1. ¿Keniuj kinextijkej nejin eyi tokniuan ke amo kikauaj Jiova?

MAJ titanemilikan itech nejin eyi neskayomej. Se ichpoch yetok kampa momachtia uan itamachtijkauj kitajtania maj tapaleui itech se iluit tein amo kiyolpaktia Dios uan ika poujkaitalis kiluia itamachtijkauj ke amo tapaleuis. Se telpoch tanojnotstok uan kiita ke itech okse kali tein kisentoka, nemi se akin iuan momachtia akin kinpinaujtiani itaixpantijkauan Jiova, maski moui, tanotsa. Se tepopaj moajsi itekipan uan akin kitekitilia kitajtania maj kichiua se taman tein amo melauak. Maski uelis kipolos itekiuj, kimelauilia ke yejua amo takajkayaua uan ke kitakamati tanauatilmej porin Dios kichia maj itekitikauan kichiuakan nejon (Rom. 13:1-4; Heb. 13:18).

2. ¿Katiyejua netajtanilmej tiknankilitij itech nejin tamachtilis uan keyej?

² ¿Katiyejua kualneskayot tikijtoskiaj ke kinextijkej nejon eyi tokniuan? Xa tikijtoskiaj ke kinextijkej yolchikaualis, melaujkayot uan oksekiok. Sayoj ke tein okachi kinolinij maj ijkon kichiuakan yejua amo kinekiskej kikauaskej Dios. Nochin mochikauaj kitakamatiskej itanauatiluan Jiova. Tein melauj, yejuatsin senkis yolpaki ika tein sejsemej kichiujkej. Tejuan no tiknekij maj toTajtsin yolpaki ika tein tikchiuaj. Yejua ika, maj tiknankilikan nejin netajtanilmej: ¿Toni kijtosneki maj amo tikauakan Dios? ¿Keyej motelneki? ¿Uan keniuj uelis okachi tiknekiskej amo tikauaskej Dios itech nejin tonalmej tein ouijkej?

3. 1) ¿Toni kijtosneki amo tikauaskej Dios? 2) ¿Katiyejua neskayomej techpaleuiaj maj tikajsikamatikan toni kijtosneki amo tikauaskej Dios?

³ Amo se kikauas Dios kijtosneki senkis se kitasojtas uan se kiueyichiuas uan nochipa se kichiuas tein  kiyolpaktia. Itech Biblia, tajtol hebreo tein motajtolkepa “amo se kikauas Dios oso maj toyolo ajsito iuan”, mokui keman ika motajtoua teisa tein ajsitok oso amo teyi kipoloua. Kemej neskayot, Tanauatil tein Dios kimakak Moisés kijtouaya ke keman israelitas kimakayaj Jiova se tapial kemej nemaktil, monekia amo kipias se kokolis (Lev. 22:21, 22). * Itekitikauan Dios amo monekia kitemakaskej se tapial tein kipoloskia se imets, se inakas, se iixtololo oso se tein mokokouaya. Jiova kiitaya ke motelnekia maj se tapial ajsitoni uan maj amo kipiani se kokolis (Mal. 1:6-9). ¿Keyej kineki Jiova maj ajsito nochi tein tikmakaskej? Nejin neskayot techpaleuis maj tikajsikamatikan. Keman tikouaj teisa kemej se takilot, tiknekij maj ajsitok, amo maj kojkoyoktik nion maj palaktik. No ijkon, Jiova kineki maj senkis tiktasojtakan uan maj amo keman tikauakan.

4. 1) Xikonmelaua keyej maski titajtakouanij uelis tikpiaskej toyolo ajsitok iuan Dios. 2) Kemej kijtoua Salmo 103:12-14, ¿toni kichia Jiova maj tikchiuakan?

⁴ Kemej titajtakouanij uan miakpa timopolouaj, xa timotajtaniaj: “¿Uelis ajsitos toyolo iuan Dios?”. Kemaj. Maj tikitakan ome taman keyej: Yekinika porin Jiova amo sayoj kiitstok tonepololuan. ITajtol techiluia: “Jiova, komo nepololmej tikitaskia, ¿akoni Jiova ueliskia ijkatos moixpan?” (Sal. 130:3). Yejuatsin kimati ke titajtakouanij uan techtapojpoluia (Sal. 86:5). Ojpatika, porin Jiova kimati tein ueli tikchiuaj uan amo kichia maj tikchiuakan tein amo tiuelij (xikonixtajtolti Salmo 103:12-14). Yejua ika, ¿keniuj uelis amo tikauaskej Dios oso tikpiaskej toyolo ajsitok iuan?

5. ¿Keyej netasojtalis techpaleuis maj amo tikauakan Dios?

⁵ Netasojtalis techpaleuis maj amo tikauakan Dios. Moneki maj senkis tiktasojtakan toTajtsin Jiova uan maj amo keman tikauakan maski tikpiaskej tayejyekolismej. Komo ijkon tikchiuaj, tiknextiskej ke toyolo ajsitok iuan (1 Crón. 28:9; Mat. 22:37). Maj oksepa tikitakan tein kinpanok eyi tokniuan akin ininka titajtojkej itech yekinika párrafo. Ichpoch kinekia yolpakis kaltamachtiloyan, telpoch amo kinekia maj kipinaujtianij itech tanojnotsalis uan tepopaj amo kinekia kipolos itekiuj. Komo ijkon, ¿keyej amo kichiujkej tein kiniluiayaj? Porin kimatij ke itanauatiluan Dios melaujkej uan okachi kinekij kiyolpaktiskej toTajtsin. Kemej kitasojtaj Jiova, kitayekanaltijkej itanauatiluan keman monekik kiixtaliskej kichiuaskej teisa. Ijkon kinextiaj ke amo kikauaj Dios.

6. 1) ¿Keyej semi moneki maj tisejsemej amo tikauakan Dios? 2) ¿Keniuj kinextijkej Adán uan Eva ke ininyolo amo ajsitoya iuan Dios?

⁶ ¿Keyej semi moneki maj tisejsemej amo tikauakan Dios? Porin Satanás kiixnamikini Jiova uan tejuan techijtouiliani tein amo melauak. Itech xochital Edén, nejon ángel akin amo yolkuali mochiuak Satanás, tein kijtosneki “Taixnamikkej”. Yejua kipitsotilij itokay Jiova porin kiteajsikamatiltij ke amo kuali taixyekanaya, ke moueyinekia uan ke amo kichiuaya tein melauak.  Tetayokoltij tikijtoskej ke Adán uan Eva kipaleuijkej Satanás uan kiixnamikkej Dios (Gén. 3:1-6). Keman nemiaj Edén, kipiayaj tein kinpaleuiskia maj okachi kitasojtanij Jiova. Sayoj ke, ijkuak Satanás taixnamikik, netasojtalis tein kipialiayaj Jiova amo ajsitoya. Miak xiujmej satepan, itech itonaluan Job, monekia monankilis nejin: ¿Onkaskiaj taltikpakneminij akin kitasojtaskiaj Jiova uan amo kikauaskiaj? Oso, ¿ueliskiaj kipiaskej ininyolo ajsitok iuan Dios?

7. Kemej kijtoua Job 1:8-11, ¿keniuj kiitaya Jiova maj Job kipiani iyolo ajsitok iuan, uan keniuj kiitaya Satanás?

⁷ Job nemik itech tonalmej keman israelitas moajsiaj ompa Egipto. Ijkuak, amo moajsia nion se taltikpaknenkej maj kipiani iyolo ajsitok kemej yejua. Maski katka tajtakojkej uan mopolouaya kemej tejuan, Dios kitasojtaya porin amo kikauaya. Xa Satanás kiixnamikkaya Jiova keman kijtojka ke taltikpakneminij amo ueliskiaj kipiaskej ininyolo ajsitok iuan. Yejua ika, Dios kiluij maj kiitani Job. Kemej monejnemiltiaya kinextiaya ke Satanás katka se takajkayaujkej. Ompa, Satanás kiluij Dios maj kikauani maj kiyejyeko Job. Jiova takuaujtamatia iuan itasojikniuj Job, yejua ika kikauak maj Satanás kiyejyekouani (xikonixtajtolti Job 1:8-11).

8. ¿Keniuj Satanás kitajyouiltij Job?

⁸ Satanás tel amo yolkuali uan temiktijkej. Kikuilij Job nochi tein kipiaya uan kichiuak maj amo kuali ika tajtokan. Uan no, kinmiktilij majtakti ikoneuan akin  semi kintasojtaya. Satepan, kichiuak maj kipiani se ueyi kokolis tein peuaya imetstampa uan tamia itech itsontekon. Kemej inamik Job semi moyolkokojtoya kiluij maj mosenkauani, maj kiuijuikaltiani Dios uan maj mikini. Job kinejnekia momikilis, sayoj ke amo keman kikauak Dios. Ompa, Satanás kiyejyekoj ika okse taman. Eyi itasojikniuan Job akin kikalpanotoj miak tonalmej amo kiyolseuijkej, ta kiajuakej uan kijijtojkej. Kiluijkej ke Dios kitajyouiltijtoya uan ke amo kiitaya ox iyolo ajsitoya iuan oso amo. Hasta kiluijkej ke amo yolkuali katka uan ke kinamikia nochi tein kipanotoya (Job 1:13-22; 2:7-11; 15:4, 5; 22:3-6; 25:4-6).

9. Maski Job semi tajyouij, ¿toni amo kichiuak?

⁹ ¿Toni kichiuak Job keman semi tajyouij? Yejua no mopolouaya, yejua ika kualanik uan kinmelauak akin yajkaj kiyolseuitoj uan kijtoj seki taman tein satepan kiitak ke amo kuali kinemilijka. Kijtoj ke katka okachi yolmelauak ke Dios (Job 6:3; 13:4, 5; 32:2; 34:5). Maski semi tajyouijtoya amo keman kikauak Jiova. Amo kineltokak tein kiluijkej akin kijtouayaj ke katkaj itasojikniuan. Kijtoj: “¡Nion no xiknemilikan ke nejua namechita nanyolmelaujkej! ¡Amo keman nikauas Dios hasta maj nimiki!” (Job 27:5). Ika tein kijtoj, kiteajsikamatiltij ke amo keman kikauaskia Dios maski semi tajyouiskia. Amo keman mosenkauak uan tejuan no moneki ijkon tikchiuaskej.

10. ¿Keniuj Satanás no techijtouilia tein kijtouilij Job?

¹⁰ Tein Satanás kijtouilij Job no techijtouilia tejuan. Yejua kijtoua ke amo yekmelauj tiktasojtaj Jiova, ke tikauaskej komo tikitaj ke uelis timomikiliskej uan ke toyolo amo ajsitok iuan (Job 2:4, 5; Apoc. 12:10). ¿Melauj ke techyolkokoua tein kijtoua? Maj titanemilikan itech nejin: Kemej Jiova semi touan takuaujtamati kikaua maj Satanás techyejyeko, ijkon ueli tiknextiaj ke amo tikauaj uan ke Satanás se takajkayaujkej. Uan yejuatsin no motenkaua techpaleuis (Heb. 13:6). ¡Se ueyi tatiochiualis maj touan takuaujtamati Akin tekiuajti iluikak uan taltikpak! ¿Tikitaj keyej semi moneki maj amo tikauakan Dios? Porin ijkon tiknextiaj ke amo melauak tein Satanás kijtoua uan tikpaleuiaj itokay toTajtsin uan kemej taixyekana. Yejua ika, ¿keniuj uelis okachi tiknekiskej amo tikauaskej Dios?

11. ¿Toni techmachtia ineskayo Job?

¹¹ Itech nejin itamian tonalmej, Satanás okachi kitemouani kinixnamikis itekitikauan Dios (2 Tim. 3:1). Yejua ika, ¿toni techpaleuis axkan maj okachi tiknekikan amo tikauaskej Dios? Ineskayo Job uelis techpaleuis. Achto ke kipanoskia ouijkayomej, kinextijkaya ke amo kikauaya Dios. Maj tikitakan eyi taman tein kichiuak uan keniuj uelis no ijkon tikchiuaskej.

12. 1) Kemej kijtoua Job 26:7, 8, 14, ¿toni kichiuak maj Job kimoujkaitani uan kipoujkaitani Jiova? 2) ¿Toni techpaleuis maj no tikmoujkaitakan Dios?

¹² Okachi kitasojtaya Dios keman kiitaya itachijchiualis. Job tanemiliaya itech nochi tein Jiova kichijchiuak (xikonixtajtolti Job 26:7, 8, 14).  Keman tanemilij keniuj chijchiujtoya taltikpak, iluikak, mixti uan keman tatikuini semi kimoujkaitak, maski kiajsikamatik ke semi tepitsin kiixmatia itachijchiualis Dios. No semi kipatiuitak tein Jiova kimachtiaya, yejua ika kijtoj: “Nikpatiuitani itajtoluan” (Job 23:12). Kemej kimoujkaitaya Jiova uan kipoujkaitaya nejon kichiuak maj okachi kitasojta uan maj kiyolpakti. No kipaleuij maj okachi kinekini amo kikauas Dios. Kemej Job, no moneki titanemiliskej itech itachijchiualis Jiova. Axkan, taltikpakneminij okachi kimatij keniuj chijchiujtok taltikpak uan iluikak ke itech itonaluan Job. Uan no, tikpiaj Biblia ajsitok tein techpaleuia maj kuali tikixmatikan Dios. Nochi tein timomachtiskej techpaleuis maj tikpoujkaitakan uan maj tikmoujkaitakan Jiova. Ijkon tiktasojtaskej uan tiktakamatiskej uan okachi tiknekiskej amo tikauaskej (Job 28:28).

13, 14. 1) Kemej kijtoua Job 31:1, ¿itech toni taman kinextij Job ke tatakamatia? 2) ¿Keniuj uelis tikchiuaskej kemej yejua?

¹³ Mochikauak tatakamatis itech nochi. Job kimatia ke monekia kitakamatis Jiova, ijkon amo kikauaskia. Nochipa keman titatakamatij okachi tiknekij amo tikauaskej Dios. Job mojmostaj mochikauak kitakamatis. Kemej neskayot, nochipa kinpoujkaitaya siuamej (xikonixtajtolti Job 31:1). Kemej kipiaya inamik, kimatia ke amo kuali yetoya maj kiixtoka okse siuat. Axkan, onkak miak taman tein uelis kichiuas maj tiauilnemikan. Ijkon kemej Job, ¿tikixtalijtokej amo tikixtokaskej akin amo tonamik? Uan, ¿amo tikitaskej taixkopimej tein kinextiaj auilnemilis kampa yeski nesis? (Mat. 5:28). Komo mojmostaj timotsakuiliaj, okachi tiknekiskej amo tikauaskej Dios.

¹⁴ Job no kiitak tominpialis ijkon kemej Jiova kiita. Kiajsikamatik ke komo  takuaujtamatia itech tein kipiaya yeskia se ueyi tajtakol uan tamelauanij monekiskia kitatsakuiltiskej (Job 31:24, 25, 28). Axkan, miakej semi kitemouaj motomintiskej. Komo tikitaj tominpialis ika taixejekolis ijkon kemej techyolmajxitia Biblia, okachi tiknekiskej amo tikauaskej Dios (Prov. 30:8, 9; Mat. 6:19-21).

15. 1) ¿Toni kipaleuij Job maj amo kikaua Dios? 2) ¿Keyej moneki tikelnamikiskej tein Jiova motenkaua techmakas?

¹⁵ Takuaujtamatia ke Dios kitatiochiuiskia. Job kineltokaya ke Dios kiitaya ox iyolo ajsitoya iuan oso amo (Job 31:6). Maski semi tajyouij, takuaujtamatia ke Jiova kitatiochiuiskia uan nejon kipaleuij maj kisentoka amo kikaua yejuatsin. Nejon semi kiyolpaktij Jiova uan kitiochiuak keman yoltoyaok (Job 42:12-17; Sant. 5:11). Uan satepan okachi kitatiochiuis. ¿Uan tejuan? ¿Titakuaujtamatij ke Jiova techtatiochiuis komo tiksentokaj amo tikauaj? ToDios amo mopatani (Mal. 3:6). Tikelnamikiskej ke yejuatsin semi kipatiuita maj amo tikauakan techpaleuis maj tiksentokakan tikchiakan tein motenkaua techmakas satepan (1 Tes. 5:8, 9).

16. ¿Toni moneki tikixtaliskej tikchiuaskej?

¹⁶ Moneki tikixtaliskej amo keman tikauaskej Dios. Kemansa uelis tikmachiliskej ke sayoj tejuan tiknekij tikchiuaskej. Sayoj ke amo toselti, ta noyampa taltikpak moajsij tel miakej tokniuan akin no mochikaujtokej amo kikauaskej Dios. Uan no, timoajsiskej iniuan akin semi takuaujtamatkej uan mochikaujkej amo kikauaskej Dios maski ueliskiaj kinmiktiskej (Heb. 11:36-38; 12:1). Maj tinochin tiktojtokakan ineskayo Job uan maj tikijtokan kemej yejua: “¡Amo keman nikauas Dios hasta maj nimiki!”. Uan maj nochipa ijkon tikueyitalikan Jiova.