1. Songon dia tolu halak Sitindangi patuduhon na tongtong nasida setia?

BAYANGKON ma tolu Sitindangi Ni Jahowa na mangadopi situasi na susa. (1) Sahalak donganta borua na marsingkola dope, dipangido guruna asa dohot tu sada perayaan. Ala diboto ibana ndang lomo roha ni Jahowa tu perayaan i, denggan do didok na so boi ibana dohot. (2) Sahalak baoa na poso na parila, marbarita sian jabu tu jabu. Tingki naeng manuktuk jabu na mangihut, diboto ibana ma molo jabu i, jabu ni dongan sasingkolana na jotjot mangarehei Sitindangi. Nang pe songon i, tongtong do dituktuk jabu i. (3) Sahalak baoa disuru bosna asa mambahen laporan na so jujur. Jala didok bosna i molo ndang olo, dipakaluar ma ibana sian karejona i. Hape ingkon karejo do ibana laho manarihon keluargana. Alai denggan ma dipatorang tu bosna i, na ingkon jujur do ibana jala ingkon unduk tu hata ni Debata.​—Rom 13:1-4; Heb. 13:18.

2. Sungkun-sungkun aha do na laho taulas, jala boasa?

² Sian tolu halak Sitindangi i, taboto ma na barani do nasida jala jujur. Alai na rumingkot, setia do nasida tu Jahowa. Ndang olo nasida mangalo prinsip ni Debata. On mambahen las roha ni Jahowa. Tontu, hita pe lomo do rohanta mambahen las roha ni Jahowa. Saonari taulas ma sungkun-sungkun on: Aha do lapatan ni setia? Boasa ingkon setia hita? Jala songon dia do caranta asa tongtong setia nang pe di situasi na susa saonari?

3. (a) Songon dia caranta patuduhon na setia hita tu Debata? (b) Aha do contoh na boi mangurupi hita mangantusi lapatan ni setia?

³ Songon dia caranta patuduhon na setia hita tu Debata? Ingkon tahaholongi do Ibana sian nasa rohanta jala ingkon tabahen do na boi mambahen las rohana. Di Bibel lapatan ni hata “setia”, i ma ndang martihas * manang ndang cacat. Umpamana, di Patik ni si Musa didok do tu halak Israel, ndang boi dilehon nasida binatang na cacat tingki mangalehon pelean tu Jahowa. (3 Mus. 22:21, 22) Ndang boi dilehon nasida binatang na so adong patna, pinggolna, matana, manang na marsahit. Ingkon na sehat do na dilehon nasida. (Mal. 1:6-9) Asa mura taantusi boasa dipangido Jahowa songon i, pingkirhon ma sada contoh. Molo tatuhor sada barang, tontu tapillit do barang na mansai denggan. Ndang olo hita manuhor barang i molo adong na sega apala saotik pe. Suang songon i ma pangkilalaan ni Jahowa. Molo holong rohanta jala setia hita tu Ibana, tontu ingkon talehon do na dumenggan tu Ibana.

4. (a) Boasa halak na so sempurna boi setia? (b) Hombar tu Psalmen 103:12-14, aha do na dipangido Jahowa tu hita?

⁴ Ganup ari, sai adong do hasalaan na tabahen. Alani i, unang ma didok rohanta ingkon sempurna hita asa boi setia. Boasa? Pingkirhon ma dua alasan on. Na parjolo, ndang hasalaanta na sai diida Jahowa. Didok Bibel, “Molo dibilangi Ho angka dosanami, ise ma na boi malua sian uhum?” (Ps. 130:3, Bibel siganup ari) Diboto Jahowa do molo hita jolma na so sempurna. Jala rade do Jahowa manalpuhon hasalaanta. (Ps. 86:5) Na paduahon, ndang dipangido Jahowa tu hita na so tolap taulahon. (Jaha Psalmen 103:12-14.) Jadi songon dia do carana mangalehon na dumenggan tu Ibana?

5. Aha do na mangonjar rohanta asa tongtong setia tu Jahowa?

⁵ Holong do na mangonjar rohanta umbahen tongtong setia tu Jahowa. Alani i, talehon ma na dumenggan tu Jahowa jala tapatudu ma holongta sian nasa roha. Molo holong do rohanta tu Jahowa, boi do hita tongtong setia nang pe adong na mengela-ela hita. (1 Kron. 28:9; Mat. 22:37) Pingkirhon ma muse contoh sian tolu donganta i. Boasa dibahen nasida keputusan sisongon i? Na so lomo do roha ni donganta borua na di singkola i rap marlas ni roha ni dohot donganna di singkola? Manang, na lomo do roha ni donganta baoa na parila i asa direhei donganna i ibana? Asing ni i, na lomo do roha ni baoa i asa dipakaluar ibana sian karejona? Tontu daong. Ala diboto nasida do prinsip ni Jahowa. Jala rumingkot do di nasida mambahen las roha ni Jahowa. Ala holong do roha ni nasida tu Jahowa umbahen dibahen keputusan sisongon i. On patuduhon na setia do nasida tu Jahowa.

6. (a) Boasa hita ingkon tongtong setia? (b) Songon dia si Adam dohot si Hawa patuduhon na so setia tu Jahowa?

⁶ Boasa ingkon setia hita tu Jahowa? Alana adong suru-suruan na mangalo tu Jahowa, i ma Sibolis manang “Pangalo”. Jala dohot do hita dialo ibana. Tingki di porlak Eden, didok ibana tu si Adam dohot  si Hawa molo Jahowa, i ma Debata na jahat, ndang parduli, jala Parhuaso na so jujur. Alani i, gabe dohot ma si Adam dohot si Hawa mangalo tu Jahowa. I do alana, ingkon tongtong ma hita setia tu Jahowa. (1 Mus. 3:1-6) Sasintongna tingki di Porlak Eden, i ma kesempatan ni si Adam dohot si Hawa patoguhon holong ni nasida tu Jahowa. Alai tingki diela-ela Sibolis, tarida ma na so sian nasa roha nasida mangkaholongi Jahowa. Ra, gabe sungkun-sungkun do roha: Adong jolma na boi tongtong setia tu Jahowa jala mangkaholongi Ibana? Sungkun-sungkun on ma na hea disungkun Sibolis tu Jahowa taringot si Job.

7. Songon na didok di Job 1:8-11, songon dia pangkilalaan ni Jahowa tu si Job, jala songon dia pangkilalaan ni Sibolis?

⁷ Si Job mangolu tingki di Mesir dope halak Israel. Ndang adong jolma na setia songon si Job di tingki i. Dos songon hita, jolma na so sempurna do si Job jala boi mambahen na sala. Didok Sibolis, ndang adong jolma na boi tongtong setia. Alai didok Jahowa, adong do jolma na setia, i ma si Job. Ala tongtong setia, gabe holong ma roha ni Jahowa tu si Job. Sian parniulaonna, dipatudu si Job do molo Sibolis i pargabus! Dipangido Sibolis tu Jahowa asa diloas ibana mangunjuni si Job. Dipaloas Jahowa do i masa tu si Job, ala pos do roha ni Jahowa tu si Job.​—Jaha Job 1:8-11.

8. Songon dia do Sibolis mambahen susa si Job?

⁸ Kejam jala pambunu do Sibolis. Dibuat Sibolis do sude na adong di si Job. Dibuat artana, parkarejona, jala dibahen do ibana marlea. Dibahen do mate sampulu anakkonna.  Dibahen muse bisul na mansai posi tu si Job sian uluna sahat tu patna. On mambahen marsak istri ni si Job. Didok istrina ma tu ibana asa dileai Debata jala mate. Ala songon i sitaononna, didok roha ni si Job ma tumagon ibana mate. Nang pe songon i, tongtong do ibana setia tu Jahowa. Alai dibahen Sibolis do muse cara na asing. Tingki ro tolu dongan ni si Job manjumpangi ibana, didok nasida ma angka hata na so tutu tu si Job. Ndang diapuli nasida si Job. Gariada didok nasida, ndang parduli Debata tu si Job jala na diuhum Debata do ibana. Didok nasida muse na adong do na sala dibahen si Job umbahen na masa i tu ibana!​—Job 1:13-22; 2:7-11; 15:4, 5; 22:3-6; 25:4-6.

9. Nang pe susa si Job, alai aha do na so diulahon ibana?

⁹ Songon dia do pangkilalaan ni si Job tu sitaononna i? Ndang halak na sempurna si Job. Tingki didok donganna i songon i, muruk do si Job tu nasida. Didok ibana do hata na so denggan. Jala dirimpu ibana, umtigor do ibana sian Debata. (Job 6:3; 13:4, 5; 32:2; 34:5) Nang pe susa ngolu ni si Job, alai ndang olo ibana mangalo Jahowa. Ndang porsea ibana tu na didok donganna i. Didok ibana do, “Dao ma sian ahu tung tolopanku hatamuna; rasirasa tos hosangku, ndang tagamon sumurut sian ahu habontoronku.” (Job 27:5) Hata ni si Job on patuduhon, na tongtong do setia ibana tu Jahowa. Hita pe, boi do maniru si Job.

10. Songon na masa tu si Job, aha do na didok Sibolis taringot hita?

¹⁰ Saonari pe, didok Sibolis do na so tutu tahaholongi Jahowa. Didok muse, molo susa hita ndang laho sombaonta be Jahowa jala ndang setia be hita tu Ibana. (Job 2:4, 5; Pgk. 12:10) Songon dia pangkilalaanta tu na didok Sibolis i? Tontu ndang lomo rohanta didok songon i. Alai taingot ma, pos do roha ni Jahowa tu hita jala dilehon do tingki tu hita laho patuduhon, molo Sibolis i pargabus. Jala marjanji do Ibana, na urupanna do hita asa boi tongtong setia. (Heb. 13:6) Las do rohanta ala porsea Jahowa tu hita! Alani i, tongtong ma hita setia. Molo setia hita, boi ma tabuktihon molo Sibolis i pargabus. Jala tama do Jahowa laho mamarenta jolma. Alai aha ma na ingkon taulahon asa boi tongtong setia?

11. Aha do na boi taparsiajari sian si Job?

¹¹ Di ari parpudi on, lam marrimas do Sibolis tu naposo ni Debata. (2 Tim. 3:1) Alani i, songon dia carana asa tongtong hita setia? Boi ma hita marsiajar sian pengalaman ni si Job. Andorang so diela-ela Sibolis, dipatogu si Job do holongna tu Jahowa. Saonari taulas ma tolu parsiajaran na boi tatiru sian si Job na mangurupi hita asa tongtong setia.

12. (a) Songon na didok di Job 26:7, 8, 14, songon dia do cara ni si Job asa lam mangargai Jahowa? (b) Jala songon dia hita boi maniru ibana?

¹² Lam dipatogu si Job do holongna marhite mangargai sude na dibahen Jahowa. Dipatudu ibana do i, marhite mangarimangi sude angka tompaan ni Jahowa. (Jaha Job 26:7, 8, 14.) Longang do rohana tingki mangarimangi taringot tano on, langit, ombun, dohot ronggur. Didok roha ni si Job do, holan saotik dope na diboto ibana taringot tompaan ni Jahowa. Jala diargai ibana do sude na didok Jahowa. I do alana didok ibana, “Tongtong  do huulahon na pinarentahon ni Debata.” (Job 23:12, Bibel siganup ari) Holong do rohana tu Jahowa jala lomo rohana mambahen las roha ni Jahowa. Marsitutu do si Job asa tongtong setia tu Jahowa. Hita pe boi do songon si Job. Alana gumodang do na taboto taringot tompaan ni Jahowa sian angka halak na mangolu di tingki ni si Job. Jala adong do Bibel na boi mangurupi hita mamboto taringot Jahowa. Sude na taparsiajari, boi mangurupi hita asa mangulahon lomo ni rohana. Gabe taronjar ma rohanta mangkaholongi, unduk jala asa tongtong setia tu Jahowa.​—Job 28:28.

13, 14. (a) Songon na didok di Job 31:1, songon dia do si Job patuduhon na unduk ibana tu Jahowa? (b) Jala songon dia hita boi maniru ibana?

¹³ Dipatudu si Job do na tongtong setia ibana marhite unduk tu Jahowa. Diboto si Job, ingkon unduk do hita tu Jahowa asa boi tongtong setia. Molo tongtong unduk, boi ma hita tongtong setia. Sai diulahon si Job do hata ni Debata ganup ari. Umpamana, manat do ibana maradophon borua. (Jaha Job 31:1.) Ndang olo ibana menggoda borua na so dongan saripena. Saonari, godang do ela-ela na manjujui hita mangulahon seks na so patut. Tatiru do si Job ndang menggoda na so dongan saripenta? Tapasiding do video dohot gambar na porno? (Mat. 5:28) Molo marsitutu hita mangorom dirinta, gabe boi ma hita tongtong setia.

¹⁴ Diboto si Job do, molo gabe arta na rumingkot di ngoluna, boi do gabe mangulahon dosa na balga ibana jala diuhum. Alani i, tongtong do si Job unduk tu Jahowa asa unang arta na rumingkot di ngoluna. (Job 31:24, 25, 28) Saonari, godang halak holan mangalului arta. Alai, songon na taparsiajari di Bibel, molo ndang hepeng dohot arta na gabe rumingkot di ngolunta,  boi ma hita tongtong setia.​—Poda 30:8, 9; Mat. 6:19-21.

15. (a) Aha do pangkirimon na sai diingot si Job na mangurupi ibana tongtong setia? (b) Boasa pangkirimon i boi mangurupi hita asa tongtong setia tu Jahowa?

¹⁵ Tongtong do setia si Job huhut mamingkirhon upa na laho dilehon Debata tu ibana. Porsea do si Job, na las do roha ni Debata molo setia ibana. (Job 31:6) Nang pe mangadopi sitaonon, pos do roha ni si Job na lehonon ni Jahowa upa tu ibana. Jala pos do rohana urupan ni Jahowa do ibana asa tongtong setia. Nang pe jolma na so sempurna si Job, tongtong do ibana setia tu Jahowa. Alani i, dilehon Jahowa do gok pasu-pasu tu ibana. (Job 42:12-17; Jak. 5:11) Jala haduan, lehonon ni Jahowa do muse gok pasu-pasu tu ibana. Porsea do hamu na pasu-pasu on ni Jahowa molo tongtong setia? Ndang hea muba Jahowa. (Mal. 3:6) Molo taingot na arga do di Jahowa molo tongtong hita setia, on boi mangurupi hita tongtong mangingot pangkirimon i di bagas rohanta.​—1 Tes. 5:8, 9.

16. Aha do na ingkon tongtong taingot?

¹⁶ Marsitutu ma hamu asa tongtong setia! Sipata, olo do ra dihilala hamu ndang adong donganmuna na setia tu Jahowa. Alai sasintongna, marjuta do halak na setia tu Jahowa di liat portibi on. Songon angka naposo ni Jahowa najolo na tongtong setia nang pe ingkon mate, hamu pe boi do songon i. (Heb. 11:36-38; 12:1) Anggiat ma hita sude boi tongtong setia songon na didok si Job, “Ndang tagamon sumurut sian ahu habontoronku.” Molo tongtong hita setia, parohon pujian do i tu Jahowa!