1. Hi catlangbu ah langhtermi Jehovah Tehte pathum cu Jehovah cungah zeitindah zumhfek tein an um?

JEHOVAH Tehte Hna nih an tonmi a tanglei thil sining pathum hi ruathmanh. (1) Minonu pakhat cu sianginn ah an sayapa nih an khaan dihlak in puai pakhat ah i tel dingin a fial hna. Mah puai cu Pathian nih a duh lomi a si ti kha a hngalh caah upatnak tein a rak al. (2) A ningzah a pangmi minopa pakhat cu innkhat hnu innkhat phungchimnak ah a kal. A luh hniknak inn cu hlanah Jehovah Tehte a rak nihsawhmi a sianginn kaiṭihawi pa te inn a si ti kha a hngalh. Asinain mah inn ah a kal i kutka kha a va kingh. (3) Pa pakhat cu a chungkhar zohkhenhnak caah fakpi in rian a ṭuan. Nikhat cu a rian bawi nih a dinglomi asiloah upadi nih a awnh lomi thil pakhat tuah awkah a fial. A rian hmanh a sung kho ko nain Pathian nih a salle kha dingfel tein um awk le upadi zulh awkah a kan fial tiah a ti.—Rom 13:1-4; Heb. 13:18.

2. Zei biahalnak dah kan i ruah hna lai, zeicah?

² Mah hna pathum sinah zei sining dah na hmuh? Ralṭhatnak le dinfelnak ti bantuk sining hna na hmuh ko lai. Asinain an dihlak in an langhtermi a hleiin a biapimi sining pakhat cu zumhfehnak a si. An pathum ningin Jehovah cungah zumhfehnak kha an langhter. Pakhat cio nih Pathian phunglam buar ding kha an al. Zumhfehnak nih cutin tuah awkah a forh hna. Pakhat cio nih mah sining kha an langhter caah Jehovah cu aa uangthlar tuk lai. Kannih zong vancung kan Pa kha i uanthlarter kan duh ve. Cucaah mah biahalnak hi i ruah hna u sih: Zumhfek tein um timi cu zeidah a si? Zeicah zumhfek tein kan um a herh? Hi harnak caan ah zumhfek tein um ding timi kan biakhiahnak kha zeitindah kan fehter khawh?

3. (a) Pathian salle nih zumhfehnak kha zeitindah an langhter? (b) Zumhfek tein um timi sullam hngalhthiam awkah zei tahchunhnak nih dah a kan bawmh khawh?

³ Pathian salle nih zumhfehnak kha zeitindah kan langhter khawh? Jehovah kha lungthin dihlak in kan dawt i kan i pumpeknak thawngin a lung a lawmhtermi thil kha kan tuah zungzal. Hlanlio thil sining cheukhat hi ruathmanh. Baibal ah “zumhfek tein um” tiah lehmi Hebru biafang cu a tlingmi, a ṭhami asiloah a dihlak timi sullam a ngei. Tahchunhnak ah, Israel mi nih Jehovah sin saram in rai an thawi tikah saram cu a ṭhami, do a tlami a si lai tiah Nawlbia nih a ti. * (Lev. 22:21, 22) Pathian miphun cu a ke, a hna asiloah a mit a tling lomi le a zawmi saram in raithawi awkah awnh an si lo. Mah saram cu a tlingmi, a ṭhami asiloah a dihlak in si cu Jehovah caah a biapi. (Mal. 1:6-9) Jehovah nih a ṭhami asiloah a tlingmi si cu zeicah biapi ah a chiah ti kha kan hngalh khawh. Thingthei, cauk asiloah hriamnam ti bantuk thil pakhatkhat kan cawk tikah a ṭha lomi asiloah a chambaumi kha cu cawk kan duh lai lo. A dihlak in a tlingmi, a ṭhami kha kan duh. Cu bantukin Jehovah nih amah kan dawtnak le kan zumhfehnak zong kha a hmuh ve. A tlingmi, a ṭhami le a dihlak in a si a hau.

4. (a) Mitlinglo a simi pakhat nih zeicah zumhfek tein um khawh a si? (b) Salm 103:12-14 ningin Jehovah nih kan sinin zeidah aa ruahchan?

⁴ Zumhfek tein um awkah a tlingmi kan si a hau tiah kan ruah awk a si maw? Kannih cu ṭhatnak tlawmpal lawng a ngeimi asiloah palhnak tampi a tuahmi kan si tiah kan ruah men lai. Zumhfek tein um awkah a tlingmi kan si a hau tiah kan ruah awk a si lonak a ruang pahnih kha zohhmanh hna u sih. Pakhatnak, Jehovah nih kan tlinlonak kha biapi ah a chia lo. Baibal nih hitin a ti: “Kan sualnak kha cazin chungah na kan khumhpiak ahcun ahodah sualphawtnak cu a luat khomi a um lai?” (Salm 130:3) Mitlinglo, sualnak a ngeimi minung kan si kha a hngalh caah siang ngaiin a kan ngaihthiam. (Salm 86:5) Pahnihnak, Jehovah nih ri kan ngeihmi kha a hngalh i kan tuah khawh lo lengin aa ruahchan lo. (Salm 103:12-14 rel.) Cu a si ah Pathian mit ah a dihlak in a tlingmi, a ṭhami kan si kho maw?

5. Jehovah salle nih zumhfek tein an um khawh nakhnga zeicah dawtnak an ngeih a herh?

⁵ Jehovah salle caah zumhfek tein um khawhnak ah a herh bikmi cu dawtnak a si. Pathian kan dawtnak le a cungah zumfek tein kan i pumpeknak cu a dihlak in a tlingmi, a ṭhami a si a hau. Hneksaknak kan ton tik hmanhah Pathian kan dawt zungzal ahcun zumhfek tein kan um kho lai. (1 Chan. 28:9; Matt. 22:37) A cunglei ah langhtermi Jehovah Tehte pathum kong kha ruat ṭhan hmanh. An zumhfehnak ningin zeicah an tuah? Mino nu nih sianginn ah nihchuak capo saih lai kha a duh maw, mino pa nih ningzahnak ton lai kha a duh maw, chungkhar a ngeimi pa nih a rian sungh lai kha a duh maw? An duh hrimhrim lai lo. Mah canah Jehovah nih a dingmi phunglam a ngei ti kha an hngalh i a lunglawmhternak tu kha biapi ah an chiah. Pathian an dawtnak nih biakhiahnak an tuah tikah Pathian kha pakhatnak chiah awkah a forh hna. Cuticun zumhfek tein an um kha an langhter.

6. (a) Zeicah zumhfek tein na um a herh? (b) Adam le Evi nih zumhfek tein an um lo kha zeitindah an langhter?

⁶ Kan dihlak in zumhfek tein um cu zeicah a herh? Satan nih Jehovah he, nangmah he aan  zuamcawh hna caah zumhfek tein na um a hau. Ralchanhtu a simi vancungmi nih Eden dum ah amah tein Satan asiloah “Ralchanhtu” ah aa canter. Pathian cu a ṭhalomi, amah zawn lawng aa ruatmi le a ding lomi Uktu a si tiah sual a puhnak thawngin Jehovah min a chiatter. Ngaihchiat awk ngai a simi cu Adam le Evi cu Satan leiah an ṭang i Jehovah kha an ralchanh. (Gen. 3:1-6) Jehovah nih Eden dum ah amah an dawtnak langhter khawhnak caanṭha tampi a pek hna. Asinain Satan nih a zuamcawh hna lioah an dawtnak cu a dihlak in a tlingmi, a ṭhami a si lo. A dang biahalnak pakhat a um rih: Jehovah Pathian a daw taktak i a cungah zumhfek tein a ummi minung an um lai maw? Phundang in cun minung nih zumhfek tein an um kho lai maw? Mah biahalnak cu Job sinin kan hmuh khawh.

7. Job 1:8-11 ah kan hmuh bantukin Jehovah le Satan nih Job zumhfehnak kha zeitindah an hmuh?

⁷ Job cu Israel mi Izipt ram i an um lioah a nungmi a si. Job chan lioah amah bantukin zumhfekmi ahohmanh an um lo. Job cu kanmah bantukin mitlinglo a si. Palhnak a tuah ve. Asinain zumhfek tein a um caah Jehovah nih a dawt. Satan nih minung zumhfehnak he aa tlaiin Jehovah kha rak serhsat cang dawh a si. Cucaah Jehovah nih Satan kha Job cu a hmuhsak. Mah pa nunning nih Satan milihchim a si kha a langhter. Mah tikah Satan nih Job zumhnak hneksak awkah Jehovah kha a hal. Jehovah nih a hawi Job kha a zumh i Satan kha Job hneksak awkah a awnh.—Job 1:8-11 rel.

8. Satan nih Job kha zeitindah a doh?

⁸ Satan cu a puarhrangmi le lainawng a si. Job ngeihmi thilri chawva vialte kha a lakpiak,  a salle kha a thah hna i a min thang a chiat. A dawt tukmi a fale kha an pahra ningin a thah hna. Mah hnuah Job takpum kha a doh i a lu in a ke tiang hmachia a tlunhter. A nupi cu ngaihchia le lung dong in a um i Job kha Pathian chiatserh in thih awkah a fial. Job thengte zong nih thih cu a duh ko nain zumhfek tein a um zungzal. Satan nih a dang lam zongin doh aa zuam rih. Job a hawile pathum kha a hman hna. Mah pa hna cu Job sinah an va leng ko nain hnemhnak bia an chim lo. Mah canah zaangfahnak ngei loin sual an phawt i an mawhchiat. Pathian nih aan kaltak cang i na zumhfehnak kha zei ah a rel lo tiah an ti. Miṭhalo na si caah na tonmi thil hna cu aa tlakmi a si ti hmanhin an ti.—Job 1:13-22; 2:7-11; 15:4, 5; 22:3-6; 25:4-6.

9. Job nih hneksaknak a ton lioah zei tuah dah a al?

⁹ Job nih a tonmi harnak vialte kha zeitindah a lehrulh? Anih cu mitlinglo a si. Sual a puhtu hna kha thinhung ngaiin a mawhchiat hna i khuaruat loin bia a chim. Pathian nakin ka ding deuh ti bantukin a chim. (Job 6:3; 13:4, 5; 32:2; 34:5) Asinain a sining a chiat tuk lio hmanhah Job nih Jehovah Pathian ralchanh kha a duh lo. A hawikom ṭha a si lomi hna i lihbia kha a zum lo. Hitin a ti: “Nangmah cu na dik, tiah kaan tinak ding kha, Pathian nih ka kham ko seh; ka thih tiangin, ka zumhfehnak kha ka hlaw bal lai lo.” (Job 27:5, NW) Mah bia nih Job cu zei thil a ton hmanhah zumhfek tein um dingin bia a khiah ti kha a langhter. Job bantukin kannih zong kan tuah khawh ve.

10. Satan nih Job a zuamcawhnak ah zetindah naa tel ve?

¹⁰ Satan nih Job kong he aa tlaiin a chuahtermi biahalnak ah nang tah zeitindah naa tel ve? Jehovah Pathian kha na daw taktak lo, nangmahle nangmah i khamh awkah amah biak kha na ngol lai i na zumhfehnak kha na thlah ko lai tiah aan ti. (Job 2:4, 5; Biat. 12:10) Mah bia nih zeitindah aan umter? Na lung aan fahter maw, fahter lo dah? Asinain mah kong hi ruathmanh: Jehovah nih aan zumh caah a ṭha tukmi caanṭha aan pek. Jehovah nih na zumhfehnak hneksak awkah Satan kha a awnh. Jehovah nih zumhfek tein na um lai i Satan milihchim a si langhternak ah a ka bawmh lai tiah aan zumh. Cutin tuahnak ah kaan bawmh hna lai ti zongin bia aa kam. (Heb. 13:6) Van le vawlei ah Cungnung Bik nih zumhmi si cu tinvo sung taktak a si. Zumhfek tein um a biapitnak a ruang kha na hngal maw? Mah nih Satan hlennak langhter awk, kan Pa a min thiang ṭhatter zungzal awk le a uknak bawmh awkah a kan bawmh lai. Mah a biapimi sining kha zeitindah kan kilven khawh?

11. Job sinin zeidah kan cawn khawh?

¹¹ Hi harnak caan a simi “ni hmannung bik” caan ah Satan nih Pathian salle kha a doh chinchin hna lai. (2 Tim. 3:1) Hi muihnak caan ah zeitindah kan zumhfeknak kha kan kilven khawh? Job sinin kan cawn khawhmi tampi a um. Job cu hlanliopi in Jehovah cungah zumhfek tein a um zungzal. Zumhfek tein um zungzal awkah Job sinin kan cawn khawhmi a kong pathum kha i ruah hna u sih.

12. (a) Job 26:7, 8, 14 ah a chim bantukin Job nih Jehovah a ṭihnak le a upatnak kha zeitindah a ṭhanter? (b) Pathian ṭihnak in kan lungthin kha zeitindah kan khahter khawh?

¹² Job nih Jehovah a ṭihnak a ṭhanternak thawngin a dawtnak kha a fehter. Job nih Jehovah sermi thil khuaruahhar tuaktannak caah a caan a hman. (Job 26:7, 8, 14 rel.) Vawlei, van, minmei le khuari ti bantuk kong a ruah tikah a khuaruah a har tuk i Jehovah sermi thil vialte he aa tlaiin tlawmte lawng ka  hngalh ti kha a hun hngalh. Jehovah sining zong kha a sunsak tuk. “Ka lung chungah a kaa chuak bia kha ka khon hna” tiah Job nih a ti. (Job 23:12) Job cu Jehovah kong he aa tlaiin a khuaruah a har tuk i a upat tuk. A Pa kha a dawt i a lunglawmhter a duh. Cucaah zumhfek tein um ding timi a biakhiahnak cu a fek chinchin. Kannih zong Job bantukin kan tuah ve a hau. Khuaruahhar a simi sernak kong kha Job chan i mi hna nakin tam deuh kan hngalh. Jehovah a sining hngalh awkah a kan bawmmi Baibal uktling in kan ngei. Mah kan hngalhmi vialte nih kan lungthin chungah ṭihnak in a khahter. Jehovah kan ṭihnak le kan upatnak nih amah kan dawtnak, a nawl kan ngaihnak le zumhfek tein um kan duhnak kha fehter chin awkah a kan forh lai.—Job 28:28.

13, 14. (a) Job 31:1 ah kan hmuh bantukin Job nih nawlngaihnak kha zeitindah a langhter? (b) Job kha zeitindah kan i zohchunh khawh?

¹³ Job cu a nawlngaihnak nih zumhfek tein um awkah a bawmh. Job nih zumhfek tein um awkah Jehovah nawlngaih a hau ti kha a hngalh. Nawlngaihnak kan langhter fatin zumhfek tein um ding timi kan biakhiahnak cu a fek chinchin lai. Job cu nifa a nunnak ah Pathian nawlngaih dingin aa zuam. Tahchunhnak ah, nu pawl a pehtlaih hna tikah a umtuning kha aa ralring. (Job 31:1 rel.) Innchunghawi a ngei cangmi pa pakhat nih a nupi a si lomi nudang sinah nungak, tlangval duhdawtnak langhter cu aa tlak lo ti kha a hngalh. Nupa sualnak tuah awkah lemsoinak in a khatmi vawlei ah kan nung. Job bantukin kan innchunghawi a si lomi sinin aa tlak lomi lungthin peknak kha kan al lai maw? Nupa umṭi duhnak a ṭhawntermi thil asiloah a thurhnawmmi hmanthlak zoh ti bantuk zong kha kan hrial maw? (Matt. 5:28) Nifate mahle mah kan i uk khawh ahcun kan zumhfehnak cu a fek chin lai.

¹⁴ Job nih thilri chawva a hmuhning he aa tlai zongin Jehovah nawl a ngaih. Job nih a  ngeihmi thilri chawva kaa bochan ahcun dantat awkah aa tlakmi sualnak ka tuah lai ti kha a hngalh. (Job 31:24, 25, 28) Tuchan mi hna nih thilri chawva kha biapi tuk ah an chiah. Baibal nih ralrin a kan pek bantukin tangka le thilri chawva he a tlaiin a tlarimi hmuhnak kan ngeih ahcun zumhfek tein um ding timi kan biakhiahnak cu a fek chin lai.—Ptb. 30:8, 9; Matt. 6:19-21.

15. (a) Zei ruahchannak nih dah Job kha zumhfek tein um zungzal awkah a bawmh? (b) Mah nih Jehovah pekmi ruahchannak i cinken awkah zeicah a kan bawmh khawh?

¹⁵ Job cu Pathian nih a pek dingmi laksawng cungah a lungthin a chiah zungzalnak thawngin zumhfek tein a um. A zumhfehnak kha Pathian nih biapi ah a chiah ti kha a zumh. (Job 31:6) Hneksaknak a ton bu hmanhin a donghnak ah Jehovah nih laksawng a ka pek lai ti kha a zumh. Mah nih zumhfek tein um zungzal awkah a bawmh. Jehovah cu Job zumhfehnak cungah aa lawm tuk. Cucaah mitlinglo a si lio hmanhah thluachuah tampi a pek. (Job 42:12-17; Jeim 5:11) Hmailei ah laksawng tam chinchin hmanhin a pek lai. Na zumhfehnak cungah Jehovah nih laksawng a ka pek lai timi a fekmi ruahchannak na ngei maw? Kan Pathian cu aa thleng bal lo. (Mal. 3:6) Jehovah nih kan zumhfehnak kha a sunsak ti kan i cinken ahcun a ṭha tukmi hmailei ruahchannak cu kan lungthin chungah a um zungzal lai.—1 Thes. 5:8, 9.

16. Zei tuah awkah dah bia kan khiah awk a si?

¹⁶ Zumhfek tein um zungzal awkah biakhiak. A caan ah zumhfek tein a ummi cu keimah lawng ka si tiah na ruah men lai nain nangmah lawng na si bal lo. Vawleicung pumpi ah zumhfek tein a ummi nuai tampi lakah naa tel ve. Thihnak tlerhkhonhnak lak hmanhah zumhfek tein a ummi hlanlio mi hna lakah naa tel ve. (Heb. 11:36-38; 12:1) “Ka zumhfehnak kha ka hlaw bal lai lo” tiah a chimmi Job bantukin nun ve awkah biakhiak hna u sih. Kan zumhfehnak nih Jehovah kha a zungzal in thangṭhatnak pe ko seh.