1. Nē ǃnona Jehovab di ǀHûǀguitimî-aon hîna ǁaraǃās ǃnâ ra ǃhoaǃgao-ena mati ǁîn mâǀgaibesiba Jehovab ǃnâ ge ǁgau?

ǃNONA aiǁgaudi xa ǂâi re hîna Jehovab di ǀHûǀguitimî-aona ǃkhōǂgā hâde. (1) ǂKham ǀgôas ge skoli tawa ǁîs ǁgauǃnâ-aos xa ama tama ǃoabas ǃnâ ge ǁhao kaihe. Nē ǀgôas ge a ǂan nēs Elob xa ǃkhōǃoahe tama hâsa tsî nēs ǃnâ ǁhaosa ge ǂkhā. (2) Taoxa ǂkhamkhoeb ge omsa xu oms ǀkha ra aoǁnâ. Tsî ge mû ǁîb ǀkha ǀguiba skola ra ǂgâ khoe-i hîna ge Jehovab di ǀHûǀguitimî-aona gere ǃkhāǃkhā i ge xōǀkhāb oms ai ra hâ di. (3) Oms khoeb hîna ǁîb omarisa kōǃgâs ǃgao ra sîsenni ge ǀguitsē ǁîb sîsen mā-aob xa ge ǂhumi kaihe tamas ka io ǁgauoǃnâ xū-e ge dī kaihe. ǁÎb sîsen-eb a ǂoaǃnâ ǁkhā xaweb ge nē ǃgâsaba ǁîb ǀhōnkhoeba ge mîǃāba ǁîb a ǂhumi ǁoasa tsî Elob ǁgaraga nî ǁnâuǀnamse īsa nēs a Elob ǂgaoǀkhā amaga.—Rom. 13:1-4; Heb. 13:18.

2. Mâ dîde da nî ǃhoaǃgao tsî tae-i ǃaroma?

² Mâ ǀgauga da nē ǃnona ǃgâsan ǃnâ ra mû? ǃKharagagu ǀgauga du ge a mû ǁkhā aiǁgause ǁkhoaǂgaosib tsî ama-aisib tsîna. Xawe ǀgui ǀgaub ge ra mâǂoa—ǂhauǃnâsiba. Nē ǃnona khoen hoan ge ǂgomǃgâsiba Jehovab ǃnâ ra ǁgau. Mâ i hoa-i ge Jehovab ǁgaraga ǁnâuǀnamoǃnâ ǂgao tama hâ. ǂHauǃnâsib ge nē khoena ge ǁgari în nēn ge tanisen ǀgaub ǃnâ tanisen. Jehovab ge mâ ǀgui-i hoa-i ǀkha kaise a ǂkhî nēti tanisens ǃaroma. Sada tsîn ge sada ǀhomsi ǁGûba ra ǂkhî kai ǂgao. ǀKhī î da sao ra dîde ǃhoaǃgao: ǂHauǃnâsiba a tae? Tae-i ǃaroma da ǂhauǃnâsiba ǂhâ hâ? Tsî tae-i ǃaroma du sadu mâǀgaibesiba nî ǀgaiǀgai ǂhauǃnâsiba ūhâ ǀgaras ǃaroma?

3. (a) ǂHauǃnâsiba tae-e sadu ǃoa ra ǂâibasen? (b) Mâ aiǁgaude ra ǁgau ǂnao-osis tsî loasasib sadu ǃoa-ai ǂhâǂhâsasa?

³ Elob khoen asa i ga sada ǃoa ǁnaeǁgau o, ob ge ǂhauǃnâsiba  ra ǂâibasen hoaraga ǂgaob ǀkha ǀnams tsî khôahe ǁoa ǂgomǃgâsib tsîna Jehovab ǃnâ ūhâsa. Nēs ge nî hui da ǁÎb ǂâisa sada mîmâidi ǃnâ ǂgurose mâisa. ǀNî hâ khaoǃhūga kō re. ǀGui ǁguiǃās Elobmîs dis “ǂhauǃnâsib” dis ge ǀoasa tamas ka io ǀguiǃgupu di ra ǂâibasen. Aiǁgause Israelǁaes ge ǁguibana Jehovaba gere ǁguiba o, o i ge ǁgaraga gere ǂgaoǀkhā nî în ǀoasa xamani-e ǁguiba. * (Lev. 22:21, 22) Elob khoen ge ǃhora hâ xamanin hîna ǀnūb, ǂgaes tamas ka io mûsa ūhâ tamana ge ǁguiba tama hâ i. Jehovaba i ge kaise ge ǂhâǂhâsaba i ǀoasa xamani-i nî ǁguibahesa. (Mal. 1:6-9) ǁNās ǀkha da ge a ǁnâuǃā ǁkhā Jehovab tae-i ǃaroma ǀoasasiba ra ǃgôaǃgâsa. Xū-e du ga ǁama o, hai ǂû-i kas, ǂkhani-i kas tamas ka io kuru-ū xū i kas, o du ge ǂhâba hâ î-i ǁnā xū-e tā khôa, ā-e ūhâ tamas ka io ǃâ-e ǀkhai. ǁNā xū-i nî hoasa du ge ǂhâba hâ. Jehovab ge ǁkhāse ra tsâ ǁîb ǃoa-ai du ūhâ ǀnammi tsî ǂgomǃgâsib tawa i ra ǀkhī o. Nēs ge nî ǂnao o tamas ka io nî ǀoasa i.

4. (a) ǀOasa kurusa ūhâ tama khoe-e tae-i ǃaroma ǂhauǃnâsiba a ǁgau ǁkhā? (b) Psalmdi 103:12-14 ǃoagub Jehovaba tae-e sida xu ra ǂgaoǀkhā?

⁴ Nēsa ra ǂâibasen ǀoasa du nîsa ǂhauǃnâsiba ǁgaus ǃaroma? Xawe du ge a ǂâi ǁkhā sadu anu tama nēs ǃoa-ai di. ǀGam ǃaroma ra xa ǂâi re ǃaoba du tide ra. ǂGurose Jehovab ge sadu ǂkhabusasigu ai kō tama hâ. ǁÎb mîs ge ra mî: “Sats ǃKhūts nî dīsādi ai ǃgaoǃgâs karao, ǃKhūtse, tari-e nî mâ ǁkhā?” (Psa. 130:3) ǁÎb ge a ǂan sadu ǀoasa kurusa ūhâ tama hâsa tsî ǁore-aosa tsî a ǀûbaǀnamxa. (Psa. 86:5) ǀGamǁîse Jehovab ge sadu ǃnubusiga a ǂan tsî ǃnāsa-e sado xu ǂgaoǀkhā tama hâ dī ǁkhā du as xa. (Khomai re Psalmdi 103:12-14.) Mâ ǀgaub ǃnâ du ǁnai a ǀoasa tamas ka io a ǂnao o Jehovab mû ǁae?

5. Jehovab di ǀHûǀguitimî-aon ǃaromab mati ǀnamma a ǂhâǂhâsa ǂhauǃnâsiba ūhâs ǃaroma?

⁵ Jehovab di ǀHûǀguitimî-aon ge ǂhauǃnâsiba ūhâs ǃaroma ǀnamma ǂhâ hâ. Sadu ǀnammi Elob ǃoa-ai tsî mâǀgaibesib sadu ǀhomsi ǁGûb ǃnâs tsîna ūhâ ǀgaras ǃaroma du ge nî ǀoasa tsî ǂnao o. Sadu ǀnammi ga ǁnāti hâ ǀgara o, o du ge ǂhauǃnâsiba nî ūhâ. (1Kro. 28:9; Mat. 22:37) ǁNā ǃnona ǃgâsan hîna da go tsoatsoas ǃnâ ǃhoaǃgaon xa ǂâi re. Tae-i ǃaroman ge ǁnā ǀgaub ǃnâ tanisenba? ǂKham ǃgâsasa ǁkhoaxa ǁaeba ūhâsa a ǃhuisa, ǂkham ǃgâsaba ra ǃâubasen dao-ams tawa tao kaihesa tamas ka iob omaris danaba sîsen-e ra ǂoaǃnâ ǂgao? Di tamas ge. Xawen ge ǂan Jehovab ǂhanu-ai ǁgaraga ūhâsa ǁnās ǃgaon ge ǁîn ǀhomsi ǁGûba ra ǂkhîǂkhî xūna ǂâis ǃnâ ra ūhâ. ǁÎban ūba hâ ǀnammi ge ra hui nî în ǁîn mîmâidi ǃnâ ǁîba ǂgurose mâi. Nēs ǀkhan ge ǁîn ǂhauǃnâsiba ra sîsen-ū.

6. (a) Tae-i ǃaroma du ǂhauǃnâsiba ǂhâ hâ? (b) Mati ra Adammi tsî Evas tsîra nēs ǃnâ ge dan tama hâ i?

⁶ Tae-e ǂhauǃnâsiba ra ǂhâǂhâsa kai hoa du nēsa nî ûiǂuise? ǂHauǃnâsiba du ge ǂhâ hâ ǁGâuab ge Jehovab di ǂhauǃnâsiba a dîǃnâ xui-ao tsî du ge sadu tsîna nēs ǃnâ-ū a nēs ǃâ. Nē mâǃoaxa ǀhomǃgāb ge aitsama ge ǁGâua kaisen tamas ka io “mâǃoasabe” kai Edenni ǃhanab ǃnâ. ǁÎb ge  Jehovab ǀonsa ge ǁgaiǁgai mîs ǃnâ-ū Elob a ǁgai, ǁî ǂâibasenxa tsî ǂhauǃnâ tama hâ ǂgaeǂgui-ao di. Tsûtsûsase ra ge Adammi tsî Evas tsîra ǁGâuab ǀkhāba ge ǁhûi tsî Jehovab ǃoa-ai ge ǁore. (Gen. 3:1-6) Ûib Edenni ǃhanab dib ge ǁîra ǂgui aiǂhanuga ge mā ǁîra ǀnamma Jehovab ǃoa-ai ǀgaiǀgaisa. Xawe ǁnā mâǃoas ǁGâuab dis ǁaeb ǃnâ i ge ǁîra di ǀnamma ge ǀoasa tama hâ i. Dîs ge ge dî-e: Khoena Jehova Elob ǃnâ nî mâǁapo ǀnammi xa ǃaroma-e hâse? ǀNî mîdi ǃnâ khoena ǂhauǃnâsiba a ǁgau ǁkhā? Nē dîs ge Jobi ǁhōb ǃnâ ge dî-e.

7. Job 1:8-11 tawa i ra ǁgau khami kha ge Jehovab tsî ǁGâuab tsîkha mati Jobi di ǂhauǃnâsib xa gere tsâ?

⁷ Jobi ge Israelǁaes ge Egipteb ǃnâ hâ i ǁaeb ǃnâ ge ûi hâ i. ǁÎb ǂhauǃnâsib ge ge ǂoaǂamsa i. Sadu khamib ge ǁîb tsîna ǀoasa kurusa ge ūhâ tama hâ i. Dīsāb ge gere. Xaweb ge Jehovaba Joba ǁîb ǂhauǃnâsib ǃaroma ge ǀnam i. ǁGâuab ge ǀnai Jehovaba khoen ǂhauǃnâsib xa a dîǃnâ khami i ge ra ǁgausen. Ob ge Jehovaba ǁGâuaba Jobi ǂhauǃnâsiba ǃoa ge ǁnaeǁgau. Nē khoeb ûib ge ǁGâuaba ǂhumi-aob ase ge ǁgau. ǁGâuab ge ge ǁgari îb Jobi di ǂhauǃnâsiba ǃâitsâ-e. Jehovab ge ǁîb ǀhōb Joba ge ǂgomǃgâ hâ i tsî nēs ǃaroma ǁGâuaba ge mā-am ǁîba ǃâitsâsa.​—Khomai re Job 1:8-11.

8. ǁGâuaba mati Joba ge ǁnāǂam?

⁸ ǁGâuab ge a ǁgai tsî a ǃgam-ao. ǁÎb ge Jobi xūna ge hîgaga tsî ǁîb ǃkhūsis tsî ǃgān tsîna ge ūxubi tsî ǁîb ǀonsa ge ǁgaiǁgai. ǁÎb ge Jobi omarisa ǁnāǂam tsî ǁîb di disi ǀgôana ge ǃgam. Tsîb ge ǁnāpaxū Jobi di sorosa ge ǁnāǂam tsî ǁîb ǂurusiba  ge ūbe, kai tsûba ra ǃaroma ǀaeba mā bis ǃnâ-ū. Jobi kaikhoes ge nē xūn xa tsâǀkhāhe tsî ǃoab ǃnâ hâse ge mîba bi îb Eloba ǀâxare tsî ǁō. Jobi tsîn ge gere ǁō ǂgao xaweb ge ǁîb ǂhauǃnâsiba ge ǃkhōǀgaibe. Ob ge ǁGâuaba ǀnî hâ ǀgaub ǃnâ ge ǁnāǂam bi. ǁÎb ge ǁîb di ǃnona ǀhōsaga ge sîsen-ū. ǁÎgu ge ǁîba tsēde ge sari xawe ge ǂkhâǃnâ bi tama hâ i. Xawe gu ge ǁîga ǁîba gere mîǁgaiǁgai tsî mîǃhara. ǁÎgu ge gere mî Elob nē xūn ǃgâb ai hâsa tsî ǁîb ǂhauǃnâsib xa ǁae tama di. ǁÎgu ge ge mî Jobi a tsūdi-ao tsî nē xūn hînab ra ǃkharu ǃnâna ǁîb ai aitsama a hausa.​—Job 1:13-22; 2:7-11; 15:4, 5; 22:3-6; 25:4-6.

9. Nē ǃâitsân ǃnâ Joba tae-e ge ǂkhā dīsa?

⁹ Joba mati nē xūn hoana ge sîsenǂam? ǁÎb ge ǀoasa kurusa ge ūhâ tama hâ i. ǁÎb ge ǁgâib ǃnâ ama tama ǀhōsa ga ge ǃhoaǃoa tsî ega ge ǂanǃgâ xūnab ge ǂâiǃgâ tama hâse gere mîsa. ǁÎb ge ǁîb di ǂhauǃnâsiba Elob dib ǃgâ-ai ge ǁkhauba. (Job 6:3; 13:4, 5; 32:2; 34:5) Xaweb ge ǁîb di ǃgom ǁaegu ǃnâs tsîna Elob ǃoa-ai ge tawasen tama hâ i. ǁÎb ge ge mā-am tama hâ i ǁnā ama tama ǀhōsagu di ǂhumiba ǂgomsa. ǁîb ge ge mî: “Tita xu a-i ǃnūse hâ, sago ta nî ǂhanu-ai kai ǃkhaisa; ǁō ta nîs kōse ta ge ti ǂhauǃnâsiba tita xu sîsenbē tide.” (Job 27:5) Nē ǃnurib ge kaise ge ǂhâǂhâsa i. Jobi ge nēs ǃnâ ge māǁnâsen tama hâ i, sadu tsîn ge nēsa a dī ǁkhā.

10. Mati du ǁGâuab ge Jobi ǃoa-ai a dī mâsib ǃnâ ǃâ-e ūhâ?

¹⁰ ǁGâuab ge sadu hoa du xas tsîna ǁkhā xū-e ra mî. Sado mati nēs ǃnâ ǃâ-e ūhâ? ǁÎb ge ra mî sadu Eloba amabes ǃnâ ǀnam tama hâ di tsî ǁîba nî ǃoaba ǀûsa sadu ûiga sâus ǃaroma. Tsî ǂhauǃnâsib hîna du ūhâb ama tama hâsa. (Job 2:4, 5; J.ǂHa. 12:10) Nēsa mati ra tsâ kai du? Tsûtsûsa a ama tama-e? Xawe ǂâi re nēsa: Jehovab ge ǂâusase ra ǂgomǃgâ du tsî ǃgâi aiǂhanuga mâi-aiǃâba du hâ. Jehovab ge ra mā-am îb ǁGâuaba sadu ǂhauǃnâsiba ǃâitsâ. Jehovab ge ra ǂgomǃgâ sadu nî ǂhauǃnâse mâǀgaibesa tsî ǁGâuaba ǂhumi-aob ase nî ǁgausa. ǁÎb ge ra mîǁgui hui dub nîsa nēsa dīsa. (Heb. 13:6) Nēb ge aiǂhanuba sadu Hoaǀgaixa Kuru-aob xa ǂgomǃgâhesa. Mû î du ra tae-i ǃaromab ǂhauǃnâsiba a ǂhâǂhâsasa. Nēs ge ra hui da ǁGâuaba ǂhumi-aob ase ǁgausa tsî sadu ǁGûb di ǀonsa ǃanuǃanu tsî ǂgaeǂguis âba ǂkhâǃnâsa. Nē ǂhâǂhâsa ǀgauga du mati a omkhâi ǁkhā?

11. Joba xu da tae-e a ǁkhāǁkhāsen ǁkhā?

¹¹ ǁGâuab ge ǁîb di ǃâitsâga nē “ǀuni tsēdi” ǃnâ ge ǀgaiǀgai. (2Tim. 3:1) Nē ǃgom ǁaegu ǃnâ du mati nî ǀgaiǀgaisen sadu ǂhauǃnâsiba ūhâ ǀgarasa? Nēsa du ge Joba xu a ǁkhāǁkhāsen ǁkhā. ǁÎb ǃâitsâdi nî tsoatsoas aiǃâb ge Joba ǀnai ǁîb di ǂhauǃnâsiba ge omkhâi. ǃNona xūna ǁîba xu ǁkhāǁkhāsen re hui du ǁkhā a na sadu ǂhauǃnâsiba ǀgaiǀgais ǃnâ.

12. (a) Job 26:7, 8, 14 ǃoagub ge Joba mati buruxa ǃgôaǃgâsib Jehovabab ūba hâba omkhâi? (b) Sida tsîna mati sida ǂgaoga Jehovaba ǃgôaǃgâsiba ūhâbas ǀkha a omkhâi ǁkhā?

¹² Jobi ge ǁîb ǀnamma Elob ǃoa-ai ge ǀgaiǀgai ǃgôaǃgâsiba omkhâis ǃnâ-ū. Jobi ge ǁaeba gere ǁamaǂui Jehovab buruxa kurusa ǂâiǃgâs ǃnâ-ū. (Khomai re Job 26:7, 8, 14.) ǁÎb ge kaise gere buru  ǃhūbaib, ǀhommi, ǃâudi tsî ǃgūrub tsîn xab gere ǂâi o xaweb ge ge mûǂan ǀoro ǂansab kurus xa ūhâsa. Jehovab buruxa ǀgaugu xas tsînab ge nēti gere tsâ: “Mîdi ǁîb di ams dide ta ge ti ǂhanub ǃgâ-ai ge sâubasen.” Nēsab ge Joba Jehovab xa ge mî. (Job 23:12) Jobi di buruxa ǃgôasib hînab Jehovaba ūba hâb ge ge ǁgari bi, îb ǁîb ǁGûba ǀnam tsî ǂkhîǂkhî ǂgao. Jobi ge ǁîb mîs ai ge mâǀgara tsî ǁîb ǂhauǃnâsiba ge ǀgaiǀgai. Jobi khami du ge sadu tsîna nî dī. Sadu ge Kurus xa ǂgui xūna a ǂan Jobi ǁaeb ǃnâ ge ûi hâ i khoen xa. Tsî du ge ǀoasa Elobmîsa ūhâ Jehova Elob xa hoa xūna ǂans ǃaroma. Hoa xūn hîna du ra ǁkhāǁkhāsenan ge nî hui du sadu ǂgaoga burugâb ǀkha ǀoaǀoasa. Sadu buruxa ǃgôaǃgâsib Jehovaba du ūba hâb ge nî hui du ǀnamma omkhâis ǃnâ tsî ǁîba ǁnâuǀnamsa tsî nēs ǃnâ-ū sadu ǂhauǃnâsiba ǃkhōǀgarasa.​—Job 28:28.

13-14. (a) Job 31:1 tawa i ra ǁgau-e khamib ge Joba mati ǁgau ǁnâuǀnamxab a ǃkhaisa? (b) Mati da Jobi aiǁgausa a sao ǁkhā?

¹³ Jobi ge ǁîb di ǀgaisa ǁnâuǀnamxasib ǃnâ-ū ǁîb di ǂhauǃnâsiba ge ǃkhōǀgara. Jobi ge ge ǂan i ǂhauǃnasiba ūhâs ǁnâuǀnamxasiba ǂhâ hâsa. ǁNās ǀkha du ge ǁnâuǀnam du ra ǁaeb hoaba ra ǀgaiǀgaisen sadu ǂhauǃnâsiba ūhâ ǀgarasa. Jobi ge tsēs hoasa ǀgaisase gere sîsen Eloba ǁîb ǁnâuǀnamxasiba ǁgaus ǃnâ. Aiǁgauseb ge ǁîb tara tama tarekhoede xu gere ǂgōsen. (Khomai re Job 31:1.) ǃGame hâ khoeb aseb ge ge ǂan i ǂhanu tama i hâsa ǁîb tara tama tarekhoedi ǀkha ǂhâbasa tama ǂgui ǁaeba ūhâsa. Nētsēs ǃhūbaib ge ǁgoe-ūgub di ǃâitsân ǀkha ra ǃâitsâ da. Jobi khami du ge ǃgame-ū tama du hâ khoen ǀkha ǂhâbasa tama ǂgui ǁaeba ūhâ tide. ǁGaiǁgaibe ǀōǀkhā hâ khoen ai-īsiga kōsa xu da nî ǂgōsen? (Mat. 5:28) Nē xūna xu  du ga ǂgōsen o, o du ge sadu ǂhauǃnâsiba nî ǀgaiǀgai tsî nî ūhâ ǀgara.

¹⁴ Jobi tsîn ge Jehovaba ge ǁnâuǀnam ǃkhūsibab ra mû ǀgaub ǃnâ. Jobi ge ge mûǂan ǁîb ǂgomǃgâsibab ga ǃkhūsis ǃnâ mâi o, ob ǁōb ǀkha a ǁkharahe ǁkhā ǃkhaisa. (Job 31:24, 25, 28) Nētsē da ge ǃkhū ǂgaos ǀguisa ra hî khoen xa ǀoahe hâ ǃhūbaib ǃnâ ǁan hâ. Elobmîs ǂâi ǀgauba du ga mari-i tsî ǃhūbaib xūn ai ūhâ o, o du ge ǀgaiǀgaisen tsî sadu ǂhauǃnâsiba a ūhâ ǀgara ǁkhā.​—ǂKhm. 30:8, 9; Mat. 6:19-21.

15. (a) Mâ ǃâubasensa Joba ge hui îb ǁîb ǂhauǃnâsiba ūhâ ǀgara? (b) Tae-i ǃaroma-i a hui du ǁkhā Jehovab nî mā du ǀkhaegu ai ǂâisa ǂnûisa?

¹⁵ Jobi ge Elob di ǀkhaeb hînab nî mā dawa-am bis dis ai ǁîb ǂâisa ge ǂnûi. ǁÎb ge ǂgomǃgâsiba ge ūhâ i Elob ǁîb ǂhauǃnâsiba ra ǃgôaǃgâsa. (Job 31:6) ǁÎb ǃâitsâgu hoagu ǃnâb ge Joba ǂgomǃgâsiba ge ūhâ i Jehovab ǀams ai nî ǀkhaebisa. Nē ǂgomǃgâsib ge ge hui bi îb ǂhauǃnâse hâ. Jehovab ge Jobi di ǂhauǃnâsib ǀkha ge ǂkhîǂâixa i tsî ǁîba ǂgui xūn ǀkha ge ǀkhae ǀoasa kurusab ge ūhâ tama hâ i xawe. (Job 42:12-17; Jak. 5:11) Tsî nēs xa kai ǀkhaegu ge noxoba aiǃâ ǃâu bi hâ. ǀGaisa ǂgomsa du ūhâ Jehovab sadu ǂhauǃnâsib ǃaroma nî ǀkhae du sa? Sada ǃKhūb ge ǀkharaǀkharasen tama hâ. (Mal. 3:6) ǂAnǃgâ du ga o ǁîb sadu ǂhauǃnasiba ra ǃgôaǃgâsa, o du ge sadu ǂgaogu ǃnâ hānîǁaeba a ǃâubasen ǁkhā.​—1Tes. 5:8, 9.

16. Tae-e du nî mîmâi dīsa?

¹⁶ ǁNā-amaga ǂgōsen re sadu di ǂhauǃnâsiba nî khôa xūna xu. ǀNî ǁaegu ai du ge a ǀguri tsâsen ǁkhā nē ǃnoa ǃgomsin ǃgao xawe du ge tātsē ǀguri hâ tama hâ. ǂGui khoen ǂhauǃnâsiba ra ūhâ ǀgaran ǀkha du ge ǃhūbaib ǂhawase hâ. Tsî du ge ǂgui aogu tsî taradi hîna Elobmîs ǁaegu ǃnâ ǁîn ǂhauǃnâsiba ǁōb ǀkhan gere ǁgari-e xawe a ūhâ ǀgaran tsîna ūhâ. (Heb. 11:36-38; 12:1) A da hoa da Jobi mîdi ǃoa-ai ûi re: “ǁŌ ta nîs kōse ta ge ti ǂhauǃnâsiba tita xu sîsenbē tide.” Tsî sadu ǂhauǃnâsibab Jehovaba ǀamosib kōse koa re.