1. Oonzapo dhaJehova ndatu ndhoka dha popiwa mokatendo, odha ulike ngiini uudhiginini wadho kuJehova?

THANEKA momadhiladhilo iiholelwa itatu tayi landula, mbyoka ya kwatela mo Oonzapo dhaJehova. (1) Esiku limwe sho okakadhona kamwe ka li kosikola, omulongi okwa pula aalongwa yomongundu ye ayehe ya kuthe ombinga moshituthi shefudho. Oka li ke shi kutya oshituthi shoka inashi hokiwa kuKalunga. Onkee ano, oka tindi okukutha ombinga musho. (2) Esiku limwe omulumentu gumwe omugundjuka ngoka e na ohoni, okwa li ta uvitha egumbo negumbo. Okwa dhimbulula kutya omulongwa gwokosikola yawo oha zi megumbo lya landula ko. Omulongwa ngoka okwa li a sheke Oonzapo dhaJehova kosikola. Nonando ongawo, omugundjuka ngoka okwa tokola owala a konkole po paandjawo. (3) Esiku limwe omulumentu gumwe ngoka ha longo nuudhiginini kiilonga, opo a sile oshimpwiyu uukwanegumbo we, okwa pulwa komukuluntu gwiilonga a ninge oshinima shoka kaashi li paushili nenge pampango. Nonando okwa li ta vulu okukanitha iilonga, omulumentu ngoka okwa li a yelitha kutya oku na okupopya oshili nokuvulika kompango, molwaashono Kalunga osho a tegelela aapiya ye ya ninge. — Rom. 13:1-4; Heb. 13:18.

2. Omapulo geni tatu ka kundathana, nomolwashike?

² Omaukwatya geni wa ndhindhilika maantu yatatu mboka twa zi nokupopya? Otashi vulika wa ndhindhilike mo omaukwatya gontumba, ngaashi uulaadhi nuunashili. Ihe ayehe oya ulike uukwatya wumwe mboka wa simanenena, ano uudhiginini. Ayehe yatatu oya ulike uudhiginini wawo kuJehova. Ayehe oya tindi okutaaguluka omithikampango dhe. Uudhiginini owo we ya inyengitha ayehe ya katuke ngaaka. Odhoshili kutya Jehova oku na okukala a li a nyanyukwa, sho ya ulike uukwatya mboka. Natse wo otwa hala tu nyanyudhe Tate gwetu gwomegulu. Onkene natu kundathaneni omapulo ngaka: Uudhiginini oshike? Omolwashike twa pumbwa  okukala aadhiginini? Ongiini tatu vulu okukakatela uudhiginini wetu pethimbo ndika edhigu?

3. (a) Tu li aapiya yaJehova, ohatu ulike ngiini uudhiginini wetu? (b) Iiholelwa yini tayi vulu oku tu kwathela tu uve ko kutya uudhiginini oshike?

³ Tu li aapiya yaJehova, ohatu ulike ngiini uudhiginini? Omokukala tu hole Jehova nomutima aguhe, shoka hashi tu ningitha tu longe aluhe shoka shi li mondjila. Natu ka tale kuuyelele wumwe kombinga yankene oshitya uudhiginini sha longithwa mOmbiimbeli. Eityo limwe lyoshitya “uudhiginini” shoka sha longithwa mOmbiimbeli olyo oshinima sha gwana po nenge shaa na oshipo. Pashiholelwa, Ompango oya li ya pitika Aaisraeli ya yambele Jehova iinamwenyo mbyoka kaayi na oshipo. * (Lev. 22:21, 22) Oshigwana shaKalunga kasha li sha pitikwa shi yambe oshinamwenyo shoka kaashi na omagulu agehe, omakutsi agehe, omeho agehe nenge shoka tashi ehama. Jehova okwa li e shi tala ko sha simana ye mu yambele oshinamwenyo shoka sha gwana po nokaashi na oshipo. (Mal. 1:6-9) Shoka otashi tu kwathele tu uve ko kutya omolwashike Jehova e hole iinima yaa na oshipo nenge ya gwana po. Uuna tatu landa oshinima shontumba, tashi vulika oshiyimati, embo nenge oshilongitho, inatu hala tu lande shoka kaashi li monkalo ombwanawa nenge sha kambela sha. Otwa hala okulanda shoka shi ihwapo nokaashi na uupyakadhi. Jehova naye osho ha kala e uvite ngaaka, uuna tatu ulike kutya otu mu hole, mokukala aadhiginini kuye. Otu na okukala tu mu hole nomutima gwetu aguhe nokukala aadhiginini thiluthilu.

4. (a) Omolwashike omuntu inaa gwanenena ta vulu okukala omudhiginini? (b) Shi ikolelela kEpisalomi 103:12-14, Jehova okwa tegelela tu ninge shike?

⁴ Mbela otu na okuthika pehulithodhiladhilo kutya otu na okukala twa gwanenena, opo tu kale nawa aadhiginini? Natango, otashi vulika tu kale tu uvite kutya ohatu ningi omapuko ogendji. Natu ka tale komatompelo gaali kutya omolwashike inaatu pumbwa okudhiladhila kutya otu na okukala twa gwanenena, opo tu kale aadhiginini. Shotango, Jehova iha kala ta gandja eitulomo komapuko getu. Ombiimbeli otayi ti: “Omuwa, ngele to kala nokudhimbulukwa oondjo, olye ta vulu okukala po?” (Eps. 130:3) Jehova oku shi shi kutya inatu gwanenena nohatu puka olundji, ihe ohe tu dhimine po nehalo ewanawa. (Eps. 86:5) Oshitiyali, Jehova oku shi omangambeko getu noiha kala a tegelela tu ninge oshindji shi vulithe pwaashoka tatu vulu okuninga. (Lesha Episalomi 103:12-14.) Omeityo lini nduno, tatu vulu okukala kaatu na oshipo momeho ge?

5. Tu li aapiya yaJehova, omolwashike tu na okukala tu mu hole, opo tu kale aadhiginini?

⁵ Tu li aapiya yaJehova, opo tu kale aadhiginini, otu na okukala tu mu hole. Ohole ndjoka nosho wo uudhiginini wetu kuye e li Tate yetu gwomegulu, oyi na okukala yashili, kaayi na oshipo. Ngele osho twa kala tu mu hole ngawo, nokuli nuuna tatu yelekwa, otatu ka kala aadhiginini. (1 Ondjal. 28:9; Mat. 22:37) Natu taleni ishewe kOonzapo ndatu ndhoka dha popiwa metetekelo. Omolwashike dha katuka ngawo? Mbela okakadhona hoka kake hole okukutha ombinga momainyanyudho kosikola? Mbela omumati omugundjuka okwa hala okusithwa ohoni pomagumbo gaantu? Nenge omusamane ngoka e na uukwanegumbo okwa hala okukanitha iilonga ye? Hasho nando! Pehala lyaashono, oye shi kutya omithikampango dhaJehova odhi li pauyuuki, nohaya gandja eitulomo koku mu nyanyudha. Ohole yawo yoku mu hola, ohayi ya inyengitha ye mu pitithe komeho, uuna taya ningi omatokolo. Kungawo, ohaya ulike uudhiginini wawo.

6. (a) Omolwashike wa pumbwa okukala omudhiginini? (b) Adam naEva oya ndopa ngiini okuulika uudhiginini?

⁶ Omolwashike sha simanenena atuheni tu  kaleni aadhiginini? Omolwaashoka Satana okwa pataneka Jehova note ku pataneke wo. Omuyengeli ngoka omunashipotha, okwi iningi ye mwene Satana nenge “Omupataneki” moshikunino shaEden. Okwa lundile Jehova, mokupopya kutya Jehova Omupangeli omwiinayi, i ihole mwene nomufundja. Shiyemateka, Adam naEva oya wayimine Satana muunashipotha we. (Gen. 3:1-6) Sho Adam naEva ya li moshikunino shaEden, oya li ye na oompito odhindji ya koleke ohole yawo yokuhola Jehova. Ihe pethimbo ya makelwa kuSatana, ohole yawo yokuhola Jehova kaya li ya kolelela. Opwa li wo pwa holoka epulo tali ti: Mbela opu na ngaa omuntu ta vulu okukala omudhiginini kuJehova Kalunga, molwaashono e mu hole? Niitya yimwe, aantu otaya vulu ngaa okukala aadhiginini? Epulo ndyoka olya ka holoka po monkalo yaJob.

7. Ngaashi sha ulikwa muJob 1:8-11, Jehova nosho wo Satana oya li ye uvitile ngiini uudhiginini waJob?

⁷ Job okwa li ko pethimbo Aaisraeli ye li muEgipiti. Pethimbo ndyono kapwa li pu na omuntu e na uudhiginini wa fa we. Ngaashi owala tse, naye okwa li inaa gwanenena. Okwa li ha ningi omapuko. Nonando ongawo, Jehova okwa li e hole Job, omolwuudhiginini we. Osha fa shi li ngeyi kutya Satana okwa kala nokusheka Jehova, omolwuudhiginini waantu. Onkee ano, Jehova okwa li a pitike Satana a makele Job. Ihe Job okwa li a ulike monkalamwenyo ye ayihe kutya Satana omufundja! Satana okwa li a pula a makele uudhiginini waJob. Jehova okwa li i inekela kuume ke Job, nokwa li a pitike Satana e mu makele. — Lesha Job 1:8-11.

8. Ongiini Satana a li a ponokele Job?

⁸ Satana omukwanyanya, ye omudhipagi.  Okwa li a ponokele iiniwe yaJob, moku mu yuga omaliko ge, aapiya ye nokwa li wo a nyateke edhina lye. Okwa ponokele uukwanegumbo we, mokudhipaga aanona ye ayehe omulongo. Opo nduno, okwe mu umbu iitumbuka molutu aluhe. Omukulukadhi gwaJob okwa li a geya nokwa gwililwa po koluhodhi. Onkee okwe mu lombwele a tuke Kalunga, opo a se. Job okwa li a hala okusa, ihe nonando ongawo, okwa kala omudhiginini. Onkee ano, Satana okwa li e mu ponokele momukalo gumwe gwi ili. Okwa longitha ookuume kaJob yatatu. Aalumentu mboka oya li ye ya oku mu talela po, e taya kala puye uule womasiku, ihe kaya li ye mu hekeleke. Pehala lyaashono, oye mu ula omalaka omawinayi noku mu sheka. Oya ti kutya Kalunga oye e mu etela uupyakadhi nonokutya ke na ko nasha nuudhiginini we. Oya ti nokuli kutya Job omulumentu omwiinayi nosho wo kutya uudhigu awuhe mboka wa li we mu adha owe mu opalela. — Job 1:13-22; 2:7-11; 15:4, 5; 22:3-6; 25:4-6.

9. Nonando Job okwa li muudhigu, oshike a tindi okuninga?

⁹ Job okwa li a ungaunga ngiini nomaudhigu agehe ngoka? Ka li a gwanenena. Okwa li a ganda aahekeleki ye mboka aafundja, e ta popi oohapu ndhoka konima a ka mona kutya inadhi dhiladhilwa nawa. Okwa li a popile unene uuyuuki we shi vulithe waKalunga. (Job 6:3; 13:4, 5; 32:2; 34:5) Nonando ongawo, nokuli naasho onkalo ye ya pindjala unene, Job ina etha po Jehova Kalunga. Okwa li a tindi okwiitaala iifundja yookuume ke mboka aafundja. Okwa ti: “Itandi ka zimina okupopya kweni kutya oku li mondjila, sigo okusa itandi ki idhimbika uuyuuki wandje.” (Job 27:5) Oohapu ndhoka otadhi ulike kutya Job okwa li a tokola toko okukakatela uudhiginini we. Job ka li a etha po uudhiginini we, onkee natse otatu vulu okuninga sha faathana.

10. Mompata ndjoka ya li ya tukululilwa Job kuSatana, owa kwatelwa mo ngiini?

¹⁰ Mompata ndjoka ya li ya tukululilwa Job kuSatana, owa kwatelwa mo ngiini? Satana okwa ti kutya ku hole shili Jehova nosho wo kutya oto ke etha po oku mu longela, opo wi ihupithe. Okwa ti wo kutya ito ka kala omudhiginini! (Job 2:4, 5; Eh. 12:10) Shoka owu shi uvitile ngiini? Osha yela kutya ohashi ku uvitha nayi. Ihe dhiladhila kwaashika: Jehova okwe ku inekela lela, sho e ku pa ompito ndjika ya dhenga mbanda. Ohe etha Satana a makele uudhiginini woye. Jehova oku na einekelo kutya oto vulu okukala omudhiginini note ku kwathele wu ulike kutya Satana omufundja. Okwa uvaneka kutya ote ke ku kwathela wu shi ninge. (Heb. 13:6) Kashi shi tuu uuthembahenda wokukala wi inekelwa kOmupangeli gweshito alihe! Mbela owu shi wete kutya omolwashike uudhiginini wa simana? Ohawu tu kwathele tu ulike kutya Satana omufundja, tu popile edhina ewanawa lyaTate gwetu notu ambidhidhe omukalo gwe gwokupangela. Oshike tatu vulu okuninga, opo tu kale aadhiginini?

11. Oshike tatu vulu okwiilonga kuJob?

¹¹ Satana ota pimbilike lela oonkalo ‘momasiku ngaka gahugunina.’ (2 Tim. 3:1, yelekanitha NW) Moonkalo ndhoka, oshike tashi ke tu kwathela tu kale twa tokola toko tu kale aadhiginini? Otatu vulu okwiilonga ko oshindji kuJob. Manga inaa makelwa kuSatana, Job okwa kala nale omudhiginini. Natu ka taleni kiinima itatu, mbyoka tatu vulu okwiilonga kuye yi na ko nasha nokukala twa tokola toko tu kakatele uudhiginini wetu.

12. (a) Ngaashi sha popiwa muJob 26:7, 8, 14, ongiini Job a li a kokeke ohole yokuhola Jehova? (b) Oshike tashi vulu oku tu kwathela tu kale hatu tila Kalunga?

¹² Job okwa li a kokeke ohole ye yokuhola Kalunga, mokukala e na etilosimaneko. Okwa li ha konakona eshito lyaJehova ekumithi. (Lesha Job 26:7, 8, 14.) Osha li hashi mu kumitha, uuna a dhiladhila kombinga yevi, yewangandjo, yiikogo noyomindundumo. Nonando ongawo, okwa li e shi mono kutya oku shi owala kashona  kombinga yiinima ayihe mbyoka Jehova a shita. Okwa li wo a lenga Oohapu dhaJehova. Job okwa popi kombinga yOohapu dhaKalunga a ti: “Oohapu dhe onde dhi pungula.” (Job 23:12) Job okwa li a kuminwa Jehova nokwa li e mu simaneke noonkondo. Okwa li e hole He nokwa li a hala oku mu nyanyudha. Oshizemo? Job okwa li a tokola toko okukakatela uudhiginini we shi vulithe nale. Otwa pumbwa okuninga ngaashi Job. Odhoshili kutya otu shi oshindji kombinga yeshito lyaJehova ekumithi, tu vule aantu yopethimbo lyaJob. Otu na wo Ombiimbeli ndjoka tayi tu kwathele tu tseye nawa Jehova. Ashihe shono tatu ilongo mo, otashi tu kwathele tu kale tu na etilosimaneko. Okukala twa kuminwa Jehova nokukala twe mu simaneka, otaku ke tu inyengitha tu kale tu mu hole notu vulike kuye. Otaku ke tu inyengitha wo tu kakatele lela uudhiginini wetu. — Job 28:28.

13-14. (a) Ngaashi sha popiwa muJob 31:1, Job okwa li a ulike ngiini kutya omuvuliki? (b) Ongiini tatu vulu oku mu holela?

¹³ Okuvulika kwaJob miinima ayihe, okwe mu kwathele a kale omudhiginini. Job okwa li e shi shi kutya opo a kale omudhiginini, okwa pumbwa okuvulika kuJehova. Odhoshili kutya uuna tatu vulika, ohashi tu kwathele tu kale twa tokola toko okukala aadhiginini. Job okwa li a longo a tula ombunda moshihwa, opo a vulike kuKalunga esiku kehe. Pashiholelwa, okwa li a kotokela eihumbato lye ngele tashi ya paakiintu. (Lesha Job 31:1.) E li omulumentu a hokana, okwa li e shi kutya osha puka okutala omukiintu nokahalu, ngoka kee shi omukulukadhi gwe. Kunena otu li muuyuni mbuka hatu makelwa tu ye momilalo. Ngaashi Job, natse otatu ka tinda ngaa okukala nekwatathano lyopaihole nomuntu ngoka kee shi kuume ketu kopandjokana? Mbela otatu ka tinda ngaa okutala omathano giipala kutya nduno openi? (Mat. 5:28) Ngele otu ulike eipangelo esiku kehe, otatu ka kala twa tokola toko okukakatela uudhiginini wetu.

¹⁴ Job okwa li wo a vulika kuJehova, momukalo moka a li a tala ko iinima yopamaliko. Okwa li e shi mono kutya ngele okwa kala i inekela momaliko ge, ota ka yona eyono lya kwata miiti, e ta  geelwa. (Job 31:24, 25, 28) Odhoshili kutya otu li muuyuni moka aantu ye hole eliko unene. Ngele otwa kala tu na etaloko li li pandjele li na ko nasha niimaliwa nosho wo nomaliko, ngaashi Ombiimbeli tayi tu ladhipike tu shi ninge, otashi ke tu kwathela tu kakatele uudhiginini wetu. — Omayel. 30:8, 9; Mat. 6:19-21.

15. (a) Etegameno lini Job a li e na, ndyoka lye mu kwathele a kakatele uudhiginini we? (b) Omolwashike okukaleka momadhiladhilo ondjambi ndjoka Jehova te ke tu pa, taku vulu oku tu kwathela?

¹⁵ Job okwa li a kakatela uudhiginini we, mokukala a gandja eitulomo kondjambi ndjoka Kalunga a li te ke mu pa. Okwa li i itaala kutya Kalunga oku na ko nasha nuudhiginini we. (Job 31:6) Nonando okwa li a adhika komaudhigu, okwa kala e na einekelo kutya Jehova ote ke mu pa ondjambi pehulilo. Einekelo ndyoka olya li lela lye mu kwathele a kakatele uudhiginini we. Nonando Job okwa li inaa gwanenena, Jehova okwa li a nyanyukilwa lela uudhiginini we nokwe mu laleke nuuyamba. (Job 42:12-17; Jak. 5:11) Nokuli Job ota ka mona omayambeko ge vule ngoka, monakuyiwa. Mbela owu na ngaa einekelo lya kola kutya Jehova ote ke ku pa ondjambi, omolwuudhiginini woye? Kalunga ketu ina lunduluka. (Mal. 3:6) Ngele otwe shi kaleke momadhiladhilo kutya okwa lenga uudhiginini wetu, otatu vulu okukala netegameno ewanawa kombinga yonakuyiwa yetu. — 1 Tes. 5:8, 9.

16. Otu na okutokola toko okuninga shike?

¹⁶ Kala aluhe wa tokola toko okukakatela uudhiginini woye! Omathimbo gamwe, otashi vulika wu kale wu uvite ongoye awike to kambadhala okukala omudhiginini, ihe paulelalela, hangoye awike. Owu li mokati kaantu omamiliyona mboka ya kakatela uudhiginini wawo. Oto ka kala wo gumwe gwomaalumentu naakiintu mboka ya li ye na eitaalo, noya kakatele uudhiginini wawo monakuziwa, nokuli nuuna sha li tashi pula eso. (Heb. 11:36-38; 12:1) Atuheni natu kale twa tokola toko okutula miilonga oohapu dhaJob ndhoka tadhi ti: “Itandi ki idhimbika uuyuuki wandje.” Uudhiginini wetu nawu simanekithe Jehova sigo aluhe!