1. Fa den dii Kotoigi di kai aini a paragraaf ya soi taki den á gwe fika Yehofa?

MEKE u luku dii sani di sa miti Yehofa Kotoigi: (1) Wan yonkuu sisa de a sikoo. A yefolow taigi ala den pikin taki den o holi wan fesa. A wani ala den pikin holi a fesa ya. A sisa sabi taki Gadu nai fende a fesa ya bun, bika a komoto a falisi biibi. Neen meke a taigi a yefolow anga lesipeki taki a ná o poi de na a fesa. (2) Wan yonkuu baala di sen e kisi de a peleikiwooko. A sabi taki a wan boi fi en kalasi e tan na a osu di den e waka go. A boi lobi wisiwasi Yehofa Kotoigi. Ma toku a yonkuu baala waka go na a osu, neen a koko a doo. (3) Wan baala e wooko taanga fu solugu en osufamii. Ma wan dei en basi akisi en fu a du wan sani a wooko di á bun. A baala sabi taki a sa lasi en wooko efu a á du san a basi taigi en. Toku a taigi en basi taki a á wani bidiigi sama, a wani holi den weiti fu a kondee, bika a sabi taki a dati Gadu wani den sama di e dini en du.​—Rom. 13:1-4; Heb. 13:18.

2. Sowtu akisi wi o luku? Saide wi o luku den akisi ya?

² San den dii Kotoigi ya du? Kande i si taki den soi deki-ati. Den du sani anga wan kiin ati tu. Ma den du wan taa sani di pelensipali tuutuu. Ala den dii Kotoigi ya soi taki den wani tan a Yehofa se. Den du san a wani. Yehofa e piisii tuutuu te den sama di e dini en e soi taki den nai gwe fika en. Useefi wani u Dda di de a hemel piisii tu. Neen meke wi o luku dii akisi: San a wani taki fu ná gwe fika Yehofa? Saide wi á mu gwe fika Yehofa? San o yeepi u fu tan dini Yehofa aini a taanga ten ya?

3. (a) San a wani taki fu ná gwe fika Yehofa? (b) Gi wan toli di e soi san a wani taki fu dini Yehofa anga u hii ati?

³ San o yeepi wan sama di e dini Yehofa fu a á gwe fika en? A te a lobi Yehofa anga en hii ati. Fu di a lobi Yehofa, meke ala yuu a o wani du san a taki. Wi o luku wantu toli aini Beibel di e soi taki Yehofa wani u soi en taki u lobi en anga u hii ati. A Weiti be e soi taki den meti di den Islayelisama be e tyai gi Yehofa enke ofaandi be mu gusontu. Den á be mu e mankei nawan sani. A be mu de a moo bun meti di den be abi (Lef. 22:21, 22). Den á be mu gi Yehofa meti di be siki neen futu, en yesi en ain efuso taa peesi. Yehofa be wani a foluku gi en bun meti di á be malengii (Male. 1:6-9). Wi e fusutan saide Yehofa á be wani den gi en siki meti. Te u go bai wan sii, wan buku efuso taa sani, wi e keli den luku efu den á poli efuso abi olo. U nai bai sani di u sabi taki á bun. A letiso Yehofa wani u dini en anga u hii ati.

4. (a) Saide u poi dini Yehofa anga u hii ati winsi wi abi sondu? (b) Enke fa Psalm 103:12-14 e soi, da san Yehofa sabi fu wi?

⁴ U mu si enke u ná o man dini Yehofa anga u hii ati fu di wi abi sondu? Bika wi e meke fowtu ala yuu. Wi o luku tu sani di o yeepi u fu si taki u poi dini Yehofa anga u hii ati winsi wi e meke fowtu. A fosiwan: Yehofa nai poti pakisei a den fowtu fu u. Beibel taki: „Efu a fowtu i be e luku baa, Yehofa, da sama be o poi taampu a yu fesi?” (Ps. 130:3) A sabi taki wi e meke fowtu bika wi abi sondu, neen meke ai gi u paadon anga en hii ati (Ps. 86:5). Du fu tu: Yehofa nai akisi u fu du moo enke san u man. A sabi san u poi du anga san wi á poi du (Leisi Psalm 103:12-14.) Fa u sa soi taki u nai gwe fika Yehofa?

5. Fa lobi e yeepi a foluku fu Yehofa fu den á gwe fika en?

⁵ A sani di e yeepi a foluku fu Yehofa fu den á gwe fika en, a lobi. U mu lobi Yehofa anga u hii ati. Efu u lobi Yehofa, u ná o gwe fika en te tesi miti u (1 Kolon. 28:9; Mat. 22:37). Meke u luku den dii Kotoigi di u be taki fu den na a bigin baka. Saide den be tyai denseefi na a fasi de? A wani a yonkuu sisa á be wani piisii anga den pikin a sikoo? A wani a yonkuu baala be wani sama gi en sen? A wani a baala di abi a osufamii be wani lasi en wooko? Nono. Ma den be wani dini Yehofa anga den hii ati, neen meke den meke moiti fu holi den weiti fi en. Den wani Yehofa piisii tu. Fu di den lobi Yehofa meke den e pakisei en fosi den du wan sani. A so den soi taki den nai gwe fika Yehofa.

6. (a) Saide wi á mu gwe fika Yehofa? (b) Saide Adan anga Efa taangayesi Yehofa?

⁶ Saide a de taanga fanowdu fu soi taki u nai gwe fika Yehofa? A sani ya de taanga fanowdu bika di Saatan lei gi Yehofa, a lei gi u tu. Di a engel ya taangayesi Gadu aini a dyali Eden, a meke enseefi toon Saatan efuso „Sitee”. A poli Yehofa nen di a taki Gadu á bun, a taki a soso enseefi ai pakisei. Saatan taki Gadu nai tii libisama bun. A wan tyali sani taki Adan anga Efa  teke Saatan se neen den taangayesi Yehofa (Gen. 3:1-6). Di den be de aini Eden den á teke den somen okasi di den be abi fu kon lobi Yehofa anga den hii ati. Neen meke di Saatan sitee anga Gadu, Adan anga Efa holibaka gi Saatan. Fu di den taangayesi Yehofa meke wi abi fu sabi a piki fu den akisi ya: Libisama be o dini Yehofa fu di den lobi en? Den be o poi dini Yehofa anga den hii ati winsi san e pasa? Den akisi ya be mu piki aini a toli fu Yopu.

7. Enke fa Yopu 1:8-11 e soi, da fa Yehofa be e fii fu a fasi fa Yopu be e soi taki a lobi en? Fa Saatan be e si a sani ya?

⁷ Yopu be e libi na a ten di den Islayelisama be de a Egepte. Yopu á be e tyai enseefi enke den sama fu a ten fi en. A be abi sondu leti enke wi. A be e meke fowtu, ma Yehofa be lobi Yopu fu di a be e dini en anga en hii ati. A gei enke Saatan be taki kaba taki a ná di libisama lobi Yehofa meke den e dini en. Neen meke Yehofa be meke a poti pakisei a Yopu. A fasi fa a man ya be e tyai enseefi be soi kiin taki Saatan a wan leiman! Saatan be wani tesi Yopu fosi fu si efu a o dini Yehofa winsi san e pasa. Yehofa be e fitoow en mati Yopu neen meke a gi Saatan pasi fu a tesi en.​—Leisi Yopu 1:8-11.

8. San Saatan du anga Yopu?

⁸ Saatan abi ogii-ati, en a wan kiiman. A teke ala den sani di Yopu be abi. A kii den wookoman fi en, boiti dati a gi en poli nen. Baka dati a kii ala den tin pikin  fu Yopu. Ma Saatan á be kaba ete, a meke Yopu siki wan gaan siki. A meke soo kisi en fi en ede te neen paata futu. Yopu uman kusumi te a á be sabi san fu du, neen meke a sende Yopu fu a gi abaa. A taigi en taki meke a kosi Gadu da a dede. Yopu seefi be akisi Gadu fu meke a dede, ma tokuso a á gwe fika Gadu. Baka dati Saatan puubei wan taa sani fu meke Yopu lasi-ati. A meke den dii mati fu Yopu kon luku en. Den man ya be de omen dei anga Yopu, ma nawan fu den be e gi en taanga-sikin. Pe fu den gi en taanga-sikin, a kuutu den be e kuutu en. Den taigi en taki a Gadu be e meke ogii miti en. Den taki Gadu á be e booko en ede anga a fasi fa a be e libi. Den taki Yopu a be wan ogii-ati man, neen meke ogii be e miti en.​—Yopu 1:13-22; 2:7-11; 15:4, 5; 22:3-6; 25:4-6.

9. San Yopu á du winsi san be e miti en?

⁹ San Yopu du di ala den sani ya miti en? Yopu be abi sondu. Neen meke di en ati boon, a taki sani sondee a denki. A fasi fa a be taki a leti enke a be bun moo Gadu (Yopu 6:3; 13:4, 5; 32:2; 34:5). Tokuso Yopu á gwe fika Yehofa di sani be kon moo taanga gi en. A á be e biibi den lei sani di den falisi mati fi en be e taigi en. A be taki: „Noiti mi o taki wi a sama di e libi a wan letifasi. Mi o tan dini Gadu fu te mi boo koti!” (Yopu 27:5) A sani di Yopu taki be e soi taki a be o dini Yehofa winsi san be e miti en. Yopu holidoo, u sa du aseefi sani ya tu.

10. Saide a sani di Saatan taki fu Yopu e teli gi wi aini a ten ya tu?

¹⁰ Saide u sa taki a sani di Saatan be taki fu Yopu e teli gi wi aini a ten ya tu? Fu taki en kiin, Saatan taki yu á lobi Yehofa Gadu anga i hii ati. A taki te tesi miti i, yu o gwe fika Gadu fu di i wani tan a libi (Yopu 2:4, 5; Openb. 12:10). Fa den sani di Saatan taki e meke i fii? A nai hati i noh? Ma pakisei a sani ya: Yehofa e fitoow yu te neen a gi yu a okasi fu soi taki Saatan e lei. Yehofa gi pasi fu Saatan tesi yu. Yehofa sabi taki i poi holidoo fu soi taki Saatan a wan leiman. A paamisi taki a o yeepi i fu holidoo (Heb. 13:6). A wan gaandi yu abi fu sabi taki a Moo Heiwan fu hii goontapu e fitoow i. I si saide a de fanowdu fu holidoo? Te wi e holidoo, wi e soi taki Saatan a wan leiman. Wi e santa a nen fu Yehofa tu. Wi e soi tu taki neen u wani enke u tiiman. San o yeepi u fu wi á gwe fika Yehofa?

11. San u sa leli fu Yopu?

¹¹ Saatan e moo tesi wi aini den „lasiti dei” ya (2 Tim. 3:1). Fa u sa meke moiti fu wi á gwe fika Yehofa aini den taanga ten ya? U sa leli omen sani fu Yopu. Omen ten a fesi fosi Saatan tesi en, a be soi taki a be lobi Yehofa anga en hii ati. Wi o luku dii sani di u sa leli fu a fasi fa a holidoo, anga fa u sa waka neen baka.

12. (a) Enke fa Yopu 26:7, 8, 14 e soi, da san be yeepi Yopu fu abi lesipeki gi Yehofa? (b) San o yeepi u fu abi lesipeki gi Yehofa?

¹² A lesipeki di Yopu be abi gi Yehofa, yeepi en fu a kon moo lobi en. Yopu be e teke ten pakisei den sani di  Yehofa meke. (Leisi Yopu 26:7, 8, 14.) A be e foondoo te a be e luku goontapu, den woluku, anga te a be e yee fa dondoo e bali. Toku a be e fusutan taki a á sabi ala den sani di Gadu meke. A be e lesipeki Yehofa tu. Yopu taki: „Mi du moo enke san a wani mi du” (Yopu 23:12). Den sani di Yehofa du be e foondoo Yopu, neen meke a be e lesipeki en. A be lobi en Dda, a be wani a piisii tu. A sani ya gi Yopu taanga-sikin fu du ala san a man fu a á gwe fika Yehofa. Na aseefi sani di Yopu du useefi mu du tu. U sabi moo fu den moin sani di Gadu meke moo den sama fu a ten fu Yopu. Wi abi a Beibel tu di e yeepi u fu sabi Yehofa moo bun. Ala den sani di wi e leli o yeepi u fu wi abi moo lesipeki gi Gadu. A lesipeki di wi o abi gi Yehofa o yeepi u fu lobi en anga fu aliki en. A o yeepi u tu fu holidoo.​—Yopu 28:28.

13-14. (a) Enke fa Yopu 31:1 e soi, da fa Yopu soi taki a be e aliki Yehofa? (b) Fa u sa waka a Yopu baka?

¹³ Yopu be gwenti aliki Yehofa neen meke a be poi holidoo. Yopu be sabi taki efu a be wani holidoo, a be mu e aliki Yehofa. Ala sani di wi e du fu aliki Yehofa e yeepi u fu holidoo. Yopu meke moiti fu aliki Gadu ala dei. A be e luku bun fa a be e tyai enseefi anga wan uman di á be de en toowpaa. (Leisi Yopu 31:1.) A be sabi taki a wan fowtu sani fu luku wan taa uman anga a fii fu didon anga en. A ten di wi e libi ya lai sani di sa meke u pakisei efuso du sani di á fiti. Wi o meke moiti enke Yopu fu wi á luku wan sama di á de u toowpaa anga takuu pakisei? Wi o meke moiti fu wi á luku sekisi buku efuso felon? (Mat. 5:28) Efu wi e meke moiti fu dwengi useefi ala yuu, a sani de o yeepi u fu wi á gwe fika Yehofa.

 ¹⁴ Yopu soi anga a fasi fa a be e si gudu, taki a be e aliki Yehofa. A be fusutan taki efu a be e si den gudu fi en enke a moo pelensipali sani, a wan sondu a be o du (Yopu 31:24, 25, 28). Wi e libi aini wan ten pe sama e si gudu enke wan fu den moo pelensipali sani. Efu wi e wooko anga den leli fu Beibel di e soi fa u mu si gudu anga moni, a sani de o yeepi u fu wi á gwe fika Yehofa.​—Odo 30:8, 9; Mat. 6:19-21.

15. (a) San Yopu be sabi meke a be poi holidoo? (b) Saide wi á mu feegete san Yehofa paamisi wi?

¹⁵ Yopu be e holidoo fu di a be sabi taki Gadu o belesi en. A be sabi taki di a be o holidoo a be o meke Gadu piisii (Yopu 31:6). Winsi fa tesi miti Yopu toku a be sabi taki Yehofa be o belesi en. Fu di a be sabi a sani ya meke a be poi holidoo. Yehofa piisii di Yopu á gwe fika en, neen meke a belesi en winsi fa a be abi sondu (Yopu 42:12-17; Yak. 5:11). Yehofa o moo belesi en aini a ten di e kon. Yu e biibi taki Yehofa o belesi i efi yu á gwe fika en? A Gadu fu wi á kengi (Male. 3:6). Efu wi e holi a pakisei taki ai bigi gi en te wi e holidoo, u ná a o lasi a howpu di wi abi taki a o belesi wi aini a ten di e kon.​—1 Tes. 5:8, 9.

16. San u mu de kabakaba fu du?

¹⁶ Meke moiti fi yu á gwe fika Yehofa! Son leisi yu o fii enke nawan sama nai meke moiti fu du san Yehofa wani, ma i mu holi a pakisei taki a ná i wawan de. A omen miliyun baala anga sisa de a hii goontapu di e meke moiti fu holidoo tu. Efi i holidoo, yu o de aini a kulu fu den somen sama fu fositen di tan dini Yehofa winsi fa sama be wani kii den fu den biibi ede (Heb. 11:36-38; 12:1). Meke ala u meke moiti fu holidoo enke Yopu di be taki: „Mi o tan dini Gadu”! Wi e gi Yehofa gaandi te u nai gwe fika en!