1. Kasano a nagtalinaed a matalek ti tallo a Saksi ni Jehova a nailadawan iti parapo?

PANUNOTEM dagitoy tallo nga eksena iti biag dagiti Saksi ni Jehova. (1) Maysa nga aldaw, adda iti eskuelaan ti maysa a balasitang idi imbaga ti titserda a makiraman ti amin nga estudiante iti maysa a selebrasion. Ammona a saan a makaay-ayo iti Dios dayta, isu a sirerespeto a nagkedked. (2) Mangaskasaba ti managbabain nga agtutubo a lalaki. Ammona nga aggigian iti sumaruno a balay ti kaeskuelaanna a nanguy-uyaw idi kadagiti Saksi ni Jehova. Ngem nagtuktok latta. (3) Nakagaggaget nga agtrabtrabaho ti maysa a lalaki tapno maipaayna ti kasapulan ti pamiliana, ngem adda illegal nga ipapaaramid ti boss-na. Nupay mabalin a mapukawna ti trabahona, inlawlawagna a masapul nga agbalin a napudno ken agtulnog iti linteg gapu ta dayta ti kayat ti Dios kadagiti adipenna.​—Roma 13:1-4; Heb. 13:18.

2. Ania dagiti saludsod nga usigentayo, ken apay?

² Ania a kualidad ti makitam kadakuada a tallo? Mabalin a madlawmo a natured ken napudnoda. Ngem adda pay napatpateg nga impakitada​—ti kinamatalekda ken Jehova. Saanda nga inkompromiso dagiti pagalagadan ti Dios. Naimpusuan nga inaramidda dayta. Sigurado nga ipagpannakkel ni Jehova ti tunggal maysa kadakuada gapu iti dayta. Kayattayo met nga ipagpannakkelnatayo ti Amatayo idiay langit. Pagsasaritaantayo ngarud dagitoy a saludsod: Ania ti kinamatalek? Apay a kasapulantayo dayta? Ken kasano a mapabilegtayo ti determinasiontayo nga agtalinaed a matalek kadagitoy narigat a tiempo?

3. (a) Kasanotayo a maipakita ti kinamatalek? (b) Ania ti mangipakita a napateg kadatayo ti banag a kompleto, nasalun-at, wenno sibubukel?

³ No para kadagiti adipen ti Dios, ti kinamatalek ket naimpusuan  nga ayat ken di madadael a debosion ken Jehova kas Persona. Isu nga iyun-unatayo ti pagayatanna iti amin a desisiontayo. Iti Biblia, ti maysa a literal a kaipapanan ti sao para iti “kinamatalek” ket kompleto, nasalun-at, wenno sibubukel. Kas pagarigan, nagidaton dagiti Israelita kadagiti animal ken ni Jehova, ket imbaga ti Linteg a masapul a nasalun-at dagita. * (Lev. 22:21, 22) Saan a maipalubos a mangidatonda iti animal a saan a kompleto ti saka, lapayag, wenno matana, ken masakit. Napateg ken Jehova a kompleto, nasalun-at, wenno sibubukel ti animal. (Mal. 1:6-9) Maawatantayo no apay a napateg ken Jehova ti kinasalun-at wenno kinakompleto. Ditay kayat a gatangen ti prutas nga adda abutna, ti libro a kurang ti panidna, wenno ti alikamen a saan a kompleto ti pasetna. Kayattayo ti banag a kompleto, nasalun-at, wenno sibubukel. Kasta met laeng ti kayat ni Jehova maipapan iti ayat ken kinamatalektayo kenkuana. Masapul a kompleto, nasalun-at, wenno sibubukel.

4. (a) Apay a kabaelan ti imperpekto a tao ti agbalin a matalek? (b) Sigun iti Salmo 103:12-14, ania ti ekspektaren kadatayo ni Jehova?

⁴ Masapul kadi a perpektotayo tapno agbalintayo a matalek? Baka mariknatayo a ditay kabaelan ti agmatalek ta nakaad-adu ti kamalitayo. Pagsasaritaantayo ti dua a rason no apay a saan koma a kasta ti panagriknatayo. Umuna, saan nga agpokus ni Jehova kadagiti kamalitayo. Ibaga kadatayo ti Saona: “No dagiti kamali laeng ti kitkitaem, O Jah, asino ngarud ti makapagtakder, O Jehova?” (Sal. 130:3) Ammona nga imperpekto ken managbasoltayo, ket sibubulos a pakawanennatayo. (Sal. 86:5) Maikadua, ammo ni Jehova dagiti limitasiontayo, ken saanna nga ekspektaren ti saantayo a maaramidan. (Basaen ti Salmo 103:12-14.) Kasano ngarud nga agbalintayo a kompleto, nasalun-at, wenno sibubukel iti imatangna?

5. Kadagiti adipen ni Jehova, kasano a ti ayat ti tulbek ti kinamatalek?

⁵ Kadagiti adipen ni Jehova, ti tulbek ti kinamatalek ket ayat. Ti ayattayo iti Dios, ti matalek a debosiontayo kenkuana kas nailangitan nga Amatayo, ket masapul nga agtalinaed a kompleto, nasalun-at, wenno sibubukel. No kasta latta ti ayattayo uray masuboktayo, ipakpakitatayo a matalektayo. (1 Cron. 28:9; Mat. 22:37) Subliantayo ti tallo a Saksi iti rugi daytoy nga artikulo. Apay a kasdiay ti inaramidda? Kayat kadi ti balasitang ti saan a naragsak iti eskuelaan? Kayat kadi ti agtutubo a lalaki ti mapabainan? Ken kayat kadi ti ama ti maawanan iti trabaho? Siempre saan. Ammoda ngamin dagiti nalinteg a pagalagadan ni Jehova, ken nakapokusda no ania ti mangparagsak iti nailangitan nga Amada. Gapu iti ayatda kenkuana, inyun-unada isuna iti desisionda. Iti kasta, impakitada a matalekda.

6. (a) Apay a masapul nga agmatalekka? (b) Apay a saan a nakapagmatalek da Adan ken Eva?

⁶ Apay a masapul nga agmatalek ti tunggal maysa kadatayo? Kinarit ngamin ni Satanas ni Jehova, ken kinaritnaka met. Idiay hardin ti Eden, pinagbalin dayta a rebelde nga anghel ti bagina a Satanas, wenno “Bumusbusor.” Rinugitanna ti nadalus a nagan ni Jehova ta pinaruarna a dakes, naagum, ken naulbod nga  Agturay. Makapaladingit ta dimmasig ken Satanas da Adan ken Eva, ket nagsukirda ken Jehova. (Gen. 3:1-6) Adu idi ti gundawayda idiay Eden a mangpabileg iti ayatda ken Jehova. Ngem idi sinubok ida ni Satanas, saan a kompleto wenno sibubukel ti ayatda. Daytoy pay ti saludsod: Adda kadi asinoman a tao nga agtalinaed a matalek ken Jehova a Dios gapu iti ayatna kenkuana? Timmaud dayta a saludsod iti kaso ni Job.

7. Kas makita iti Job 1:8-11, ania ti panagrikna ni Jehova iti kinamatalek ni Job, ken ania met ti narikna ni Satanas iti dayta?

⁷ Nagbiag ni Job idi tiempo nga adda dagiti Israelita idiay Egipto. Nagpaiduma ti kinamatalekna. Imperpekto a kas kadatayo, ket nagkamali met. Ngem ay-ayaten ni Jehova ni Job gapu ta matalek. Agparang a nabayag idin nga in-insultuen ni Satanas ni Jehova maipapan iti kinamatalek ti tao. Isu nga inturong ni Jehova ti atension ni Satanas ken Job. Makita iti biag dayta a lalaki nga ulbod ni Satanas! Imbaga ni Satanas a masapul a masubok ti kinamatalek ni Job. Nagtalek ni Jehova iti gayyemna a ni Job, ket impalubosna a suboken ni Satanas.​—Basaen ti Job 1:8-11.

8. Kasano a dinangran ni Satanas ni Job?

⁸ Naulpit ken mammapatay ni Satanas. Inibusna dagiti sanikua ken kinabaknang ni Job, pinatayna dagiti adipenna, ken pinerdina ti reputasionna iti lugarda. Insublatna ti pamilia ni Job ket pinatayna ti 10 a dungdungnguenna nga annak. Kalpasanna, pinagsakitna ni Job iti naut-ot a busali manipud ulo agingga iti dapanna. Nariribukan ken naladingitan ti asawa ni Job.  Imbagana a sumukon ni Job ken ilunodna ti Dios ket matayen. Kayat idin ni Job ti matay, ngem nagtalinaed a matalek. Isu a pinadas ni Satanas ti sabali a pamay-an. Inusarna ti tallo a lallaki a gagayyem ni Job. Bimmisitada ken Job iti sumagmamano nga aldaw. Imbes a liwliwaenda, awanan asi a sinermonan ken inungtanda. Imbagada a ti Dios ti makagapu nga agrigrigat ken awan bibiangna iti kinamatalek ni Job. Pinaruarda pay ketdi a dakes ni Job a maikari kadagiti dakes a mapaspasaranna!​—Job 1:13-22; 2:7-11; 15:4, 5; 22:3-6; 25:4-6.

9. Ania ti saan a kayat nga aramiden ni Job idi naipasango kadagiti pannubok?

⁹ Ania ti reaksion ni Job iti amin a napasaranna? Saan a perpekto ni Job. Sipupungtot a tinubngarna dagiti sinsinan a manangliwliwana, ken ti la adda a naibagbagana, kas inaminna idi agangay. Ad-adda nga indepensa ni Job ti kinalintegna imbes a ti kinalinteg ti Dios. (Job 6:3; 13:4, 5; 32:2; 34:5) Ngem uray idi marigrigatan unayen, dina tinallikudan ni Jehova a Dios. Saanna a pinati dagiti kinaulbod nga imbaga dagiti sinsinan a gagayyemna. Imbagana: “Diakto pulos maibaga a nalintegkayo a tattao! Agingga a matayak, agtalinaedak nga awan pagkuranganna [wenno, matalek]!” (Job 27:5) Nakapatpateg dayta a sasao. Saan a simmuko ni Job, ket kabaelantayo met dayta.

10. Kasano a nairamanka iti isyu a pinataud ni Satanas mainaig ken Job?

¹⁰ Kasta met laeng ti pammabasol kadatayo ni Satanas. Kasano? Kasla ibagbagana a dimo talaga nga ay-ayaten ni Jehova a Dios, nga isardengmo ti agserbi kenkuana tapno maispalmo ti bagim, ken sinsinan ti aniaman a kinamatalekmo! (Job 2:4, 5; Apoc. 12:10) Ania ti mariknam? Nasakit, saan kadi? Ngem panunotem daytoy: Agtalek kenka ni Jehova ket ik-ikkannaka iti nagsayaat a gundaway. Ipalpalubosna a suboken ni Satanas ti kinamatalekmo. Namnamaen ni Jehova nga agtalinaedka a matalek ken tumulongka a mangpaneknek nga ulbod ni Satanas. Ket inkarina a tulongannaka. (Heb. 13:6) Talaga a pribilehio ti pagtalkan ti Kangatuan iti uniberso! Makitam kadi no apay a nakapatpateg ti kinamatalek? Mapaneknekantayo nga ulbod ni Satanas, maitandudotayo ti nadalus a nagan ti Amatayo, ken masuportarantayo ti panagturayna. Kasano a mapagtalinaedtayo daytoy a nagpateg a kualidad?

11. Ania ti masursurotayo ken Job?

¹¹ Pakpakaruen ni Satanas ti iyaatakarna iti daytoy nariribuk a “maudi nga al-aldaw.” (2 Tim. 3:1) Kasano a mapabilegtayo ti determinasiontayo nga agtalinaed a matalek? Adu manen ti masursurotayo ken Job. Nabayag pay sakbay a nasubok, namin-adun nga impakitana a matalek. Pagsasaritaantayo ti tallo a masursurotayo kenkuana no kasano a mapabilegtayo ti bagitayo nga agtultuloy a matalek.

12. (a) Kas nadakamat iti Job 26:7, 8, 14, kasano a naaddaan ni Job iti panagsiddaaw ken panagraem ken Jehova? (b) Ania ti makatulong tapno pagsiddaawan ken pagraemantayo ti Dios?

¹² Bimmileg ti ayat ni Job iti Dios gapu ta nagsiddaawanna ti amin nga inaramid ni Jehova. Nangiwaya ni Job iti tiempo a mangpanunot kadagiti nakaskasdaaw a parsua ni Jehova. (Basaen ti Job 26:7, 8, 14.) Nagsiddaaw idi pinampanunotna ti daga, tangatang, ulep, ken gurruod, ngem binigbigna a nakabasbassit ti ammona iti nakalawlawa a sangaparsuaan. Impategna  met ti sasao ni Jehova. Kinunana: “Ipatpategko dagiti saona.” (Job 23:12) Gapu iti panagsiddaaw ken panagraem ni Job ken ni Jehova, natignay a mangayat ken mangparagsak kenkuana. Iti kasta, bimmileg ti determinasion ni Job nga agtalinaed a matalek. Masapul a tuladentayo ni Job. Ad-adun ti ammotayo maipapan iti sangaparsuaan ngem kadagiti tattao idi tiempo ni Job. Ken adda kadatayo ti intero a Biblia a tumulong iti panangammotayo no asino a talaga ni Jehova. Amin a masursurotayo ket makatulong tapno pagsiddaawan ken pagraemantayo ni Jehova. Dayta ti pakatignayantayo a mangayat ken agtulnog kenkuana ken mangpabileg iti determinasiontayo nga agtalinaed a matalek.​—Job 28:28.

13-14. (a) Kas naibaga iti Job 31:1, kasano a pinaneknekan ni Job a natulnog? (b) Kasanotayo a matulad ni Job?

¹³ Bimmileg ti determinasion ni Job nga agmatalek gapu ta nagtulnog iti amin a banag. Ammo ni Job a kasapulanna ti kinatulnog tapno makapagmatalek. Kinapudnona, tunggal agtulnogtayo bumileg ti determinasiontayo nga agmatalek. Inkagumaan ni Job ti agtulnog iti Dios iti inaldaw. Kas pagarigan, naannad ti pannakilangenna kadagiti babbai. (Basaen ti Job 31:1.) Kas naasawaan, ammona a di umiso ti mangipakita iti romantiko nga atension iti asinoman a babai malaksid iti asawana. Agbibiagtayo ita iti lubong a nasaknap ti immoralidad. Kas ken Job, ikagkagumaantay kadi ti saan a mangipakita iti di umiso nga atension iti asinoman a ditay asawa? Likliklikantayo met kadi ti kumita iti aniaman a kita ti makagargari wenno pornograpiko a ladawan? (Mat. 5:28) No ikagumaantayo ti agteppel iti inaldaw, mapabilegtayto ti determinasiontayo nga agmatalek.

¹⁴ Nagtulnog met ni Job ken ni Jehova maipapan iti panangmatmatna iti material a bambanag. Ammona a no agtalek kadagiti  sanikuana, makaaramid iti nadagsen a basol a maikari iti dusa. (Job 31:24, 25, 28) Agbibiagtayo ita iti materialistiko a lubong. No balanse ti panangmatmattayo iti kuarta ken sanikua, kas ibalbalakad ti Biblia nga aramidentayo, bumileg ti determinasiontayo nga agmatalek.​—Prov. 30:8, 9; Mat. 6:19-21.

15. (a) Ania a namnama ti nakatulong ken Job nga agmatalek? (b) Ania ti mabalin a makatulong tapno agtalinaed iti panunottayo ti namnama manipud ken Jehova?

¹⁵ Nakapagtalinaed a matalek ni Job gapu ta nangnamnama a gunggonaanto ti Dios. Patienna a napateg iti Dios ti kinamatalekna. (Job 31:6) Uray no naipasango ni Job kadagiti pannubok, nagtalek a gunggonaanto met laeng ni Jehova. Sigurado a dayta ti nakatulong kenkuana nga agmatalek. Naragsakan unay ni Jehova iti kinamatalek ni Job ket sibabaknang a ginunggonaanna uray imperpekto pay! (Job 42:12-17; Sant. 5:11) Ken dakdakkel pay dagiti gunggona nga agur-uray ken Job. Nabileg kadi ti namnamam a gunggonaan ni Jehova ti kinamatalekmo? Saan nga agbalbaliw ti Diostayo. (Mal. 3:6) No laglagipentayo a napateg kenkuana ti kinamatalektayo, mapagtalinaedtayo a sibibiag iti pusotayo ti nagsayaat a namnamatayo iti masanguanan.​—1 Tes. 5:8, 9.

16. Ania koma ti determinasiontayo?

¹⁶ Determinadoka koma ngarud nga agtalinaed a matalek! No dadduma, baka mariknam a siksika laeng ti mangar-aramid iti dayta, ngem saanka nga agmaymaysa. Kaduam ti minilion a matalek iti intero a lubong. Mainayonka pay kadagiti lallaki ken babbai a nabileg ti pammatida ken nagtalinaed a matalek, uray pakatayanda. (Heb. 11:36-38; 12:1) Sapay koma ta determinadotayo amin nga agbiag a matalek kas ken Job. Ket sapay koma ta ti kinamatalektayo ti mangidaydayaw ken Jehova iti agnanayon!