XNAQʼTZBʼIL 6
Qo ten tzʼaqli
«¡Kukx chin tele tzʼaqli ajxi nkyime!» (JOB 27:5, TNM).
BʼITZ 34 Toj tumelxix chin anqʼile Jehová
AJU KʼELEL QNIKʼ TIʼJ *
1. ¿Tzeʼn ma kubʼ kyyekʼin oxe erman qa kukx in che ajbʼen te Jehová?
QO XIMEN tiʼj oxe tiʼ in che ok weʼ erman twitz. In xi qʼamaʼn te jun txin toj tja xnaqʼtzbʼil kyukʼil txqantl kʼwaʼl tuʼn kyparticiparin toj jun ninqʼij, aju ojtzqiʼn tuʼn txin qa nya bʼaʼn in nela toj twitz Jehová. Tuʼntzunju in xi tqʼamaʼn toj tumel qa mlay tzʼex toj ninqʼij. In pakbʼan jun kuʼxun kytzi ja ex in nel tnikʼ tiʼj qa chʼix tpon ttzi tja jun tukʼil toj tja xnaqʼtzbʼil aju otoq xmayin kyiʼj testigos de Jehová. Maske in xobʼ tuʼn tyolin, in xi bʼet ttzi ja ex in nok ttokʼchaʼn. Ex jun mambʼaj aju at toj aqʼuntl, in tzaj tqanin tpatrón te tuʼn tkubʼ tbʼinchaʼn jun tiʼ nya toj tumel moqa nya qʼoʼn ambʼil tuʼn ley. Maske jaku tzʼel qʼiʼn taqʼun, in xi tqʼamaʼn qa mlay bʼant jlu tuʼn, tuʼnju in xi tnimen qe ley ex tuʼnju atzun taj Dios tuʼn tbʼant kyuʼn tmajen (Rom. 13:1-4; Heb. 13:18).
2. ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu ex tiquʼn?
2 ¿Alkye kymod oxe erman ma qo yolin kyiʼj xkubʼ kyyekʼin? Bʼalo jaku qqʼama qa mintiʼ ẍe tzaj xobʼ ex qa tbʼanel xjal qe. Noqtzun tuʼnj, at juntl mod mas nim toklen aju ma tzʼonin kyiʼj: aju tuʼn kyten tzʼaqli. Ma tzʼok tilil kyuʼn oxe erman lu tuʼn kukx kyajbʼen te Jehová ex tuʼn t-xi kybʼiʼn qe tkawbʼil. Jaku txi qqʼamaʼn qa in tzalaj Jehová kyiʼj. Ax ikx qe qaj tuʼn ttzalaj tanmi Jehová quʼn. Tuʼntzunju, kxel qqʼoʼn tzaqʼwebʼil kyiʼj xjel lu: ¿Tiʼ t-xilen aju tuʼn qten tzʼaqli? ¿Tiquʼn nim toklen tuʼn tkubʼ qyekʼin mod lu? ¿Ex tiʼ jaku bʼant quʼn tuʼn tkubʼ qximen tuʼn qten tzʼaqli kyoj ambʼil kwest?
¿TIʼ T-XILEN AJU TUʼN QTEN TZʼAQLI?
3. a) ¿Tiʼ t-xilen aju tuʼn qten tzʼaqli? b) ¿Alkyeqe techel in che onin qiʼj tuʼn tel qnikʼ tiʼj tiʼ t-xilen aju tuʼn qten tzʼaqli?
3 Tuʼn qten tzʼaqli, a t-xilen tuʼn tten nim qkʼujlabʼil tiʼj Jehová, tuʼn qajbʼen oʼkx te ex tuʼn tkubʼ qbʼinchaʼn aju in tzalaj tiʼj. Toj Tyol Dios, aju yol hebreo in najbʼen tiʼj yol «tzʼaqli», jaku yolin tiʼj jun tiʼ cabal, tbʼanel taʼ ex mintiʼ tpaltil. Jun techel, tzaj tqʼamaʼn Ley qa aj t-xi kyqʼoʼn aj Israel jun chojbʼil, iltoq tiʼj tuʼn t-xi kyqʼoʼn jun alumaj mintiʼ yabʼil tiʼj (Lev. 22:21, 22). * Mlaytoq txi kyqʼoʼn jun txkup mintiʼ jun tqan, mintiʼ jun t-ẍkyin, mintiʼ jun twitz moqa at tpaltil. Nimtoq toklen toj twitz Jehová tuʼn t-xi kyqʼoʼn jun txkup tbʼanel (Mal. 1:6-9). ¿Tiquʼn taj Jehová tuʼn t-xi qqʼoʼn jun tiʼ tbʼanel te? Qo yolin tiʼj jun techel aju kʼonil qiʼj tuʼn tel qnikʼ tiʼj. Aj ttzaj qlaqʼoʼn jun fruta, nya qaj tuʼn ttzaj qʼoʼn jun fruta qe aju otoq tzʼok chʼin qʼayne tiʼj moqa otoq tzʼel qʼiʼn jun piẍ. Chʼixme ax jlu in bʼaj tukʼilju qkʼujlabʼil at tiʼj Jehová ex aju tuʼn kukx qajbʼen te. Taj Jehová tuʼn t-xi qqʼoʼn tkyaqil te moqa toj jun tten tzʼaqli.
4. a) Tuʼn qten tzʼaqli twitz Jehová, ¿ape t-xilen jlu qa mlayx qo el txalpaj? b) Ik tzeʼn in tzaj tqʼamaʼn Salmo 103:12 a 14, ¿tiʼ mintiʼ in nayon Jehová tuʼn tbʼant quʼn?
4 Tuʼnju aj il xjal qoʼ ex at maj mintiʼ in xi qbʼinchaʼn qe tiʼchaq toj tumel, jakulo kubʼ qxjelin jlu: «¿Mlayx qo el txalpaj tuʼntzun qten tzʼaqli?». Miʼn. Qo xnaqʼtzaʼn tiʼj tiquʼn. Tnejel, nya oʼkx tok twiʼ Jehová kyiʼj qeju tiʼchaq in qo el txalpaj tiʼj. In tzaj tqʼamaʼn Tyol jlu: «Noqwit kukx in tzaj tnaʼna aju qbʼinchbʼene mya bʼaʼn, ax tok mi jun jaku kyaj ten mintiʼ til» (Sal. 130:3). Ojtzqiʼn tuʼn qa aj il qoʼ, tuʼntzunju in kubʼ tnajsaʼn qil tukʼil kʼujlabʼil (Sal. 86:5). Tkabʼin, ojtzqiʼn tuʼn Jehová jniʼ jaku bʼant quʼn ex mlay tzaj tqanin jun tiʼ aju mlay bʼant quʼn (kjawil uʼjit Salmo 103:12-14). Tuʼntzunju, ¿toj alkye tten jaku qo ten tzʼaqli twitz Jehová?
5. ¿Tiquʼn nim toklen tuʼn tten qkʼujlabʼil tuʼntzun qten tzʼaqli?
5 Tuʼn kukx qten tzʼaqli, nim toklen tuʼn tten qkʼujlabʼil. Ilxix tiʼj tuʼn tkubʼ qyekʼin axix tok qkʼujlabʼil tiʼj Jehová aj qajbʼen te. Ex qa kukx ma ten qkʼujlabʼil tiʼj aj qok weʼ twitz nya bʼaʼn, in qo ten tzʼaqli twitz (1 Crón. 28:9; Mat. 22:37). Qo ximen juntl maj kyiʼj oxe erman xqo yolin kyiʼj toj tnejel taqikʼ. Nya taj txin tuʼn tbʼaj tgan toj tja xnaqʼtzbʼil, nya taj kuʼxun tuʼn tkubʼ tchʼixwi toj pakbʼabʼil ex nya taj mambʼaj tuʼn tel qʼiʼn taqʼun. Qa ikju, ¿tiquʼntzun xkubʼ kybʼinchaʼn aju mas bʼaʼn? Tuʼnju ojtzqiʼn kyuʼn qa tbʼanel qe tkawbʼil Jehová ex kyaj tuʼn ttzalaj tanmi kyuʼn. In che ximen tnejel tiʼj Jehová aj t-xi kybʼinchaʼn jun tiʼ, tuʼnju at kykʼujlabʼil tiʼj. Iktzun tten in kubʼ kyyekʼin qa tzʼaqli qe.
¿TIQUʼN NIM TOKLEN TUʼN QTEN TZʼAQLI?
6. a) ¿Tiquʼn nimxix toklen tuʼn tten teyele junjun qe tzʼaqli? b) ¿Tzeʼn kubʼ tyekʼin Adán ex Eva qa mintiʼ e ten tzʼaqli twitz Jehová?
6 ¿Tiquʼn nimxix toklen tuʼn tten teyele junjun qe tzʼaqli? Tuʼnju o tzʼok toklen Jehová toj malbʼil tuʼn Satanás ex o yolin nya bʼaʼn tiʼj teyele junjun qe. Ok nya bʼaʼn anjel lu te Satanás toj jardín te Edén, ex «aj Qʼoj» t-xilen tbʼi. Bʼaj ttzʼilsaʼn Satanás tbʼi Jehová tej tqʼama qa nya bʼaʼn aj kawil te, qa oʼkx in ximen tiʼjx ex qa in sbʼun kyiʼj xjal. Bʼisbʼajil tuʼnju kubʼ t-ximen Adán ex Eva tuʼn tonin tiʼj Satanás ex e ok te aj qʼoj tiʼj Jehová (Gén. 3:1-6). Akux e anqʼin toj Edén, attoq nim tumel tzeʼn tuʼn tchʼiy kykʼujlabʼil tiʼj Jehová. Noqtzun tuʼnj, tej tok Satanás te aj qʼoj, ya mintiʼ ten kykʼujlabʼil tzʼaqli tiʼj Jehová. Ex toj tqʼijlalil Job, ax ikx tqʼama Satanás juntl tiʼ: ¿Jakupe che ajbʼen xjal te Jehová tuʼnju at kykʼujlabʼil tiʼj? Toj juntl yol, ¿jakupe che ten tzʼaqli twitz?
7. Ik tzeʼn in tzaj tqʼamaʼn Job 1:8 a 11, ¿tiʼ t-ximbʼetz Jehová ten tiʼj Job tuʼnju ten tzʼaqli ex tiʼ t-ximbʼetz Satanás ten tiʼj?
7 Anqʼin Job tojxju ambʼil tej kyten aj Israel toj Egipto. Oʼkx te ten tzʼaqli kyxol kykyaqil, pero el txalpaj tuʼnju aj iltoq ik tzeʼn qe. Noqtzun tuʼnj, ok kʼujlaʼn tuʼn Jehová tuʼnju ten tzʼaqli. Bʼalo otoqxi tzʼok ten Satanás xmayil tiʼj Jehová tuʼnju tqʼama qa mlay che ten xjal tzʼaqli twitz. Tuʼntzunju xi tqʼamaʼn Jehová te Satanás tuʼn tok tqʼoʼn twitz tiʼj Job. Tuʼnju ten Job tzʼaqli, el nikʼbʼaj tiʼj qa nya ax tok aju tqʼama Satanás. Kyjuʼtzun xi tqʼamaʼn Satanás qa bʼaʼn tuʼn tok Job toj malbʼil. Ok qeʼ tkʼuʼj Jehová tiʼj Job ex xi tqʼoʼn ambʼil tuʼn tok toj joybʼil tuʼn Satanás (kjawil uʼjit Job 1:8-11).
8. ¿Alkye tten ok Job toj joybʼil tuʼn Satanás?
8 Nya bʼaʼn tmod Satanás at ex jun bʼyol xjal. El tiʼn tkyaqilju attoq te Job: el tiʼn tqʼinumabʼil, qe tmajen ex ok tilil tuʼn tuʼn kyyolin txqantl nya bʼaʼn tiʼj. Ax ikx, e kubʼ tbʼyoʼn Satanás qeju lajaj tkʼwaʼl, aqeju kʼujlaʼnxixtoq tuʼn. Yajxitl ok tqʼoʼn txʼaʼk tiʼj aju noj tiʼj tkyaqil t-xmilal tuʼn. Tzaj bʼaj tkʼuʼj t-xuʼjil tuʼn bʼis ex xi tqʼamaʼn te Job tuʼn tel tikʼen Dios tuʼntzun tkyim. Kubʼ t-ximen Job tuʼn tkyim, pero kukx ten tzʼaqli. Oktzun tbʼinchaʼn Satanás nya bʼaʼn tiʼj Job toj juntl tten. Ajbʼen qeju oxe tamiw Job tuʼn, aʼyeju e pon visitarilte kyoj nimku qʼij, pero mintiʼ ok kyqʼuqbʼaʼn tkʼuʼj. Aju bʼant kyuʼn, oʼkx xi kyqʼamaʼn kyuw yol te ex e xmayin tiʼj. Xi kyqʼamaʼn te qa tuʼn Jehová otoq tzaj nim nya bʼaʼn tiʼj ex qa mintiʼtoq toklen toj twitz qa tzʼaqli Job ex qa nya. Axpe ikx xi kyqʼamaʼn te Job qa nya bʼaʼn xjaltoq ex qa toj tumel tkyaqilju tkastiw otoq kubʼ qʼoʼn (Job 1:13-22; 2:7-11; 15:4, 5; 22:3-6; 25:4-6).
9. Maske tzaj nim nya bʼaʼn tiʼj Job, ¿tiʼ mintiʼ kubʼ t-ximen?
9 ¿Tiʼ bʼant tuʼn Job tej tikʼ toj tkyaqil nya bʼaʼn? Tuʼnju aj iltoq, tzaj tqʼoj ex i ex tkawin qe nya bʼaʼn tamiw, yajxitl tqʼama qa el tzpet. Mas ximen tiʼj qa mintiʼ til ex mintiʼ ximen tiʼj qa tzʼaqli te Jehová (Job 6:3; 13:4, 5; 32:2; 34:5). Maske ikju, mintiʼ kubʼ t-ximen tuʼn tkyaj tkolin Jehová kyoj ambʼil kwest. Mintiʼ xi tbʼiʼn kyyol nya ax tok tamiw. Tqʼama jlu: «Mlayx kubʼ nximane tuʼn t-xi nqʼamaʼne qa tbʼanel xjal qeye. ¡Kukx chin tele tzʼaqli ajxi nkyime!» (Job 27:5, TNM). Kyukʼil yol lu, tqʼama qa otoq bʼaj t-ximen tuʼn tten tzʼaqli ex noq tiʼxku jakutoq tzaj tiʼj. Mintiʼ xi tqʼoʼn ambʼil tuʼn tkubʼ numj ex ax jlu jaku bʼant quʼn.
10. ¿Tiʼ toklen tukʼil teyele junjun qe aju nya bʼaʼn tqʼama Satanás tiʼj Job?
10 ¿Tiʼ toklen tukʼil teyele junjun qe aju nya bʼaʼn tqʼama Satanás tiʼj Job? In tzaj tqʼamaʼn Satanás qa nya ax tok aju qkʼujlabʼil at tiʼj Jehová, qa jaku kyaj qkolin tuʼn qajbʼen te aj kytzaj nya bʼaʼn qiʼj ex qa mlay qo ten tzʼaqli twitz (Job 2:4, 5; Apoc. 12:10). ¿Tiʼ in kubʼ qnaʼn tuʼn jlu? In tzaj qbʼis tuʼn. Qo ximen tiʼj jlu: qʼuqlixix tkʼuʼj Jehová qiʼj, tuʼntzunju in xi tqʼoʼn ambʼil te Satanás tuʼn qok tuʼn toj malbʼil tuʼntzun tkubʼ qyekʼin qa tzʼaqli qoʼ twitz Jehová ex qa nya ax tok aju in tzaj tqʼamaʼn. Ax ikx in tzaj ttziyen Jehová qa kʼonil qiʼj (Heb. 13:6). ¡Jun tbʼanelxix qoklen tuʼnju qʼuqli tkʼuʼj Jehová qiʼj, aju aj Kawil tibʼaj tkyaqil! Tuʼn jlu in nel qnikʼ tiʼj tiquʼn nim toklen tuʼn qten tzʼaqli. Qa ma qo ten tzʼaqli, qo kolil tiʼj tbʼi Jehová ex tiʼj toklen tuʼn tkawin. Tuʼntzunju, ¿tiʼ jaku bʼant quʼn tuʼn kukx qten tzʼaqli?
¿TIʼ JAKU BʼANT QUʼN TUʼN QTEN TZʼAQLI TOJ AMBʼIL JAʼLO?
11. ¿Tiʼ xnaqʼtzbʼil jaku tzʼel qiʼn tiʼj Job?
11 Mas o tzʼok tbʼinchaʼn Satanás nya bʼaʼn kyiʼj tmajen Dios toj ambʼil jaʼlo, tuʼnju in qo anqʼin kyoj «mankbʼil tqʼijlalil» (2 Tim. 3:1). Tuʼntzunju, ¿tiʼ jaku bʼant quʼn tuʼntzun kukx qten tzʼaqli? Ax ikx jaku tzʼel qkanoʼn tiʼj tbʼanel techel kyaj tqʼoʼn Job. Tej naʼmxtoq kytzaj nya bʼaʼn tiʼj, otoq kubʼ tyekʼin toj nimku maj qa tzʼaqli te. Qo xnaqʼtzan kyiʼj oxe tiʼ bʼant tuʼn ex qo ximen tiʼj tzeʼn jaku tzʼel qkanoʼn tiʼj.
¿Alkye junjun tiʼ jaku bʼant quʼn tuʼntzun kukx qten tzʼaqli? (Qʼonka twitza tiʼj taqikʼ 12). *
12. a) Ik tzeʼn in tzaj tyekʼin Job 26:7, 8 ex 14, ¿tiʼ onin tiʼj Job tuʼn tchʼiy tkʼujlabʼil tiʼj Jehová ex tuʼn tnimen te? b) ¿Tiʼ kʼonil qiʼj tuʼn tchʼiy qkʼujlabʼil tiʼj Jehová?
12 Tej tok tqʼoʼn Job toklen Jehová, chʼiy tkʼujlabʼil tiʼj. El tpaʼn Job ambʼil tuʼn t-ximen tiʼj tbʼanelxix tbʼinchbʼen Jehová (kjawil uʼjit Job 26:7, 8, 14). Jaw labʼin tiʼjju alkye tten bʼinchaʼn Txʼotxʼ, kyaʼj, qe muj ex qʼankyoq, ax ikx el tnikʼ tiʼj qa noq chʼin tojtzqibʼil ten tiʼj tkyaqilju tbʼinchbʼen Jehová. Ok tqʼoʼn toklen aju xi t-xnaqʼtzaʼn Jehová te ex tuʼntzunju tqʼama jlu tiʼj: «Kukx in che japun qe tley wuʼne ax ikx qe tmandamyent» (Job 23:12). Tej tnimen Job te Jehová ex tej tok tqʼoʼn toklen, chʼiy tkʼujlabʼil tiʼj, ttzalaj tanmi tuʼn ex ten tzʼaqli twitz. Ax ikx qe, nim toklen tuʼn tel qpaʼn ambʼil tuʼn qximen kyiʼj tbʼinchbʼen Jehová. Toj ambʼil jaʼlo mas o tzʼel kynikʼ xjal kyiʼj tbʼinchbʼen Jehová. Ax ikx, at tkyaqil Xjan Uʼj qukʼil aju in nonin qiʼj tuʼn tok qojtzqiʼn Jehová. Aju in nel qnikʼ tiʼj, in nonin qiʼj tuʼn tok qqʼoʼn toklen, tuʼn qnimen te, tuʼn tchʼiy qkʼujlabʼil tiʼj ex tuʼn tkubʼ qbʼinchaʼn aju in tzaj tqʼamaʼn. Tuʼn jlu kbʼel qximen tuʼn kukx qten tzʼaqli (Job 28:28).
Tuʼn qten tzʼaqli, il tiʼj tuʼn tel qikʼen kyilbʼilal xjal mintiʼ kyxbʼalun tok. (Qʼonka twitza kyiʼj taqikʼ 13). *
13, 14. a) Ik tzeʼn in tzaj tyekʼin Job 31:1, ¿toj alkye juntl tten kubʼ tyekʼin Job qa bʼaʼntoq nimen? b) ¿Tzeʼn jaku tzʼel qkanoʼn techel kyaj tqʼoʼn?
13 Ok tilil tuʼn Job tuʼn tnimen te Jehová toj tkyaqil tten tanqʼibʼil. Ojtzqiʼntoq tuʼn Job qa tuʼn tten tzʼaqli twitz Jehová, iltoq tiʼj tuʼn tnimen te. Aj qnimen te Jehová, in nonin qiʼj tuʼn qten tzʼaqli twitz. Kubʼ t-ximen Job tuʼn t-xi tbʼiʼn Jehová toj tkyaqil ambʼil. Jun techel, ok t-xqʼuqin tibʼ tuʼn miʼn tpon tkʼuʼj tiʼj juntl xuʼj (kjawil uʼjit Job 31:1). Tuʼnju otoq kubʼ mojeʼ, ojtzqiʼntoq tuʼn qa mlay tzʼok qkʼujlaʼn juntl xuʼj. Toj ambʼil jaʼlo oʼkx in che ximen xjal tuʼn kyyaẍin. Qa o qo kubʼ mojeʼ, ¿kʼokelpe tilil quʼn tuʼn miʼn tpon qkʼuʼj tiʼj juntl xjal ik tzeʼn bʼant tuʼn Job? ¿Okpe kʼokel tilil quʼn tuʼn miʼn tok qqʼoʼn qwitz kyiʼj tilbʼilal jatumel mintiʼ kyxbʼalun xjal tok aj kyetz yekʼin noq jaxku tumel? (Mat. 5:28). Qa ma tzʼok tilil quʼn tuʼn qjakʼunte qibʼ tkyaqil qʼij, kʼonil qiʼj tuʼn qten tzʼaqli.
Tuʼn qten tzʼaqli, il tiʼj tuʼn tten qximbʼetz toj tumel kyiʼj qʼinumabʼil te twitz txʼotxʼ. (Qʼonka twitza kyiʼj taqikʼ 14). *
14 Ax ikx ten Job tzʼaqli twitz Jehová tej t-ximen toj tumel kyiʼj qʼinumabʼil. Tqʼama qa noqwit ok qeʼ tkʼuʼj tiʼjju tqʼinumabʼil, maswitlo bʼaʼn tuʼn tkubʼ qʼoʼn tkastiw (Job 31:24, 25, 28). Toj ambʼil jaʼlo, oʼkx in che ximen xjal tiʼj pwaq. Qa ma txi qbʼiʼn qe nabʼil ateʼ toj Tyol Dios tiʼjju tuʼn tten qximbʼetz toj tumel tiʼj pwaq ex kyiʼj tiʼchaq, kʼonil jlu qiʼj tuʼn kukx qten tzʼaqli (Prov. 30:8, 9; Mat. 6:19-21).
Tuʼn qten tzʼaqli, il tiʼj tuʼn kukx qximen tiʼj qʼuqbʼil qkʼuʼj. (Qʼonka twitza kyiʼj taqikʼ 15). *
15. a) ¿Tiʼ onin tiʼj Job tuʼn tten tzʼaqli? b) ¿Tiquʼn nim toklen tuʼn ttzaj qnaʼn aju qʼuqbʼil qkʼuʼj in tzaj tqʼoʼn Jehová?
15 Atz ximen Job tiʼj qa tzultoq kʼiwlaʼn tuʼn Jehová. Ok qeʼ tkʼuʼj Job tiʼj qa nimtoq toklen toj twitz Jehová qa ma ten tzʼaqli twitz (Job 31:6). Maske tzaj nim nya bʼaʼn tiʼj, ok qeʼ tkʼuʼj tiʼj qa tzultoq kʼiwlaʼn tuʼn Jehová. Jaku txi qqʼamaʼn qa onin jlu tiʼj tuʼn tten tzʼaqli. Nimxix tzalaj tanmi Jehová tuʼn Job, tuʼntzunju tzaj tkʼamoʼn nimxix kʼiwlabʼil maske aj iltoq (Job 42:12-17; Sant. 5:11). Ex toj ambʼil tzul, tzul tkʼamoʼn mas kʼiwlabʼil. ¿Yajtzun qe? ¿Qʼuqlipe qkʼuʼj tiʼj qa tzul tkʼiwlaʼn Jehová qoʼ qa ma qo ten tzʼaqli twitz? Naʼmx tchʼexpaj Jehová (Mal. 3:6). In nok tqʼoʼn toklen qa ma qo ten tzʼaqli twitz. Aj qximen tiʼj jlu, kʼonil qiʼj tuʼn kukx tok qeʼ qkʼuʼj tiʼj qa tzul jun tbʼanel ambʼil (1 Tes. 5:8, 9).
16. ¿Tiʼ nim toklen tuʼn tkubʼ qximen tuʼn tbʼant quʼn?
16 Nim toklen tuʼn tkubʼ qximen tuʼn kukx qten tzʼaqli. Atlo maj jaku kubʼ qximen qa oʼkx qe in nok tilil quʼn tuʼn qten tzʼaqli. Noqtzun tuʼnj, nya qjunalx in nok tilil quʼn. Twitz tkyaqil Txʼotxʼ ateʼ nim millón erman in nok tilil kyuʼn tuʼn kyten tzʼaqli. Axpe ikx, qo tel kyxol tmajen Jehová e ten tzʼaqli twitz, aqeju ok tilil kyuʼn maske jakutoq che kubʼ bʼyoʼn (Heb. 11:36-38; 12:1). Qkyaqilx bʼaʼn tuʼn tel qkanoʼn tiʼj techel kyaj tqʼoʼn Job ex qqʼamanx jlu ik tzeʼn te: «¡Kukx chin tele tzʼaqli ajxi nkyime!». Bʼaʼn tuʼn tok tilil quʼn tuʼn qten tzʼaqli twitz Jehová tuʼntzun tjaw nimsaʼn te jumajx.
BʼITZ 124 Kukx qo ten tzʼaqli
^ taqik' 5 ¿Tiʼ t-xilen aju tuʼn qten tzʼaqli? ¿Tiquʼn nim toklen te Jehová qa ma che ten tmajen tzʼaqli twitz? ¿Ex tiquʼn nim toklen tuʼn tkubʼ tyekʼin teyele junjun tmajen Jehová aju mod lu? Kʼonil xnaqʼtzbʼil lu qiʼj tuʼn tel qnikʼ tiʼj tzaqʼwebʼil in tzaj tqʼoʼn Tyol Dios kyiʼj xjel lu. Ax ikx kʼonil xnaqʼtzbʼil qiʼj tuʼn tkubʼ qximen tuʼn qten tzʼaqli junjun qʼij. Qa ma bʼant jlu quʼn, tzul qkʼamoʼn nim kʼiwlabʼil.
^ taqik' 3 Toj yol hebreo, aju yol in najbʼen tuʼn t-xi qʼamet qa tbʼanel taʼ jun txkup at tmojbʼabʼil tibʼ tukʼilju yol in najbʼen tuʼn t-xi qʼamet qa tzʼaqli jun xjal.
^ taqik' 50 TQANIL KYIʼJ TILBʼILAL: In nok qqʼoʼn qwitz tiʼj Job tej tzmatoq kuʼxun ex in xi tyekʼin kye junjun tkʼwaʼl qe tbʼanel tbʼinchbʼen Jehová.
^ taqik' 52 TQANIL KYIʼJ TILBʼILAL: Mintiʼ in xi tqʼoʼn jun erman ambʼil tuʼn tok tkeʼyin kyilbʼilal xjal mintiʼ kyxbʼalun tok.
^ taqik' 54 TQANIL KYIʼJ TILBʼILAL: In nok tilil tuʼn jun erman tuʼn miʼn ttzaj tlaqʼoʼn jun matij televisión aju nya il tiʼj ex mlay chjet tuʼn.
^ taqik' 56 TQANIL KYIʼJ TILBʼILAL: Ax ikx in nel tpaʼn jun erman ambʼil tuʼn tnaʼn Dios ex tuʼn t-ximen tiʼj qʼuqbʼil tkʼuʼj tuʼn tanqʼin toj Tbʼanel Najbʼil.
