ACHISHINGANYEKENU havyuma vino vyasolokele kuli Vinjiho jaYehova vamwe. (1) Likumbi limwe Chinjiho umwe wapwevo wakanyike apwile kushikola, kaha mulongeshi wavo himwavalweza vazane muchilika chalikumbi lyakunoka. Ou kanyike atachikiza ngwenyi chilika kana chalimbalaka najindongi jaKalunga, ngocho alwezele mulongeshi ngwenyi keshi kwazana muchilika kanako. (2) Mukweze walunga waChinjiho uze atwama nasonyi ali mumulimo wakwambulula kuzuvo hizuvo. Nejiva ngwenyi hembo ali nakuya hakiko hatwama mukwavo muka-shikola uze eji kusekelekanga Vinjiho. Oloze mwahamuka nakuya nakwambulwila hembo kana. (3) Chisemi walunga waChinjiho eji kuzatanga nangolo kumilimo mangana azakame kanawa vaka-tanga yenyi kumujimba, kaha likumbi limwe mukulwane wenyi wamilimo amulwezele alinge vyuma vize vyalimbalaka najishimbi. Numba tuhu atachikijile ngwenyi kukana kulinga chuma kana nachimulingisa vamufumise milimo, oloze ahamukile nakuhanjika ngwenyi keshi kuhasa kulinga chuma kanako mwomwo Kalunga asaka vangamba jenyi vakavangizenga jishimbi nakupwa nawa vakushishika.—Loma 13:1-4; Hepe. 13:18.

2. Vihula muka natushimutwila, kaha mwomwo ika?

² Vilinga muka vasolwele vaze Vinjiho vatatu? Vasolwele vilinga vyakufwana nge kumika, nakashishi navilinga vyeka. Oloze chuma chimwe chachilemu vasolwele shina kulama kulonga chavo. Vosena vatatu vapwile vakushishika kuli Yehova. Kaha nawa vosena kavasakile kuhokola jishimbi jaKalungako. Kupwa vakulonga chakafwile ava Vinjiho vatatu valinge vyuma vyakwoloka. Yehova evwile kuwaha havilinga vasolwele ava vangamba jenyi. Nayetu nawa twasaka kwivwisa kuwaha Setu wamwilu. Shikaho natushimutwila vihula vino vitatu: Uno kulonga chapwa chika? Mwomwo ika twatela kupwa vakulonga? Vyuma muka navitukafwa tutwaleho kulama kulonga chetu mulwola luno lwalukalu?

3. (a) Uno vangamba jaKalunga veji kusololanga ngachilihi kulonga chavo? (b) Vyakutalilaho muka navitukafwa twijive mwalumbunukila kulonga?

³ Uno vangamba jaKalunga veji kusololanga ngachilihi kulonga chavo? Veji kulinga ngocho hakuzanga Yehova namuchima wavo wosena nakulinga vyuma vize navimwivwisa kuwaha. Achitalenu omwo lizu kulonga valizachisa muMbimbiliya. MuMbimbiliya lizu lyachiHepeleu valumuna ngwavo “kulonga” lyalumbununa kuzuka mwosena, walambwe. Chakutalilaho, vaIsalele vahanyinenga vimuna vakuvatula kuli Yehova, kaha Jishimbi jahanjikile ngwajo vimuna vaze vahanyinenga vatelelele kupwa valambwe. * (Levi 22:21, 22) Vatu jaKalunga kavavetavishile kuhana chimuna wakuhokoka lihinji, chipwe wakutuvika liso chipwe uze apwile nalitwitwi limweko. Kaha nawa kavavetavishile kuhana chimuna uze apwile namusongoko. Yehova achimwene kupwa chakutamo kumuhana chimuna walambwe wakuzuka mwosena. (Mala. 1:6-9) Tunahase kutachikiza ovyo Yehova asakila vangamba jenyi vapwenga valambwe chipwe vakuzuka mwosena. Achishinganyekenu tuli nakusaka kulanda chuma chimwe, pamo mihako, chipwe mukanda chipwe kala chinoma chakuzachisa. Katweshi kwivwa kuwaha kulanda mihako yize yili najimbandu, chipwe mukanda uze unafumu mapapilo chipwe chinoma chakufwa lyehiko. Tweji kufwilanga kulanda vyuma vize vili kanawa vyalambwe kaha nawa vyakuzuka mwosena. Shikaho naYehova asaka tumuzange namuchima wetu wosena nakupwa vakushishika kuli ikiye. Zangi kana yatela kupwa yalambwe yakuzuka mwosena.

4. (a) Mwomwo ika natwambila ngwetu mutu wakuhona kukupuka nahase kupwa wakulonga? (b) Kweseka namazu ahali Samu 103:12-14, Yehova atachikiza vyuma muka hali etu vatu?

⁴ Uno twatela kupwa vakukupuka numba tupwenga vakulonga tahi? Nduma. Twatachikiza ngwetu twapwa tuvaka-shili, kaha tweji kulimbenjanga. Tuchitalenu havyuma vivali vize navitukafwa tumone ngwetu katwasakiwa kupwa vakukupuka numba tupwenga vakulongako. Chatete, Yehova keshi kutala hatutenga twetuko. Mazu enyi amba ngwawo: “Ove Ya, kachi nge weji kulamanga jishili, ove Yehova, kachi iya mwemana kumeso ove?” (Samu 130:3) Shikaho Yehova atachikiza ngwenyi katwakupukako, tuvaka-shili, ngocho eji kutukonekelanga namuchima wenyi wosena. (Samu 86:5) Chamuchivali, Yehova atachikiza hakumina ngolo jetu, ngocho keshi kutulweza tulinge vyuma vize katweshi kuhasako. (Tangenu Samu 103:12-14.) Jino tunahase kupwa ngachilihi vakuzuka mwosena kaha nawa valambwe kuli Yehova?

5. Uno zangi nayikafwa ngachilihi vangamba jaYehova vapwenga vakulonga?

⁵ Chuma nachikafwa vangamba jaYehova kupwa vakulonga shina zangi. Twatela kuzanga Kalunga nakulihana kuli ikiye namuchima wetu wosena hakuwana nge ikiye apwa Setu. Kachi nge natuzanga lika Kalunga namuchima wetu wosena nahalwola natuhita muvyeseko, kaha natusolola chikupu ngwetu twapwa vakulonga. (Miji. 1, 28:9; Mateu 22:37) Tuchishinganyekenu cheka hali Vinjiho vatatu vaze twavulukanga kumaputukilo. Mwomwo ika valingililile vyuma kana? Uno natwamba ngwetu uze kanyike kasaka kulihizumuna navakwavo kushikolako tahi? Uno uze mukweze ayile nakwambulula asakile vamwivwise sonyi kuli uze mukwavo muka-shikola tahi? Nyi ngachilihi uze chisemi walunga akanyine kuhokola jishimbi, uno asakile vamuhange hamilimo tahi? Nduma. Mwomwo vosena vatachikijile ngwavo Yehova ahakako jishimbi jakwoloka, ngocho vafwilililile kulinga vyuma vize navivwisa Sevo wamwilu kuwaha. Hakuwana nge vamuzanga, ngocho shimbu kanda vasakule vyakulinga vavangililile kushinganyeka vamone omwo Kalunga amona vyuma kana. Kulinga ngocho vasolwele ngwavo vapwile vakulonga.

6. (a) Mwomwo ika mwatela kupwila vakulonga? (b) Uno Alama naEve vahonene ngachilihi kulama kulonga chavo?

⁶ Mwomwo ika chapwila chachilemu kuli mutu himutu kupwa wakulonga? Twatela kupwa vakulonga mwomwo Satana avangijikilile Kalunga nakuvangijikila navatu vosena. Kufuma vene kunyima mumilemba yaEtene ou kangelo ejile nakupwa Satana chipwe ngwetu “Muka-kulikanga,” apihishile lijina lyaYehova hakwamba ngwenyi Kalunga apwa muka-kuyula wamupi, walizangamina kaha nawa wakuhona kashishi. Chaluvinda Alama naEve vakundwijile Satana hakulikanga kuli Yehova. (Kupu. 3:1-6) Hakuwana nge Alama naEve vatwaminenga mumilemba yaEtene nakulivwisa kuwaha kuyoya, ngocho vapwile navyuma vyavivulu vyakuvakafwa kuzamisa zangi yavo yakuzanga Yehova. Oloze halwola luze avahungumwishile Satana, zangi yavo kayapwile cheka yalambwe chipwe yakuzuka mwosenako. Echi jino chanehele chihula chakwamba ngwavo: Kutala vatu vanahase kupwa lika vakushishika kuli Yehova mwomwo yakumuzanga tahi? Mujila yikwavo tunahase kuhulisa ngwetu, kutala vatu vanahase kulama kulonga chavo tahi? Chihula kana chepukile halwola vesekele Yopa kuli Satana.

7. Kweseka namukanda waYopa 1:8-11, uno Yehova amwene ngachilihi kulonga chaYopa, kaha Satana achimwene ngachilihi?

⁷ Yopa ayoyelele halwola luze vaIsalele vapwile muEjipitu. Apwile lunga uze apwile wakulonga chikuma havatu vosena halwola kana. Yopa apwile mutu wakuhona kukupuka ngana mwayetu, mwomwo nayikiye alimbenjelenga. Chipwe ngocho, Yehova amuzangile mwomwo apwile wakulonga. Chasoloka nge halwola kanelu Satana hanatombo lyehi Kalunga hakwamba ngwenyi vatu kaveshi kuhasa kulama kulonga chavoko. Echi chikiko chalingishile Yehova alweze Satana ngwenyi  Yopa apwile mutu wakulonga. Kulonga chaYopa chasolwele hatoma nge Satana apwile muka-makuli. Numba tuhu Yehova etavishile Satana eseke Yopa, oloze afwelelele ngwenyi sepa lyenyi Yopa mwatwalaho lika kulama kulonga chenyi.—Tangenu Yopa 1:8-11.

8. Uno Satana alukukile ngachilihi Yopa?

⁸ Satana apwa chihwanga kaha nawa muka-kujiha vatu. Satana enyekele luheto lwaYopa, nakujiha vangamba jenyi nakupihisa lijina lyenyi mungalila. Alukukile nawa tanga yaYopa hakujiha vana venyi 10. Kufumaho avetele Yopa namusongo wamahute aze apwile mujimba wosena kufuma kumutwe swi namuvilyachilo. Pwevo lyaYopa alishonene chikuma nakwivwa kupihya, ngocho alwezele lunga lyenyi angule Kalunga mangana afwenga. NaYopa amwene ngwenyi chapwile chakutamo kufwa, oloze atwalileho lika kulama kulonga chenyi. Satana azachishile cheka jila yikwavo. Azachishile malunga vatatu vaze vapwile masepa jaYopa. Vaze malunga vejile nakushikama naYopa hamakumbi amwe, oloze kavamuvendejekeleko. Vamuhanyinenga kaha milonga, nakwamba ngwavo Kalunga ikiye amumweneselenga ukalu kana, kaha nawa ngwavo Kalunga kamwene kulonga chenyi kupwa chachilemuko. Vamwambile nawa ngwavo apwile lunga wakuhuka, kahechi chikiko chamulingishile ahite muukalu kana.—Yopa 1:13-22; 2:7-11; 15:4, 5; 22:3-6; 25:4-6.

9. Vyuma muka alingile Yopa omu apwile muukalu?

⁹ Uno Yopa alingile ngachilihi haukalu wosena uze amwenenga? Yopa kapwile mutu wakukupukako, ngocho atenukilile vaze masepa jenyi hakuhanjika mazu aze ambile jino ngwenyi apwile amokomoko. Alimwene kupwa wakwoloka chikuma kuhambakana Kalunga. (Yopa 6:3; 13:4, 5; 32:2; 34:5) Chipwe ngocho atwalilileho lika kupendamina hali Kalunga nahalwola apwile muukalu. Ketavilile mazu amakuli aze vahanjikile masepa jenyiko. Ambile ngwenyi: “Nachipwa chakuhenga kuli ami kumivulukila kwoloka! Kangweshi kuseza kulonga chamiko palanga nomu nangufwa.” (Yopa 27:5) Mazu kana asolwele nge Yopa afwililile kupwa wakulonga chamokomoko nakala ukalu uze amwenenga. Yopa ketavilile vamuhungumwiseko, ngocho nayetu nawa tunahase kulinga mwomumwe.

10. Uno mazu aze ahanjikile Satana kuli Yopa akwata ngachilihi nahali etu?

¹⁰ Uno mazu aze ahanjikile Satana kuli Yopa akwata ngachilihi nahali etu? Satana amba ngwenyi etu katwazanga Yehova Kalungako, kaha nawa ngwenyi tunahase kulitwamina kumuzachila Kalunga hakusaka kulinganyalisa etu vavene, kaha cheka ngwenyi katweshi kuhasa kulama kulonga chetuko. (Yopa 2:4, 5; Kuso. 12:10) Uno munevu ngachilihi hamazu kana? Awa mazu eji kutukolesanga chikuma kumuchima. Chipwe ngocho tachikizenu ngwenu Yehova amifwelela chikuma. Echi chikiko eji kwitavishilanga Satana atweseke. Yehova afwelela ngwenyi tunahase kulama kulonga chetu nakusolola Satana kupwa muka-makuli. Atufwelelesa ngwenyi mwatukafwa tulame kulonga chetu. (Hepe. 13:6) Twapwa vakutokwa chikuma kutufwelela kuli Mwata wavyuma vyakutenga vyosena. Chikupu vene, chapwa chachilemu chikuma kupwa vakulonga, mwomwo cheji kutukafwanga tukane makuli aSatana, nakuhakwila lijina lyaKalunga nakukundwiza chiyulo chenyi. Vyuma muka navitukafwa tulame kulonga chetu?

11. Chuma muka natulinangula kuli Yopa?

¹¹ Satana ali nakufumbukila chikuma vangamba jaYehova ‘mumakumbi ano akukuminyina.’ (Chimo. 2, 3:1) Jino vyuma muka twatela kulinga mangana tulame kulonga chetu kachi nge tuli muvyeseko? Chakutalilaho chaYopa chinahase kutukafwa. Shimbu kanda vamweseke kuli Satana, Yopa apwile lika wakulonga mukuyoya chenyi chosena. Tushimutwilenu havishina vitatu natulinangula kuli Yopa vize navitukafwa tutwaleho lika kulama kulonga chetu.

12. (a) Kweseka namukanda waYopa 26:7, 8, 14, vyuma muka vyakafwile Yopa akomoke chikuma Yehova nakumuvumbika? (b) Vyuma muka navitukafwa nayetu tukomoke chikuma Yehova?

 ¹² Kutala havyuma vyakutenga chakafwile Yopa azange chikuma Yehova. Yopa ashinganyekelenga chikuma havyuma atenga Yehova. (Tangenu Yopa 26:7, 8, 14.) Alikomokelele chikuma hakushinganyeka havyuma vyakufwana nge mavu, nalilu, namavwi namikalateta, chipwe ngocho atachikijile chikupu ngwenyi ejivile kaha vyuma vyavindende havyuma vyosena atenga Yehova. Kaha nawa Yopa amwenenga mazu aYehova kupwa amalemu. Ambile ngwenyi: “Ngunalamenga mazu enyi.” (Yopa 23:12) Hakuwana nge Yopa alikomokelele chikuma havyuma atenga Yehova ngocho chamulingishile amuvumbike chikuma. Azangile chikuma Yehova nakusaka kulinga vyuma vize vyevwishilenga chikuma Kalunga kuwaha. Kuzanga chikuma Yehova chamukafwile atwaleho lika kulama kulonga chenyi. Shikaho nayetu twatela kulondezeza Yopa. Makumbi ano twatachikiza vyuma vyavivulu chikuma vize atenga Yehova kuhambakana muze chapwile kuli vatu vamumakumbi aYopa. Kaha nawa twatwama naMbimbiliya yize yeji kutukafwanga tutachikize omwo apwa Yehova. Vyuma tweji kulinangulanga vyeji kutulingisanga tulikomokele chikuma hali ikiye. Kukomoka Yehova nakumuvumbika nachitukafwa tufwile kumwononoka nakufwila kutwalaho lika kulama kulonga chetu.—Yopa 28:28.

13-14. Kweseka namukanda waYopa 31:1, uno Yopa asolwele ngachilihi nge ononokele Kalunga? (b) Tunahase kukavangiza ngachilihi chakutalilaho chaYopa?

¹³ Kwononoka Yehova chakafwile Yopa alame kulonga chenyi. Yopa atachikijile ngwenyi, hakusaka alame kulonga chenyi atelelele kwononoka chikuma Yehova. Kwononoka cheji kukafwanga mutu alame kulonga chenyi. Yopa akilikichile chikuma mangana ononoke Yehova mukuyoya chenyi chosena. Chakutalilaho, alihendelenga kukushishika mapwevo veka. (Tangenu Yopa 31:1.) Hakuwana nge apwile napuwenyi, ngocho alihendele kwivwila peha mapwevo veka. Makumbi ano ujila unalisale chikuma mukaye, kutala natukavangiza chakutalilaho chaYopa tahi? Kutala natulihenda kukutala mivwimbimbi yauselesele hajishinga, chipwe hajivindiyo chipwe hainternet  tahi? (Mateu 5:28) Nge natulihendanga kutala vyuma kana hakumbi hakumbi, kaha natulama kulonga chetu.

¹⁴ Yopa nawa ononokelenga Yehova hakuhona kuzanga chikuma luheto. Atachikijile ngwenyi kachi nge mwazanga chikuma luheto lwenyi kaha mwavulumuna mulonga waunene kuli Kalunga. (Yopa 31:24, 25, 28) Makumbi ano vatu mukaye vali nakufwila chikuma luheto. Kachi nge natumonanga jimbongo naluheto mujila yatela ngana muze Mbimbiliya yatulweza, kaha nachitukafwa tufwile kulama kulonga chetu.—Vishi. 30:8, 9; Mateu 6:19-21.

15. (a) Uno vyuma muka atalililile Yopa vize vyamukafwile alame kulonga chenyi? (b) Mwomwo ika chapwila chachilemu kushinganyeka havyuma atushika Yehova?

¹⁵ Yopa alamine kulonga chenyi hakushinganyeka havyuma amushikile Kalunga. Afwelelele chikupu ngwenyi Kalunga amwenenga kulonga chenyi kupwa chachilemu. (Yopa 31:6) Yopa afwelelele ngwenyi Yehova mwamukisula chamokomoko navihuli apwile nakuhitamo. Kufwelela vyuma kana chamukafwile mangana atwaleho lika kulama kulonga chenyi. Yehova awahililile chikuma hakumona omu Yopa alamine kulonga chenyi, ngocho amukiswile numba tuhu kapwile wakukupukako. (Yopa 42:12-17; Yako. 5:11) Kaha nawa Yehova mwakakisula chikuma Yopa kulutwe. Uno nayenu mwafwelela chikupu ngwenu Yehova mwakamikisula mwomwo yakulama kulonga chenu tahi? Yehova kalumukako. (Mala. 3:6) Shikaho nge natwanuka ngwetu Yehova amona kulonga chetu kupwa chachilemu, kaha nachitukafwa tufwile kutalilila vyuma vyamwaza vize atushika.—Teso. 1, 5:8, 9.

16. Chuma muka twatela kufwila kulinga?

¹⁶ Shikaho twalenuho lika kulama kulonga chenu. Shimbu jimwe munahase kushinganyeka ngwenu yenu kaha muli nakulama kulonga chenu, oloze tachikizenu ngwenu navandumbwenu vavavulu kuvihela vyeka vali nakulinga mwomumwe. Tachikizenu ngwenu namukapwa halizavu lyavandumbwenu vakushishika vamukaye kosena vaze vali nakulama kulonga chavo. Namukalinunga nawa hamukana wavangamba jaKalunga vakushishika vakunyima vaze valamine kulonga chavo namulwola lwaukalu. (Hepe. 11:36-38; 12:1) Tuvosena tufwilenu kulama kulonga chetu ngana muze alingile Yopa uze ahanjikile ngwenyi: “Kangweshi kuseza kulonga chamiko palanga nomu nangufwa.” Chikupu vene, tutwalenuho lika kulama kulonga chetu mangana twalisenga Yehova haya myaka yosena.