1. Ida liña harufuduni ǘrüwa Gefentiña ha uágubaña layanuhóua lidan párafu, úaragua hamá lun Heowá?

SAMINA wamá luagun ǘrüwa sügǘ le. Leskuelaruñoun aban nibureintu ani aba lamuriahan tumaisturun hama sun tupanaagu lun hídehan lidan aban fedu le subuditi tun nibureintu to mínsiñe lan lun Bungiu. Lauti inebesei, aba tariñagun mídehanboun lan lidan fedu ligía. Lapurichihaña aban nibureinti tidan burí muna ani aba líchugun fe tidan lan teweñegua muna to lunboun hapurichihan, ñein leredera aban lupaaná le adügübei bula hau gefentiña luagu Heowá. Lau sun haburi lan, aba lidin adaünha luagu bena. Lídanñein luadigimari aban úguchili ani aba lamuriahan lábuti luma lun ladügün somu katei le múaranti luma lúrudu o lun móuserun lan lau arumani. Lau sun gayara lan leferidiruni luadigimari, aba lafuranguagüdüni úguchili ligía lun lábuti lunti lan lóuserun lau arumani ani gaganbadi lan lun lúrudu lugundun ligía lan lagurabubei Bungiu hámagiñe lubúeingu (Rom. 13:1-4; Ebü. 13:18).

2. Kaba burí álügüdahani wóunaba lidan arütíkulu le ani ka uagu?

² Ka burí igaburi warihibei hawagu ǘrüwa Gefentiña ha? Másiñati ariha wamá fiu, kéiburi ganigi luma haruma lan hóuserun. Lau sun lira, anihein aban igaburi létima harufudubei ani ínchaha lumutiña lun hóuserun kei aubei hóusera: úaraguni. Súngubei hagía áfaaguatiña lun madurun hamá ligibugiñe Heowá luma lun gaganbadi hamá lun lugumadin. Chóuruti gúndaabei lan hamuga Heowá hau lau harufuduni igaburi le. Busentiwa giñe lun gunda lan Heowá wau. Ligíati, óunaba waméi álügüdahani burí le: Ka san mini lubéi úaraguni? Ka uagu súdini lubéi lun úaragua wamá? Ani ida luba wadügün lúntima busén wamá úaragua wamá lidan burí dan hénrenguti le?

3. a) Ka san mini lubéi úaraguni? b) Ka burí hénpulu íderagubadiwa gunfurandei le mini lubéi úaraguni?

³ Le mini lubéi úaraguni lasandirun gürigia ínsiñeni luagu Heowá, maweiyasunbei lan ígirei láhuduragun lun ani adüga lumuti lan le aubei lagundaara Bungiu. Tidan Bíbülia, dimurei ebüréu le ásügürawagüdübei kei “úaraguni”, yúsuati lun layanuhóun luagu somu katei le dayarüti ani le úati mégeiti luagu. Kéiburi, ariñagati meha Lúrudu dan le lan hadagaragüdün ísüraelina lun Heowá, mosu meha híchugun animaalugu le úati mégeiti luagu (Fad. 22:21, 22). * Siñati meha hadagaragüdün lubúeingu Bungiu aban animaalu le danimati, marihinti, maganbunti o le sánditi. Súdiniti meha lun Heowá lun ua lan mégeiti luagu animaalu ligía luma lun dayarügili lan (Mal. 1:6-9). Ka uagu busén lubéi Heowá lun sun lan le wíchugubei lun lun dayarü lan? Líderagubadiwa hénpulu le lun gunfuranda wamani. Dan le wagañeihan aban furuda, mabusenrunbadiwa hamuga aban to ñalaaru o to anihein somu mégeiti tuagu. Busenbadiwa hamuga aban to dayarütu ani buiti tarihín. Ítarameme liña giñe lasandiragun Heowá lungua luagu ínsiñeni luma úaraguni le wasandirubei luagu. Busenti lun warufuduni sunsuinagubei.

4. a) Afuranguagüda huméi ka lan uagu mama lan mosu mafigoun wamá lun úaragua wamá. b) Según Sálumu 103:12-14, ka lagurabubei Heowá wámagiñe?

⁴ Kei subudi wamani gafigoun wamá chará wagía, másiñati álügüdagua wamá woungua: “Lunti san mafigoun wamá lun úaragua wamá?”. Uá. Ariha wamá ka lan uagu. Furumiñe, ladüga meteniti Heowá lun wachara. Ariñagatu Lererun woun: ‘Aburemei, Aburemei, lun hamuga babahüdüni wafigoun, ka hamuga gayaraabei lerederun rara?’ (Sal. 130:3). Subudi lumuti Heowá gafigoun wamá, chará wagía ani gíchigaditi ferudun woun (Sal. 86:5). Libiaman, ladüga subudi lumuti Heowá le gayara wabéi adüga luma le siñá wabéi adüga ani mamuriahanti wámagiñe lóugiñe le gayaraabei wíchugun (aliiha huméi Sálumu 103:12-14). Ida lubati úaragua wamá sunsuinagubei ligibugiñe Heowá?

5. Ka uagu mégeiwa lubéi ínsiñeni lun úaragua wamá?

⁵ Lun úaragua wamá mégeitiwa ínsiñeni. Lunti dayarü lan ínsiñeni luma úaraguni le warufudubei lun Heowá, Wáguchi le siélubei. Anhein ítarameme liña lubéi wínsiñehabu íbini laganagua óuchawaguni, arufudati lira úaragua wamá (1 Kro. 28:9; Mat. 22:37). Saminaya wamá hawagu ǘrüwa Gefentiña ha uágubaña layanuhóua lidan furumiñeti párafu. Chóuruti busén tan nibureintu tuguya buidu lan tásügürüni leskuelarugu, mabusenrunti giñe le aban nibureinti lásügürün busiganu dan le lapurichihan ani mabusenrunti giñe hachügüdina iduheñu leferidiruni luadigimari. Kati uagu hadügei le hadügübei? Ladüga subudi hamani richá lan lugumadin Bungiu ani létima súdinitimabei houn hadügüni lugundan Háguchi le siélubei. Ínchaha lumutiña ínsiñeni le hasandirubei luagu Heowá lun hasaminarun luagu, lubaragiñe hadügün somu katei. Ítara liña harufuduni úaragua hamá.

6. a) Ka uagu súdiniti lubéi lun úaragua lan kada aban wádangiñe? b) Ida liña larufudun Adán tuma Ewa múaragun hamá?

⁶ Ka uagu súdini lubéi lun úaragua lan kada aban wádangiñe? Lugundun anabagua laali Satanási Heowá ani anabagua laadiwa giñe. Lidan fuluri-agei Edén, adügaguati ánheli wuribati le lungua lun Satanásime, mini lan “Le agarabaagubei”. Aba lawiyeduni liri Heowá lau lariñagun aban lan gumadimati wuribati  Heowá ani luouguounrügüñein lan lasaminara. Ma lirun aba lan lidin Adán tuma Ewa luéigiñe lóubadina Satanási ani aba hagarabaagun lun Bungiu (Agu. 3:1-6). Dan meha le lawinwandubei Adán tuma Ewa lidan fuluri-agei Edén, gachansintiña meha lun hederebudagüdüni hínsiñehabu luagu Heowá. Gama lumoun, dan le lagarabaagunbei Satanási lun Heowá, arufudatiña mínsiñe lan meha Heowá houn tídangiñe sun hanigi. Saragu dan lárigiñe, lidan lidaani Hobu, mosu meha lounabún ábaya álügüdahani: Ñéinbaña meha san gürigia ha úaraguatiña lun Heowá ladüga línsiñe houn? Lidan amu dimurei, gayaraati san úaragua hamá gürigia?

7. Según Hobu 1:8-11, ida liña meha larihini Heowá lúaragun Hobu ani ida liña meha larihini Satanási?

⁷ Lidan meha dan le hawinwandubei ísüraelina Ehiptu ligía dan ligía lawinwanda Hobu. Lidan meha dan ligía, úati meha amu gürigia le úaraguati kei ligía. Íbini gafigoun lan meha chará ligía, ítara kei wagía, hínsiñeti meha lun Bungiu ladüga úaragua lan lun. Másiñati ariñagaali lan meha Satanási lun Heowá múaragun hamá gürigia lun. Ligíati, aba lariñagun Bungiu lun lun letenirun lun ligaburi Hobu. Arufuda lumuti meha ligaburi lawinwandun Hobu marasualugu lan Satanási. Ligía aba lubéi lamuriahan Satanási üma luma Heowá lun lígirun lun lóuchaguni Hobu. Afiñeti meha Heowá luagu Hobu, le lumada, ligía lígirunbei lun lóuchaguni Satanási (aliiha huméi Hobu 1:8-11).

8. Ida liña lagayuahan Satanási luagu Hobu?

⁸ Hanarimeti luriban Satanási ani gáfarahati. Aba lagidaruni sun le lúmabei Hobu luéi: lirisin, lubúeingu luma lubuidun liri. Ani áfaragua lumutiña giñe Satanási diisigubei lisaanigu Hobu hilagubei, ha meha wéiribei hínsiñe lun Hobu. Lárigiñe, aba ladügün lun ladagarun  aban luriban sandi luagu Hobu, le adügübei lun ladagarun guméi luagu sun lura. Wéiriti meha tidiheri luma tigarigu lani Hobu weiriou darí lun tariñagun lun Hobu lun lígiraguagüdün lungua lun lábürühan larüna, lun líñaraguni Bungiu luma lun lounwen. Lau sun busén lan yebe giñe Hobu lounwen, úaraguamemeti lun Heowá. Ábati layusurun Satanási amu katei lun lóuchaguni Hobu. Aba layusurun ǘrüwa lumadagu Hobu, ha ñǘdünbaña abisidahei luagu saragu weyu, lau sun lira, míchuguntiña gurasu lun. Lubaragiñe lira, aba herederun ariñaga katei wuribati lun. Aba hariñagun ladüga lan Bungiu lasufurirubei ani meberesegun lan Bungiu anhein úaragua lubéi lun. Darí lun hariñagun wuriba lan Hobu ani gadüna lani lasufurirun (Hob. 1:13-22; 2:7-11; 15:4, 5; 22:3-6; 25:4-6).

9. Lau sun súfuri lan Hobu saragu, ka un mígiraguagüdün lan lungua?

⁹ Ida liña lóunabun Hobu lidan sun lasufurirun? Mama meha aba gürigia le mafigounti, ligía aba lubéi lagañidun hama ha ariñagubaña híchuguña lan gurasu lun ani aba ladeinhan houn, ariñagati giñe katei mabuidunti. Ariñagati saragu wéiyaasu richá lan ligaburi sügǘ lau lariñagun richá lan Bungiu (Hob. 6:3; 13:4, 5; 32:2; 34:5). Lau sun lira, íbini dan meha weiri lan luriban le gádanbalin, madüraagun lumuti lumadagua luma Bungiu. Mígiraguagüdünti lungua lun lafiñerun luagu burí iyeeni le hariñagubei umadagu mama inarünitiña ha. Ariñagati: ‘Sun winwan nan, narufudamémebei luagu úaragua nan’ (Hob. 27:5). Lau lariñaguni dimurei burí súdiniti le, larufuduña meha aranseñu liña lan lun úaragua lan meberesenga le asusereduti. Mígiraguagüdünti lungua lun lábürühan larüna ani gayaraati wadügüni ligiaméme.

10. Ida liña gadan lániwa kada aban wádangiñe le lasigenehabei Mafia luagu Hobu?

¹⁰ Ida liña gadan lániwa kada aban wádangiñe le lasigenehabei Satanási luagu Hobu? Ariñagati mínsiñe lan Heowá woun tau sun wanigi, wígirubei lan weseriwidun lun lun wesefuruni wabagari ani múaragun wamá (Hob. 2:4, 5; Aruf. 12:10). Ida liña ladügün katei le lun wasandiragun woungua? Ma gáriti woun? Lau sun lira, samina wamá luagun katei le: afiñeti Heowá wawagu saragu darí lun lígirun lun lóuchaguniwa Mafia lun warufuduni úaragua wamá ani marasualugu lan Mafia. Ani füramaseti Bungiu líderagubadiwa lan (Ebü. 13:6). Aban lubuidun chansi afiñe lan Lurúeite sun ubóu wawagu! Ariha wamutiti ka lan uagu weiri lubéi lisudinin úaraguni. Lugundun lau úaragua wamá, arufudatiwa iyeeni lan le lariñagubei Satanási ani ídehatiwa lun larumadahóun lubuidun liri luma ligaburi larúeihan Wáguchi le siélubei. Ligíati, ida luba wadüga lúntima busén wamá úaragua wamá?

11. Ka gayaraabei wafurendeirun lúmagiñe Hobu?

¹¹ Gánwoungüda laali Satanási lagayuahan hawagun lubúeingu Bungiu lidan “lagumuhóun dan” hénrenguti le (2 Tim. 3:1). Ligíati, ida luba wadügün lúntima busén wamá úaragua wamá? Gayaraayati wafurendeirun saragu lúmagiñe Hobu. Saragu dan lubaragiñe lasufurirun óuchawaguni, arufuda laali meha lidan ámuñegueinarügü sügǘ úaragua lan. Ariha wamá ǘrüwa katei le ladügübei luma le gayaraabei wadügüni lun wáyeihani.

12. a) Kei aubei larufudúa lidan Hobu 26:7, 8, 14, ka ladügübei Hobu lun laganwoundagüdüni ínsiñeni luma inebesei le lasandirubei luagu Heowá? b) Kaba íderaguawa lun laganwoundun ínsiñeni le wasandirubei luagu Heowá?

¹² Derebugüda lumuti ínsiñeni le lasandirubei luagu Bungiu lau lasaminarun luagu le ladügübei Bungiu. Sügüti Hobu dan aríaguei luma asaminara luagun le ladügübei Heowá (aliiha huméi Hobu 26:7, 8, 14). Aba  taweiridun lanigi dan le lasaminarunbei luagu Ubóu, sielu, dúeri luma wayuhuru, lau sun aba lan líchugun fe mibe lan le lasubudirubei luagu le ladügübei Bungiu. Wéiriti meha giñe línsiñe le larufudahabei Heowá lun, ligía lariñagunbei: “Súnwandan nagunfuliruni lilurudun” (Hob. 23:12). Ínchaha lumuti ínsiñeni luma inebesei le lasandirubei Hobu luagu Heowá lúntima línsiñedun lun luma lun lagundaaragüdüni. Adügati giñe katei le lúntima busén lan úaragua lan. Ítara kei Hobu, mosu wásügürün dan aríaguei luma asaminara luagun sun le adüga laalibei Heowá. Gíbetimahali hasubudirun gürigia luagu sun le adüga laalibei Heowá sügǘ hawéi ha meha awinwandubaña lidan lidaani Hobu. Ani anuhein giñe Bíbülia dayarügü wama, to íderagubadiwa lun wasubudiruni Bungiu buidu. Lídehaba sun le wafurendeirubei lun línsiñedun Heowá woun saragu, inebe ligíame woun. Línchahabadiwa le lúntima hínsiñe lan Heowá woun luma lun gaganbadi wamá lun ani ladügüba lúntima busén wamá lun úaragua wamá (Hob. 28:28).

13, 14. a) Ítara kei larufuduni Hobu 31:1, ida liña meha larufuduni Hobu gaganbadi lan? b) Ida luba wáyeihani ligaburi?

¹³ Áfaaguati lun gaganbadi lan lidan sun le ladügübei lidan libagari. Subudi lumuti meha Hobu lun lan úaragua lan mosu lan gaganbadi lan lun Heowá. Le linarün katei, sagü gaganbadi wamá, adügatiwa lúntima busén wamá úaragua wamá. Áfaaguati Hobu saragu lun gaganbadi lan lun Bungiu lidan le ladügübei sagü weyu. Kéiburi, óuserati meha lau duari lidan ligaburi lóuseruniña würiña (aliiha huméi Hobu 31:1). Kei meha maríei lubéi, subudi lumuti meha wuriba lan lun letenirun tun amu würi to mama lani weiriou lidan aban igaburi le madünamati. Uguñe weyu, wawinwanduña lidan aban ubóu le óuchagubaliwa lau burí katei le lánina magíaguni. Ítara waba san kei Hobu, lun metenirun wamá houn amu gürigia ha mama wámari lidan aban igaburi madünamati? Wamaharunba san warihin furumiñeguarügü iyawaü o bidéu le gaganati magíaguni o le lánina agamariduni?  (Mat. 5:28). Ánhawa árügüdagua woungua sagü weyu, wadügüba lúntima busén wamá úaragua wamá.

¹⁴ Gaganbaditi meha Hobu lun Heowá lidan ligaburi larihini umegeguni. Ariñagati anhein lan hamuga íchigei lemenigin luagu umegeguni, ábanbei lan hamuga charati wéiriti ani mosu lan hamuga lererehóun lun luagu ladügüni lira (Hob. 31:24, 25, 28). Uguñe weyu, wawinwanduña lidan aban ubóu ñein lubéi háfaagua gürigia hibihin umegeguni súnwandan. Ánhawa arihei seinsu luma umegeguni keisi lubudubu, ítara kei aubei tariñagei Bíbülia woun, wadügüba lúntima busén wamá úaragua wamá (Ari. 30:8, 9; Mat. 6:19-21).

15. a) Ka emenigini íderagubalin Hobu lun úaraguameme lan? b) Ka uagu lunti lubéi waritaguni emenigini le líchugubei Heowá woun?

¹⁵ Téniti lun lemenigin luagu líchuguba lan Bungiu lafayeiruaha. Chouru lumuti meha Hobu gunda lan Bungiu lau úaragua lan (Hob. 31:6). Lau sun le lasufurirubei, afiñeti meha líchuguba lan meha Heowá lafayeiruaha ani chóuruti ídeha lan katei le lun úaragua lan. Wéiriti meha lugundan Heowá lau Hobu darí lun líchugun aban lubuidun abiniruni lun lau sun gafigoungili lan meha Hobu (Hob. 42:12-17, TNM; Sant. 5:11). Ani libihuba abiniruni létima buídutimabei ámuñegü. Ágiati wagía? Afiñetiwa san tau sun wanigi líchuguba lan Heowá wafayeiruaha ladüga úaragua wamá? Masansirungili Wabungiute (Mal. 3:6). Ánhawa aritagua luagu gebegi lan úaragua wamá lun, meferidirun wabéi lubuidun wemenigin lubá ámuñegü (1 Tesa. 5:8, 9).

16. Ka lunbei aranseñu wamá lun wadügüni?

¹⁶ Lunti aranseñu wamá lun úaragua wamá súnwandan. Másiñati aniheinbei lan dan wasandiragun woungua wagíarügüñanu lan busén lun úaragua wamá. Gama lumoun, mama wábuguarügüñadiwa. Lidan sun ubóu, añahein saragu míñunu íbirigu ha giñe áfaagubaña lun úaragua hamá. Ani hádanbadiwa giñe sun wügüriña hama würiña afiñetiña ha meha úaraguabaña lidan dan le sügühalibei, íbini dan le hasíadirunbei lun hafarún hilagubei (Ebü. 11:36-38; 12:1). Sun wagía, falá waméi ligaburi Hobu ani ítara kei ligía, ariñaga wamá: ‘Sun winwan nan, narufudamémebei luagu úaragua nan’. Ani ru láamuga úaraguni le warufudubei uéiriguni lun Heowá súnwandan!