1. ¿Bajcheʼ tsiʼ pʌsʌ jiñi uxtiquilob chaʼan xucʼulobʌch ti Jehová?

LAʼ lac ñaʼtan ili uxpʼejl wocol. Ñaxam bʌ, juntiquil xcʼalʌl an ti clase i jiñi maestro miʼ yʌl chaʼan pejtelel jiñi alumnojob yom miʼ melob jumpʼejl qʼuiñijel. Pero jiñi xcʼalʌl yujil chaʼan Dios maʼañic miʼ mulan jiñi qʼuiñijel, jin chaʼan wen jach miʼ suben chaʼan maʼañic mi caj i mel. I chaʼpʼejlel, juntiquil xcolel woli (choncol) ti subtʼan i miʼ taj i qʼuel chaʼan ti jiñi yambʌ otot yaʼ chumul juntiquil i piʼʌl ti escuela am bʌ i wajle i testigojob Jehová. Anquese an i bʌqʼuen, mucʼʌch i ñumel ti subtʼan yaʼi. I yuxpʼejlel, juntiquil tatʌl woli ti eʼtel (troñel) i jiñi i yum miʼ suben chaʼan miʼ mel (chaʼlen) mach bʌ weñic o ticʼbil bʌ ti yumʌlob. Anquese jiñi hermano miʼ mejlel i sʌt i yeʼtel, miʼ tsictesʌben chaʼan maʼañic miʼ mel yicʼot chaʼan miʼ jacʼben i mandar yumʌlob come jiñʌch muʼ bʌ i pijtan Dios tiʼ tojlel i wiñicob (Ro. 13:1-4; He. 13:18).

2. ¿Chuqui ti cʼajtiya tac mi caj lac jacʼ ti ili temaj, i chucoch?

² ¿Chuqui tsiʼ pʌsʌyob maʼ wʌl ili uxtiquil Testigojob? Tajol miʼ mejlel la cʌl chaʼan tsiʼ pʌsʌyob i chʼejlel yicʼot tsiʼ meleyob chuqui utsʼat. Pero an yambʌ wen ñuc bʌ tsaʼ bʌ i ñijcayob i mel bajcheʼ tsiʼ meleyob: Tojobʌch ti Dios. Tsiʼ chaʼleyob wersa i mel muʼ bʌ i mulan yicʼot chaʼan miʼ jacʼbeñob i mandar. Tiʼ sujm, Jehová wen tijicña miʼ yubin i bʌ tiʼ tojlelob. Joñonla jaʼel la com chaʼan tijicña miʼ yubin i bʌ ti lac tojlel jiñi lac Tat am bʌ ti panchan. Jin chaʼan, laʼ lac jacʼ ili cʼajtiya tac: ¿Chuqui yom i yʌl cheʼ tojonla ti Dios? ¿Chucoch ñuc i cʼʌjñibal cheʼ yomonla bajcheʼ jiñi? ¿I chuqui miʼ mejlel lac mel chaʼan mi lac ñumen mulan ajñel ti toj ti ili qʼuin wen wocol jax bʌ?

3. a) ¿Chuqui yom i yʌl cheʼ tojonla ti Dios? b) ¿Chuqui tac ti ejemplo miʼ coltañonla lac chʼʌmben i sujm?

³ Cheʼ tojonla ti Dios yom i yʌl chaʼan ti jumpʼejl lac pusicʼal mi laj cʼuxbin Jehová yicʼot chaʼan jin jach mi lac chʼujutesan, i mi lac mel chuqui miʼ mulan. Yaʼ ti Biblia, jiñi tʼan am bʌ ti hebreo muʼ bʌ i chaʼlentel ti traducir bajcheʼ toj o xucʼul miʼ cʼʌjñel chaʼan miʼ tajtʌl ti tʼan chuqui tsʼʌcʌl o cʼocʼ. Jumpʼejl ejemplo, yaʼ ti Mandar tsaʼ ajli chaʼan mi jiñi israelob mi caj i yʌqʼueñob tiʼ majtan Jehová juncojt añimal, yomʌch miʼ yʌcʼob jiñi cʼocʼ bʌ (Lv. 22:21, 22). * Maʼañic miʼ mejlel i yʌcʼob juncojt mach bʌ weñic i yoc, maʼañic bʌ i chiquin o i wut o cʼam. Jehová wen ñuc tsiʼ qʼuele cheʼ miʼ yʌqʼuentel juncojt añimal cʼocʼ bʌ yicʼot tsʼʌcʌl bʌ chuqui an i chaʼan (Mal. 1:6-9). ¿Chucoch yom Jehová chaʼan tsʼʌcʌl chuqui mi la cʌqʼuen? Chaʼan mi lac chʼʌmben i sujm, laʼ lac ñaʼtan ili ejemplo. Cheʼ mi lac mʌn jumpʼejl wut teʼ, maʼañic mi lac mulan cheʼ chʼujbeñix o cheʼ xutʼul jax. La com chaʼan tsʼʌcʌl mi la cʌqʼuentel yicʼot cheʼ wento. Lʌcʼʌl cheʼʌch miʼ yujtel chaʼan jiñi laj cʼuxbiya yicʼot lac xucʼtʌlel, Jehová yom tiʼ tsʼʌcʌl mi la cʌqʼuen.

4. a) ¿Chucoch mach yom i yʌl chaʼan mach xmuliloñixla cheʼ yom tojonla? Tsictesan. b) Cheʼ bajcheʼ miʼ yʌl Salmo 103:12-14, ¿chuqui maʼañic miʼ pijtan Jehová chaʼan mi lac mel?

⁴ La cujil chaʼan xmulilonla i mi lac taj cabʌl lac sajtemal, i tajol mi laj cʼajtiben lac bʌ: «¿Yom ba i yʌl chaʼan mach xmuliloñixla cheʼ yom tojonla?». Mach cheʼiqui. Laʼ laj qʼuel chaʼpʼejl i sujmlel. Ñaxan, come Jehová mach jiñic miʼ chʼuj qʼuel lac sajtemal tac. Yaʼ tiʼ Tʼan miʼ yʌl: «C Yum, muqʼuic a chʌn ñaʼtan c mul lojon mach tojic maʼ qʼuelon» (Sal. 130:3). Jehová yujil chaʼan xmulilonla, i tiʼ yutslel i pusicʼal miʼ ñusʌbeñonla lac mul (Sal. 86:5). I chaʼpʼejlel, come yujil chaʼan pʼisbil jach chuqui miʼ mejlel lac mel, i mach ñumeñic ti pʼis chuqui miʼ cʼajtibeñonla (pejcan Salmo 103:12-14). Cheʼ jiñi, ¿bajcheʼ an i sujmlel cheʼ yom tojonla tiʼ wut?

5. ¿Chucoch ñuc i cʼʌjñibal jiñi cʼuxbiya chaʼan tojonla ti Dios?

⁵ Chaʼan tojonla ti Dios, ñuc i cʼʌjñibal jiñi cʼuxbiya. Yomʌch tsʼʌcʌl jiñi laj cʼuxbiya yicʼot lac xucʼtʌlel muʼ bʌ lac pʌsben Jehová come jiñʌch lac Tat am bʌ ti panchan. Mi maʼañic chuqui miʼ chaʼlen jiñi laj cʼuxbiya anquese an wocol tac, yom i yʌl chaʼan tojonla ti Dios (1 Cr. 28:9; Mt. 22:37). Laʼcu lac chaʼ ñaʼtan jiñi uxtiquilob tsaʼ bʌ lac ñaxan alʌyob ti ñaxam bʌ párrafo. Tajol jiñi xcʼalʌl yomʌch i ñusan i bʌ jaʼel yaʼ ti escuela, jiñi xcolel mach yomic i yubin quisin ti subtʼan, i jiñi tatʌl mach yomic i sʌt i yeʼtel. Pero ¿chucoch tsiʼ meleyob cheʼ bajcheʼ tsaʼix laj qʼuele? Come yujilob chaʼan toj jiñi i mandar tac Dios i ñumen ñuc tsiʼ qʼueleyob cheʼ miʼ melob muʼ bʌ i mulan i Tat am bʌ ti panchan. Jiñi i cʼuxbiyajob ti Jehová tsiʼ ñijcayob chaʼan ñumen ñuc miʼ qʼuelob chuqui miʼ ñaʼtan i mach jiñic bajcheʼ yomob. Jiñi tsiʼ pʌsʌ chaʼan toj añob ti Dios.

6. a) ¿Chucoch wen ñuc i cʼʌjñibal cheʼ toj mi la cajñel ti jujuntiquilonla? b) ¿Bajcheʼ tsiʼ pʌsʌ Adán yicʼot Eva chaʼan mach tsʼʌcʌlic tsiʼ yʌcʼʌyob i bʌ ti Jehová?

⁶ ¿Chucoch wen ñuc i cʼʌjñibal cheʼ toj mi la cajñel ti jujuntiquilonla? Come Satanás an i contraji Jehová yicʼot joñonla. Yaʼ ti pʌcʼʌbʌl Edén, ili jontol bʌ ángel tsaʼ sujti ti Satanás, yom bʌ i yʌl «xContra o xMʌctaya». Tsiʼ bibʼesʌbe i cʼabaʼ Jehová cheʼ tsiʼ yʌcʼʌ ti ñaʼtʌntel chaʼan mach weñic bʌ yumʌl, i bajñel jach miʼ ñaʼtan i bʌ yicʼot yujil lot.  Chʼijiyemtic jax come Adán yicʼot Eva tsiʼ tsajcayob Satanás i tsaʼ sujtiyob tiʼ contra Dios (Gn. 3:1-6). Cheʼ bʌ yaʼto añob ti Edén, cabʌl bajcheʼ tsaʼ mejli i pʼʌtʼesañob i cʼuxbiya ti Jehová. Pero cheʼ bʌ Satanás tsiʼ contraji Dios, mach tsʼʌcʌlic tsaʼ ajñiyob i cʼuxbiya ti Jehová. I cheʼ tiʼ yorajlel Job, tsaʼ tejchi yambʌ wocol: ¿Anto majqui xucʼul miʼ yajñel tiʼ tojlel Jehová chaʼan i cʼuxbiya? Yom i yʌl, ¿mejloʼ ba ti ajñel ti toj jiñi quixtañujob?

7. Cheʼ bajcheʼ miʼ yʌl Job 1:8-11, ¿bajcheʼ tsiʼ qʼuele Jehová cheʼ Job toj woliʼ yajñel, i bajcheʼ tsiʼ qʼuele Satanás?

⁷ Job tsaʼ chumle tiʼ yorajlel jiñi israelob cheʼ bʌ yaʼañob ti Egipto. Ti jiñi bʌ ora, maʼañic yambʌ quixtañu toj bʌ bajcheʼ Job. I sujmʌch chaʼan xmulil yicʼot miʼ taj cabʌl i sajtemal cheʼ bajcheʼ joñonla. Pero Dios tsiʼ cʼuxbi come toj an tiʼ tojlel. Tajol Satanás subebilix i chaʼan Jehová chaʼan jiñi wiñicob xʼixicob (quixtañujob) mach tojobic tiʼ tojlel. Jin chaʼan, Dios tiʼ sube chaʼan miʼ qʼuel jiñi Job. Come pejtelel chuqui miʼ mel miʼ pʌs chaʼan Satanás juntiquilʌch xlot. Jin chaʼan, Satanás tsiʼ cʼajti chaʼan miʼ yʌcʼ ti wocol jiñi Job i miʼ qʼuel mi tojʌch. Jehová tsiʼ yʌlʌ chaʼan mucʼʌch mejlel i mel come yujil chaʼan xucʼulʌch jiñi Job (pejcan Job 1:8-11).

8. ¿Bajcheʼ tsiʼ ticʼla Satanás jiñi Job?

⁸ Satanás wen jontol yicʼot juntiquilʌch xtsʌnsa. Tsiʼ chilbe Job pejtelel chuqui an i chaʼan: Jiñi i taqʼuin, jiñi i yaj eʼtelob yicʼot cheʼ mach utsʼatix tsaʼ qʼuejli tiʼ tojlel yambʌlob. Cheʼ jaʼel, tiʼ tsʌnsʌbe lujuntiquil i yalobil wen cʼuxbibil bʌ i chaʼan. Ti wiʼil, tsiʼ yʌqʼue biʼiltic jax bʌ cʼamʌjel muʼ bʌ i locʼben i pujil tiʼ pejtelel i bʌcʼtal. Jiñi i yijñam mach yomix i qʼuel jiñi i wocol i tiʼ sube chaʼan muqʼuix i cʌy i chʼujutesan Dios, miʼ pʼaj yicʼot laʼix  chʌmic. Job tsiʼ ñaʼta chʌmel (sajtel), pero toj tsaʼ bej ajñi ti Dios. Cheʼ jiñi, Satanás tsiʼ chaʼ ticʼla. Tsiʼ cʼʌñʌ uxtiquil i yamigo jiñi Job tsaʼ bʌ majli i julaʼtañob, pero maʼañic tsiʼ ñuqʼuesʌbeyob i pusicʼal. Tsaʼ jach i subeyob lolom jach bʌ tʼan yicʼot tsiʼ wen wajleyob. I tiʼ subeyob Job chaʼan Dios woli (yʌquel) i yʌqʼuen pejtelel jiñi wocol i chaʼan mach i wentajic miʼ xucʼul o maʼan. Tsaʼto i yʌqʼueyob i ñaʼtan jaʼel chaʼan wen jontol i chaʼan weñʌch pejtelel chuqui woliʼ ñusan (Job 1:13-22; 2:7-11; 15:4, 5; 22:3-6; 25:4-6).

9. Anquese Job tsiʼ ñusa tsʌts bʌ wocol tac, ¿chuqui maʼañic bʌ tsiʼ mele?

⁹ ¿Chuqui tsiʼ mele Job cheʼ tsiʼ ñusa wocol tac? Tsaʼ michʼa i tsiʼ tiqʼui jiñi i yamigojob i tsiʼ yʌlʌ tʼan tac tsaʼ bʌ chaʼ cʼoti i ñaʼtan ti wiʼil chaʼan mach tojic. Tsiʼ bajñel ñaʼta chuquiyes jiñi wem bʌ tiʼ tojlel i maʼañic tsiʼ chʼʌmʌ ti ñuc Dios (Job 6:3; 13:4, 5; 32:2; 34:5). Pero, anquese woliʼ ñusan jiñi tsʌts tac bʌ wocol, maʼañic tsiʼ cʌyʌ Jehová. Maʼañic tsiʼ ñopo jiñi lot tac tsaʼ bʌ i yʌlʌ jiñi i yamigojob. Tsiʼ yʌlʌ: «Muqʼuic c sub isujm bajcheʼ wolaʼ wʌl, cheʼ jini mach tojonic. Cʼʌlʌlto mic chʌmel mux c sub maʼanic c mul» (Job 27:5). Ti ili tsaʼ bʌ i yʌlʌ tsiʼ yʌcʼʌ ti ñaʼtʌntel chaʼan mach yʌlʌlic chuqui miʼ ñusan, toj mi caj i yajñel yicʼot Dios. Maʼañic tsiʼ liji i bʌ i cheʼʌch miʼ mejlel lac mel jaʼel.

10. ¿Bajcheʼ miʼ tajonla ti jujuntiquil tsaʼ bʌ i yʌlʌ Satanás tiʼ tojlel Job?

¹⁰ ¿Bajcheʼ miʼ tajonla ti jujuntiquil tsaʼ bʌ i yʌlʌ Satanás tiʼ tojlel Job? Satanás miʼ yʌl chaʼan maʼañic mi laj cʼuxbin Jehová tiʼ sujm, chaʼan mi caj laj cʌy lac melben i yeʼtel chaʼan mi lac bajñel coltan lac bʌ i chaʼan mach tojoñicla tiʼ tojlel (Job 2:4, 5; Ap. 12:10). ¿Bajcheʼ miʼ yʌqʼueñonla la cubin lac bʌ iliyi? ¿Mach ba cʼuxic mi laj cubin? Pero laʼcu lac ñaʼtan iliyi: Jehová miʼ ñop chaʼan tojʌch mi caj la cajñel, i miʼ cʌy chaʼan Satanás miʼ yʌqʼueñonla wocol chaʼan miʼ mejlel lac pʌs chaʼan xucʼuloñʌchla i chaʼan xlot jiñi Satanás. Cheʼ jaʼel, Dios miʼ yʌqʼueñonla i tʼan chaʼan mi caj i coltañonla (He. 13:6). ¡Jiñʌch ñuc bʌ lac majtan cheʼ jiñi lac Rey tiʼ pejtelel pañimil miʼ ñop chaʼan toj mi caj la cajñel! ¿Muʼ ba laj qʼuel chucoch ñuc i cʼʌjñibal cheʼ tojonla tiʼ tojlel Dios? Come cheʼʌch mi lac pʌs chaʼan muʼ bʌ i yʌl Satanás mach i sujmic, mi laj coltʌben i cʼabaʼ jiñi lac Tat am bʌ ti panchan yicʼot bajcheʼ yujil yumʌntel. Jin chaʼan, ¿chuqui miʼ mejlel lac mel chaʼan mi lac ñumen mulan ajñel ti toj?

11. ¿Chuqui mi mejlel laj cʌn tiʼ tojlel Job?

¹¹ Satanás an i ñumen tsʌtsʼesa bajcheʼ miʼ contrajin i wiñicob Dios ti ili «cojix bʌ qʼuin» (2 Ti. 3:1). Jin chaʼan, ¿chuqui miʼ mejlel lac mel wʌle ora chaʼan mi lac ñumen mulan ajñel ti toj? An chuqui mi mejlel lac chaʼ cʌn tiʼ tojlel Job. Cheʼ anto yom chaʼan miʼ taj wocol tac, cabʌlix bajcheʼ an i pʌsʌ chaʼan tojʌch ti Dios. Laʼ laj qʼuel uxchajp chuqui tsiʼ mele yicʼot bajcheʼ miʼ mejlel lac lajin.

12. a) Cheʼ bajcheʼ miʼ pʌs Job 26:7, 8, 14, ¿chuqui tsiʼ ñijca Job chaʼan miʼ qʼuel ti ñuc Jehová? b) ¿Chuqui mi caj i coltañonla chaʼan mi laj qʼuel ti ñuc Dios?

¹² Job tsiʼ wen mulaj i qʼuel chuqui tac melbil (pʌtbil) i chaʼan Jehová, jin chaʼan tsaʼ ñumen pʼʌtʼa i cʼuxbiya tiʼ tojlel. Tsiʼ yʌqʼue i yorajlel chaʼan miʼ wen ñaʼtan jiñi utsʼatax bʌ i melbal Jehová (pejcan Job 26:7, 8, 14). Toj sajtel i pusicʼal cheʼ tsiʼ wen ñaʼta bajcheʼ an jiñi Lum, panchan, jiñi tocal yicʼot chajc, anquese yujil chaʼan maxto wen i cʌñʌyic pejtelel chuqui melbil i chaʼan Dios. Yicʼot jaʼel, tsiʼ wen qʼuele ti ñuc i cʌntesa Jehová, jin  chaʼan tsiʼ yʌlʌ: «Maʼanic mic ñusʌben i mandar. Tsaʼix c wen lotbe i tʼan tic pusicʼal» (Job 23:12). Job tsiʼ wen qʼuele ti ñuc Jehová yicʼot tsiʼ mulaj i cʌn i melbal tac, i jiñʌch tsaʼ bʌ i ñijca chaʼan miʼ cʼuxbin yicʼot miʼ mel chuqui miʼ mulan. I tsiʼ colta chaʼan miʼ ñumen mulan ajñel ti toj. Cheʼ bajcheʼ Job, yom mi la cʌqʼuen i yorajlel lac wen ñaʼtan melbil bʌ i chaʼan Jehová. Ili ora, cabʌlix chuqui ñaʼtʌbil maxto bʌ ñaʼtʌnti tiʼ yorajlel Job. Cheʼ jaʼel, tsʼʌcʌlix lac chaʼan jiñi Biblia, jiñi miʼ coltañonla laj cʌn ti wen Dios. Pejtelel chuqui mi laj cʌn mi caj i ñijcañonla laj qʼuel ti ñuc Jehová. I jiñi mi caj i coltañonla chaʼan mi laj cʼuxbin yicʼot mi lac jacʼben i tʼan, i chaʼan mi lac ñumen mulan ajñel ti toj (Job 28:28).

13, 14. a) Cheʼ bajcheʼ miʼ yʌl Job 31:1, ¿baqui tsiʼ pʌsʌ Job chaʼan xjacʼtʼañʌch? b) ¿Bajcheʼ miʼ mejlel lac lajiben i melbal?

¹³ Tsiʼ chaʼle wersa chaʼan miʼ jacʼ tan. Job yujil chaʼan yom miʼ jacʼben i tʼan Jehová mi toj yom ajñel yicʼot. Cheʼ jajayajl mi lac jacʼben i tʼan, mi lac ñumen mulan chaʼan toj la com ajñel ti Dios. Job tsiʼ chaʼle wersa i jacʼben i tʼan Dios ti jujumpʼejl qʼuin. Jumpʼejl ejemplo, tsiʼ wen cʌnta i bʌ chaʼan bajcheʼ miʼ pejcan jiñi xʼixicob (pejcan Job 31:1). Yujil chaʼan mach yomic miʼ pʌsben yambʌ xʼixic chaʼan miʼ mulan come ñujpuñem. Ili ora, chumulonla ti jumpʼejl pañimil (mulawil) baqui cʌlʌxix miʼ pʌstʌl mejl bʌ i yʌsañonla ti tsʼiʼlel. ¿Cheʼ ba mi caj lac mel bajcheʼ Job i maʼañic mi caj lac pʌsben chaʼan mi lac mulan yambʌ quixtañu mach bʌ lac piʼʌlic? ¿Muʼ ba caj lac tʌtsʼ lac wut yaʼ baqui miʼ pʌstʌl quixtañujob pitsʼiloʼ bʌ o lecojax bʌ bajcheʼ miʼ pʌsob i bʌ? (Mt. 5:28). Cheʼ mucʼʌch lac ticʼ lac bʌ ti jujumpʼejl qʼuin, mi caj lac ñumen mulan chaʼan toj mi la cajñel.

¹⁴ Job tsiʼ jacʼbe i tʼan Jehová jaʼel cheʼ wen jach bajcheʼ tsiʼ qʼuele jiñi chubʌʼañʌl. Tsiʼ yʌlʌ chaʼan jumpʼejlʌch tsʌts bʌ mulil cheʼ yaʼic tsiʼ yʌcʼʌ i pusicʼal tiʼ chubʌʼan tac, i chaʼan yom miʼ toj i mul ti juezob (Job 31:24, 25, 28). Ili  ora, jiñi quixtañujob miʼ wen mulañob chubʌʼan tac. Mi pʼisbil jach bajcheʼ mi laj qʼuel jiñi taqʼuin yicʼot chubʌʼan tac, cheʼ bajcheʼ miʼ subeñonla jiñi Biblia, ñumen mi caj lac mulan chaʼan toj mi la cajñel (Pr. 30:8, 9; Mt. 6:19-21).

15. a) ¿Baqui bʌ pijtaya tsiʼ colta Job chaʼan chʌn toj miʼ yajñel ti Dios? b) ¿Chucoch yom mi laj cʼajtesan jiñi chobejtʌbal muʼ bʌ caj i yʌqʼueñonla Jehová?

¹⁵ Tsiʼ yʌcʼʌ i pensar ti jiñi pijtaya chaʼan Dios mi caj i yʌqʼuen i chobejtʌbal. Job tsiʼ ñopo chaʼan Dios mucʼʌch i chʼʌm ti ñuc mi tojʌch an o maʼañic (Job 31:6). Anquese tsiʼ ñusa wocol tac, tsiʼ ñopo chaʼan Jehová miʼ caj i yʌqʼuen i chobejtʌbal ti wiʼil, i jiñʌch tsaʼ bʌ i colta chaʼan chʌn toj miʼ yajñel. Jehová wen tijicña tsiʼ yubi i bʌ chaʼan Job, jin chaʼan tsiʼ yʌqʼue ñuc bʌ bendición cheʼ cuxulto (Job 42:12-17; Stg. 5:11). Pero cheʼ ti talto bʌ qʼuin mi caj i taj ñuc bʌ bendición. ¿Ixcu joñonla? ¿Muʼ ba lac ñop ti jumpʼejl lac pusicʼal chaʼan Jehová mi caj i yʌqʼueñonla lac chobejtʌbal mi tojonla? Dios maʼañic qʼuextʌyem (Mal. 3:6). Cheʼ mi laj cʼajtesan chaʼan Jehová mi caj i yʌqʼuen i chobejtʌbal jiñi toj bʌ miʼ chʌn ajñelob, miʼ ñijcañonla lac chaʼlen wersa chaʼan toj mi lac chʌn ajñel i miʼ mejlel lac ñop chaʼan mi caj i yʌqʼueñonla utsʼatax bʌ lac chobejtʌbal (1 Ts. 5:8, 9).

16. ¿Chuqui yom mi lac ñaʼtan lac mel ti jumpʼejl lac pusicʼal?

¹⁶ Ti jumpʼejl lac pusicʼal yom mi lac ñaʼtan chaʼan chʌn xucʼul mi caj laj cajñel. Tajol an qʼuiñil mi laj cubin chaʼan lac bajñel jach woli lac mel yubil. Pero mach cheʼiqui. Tiʼ pejtelel pañimil yonlel hermanojob woliyob ti wersa chaʼan toj miʼ yajñelob yicʼot Dios. Cheʼ jaʼel, mi caj lac tem ajñel la quicʼot jiñi wiñicob xʼixicob ti wajali toj bʌ tsaʼ ajñiyob ti Dios anquese tsaʼ tsʌnsʌntiyob (He. 11:36-38; 12:1). Ti lac pejtelel laʼ lac tsajcʌben i melbal Job i laʼ laj cʌl: «Cʼʌlʌl to mic chʌmel mux c sub maʼanic c mul». Laʼ laj cʌqʼuen i ñuclel Jehová tiʼ pejtelel ora cheʼ toj o tsʼʌcʌl mi laj cajñel tiʼ tojlel.