1. Kullakasa jilatanakasa, ¿kunjamsa Diosat jan jitheqtañ munapjjatap uñachtʼayapjje?

AKANAKAT amuytʼañäni. 1) Mä tawaqo kullakajj escuelan clasepankaski ukhajja, markan aniversariopa, jan ukajj falso religionanakan fiestap amtapjjañapatakiw profesorajj taqpachanir mayi. Kullakatakejj uka fiesta amtañajj janiw walïkiti, ukatwa “janiw uka fiesta amtkäti” sasin respetomp qhanañchi. 2) Mä wayna jilatajj utat uta yatiykasajja, mä compañeropan utapar jakʼachasiskatap amuyasi, uka compañeropajj Testigonakar wal nayrajj jiskʼachirïna. Ajjsarirïkchisa, compañeropan utap leqtʼiriw sari. 3) Familiani mä jilatajj trabajopankaski ukhajja, jefepajj kʼarisiñapatakiw mayi. Ukampis jilatajja, “Diosan servirinakapajj honradöpjjañapawa, leyinakarus istʼapjjañapawa, ukwa Diosajj muni” sasaw jefeparojj trabajo aptʼasirjam qhanañchi (Rom. 13:1-4; Heb. 13:18).

2. ¿Kuna jisktʼanakarus aka yatichäwin qhanañchaskañäni, ukat kunatsa?

² Kullakasa jilatanakasa, ¿kunjam chuymanïpjjatapsa uñachtʼayapjje? “Jan ajjsartʼirïpjjatapa, honradöpjjatapwa uñachtʼayapjje” sasin inas sissna. Ukajj cheqäkchisa, Diosar taqpach chuymampi servipjjatapwa uñachtʼayapjjaraki. Jupanakajj Diosan chuymap jan ustʼayañataki, leyinakapar istʼañatakiw chʼamachasipjje. Ukham lurapjjatap uñjasajja, Diosajj wal kusispacha. Jiwasajj ukhamarakiw alajjpachankir Awkisar kusisiyañ muntanjja. Ukatwa aka kimsa jisktʼanakar qhanañchaskañäni: Diosar taqpach chuymamp serviñajj ¿kamsañsa muni? ¿Kunatsa Diosar taqpach chuymampi serviñasa? ¿Kunas aka jan wali urunakan Diosar taqpach chuymampi serviskakiñatak yanaptʼistaspa?

3. 1) Jehová Diosar taqpach chuymamp serviñajj ¿kamsañsa muni? 2) Diosar taqpach chuymampi serviñajj kamsañsa muni uk amuytʼañatakejja, ¿kuna uñachtʼäwinakas yanaptʼistaspa?

³ Diosar taqpach chuymamp serviñajja, Jupar taqe chuym yupaychaña, munasiña, Jupatakjam sarnaqaña sañwa muni. Biblianjja, hebreo arut “Diosar taqpach chuymamp serviña” sasin jaqokipaski uka arojj phoqata, maypacha, jan ukajj jan usuta sañatakiw apnaqasi. Moisesan Leyiparjamajja, sacrificiot loqtaskäna uka animalanakajj janiw usutäpjjañapäkänti (Lev. 22:21, 22). * Diosan servirinakapajja, janiw jan kayuni, jan jiñchuni, jan nayrani, jan ukajj usuntata animalanak sacrificiot loqtapjjañapäkänti (Mal. 1:6-9). ¿Kunatsa Jehová Diosar kuntï churktan ukajj phoqatäñapa? Aka toqet amuytʼañäni. Mä fruta alastan ukhajja, janiw laqʼotäñapäkiti ni chikatakïñapäkisa, jan ukasti, maypachäñapawa. Jehová Diosarojj ukhamarakiw taqpach chuymampi munasiñasa, janipuniw Jupat jitheqtañasäkiti. Diosajj maypachäñaswa muni, mä arunjja, taqpach chuymampi Jupar serviñaswa muni.

4. 1) ¿Mä pantjasir jaqejj Diosar taqpach chuymamp servispati? 2) Salmo 103:12-14 qellqatarjamajja, ¿kunsa Diosajj sapa maynir mayistu?

⁴ Pantjasirïtas laykojj inas akham jisktʼasstan: “¿Diosar taqpach chuymampi serviñatakejj perfectöñajati?” sasa. Janiw perfectöñasäkiti. ¿Kunatsa ukham sistanjja? Maya, Jehová Diosajj janiw pantjasitanakas amjjäskiti. Bibliajj akham siwa: “Dios Tatay, jumatejj taqpach juchanak amjjäsiskakismajja, ¿khitirak nayraqataman saytʼaspasti?” sasa (Sal. 130:3). Jupajj pantjasirïtassa juchachasirïtassa yatiwa, taqe chuymaw perdonarakistu (Sal. 86:5). Paya, qhawqsa lurirjamätan uk Jehová Diosajj yatiwa, ukatwa kuntï lurirjamäktan ukak mayistu (Salmo 103:12-14 liytʼañataki). Ukhamajj ¿kunjamsa Diosar taqpach chuymamp sirvsna?

5. ¿Kunatsa Diosar taqpach chuymamp serviñatakejj Jupar munasiñasa?

⁵ Diosar taqpach chuymamp serviñatakejj taqe chuymaw Jupar munasiñasa, janirakiw kunäkipansa Jupat jitheqtañasäkiti. Jan walinakan uñjaskasas Diosar munasiskaktan ukhajja, taqpach chuymamp serviskataswa uñachtʼaytanjja (1 Crón. 28:9; Mat. 22:37). Nayrïr parrafon parlaniwayktan uka kullakampita jilatanakampit parltʼaskakiñäni. Kullakajj janiw escuelan aburrisiñ munkiti. Wayna jilatasti, janiw utat uta yatiykasajj phenqʼachatäñ munkiti. Familiani jilatasti, janirakiw trabajop aptʼasiñ munkiti. Ukhamajj ¿kunatsa Diosat jan jitheqtañ amtapjjpacha? Jupanakajja, Diosan leyinakapajj cheqapätapwa yatipjje, alajjpachankir Awkiparuw kusisiyañ munapjjaraki. Jupar munasiñatwa taqe kuns ewjjtʼaparjam lurapjje. Ukhamatwa Diosar taqpach chuymampi servipjjatap uñachtʼayapjje.

6. 1) ¿Kunatsa Diosarojj taqpach chuymampi serviñasa? 2) Adanampi Evampejja, ¿kunjamsa Diosar jan taqpach chuymampi munasipjjatap uñachtʼayapjjäna?

⁶ ¿Kunatsa taqenis Diosar taqpach chuymampi serviñasa? Supayajj jan walinakwa Dios contrasa jaqenak contras parläna. Dios contra saytʼiri uka angelajj Supayaruw Edén jardinan tuküna (Supaya arojj “kutkatasiri” sañwa muni). Diosajj jan wali apnaqeriwa, Jupatakik taqe kuns muniriwa, jan cheqaparjam kuns luririwa sasaw Supayajj Jehová Diosan sutip qʼañuchäna. Adanampi Evampejj Supayampiw mayachasipjjäna, Dios contraw saytʼapjjarakïna (Gén. 3:1-6). Edén jardinan  jakkasajja, sapürutjamaw Diosarojj munasipjjaspäna. Ukampis Supayajj Dios contra saytʼaskäna ukhajja, Diosar jan taqpach chuymampi munasipjjatapwa uñachtʼayapjjäna. Job chachajj jakkäna uka urunakanjja, aka jisktʼar qhanañchañaw wakisirakïna: “¿Diosar munasipjjatapat Jupat jan jitheqtir jaqenakajj utjaspati?, mä arunjja, ¿jaqenakajj Diosar taqpach chuymamp servipjjaspati?”.

7. Kunjamtï Job 1:8-11 qellqatajj siskejja, ¿kunjamsa Diosajj Job chachar uñjäna, kunjamsa Supayajj uñjarakïna?

⁷ Job chachajja, israelitanakajj Egiptonkapkäna uka tiemponwa jakarakïna. Uka tiemponjja, janiw Job chachjam Diosar taqpach chuymampi servir jaqejj utjkänti. Jupajj jiwasjam pantjasir jaqënwa, ukampis Diosajj taqpach chuymamp servitapat wal munasïna. Supayajja, “jaqenakajj janiw taqpach chuymamp servipktamti” sasin nayratpachaw Diosar sispachäna. Ukatwa Jehová Diosajj ‘¿Job chachar uñjaniwaytati?’ sasin sispachäna. Uka chachajja, Supayajj kʼarïtapwa sarnaqäwipamp uñachtʼayäna, ukatwa Supayajj uka chachar yantʼasiñapatak Diosar mayïna. Diosajj amigopar confiyänwa, ukatwa Supayamp yantʼatäñapatak jaytäna (Job 1:8-11 liytʼañataki).

8. ¿Kuna jan walinaksa Supayajj Job chachar luräna?

⁸ Supayajj jan sinttʼasiri, jaqe jiwayiri ukhamawa. Job chachatjja taqe kunwa aparäna, servirinakaparus jiwarayänwa, jaqenakampis jan wali jaqetwa uñjayarakïna. Wali munat 10 wawanakaparuw jiwarayarakïna. Qhepatjja, llejjti usumpiw kayut pʼeqekam usuntayäna. Warmipajj uka jan walinak uñjasin wali llakitäsajja, ‘suma jaqëñ munaskaktawa, ¡ñanqhacham Diosaru, ukat jiwjjam!’ sasaw säna. Job  chachajj jiwañakwa munjjäna, ukhampachas Diosar taqpach chuymamp serviskakïnwa. Ukatjja, Supayajj yaqha jan wal lurarakïna. Job chachan kimsa amigonakapaw visittʼir sarapjjäna, jupanakampiw Supayajj jukʼamp llakisiyäna. Uka jaqenakajj jan sinttʼasisaw Job chachar juchañchapjjäna. ‘Diosaw tʼaqesiyasktamjja’ sasaw sapjjäna, ‘Jupatakejj taqpach chuymampi servitamasa jan servitamas igualakiwa’ sasaw sapjjarakïna. ‘Jan wali jaqëtamatwa akhaman uñjastajja’ sasaw sapjjäna (Job 1:13-22; 2:7-11; 15:4, 5; 22:3-6; 25:4-6).

9. Job chachajj kunayman jan walinakansa uñjaskchïnjja, ¿kun lurañsa amtäna?

⁹ Ukhaman uñjasisajj ¿kunsa Job chachajj luräna? Pantjasirïtap laykojj colerasïnwa, jan wali amigonakaparus toqenoqänwa, qhepatakwa ukham luratapat amtasïna. Diosat sipan jukʼamp cheqapäkaspas ukhamwa amuyasirakïna (Job 6:3; 13:4, 5; 32:2; 34:5). Job chachajj sinti jan walinakansa uñjaskchïnjja, janipuniw Dios contrajj saytʼkänti. Jan wali amigonakapan kʼari arunakaparus janiw creykänti. Akham sänwa: ‘Janipuniw kunäkipansa “cheqa jaqenakäpjjtawa” sasin sapkämati. Jiwañajkamajj taqpach chuymampiw Diosar yupaychä’ sasa (Job 27:5, NM). Uka arunakampejja, “jan walinakan uñjaskasas Diosar taqpach chuymamp serviskakïwa” sañwa munäna. Jupajj janipuniw Diosat jitheqtañ munkänti, jiwasajj ukhamwa luraraksna.

10. ¿Kunsa Supayajj taqe jaqenakat amuyi?

¹⁰ Supayajj ukhamarakiw jiwasat jan walinak amuyi. Jehová Diosarojj janis cheqpachapun munasksna, jakäwis jan aptʼasiñ laykojj Jupar serviñ jaytjjsnasa, Diosarojj janis taqpach chuymamp sirvksna ukhamwa amuyi (Job 2:4, 5; Apoc. 12:10). ¿Kunjamsa uk yatisajj jikjjatastanjja? ¿Janit chuymajj uskistu? Ak janipun armañäniti: Jehová Diosajj janiw jiwasat pächaskiti, ukatwa Supayarojj jiwasar yantʼañapatak jayti. Ukhamat kuntï Supayajj siski ukajj kʼarïtapa, ukhamarak Diosar taqpach chuymamp servitas uñachtʼayañataki, ukatakejj Diosaw yanaptʼistani (Heb. 13:6). Taqe Kunjjar Munañani Reyimpi ukham uñjatäñajj wali kusiskañawa, ukatwa Jupar taqpach chuymampi serviñasa. Ukham lurañäni ukhajja, Supayan arunakapajj kʼarïtapwa uñachtʼayañäni, alajjpachankir Awkisan sutip toqe saytʼasitassa, Jupajj suma apnaqerïtapsa uñachtʼayarakiñäniwa. Ukhamajj ¿kunas Diosar taqpach chuymampi serviskakiñatakejj yanaptʼistaspa?

11. ¿Kunsa Job chachat yateqsna?

¹¹ Aka jan wali “qhepa urunakanjja”, Supayajj jukʼampiw Diosan servirinakaparojj jan waltʼayañ muni (2 Tim. 3:1). Ukhamajja, ¿kunanak lurañas Diosar taqpach chuymampi serviskakiñatak yanaptʼistaspa? Job chachatwa yateqasiñasa. Supayamp janïr yantʼat uñjaskasajja, walja kutiw Diosar taqpach chuymampi servitap uñachtʼayäna. Kunanaksa Job chachajj luräna ukat kunsa jupat yateqassna uk jichhajj kimsa toqet uñjañäni.

12. 1) Job 26:7, 8, 14 qellqatarjamajja, ¿kunas Job chacharojj Diosar munasiñatakisa respetañatakis yanaptʼäna? 2) ¿Kunas jiwasarojj Diosar munasiñatakisa respetañatakis yanaptʼistani?

¹² Jehová Diosajj musparkañ Diosätap yatiñaw Jupar jukʼamp munasiñatak yanaptʼäna. Job chachajj Diosan luratanakapat lupʼipunirïnwa (Job 26:7, 8, 14 liytʼañataki). Kunapachatï aka oraqeta, alajjpachata, qenayanakata, qʼejjo qʼejjot lupʼïna ukhajj wal musparäna, Diosan luratanakapat mä jukʼak yatitapsa amuyarakïnwa. Maysa toqetjja, kuntï Diosajj yatichkäna ukarojj wali valoranitwa uñjäna, ukatwa akham säna: “Mandamiento arunakapsa phoqhapuntwa” sasa  (Job 23:12). Diosajj musparkañ Diosätap yatiña, ukhamarak Jupar respetomp uñjañaw Job chacharojj Diosar munasiñatakisa kusisiyañatakis yanaptʼäna. Ukarakiw Jupar taqpach chuymamp serviñatakis yanaptʼarakïna. Jiwasajj Job chachjamarakiw Diosan musparkañ luratanakapat lupʼiñatakejj tiempo apstʼasiñasa. Jichhürunakanjja, jaqenakajj jukʼampwa Diosan luratanakapat yatipjje, Biblias phoqatpachaw utj-jjarakistu, ukaw Diosar jukʼamp uñtʼañatak yanaptʼistu. Kuntï yatjjatkañäni ukajja, Diosajj musparkañ Diosätap yatiñataki, Jupar respetompi uñjañatakiw yanaptʼistani. Diosar ukham uñjañajja, Jupar munasiñataki, arunakaparjam sarnaqañataki, taqpach chuymampi serviñatakiw yanaptʼarakistani (Job 28:28).

13, 14. 1) Job 31:1 qellqatarjamajja, ¿kunjamsa Job chachajj istʼasirïtap uñachtʼayäna? 2) ¿Kunjamsa jiwasajj Job chachat yateqassna?

¹³ Taqe kunanwa Diosar istʼäna. Diosar taqpach chuymampi serviñatakejja, Job chachajj Jehová Diosar istʼañapänwa. Cheqas Diosar istʼañajja, Jupar taqpach chuymamp serviskakiñatakiw yanaptʼistu. Job chachajj Diosar taqe kunan istʼañatakiw chʼamachasïna. Sañäni, janipuniw warminakarojj jan wali amtampi uñchʼukirïkänti (Job 31:1 liytʼañataki). Niyakejjay jupajj casaratächïnjja, jan warmipäkäna uka warminakar jan wali amtampi arjjayañajj janipuniw jupatak walïkänti. Jichhürunakanjja, kunayman qʼañu lurañanakaw akapachan utji. Ukhamajj ¿Job chachjamarakit jan warmisäki, jan ukajj jan chachasäki ukanakarojj uñjañäni? ¿Pornografía, jan ukajj yaqha ukhamanak janipun uñchʼukiñatakejj chʼamachasiñäniti? (Mat. 5:28). Jiwasatï munañasamp jan apnaqayaskañäni ukhajja, Diosarojj taqpach chuymamp serviskakiñäniwa.

¹⁴ Job chachajja, Jehová Diosjamarakiw kunanakatï akapachan utjki ukanakar uñjäna. ‘Cosasanakar confiyañajj mä jachʼa jucha lurañampi sasispawa, juezanakat castigo katoqañakiw wakisjjaspa’ sasaw säna (Job 31:24,  25, 28, NM). Jichhürunakanjja, qollqe chuyma jaqenak taypinwa jaktanjja. Ukampis qollqerusa, kunatï akapachan utjki ukanakarus Biblian ewjjanakaparjam uñjañäni ukhajja, Diosarojj taqpach chuymamp serviskakiñäniwa (Prov. 30:8, 9; Mat. 6:19-21).

15. 1) Job chacharojja, ¿kun suytʼañas Diosar taqpach chuymampi serviskakiñatak yanaptʼäna? 2) ¿Kunatsa kuntï jutïrin katoqkañäni uk amtapuniñasa?

¹⁵ Diosajj bendisitaniwa sasaw suytʼäna. Taqpach chuymampit serviskta janicha ukajj Diosatak wali wakiskiriwa sasaw Job chachajj amuyäna (Job 31:6). Kunayman jan walinakampi yantʼatas uñjaskchïnjja, Diosajj bendisitaniwa sasaw confiyäna, ukaw Diosar taqpach chuymampi serviskakiñatak yanaptʼäna. Jehová Diosajj suma jaqetwa Job chachar uñjäna, ukatwa pantjasir jaqëkchïnsa bendicionanakap churäna (Job 42:12-17; Sant. 5:11). Jutïrinsa jukʼamp suma bendicionanakwa katoqani. ¿Jiwasat kamsaraksnasa? ¿“Diosajj taqpach chuymamp servitajat bendisitaniwa” sasat suytanjja? Jehová Diosajj pachpakïskiwa (Mal. 3:6). Jupar taqpach chuymamp servitasjja, wali valoranitwa uñji. Uk amtañajja, kuntï jutïrin katoqkañäni uk taqe chuym suytʼañatakiw yanaptʼistani (1 Tes. 5:8, 9).

16. ¿Kun lurañsa janipun jaytañasäki?

¹⁶ Janipun kunäkipansa Diosar taqpach chuymamp serviñ jaytapjjañäniti. Awisajja, jiwasakis ukham lurañatak chʼamachasisksna ukhamwa amuyassna. Ukampis janiw sapäktanti. Oraqpachanjja, walja jilat kullakanakaw Diosar ukham serviñatak chʼamachasisipki. Nayra tiemponakansa, ukhamarakiw Diosar confiyirinakajj jakäwip niya aptʼasirjam Diosar taqpach chuymamp servipjjäna (Heb. 11:36-38; 12:1). Ukhamajj Job chachat yateqasipjjañäni, ukat akham sapjjarakiñäni: ‘Jiwañajkamajj taqpach chuymampiw Diosar yupaychä’ sasa. Diosar taqpach chuymampi servitasajj Jupar wiñayataki jachʼañchpan.