1. Edena dala ai Witnes taudia toi be Iehova idia badinaia?

IEHOVA ENA WITNES TAUDIA toi dekenai ia vara gauna mani ita laloa. (1) Kekeni matamata ta be sikuli ai tisa ese ia hadibaia tanobada ena moale karana ta lalonai ia vareai totona. Unai kekeni ia diba unai moale karana be Dirava ese ia moalelaia lasi, unai dainai mai hemataurai ida unai ia dadaraia. (2) Hemarai momo merona ta be haroro gaukara ia karaia. Ia diba do ia lao henia rumana ai sikuli turana ta ia noho​—ia be guna Iehova ena Witnes taudia ia kirikirilaia. To unai hemarai merona be ia gari lasi iduara dekenai ia pidipidi totona. (3) Tau ta be ena ruma bese naria totona moni gaukara ia karaia, bona dina ta iena bosi ese ia hamaoroa koikoi dalana ta ia badinaia totona. Ena be ia diba ena moni gaukara amo ia do idia hadokoa, to unai tau be Dirava ena kara maoromaoro taravatudia ia badinaia bona hereva momokani be ena bosi dekenai ia gwauraia.​—Roma 13:1-4; Heb. 13:18.

2. Edena henanadai do ita herevalaia, bona dahaka dainai?

² Unai Witnes taudia toi ese edena kara idia hahedinaraia? Reana oi gwau diba gari lasi karana bona hereva momokani gwauraia karana. To idia ta ta ese kara badana ta idia hahedinaraia, unai be Dirava badinaia karana. Idia toi idia ura lasi Dirava ena kara maoromaoro taravatudia idia utua. Dirava idia badinaia dainai Iehova be idia toi dekenai ia moale bada. Ita ibounai ita ura iseda guba Tamana ita hamoalea. Unai dainai inai henanadai mani ita haerelaia: Dirava badinaia karana ena anina be dahaka? Dahaka dainai ita ta ta dekenai Dirava badinaia karana be mai anina bada? Bona edena dala ai ita hahedinaraia diba inai nega dokona ai Dirava ita badinaia noho?

3. (a) Dirava badinaia karana ena anina be dahaka? (b) Edena haheitalai haida ese ita do ia durua Dirava badinaia karana ita lalopararalaia namonamo totona?

³ Iehova idia hesiai henia taudia dekenai Dirava badinaia karana ena anina be mai kudouna ibounai ida ia idia lalokau henia bona badinaia. Unai dainai iseda abia hidi ibounai lalonai iena ura ita atoa guna be namo. Baibel ai Dirava badinaia karana ena anina idia herevalaia dalana mani ita laloa. Hegeregere, Israela taudia be Iehova dekenai animal idia bouboulaia bona taravatu hegeregerena namona be animal goevadia idia henia. (Lev. 22:21, 22) Unai idia karaia totona Dirava ena taunimanima be aena, matana, bona taiana dikana animal do idia bouboulaia lasi. Iehova dekenai unai be mai anina bada, anina be animal be bero lasi, toto lasi bona ia goeva be namo. (Mal. 1:6-9) Unai dainai ita laloparara Iehova ese mai kudouna ibounai ida ia ita badinaia karana ia laloa bada. Unai hegeregerena bema frut, buka, eiava tulu ta ita hoia neganai, ita ura lasi ita hoia gauna ena kahana ta be ia dika. To ita ura ita hoia gauna be ia namo. Iehova be unai bamona ia laloa danu, ia ura mai kudouna ibounai ida ia ita lalokau henia bona badinaia.

4. (a) Dahaka dainai goevadae lasi tauna be Dirava ia badinaia diba? (b) Salamo 103:12-14 ena hereva bamona, Iehova ia ura dahaka ita karaia?

⁴ Dirava ita badinaia totona, goevadae taudia ai ita lao be namo, a? Namona be ita laloatao ita be goevadae lasi taudia bona kerere momo ita karaia. Namo lasi ita laloa Dirava ita badinaia totona goevadae taudia ai ita lao, mani badina rua ita herevalaia. Gau ginigunana be, Iehova be iseda kerere ia itaia sibona lasi. Baibel ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?” (Sal. 130:3) Dirava ia diba ita be goevadae lasi bona kara dika taudia, bona mai hebogahisi ida iseda dika ia gwauatao. (Sal. 86:5) Gau iharuana be, Iehova ia diba iseda goada be mai ena hetoana bona ita do ia doria lasi ita karaia diba lasi gauna ita karaia totona. (Salamo 103:12-14 duahia.) Iehova ena matanai edena dala ai mai kudouna ibounai ida ia ita badinaia?

5. Dahaka dainai Iehova ena hesiai taudia be ia idia badinaia totona, lalokau idia hahedinaraia be namo?

⁵ Iehova ena hesiai taudia ese ia idia badinaia totona, ia idia lalokau henia be namo. Namona be mai iseda kudouna ibounai ida iseda guba Tamana ita lalokau henia bona ita badinaia. Bema unai bamona ita karaia, herevana hahetoho ita davaria, to Dirava ita badinaia noho diba. (1 Siv. 28:9; Mat. 22:37) Paragraf ginigunana ai ita herevalaia Witnes taudia toi mani ita laloa lou. Dahaka dainai Dirava badinaia karana idia hahedinaraia? Kekeni matamatana be sikuli ai ia ura lasi moale karana ta lalonai ia vareai, a? Hemarai momo merona be haroro gaukara ai ia ura ma haida ese ia do idia hahemaraia, a? Eiava tama ta be ia ura ena moni gaukara ia haboioa, a? Lasi, to idia toi idia diba Iehova ena taravatu be maoro, bona edia lalona idia hadaia vadaeni edia guba Tamana idia hamoalea totona. Iehova idia lalokau henia dainai abia hidi maorodia idia karaia. Edia kara amo idia hahedinaraia Dirava idia badinaia.

6. (a) Dahaka dainai Dirava badinaia karana oi hahedinaraia be namo? (b) Dahaka dainai Adamu bona Heva be Dirava idia badinaia lasi?

⁶ Dahaka dainai ita ibounai ese Dirava ita badinaia be namo? Badina Satani be ita ta ta bona Iehova ena lohia siahuna ia hepapahuahulaia. Eden umana ai unai gwau-edeede  aneruna be sibona Satani o “Hadikaia Tauna” ai ia halaoa. Iehova ena ladana ia hadikaia bona ia gwau Dirava be kara dika tauna, sibona ena ura ia badinaia, bona Lohia Tauna koikoina. Madi, Adamu bona Heva be Satani idia durua bona Iehova idia gwau-edeede henia. (Gen. 3:1-6) Eden umana ai idia noho neganai, unai be nega namona Iehova dekenai edia lalokau idia hahedinaraia totona. To Satani ena hepapahuahu herevana dainai Iehova totona edia lalokau karana be mai kudouna ibounai ida idia hahedinaraia lasi. Henanadai ma ta be inai: Bema ta be Iehova Dirava ia lalokau henia, ia be Dirava ia badinaia noho diba, a? Unai henanadai be Iobu ena nega dekenai ia vara.

7. Iobu 1:8-11 ena hereva bamona, edena dala ai Iobu ese Satani dekenai ia hahedinaraia ia be Iehova ia badinaia momokani?

⁷ Israela taudia be Aigupito dekenai idia noho neganai Iobu be ia mauri noho. Iena mauri ibounai lalonai ia be Dirava ia badinaia. Ita bamona ia be goevadae lasi tauna bona kerere ia karaia danu. To Iehova ese ia lalokau henia badina Iobu ese Dirava ia badinaia. Unai ese ia hahedinaraia Satani ia laloa taunimanima be Iehova do idia badinaia lasi. Unai dainai Iehova ese Satani dekenai Iobu ia herevalaia. Iobu be ena mauri dalana amo ia hahedinaraia Satani be koikoi tauna! Iehova ese Satani ia koua lasi Iobu ia tohoa totona. Iehova ia diba momokani Iobu be Ia do ia badinaia.​—Iobu 1:8-11 duahia.

8. Edena dala ai Satani ese Iobu ia hahisia?

⁸ Satani be dagedage bona ala-ala tauna. Iobu ia hahisia, iena hesiai taudia ibounai ia hamasea bona taunimanima huanai iena ladana ia hadikaia. Iena ruma bese edia mauri ia hadikaia bona natudia ibounai ten ia hamasea.  Iobu dekenai gorere dikana ia havaraia, iena tauanina ibounai dekenai iohururu ia havaraia. Iobu ena adavana be ia lalohekwarahi bada; Iobu ia hamaoroa Dirava ia gwauraia dika bona ia mase sibona. Momokani Iobu be ia hesiku bada bona ia ura do ia mase, to Dirava ia badinaia noho. Bena Satani ese Iobu hahisia dalana ma ta ia gaukaralaia. Iobu ena turadia toi ia gaukaralaia. Unai tatau be dina iboudiai Iobu idia vadivadi henia to ia idia hagoadaia lasi. To idia ese ia dekenai sisiba kereredia bona hadikaia herevadia idia gwauraia. Idia gwau Dirava ese unai dika ibounai ia havaraia bona Dirava be ia ia laloa lasi. Danu, idia gwau Iobu be kara dika ia karaia dainai unai dika ibounai be ia dekenai idia vara!​—Iobu 1:13-22; 2:7-11; 15:4, 5; 22:3-6; 25:4-6.

9. Ena be Iobu be hekwakwanai momo ia abia, to dahaka dainai Dirava ia badinaia noho?

⁹ Iobu be unai hekwakwanai lalonai dahaka ia karaia? Ia be goevadae lasi. Unai dainai mai badu ida ena tura koikoidia ia gwau henidia bona ia lalomaoromaoro lasi dainai ia hereva kava. Bona ia gwau: “Lau be kerere lasi, to Dirava ese kota maorona lau dekenai ia henia lasi.” (Iobu 6:3; 13:4, 5; 32:2; 34:5) To herevana ena hekwakwanai be ia bada momokani to ia ura lasi Iehova Dirava ia rakatania. Ia ura lasi iena koikoi turadia edia hereva ia abia dae. Ia gwau: “Lau ese egu Dirava badinaia karana do lau hahedinaraia noho ela bona lau mase!” (Iobu 27:5, NWT) Unai ese ia hahedinaraia herevana dahaka do ia vara, to Iobu be Dirava ia badinaia. Iobu be ia hesiku lasi; unai dainai ita danu be unai bamona ita karaia diba.

10. Edena dala ai Satani be ita ta ta dekenai koikoi herevana ia gwauraia?

¹⁰ Satani be ita ta ta dekenai unai bamona ia karaia noho. Edena dala ai? Satani ia gwau oi be Iehova Dirava oi lalokau henia lasi, ia do oi hesiai henia lasi bona ia do oi badinaia lasi! (Iobu 2:4, 5; Apok. 12:10) Emu hemami be edena bamona, oi lalohisihisi, a? To mani inai oi laloa: Iehova ia diba oi ese ia do oi badinaia, unai dainai Satani ia koua lasi oi ia tohoa totona. Iehova ia diba emu kara amo do oi hahedinaraia Satani be koikoi tauna. (Heb. 13:6) Siahu Ibounai Diravana be ia diba ia oi badinaia karana be hahenamo badana! Dirava badinaia karana ena namo oi itaia, a? Unai ese ita ia durua unai amo do ita hahedinaraia Satani be koikoi tauna. Bona iseda Tamana ena ladana ita abia isi bona iena lohia dalana ita durua be namo. Dahaka ita karaia diba unai amo Dirava ita badinaia noho?

11. Iobu amo dahaka ita dibaia?

¹¹ Hari “dina gabediai” Satani ese Dirava ena hesiai taudia ia hahisidia. (2 Tim. 3:1) Unai bamona negadiai, edena dala ai Dirava badinaia karana ita goadalaia diba? Iobu ena haheitalai ita tohotohoa diba. Hahetoho ia do davaria lasi neganai, ia be idaunegai Dirava ia badinaia. Dirava badinaia karadia ita goadalaia totona, Iobu ena haheitalai amo gau toi ita dibaia.

12. (a) Iobu 26:7, 8, 14 ena hereva bamona, edena dala ai Iobu be ena lalokau Dirava dekenai ia hagoadaia? (b) Bona edena dala ai mai kudouna ibounai ida Dirava ita hanamoa diba?

¹² Iobu be Iehova ese ia havaraia gaudia ia stadilaia karana amo ena lalokau Dirava dekenai ia hagoadaia. Iobu be nega ia atoa Iehova ese ia havaraia gaudia ia laloa totona. (Iobu 26:7, 8, 14 duahia.) Iobu be Dirava ese ia havaraia gaudia, tanobada, guba, ori, bona kevaru ia itaia neganai, ia hoa bada. To ia laloparara Iehova ese ia havaraia gaudia dekenai iena aonega be mai ena hetoana. Iobu ese Iehova ena kara dekenai ia hoa danu. Ia  gwau: “Dirava ena oda be nega ta lau rakatania lasi.” (Iobu 23:12) Iobu be Iehova ese ia havaraia gaudia dekenai ia hoa bada bona ia matauraia danu. Iena guba Tamana ia lalokau henia bona ia ura bada ia hamoalea. Unai dainai, Iobu be ena lalona ia hadaia Dirava ia badinaia noho totona. Namona be ita danu unai bamona ita karaia. Ita be Iobu ena nega ai idia noho taudia bamona lasi, to ita be Iehova ese ia havaraia gaudia momo ita diba vadaeni. Ita dekenai Baibel ia noho unai ese ita ia durua Iehova ita dibaia noho totona. Bona ita dibaia gaudia ese ita do idia durua Dirava ita hanamoa totona. Iehova ita hanamoa bona ita matauraia karana ese ita do ia hagoadaia ia ita lalokau henia bona ia ita badinaia noho totona.​—Iobu 28:28.

13-14. (a) Iobu 31:1 ena hereva bamona, Iobu be edena dala ai ia hahedinaraia Dirava ia badinaia? (b) Edena dala ai Iobu ena haheitalai ita tohotohoa diba?

¹³ Iobu be ena kamonai karana amo ia hahedinaraia Dirava ia badinaia hanaihanai. Iobu ia diba Dirava ia badinaia totona ena kamonai karana be mai anina bada. Momokani, iseda kamonai karana ese ita ia hagoadaia Dirava ita badinaia noho totona. Iobu ia gaukara goada dina ta ta ai Dirava ia badinaia noho. Hegeregere, hahine o kekeni ia kara henidia neganai sibona ia naria namonamo. (Iobu 31:1 duahia.) Iobu be headava tauna dainai, ia diba hahine ma ta ura henia karana be kara dikana. Hari inai negai, ita be matabodaga urana ia havaraia tanobadana lalonai ita noho. Iobu ia karaia bamona, iseda adavana lasi to hahine o tau ma ta ura henia karana ita dadaraia, a? Ponografi laulaudia o hemarai karadia idia karaia laulaudia itaia karana ita dadaraia, a? (Mat. 5:28) Bema dina iboudiai ita sibona ita biagua, Dirava badinaia karana ita hahedinaraia diba.

¹⁴ Iobu be kohu dekenai lalohadai maorona ia abia karana amo Iehova ia badinaia. Ia laloparara bema kohu ia laloa bada, unai be kara dika badana ia karaia unai. (Iobu 31:24, 25, 28) Hari inai negai ita be kohu momo laloa  bada tanobadana lalonai ita noho. Bema Baibel ese ita ia hagoadaia moni bona kohu dekenai lalohadai maorona ita abia, bona unai ese ita do ia durua Dirava badinaia karana ita goadalaia totona.​—⁠Aon. 30:8, 9; Mat. 6:19-21.

15. (a) Dahaka ese Iobu ia durua dainai Dirava ia badinaia? (b) Iehova ese ita dekenai do ia henia ahuna ita laloa bada totona, dahaka ese ita do ia durua?

¹⁵ Iobu be Dirava ese ia dekenai do ia henia ahuna ia laloa dainai Dirava ia badinaia. Ia be Dirava ia badinaia bona ia abia dae Dirava be ia ia laloa bada. (Iobu 31:6) Ena be hahetoho momo ia davaria to Iobu ia diba momokani Iehova ese ia dekenai hahenamo do ia henia. Ena abidadama goadana dainai Dirava ia badinaia. Iehova be Iobu dekenai ia moale. Herevana ia be goevadae lasi tauna, to Dirava ese ia dekenai hahenamo momo ia henia. (Iobu 42:12-17; Iam. 5:11) Vaira negai danu Iobu ese hahenamo momo do ia abia. Oi abia dae momokani Dirava oi badinaia dainai ia ese oi do ia hanamoa, a? Iseda Dirava ena kara ia idau lasi. (Mal. 3:6) Namona be ita laloatao Dirava be iseda badinaia karana ia laloa bada, unai ese ita ia durua vaira nega ena helaro ita laloa noho totona.​—1 Tes. 5:8, 9.

16. Iseda lalona ita hadaia dahaka ita karaia totona?

¹⁶ Namona be emu lalona oi hadaia Dirava oi badinaia noho totona. Nega haida oi mamia emu turadia o emu lalokau taudia be Dirava idia badinaia lasi, to oi sibona be Dirava oi badinaia noho. Oi lalomanoka lasi badina tanobada hegegemadai ai, abidadama taudia milioni momo be Dirava idia badinaia danu. Oi be idaunegai Dirava idia badinaia tatau bona hahine huanai oi noho​—⁠herevana idia diba do idia mase. (Heb. 11:36-38; 12:1) Iobu ena hereva hegeregerena ita laloa be namo, ia gwau: “Lau ese egu Dirava badinaia karana do lau hahedinaraia noho.” (NWT) Namona be ita danu Iehova ita badinaia noho ela bona hanaihanai!