1. Mmukhalelo taani Anamoona a Yehova aromoliwe mu eparakrafo ela yaatitelenlaaya okhala oororomeleya wa Yehova?

NKAANYIHERYANI saweereya chaaru sinacharela seiho sinaavolowela Anamoona a Yehova. (1) Mwali mmoha ori osikola vaavaa muhusiha onaavekeiye anasikola opaka makupa mu mahiku a ifesta seelapo. Mwali onnasuwela wi ifesta seelapo hasinamuhakalaliha Muluku, mwawiihiiha mwamiruku owo onnakhooca opaka makupa. (2) Mmiravo mmoha yoowo onuuliwa muru onnalaleerya empa ni empa. Owo onnasuwela wi mmoha a yaawo onakhaleiyeno osikola onakhala empa yoocharela—owo nasikola yoowo aanyemunle Anamoona a Yehova woosiilo. Nyenya mmiravo onnaya wa yoowo nave onnamana mukhora. (3) Mulopwana onnalapa mwakuru wi avakulele echoko awe, nave nihiku nimoha patarawu awe onnamveka opaka echu moohiroromeleya naari moohookololowa. Naamwi owo ahaalaka oyeleela muteko awe, mulopwana onnathariha wi onaphwanela okhala oororomeleya ni wiiwelela nlamulo nthowa nawi ti yeeyo Muluku onaavekeiye alapeli awe.—Aro. 13:1-4; Ahe. 13:18.

2. Makoho taani nnahaalaahu othokororya nave ntakhara heeni?

² Mukhalelo taani munoonaanyu mwa achu yaala araru? Nyuwo akhweya munnoona sincipale, hiiha ntoko olipa murima ni ororomeleya. Nyenya oothene ahooniherya mukhalelo mmoha wavameekhaaya ni wookhweleya yoowo ori ororomeleya. Ooraaru ala ahooniherya ororomeleya wa Yehova. Mmoha ti mmoha a yaawo ookhooca opwexa malamulo a Muluku. Ororomeleya wooweeriha oothene yaala weera ichu ntoko apakenlaaya. Mweeparipari Yehova ohiirumiha ni muchu ti muchu a yaawo moorweela wa wooniherya mukhalelo yoola. Moolikana, hiyotho nnachuna omweeriha tiithi ahu awirimu wiirumiha ntakhara hiyo. Mwawiihiiha hankooni nthokororye makoho ala: Ororomeleya tiheeni? Ntakhara heeni ninnachuna okhala oororomeleya? Nave nni nlipihe hai yoolakelelaahu ya otitelela okhala oororomeleya mu ilukuluku seiya sookacamiha?

3. (1) Ororomeleya onataphulela eheeni wa hiyo? (2) Sootakiherya taani sinanikhaviherya wiiwexexa yootaphulela ya ororomeleya?

³ Alapeli a Muluku anooniherya hai ororomeleya? Moorweela wa okhalano osivela onarweela vathi va murima ni woohipweeya ntakhara Yehova, nave ntoko yookhumelela, elukuluku yoothene weerano yeeyo enamuhakalaliha. Muthokororye sooleeliherya ikina. Mpiipiliyani, masu a Ehepiri ataphuleliwe “ororomeleya” anataphulela yawaakhwanela, yaphaama, naari yanteero. Ntoko yootakiherya, Aisarayeli yaanavaha mikucho sa asinama wa Yehova, nave nlamulo naaloca wi asinama yaaphwanela okhala aphaama. * (Onam. 22:21, 22) Achu a Muluku hiyeemereryiwa omveleela mwaasinama yoowo ahaarino mweco, oocoowa niitho naari ahaarino naaru; awo hiyaaphwanela omveleela mwaasinama awiiceliwa. Ela yaari yookhweleya wa Yehova wi mwaasinama akhaleke awaakhwanela, aphaama naari anteero. (Malak. 1:6-9) Nnanwerya wiiwexexa ntakhara heeni Yehova onnapwacha vooloca sa ophaama naari waakhwanela. Vaavaa nnathumaahu echu, moohipwacha waakhanle wi ti yawiima, liivuru, ekhankoonya, hinnachuna wi makupa mamoha n’yeleele. Nnachuna echu yeeyo eri yawaakhwanela, yaphaama naari yanteero. Yehova onoona moolikana vaavaa nnooniheryaahu osivela ni ororomeleya wahu wa yoowo. Iho sinaphwanela okhala sawaakhwanela, saphaama naari santeero.

4. (1) Ntakhara heeni muchu oohiphaameya onanwerya okhala oororomeleya? (2) Mwawiiwanana ni Salumu 103:12-14, tiheeni Yehova onaweheryeiye wa hiyo?

⁴ Apwanne nnaphwanela ophiyerya makuchuwelo wi nnaphwanela okhala oophaameya wi nikhaleno ororomeleya? Opwaha soothene, hiyaano akhweya nnamuupuwela wi ninnapaka soohesa sincipale. Muthokororye mathowa meeli ntakhara heeni hannaphwanela wuupuwela wi nnahaala okhala oophaameya wi nikhale oororomeleya. Noopacerya, Yehova hanatikitheryeya mu soohesa sahu. Masu awe annanleela: “Mwakushererya soocheka sahu, Apwiya, pwiya ahu, taani anii awerye ovuluwa?” (Sal. 130:3) Yehova oosuwela wi naachu oohiphaameya, naachu oocheka, nave owo onnanikhurumuwela moomalela. (Sal. 86:5) Yanawiili, Yehova oosuwela okotakota wahu, nave owo hanaweherya sincipale wa hiyo opwaha nnaweryaahu opaka. (Mwaalakhanye Salumu 103:12-14.) Mmukhalelo taani vano, nneeraahu nikhale awaakhwanela, aphaama naari anteero vamiithoni vawe?

5. Wa alapeli a Yehova, mmukhalelo taani osivela oryaaya yoohulela ya ororomeleya?

⁵ Wa alapeli a Yehova, yoohulela ya ororomeleya ti osivela. Osivela wahu ntakhara Muluku, omwiiwelela wahu ni murima woothene ntoko Tiithi ahu a wirimu, onaphwanela otitelela okhala wawaakhwanela, waphaama naari wanteero. Wakhala wi osivela wahu onniikhalelaru hiiha, naamwi nikumanaka ni saweeha, naachu oororomeleya. (1 Math. 28:9; Mat. 22:37) Mwaathokororye wanaawiili Anamoona araru naaloncaahu wuupaceryani. Ntakhara heeni awo yaapankaaya ichu mmukhalelo yoowo? Apwanne mwali ole aasepa wiiciwa osikola, naari mmiravo ole aachuna wuulihiwa muru va mukhora, naari muhooleli ole a emusi aachuna oyeleela muteko? Mweeparipari hooye. Ohiya yeeyo, awo yaahisuwela wi Yehova ookhalano malamulo awookololowa, nave muupuwelo aya waatikitheren’ye mwa yeeyo yaahaala omuhakalaliha Tiithi aya awirimu. Omusivela waya waahiweeriha omuhela mu nipuro noopacerya mu soolakelela saya. Mmukhalelo yoowo awo yaahooniherya wi yaari oororomeleya.

6. (1) Ntakhara heeni nyuwo munnachuna okhala oororomeleya? (2) Atamu ni Eva yaahense hai wooniherya ororomeleya?

⁶ Ntakhara heeni oothene ahu ninnachuna ororomeleya? Nyuwo munnachuna ororomeleya nthowa nawi Satana oovaanyihana ni Yehova, navetho oovaanyihana ni nyuwo. Munkeelo yoowo oohiroromeleya ohiipaka mukhateiye okhala Satana, naari “Namavaanya,” khalai mu emaca ya Eteni. Owo aahinyemula nsina na Yehova, moorweela mwa oloca wi Muluku toonanara murima, anrima, ni Mulamuleli oohiroromeleya. Moothananiha, Atamu ni Eva yaahimukhaviherya Satana, emmwaaryeelaka Yehova. (Map. 3:1-6) Okumi aya mu emaca ya Eteni waahaavaha ekari yincipale ya olipiha onthamwene aya ni Yehova. Nyenya mu elukuluku Satana aawonkeiye, osivela waya hiwaari wawaakhwanela, waphaama naari wanteero. Nikoho nikina ninnakhumelela: Apwanne achu yanwerya otitelela okhala oororomeleya wa Yehova Muluku eniiha ahimusivelaka? Mmasu makina, apwanne achu ananwerya wooniherya ororomeleya? Nikoho nenla naakhumelenle mmwaha wa Yupu.

7. Hiiha ntoko yooniheryiwaaya mu Yupu 1:8-11, Yehova oonne hai vooloca sa ororomeleya wa Yupu? Hanka Satana oonne hai vooloca sa yeeyo?

⁷ Yupu aakhanle mmahiku yaawo Aisarayeli yaaryaaya o Yikuputu. Mmahiku a Yupu, haarivo muchu mukina aari oororomeleya. Moolikana ni hiyo, Yupu aari oohiphaameya. Owo aahipaka soocheka. Naamwiihiiha, Yehova aanamusivela Yupu nthowa na ororomeleya wawe. Enakhala yawooneya wi Satana aahimunyemula Yehova woosiilo vooloca sa ororomeleya wa achu. Mwawiihiiha Yehova aahimuthanla Yupu. Meecelo a Yupu yaahooniherya wi Satana mulipa awootha! Satana aahiveka wi Yehova amweemererye wi amweehe Yupu. Yehova  aahimuroromela nthamwene awe, nave owo aahimweemererya Satana wi amweehe Yupu.—Mwaalakhanye Yobi 1:8-11.

8. Satana aamuhiphenle hai Yupu?

⁸ Satana mulipa ootakhala, nave owo mulipa awiipha. Owo aahiphela ichu soothene Yupu aareiyeno, aahimwaakha muhakhu awe, alapeli awe, ni ophwanelela wawe vamucecheni. Satana aahiphela emusi ya Yupu, nave aawiipha anaawe khumi oosiveliwa. Voocharela owo aahiphela mwiili wa Yupu, owo aahimweeriha Yupu wiiceliwa ni makhwaca yaawo yaasaren’ye mwiili woothene ovinyerya mmuruni ophiyerya mu inaani. Mwaara a Yupu aahihaleeliheya nave aahuukhuwa vancipale ni ereca ya iyawe; mwawiihiiha owo aahimuleela Yupu wi amuruwane Muluku wi akhwe. Chiryene Yupu aanaweherya okhwa, nyenya nlelo aahikhapelela ororomeleya wawe. Voocharela Satana aaheererya opharihela mukhalelo mukina wi amuhiphele Yupu. Owo aahaapharihela alopwana araru yaawo yaari asinthamwene a Yupu. Alopwana awo yaahimusekurya Yupu mu mahiku mancipale, nyenya hiyaamvanhe nihakararyo. Moohiyana awo yaanamulocela munyemu. Awo yaalonce wi Muluku taamutannyerya makacamiho awe nave haapwacha vooloca sa ororomeleya wa Yupu. Ophiyerya wi awo yaahiloca wi Yupu aari mulopwana oonanara murima yoowo aaphwanela okumana ni ipahu seiye saamukhumelenle!—Yobi 1:13-22; 2:7-11; 15:4, 5; 22:3-6; 25:4-6.

9. Moohipwacha saweeha aakumanneiyeno, tiheeni Yupu aalakelenleiye opaka?

⁹ Yupu aahoolenle hai makacamiho oothene yaawo? Owo haari muchu oophaameya. Moonyeenyeya owo aahaavaanya asinthamwene awe atheru, nave aahiloca ichu seiyo ohoolo waya eemerenryeiye wi saari soohiphwanelela. Owo aahaakiha wookololowa wawe opwaha wa Muluku. (Yobi 6:3; 13:4, 5; 32:2; 34:5) Naamwi mikhalelo sawe saari soonanara opwaha mphimo, Yupu aahikhooca omurukunuwela Yehova Muluku. Owo aahikhooca weemererya sawootha sa asinthamwene yaale atheru. Aahiloca: “Nkirwa kiweemereryaani nyuwo akhwaaka; ophiyerya okhwa waka nkirwa kihiya okhala [oororomeleya.]” (Yobi 27:5) Masu ala annooniherya wi Yupu aari oolakelela okhapelela ororomeleya wawe, moohipwacha echu yi yeereye. Yupu haahin’ye okhala oororomeleya; hiyotho nnanwerya weerano emohamoha.

10. Nyuwo mvoloweliwe hai ni mwaha yoowo Satana otannyileiye vooloca sa Yupu?

¹⁰ Nyuwaano mvoloweliwe hai ni mwaha Satana otannyileiye vooloca sa Yupu? Mweeparipari, owo onaloca wi nyuwo himunamusivela chiryene Yehova Muluku, wi munahaala omaala omurumeela yoowo wi mwiisaakihe, navetho wi hamuni mutitelele okhala oororomeleya! (Yobi 2:4, 5; Wup. 12:10) Ela enaweerihaani woona hai? Ela ti yawiicelaxa, tahi yeeyo? Mwawiihiiha, muupuwele vooloca sa ela: Yehova onnoororomelani mwawaakhwanela ophiyerya woovahaani ekari yooreeraxa. Yehova onnamweemererya Satana wi eehe ororomeleya wanyu. Yehova onnaroromela wi munahaala okhapelela ororomeleya wanyu nave mukhaviherye wooniherya wi Satana mulipa awootha. Nave owo onnaroromeliha wookhaviheryaani weerano yeeyo. (Ahe. 13:6) Ela ekari etokweene ororomeliwa ni Mpatusa a ichu soothene! Apwanne mohoona ntakhara heeni ororomeleya oryaaya woochuneyaxa? Onnaneeriha okhooca sawootha sa Satana nave ninnaakiha nsina naphaama na Tiithi ahu ni okhaviherya mukhalelo awe wa olamulela. Tiheeni nnaphwanelaahu opaka wi nikhapelele ororomeleya wahu?

11. Tiheeni nnahuseryaahu orweela wa Yupu?

¹¹ Satana onnaaceererya ohiphela wawe ntakhara alapeli a Muluku elukuluku yeela yookacamiha ya “mmahiku ookuchula.” (2 Tim. 3:1) Mu elukuluku yeela ya epiiphi, nni niilipihe hai mukhatiihu wi nikhapelele ororomeleya  wahu? Wanawiili, nnanwerya ohuserya sincipale orweela wa Yupu. Owo aahititelela okhala oororomeleya wa Yehova mu elukuluku yincipale muculi. Muthokororye ichu chaaru nnahaalaahu ohuserya orweela wa yoowo vooloca sa wiilipiha mukhatiihu wi nikhapelele ororomeleya wahu.

12. (1) Ntoko elociwaaya mu Yupu 26:7, 8, 14 Yupu unnuwinhe hai ncicimiho ntakhara Yehova? (2) Nni nsareihe hai murima ahu ni ncicimiho ntakhara Yehova?

¹² Yupu aahilipiha omusivela wawe Muluku moorweela wa wunnuwiha ncicimiho nawe ntakhara Yehova. Yupu aanamaliha elukuluku avareryaka soopatusiwa sootikhiniha sa Yehova. (Mwaalakhanye Yobi 26:7, 8, 14.) Owo aatikhiniheya vaavaa uupuweleiye vooloca sa elapo yavathi, mucharapo, meeku, ni itari, aahiiwexexa wi haasuwenle ichu sincipale vooloca sa soopatusiwa soothene sa Yehova. Yupu aanavaha esisapo masu a Yehova. Owo aahiloca sa masu a Muluku, “kinnacicimiherya masu awe.” (Yobi 23:12) Yupu aahitikhiniheya ni Yehova nave aanamucicimiha yoowo vatokovene. Owo aanamusivela Tiithi awe nave aanachuna omuhakalaliha. Yoolakelela ya Yupu ya wiikhalelaru oororomeleya yaahikhala yoolipa. Nnaphwanela opaka ntoko Yupu. Noosuwela sincipale vooloca sa soopatusiwa sooreeraxa waapwaha achu a mmahiku a Yupu. Nave nookhalano Piipiliya ooveereliwa anteero wi anikhaviherye omusuwela Yehova mwawaakhwanela. Soothene seiho nnahuseryaahu inamunikhaviherya osareiha murima ahu ni ncicimiho. Ncicimiho nahu ntakhara Yehova nnahaala onceenyerya omusivela ni omwiiwelela yoowo ni oteka nchuno nahu nawiiseela na okhapelela ororomeleya wahu.—Yobi 28:28.

13, 14. (1) Hiiha ntoko elociwaaya mu Yobi 31:1, Yupu oonihenrye hai wi aari awiiwelela? (2) Nave nni ncharihe hai yootakiherya awe?

¹³ Wiiwelela wa Yupu waahimukhaviherya okhapelela ororomeleya wawe. Yupu aahisuwela wi aariki akhale oororomeleya, owo aaphwanela omwiiwelela Yehova. Mweeparipari, meerelo ari oothene a wiiwelela annalipiha yoolakelelaahu ya okhapelela ororomeleya wahu. Yupu aahiilipiserya omwiiwelela Muluku mu okumi awe wa nihiku ti nihiku. Ntoko yootakiherya, owo aahikhalano ekaasoope vooloca sa mukhalelo aakhaliheiye athiyana. (Mwaalakhanye Yobi 31:1.) Ntoko mulopwana oothela,  owo aahisuwela wi yaari yoohiphwanelela omooseelela muthiyana vyakala ompwaha mwaariye. Olelo nnakhala mu elapo yeeyo enansareiha ni saweeha sa ocapaheya. Ntoko Yupu, apwanne nnahaala okhooca omooseelela muchu yoowo ohiri oothelana ahu? Apwanne nnahaalatho osepa woona epwitikiri naari iruku sinavuwiha ocapaheya? (Mat. 5:28) Wakhala wi ninnunnuwiha wiihiiha nihiku ti nihiku, nnahaala wiilipiha okhapelela ororomeleya wahu.

¹⁴ Yupu aanamwiiwelela tho Yehova mmukhalelo ooneiye ichu soomwiilini. Yupu aahisuwela wi wakhala wi onnaroromela ichu soomwiilini, owo aahaala opaka yoocheka etokotoko ophiyerya olakiwa. (Yobi 31:24, 25, 28) Olelo, nnakhala mu elapo achu aniithukumanyeryaaya. Wakhala wi nohunnuwiha moonelo woophwanelela wa ikhorowa ni sookhalano, hiiha ntoko Piipiliya onanleeleiye, nnamulipiha yoolakelela ahu ya okhapelela ororomeleya wahu.—Masi. 30:8, 9; Mat. 6:19-21.

15. (1) Ewehereryo taani ya mareeliho yaamukhavihenrye Yupu okhapelela ororomeleya wawe? (2) Ntakhara heeni eyo ennanikhaviherya okhapelela ewehereryo yeeyo Yehova onanivaheiye?

¹⁵ Yupu aahikhapelela ororomeleya wawe moorweela wa wuupuwelela ewehereryo yeeyo Muluku aahaaleiye omvaha. Owo aaneemererya wi Muluku aanapwacha ororomeleya wawe. (Yobi 31:6) Moohipwacha saweeha sawe, Yupu aanaroromela moomalela wi wookuchulani Yehova aahaala omureeliha. Nroromelo nenlo naahimukhaviherya chiryene okhapelela ororomeleya wawe. Yehova aahihakalala vancipale ni ororomeleya wa Yupu ophiyerya wi Owo aahimureeliha vatokovene naamwi nlelo aari muchu oohiphaameya! (Yobi 42:12-17; Tiy. 5:11) Nlelo Yupu onahaala okhalano mareeliho matokotoko. Apwanne mookhalano ewehereryo yoolipa yawi Yehova onahaala oreeliha ororomeleya wanyu? Muluku ahu hanatorokeya. (Malak. 3:6) Wakhala wi ninnuupuwela wi owo onnavaha esisapo ororomeleya wahu, nnanwerya okhapelela mmurimani mwahu ewehereryo ahu yooreeraxa ya muhoolo.—1 Tes. 5:8, 9.

16. Nnaphwanela olakela opaka eheeni?

¹⁶ Mukhale oolakelela okhapelela ororomeleya wanyu! Mu ilukuluku ikina, munahaala wuupuwela wi haavo achu anakhapelela ororomeleya waya, nyenya hamurwa mukhala meekhinyu. Nyuwo munahaala okhala variyari va amilyawu a anna ni arokora yaawo anakhapelela ororomeleya waya orukurerya elapo. Nyuwo munahaala okhalatho mu nikhuuru na alopwana ni athiyana a nroromelo yaawo yaakhapelenle ororomeleya waya khalai, naamwi ehoolelaka okhwa. (Ahe. 11:36-38; 12:1) Hankooni oothene ahu nikhale oolakelela ookhapelela ororomeleya wahu hiiha ntoko Yupu yoowo aalonce: “Nkirwa kihiya okhala [oororomeleya.]” Nave ororomeleya wahu onaphwanela omucicimiha Yehova okhala wookhala!