1. Paano nangin matutom kay Jehova ang tatlo niya ka Saksi nga ginlaragway sa sini nga parapo?

IMADYINA ining tatlo ka sitwasyon nga natabo sa mga Saksi ni Jehova. (1) Isa ka adlaw sa klase sang isa ka pamatan-on nga babayi, ginsilingan sang maestra ang tanan nga estudyante nga dapat sila mag-entra sa isa ka selebrasyon. Bangod nabal-an sang pamatan-on nga wala nahamuot ang Dios sa sini nga selebrasyon, matinahuron sia nga nagsiling nga indi sia mag-entra. (2) Nagabantala ang isa ka mahuluy-on nga pamatan-on nga lalaki. Nabal-an niya nga sa masunod nga balay nga iya kadtuan, diri nagaistar ang kaeskwela niya nga nagyaguta anay sa mga Saksi ni Jehova. Pero ginkadtuan niya gihapon ini nga balay kag nanuktok. (3) Ang isa ka amay nagatrabaho para amanan ang iya pamilya. Isa ka adlaw, gusto sang iya boss nga mangdaya sia ukon maghimo sang ilegal. Nabal-an niya nga puede sia pahalinon sa trabaho kon indi sia magsunod sa iya boss, pero ginpaathag niya nga dapat sia mangin bunayag kag dapat niya tumanon ang kasuguan bangod amo ini ang ginsugo sang Dios sa iya mga alagad.—Roma 13:1-4; Heb. 13:18.

2. Ano nga mga pamangkot ang binagbinagon naton, kag ngaa?

² Ano nga kinaiya ang ginpakita sining tatlo ka Saksi? Mahimo nga natalupangdan mo ang ila kaisog kag pagkabunayag. Pero ginpakita nila ang isa ka importante gid nga kinaiya, nga amo ang integridad. Nangin matutom sila kay Jehova. Indi nila gusto lapason ang mga talaksan sang Dios. Amo sini ang ila ginhimo bangod sang ila integridad, kag nalipay gid si Jehova sa ila. Gusto man naton nga malipay ang aton Amay sa langit. Gani binagbinagon naton ini nga mga pamangkot: Ano ang integridad? Ngaa kinahanglan naton ang integridad? Kag paano kita mangin  malig-on pa gid sa aton integridad bisan pa mabudlay ang aton kahimtangan?

3. (a) Paano mapakita sang mga alagad sang Dios ang integridad? (b) Ano nga mga halimbawa ang makabulig sa aton nga mahangpan ang kahulugan sang integridad?

³ Paano mapakita sang mga alagad sang Dios ang integridad? Mapakita nila ini paagi sa ila bug-os tagipusuon nga gugma kag debosyon kay Jehova, amo nga pirme nila ginauna ang iya kabubut-on kon nagadesisyon sila. Binagbinagon naton kon paano gingamit ang tinaga nga “integridad” sa Biblia. Nagakahulugan ini sing kompleto, wala sing diperensia, ukon bug-os. Halimbawa, naghalad kay Jehova ang mga Israelinhon sang mga sapat, kag dapat wala ini sing diperensia suno sa Kasuguan. * (Lev. 22:21, 22) Indi dapat maghalad ang katawhan sang Dios sang sapat nga kulang sang tiil, dulunggan, ukon mata, ukon sang sapat nga masakiton. Importante kay Jehova nga ang sapat kompleto ukon wala sing diperensia. (Mal. 1:6-9) Mahangpan naton kon ngaa amo sini ang pagtamod ni Jehova. Kon magbakal gani kita sang isa ka prutas, libro, ukon gamit, indi naton gusto nga may buhin ini ukon may parte ini nga kulang. Gusto naton nga kompleto ini ukon wala sing diperensia. Gusto man ni Jehova nga bug-os ang aton gugma kag katutom sa iya.

4. (a) Ngaa puede makapakita sing integridad ang indi perpekto nga tawo? (b) Suno sa Salmo 103:12-14, ano ang ginapaabot ni Jehova sa aton?

⁴ Dapat bala nga perpekto gid kita para mapakita naton ang integridad? Mahimo nga nagabatyag kita nga madamo kita sing sala kag diperensia. Binagbinaga ang duha ka rason nga puede kita makapakita sing integridad bisan pa indi kita perpekto. Una, wala nagapokus si Jehova sa aton mga sala. Ang iya Pulong nagasiling: “Kon mga sala lang ang ginatan-aw mo, O Jah, O Jehova, sin-o bala ang makatindog sa atubangan mo?” (Sal. 130:3) Kabalo sia nga makasasala kita kag indi perpekto, kag handa sia magpatawad. (Sal. 86:5) Ikaduha, kabalo si Jehova nga may mga limitasyon kita, kag wala niya ginapaabot nga himuon naton ang indi naton masarangan. (Basaha ang Salmo 103:12-14.) Gani paano kita mangin bug-os kag wala sing diperensia sa iya?

5. Ngaa kinahanglan sang mga alagad ni Jehova ang gugma para mapakita ang integridad?

⁵ Mapakita sang mga alagad ni Jehova ang integridad paagi sa ila gugma. Dapat bug-os gid ang aton gugma sa Dios kag ang aton debosyon sa aton Amay sa langit. May integridad kita kon bug-os ang aton gugma bisan pa ginatilawan kita. (1 Cron. 28:9; Mat. 22:37) Binagbinagon naton liwat ang tatlo ka Saksi nga ginsambit sa umpisa. Ngaa amo sini ang ila ginhimo? Gusto bala sang pamatan-on nga babayi nga masubuan sia sa eskwelahan, ukon gusto bala sang pamatan-on nga lalaki nga pakahuy-an sia sang iya bantalaan, ukon gusto bala sang amay nga madulaan sia sang trabaho? Indi gid. Pero nabal-an nila ang matarong nga mga talaksan ni Jehova kag gusto gid nila nga pahamut-an ang ila Amay sa langit. Bangod sang ila gugma sa iya, gin-una nila sia sang nagdesisyon sila. Paagi sa sini, ginpakita nila nga may integridad sila.

6. (a) Ngaa kinahanglan naton ang integridad? (b) Ngaa wala mapakita nanday Adan kag Eva ang integridad?

⁶ Ngaa kinahanglan naton tanan ang integridad? Kinahanglan naton ang integridad bangod ginkuestyon ni Satanas si Jehova, kag  ginkuestyon niya kita. Sang una sa hardin sang Eden, ginhimo sining rebelde nga anghel ang iya kaugalingon nga Satanas, ukon “Manugpamatok.” Ginpasipalahan niya si Jehova paagi sa pagpahangop nga ang Dios isa kuno ka Manuggahom nga malain, nagapensar lang sang iya kaugalingon, kag nagabutig. Makapasubo kay nagdampig sanday Adan kag Eva kay Satanas paagi sa pagrebelde kay Jehova. (Gen. 3:1-6) Madamo kuntani sila sing kahigayunan didto sa Eden para mapabakod ang ila gugma kay Jehova. Pero indi bug-os ang ila gugma sang tion nga ginkuestyon ni Satanas ang Dios. Sang ulihi, dapat man masabat ini nga pamangkot: Mangin matutom ayhan ang mga tawo kay Jehova nga Dios bangod sang ila gugma sa iya? Buot silingon, makapakita ayhan sang integridad ang mga tawo? Nangin maathag ini nga pamangkot sa natabo kay Job.

7. Suno sa Job 1:8-11, paano gintamod ni Jehova kag ni Satanas ang integridad ni Job?

⁷ Nagkabuhi si Job sang panahon nga ara sa Egipto ang mga Israelinhon, kag wala sing tawo sadto nga may integridad pareho sa iya. Indi sia perpekto pareho sa aton, kay may mga sala man sia. Pero palangga ni Jehova si Job bangod may integridad sia. Antes pa sini, mahimo nga ginayaguta na ni Satanas si Jehova parte sa integridad sang mga tawo. Gani ginpatalupangod ni Jehova kay Satanas si Job. Ginpakita ni Job paagi sa iya pagkabuhi nga butigon si Satanas! Nag-insister si Satanas nga testingan niya kon matuod nga may integridad si Job. May salig si Jehova kay Job nga iya abyan, gani gintugutan Niya si Satanas.—Basaha ang Job 1:8-11.

8. Ano ang ginhimo ni Satanas kay Job?

⁸ Mapintas si Satanas, kag manugpatay sia.  Ginpanguha niya ang tanan nga ginapanag-iyahan ni Job, ginpatay ang iya mga alagad, kag ginguba ang iya reputasyon. Ginpatay man niya ang napulo ka pinalangga nga mga anak ni Job. Dayon ginpamasakit niya si Job sing mga hubag nga nagtubo halin sa iya dapadapa asta sa iya alimpudwan. Grabe gid ang kasubo sang asawa ni Job amo nga ginsilingan niya si Job nga pakamalauton ang Dios kag mapatay. Daw gusto naman ni Job nga mapatay, pero nangin malig-on sia sa iya integridad. Dayon, lain naman ang ginhimo ni Satanas. Gingamit niya ang tatlo ka abyan ni Job. Ginkadtuan sini nga mga lalaki si Job kag nagtener sing pila ka adlaw, pero wala gid nila sia mapalig-on. Sa baylo, wala sila sing kaluoy nga nagpakalain sa iya. Ginsiling nila nga ang Dios ang nagapaantos sa iya kag indi importante sa Dios kon may integridad sia. Ginsiling pa gani nila nga malain si Job kag dapat gid sia mag-antos!—Job 1:13-22; 2:7-11; 15:4, 5; 22:3-6; 25:4-6.

9. Ano ang wala ginhimo ni Job bisan pa mabudlay na gid ang iya kahimtangan?

⁹ Paano gin-atubang ni Job ining tanan nga kabudlayan? Indi sia perpekto. Naakig sia sa iya indi matuod nga mga abyan kag nakahambal sia sa ila sang mga tinaga nga sang ulihi gin-aku niya nga wala niya nahunahuna sing maayo. Ginpakamatarong niya ang iya kaugalingon sa baylo nga ang Dios. (Job 6:3; 13:4, 5; 32:2; 34:5) Pero bisan pa mabudlay na gid ang iya kahimtangan, wala gid niya ginsikway si Jehova nga Dios. Wala gid sia magpati sa kabutigan nga ginsiling sang iya indi matuod nga mga abyan. Nagsiling sia: “Indi ko gid masiling nga matarong kamo! Tubtob mapatay ako, indi ko pag-isikway ang akon integridad!” (Job 27:5) Ginapakita sini nga determinado gid si Job nga mangin malig-on sa iya integridad bisan ano pa ang matabo. Mahimo man naton ini.

10. Ngaa nalakip ka sa ginkuestyon ni Satanas?

¹⁰ Ginkuestyon man ni Satanas ang kada isa sa aton. Ngaa nalakip ka sa sini? Daw pareho lang nga nagasiling sia nga indi mo palangga si Jehova nga Dios, indi ka na kuno magaalagad sa iya kon mabutang sa ital-ital ang imo kabuhi, kag indi ka mangin malig-on sa imo integridad! (Job 2:4, 5; Bug. 12:10) Ano ang batyagon mo sa sini? Siempre, masakitan ka gid. Pero pamensara ini: Gintugutan ni Jehova si Satanas nga testingan ang imo integridad. May salig sia sa imo amo nga ginhatagan ka niya sing kahigayunan nga ipakita ang imo integridad kag pamatud-an nga butigon si Satanas. Nagasalig si Jehova nga mangin malig-on ka sa imo integridad, kag nagpromisa sia nga buligan ka niya. (Heb. 13:6) Nalipay gid kita nga may salig sa aton ang Soberano sang uniberso! Gani importante gid ang integridad. Paagi sa sini, mapamatud-an naton nga butigon si Satanas, kag mapadunggan naton ang aton Amay kag masuportahan ang iya paggahom. Ano ang himuon naton para mangin malig-on kita sa aton integridad?

11. Ano ang matun-an naton kay Job?

¹¹ Sa sining magamo nga “katapusan nga mga adlaw,” labi pa gid nga ginahingabot ni Satanas ang mga alagad sang Dios. (2 Tim. 3:1) Paano kita mangin malig-on sa aton integridad? Madamo kita sing matun-an kay Job. Antes pa sia gintilawan, madamo na nga beses nga nangin malig-on sia sa iya integridad. Binagbinaga ang tatlo ka leksion nga matun-an naton sa iya.

12. (a) Suno sa Job 26:7, 8, 14, ano ang ginhimo ni Job nga nagpalig-on sa iya nga dayawon kag tahuron si Jehova? (b) Ano ang himuon naton para mapalig-on kita nga dayawon ang Dios?

¹² Bangod nagdayaw si Job sa tanan nga ginhimo ni Jehova, nagbakod ang iya gugma sa Dios. Ginapamalandungan pirme ni Job  ang dalayawon nga mga tinuga ni Jehova. (Basaha ang Job 26:7, 8, 14.) Nagdayaw gid sia sang ginpamensaran niya ang parte sa duta, langit, mga panganod, kag daguob, pero nahangpan niya nga diutay lang ang nabal-an niya sa tanan nga gintuga ni Jehova. Ginpabaloran man niya ang mga ginsiling ni Jehova. “Ginapakabahandi ko ang iya ginahambal,” siling ni Job. (Job 23:12) Gindayaw kag gintahod gid ni Job si Jehova. Palangga niya ang iya Amay kag gusto niya nga malipay sia. Gani determinado si Job nga mangin malig-on sa iya integridad. Dapat man naton himuon ang ginhimo ni Job. Mas madamo na ang nabal-an naton sangsa mga tawo sang panahon ni Job parte sa dalayawon nga mga tinuga sang Dios. Kag kompleto na ang Biblia para mabuligan kita nga makilala gid si Jehova. Ang tanan naton nga matun-an magapalig-on sa aton nga dayawon kag tahuron si Jehova. Bangod sini, mapalig-on kita nga palanggaon kag tumanon sia kag mangin malig-on sa aton integridad.—Job 28:28.

13-14. (a) Suno sa Job 31:1, paano ginpakita ni Job nga matinumanon sia? (b) Paano naton mailog si Job?

¹³ Nangin malig-on si Job sa iya integridad bangod sang iya pagtuman. Kabalo si Job nga may integridad sia kon ginatuman niya si Jehova. Ang matuod, sa kada tion nga nagatuman kita sa Dios, mas determinado pa gid kita nga mangin malig-on sa aton integridad. Ginpanikasugan ni Job nga tumanon ang Dios kada adlaw. Halimbawa, naghalong gid sia sa iya ginahimo kon kaupod niya ang iban nga babayi. (Basaha ang Job 31:1.) Bangod may asawa sia, kabalo sia nga sala nga magpakita sing indi nagakaigo nga atension sa iban nga babayi. Subong, lapnag sa kalibutan ang pagsulay nga maghimo sing imoral. Pareho kay Job, likawan man bala naton nga magpakita sing indi nagakaigo nga atension sa indi naton bana ukon asawa? Indi man bala kita magtulok sa bisan ano nga bastos ukon pornograpiko nga larawan? (Mat. 5:28) Kon ginapunggan naton ang aton kaugalingon kada  adlaw para malikawan ini, mangin malig-on kita sa aton integridad.

¹⁴ Gintuman man ni Job si Jehova kon paano tamdon ang materyal nga mga butang. Nahangpan ni Job nga kon magsalig sia sa iya mga pagkabutang, isa ini ka sala kag dapat sia silutan. (Job 31:24, 25, 28) Subong, lapnag na gid ang materyalismo. Kon husto ang pagtamod naton sa kuarta kag pagkabutang, nga ginalaygay sa aton sang Biblia, mangin malig-on pa gid kita sa aton integridad.—Hulu. 30:8, 9; Mat. 6:19-21.

15. (a) Ano ang ginlauman ni Job nga nakabulig sa iya nga mangin malig-on sa iya integridad? (b) Ngaa makabulig sa aton kon dumdumon naton pirme ang paglaum nga ginhatag ni Jehova sa aton?

¹⁵ Nangin malig-on si Job sa iya integridad bangod naglaum sia nga padyaan sia sang Dios. Nagapati sia nga importante sa Dios ang iya integridad. (Job 31:6) Bisan pa nag-antos si Job, nagsalig sia nga padyaan sia ni Jehova sa ulihi. Nagbulig gid ini sa iya nga mangin malig-on sa iya integridad. Nalipay gid si Jehova sa integridad ni Job amo nga ginpadyaan Niya si Job bisan indi pa sia perpekto! (Job 42:12-17; Sant. 5:11) Kag mas madamo pa nga padya ang mabaton ni Job sa ulihi. Nagalaum ka gid bala nga padyaan ka ni Jehova bangod sang imo integridad? Wala nagbag-o ang aton Dios. (Mal. 3:6) Kon dumdumon naton nga ginapabaloran niya ang aton integridad, pirme mangin maathag sa aton hunahuna ang ginalauman naton nga matahom nga palaabuton.—1 Tes. 5:8, 9.

16. Ano ang dapat naton panikasugan?

¹⁶ Gani panikasugi nga mangin malig-on sa imo integridad! Kon kaisa, mahimo magbatyag ka nga daw nagaisahanon ka sa paghimo sini, pero indi gid ini matabo. Kaupod mo ang minilyon nga matutom sa bilog nga kalibutan nga nangin malig-on sa ila integridad. Mangin kaupod mo man ang mga lalaki kag babayi nga nangin malig-on sa ila integridad sang una, bisan pa nabutang sa katalagman ang ila kabuhi. (Heb. 11:36-38; 12:1) Kabay pa nga mangin determinado man kita pareho kay Job nga nagsiling: “Indi ko pag-isikway ang akon integridad!” Kag kabay pa nga mahimaya naton si Jehova paagi sa aton integridad sa wala sing katapusan!