1. Abantu bashatu abaagambwaho bakaguma bata bahamiire ahari Yehova?

TEEKATEEKA aha mbeera ezi ishatu ezirikukwata aha Bajurizi ba Yehova. (1) Omwishiki muto ari ah’eishomero eizooba rimwe omushomesa ashaba abeegi boona kwejumba omu kukuza ekiro kikuru. Kwonka omwishiki ogwo naamanya ngu ekiro kikuru eki tikirikushemeza Ruhanga, omu muringo gw’ekitiinisa acwamu kuteejumbamu. (2) Omutsigazi oine enshoni ariyo naabuurira enju aha nju. Ayetegyereza ngu omwe aha bu arikushoma nabo naatuura aha nju erikukurataho, kandi omwojo ogwo akarahuraho Abajurizi ba Yehova. Kwonka omutsigazi agumizamu ahika aha nju aiguza. (3) Omushaija naakora n’amaani kureeberera eka ye, reero eizooba rimwe mukama we amushaba kukora ekintu ky’oburyangatanisa nari ekitarikwikirizibwa. N’obu omushaija ogwo arikubaasa kufeerwa omurimo gwe, agambira mukama we ngu aine kuhamira aha kihikire kandi akoorobera ebiragiro, ahakuba Ruhanga nikwo arikwenda abaheereza be batwaze.​—Rom. 13:1-4; Heb. 13:18.

2. Nituza kushwijuma bibuuzo ki, kandi n’ahabw’enki?

² Abantu bashatu abo bakooreka mutwarize ki? Noobaasa kuba waareeba ngu baine obumanzi, n’obwesigwa. Kwonka okukira munonga, omutwarize gw’omuhendo ogurikureebwa butunu n’okutagira kamogo. Buri omwe aharibo akooreka ngu ahamiire ahari Yehova. Kandi boona bakanga kuhenda emitindo ye. Okutenda kugira akamogo nikyo kyabahwereire kutwaza batyo. Yehova buzima naayesiimisa buri omwe aharibo ahabw’okugira omutwarize ogu. Naitwe Tataitwe ow’omu iguru naatwesiimisa. Mbwenu hati ka tushwijume ebibuuzo ebi: Okuba otaine kamogo nikimanyisa ki? Ahabw’enki twine kuba abataine kamogo? Kandi nitubaasa kuhamya tuta okumariirira kwaitu kuguma tutaine kamogo omu biro ebi ebigumire munonga?

3. (a) Okutagira kamogo nikimanyisa ki ahariitwe? (b) Ni by’okureeberaho ki ebirikubaasa kutuhwera kwetegyereza omutwarize gw’okutagira akamogo?

³ Itwe abaheereza ba Ruhanga twagira ngu titwine kamogo, nikiba nikimanyisa ngu nitukundira kimwe Yehova, kandi ngu tumaririire kumuheereza wenka, tukeebembeza okukora ebi arikukunda. Yetegyereze ebigambo otaine kamogo oku birikukoresibwa omu Baibuli. Omu Baibuli ebigambo “otaine kamogo” obumwe nibimanyisa: ekihikire, ekishugaine, nari ekitaine kirikuburaho. Nk’eky’okureeberaho, Abaisraeli bakaba nibaha Yehova ebitambo, kandi Ebiragiro bikaba nibigira ngu baheyo enyamaishwa ezishugaine. * (Lev. 22:21, 22) Abaheereza ba Ruhanga bakaba batarikwikirizibwa kuhayo enyamaishwa etaine kuguru, okutu, eriisho, nari erwaire. Yehova akaba naakitwara nka kikuru ngu enyamaishwa ebe ehikire, eshugaine, nari etaine ekibuzireho. (Mal. 1:6-9) Eki nikibaasa kutuhwera kwetegyereza ahabw’enki Yehova naafayo aha kushugaana nari okutagira ekyaburaho. Twagura ekintu, nk’ekijuma, ekitabo, nari ekikoreso, nituba tutarikwenda ekiine emyanya mihango, ebihengyere, nari ekibuzirweho ebicweka ebimwe. Nituba nitwenda ekihikire, ekishugaine, nari ekijwire. Nikwo Yehova arikwenda tumukunde tutyo, kandi tumuhamireho. Tushemereire kumukunda omu muringo oguhikire, ogushugaine, kandi omu bwijwire.

4. (a) Ahabw’enki omuntu otahikiriire arikubaasa kuba otaine kamogo? (b) Kurugiirira ahari Zaaburi 103:12-14, niki eki Yehova arikutumanyaho?

⁴ Mbwenu shi tugire ngu twine kuba tuhikiriire kubaasa kuba abataine kamogo? N’amazima turi abasiisi kandi nitukora enshobe nyingi. Kwonka yetegyereze enshonga ibiri ahabw’enki kitarikwetengyesa ngu tube tuhikiriire kubaasa kuba abataine kamogo. Ey’okubanza, Yehova tarikuta omutima aha bweremwa bwaitu. Ekigambo kye nikitugira kiti: “Kuri noofa aha by’okutahikiirira, n’oha owaakubaasa kwemerera, ai” Yehova? (Zab. 130:3) Naamanya ngu tituhikiriire, turi abasiisi, kandi naatusaasira emirundi mingi. (Zab. 86:5) Eya kabiri, Yehova naamanya obugarukiro bwaitu, tarikuteekateeka ngu twine kukora eki tutarikubaasa. (Shoma Zaaburi 103:12-14.) Mbwenu shi ni mu muringo ki ogu turikubaasa kuba abahikire, abashugaine, nari abataine kibuzireho omu maisho ge?

5. Rukundo ni nkuru eta aha baheereza ba Yehova omu kuguma bataine kamogo?

⁵ Ekikuru ekirikuhwera abaheereza ba Yehova kuba abataine kamogo, ni rukundo. Tushemereire kukunda Ruhanga, kandi tukamuhamiraho omu muringo oguhikire, ogushugaine, kandi omu bwijwire. Rukundo yaitu yaaguma etyo n’obu twakugyezibwa, nituguma tutaine kamogo. (1 Bus. 28:9; Mat. 22:37) Garuka oteekateekye aha Bajurizi ba Yehova bashatu abu twagambaho aha kutandika. Ahabw’enki baatwarize batyo? Mbwenu shi omwishiki muto ogwo tarikwenda kushemererwa ah’eishomero, kandi shi omutsigazi naayenda kuhemuka, nari shi omushaija naayenda kufeerwa omurimo gwe? Ngaaha buzima. Omu mwanya gw’ekyo, nibamanya ngu Yehova aine emitindo ehikire, kandi bataire ebiteekateeko byabo aha kumushemeza. Rukundo ei bamwiniire neebahiga kumuteekateekaho batakacwiremu. Omu muringo ogu nibooreka ngu tibaine kamogo.

6. (a) Ahabw’enki twine kuba abataine kamogo? (b) Adamu na Haawa bakaremwa bata kuguma bataine kamogo?

⁶ Ahabw’enki twena twine kuba abataine kamogo? Oine kuguma otaine kamogo ahabw’okuba Sitaane akahakanisa Yehova, hamwe naiwe. Ira omu kibanja Edeni, Maraika ogwo omugomi akeehindura Sitaane, nari  “Omuhakanisa.” Akashiisha eiziina rirungi rya Ruhanga, Yehova, arikumureebekyesa nka mubi, nk’orikweyendeza, kandi nk’omutegyeki otari mwesigwa. Eky’obusaasi, Adamu na Haawa bakeegaita ahari Sitaane, baahakanisa Yehova. (Kut. 3:1-6) Embeera omuri Edeni zikaba nizibabaasisa kwongyera kuhamya rukundo ei baabaire bainiire Yehova. Kwonka Sitaane arikuza kubagomesa, rukundo yaabo ekaba etahikire, etashugaine, kandi etaijwire. Ekyo kikareetaho ekibuuzo eki: Hariho omuntu weena owaabaire naija kuguma ahamiire ahari Yehova Ruhanga ahabw’okumukunda? Nari shi, abantu nibabaasa kuguma bataine kamogo? Enshonga nk’egi ekaimukaho omu bunaku bwa Yobu.

7. Nk’oku kirikworekwa omuri Yobu 1:8-11, Yehova akaba naatwara ata Yobu ahabw’okutagira kamogo, kandi shi we Sitaane?

⁷ Yobu akabaho omu bwire obu Abaisraeli baabaire bari Misiri. Akaba ari omuntu otaine kamogo omu muringo gw’omutaano. Akaba ari otahikiriire nkaitwe. Nawe akaba naakora enshobe. Kwonka Yehova akaba naakunda Yobu ahabw’okutagira kamogo. Nikireebeka Sitaane akaba yaajumire Yehova aha bikwatiraine n’abantu kuba abataine kamogo. N’ahabw’ekyo Yehova akabuuza Sitaane aha bikwatiraine na Yobu. Emitwarize ya Yobu ekooreka ngu Sitaane n’omubeihi! Sitaane akashaba ngu Yobu agyezibwe kuhamya yaaba araagume ataine kamogo. Yehova akeesiga munywani we Yobu, reero yaareka Sitaane kumugyeza.​—Shoma Yobu 1:8-11.

8. Sitaane akataahirira ata Yobu?

⁸ Sitaane n’omushaarizi, kandi omwitsi. Akataahirira ebintu bya Yobu, yaamaraho obugaiga bwe, abaheereza be, yaashiisha n’eiziina rye ei yaabaire naatuura. Akataahirira eka ya Yobu, yaita abaana be ikumi. Bwanyima akarwaza Yobu ebihuute by’amaani kuruga aha mutwe  kuhika aha bigyere. Muka Yobu amaganya gakamurenga, yaayeshengyereza iba ngu ayehakane Ruhanga kandi amukyene afe. Yobu nawe akeetenga ngu afe, kwonka akaguma ahamiire ahari Ruhanga. Bwanyima Sitaane akakoresa akakoryo kasya. Akakoresa abashaija bashatu bagyenzi ba Yobu. Abashaija abo bakataayaayira Yobu kumara ebiro bingi, kwonka tibarabaasize kumugumya. Omu mwanya gw’ekyo, bakamucwera orubanja bataine saasi na kakye. Emigambire yaabo ekaba eri nk’erikworeka ngu Ruhanga niwe arikureetera Yobu oburemeezi, kandi ngu tarikufayo aha kutagira kamogo kwe. Bakooreka ngu Yobu n’omushaija mubi, kandi ngu ebi bikaba bishemereire kumuhikaho!​—Yob. 1:13-22; 2:7-11; 15:4, 5; 22:3-6; 25:4-6.

9. Yobu akanga kukora ki n’obu araabe yaagyeziibwe munonga?

⁹ Yobu akatwaza ata omu mbeera egyo? Akaba atahikiriire. Akagambira abaabaire baizire kumuhuumuriza omu muringo gw’ekiniga, kandi ebi yaagambire akabyeta okugambira eryo. Akata omutima munonga aha kuhikiirira kwe omu mwanya gw’okuhikiirira kwa Ruhanga. (Yob. 6:3; 13:4, 5; 32:2; 34:5) Kwonka n’obu embeera ze zaayeyongyeire kuba mbi, akanga kwehakana Yehova Ruhanga. Akanga kwikiriza ebishuba by’abanywani be babi. Akagira ati: “Nikikabure nyowe okugira nti: Muhikire. Okuhitsya obu ndifa, tindireka kuguma ndi omwesigwa,” nari ninyija kuguma ntaine kamogo! (Yob. 27:5) Ebigambo ebi ni bikuru munonga. Yobu akanga kugyemeserezibwa, naitwe nitubaasa kukora nikyo kimwe.

10. Nootwarirwa ota omu nshonga ezi Sitaane yaagambire ahari Yobu?

¹⁰ Buri omwe ahariitwe Sitaane naamwomesereza ebitahikire nk’oku yaagizire Yobu. Mu muringo ki? Naaba ari nk’orikugira ngu buzima torikukunda Yehova Ruhanga, ngu noija kuhitsya obwire noorekyera aho kumuheereza, kandi ngu torikwija kuguma omuhamiireho! (Yob. 2:4, 5; Kush. 12:10) Ekyo nikikureetera kwehurira ota? Buzima, nikireeta obusaasi, tikwo? Kwonka teekateeka ahari eki: Yehova naakwesiga ekirikumara, kandi naakuha omugisha gw’okworeka ngu omuhamiireho. Yehova naareka Sitaane kukugyeza kureeba yaaba noija kuguma otaine kamogo. Yehova aine obwesigye ngu noija kuguma otaine kamogo, oyorekye ngu Sitaane n’omubeihi. Kandi naaraganisa kukuhwera kukora ekyo. (Heb. 13:6) Ka n’omugisha kwesigwa ow’Obushoboorozi Bwona omu nsi n’omu iguru! Nooreeba ahabw’enki okutagira kamogo kiri kikuru? Nikitubaasisa kwangira ebishuba bya Sitaane, okushagika eiziina rirungi erya Tataitwe, n’okushagika omuringo ogu arikutegyekamu. Nitubaasa kukora ki kuguma tutaine kamogo?

11. Nitubaasa kwegyera ki ahari Yobu?

¹¹ Sitaane okutaahirira kwe akwongyeiremu amaani ‘omu biro by’emperu’ ebi. (2 Tim. 3:1) Omu bwire bugumire obu, nitubaasa kumariirira tuta kuguma tutaine kamogo? Nabwo nitubaasa kwegyera ahari Yobu. Ira munonga atakagyeziibwe, akaba yaayorekire ngu ahamiire ahari Yehova emirundi mingi. Yetegyereze amashomo ashatu agu turikubaasa kumwegyeraho omu kumariirira kuguma tutaine kamogo.

12. (a) Nk’oku kirikworekwa omuri Yobu 26:7, 8, 14, niki ekyahwereire Yobu kwesiga Yehova n’okumuha ekitiinisa? (b) Niki ekirikutuhwera kwongyera kusiima Yehova omu mitima yaitu?

¹² Yobu akahamya rukundo ei ainiire Ruhanga arikumuha ekitiinisa. Akamara obwire bwingi arikuteekateeka aha bihangirwe bya Ruhanga ebirikutangaaza. (Shoma Yobu 26:7, 8, 14.) Akatangaara munonga ku yaateekateekire aha nsi, iguru, ebicu, n’enkuba, kwonka akaikiriza ngu naamanya bikye aha bintu byona ebi Yehova yaahangire. Kandi akaba naatwara  ebigambo bya Yehova nk’eby’omuhendo. Akabigambaho ati: “Ebigambo by’omu kanwa ke mbikunzire.” (Yob. 23:12) Ebi Yehova yaakozire bikatangaaza Yobu kyamuhiga kumuha ekitiinisa. Akaba naakunda Ishe ow’omu iguru kandi ekyo kikamureetera kumushemeza. Akeeyongyera kumariirira kuguma ataine kamogo. Nitwenda kukora nk’oku Yobu yaakozire. Nitumanya bingi ebirikukwata aha kutangaaza kw’ebyahangirwe kukira abantu b’omu bunaku bwa Yobu. Kandi twine Baibuli yoona ehandiikisiibwe Ruhanga kutuhwera kumumanya nk’oku buzima ari. Byona ebi turikwega nibituhwera kusiima omu mitima yaitu. Okusiima Yehova n’okwenda kukora ebi arikwenda, nibiija kutuhwera kumukunda, kumworobera, n’okwongyera kugira ekyetengo ky’okuguma tutaine kamogo.​—Yob. 28:28.

13-14. (a) Nk’oku kirikworekwa omuri Yobu 31:1, Yobu akooreka ata ngu naayorobera Yehova? (b) Nitubaasa kutooreza tuta Yobu?

¹³ Yobu okuguma naayoroba omuri buri kimwe kikamuhwera kuguma ataine kamogo. Yobu akaba naamanya ngu kubaasa kuguma ataine kamogo, aine kworobera Yehova. Nangwa buri murundi ogu turikworoba, nitweyongyera kumariirira kuguma tutaine kamogo. Yobu akakora n’amaani kubaasa kuguma naayorobera Ruhanga buri izooba. Nk’eky’okureeberaho, akaba naayegyendesereza oku yaabaire naatwariza abakazi abandi. (Shoma Yobu 31:1.) Ahabw’okugira ngu akaba ari omu bushwere, akaba naamanya ngu tikihikire kurigira omukazi ondiijo atari owe. Obunaku obu, turi omu nsi ei kyorobi kwohibwa kugwa omu bushambani. Nka Yobu, mbwenu shi nitwija kwanga kurigira omuntu weena ou tutari nawe omu bushwere? Nitwija n’okwanga kureeba ebirikwitsya enshoni eby’omuringo gwona? (Mat. 5:28) Twaguma twine okwerinda nk’okwo buri izooba, nitwija kugira amaani g’okuguma tutaine kamogo.

¹⁴ Yobu akoorobera Yehova n’omu muringo ogu yaabaire naareebamu eby’obugaiga. Yobu  akeetegyereza ngu yaayesiga eby’obugaiga, naabaasa kukora enshobe y’amaani erikumureetera kufubirwa. (Yob. 31:24, 25, 28) Obunaku obu, nitutuura omu nsi erikwebembeza eby’obugaiga. Twagira emiteekateekyere etagwereire rubaju aha sente n’ebintu nk’oku emisingye ya Baibuli erikutuhiga, nitwija kumariirira kuguma tutaine kamogo.​—Enf. 30:8, 9; Mat. 6:19-21.

15. (a) Ni matsiko ki agaahwereire Yobu kuguma ataine kamogo? (b) Nikituhwera kita twaguma nituteekateeka aha matsiko agu Yehova atuhaire?

¹⁵ Yobu akaguma ataine kamogo aine amatsiko ngu Ruhanga naija kumushumbuusha. Akaba naamanya ngu Ruhanga naafayo aha kutagira kamogo kwe. (Yob. 31:6) N’obu Yobu araabe yaagyeziibwe, akaba naahamya ngu Yehova naija kuhitsya obwire naamushumbuusha. Obwesigye obwo buzima bukamuhwera kuguma ataine kamogo. Yehova akashemererwa ahabw’okugira ngu Yobu akaguma ataine kamogo, kandi akamushumbuusha n’obu araabe yaabaire akiri otahikiriire! (Yob. 42:12-17; Yak. 5:11) Kandi Yobu naija n’okutunga emigisha erikukira n’ahari egyo. Oine amatsiko maingi ngu Yehova naija kukuha emigisha ahabw’okuguma otaine kamogo? Ruhanga waitu tahindukire. (Mal. 3:6) Twamanya ngu naatufaho ahabw’okutagira kamogo, nikituhwera kuguma twine amatsiko aha biro by’omumaisho.​—1 Tes. 5:8, 9.

16. Tushemereire kumariirira kukora ki?

¹⁶ N’ahabw’ekyo, mariirira kutaikiriza ekintu kyona kukuremesa kuguma otaine kamogo! Obumwe noobaasa kuteekateeka ngu niiwe wenka ogumire otaine kamogo, kwonka tiiwe wenka. Ori omwe aha bantu baingi munonga abeesigwa abataine kamogo omu nsi yoona. Kandi noija kwegaita aha bashaija n’abakazi baingi abaagumire bataine kamogo ira, n’obu baabaire nibatiinisibwa kwitwa. (Heb. 11:36-38; 12:1) Twena ka tumariirire kugyendera aha bigambo bya Yobu ebirikugira ngu ‘tindikwija kureka kuguma’ ntaine kamogo! Kandi ka tuteereho kuguma tutaine kamogo, reero tuhimbisise Yehova ebiro byona!