1. Aw di tri Jiova Witnɛs dɛn we di paregraf tɔk bɔt kɔntinyu fɔ de biɛn Jiova?

IMAJIN dɛn tri tin dɛn ya we apin to Jiova in savant dɛn. (1) Wan yɔŋ titi de na skul wande we di ticha aks ɔl di studɛnt dɛn fɔ tek pat pan wan ɔlide sɛlibreshɔn. Di titi no se Gɔd nɔ de gladi bɔt dis kayn ɔlide, so wit rɛspɛkt i tɛl di ticha se i nɔ de jɔyn. (2) Wan yɔŋman de prich frɔm os to os. I kam fɔ no se in skulmet we bin de provok Jiova Witnɛs dɛn trade de na di nɛks os. Bɔt pan ɔl dat, dis yɔŋman go na di os ɛn nak na di domɔt. (3) Wan man de wok tranga wan fɔ kia fɔ in famili, ɛn wande in bɔsman tɛl am fɔ du sɔntin we nɔ ɔnɛs. Pan ɔl we i go lɔs in wok, di man ɛksplen se i fɔ ɔnɛs ɛn obe di lɔ we de na di Baybul bikɔs na dat Gɔd want in savant dɛn fɔ du.—Rom 13:​1-4; Ibru 13:​18.

2. Us kwɛstyɔn dɛn wi go tɔk bɔt? Wetin mek?

² Us kwaliti yu si pan dɛn ɔl tri? Yu go dɔn notis bɔku, lɛk fɔ gɛt maynd ɛn fɔ ɔnɛs. Bɔt dɛn ɔl gɛt wan kwaliti we rili impɔtant, dat na fɔ tinap tranga wan fɔ du wetin rayt. Dɛn ɔl tri sho se dɛn de biɛn Jiova. Dɛn nɔ gri fɔ du sɔntin we go pwɛl Gɔd in lɔ dɛn. Dɛn du dat fɔ tinap tranga wan fɔ du wetin rayt. Jiova go rili gladi fɔ dɛn fɔ da kwaliti de we dɛn gɛt. Wisɛf want fɔ mek wi Papa we de na ɛvin gladi. So lɛ wi tɔk bɔt dɛn kwɛstyɔn dɛn ya: Wetin i min fɔ tinap tranga wan fɔ du wetin rayt? Wetin mek wi nid fɔ tinap tranga wan fɔ du wetin rayt? Ɛn wetin wi fɔ du fɔ kɔntinyu fɔ tinap tranga wan fɔ du wetin rayt insay dis las dez?

3. (a) Wetin i min fɔ tinap tranga wan fɔ du wetin rayt? (b) Us ɛgzampul dɛn ɛp wi fɔ ɔndastand wetin i min fɔ tinap tranga wan fɔ du wetin rayt?

³ Aw Jiova in savant dɛn go tinap tranga wan fɔ du wetin  rayt? Na bay we wi lɛk Jiova wit ɔl wi at ɛn dat de mek wi du wetin de mek i gladi ɔltɛm. Tink bɔt wetin di Baybul tɔk bɔt fɔ tinap tranga wan fɔ du wetin rayt. Insay di Baybul, di Ibru wɔd fɔ “tinap tranga wan fɔ du wetin rayt,” min fɔ du ɔl wetin Gɔd want ɛn nɔ gɛt wan bɔt. Fɔ ɛgzampul, di Izrɛlayt dɛn bin de sakrifays animal dɛn to Jiova, ɛn di Lɔ we Gɔd bin gi Mozis bin se dɛn animal dɛn de nɔ fɔ gɛt wan bɔt. * (Lɛv. 22:​21, 22) Gɔd nɔ bin de alaw di pipul dɛn fɔ sakrifays animal we gɛt wan fut, wan yes, ɔ wan yay, ɛn animal we gɛt sik. Di animal dɛn nɔ fɔ gɛt wan bɔt bikɔs dat bin rili impɔtant to Jiova. (Mal. 1:​6-9) Wi kin ɔndastand wetin mek Jiova bisin bɔt fɔ du tin wit ɔl wi at ɛn we nɔ gɛt wan bɔt pan am. We wi bay sɔntin ilɛk na frut, buk, ɔ tul, wi nɔ want di wan we pwɛl. Wi want di wan we nɔ gɛt wan bɔt. Na da sem we de Jiova de fil we i kam pan di we aw wi lɛk am ɛn di we aw wi de biɛn am. I nɔ fɔ gɛt wan bɔt.

4. (a) Wetin mek pɔsin we nɔ pafɛkt go ebul fɔ tinap tranga wan ɛn du wetin rayt? (b) Frɔm wetin de na Sam 103:​12-14, wetin Jiova want wi fɔ du?

⁴ Yu tink se wi fɔ pafɛkt fɔ lɛ wi tinap tranga wan fɔ du wetin rayt? Infakt, wi de mek bɔku mistek. Tink bɔt tu rizin dɛn we mek wi nɔ fɔ tink se wi fɔ pafɛkt fɔ lɛ wi go tinap tranga wan fɔ du wetin rayt. Fɔs, Jiova nɔ de pe atɛnshɔn pan di mistek dɛn we wi de mek. In Wɔd, di Baybul tɛl wi se: “PAPA GƆD, if yu bin de kɔnt ɔl di bad we wi de du, PAPA GƆD [“Jiova,” NW], udat fit fɔ tinap bifo yu?” (Sam 130:​3) I no se wi nɔ pafɛkt, wi de sin, ɛn i de fɔgiv wi wit ɔl in at. (Sam 86:​5) Sɛkɔn, Jiova no wetin wi ebul fɔ du, ɛn i nɔ de tink se wi fɔ du pas wetin wi ebul fɔ du. (Rid Sam 103:​12-14.) So aw wi go sav Jiova wit ɔl wi at ɛn wi wɔship nɔ gɛt wan bɔt na in yay?

5. Wetin mek Jiova in savant dɛn nid fɔ gɛt lɔv so dat dɛn go tinap tranga wan fɔ du wetin rayt?

⁵ Di men tin we go mek di wan dɛn we de sav Jiova tinap tranga wan fɔ du wetin rayt na lɔv. Di lɛk we wi lɛk Gɔd ɛn we wi nɔ de kɔmɔt biɛn wi Papa we de na ɛvin nɔ fɔ gɛt wan bɔt. If wi lɔv kɔntinyu fɔ de di sem we ivin if sɔntin tɛst wi fet, dat de sho se wi de tinap tranga wan fɔ du wetin rayt. (1 Kro. 28:​9; Mat. 22:​37, NW) Tink bak bɔt di tri Jiova Witnɛs dɛn we wi bin tɔk bɔt fɔs. Wetin mek dɛn bin du tin da we de? Fɔ se di yɔŋ titi nɔ lɛk fɔ ɛnjɔy na skul, fɔ se di yɔŋman want fɔ shem, ɔ fɔ se di maredman want fɔ lɔs in wok? Nɔ, nɔto so i bi. Bifo dat, dɛn no se Jiova gɛt lɔ dɛn, ɛn dɛn pe atɛnshɔn pan wetin go mek dɛn Papa na ɛvin gladi. Bikɔs dɛn lɛk dɛn Papa we de na ɛvin, dɛn de tink bɔt am ɔltɛm bifo dɛn disayd fɔ du sɔntin. Bay da we de, dɛn de sho se dɛn de tinap tranga wan fɔ du wetin rayt.

6. (a) Wetin mek wi nid fɔ tinap tranga wan fɔ du wetin rayt? (b) Aw Adam ɛn Iv nɔ bin tinap tranga wan fɔ du wetin rayt?

⁶ Wetin mek wi ɔl nid fɔ tinap tranga wan fɔ du wetin rayt? Wi nid fɔ du dat bikɔs Setan dɔn chalenj Jiova, ɛn i dɔn chalenj wi bak. Da rebɛl enjɛl de bin dɔn mek insɛf Setan, ɔ “pɔsin we trangayes” trade na di gadin we bin de na Idɛn. I bin lay pan Jiova fɔ gi am badnem, bay we i bin se Gɔd bad, i jɔs bisin bɔt insɛf, ɛn na Rula we nɔ ɔnɛs. I sɔri fɔ no se Adam  ɛn Iv bin jɔyn Setan fɔ tɔn dɛn bak pan Jiova. (Jɛn. 3:​1-6) Di tin dɛn we dɛn bin gɛt na Idɛn bin mek dɛn gɛt bɔku rizin fɔ lɛ dɛn lɛk Jiova mɔ ɛn mɔ. Bɔt Adam ɛn Iv nɔ bin lɛk Jiova wit ɔl dɛn at di tɛm we Setan bin chalenj Gɔd. Bɔt wan kwɛstyɔn de we wi nid fɔ ansa: Yu tink se ɛni mɔtalman go kɔntinyu fɔ de biɛn Jiova Gɔd bikɔs i lɛk am? Ɔ yu tink se mɔtalman go ebul fɔ tinap tranga wan fɔ du wetin rayt? Setan bin aks da kwɛstyɔn de bɔt Job.

7. Frɔm wetin de na Job 1:​8-11, aw Jiova bin fil bɔt di we aw Job bin tinap tranga wan fɔ du wetin rayt? Aw Setan bin fil bɔt am?

⁷ Job bin de di tɛm we di Izrɛlayt dɛn bin de na Ijipt. Di tɛm we Job bin de alayf, nɔbɔdi nɔ bin tinap tranga wan fɔ du wetin rayt lɛk am. I nɔ bin pafɛkt, jɔs lɛk wi. I bin de mek mistek. Bɔt Jiova bin lɛk Job fɔ we i bin tinap tranga wan fɔ du wetin rayt. I bin tan lɛk se Setan bin dɔn tɛl Jiova se nɔbɔdi nɔ go ebul tinap tranga wan fɔ du wetin rayt. So Jiova bin tɛl Setan bɔt Job. Di we aw Job bin liv in layf bin sho se Setan na layman! Setan bin tɛl Jiova fɔ alaw am fɔ tɛst Job fɔ si if i go tinap tranga wan fɔ du wetin rayt. Jiova bin rili biliv in padi Job, ɛn I bin alaw Setan fɔ tɛst am.—Rid Job 1:​8-11.

8. Aw Setan bin atak Job?

⁸ Setan wikɛd ɛn i de kil. I bin mek Job lɔs ɔl in prɔpati dɛn, kil in savant dɛn, ɛn mek i gɛt badnem na di say we i bin de. I bin atak Job in famili, ɛn kil ɔl in tɛn pikin dɛn. Dɔn i put sik pan Job, bay we i mek bwɛl dɛn kɔmɔt frɔm in ed to in fut.  Job in wɛf in at bin rili pwɛl, so i bin tɛl Job fɔ giv ɔp, ɛn kɔs Gɔd ɛn day. Job insɛf bin wish fɔ day, bɔt pan ɔl dat i bin tinap tranga wan fɔ du wetin rayt. Dɔn Setan bin tray wan ɔda difrɛn we fɔ atak Job. I bin yuz tri man dɛn we na bin Job in padi dɛn. Dɛn man dɛn ya bin go fɛn Job fɔ sɔm dez, bɔt dɛn nɔ bin tɔk natin fɔ ɛnkɔrej am. Bifo dat, dɛn bin de fɛn fɔlt pan am ɛn tɔk bad bad tin dɛn bɔt am. Dɛn bin tɔk se na Gɔd de mek ɔl dɛn bad bad tin dɛn de apin to am, ɛn i nɔ bisin bɔt di we aw i de tinap tranga wan fɔ du wetin rayt. Dɛn bin ivin tɔk se Job na wikɛd man ɛn i fit fɔ lɛ ɔl dɛn bad bad tin dɛn de apin to am!—Job 1:​13-22; 2:​7-11; 15:​4, 5; 22:​3-6; 25:​4-6.

9. Pan ɔl we bad bad tin dɛn bin apin to Job, wetin i nɔ bin gri fɔ du?

⁹ Wetin Job bin du pan ɔl we tin nɔ bin rili izi fɔ am? Job nɔ bin pafɛkt. I bin vɛks we i de tɔk to in fek padi dɛn we se dɛn kam fɔ ɛnkɔrej am, ɛn i bin tɔk tin dɛn we i bin leta gri se nɔ mek sɛns. I bin want fɔ pruf se in de du wetin rayt bifo i pruf se na Gɔd de du wetin rayt. (Job 6:​3; 13:​4, 5; 32:​2; 34:​5) Bɔt pan ɔl we tin bin rili bad-ɔf fɔ Job, i nɔ bin stil gri fɔ tɔn in bak pan Jiova Gɔd. I nɔ bin gri fɔ biliv di lay lay tin dɛn we in fek padi dɛn bin de tɔk. Job bin tɔk se: “A nɔ de tink sɛf fɔ se una kɔrɛkt! Te a day, a nɔ go ɛva lɛf fɔ sav Gɔd!” (Job 27:​5, NW) Dɛn wɔd ya sho se Job bin dɔn mekɔp in maynd fɔ tinap tranga wan fɔ du wetin rayt, ilɛk wetin apin. Job nɔ bin gri fɔ giv ɔp ɛn wisɛf kin du di sem tin.

10. Aw yusɛf de insay di tin we Setan bin tɔk bɔt Job?

¹⁰ Setan de tɔk di sem tin bɔt ɛni wan pan wi. Aw yusɛf de insay di tin we Setan bin tɔk bɔt Job? Setan de tɔk se yu nɔ rili lɛk Jiova Gɔd, yu go stɔp fɔ sav am fɔ sev yu layf, ɛn yu nɔ go ebul fɔ tinap tranga wan fɔ du wetin rayt! (Job 2:​4, 5; Rɛv. 12:​10) Aw dat mek yu fil? I de mek yu rili fil bad, nɔto so? Bɔt tink bɔt dis: Jiova rili biliv yu ɛn na dat mek i gi yu wɔndaful chans. Jiova de alaw Setan fɔ tɛst yu fɔ sho aw yu go tinap tranga wan fɔ du wetin rayt. Jiova biliv se yu go tinap tranga wan ɛn ɛp fɔ sho se Setan na layman. Ɛn Jiova prɔmis se i go ɛp yu fɔ du dat. (Ibru 13:​6) Dis na big big ɔnɔ wi gɛt fɔ lɛ di Rula fɔ di wan ol wɔl biliv wi! Yu si wetin mek i rili impɔtant fɔ tinap tranga wan fɔ du wetin rayt? Dat de ɛp wi fɔ lɛ wi nɔ biliv Setan in lay lay tɔk dɛn ɛn sɔpɔt wi Papa in we fɔ rul ɛn tɔk bɔt in gudnem. Wetin wi go du fɔ lɛ wi go kɔntinyu fɔ tinap tranga wan fɔ du wetin rayt?

11. Wetin wi kin lan frɔm Job?

¹¹ Setan de atak Gɔd in savant dɛn mɔ ɛn mɔ insay dis “traŋa” tɛm. (2 Tim. 3:​1) Aw wi go kɔntinyu fɔ du tin dɛn we go mek wi tinap tranga wan fɔ du wetin rayt insay dis tɛm we tin nɔ rili izi? Wi kin lan bak bɔku tin frɔm Job. Bifo dis tɛm, Job bin dɔn tinap tranga wan fɔ du wetin rayt na Jiova in yay bɔku bɔku tɛm. Tink bɔt tri lɛsin dɛn we wi kin lan frɔm am bɔt aw wi go kɔntinyu fɔ tinap tranga wan fɔ du wetin rayt.

12. (a) Frɔm wetin di Baybul tɔk na Job 26:​7, 8, 14, aw Job bin lan fɔ kɔle ɛn rɛspɛkt Jiova? Aw wi go kɔle Gɔd mɔ ɛn mɔ?

¹² Job bin kɔntinyu fɔ lɛk Jiova bay we i bin gɛt rɛspɛkt fɔ Am. Job bin tek tɛm tink bɔt di wɔndaful tin dɛn we  Jiova mek. (Rid Job 26:​7, 8, 14.) Job bin rili kɔle we i tink bɔt di wɔl, di skay, di klawd, ɛn di tɛnda, bɔt i bin no se na smɔl tin nɔmɔ i no bɔt ɔl di tin dɛn we Jiova mek. I bin valyu bak di tin dɛn we Jiova tɔk. Job bin tɔk se Gɔd “in wɔd de insay mi at.” (Job 23:​12) Job bin kɔle Jiova ɛn i bin rili rɛspɛkt am. Job bin lɛk in Papa ɛn i bin want fɔ du wetin go mek I gladi. Dat bin mek Job mekɔp in maynd fɔ tinap tranga wan fɔ du wetin rayt. Wi nid fɔ du di sem tin lɛk Job. Wi no bɔku tin dɛn bɔt di wɔndaful tin dɛn we Gɔd mek pas di pipul dɛn we bin de insay Job in tɛm. Ɛn wi gɛt di wan ol Baybul we Jiova mek dɛn rayt fɔ lɛ wi sabi di kayn pɔsin we i rili bi. Ɔl di tin dɛn we wi de lan kin ɛp wi fɔ kɔle di tin dɛn we Jiova dɔn mek. We wi kɔle ɛn rɛspɛkt Jiova, dat de mek wi lɛk am, obe am, ɛn mekɔp wi maynd fɔ tinap tranga wan fɔ du wetin rayt.—Job 28:​28.

13-14. (a) Frɔm wetin de na Job 31:​1, aw Job bin sho se i de obe? (b) Aw wi go falamakata Job in ɛgzampul?

¹³ We Job bin de obe Gɔd pan ɔltin, dat bin ɛp am fɔ tinap tranga wan fɔ du wetin rayt. Job bin no se i nid fɔ obe Jiova fɔ lɛ i go tinap tranga wan fɔ du wetin rayt. Infakt, ɛnitɛm we wi obe Jiova, dat de mek wi tinap tranga wan fɔ du wetin rayt. Job bin wok tranga wan fɔ obe Gɔd pan ɛnitin we i de du na layf. Fɔ ɛgzampul, i bin tek tɛm aw i bin de biev to uman dɛn. (Rid Job 31:​1.) As maredman, i bin no se i bad fɔ gɛt filin fɔ ɛni ɔda uman we nɔto in wɛf. Tide, di wɔl fulɔp wit tin dɛn we de tɛmt wi fɔ du mami ɛn dadi biznɛs. Jɔs lɛk Job, wisɛf go avɔyd fɔ wach ɛn gɛt filin fɔ ɛnibɔdi we wi nɔ mared to? Wi go avɔyd bak fɔ wach ɛnikayn rud rud pikchɔ dɛn? (Mat. 5:​28) If wi de du ɔl wetin wi ebul fɔ kɔntrol wisɛf ɛvride, dat go mek wi tinap tranga wan fɔ du wetin rayt.

 ¹⁴ Job bin de obe Jiova bak bay di we aw i bin de si mɔni ɛn prɔpati. Job bin no se if i abop pan in prɔpati dɛn, i go kɔmit siriɔs sin ɛn dɛn fɔ pɔnish am fɔ dat. (Job 31:​24, 25, 28) Tide, wi de na wɔl usay pipul dɛn rili lɛk mɔni ɛn prɔpati. If wi lan fɔ tink di kɔrɛkt we bɔt mɔni ɛn prɔpati, jɔs lɛk aw di Baybul de tɛl wi fɔ du, dat go ɛp wi fɔ mekɔp wi maynd mɔ ɛn mɔ fɔ du wetin rayt.—Prɔv. 30:​8, 9; Mat. 6:​19-21.

15. (a) Wetin bin ɛp Job fɔ tinap tranga wan fɔ du wetin rayt? (b) Wetin mek i fayn fɔ lɛ wi kɔntinyu fɔ tink bɔt di op we Jiova dɔn gi wi?

¹⁵ Job bin tinap tranga wan fɔ du wetin rayt bay we i bin pe atɛnshɔn pan di op fɔ se Gɔd go blɛs am. I bin biliv se Gɔd bisin bɔt di we aw i bin de tinap tranga wan fɔ du wetin rayt. (Job 31:​6) Pan ɔl di prɔblɛm dɛn we bin de mit am, Job bin biliv tranga wan se Jiova go blɛs am. Dat bin rili ɛp am fɔ tinap tranga wan fɔ du wetin rayt. Jiova bin rili gladi fɔ di we aw Job bin tinap tranga wan fɔ du wetin rayt, ɛn dat bin mek i rili blɛs am pan ɔl we i nɔ bin pafɛkt! (Job 42:​12-17; Jems 5:​11) Ɛn Job go gɛt mɔ blɛsin we pas dat tumara bambay. Yu biliv gud gud wan se Jiova go blɛs yu fɔ we yu tinap tranga wan fɔ du wetin rayt? Wi Gɔd nɔ de chenj. (Mal. 3:​6) If wi mɛmba se Jiova valyu di we aw wi de tinap tranga wan fɔ du wetin rayt, wi go kɔntinyu fɔ op fɔ di wɔndaful tin dɛn we wi go gɛt tumara bambay ɛn i go rial to wi.—1 Tɛs. 5:​8, 9.

16. Wetin wi fɔ mekɔp wi maynd fɔ du?

¹⁶ Mekɔp yu maynd naw fɔ kɔntinyu fɔ tinap tranga wan fɔ du wetin rayt ɔltɛm! Sɔntɛnde, yu kin fil lɛk se na yu wangren de tinap tranga wan fɔ du wetin rayt, bɔt i nɔ go ɛva bi yu wangren. Yu go de wit bɔku bɔku ɔda fetful pipul dɛn na di wɔl we de tinap tranga wan fɔ du wetin rayt. Yu go de bak wit man ɛn uman dɛn we bin gɛt fet ɛn we bin tinap tranga wan fɔ du wetin rayt trade, pan ɔl we dɛn bin trɛtin fɔ kil dɛn. (Ibru 11:​36-38; 12:​1) Lɛ wi ɔl mekɔp wi maynd fɔ kɔntinyu fɔ tinap tranga wan fɔ du wetin rayt jɔs lɛk Job, we bin tɔk se: “A nɔ go ɛva lɛf fɔ sav Gɔd.” Ɛn lɛ di we aw wi de tinap tranga wan fɔ du wetin rayt briŋ prez to Jiova sote go!