1. Baka ni tiga iku Saksi-Saksi Jehovah ke dipadah ba genteran tu nunjukka diri mengkang taluk ngagai Jehovah?

UJI gambarka tiga iti utai ke nyadi ba bala menyadi Kristian kitai. (1) Bisi sekali, pengajar ngasuh semua nembiak ba kelas ngintu siti pengerami hari besai. Seiku nembiak indu ba kelas nya nemu pengerami nya enda ngelantangka ati Jehovah. Nya alai, iya enggau basa madahka diri enggai enggau ngintu pengerami nya. (2) Seiku lelaki ke biak sereta malu benung nginjil. Iya nemu seiku nembiak ke sama sekula enggau iya, ti kala ngeleseka Saksi-Saksi Jehovah, diau ba rumah ke deka alai iya nginjil. Taja pia, iya tetap mansang ngagai rumah nya lalu nginjil. (3) Seiku lelaki bebendar gawa nyediaka utai ti diguna diri sebilik. Bisi sekali, tuke ngasuh iya nipu. Iya nemu iya deka dibuai kereja enti iya enggai nitihka utai ke diasuh tuke iya. Taja pia, iya madahka kebuah iya enggai nipu lalu deka ngasika undang-undang menua laban nya utai ke diasuh Jehovah.—Rom. 13:1-4; Heb. 13:18.

2. Nama tanya ke deka dikerandauka kitai? Nama kebuah kitai patut beratika tanya nya?

² Nama kualiti ke bisi dipeda nuan ba sida tiga nya? Nuan engka beratika, sida iya berani sereta lurus. Tang siti kualiti ke pemadu nyata, iya nya taluk. Sida tiga bela taluk ngagai Jehovah sereta ngasika standard Iya. Penaluk meransang sida ngereja utai ti ngena. Jehovah tentu temegah ati ke sida. Kitai mega deka Jehovah temegah ati ke kitai. Nya alai, aram kitai berandauka tiga iti tanya tu: Nama reti taluk? Nama kebuah kitai patut taluk? Lalu baka ni chara kitai ulih ngetanka penaluk taja pan napi penanggul?

3. (a) Baka ni nembiak Jehovah ngayanka diri taluk? (b) Nama sekeda chunto ke ulih nulung kitai nemu reti leka jaku taluk?

³ Baka ni nembiak Jehovah ngayanka diri taluk? Sida ngayanka nya lebuh sida mandangka pengerindu ti teguh sereta nyembah Iya enggau pengabis ati. Nya meransang sida seruran ngereja utai ti ngelantangka ati Iya. Bup Kudus bisi madahka chara ngena leka jaku “taluk.” Dalam jaku Hebrew, leka jaku “taluk” mai reti gerai, tauka nadai penimpang. Ambika chunto, lebuh orang Israel meri pemeri ngagai Jehovah, sida patut meri jelu ke nadai penimpang. Tu bisi dipadah ba Adat Moses. (Lew. 22:21, 22) Nembiak Petara enda tau meri jelu ke nadai siti kaki, pending, mata, tauka ke sakit. Jehovah deka jelu nya gerai tauka nadai penimpang. (Mal. 1:6-9) Kitai ulih meretika kebuah Jehovah dekaka siti-siti utai nya badas. Ambika chunto, lebuh kitai meli buah, kitai enggai buah nya jai sereta bisi bekau gigit. Kitai enggai bup ke dibeli kitai lenyau lambar. Tauka kitai enggai perengka ke dibeli kitai lenyau sekeda utai. Kitai dekaka utai ti badas. Pia mega enggau Jehovah. Iya deka kitai mandangka pengerindu sereta penaluk enggau pengabis ati.

4. (a) Nama kebuah orang ke enda sempurna ulih taluk? (b) Nitihka Masmur 103:12-14, nama dikedekaka Jehovah ari kitai?

⁴ Kati kitai patut sempurna ngambika ulih ngayanka penaluk? Kitai nemu semua kitai enda sempurna lalu seruran ngereja utai ti salah. Kitai enda ibuh sempurna enti deka ngayanka penaluk. Peratika dua iti kebuah tu. Kesatu, Jehovah enda beratika penyalah kitai. Bup Kudus madahka: ‘Enti Nuan, O Jehovah nuliska dosa kami, sapa tan?’ (Mas. 130:3) Iya nemu kitai enda sempurna, lalu Iya deka ngampun kitai. (Mas. 86:5) Kedua, Jehovah nemu pengurang kitai, lalu Iya enda ngarapka kitai ngereja utai ke enda ulih digaga kitai. (Bacha Masmur 103:12-14.) Nya alai, baka ni kitai ulih ngayanka penaluk ti pengabis ati ngagai Iya?

5. Nama kebuah nembiak Jehovah begunaka pengerindu?

⁵ Ba nembiak Jehovah, utai ke meransang sida taluk iya nya pengerindu. Pengerindu enggau penaluk kitai ngagai Jehovah enda tau enda pengabis ati. Kitai nunjukka diri taluk enti kitai rinduka Jehovah enggau pengabis ati lebuh napi penguji. (1 Ban. 28:9; Mat. 22:37) Peratika baru tiga iku Saksi ke udah disebut tadi. Nama kebuah sida ngaga pemutus ke baka nya? Kati nembiak indu nya enda rindu enggau pengerami ba sekula? Kati lelaki ke nginjil nya minta diri dikeleseka? Tauka kati lelaki ke gawa nya sengaja deka dibuai kereja? Tentu enda. Sida nemu standard Jehovah nya lurus, lalu sida keran deka ngelantangka ati Iya. Laban sida rinduka Iya, sida seruran berundingka Iya sebedau ngaga siti-siti pemutus. Enggau nya sida nunjukka diri taluk.

6. (a) Nama kebuah kitai patut taluk? (b) Baka ni Adam enggau Hawa nunjukka diri enda taluk?

⁶ Nama kebuah kitai patut taluk? Laban Sitan udah ngelaban Jehovah, lalu iya mega udah ngelaban kitai. Lebuh ba Kebun Eden, melikat ti jai nya nyadi Sitan, tauka “Penyakal.” Iya nyebut utai ti bula pasal Jehovah. Iya madahka Jehovah nya jai, berundingka Diri Empu, sereta Pemerintah ti enda lurus. Sayau amat, Adam enggau Hawa nyukung Sitan lebuh seduai iya angkat ngelaban Jehovah. (P-kal. 3:1-6) Seduai iya bisi  mayuh peluang neguhka pengerindu ngagai Jehovah lebuh diau ba Kebun Eden. Tang lebuh Sitan ngelaban Jehovah, seduai iya enda agi rinduka Jehovah enggau pengabis ati. Tu mai ngagai siti tanya: Kati mensia ulih ngayanka diri taluk? Aram kitai beratika baka ni tanya tu bisi kaul enggau Jop.

7. Baka ke dipadah ba Jop 1:8-11, baka ni asai ati Jehovah lebuh meda penaluk Jop? Tang baka ni enggau asai ati Sitan?

⁷ Jop idup ba jeman lebuh orang Israel diau di menua Ejip. Nadai mensia bukai ke ngembuan penaluk baka iya. Jop mega baka kitai. Iya enda sempurna lalu ngereja utai ti salah. Tang, Jehovah rinduka iya laban iya taluk. Kenyau ari utai ke nyadi ba Kebun Eden nyentuk ngagai jeman Jop, Sitan endang udah nanyaka kebuah mensia taluk ngagai Jehovah. Nya alai Jehovah ngena Jop nunjukka sekalika jaku Sitan nya amat tauka bula. Utai ke nyadi ba Jop nunjukka jaku Sitan nya bula! Sitan deka penaluk Jop diuji. Jehovah pechaya Jop deka mengkang taluk. Nya alai, Iya nejuka Sitan nguji Jop.—Bacha Jop 1:8-11.

8. Baka ni Sitan nyerang Jop?

⁸ Sitan nya jai, lalu iya mega pemunuh. Sitan ngambi semua utai ti dikemisi Jop, munuh semua orang gaji iya, sereta ngenyaika nama iya. Sitan mega munuh sepuluh iku anak Jop. Udah nya iya ngasuh Jop kena penyakit rumbak, kenyau ari punjung pala nyentuk ngagai ujung kaki. Bini Jop balat tusah ati, lalu iya ngasuh Jop ninggalka Jehovah.  Iya mega ngasuh Jop nyumpah Jehovah, lalu mati. Indah Jop empu minta diri mati. Taja pia, iya agi mengkang taluk. Udah nya Sitan ngena siti agi chara nyerang Jop. Kena ngelemika semengat Jop, Sitan ngena tiga iku pangan Jop ke ngusung Jop beberapa hari. Sida ngutuk sereta nganu iya, lalu enda meransang iya. Sida madahka penusah ke ninggang Jop datai ari Petara, lalu sida enda ibuhka penaluk iya. Sida mega madahka Jop nya orang ti jai, lalu iya endang patut ditinggang penusah!—Jop 1:13-22; 2:7-11; 15:4, 5; 22:3-6; 25:4-6.

9. Taja pan balat tusah, nama utai ke enggai dikereja Jop?

⁹ Baka ni Jop napi semua penanggul nya? Ketegal Jop enda sempurna, iya enggau ati ti pedis ngerara tiga iku pangan iya, lalu iya ngaku diri nyebut utai enggau enda berunding. Iya mega bebendar ngumbai diri lurus agi ari Petara. (Jop 6:3; 13:4, 5; 32:2; 34:5) Taja pan balat tusah, Jop enggai ngelaban Jehovah. Iya enggai pechayaka jaku bula tiga iku pangan iya. Ku Jop: “Aku enggai sekali-kali ngumbai kita ngena. Aku deka majak [‘taluk,’ NW] nyentuk ngagai maya aku mati.” (Jop 27:5) Ari utai ke disebut Jop nya, iya nunjukka diri keran deka ngetanka penaluk iya, enda ngira nama utai ke nyadi. Jop enggai ngalahka diri. Pia mega enggau kitai.

10. Baka ni utai ke nyadi ba Jop bisi kaul enggau nuan?

¹⁰ Baka ni utai ke nyadi ba Jop bisi kaul enggau nuan? Sitan endang udah nanyaka kebuah mensia taluk ngagai Jehovah. Sitan madahka, nuan enda rinduka Jehovah enggau pengabis ati, lalu nuan deka ngetu nyembah Jehovah enti ditinggang penusah. Indah Sitan madahka, penaluk ke diayanka nuan semina pura-pura ngapa! (Jop 2:4, 5; Pem. 12:10) Baka ni asai ati nuan pasal utai tu? Tentu pedis ati. Taja pia, pikirka tu: Jehovah ngemendarka Sitan nguji penaluk nuan. Tang Jehovah arap bendar ngagai nuan. Nya alai, Iya meri nuan peluang kena nunjukka penaluk diri sereta nunjukka Sitan nya bula. Lalu Jehovah besemaya deka nulung nuan. (Heb. 13:6) Endaka kitai berasai gaga ati laban Jehovah arap bendar ngagai kitai? Ulih nuan beratika kebuah kitai patut taluk? Nya nulung kitai nyakal jaku bula Sitan, lalu nulung kitai ngetanka nama Jehovah sereta nyukung chara Iya merintah. Baka ni kitai ulih ngemansangka penaluk?

11. Nama ulih dipelajarka kitai ari teladan Jop?

¹¹ “Ba hari ti penudi” tu, Sitan balat agi nyerang nembiak Petara. (2 Tim. 3:1) Baka ni kitai ulih ngetanka penaluk ba maya ti tusah tu? Kitai ulih belajar baru ari teladan Jop. Sebedau napi penguji, Jop endang udah suah ngemansangka penaluk ngagai Jehovah. Peratika tiga iti utai ke ulih dipelajarka kitai ari Jop ngambika ulih mengkang taluk.

12. (a) Baka ke dipadah ba Jop 26:7, 8, 14, baka ni Jop ngemansangka pengerindu sereta basa ngagai Jehovah? (b) Baka ni kitai ulih ngemansangka pengerindu ke Petara?

¹² Jop neguhka pengerindu iya ngambika mengkang taluk. Jop ngena awak berundingka utai ti ditempa Jehovah. (Bacha Jop 26:7, 8, 14.) Jop balat alit ati lebuh berundingka pasal bumi, langit, remang, sereta guntur. Tang iya nemu, semina mimit aja ke ditemu iya pasal utai ti ditempa Jehovah. Jop mega balat rinduka jaku Jehovah. Iya madahka diri nyimpan jaku Jehovah dalam ati iya. (Mas. 119:11) Jop amat rindu sereta bebasaka Jehovah, lalu deka ngelantangka  ati Iya. Asil iya, Jop keran agi deka taluk ngagai Jehovah. Kitai mega patut neladan Jop. Enti dibanding enggau orang ke idup maya jeman Jop, mayuh pekara ke ditemu kitai pasal utai ti ditempa Jehovah. Lalu kitai bisi Bup Kudus kena nulung ngelala sapa Jehovah ke bendar. Semua utai ti dipelajar ngagaka ati kitai. Pengerindu sereta basa ke Jehovah meransang kitai rindu sereta ngasika Iya. Nya mega ngemansangka pengeran kitai ke deka mengkang taluk ngagai Iya.—Jop 28:28.

13-14. (a) Baka ke dipadah ba Jop 31:1, baka ni Jop nunjukka diri ngasi? (b) Baka ni kitai ulih neladan Jop?

¹³ Jop ngasika Jehovah ngambika mengkang taluk. Nya kebuah iya bebendar ngasika Petara ba pengidup. Ambika chunto, iya bejimat ngambika enda ngembuan ati ti kamah lebuh begulai enggau sida ke indu. (Bacha Jop 31:1 ari nota kaki.) * Iya udah bisi bini. Lalu iya nemu enti iya bisi asai ati ti romantik ngagai indu bukai kelimpah ari bini iya empu, nya utai ti salah. Kemayaharitu, kitai diau ba dunya ke alai mayuh orang ngereja ulah seks ti kamah. Baka Jop, kati kitai deka nyeliah ari pengingin ti salah ngagai orang ke ukai kaling pengidup kitai? Kati kitai deka nyeliah ari meda pornografi tauka gambar ke ngayanka ulah seks ti kamah? (Mat. 5:28) Ulah ti nemu nagang diri sereta ulah ke deka ngasi ulih meransang kitai mengkang taluk.

¹⁴ Jop mega nunjukka diri ngasika Jehovah lebuh iya ngembuan runding ti patut pasal reta tengkira. Jop nemu enti iya kelalu bepanggai ba reta, nya ulih ngujungka iya ngereja  penyalah ti besai. (Jop 31:24, 25, 28) Kemayaharitu, mayuh orang ba dunya angkunka reta. Bup Kudus ngasuh kitai ngembuan runding ti patut pasal duit enggau reta. Enti kitai ngasi, kitai ulih mengkang taluk.—J-lam. 30:8, 9; Mat. 6:19-21.

15. (a) Nama meransang Jop ngetanka penaluk iya? (b) Nama kebuah kitai patut seruran ingatka berekat ti deka diberi Jehovah ngagai kitai?

¹⁵ Jop belematika berekat ti deka diulih iya ngambika mengkang taluk. Iya nemu, Petara meda penaluk iya. (Jop 31:6) Taja pan napi penguji, Jop andalka Jehovah deka merekatka iya. Tu meransang iya ngetanka penaluk ngagai Jehovah. Jehovah gaga ati enggau penaluk Jop. Nya alai, taja pan Jop enda sempurna, Jehovah merekatka iya enggau belimpah-limpah! (Jop 42:12-17; Jas. 5: 11) Lalu bisi berekat ti besai agi ke deka diulih Jop jemah ila. Kati nuan pechaya Jehovah deka merekatka penaluk nuan? Petara kitai enda berubah. (Mal. 3:6) Enti kitai ingatka chara Jehovah merekatka sida ke taluk ngagai Iya, kitai deka bebendar agi ngetanka penaluk. Kitai mega andalka Jehovah deka meri kitai pengidup ti manah agi jemah ila.—1 Tes. 5:8, 9.

16. Nama utai ke deka digaga kitai enggau bebendar?

¹⁶ Kadang-kadang, nuan engka ngasaika semina nuan aja ke ngetanka penaluk. Tang kebendar iya, bisi bejuta iku bala menyadi Kristian ke tetap ati ngetanka penaluk sida di serata dunya. Kingatka mega pasal nembiak Petara jeman kelia ke sanggup mati ketegal deka ngetanka penaluk. (Heb. 11:36-38; 12:1) Nya alai, bebendar meh ngetanka penaluk nuan ngagai Jehovah! Aram meh kitai ngawakka penaluk kitai ngemuliaka Jehovah belama iya!