1. Tájíltʼéego Jiihóvah Yá Halneʼé haitʼéego Jiihóvah yikééʼ naazı̨́įgo ádaʼdiilyaa?

TÁAʼGO Jiihóvah Yá Dahalneʼé baa haneʼgo baa nitsíníkees. (1) Atʼééd yázhí léiʼ óltaʼdi yá ółtaʼii éí áłchíní tʼáá ánółtso holiday bee daʼnohtah doo yiłní. Díí atʼééd yázhí bił bééhózingo holiday éí Diyin doo bił yáʼátʼéeh da, áko shí doo anishtah da doo jidííniid. (2) Ashkii tʼah ániid naagháii ayóó yánízin léiʼ dahooghangóó nahalneʼ. Bił ajółtaʼígíí łaʼ, éí łah Jiihóvah Yá Dahalneʼé tʼóó yeidloh ńtʼééʼ, hooghan bichʼįʼ joogáłígíí bí bighan. Ákótʼée ndi doo hoł yééʼgóó ákwii jiníyáago bidáádílkał názneestsʼin. (3) Hastiin léiʼ bighan hazʼą́ą́dóó yéigo yá yilnish, ńtʼééʼ binaatʼáanii éí inaʼadloʼgo doo bee hazʼáanii łahgo áʼdíílííł hałní. Éí tʼáadoo ájiidzaagóogo nijilnishgi bitsʼáá hodiʼdooltʼeeł ndi, honaatʼáanii éí doo honaʼadloʼ da áádóó bee hazʼáanii bikʼeh áníshtʼé, háálá Diyin bá ndaalʼaʼí éí ákódajítʼée doo hóʼní, jiníigo bił hojoolneʼ.—Rom. 13:​1-4; Heb. 13:18.

2. Haʼátʼíí ndaʼídíkidígíí baa nídadíitʼįįł, éí haʼátʼíí biniyé?

² Díí tájíltʼéego haʼátʼíí bee ádajítʼéego bee baa ákoninizı̨́ı̨́ʼ? Díkwíí shı̨́ı̨́ yee ádaatʼéego bee baa ákoninizı̨́ı̨́ʼ, éí doo náhoniyéés índa doo inaʼadloʼ. Ndi tʼááłaʼígo éí tʼáadoo bahatʼaadí, éí wołí bee akééʼ asdzı̨́. Tʼáá tájíltʼéego éí Jiihóvah bikééʼ asdzı̨́įgi bééhózingo ádayiilaa. Diyin bibee hazʼáanii tʼáadoo nahjįʼ nideideezʼą́ą da. Wołí bee akééʼ asdzı̨́įgo ádaʼjiilaago Jiihóvah yee bił hózhǫ́. Nihí ałdóʼ tʼáá ákódaniitʼée doo daniidzin. Díí táaʼgo ndaʼídíkid baa nídadíitʼįįł: Wołí bee akééʼ asdzı̨́įgi haʼátʼíí óolyé? Haʼátʼíí biniyé ákóniitʼée doo? Achʼįʼ nahwiiʼnáa ndi, haitʼéego éí akééʼ siidzı̨́įgi bidziilgo ádadiilnííł?

3. (a) Wołí bee akééʼ asdzı̨́įgi haʼátʼíí óolyé? (b) Akééʼ asdzı̨́įgi haʼátʼíí binahjįʼ bikʼidiʼdiitı̨́įłgo yee nihíká adoolwoł?

³ Diyin bá neiilʼaʼí niidlı̨́įgo haitʼéego wołí bee akééʼ siidzı̨́į doo? Jiihóvah ayóóʼííníiʼníi doo, áko yaa bił hózhóonii íiʼníił doo. Akééʼ asdzı̨́ óolyéegi baa nídadíitʼįįł. Diyin Bizaad biiʼdę́ę́ʼ Hííbrewjí saad éí tʼáá ałtsojįʼ ájítʼéego “akééʼ asdzı̨́įgo” óolyé. Ízrel dineʼé éí Jiihóvah yichʼįʼ náádaʼiiłniih yę́ędą́ą́ʼ naaldlooshii hadaałtʼéii tʼáá noodzı̨́ʼígi átʼéii bidiʼníigo bee hazʼáanii biiʼ yisdzoh. (Lev. 22:​21, 22) Naaldlooshii bijáád, bijaaʼ, doodaiiʼ binááʼ ádingo, éí doodaiiʼ bąąh dahazʼáanii God bidineʼé díí ádaatʼéhígíí doo náádajiiłniih da ńtʼééʼ. Jiihóvah bichʼįʼ nááhidoonihii éí hadaałtʼéhígíí yinízin. (Mal. 1:​6-9) Baa ákoniidzingo Jiihóvah éí hadaałtʼéhígíí bił nilı̨́. Aneestʼąʼ, naaltsoos wóltaʼígíí, doodaiiʼ bee naʼanishii łaʼ nahaniihgo éí nichxǫ́ʼígo bąąh ádahádingo doo nahidiilnih da. Éí tʼáá ałtsojįʼ hadaałtʼéhígíí nahidiilnih. Jiihóvah tʼáá ákótʼé, ayóóʼííníiʼníigi tʼáá ałtsojįʼ hadaałtʼéii bee bikééʼ siidzı̨́į doo.

4. (a) Niʼiisíihii nilíinii éí haitʼéego wołí bee Jiihóvah yikééʼ sizı̨́į doogo átʼé? (b) Psalm 103:​12-14 éí Jiihóvah haʼátʼíí nihił nayólí nihiłní?

⁴ Éí yeeʼ tʼáá ałtsojįʼ doo niʼjiisííhgóó tʼéiyá Jiihóvah bikééʼ asdzı̨́į dooleeł, niidzinísh doo? Ayóó átʼéego yeeʼ nidaʼiyiilzííh, niidzin shı̨́ı̨́. Tʼáadoo kótʼéego nitsíikeesí dooleełgo naakigo baa nídadíitʼįįł. Áłtsé éí, nidaʼiyiilzíihgi Jiihóvah doo yee nihinéłʼı̨́į da. Bizaad ání: Jiihóvah “doo ákwii ádahatʼínígíí baa ákonínízingo háishąʼ yíníłdzil doo?” (Ps. 130:3) Bił bééhózingo nidaʼiyiilzííh áádóó bił hadleeʼgo éí nihá yóóʼanéidiyiiʼaah. (Ps. 86:5) Naaki góneʼ éí, Jiihóvah bił bééhózingo biʼoh nídadiniidleehii dahólǫ́. (Psalm 103:​12-14 yíníłtaʼ.) Áko haitʼéego wołí bee akééʼ asdzı̨́į doo?

5. Ayóóʼóʼóʼní haitʼéego bee Jiihóvah bikééʼ asdzı̨́į doo?

⁵ Jiihóvah yá ndaalʼaʼí éí ayóóʼóʼóʼní binahjįʼ wołí bee akééʼ asdzı̨́į doo. Yáʼąąshdę́ę́ʼ Nihizhéʼé Diyin nilíinii éí tʼáá ałtsojįʼ bee siidzı̨́ı̨́ ńtʼééʼ bee ayóóʼííníʼníi doo. Ákóniitʼéego éí nihíhodiʼneestą́ąʼgo Jiihóvah doo nahjįʼ ninádidiitʼáał da. (1 Chron. 28:9; Matt. 22:37) Táltʼéego Jiihóvah Yá Dahalneʼé chʼétʼánę́ę baa nitsíníkees. Haʼátʼíí biniyé ákótʼéego ádaʼiilaa? Atʼééd yázhí, daʼ éísh óltaʼdi doo shił honeení da nízin, doodaiiʼ ániid naagháii, daʼ éísh tʼóó baa yáhásinígi ábiʼdidoolnííł nízin, doodaiiʼ hastiin yilnishígíí, daʼ éísh binaanish bitsʼáá bidiʼdootʼeeł nízin? Nda shı̨́ı̨́. Éí Jiihóvah yee hasʼáanii bił béédahózin, áádóó yáʼąąshdę́ę́ʼ Bizhéʼé nilíinii yee bił hózhǫ́ǫ dooleełígíí yá yaa nitsídaakees. Ayóóʼádayóʼníigo éí bikʼehgo ádaʼiilaa. Éí Jiihóvah tʼáadoo nahjįʼ nideideezʼą́ą da.

6. (a) Haʼátʼíí biniyé akééʼ sínízı̨́į doo? (b) Ádam dóó Íiv éí Jiihóvah bikééʼ asdzı̨́įgi haitʼéego tʼáadoo beʼjiilaa da?

⁶ Haʼátʼíí biniyé tʼáá áníiltso akééʼ asdzı̨́į doo hwiindzin? Jó, Séítan éí Jiihóvah yaatįįh nádááh áádóó nihí ałdóʼ Jiihóvah bikééʼ asdzı̨́ yę́ęgi yee nihainítʼı̨́. Díí diyingo naalʼaʼí Séítan éí dáʼákʼeh Íídendi “Akʼijįʼ Nilíinii” áʼdiilyaa. Éí Jiihóvah doo yáʼájítʼéeh da, tʼáá hó tʼéiyá ádaa nitsíjíkees, índa hó naʼadloʼgo Nahojiʼáii jílı̨́ hałníigo házhiʼ yiyííłchxǫʼ. Ádam dóó Íiv éí Jiihóvah bikʼijįʼ jizlı̨́įʼgo Séítan bikééʼ nizhníʼáázh. (Gen. 3:​1-6) Íídengi kééhojitʼı̨́įgo  ląʼígóó há ashjaʼósingo Jiihóvah ayóóʼóóʼníigi bidziil ázhdoolííł ńtʼééʼ. Séítan éí kótʼé dííniid yę́ędą́ą́ʼ Ádam dóó Íiv éí hweʼayóóʼóʼóʼní doo bidziil da. Job bíyoołkááł yę́ędą́ą́ʼ díí baa tsíhodeeskééz: Bílaʼashdlaʼii tʼáá háida Jiihóvah ayóóʼájóʼníigo tʼáásh nahjįʼ nizhdidooʼaałgo átʼé?

7. Job éí Jiihóvah tʼáadoo nahjįʼ niidiníʼą́ągi Jiihóvah dóó Séítan haitʼéego yaa tsídeezkééz?

⁷ Ízrel dineʼé Ííjipdi kéédahatʼínę́ędą́ą́ʼ Job íídą́ą́ʼ jiiná. Job éí Jiihóvah doo nahjįʼ nizhdooʼááł átʼéegi doo łaʼda ákójítʼéhí da. Éí tʼáá nihígi átʼéego niʼiisíihii nilı̨́. Ndi, Job éí Jiihóvah doo nahjįʼ nizhdooʼááł átʼéégóó biniinaa ayóóʼáhóʼní. Séítan éí bílaʼashdlaʼii yeeʼ nahjįʼ ninándidooʼáałgo átʼé níigo Jiihóvah tʼáá íídą́ą́ʼ yaatįįh yíyáago átʼé. Áko Jiihóvah éí Job wolyéiísh baa ákoninizı̨́ı̨́ʼ hałní. Job éí beʼiinaʼ yee Séítan biyoochʼíidii nilı̨́įgo ííshjání áyiilaa! Séítan éí Job daatsʼí nahjįʼ ninándidooʼáałgi bíníshtááh níigo yee niilteeʼ, áko Jiihóvah éí haaʼíshąʼ bínítááh hodííniid. Jiihóvah éí bikʼis Job yaa dzólí, áko Séítan yá yee hoołʼaʼgo nayíneeztą́ą́ʼ.—Job 1:​8-11 yíníłtaʼ.

8. Séítan éí haʼátʼíí yee Job yichʼįʼ nahwiisʼnááʼ?

⁸ Séítan éí doo yitsʼíidii áádóó naʼaltseedii nilı̨́. Éí Job tʼáá ałtsoní bee hólóonii yę́ę ałtso yitsʼą́ą́ʼ néidiilá, bá ndaalʼaʼí neestseed, áádóó diné yáʼátʼéehii nilı̨́įgo bee bééhoʼdílzin yę́ęgi yitsʼą́ą́ʼ yiyííłchxǫʼ. Neeználtʼéego baʼáłchíní yę́ę ałtso yitsʼą́ą́ʼ neestseed. Áádóó Job bitsʼíís yaatįįh náánádzá, éí ayóó átʼéego neezgaigo bikétłʼááhdóó bitsiitʼáajįʼ chʼozh yiidííłnaʼ.  Tʼahdiísh doo shinaʼadloʼgóó yisháał dooleeł nínízin? Doo haniih Diyin God yínídziihgo dantsxaah da. Job beʼasdzą́ą́ yínííł nilı̨́įgo biniinaa God tʼóó yóóʼadíʼaahgo yínídziih áádóó dantsxaah hałní. Job éí tʼáá bí ałdóʼ tʼóó dajótsaał niizı̨́ı̨́ʼ, ndi Jiihóvah tʼáadoo yitsʼą́ąjįʼ dadiiyáa da. Ńtʼééʼ Séítan éí łah átʼéego ánááhodeeshdlííł niizı̨́ı̨́ʼ. Éí hastóí táltʼéego Job dabikʼisgo choyoosʼįįd. Díkwíí jı̨́ shı̨́ı̨́ díí hastóí Job yił náhástʼą́, éí tʼáadoo ndi háká iijéeʼ da. Doo daatsʼíídgóó tʼóó kónítʼé dahodííniid. Bee nichʼįʼ nahwiiʼnánígíí éí God áníłʼı̨́ áádóó God bikééʼ asdzı̨́įgi doo nił nilı̨́į da dahałní. Diné doo yáʼáshóonii nilı̨́įgo biniinaa kótʼéego nichʼįʼ nahwiiʼná dahałní!—Job 1:​13-22; 2:​7-11; 15:​4, 5; 22:​3-6; 25:​4-6.

9. Job bichʼįʼ nahwiiʼnáago haʼátʼíí tʼáadoo ádzaa da?

⁹ Job kóhoʼdilʼı̨́įgo bikʼee haajiidzaa? Job éí niʼiisíihii jílı̨́. Díí táltʼéego tʼáá ádzaagóó hoł dahalneʼgo tʼáá naʼníleʼdii bichʼįʼ hajiisdzííʼ, éí tʼahádóó díí tʼáadoo hazhóʼó nitsáhákeesí hahaasdzííʼ lá níigo yee hanáádzííʼ. Job éí God biláahdi tʼáá ákogi áníshtʼé jiníigo bee áchʼą́ą́h hajoodzííʼ. (Job 6:3; 13:​4, 5; 32:2; 34:5) Azhą́ tsʼídá ayóó átʼéego hachʼįʼ nahwiiʼnáa ndi, Job éí Jiihóvah tʼáadoo yitsʼą́ąjįʼ kódzaa da. Hakʼis dabiyoochʼíidii ádaanínígíí doo joodláa da. Éí kójíní: “Dooda yéi, tʼáá ákogi átʼéego shaa yádaałtiʼ tsʼídá doo nihidóshneʼ átʼée da; dasétsą́ bijı̨́įjįʼ wołí bee akééʼ asdzı̨́įgi tsʼídá doo nahjįʼ nidóshʼááł átʼée da.” (Job 27:5) Job áníigo azhą́ shichʼįʼ nahwiiʼnáa ndi, Jiihóvah tsʼídá doo nahjįʼ nidideeshʼáał da; nihí ałdóʼ tʼáá ákódiiʼníiłgo átʼé.

10. Séítan éí Job yeinístʼįįdgi haitʼéego nihídéétʼiʼ?

¹⁰ Séítan éí tʼáá áníiltso kónihóʼní. Jiihóvah doo ayóóʼííníiʼníi da, tʼáá ni yisdáʼádiʼdííltééł biniyé Jiihóvah bá naʼaʼaʼgi neʼ ádíílííł, áádóó doo tʼáá aaníígóó akééʼ sínízı̨́, niłní! (Job 2:​4, 5; Rev. 12:10) Kóndiʼníigo bikʼee haa nítʼé? Nihijéí yineesgai. Ákótʼée ndi, díí baa nitsíníkees: Jiihóvah naa dzólíigo Séítan bíniʼdii nidínóotah nóʼní. Doo nahjįʼ kóshidíílíił da nóʼníigo yee naa dzólí, áádóó Séítan biyoochʼíidii nilı̨́įgi bee ííshjání ádíílííł. Díí bee níká anáshwoʼ doo nihiłní. (Heb. 13:6) Dooládóʼ shı̨́į da, yá biiʼ adahwiisʼáágóó bee Bóhólníihii díí yee nihaa dzólí! Áko kʼadísh nił bééhózin, haʼátʼíí biniyé éí Jiihóvah doo nahjįʼ nídídiitʼáał da? Éí bee Séítan biyoochʼíidii nilı̨́įgo ííłʼı̨́, áádóó Nihizhéʼé bízhiʼ baa siitiʼ, dóó binahatʼaʼ bikééʼ siidzı̨́. Áko akééʼ siidzı̨́įgi éí haitʼéego bidziilgo ádiilnííł?

11. Job éí haʼátʼíí bitsʼą́ą́dóó bídahwiidiilʼááł?

¹¹ Díí “nihoogháahjįʼ yoołkáałgo” kééhwiitʼı̨́, éí Séítan tʼáá awołí bee nihichʼįʼ nahwiiłná. (2 Tim. 3:1) Áko haitʼéego éí akééʼ asdzı̨́įgi bee nihidziilgo íʼdííníilzin doo? Job bitsʼą́ą́dóó ídahwiidiilʼááł. Job tʼah doo bóhonítaah yę́ędą́ą́ʼ éí akééʼ asdzı̨́įgi tʼáá íídą́ą́ʼ bidziilgo áyiilaa. Kótʼéego nihidziil dooleełgo éí tááʼ ałʼąą átʼéego Job bitsʼą́ą́dóó ídahwiidiilʼááł.

12. (a) Job éí haitʼéego Jiihóvah bił nilı̨́įgo áʼdiilyaa? (b) Nihí éí haitʼéego ałdóʼ ákóniitʼée doo?

¹² Job éí Jiihóvah tʼáá ałtsoní áátʼįįdgi bikʼee bił bikʼeʼayóigo binahjįʼ God ayóóʼáyóʼníigi bidziilgo yee áʼdiilyaa. Éí ayóó ádaatʼéii Jiihóvah ádayiilaii hazhóʼó nayikʼítséłkees ńtʼééʼ. (Job 26:​7, 8, 14 yíníłtaʼ.) Nahasdzáán, yá, kʼos, áádóó iiʼniʼ yaa nitsékeesgo tʼóó bił bikʼeʼayóí, ndi díí ayóó ádaatʼéego  ádaalyaii doo ayóó hoł bééhózin dago baa ákozhnízin. Áádóó Jiihóvah yee haadzíiʼii ayóó hoł nilı̨́. Kójíní: “Saad yee shichʼįʼ haadzíʼígíí tʼáá íiyisí ílı̨́įgo ádííníshtąʼ.” (Job 23:12) Job éí Jiihóvah ayóó átʼéego yaa tsídeezkéezgo bidiisnááʼ. Bizhéʼé ayóóʼáyóʼní áádóó bił hojíshǫ́ǫ doo jinízin. Áko díí binahjįʼ yéigo akééʼ asdzı̨́įgi bidziilgo bee ádiʼdeeshnííł jinízin. Nihí ałdóʼ ákóniitʼée doo. Nihí éí tʼáá ałtso ádaalyaii tʼóó ahayóígóó kʼad nihił béédahózin. Jiihóvah Bizaad ałdóʼ nihá siʼą́ągo binahjįʼ átʼéiigi bídahwiilʼaah. Tʼáá altso bídahwiilʼą́ʼígíí nidanihiiłná. Jiihóvah nihił nilı̨́įgo ayóóʼííníiʼníigo bikʼehgóó ániitʼée doo, áádóó wołí bee ániitʼéego Jiihóvah doo bitsʼá deesháał da niidzin doo.—Job 28:28.

13. Job haitʼéego akʼeh hóółʼįįd?

¹³ Job éí akʼeh hółʼı̨́įgo yee wołí bee akééʼ asdzı̨́įgi bidziilgo yee áʼdiilyaa. Háálá bił bééhózingo éí akééʼ asdzı̨́į dooleełgo éí Jiihóvah bikʼeh hólʼı̨́į doo. Akʼeh honiilʼı̨́įgo éí akééʼ asdzı̨́įgi bidziil ánáyoodlííł. Job éí tʼáá ákwíí jı̨́ Diyin yikʼeh hółʼı̨́įgo níyá. Éí asdzání bidáhodínóoniiłgi yee ádaa áhályą́ą́ ńtʼééʼ. (Job 31:1 yíníłtaʼ.) Hachʼooní hólǫ́, áko náánáłahjįʼ asdzání bidázhdínóolniiłgi doo álʼı̨́į dago bił bééhózin. Dííshjı̨́įdi naʼageh bee adáhonooníinii danihínáágóogo kééhwiitʼı̨́. Job átʼéego nihiísh ałdóʼ náánáłahjįʼ bidádíníilniiłgi bee ádaa áhwiilyą́? Áádóó ałdóʼ éí tʼóó baaʼihgo pornography ádaheeshkidii tʼáadoo níilʼíní doo. (Matt. 5:28) Kódaatʼéii wołí bee ádaa áhwiilyą́ągo éí akééʼ asdzı̨́įgi bee nihidziil doo.

14. Haitʼéego Job beʼdiilnííł?

¹⁴ Nááʼałdóʼ Job éí naadeełii yaa nitsíkeesígi éí Jiihóvah yikʼeh hółʼı̨́įgo átʼı̨́. Job éí dah jooléłígíí baʼjólíigo bee haa hwiidínóotʼįįł jiní. (Job 31:​24, 25, 28)  Dííshjı̨́įdi naadeełii tʼéiyá bíká áhátʼı̨́įgo kééhwiitʼı̨́. Diyin Bizaad ánínígi átʼéego béeso índa naadeełii hazhóʼó baa nitsíikeesgo éí akééʼ asdzı̨́įgi bidziilgo ííníilzin doo.—Prov. 30:​8, 9; Matt. 6:​19-21.

15. (a) Job éí akééʼ asdzı̨́įgi haʼátʼíí yee bidziilgo áyósin ńtʼééʼ? (b) Áko Jiihóvah yee nihikʼihozhdoodliiłii haʼátʼíí biniyé baa nitsíikees doo?

¹⁵ Job éí Diyin yee hakʼihozhdoodliiłii yaa nitsékeesgo wołí bee akééʼ asdzı̨́įgi bidziilgo yee áʼdólzin ńtʼééʼ. Diyin éí wołí bee bikééʼ sézı̨́įgi shá yaa ákonízin jinízingo joodlą́. (Job 31:6) Azhą́ hachʼįʼ nahwiiʼnáa ndi, Jiihóvah éí hakʼihozhdoodliiłgo joodlą́. Éí díí binahjįʼ akééʼ asdzı̨́įgi bąąh dah jiztı̨́įgo áhósin. Jiihóvah éí Job tʼáadoo nahjįʼ nihodiníʼą́ą́góó biniinaa, éí azhą́ tʼahdii niʼiisíihii jílı̨́į ndi, ayóó átʼéego bikʼijidlíí ńtʼééʼ yę́ę bilááh átʼéego yikʼinááhasdliʼ! (Job 42:​12-17; Jas. 5:11) Áádóó díí tʼáá náábilááhídi átʼéego Job bikʼinááhozhdoodliił. Ni wołí bee Jiihóvah tʼáadoo nahjįʼ nidííníʼą́ą́góogo éí nikʼihozhdoodliiłgo átʼéegoósh yinídlą́? NihiDiyin éí doo łahgo ánáoʼnééh átʼée da. (Mal. 3:6) Jiihóvah bikééʼ asdzı̨́įgi éí ayóó bił nilı̨́įgi bénéiilniihgo éí náásgóó tsʼídá nizhónígo nihá ił chohooʼı̨́įgo átʼé niidzin doo.—1 Thess. 5:​8, 9.

16. Haʼátʼíí éí tʼááłáhígi átʼéego íitʼı̨́į doo?

¹⁶ Jiihóvah tʼááká bitsʼą́ąjįʼ kóonééh lágo! Łahda kwíinínízin doo, tʼáá sáhí akééʼ sézı̨́, ndi doo éí tʼáá sáhí nilı̨́į da. Nahasdzáán bikááʼgóó tsʼídá tʼóó ahayóí Jiihóvah doo yitsʼá daakáahii nihinásʼáhígíí bił honílǫ́. Áádóó azhą́ biniinaa bidiʼyoolyéeł ndi, tʼáadoo atsá daaskai da yę́ęgi átʼéego ni ałdóʼ ákónítʼée doo. (Heb. 11:​36-38; 12:1) Haaʼíyeeʼ tʼáá áníiltso Job ádííniid yę́ę bidaʼdiilnííł: “Dasétsą́ bijı̨́įjįʼ wołí bee akééʼ asdzı̨́įgi doo nahjįʼ nidóshʼááł átʼée da.” Áko hoolʼáágóó Jiihóvah bee baa dahwiiʼniih doo!