1. Witnes tatoi be edena dala ai e hahedinaraia idia na Iehova e badinaia?

IEHOVA ENA WITNES tatoi ediai e vara ḡaudia mani aita lalo. (1) Sikuli ai kekeni ta na dina ta edia tisa ese e hamaorodia tanobada ena dina helaḡana ta bae moalelaia. Una kekeni na mai dibana una dina helaḡana na Dirava ese se moalelaiamu, una dainai mai hematauraina ida tisa e hamaoroa basine vareai. (2) Hemarai merona ta na ruma ta ta ai e haroromu. Dibana ruma ta ai na e sikuli heboumu merona ta e nohomu​—ia na Iehova ena Witnes e kirikirilaidiava merona. To una hemarai merona na se gari iduara ai baine pidipidi. (3) Tau ta na ena ruma bese iduruna totona e ḡaukara goadamu, dina ta ena bosi ese e noia taravatu iutuna karana ta baine karaia. Ena be mai dibana ena ḡaukara na baine haboioa diba, to bosi e hamaoroa ia na basine koikoimu bona taravatu be badinaiamu, badina Dirava na e uramu ena hesiai taudia na unu bae kara toma.​—Rom. 13:1-4; Heb. 13:18.

2. Ededia henanadai baita herevalaimu, bona dahaka dainai?

² Unu Witnes tatoi ese edena kara e hahedinaraia? Idia na se gari bona se koikoi. To kara badana ta danu e hahedinaraia, una na Dirava ibadinana karana. Idia ta ta na asie ura Dirava ena taravatu bae utu. Dirava ibadinana karana ese e hagoadadia dainai e davari hahetohodia e hahanaidia. Idia ta ta ese una kara e hahedinaraia dainai Iehova na e moale. Ita danu ta uramu Tamada guba ai baita hamoalea. Una dainai ini henanadai baita herevalaimu: Dirava ibadinana karana anina be dahaka? Dahaka dainai Dirava baita badinaia na namo? Bona ini hekwakwanai negadiai dahaka ese baine hagoadada diba Dirava baita badinaia hanaihanai totona?

3. (a) Dirava ena hesiai taudia ese Ia ibadinana karana be ede bae hahedinaraia toma? (b) Ededia haheitalai amo Dirava ibadinana anina baita lalopararalaia?

³ Dirava ena hesiai taudia ese Ia ibadinana karana be ede  bae hahedinaraia toma? Namona na mai kudoudia idoinai ida Dirava bae lalokau henia bona hanaihanai ia ihamoalena karadia bae kara. Baibul ai Dirava ibadinana karana e herevalaia daladia haida mani aita lalodia. Heberu gado ai ina hereva “Dirava ibadinana” e hahanaia anina na ḡau ḡoevana ta idoinai, asi bebeka-bebekana, eiava asi berona. Haheitalai na, Israel taudia na animal e bouboulaiva Iehova ena, bona Taravatu na e gwa idia ese animal asi bebeka-bebekadia bae heni. (Lev. 22:21, 22) Taravatu heḡereḡerena Dirava ena taunimanima ese animal aedia didika, taiadia, o matadia didika eiava mai edia gorere ḡaudia na basie bouboulai. Iehova enai animal ḡoevana, asi bebeka-bebekana, eiava asi berona na mai anina bada. (Mal. 1:6-9) Una dainai ta lalopararamu Iehova ese kara ḡoevadia eiava momokanidia na e lalodia badamu. Ina haheitalai aita laloa: Fruti, o buka, o tulu ta, ta hoiamu neganai, asita uramu ta hoia ḡauna na dika eiava kahadia haida na lalasi. To ta uramu namona ta baita hoia. Una heḡereḡerena, Iehova na e uramu mai kudouda idoinai ida ia baita lalokau henia bona baita badinaia.

4. (a) Dahaka dainai dia ḡoevadae tauna ese Dirava baine badinaia diba? (b) Salamo 103:12-14 ena hereva heḡereḡerena, Iehova be e uramu dahaka baita kara?

⁴ Dirava baita badinaia totona baita ḡoevadae be namo, a? Ita na dia ḡoevadae tauda bona nega momo ta kereremu. Mani badi rua aita herevalai, unu ese be durudamu basita lalo ita na baita ḡoevadae bena Dirava baita badinaia. Ginigunana na, Iehova ese eda dika na se lalotaomu. Baibul na e gwaumu: “Iehova e, kara dika boma lalo tao, Ḡaubada e, daika bema gini?” (Sal. 130:3) Ia na mai dibana ita na dia ḡoḡoevadae, bona eda dika na e gwautaomu. (Sal. 86:5) Iharuana be, Iehova na mai dibana eda goada na mai hetoadia, bona se doridamu basita kara diba ḡaudia baita kara. (Salamo 103:12-14 ba duahi.) Edena dala ai ita na ia vairanai baita ḡoeva eiava asi bebeka-bebekada?

5. Iehova ena hesiai taudia ese ia bae badinaia totona dahaka dainai lalokau na mai anina bada?

⁵ Iehova ena hesiai taudia ese ia bae badinaia totona lalokau na mai anina bada. Namona na mai kudouda idoinai ida Tamada guba ai baita lalokau henia bona ia sibona baita tomadiho henia. Bema unu baita kara tomamu, hahetoho negadiai danu Dirava baita badinaiamu. (1 Sis. 28:9; Mat. 22:37) Matamanai tame herevalaidia Witnes tatoi mani aita lalodia. Dahaka dainai e davari hahetohodia lalodiai Dirava e badinaia? Kekeni be se ura sikuli ai baine moale, a? Mero matamatana be e ura haroro ai haida ese bae hahemaraia, a? Tama be e ura ena moni ḡaukara amo bae hadokoa, a? Lasi. Idia na mai dibadia Iehova ena taravatu na mamaoro, bona lalodia e hadai Tamadia guba ai bae hamoalea. Ia e lalokau henia dainai, abi hidi e ura bae kara neganai iena ura e atoa guna. Unu amo e hahedinaraia idia na Dirava e badinaia.

6. (a) Dahaka dainai Dirava baita badinaia na namo? (b) Adam bona Heva be edena dala ai Dirava se badinaia?

⁶ Dahaka dainai Dirava baita badinaia na namo? Badina Satana na Iehova e gwau-edeede henia, bona e uramu oi danu unu ba kara toma. Eden imeana ai una gwau-edeede aneruna na sibona Satana, eiava “Gwau-edeede tauna” ai e hahelao. Ia ese Iehova ladana namona e hadikaia, badina e gwauva Dirava na Lohia tauna dikana, sibona ena namo mo e lalomu, bona e koikoimu. Adam bona Heva ese Satana  e badinaia bona Iehova e gwau-edeede henia. (Gen. 3:1-6) Eden imeana ai idia ese edia lalokau Iehova enai bae hagoadaia daladia na momo. To Satana ese e tohodia neganai, idia ese mai kudoudia idoinai ida Dirava na se badinaia. Henanadai ma ta bina: Taunimanima be Iehova Dirava e lalokau heniamu dainai ia bae badinaia hanaihanai diba, eiava? Una henanadai na Iobu enai e vara ḡauna amo e hedinarai.

7. Iobu 1:8-11 ai e hahedinaraia heḡereḡerena, Iobu ese Iehova e badinaiava dainai Iehova ena hemami be ede bamona? Satana ese una be ede e laloa toma?

⁷ Iobu na Israel taudia Aigupto ai e nohova neganai e nohova tauna ta. Ia ese Dirava e badinaia ḡoevaḡoevava. Ia danu ita heḡereḡereda, dia ḡoevadae bona e kerereva. To, Iehova ese Iobu e lalokau heniava badina Ia e badinaiava. Toana na matamana negana amo Satana na Iehova e hamaoroa taunimanima ese ia na basie badinaiamu. Una dainai Iehova ese Satana enai Iobu e herevalaia. Iobu na ena mauri dalana amo e hahedinaraia Satana na koikoi tauna! Satana na e ura Iobu baine tohoa. Iehova ese turana Iobu na e abidadama heniava dainai, Satana na se koua Iobu baine tohoa totona.​—Iobu 1:8-11 ba duahi.

8. Satana ese Iobu be edena dala ai e tohoa?

⁸ Satana na asi ena hebogahisi, bona ia na ala-ala tauna. Ia ese Iobu ena ḡau iboudiai e abi oho, ena taḡa e haoredia, ena hesiai taudia e hamasedia, bona ia ladana namona e hadikaia. Danu Iobu ena ruma bese e hahisidia, natuna lalokaudia 10 e hamasedia. Bena Iobu na toto dika hereadia amo e hagorerea​—aena lalona amo ela bona kwarana tubuana na unu toto  amo e honu. Iobu adavana na e lalometau bona e hesiku dainai Iobu e hamaoroa Dirava baine uduḡuiraia bena baine mase. Iobu sibona danu e urava baine mase, to dounu Dirava e badinaiava. Bena Satana na dala ma ta amo Iobu e tohoa. Iobu turana tatoi e ḡaukaralaidia. Unu tatau na dina haida lalodiai Iobu e vadivadia to asie hagoadaia. A lalona ihahisina herevadia e gwaurai bona e gwau henia. E gwauva Dirava ese iena hekwakwanai e havarava bona ia na se laloava. Danu e gwauva Iobu na kara dika tauna dainai unu hekwakwanai na ienai e varava.​—Iobu 1:13-22; 2:7-11; 15:4, 5; 22:3-6; 25:4-6.

9. Iobu na lalona e hadaia hahetoho lalodiai dahaka baine kara?

⁹ Unu hahetoho lalodiai Iobu be dahaka e kara? Ia na dia ḡoevadae. Una dainai mai baduna ida turana koikoidia e gwau henidia, bona se lalo maoromaoro dainai hereva kavakavadia e gwaurai. Ia na sibona maorona e gwaurai, dia Dirava. (Iobu 6:3; 13:4, 5; 32:2; 34:5) Ena be Iobu ena hekwakwanai na momo herea, to Iehova Dirava na se rakatania. Se ura turana koikoidia edia hereva baine abi dae. Ia na eto: “Lau basinato umui na mamaoro, lasi ona lasi vaitani; harihari ela bona baina mase, egu lalo-maoromaoro [“Dirava ibadinana karana,” NW] basina negea.” (Iobu 27:5) Una hereva ese e hahedinaraia Iobu na lalona vada e hadaia Dirava baine badinaia, herevana dahaka bae vara. Iobu na se hesiku; ita danu unu baita kara toma.

10. Edena dala ai oi danu Satana ena hepapahuahu lalonai?

¹⁰ Edena dala ai oi danu Satana ena hepapahuahu lalonai? Satana na vaitani e gwaumu, oi ese Iehova Dirava na so lalokau henia momokanimu, sibomu emu namo dainai basio hesiai heniamu, bona ia na bo rakataniamu! (Iobu 2:4, 5; Apok. 12:10) Una dainai emu hemami be ede bamona? Una na mai lalohisihisina, ani? To mani ina a laloa: Iehova ese oi na e abidadama henimumu, una dainai Satana na se kouamu oi baine tohomu. Iehova na mai dibana ia na bo badinaiamu, bona e gwauhamata baine durumu Satana ba hakoikoia totona. (Heb. 13:6) Ḡau iboudiai ihavaradia Diravana ese e abidadama henidamu na hahenamo ta! Dirava ibadinana karana ena namo o itaiamu, a? Una ese e durudamu Satana ena koikoi herevadia baita dadarai, bona Tamada ladana namona baita abia isi bona ena lohia dalana baita badinaia. Dahaka baita kara Dirava baita badinaia hanaihanai totona?

11. Iobu ena sivarai amo dahaka ta dibamu?

¹¹ Ini “dina gabedia ai” Satana ese Dirava ena hesiai taudia na e tohodia badabadamu. (2 Tim. 3:1) Unu hahetoho lalodiai, dahaka ese baine hagoadada Dirava baita badinaia totona? Iobu ena sivarai amo ḡau momo ta dibamu. Iobu na hahetoho do se davari neganai, ia ese Iehova na e badinaia goadagoadava. Iobu ena amo baita diba ḡaudia toi aita lalodia, unu ese be hagoadadamu Dirava baita badinaia totona.

12. (a) Iobu 26:7, 8, 14 ai e herevalaia heḡereḡerena, edena dala ai Iobu na Iehova ena kara e hoalai bona e matauraia? (b) Edena dala ai Dirava baita dibaia namonamo?

¹² Iobu na Iehova ese e havara ḡaudia e hoalai dainai ena lalokau Ienai e hagoadaia. Iobu na nega e ato Iehova ese e havara ḡaudia baine haerodia. (Iobu 26:7, 8, 14 ba duahi.) Ia ese tanobada, guba, ori bona guba rahurahu e haerodia neganai e hoa, bona e laloparara Iehova e kara ḡaudia iboudiai na do asi dibana namonamo. Danu Iehova ena hereva na e matauraia.  Iobu ese Dirava ena hereva na ini e gwauraia toma: “Ia uduna herevadia na lalogu ai vada na baladia heni.” (Iobu 23:12) Iobu ese Iehova ena kara e hoalai bona e matauraia bada. Ia ese Tamana na e lalokau heniava bona e urava baine hamoalea. Una dainai lalona e hadaia Dirava baine badinaia totona. Namona na Iobu baita tohotohoa. Ita na Dirava ese e havara ḡaudia momo na mai dibada, dia Iobu ena negai e nohova taudia heḡereḡeredia. Bona ita edai Baibul ibounai na mia, una ese e durudamu Iehova baita dibaia namonamo. Ta dibamu ḡaudia na ta hoalaimu. Iehova ena ura ta laloa badamu bona ta matauraiamu dainai, ta lalokau heniamu, ta kamonai heniamu, bona ta ura dikadikamu baita badinaia hanaihanai.​—Iobu 28:28.

13-14. (a) Iobu 31:1 ai, edena dala ai Iobu na Dirava e badinaia? (b) Edena dala ai Iobu baita tohotohoa?

¹³ Iobu na ḡau iboudiai lalodiai Dirava e kamonai heniava. Iobu na e diba Dirava baine badinaia totona, namona na baine kamonai henia. Ḡau iboudiai lalodiai Dirava baita kamonai henia karana ese baine hagoadada Ia baita badinaia hanaihanai. Iobu na e hekwarahiva ena mauri lalonai Dirava baine badinaia totona. Heḡereḡere, ia ese hahine idaudia ediai ena kara nahuadia na e tohova. (Iobu 31:1 ba duahia.) Ia na headava tauna dainai, mai dibana hahine idaudia baine ḡahusidia na kerere. Hari, mahuta hebou urana e havaraiamu hedibaḡanidia na momo herea. Iobu heḡereḡerena, namona na headava tauna o hahinena ese ma ta basine ḡahusia. Danu dala idauidau ai matabodaḡa laulaudia na basita ita. (Mat. 5:28) Bema dina ta ta ai siboda baita hebiagumu, una ese be hagoadadamu Dirava baita badinaia totona.

¹⁴ Danu Iobu na Iehova e kamonai heniava dainai kohu bona moni ai lalohadai maorona e abia. E laloparara bema ena taḡa baine abidadama heni, kara dika badana ta baine karaia diba bona bae panisia.  (Iobu 31:24, 25, 28) Hari, taunimanima momo na kohu bona moni mo e lalomu. Baibul ena hereva heḡereḡerena, bema moni bona kohu ai lalohadai maorona baita abiamu, una ese be hagoadadamu Dirava baita badinaia hanaihanai.​—Her. 30:8, 9; Mat. 6:19-21.

15. (a) Dahaka ese Iobu e durua dainai Dirava e badinaia? (b) Dahaka dainai Iehova ese e henida helarona baita laloa bada?

¹⁵ Iobu na Dirava ese baine henia davana namona e laloa. Ia na e abia dae Dirava ese ena lalo-maoromaoro karana na e laloa badava. (Iobu 31:6) Ena be hahetoho idauidau e davari, to e diba momokani Dirava ese dokonai be hanamoamu. Una ese e durua Dirava baine badinaia. Iehova na Iobu enai e moale dainai e hanamoa ena be Iobu na dia ḡoevadae. (Iobu 42:12-17; Iak. 5:11) Nega vairai danu hahenamo momo be abimu. Iehova o badinaiamu dainai o abia daemu Ia ese be hanamomumu, a? Dirava na se idaumu. (Mal. 3:6) Bema baita helalotaomu Dirava ese ia ta badinaiamu karana na e laloa badamu, kudouda ai eda vaira nega helarona na baita laloa badamu.​—1 Tes. 5:8, 9.

16. Namona na laloda baita hadai dahaka baita kara?

¹⁶ Namona na lalomu ba hadaia, Dirava ba badinaia hanaihanai! Nega haida, reana bo mamiamu turamu eiava ma haida ese Dirava na asie badinaiamu, to basio lalomanoka. Tanobada heḡeḡemadai Dirava e badinaiamu taudia na momo. Danu, oi na Dirava e badinaiava abidadama tataudia bona hahinedia bogaraḡidiai​—ena be dibadia bae hamasedia. (Heb. 11:36-38; 12:1) Namona na laloda baita hadai Iobu ese e gwauraia herevana baita badinaia, eto: “Egu lalo-maoromaoro [“Dirava ibadinana karana,” NW] basina negea.” Bona namona na Iehova ibadinana karana amo Ia baita hanamoa hanaihanai!