудайыс солынбай јат (Мал. 3:6). Кудай бистиҥ чындык артканысты баалап турган деп ундыбай турзаас, келер ӧйгӧ ижемјибисти качан да јылыйтпазыс (1 Фес. 5:8, 9).

16. Биске нени эдерге бек сананып алар керек?

¹⁶ Кудайдыҥ кӧзинде јаантайын јек јок артараар деп, бек сананып алыгар! Је кезикте слерге бу јолло јаҥыскан барып јатканаар деп билдирер болор. Је слер качан да јаҥыскан болбозыгар. Не дезе, слер Кудайдыҥ кӧзинде эмдиги ӧйдӧ јек јок артып турган, анайда ок алдындагы ӧйлӧрдӧ ӧлӱмнеҥ де коркыбай Иеговага чындык арткан миллиондор тоолу ака-эјелерле кожо ӧмӧ-јӧмӧ иштееригер (Евр. 11:36—38; 12:1). Айдарда, Иовтыҥ: «Јек јок болуп артарым!» — деген сӧстӧрин ундыбай турактар! Јек јок болгоныс јаантайын Иегованы макка чыгарзын!