1. Үч диндашымыз Јеһоваја неҹә сәдагәт ҝөстәриб?

ЈЕҺОВАНЫН ШАҺИДЛӘРИНИН гаршылашдығы 3 фәргли сәһнәјә диггәт јетирин. 1) Мәктәбдә охујан бир баҹынын мүәллими бир ҝүн синифдә дејир ки, бүтүн шаҝирдләр кечирилән тәдбирдә иштирак етмәлидир. Баҹы бу тәдбирин Јеһоваја мәгбул олмадығыны билдији үчүн һөрмәтҹил шәкилдә иштирак едә билмәјәҹәјини дејир. 2) Утанҹаг хасијјәтли ҝәнҹ бир гардаш ев-ев тәблиғ едән заман нөвбәти евдә Јеһованын Шаһидләрини әлә салан бир мәктәб јолдашынын јашадығыны анлајыр. Лакин о, һеч нәјә бахмајараг, һәмин евә јахынлашыб гапыны дөјүр. 3) Аиләсини доландырмаг үчүн вар ҝүҹү илә ишләјән бир гардашымызын мүдири ондан надүрүст давранмағы вә ја ганунсузлуг етмәји тәләб едир. Бахмајараг ки, гардаш ишини итирә биләр, мүдиринә Аллаһын ондан дүрүст олмағы вә гануна итаәт етмәји тәләб етдијини сөјләјир (Ром. 13:1—4; Ибр. 13:18).

2. Һансы суаллары мүзакирә едәҹәјик вә нә үчүн?

² Јәгин бу диндашларымызда ҹәсарәт, дүрүстлүк кими хүсусијјәтләрин олдуғуна диггәт јетирдиниз. Амма онларын һәр бириндә бир мүһүм ҹәһәт вар — бу да онларын камиллик јолунда јеримәсидир. Онларын үчү дә Јеһоваја сәдагәт ҝөстәрир, Онун ганунларыны позмагдан имтина едир. Бу, онларын камил инсан олдугларыны ҝөстәрир. Сөзсүз, Јеһова камилликләрини горудугларына ҝөрә онларын һәр бири илә фәхр едир. Истәјирик ки, Јеһова бизимлә дә фәхр етсин. Елә исә ҝәлин бу суаллары мүзакирә едәк: Камиллик нәдир? Бу хүсусијјәтә нәјә ҝөрә еһтијаҹымыз вар? Бу чәтин зәманәдә камиллији горумаг әзмимизи неҹә мөһкәмләндирә биләрик?

3. а) Јеһованын хидмәтчиләри үчүн камиллик нәдир? б) Камиллијин нә олдуғуну нүмунәләр әсасында изаһ един.

³ Јеһованын хидмәтчиләри үчүн камил олмаг Јеһованы бүтүн  үрәклә севмәк, Она сарсылмаз сәдагәт ҝөстәрмәк мәнасыны верир. Белә инсан вердији бүтүн гәрарларда илк нөвбәдә Јеһованын истәјини нәзәрә алыр. Ҝәлин Мүгәддәс Китабда бу сөзүн неҹә ишләндијинә диггәт јетирәк. Орада «камил» сөзү там, гүсурсуз, јахуд бүтөв мәналарында ишләнир. Мисал үчүн, исраиллиләрин Јеһоваја гурбан ҝәтирдикләри һејванлар Гануна әсасән, сағлам, гүсурсуз олмалы иди * (Лав. 22:21, 22). Аллаһын халгы ајағы, гулағы, ҝөзү олмајан, јахуд хәстә һејваны гурбан ҝәтирә билмәзди. Јеһова үчүн ҝәтирилән гурбанын там, гүсурсуз вә бүтөв олмасы ваҹиб иди (Мәл. 1:6—9). Бу, тәәҹҹүблү дејил. Елә биз өзүмүз дә чүрүк мер-мејвә, ҹырыг дәфтәр-китаб, јахуд бәзи һиссәләри олмајан әшјаны алмаг истәмәрик. Әксинә истәјирик ки, алдығымыз шеј гүсурсуз, бүтөв олсун. Јеһова да истәјир ки, бизим Она бәсләдијимиз мәһәббәт вә сәдагәт там, гүсурсуз вә бүтөв олсун.

4. а) Ҝүнаһлы инсан һансы мәнада камил ола биләр? б) Зәбур 103:12—14 ајәләриндән Јеһованын бизә мүнасибәти барәдә нә өјрәнирик?

⁴ Бәс камил олмаг о демәкдирми ки, ҝүнаһсыз олмалыјыг? Ола билсин, ҝүнаһлы олдуғумуз вә чохлу сәһвләрә јол вердијимиз үчүн дүшүнүрүк ки, камил олмаг мүмкүн дејил. Анҹаг Аллаһ бу ҝүн биздән мүтләг, јәни там мәнада камиллик ҝөзләмир. Буну һарадан билирик? Ҝәлин ики сәбәбә нәзәр салаг. Биринҹиси, Јеһова диггәтини бизим нөгсанларымыза ҹәмләмир. Онун Кәламында дејилир: «Еј Јаһ, анҹаг сәһвләримизи ҝөрсәјдин, ким дајана биләрди, еј Јеһова?» (Зәб. 130:3). Јеһова бизим ҝүнаһлы олдуғумузу билир вә бизи сәхавәтлә бағышлајыр (Зәб. 86:5). Икинҹиси, Јеһова мәһдудијјәтләримиздән аҝаһдыр вә баҹарығымыздан артығыны тәләб етмир. (Зәбур 103:12—14 ајәләрини охујун.) Бәс биз Јеһованын ҝөзүндә һансы мәнада там, гүсурсуз вә бүтөв ола биләрик?

5. Һансы мәнада камиллијә ҝедән јол мәһәббәтдән кечир?

⁵ Јеһованын хидмәтчиләри үчүн камиллијә апаран јол мәһәббәтдән кечир. Аллаһа мәһәббәтимиз, сәдагәтимиз там, гүсурсуз вә бүтөв олмалыдыр. Әҝәр мәһәббәтимиз сынаглар заманы белә, бу ҹүр галырса, бу бизим камиллијимиздән хәбәр верир (1 Салн. 28:9; Мәт. 22:37). Јухарыда бәһс етдијимиз үч диндашымызы бир дә хатырлајаг. Онлар нә үчүн белә давранмышдылар? Мәҝәр ҝәнҹ баҹымыз мәктәбдә әјләнмәји севмир? Јахуд ев-ев тәблиғ едән гардашымызын әлә салынмагдан хошу ҝәлир? Бәлкә, аилә башчысы олан гардашымыз ишини итирмәк истәјир? Әлбәттә, јох. Онлар Јеһованын салеһлик нормаларындан аҝаһдыр вә диггәтләрини Ону разы салмаға ҹәмләјибләр. Јеһоваја мәһәббәт бу баҹы-гардашлары тәшвиг едир ки, гәрар верәркән һәр заман Онун фикрини нәзәрә алсынлар. Бунунла да онлар камиллик јолу илә ҝетдикләрини әмәлдә ҝөстәрирләр.

6. а) Нә үчүн камил олмаг ваҹибдир? б) Адәмлә Һәвва камиллик јолундан неҹә дөндү?

⁶ Һәр биримизин камил олмасы нә үчүн ваҹибдир? Чүнки Шејтан һәм Јеһоваја, һәм дә бизә мејдан охујуб. Јеһоваја аси чыхдығы үчүн бу мәләк Шејтан, башга сөзлә «Әлејһдар» адланыр. О, Әдән бағында Јеһованы пис, худбин вә надүрүст Һөкмдар олмагда иттиһам едәрәк Онун адына гара јахмышды. Әфсуслар олсун ки, Адәмлә Һәвва она гошулуб Јеһоваја үсјан етди (Јар. 3:1—6). Әдәндә јашајаркән онларын Јеһоваја мәһәббәтләрини мөһкәмләндирмәк үчүн сајсыз-һесабсыз имканлары вар иди.  Лакин Шејтан Јеһованы иттиһам едән заман онларын мәһәббәти там, гүсурсуз вә бүтөв дејилди. Даһа сонра ортаја башга суал чыхды: Кимсә Аллаһа мәһәббәтдән ирәли ҝәләрәк садиг галаҹаг? Башга сөзлә, инсанлар мүкәммәл сурәтдә Аллаһын јолу илә ҝедә биләр? Бу суал Әјјуб пејғәмбәрлә бағлы галхмышды.

7. Әјјуб 1:8—11 ајәләринә әсасән, Јеһова Әјјуб барәдә нә дүшүнүрдү? Бәс Шејтан Әјјуб һагда һансы фикирдә иди?

⁷ Әјјуб исраиллиләрин Мисирдә олдуғу дөврдә јашајырды. Һәмин дөврдә онун кими камил инсан јох иди. О да бизим кими ҝүнаһлы бәндә иди, сәһвләр едирди. Амма камил сәдагәтинә ҝөрә Јеһова ону чох севирди. Ҝөрүнүр, Шејтан инсанларын камилликләрини горуја билмәјәҹәкләри илә бағлы артыг Јеһоваја ришхәнд етмишди. Буна ҝөрә дә Јеһова Шејтанын диггәтини Әјјуба јөнәлдир. Әјјубун һәјат тәрзи Шејтанын иддиаларынын јалан олдуғуну сүбут едирди! Шејтан Әјјубун камиллијини сынамаг үчүн Јеһовадан изин истәјир. Јеһова әзиз досту Әјјуба ҝүвәндији үчүн Шејтана изин верир. (Әјјуб 1:8—11 ајәләрини охујун.)

8. Шејтан Әјјуба неҹә һүҹум чәкди?

⁸ Шејтан гәддардыр, гатилдир. О, Әјјуб пејғәмбәрин вар-дөвләтини талады, нөкәрләрини мәһв етди, ону ҹәмијјәт арасында нүфуздан салды, он әзиз баласыны әлиндән алды. Сонра Әјјубун өзүнү нишан алды, ону тәпәдән-дырнағаҹан ағрыјан чибанларла вурараг хәстәлијә дүчар еләди. Пејғәмбәрин арвады кәдәрдән о гәдәр пәришан иди ки, ону камиллијиндән дөнмәјә, Аллаһа ләнәт едиб өлмәјә сөвг етмишди. Әјјуб да өзүнә өлүм арзулајырды. Амма бүтүн бунлара бахмајараг, һәлә дә Аллаһа сәдагәтини горујурду. Сонра Шејтан башга үсула  әл атды: Әјјубу камиллик јолундан дөндәрмәк үчүн үч достундан истифадә еләди. Она баш чәкмәјә ҝәлән достлары тәсәлли вермәк әвәзинә, рәһмсизҹәсинә ону ҝүнләрлә тәнгид атәшинә тутурдулар. Онлар иддиа едирдиләр ки, ҝуја бүтүн бу бәлалары онун башына Аллаһ ҝәтириб вә камил галмаға чалышмасы Аллаһын веҹинә дејил. Онлар һәтта дејирдиләр ки, Әјјуб пис адамдыр, башына ҝәлән әзаблара лајигдир! (Әјј. 1:13—22; 2:7—11; 15:4, 5; 22:3—6; 25:4—6).

9. Үзләшдији сынаглара бахмајараг, Әјјуб нәји етмәди?

⁹ Бәс Әјјуб пејғәмбәр бу әзаблар гаршысында неҹә давранды? О, сәһвсиз дејилди. Әјјуб гәзәбләниб сахта достларыны мәзәммәт еләди, сонрадан пешман олаҹағы сөзләр деди. Үстәлик, Аллаһы јох, өзүнү һаглы чыхармаға чалышды (Әјј. 6:3; 13:4, 5; 32:2; 34:5). Бунунла белә, о һәтта һәјатынын ән чәтин анларында Аллаһдан үз дөндәрмәји ағлына да ҝәтирмәди. Сахта достларынын јаланларына инанмады. О деди: «Әсла сизә һагг газандырмарам! Мән сон нәфәсимәдәк садиг галаҹағам!» (Әјј. 27:5). Әјјубун бу сөзләриндән ҝөрмәк олар ки, о, камил галмаға гәтијјәтли иди. О, тәслим олмады. Бу биздә дә алынар.

10. Шејтанын Әјјубла бағлы иттиһамларынын сизә һансы аидијјәти вар?

¹⁰ Шејтанын Әјјубла бағлы галдырдығы иттиһамлар һамымыза аиддир. Һансы мәнада? Маһијјәт етибарилә Шејтан дејир ки, әслиндә сиз Аллаһы севмирсиниз, һәјатынызы горумагдан өтрү Аллаһа ибадәт етмәјә сон гојарсыныз вә камиллијинизи сонадәк горумајаҹагсыныз (Әјј. 2:4, 5; Вәһј 12:10). Јәгин ки, бу иттиһамлары ешитмәк сизә гәлб ағрысы верир. Амма ҝәлин дүшүнәк: Јеһова сизә о гәдәр етибар едир ки, Шејтана сизи сынаға чәкмәјә изин верир. Бунунла гаршынызда мөһтәшәм бир имкан ачыр: сиз камиллијинизи горујараг Шејтанын јаланчы олдуғуну сүбут едә биләрсиниз. Јеһова сизин садиг гала биләҹәјинизә әминдир. Үстәлик, О, бу саһәдә сизә көмәк едәҹәјинә сөз верир (Ибр. 13:6). Каинатын Һөкмдарынын бизә етибар етдијини билмәк неҹә дә ҝөзәл һиссдир! Камил олмағын нә гәдәр ваҹиб олдуғуну јәгин инди даһа јахшы баша дүшүрсүнүз. Чүнки бунун сајәсиндә биз Шејтанын јаланларыны тәкзиб едирик, Јеһованын адыны уҹалдырыг вә Онун һакимијјәтини дәстәкләјирик. Бәс камиллијимизи неҹә горуја биләрик?

11. Әјјуб пејғәмбәрдән нә өјрәнирик?

¹¹ «Сон дәрәҹә чәтин» бир дөвр олан ахырзаманда Шејтан Аллаһын хидмәтчиләринә гаршы һүҹумларыны артырыб (2 Тим. 3:1). Бәс бу ҹүр чәтин бир зәманәдә камиллијимизи горумаг гәтијјәтимизи неҹә мөһкәмләндирә биләрик? Әјјубдан бу саһәдә дә чох шеј өјрәнә биләрик. О, һәлә башына сынаглар ҝәлмәздән хејли әввәл Јеһоваја дәфәләрлә сәдагәт ҝөстәрмишди. Ҝәлин ҝөрәк камиллијимизи горумаг үчүн Әјјубдан һансы үч саһәдә өрнәк ҝөтүрә биләрик.

12. а) Әјјуб 26:7, 8, 14 ајәләриндә вурғуландығы кими, Әјјуб Јеһоваја еһтирам һиссини неҹә јетишдирмишди? б) Үрәјимизи Јеһоваја еһтирам һисси илә долдурмаг үчүн нә едә биләрик?

¹² Әјјуб пејғәмбәр Јеһоваја еһтирам һисси инкишаф етдирәрәк Она олан мәһәббәтини мөһкәмләндирирди. Пејғәмбәр јарадылыш мөҹүзәләрини мүшаһидә етмәк үчүн вахт ајырырды. (Әјјуб 26:7, 8, 14 ајәләрини охујун.) О, Аллаһын јаратдығы Јер күрәси, сәма, булудлар вә шимшәк үзәриндә дүшүнәндә һејрәтә ҝәлирди. Бунунла белә, баша дүшүрдү ки, Аллаһын јаратдыглары барәсиндә һәлә билмәдији шејләр чохдур. Әјјуб пејғәмбәр Јеһованын бујругларына да бөјүк һөрмәтлә јанашырды.  О демишди: «Тәләб етдијиндән дә артығыны етмишәм» (Әјј. 23:12). Әјјуб Јеһоваја бөјүк еһтирам бәсләјирди. О, сәмави Атасыны севир вә Ону разы салмаг истәјирди. Бунун сајәсиндә Әјјубун камиллијини горумаг гәтијјәти мөһкәмләнирди. Биз дә она бәнзәмәјә чалышмалыјыг. Бизим јарадылыш мөҹүзәләри һагда билијимиз Әјјуб пејғәмбәрин ҝүнләриндәки инсанлардан даһа чохдур. Үстәлик, әлимиздә Мүгәддәс Китаб бүтөв шәкилдә олдуғундан орадан Јеһова һагда дәгиг мәлумат ала билирик. Бүтүн бу өјрәндикләримиз үрәјимизи бөјүк еһтирамла долдурур. Јеһованын ирадәсинә олан һөрмәт һисси исә бизи, өз нөвбәсиндә, Јеһованы севмәјә, Она итаәт етмәјә, һәмчинин мүкәммәл сурәтдә Онун јолу илә ҝетмәјә тәшвиг едәҹәк (Әјј. 28:28).

13, 14. а) Әјјуб 31:1 ајәси Әјјубун итаәткар олдуғуну неҹә ҝөстәрир? б) Әјјуб пејғәмбәрдән неҹә өрнәк ала биләрик?

¹³ Әјјуб пејғәмбәр һәр шејдә итаәткарлыг ҝөстәрәрәк камиллијини горумаг әзмини мөһкәмләндирмишди. О билирди ки, Аллаһа сәдагәтли олмаг үчүн итаәткар олмалыдыр. Ејнилә, биз дә һәр дәфә итаәткарлыг ҝөстәрәндә камиллијимизи горумаг гәтијјәтимиз артыр. Әјјуб пејғәмбәр ҝүндәлик һәјатда Аллаһа итаәт етмәк үчүн әлиндән ҝәләни едирди. Мәсәлән, әкс ҹинслә мүнасибәтдә еһтијатлы иди. (Әјјуб 31:1 ајәсини охујун.) О баша дүшүрдү ки, арвадындан башга һансыса гадына романтик мүнасибәт бәсләмәк дүзҝүн дејил. Бу ҝүн јашадығымыз дүнја бизи һәр тәрәфдән сексуал характерли шејләрлә атәшә тутуб. Бәс биз Әјјуб пејғәмбәрдән өрнәк алараг никаһда олмадығымыз шәхсә пис ҝөзлә бахмамаг үчүн әлимиздән ҝәләни едирик? Һәмчинин ачыг-сачыг вә ја порнографик шәкилләрә бахмамаға гәтијјәтлијик? (Мәт. 5:28). Әҝәр һәр ҝүн бу саһәләрдә өзүмүзә һаким олсаг, камиллијимизи горумаг әзмимиз мөһкәмләнәҹәк.

¹⁴ Әјјуб пејғәмбәр һәмчинин мадди шејләрә мүнасибәтдә дә Аллаһа итаәт едирди. О баша дүшүрдү ки, мал-мүлкә бел бағласа,  бу, ҹәзаја лајиг ҝүнаһ сајылар (Әјј. 31:24, 25, 28). Бу ҝүн биз маддијјата һәдсиз өнәм верән бир дүнјада јашајырыг. Әҝәр пула вә мал-мүлкә таразлы јанашмағы бујуран Мүгәддәс Китаб принсипләринә әмәл етсәк, камиллијимизи горумаг әзмимизи мөһкәмләндирәҹәјик (Мәс. 30:8, 9; Мәт. 6:19—21).

15. а) Һансы мүкафаты алмаг үмиди Әјјуб пејғәмбәрә камиллијини горумаға көмәк еләмишди? б) Јеһованын вәдләринә даир үмидимизи ҹанлы тутмағын бизә һансы көмәји вар?

¹⁵ Әјјуб пејғәмбәр үмидини Аллаһдан алаҹағы мүкафата ҹәмләмәклә камиллијини горуду. О инанырды ки, садиглији Аллаһ үчүн өнәмлидир (Әјј. 31:6). Сынагларына рәғмән, Әјјуб Аллаһын она сонда мүкафат верәҹәјинә әмин иди. Сөзсүз ки, бу әминлик она камиллијини горумаға көмәк етмишди. Әјјубун сәдагәти Јеһоваја елә хош тәсир бағышламышды ки, о һәлә ҝүнаһлы икән она бол немәт верди (Әјј. 42:12—17; Јаг. 5:11). Ҝәләҹәкдә исә ону даһа бөјүк немәтләр ҝөзләјир. Бәс сиз камиллијинизә ҝөрә Јеһовадан мүкафат алаҹағыныза там әминсиниз? Јеһова Аллаһ дәјишмәјиб (Мәл. 3:6). Ҝөстәрдијимиз сәдагәти гијмәтләндирдијини даим јадда сахласаг, мөһтәшәм ҝәләҹәјә олан үмидимиз ҹанлы галаҹаг (1 Салон. 5:8, 9).

16. Нә етмәјә гәти гәрарлы олмалыјыг?

¹⁶ Одур ки, камиллијиниздән һеч вахт дөнмәмәјә гәти гәрарлы олун. Ола билсин, һәрдән камиллик јолунда тәк олдуғунузу һисс едәҹәксиниз. Амма сиз һеч вахт тәк олмајаҹагсыныз. Сиз бүтүн дүнјада сәдагәтини горујан милјонларла баҹы-гардашын сырасында олаҹагсыныз. Һәмчинин кечмишдә өлүмлә үз-үзә галанда белә, камиллијини горумуш мөмин киши вә гадынларын сырасына гошулаҹагсыныз (Ибр. 11:36—38; 12:1). Гој Әјјуб пејғәмбәрин дедији сөзләр сизин дә һәјат шүарыныз олсун: «Мән сон нәфәсимәдәк садиг галаҹағам!» Һәмчинин гој камиллијиниз Јеһованын адыны әбәдијјәт боју шәрәфләндирсин!