1. Ӕртӕ Ӕвдесӕни куд бавдистонцӕ, Йеговӕбӕл еузӕрдон ке ’нцӕ, уой?

ДӔ ЦӔСТИТӔБӔЛ рауайун кӕнӕ ӕртӕ уавӕри. 1) Скъоладзау хуӕрӕ кӕми ахур кӕнуй, еци къласӕн ахургӕнӕг зӕгъуй, тагъд ӕгас къласӕй дӕр цӕхуӕндӕр бӕрӕгбон ке бӕрӕг кӕндзӕнцӕ. Хуӕрӕ ’й лӕдӕруй, еци бӕрӕгбон Хуцауи зӕрдӕмӕ ке нӕ цӕуй, ӕма ахургӕнӕгӕн уӕзданӕй лӕдӕрун кӕнуй, е ӕй ке нӕ бӕрӕг кӕндзӕй. 2) Ӕфсӕрмигӕнагӕ скъоладзау ӕнсувӕр хӕдзарӕй-хӕдзарӕмӕ игъосун кӕнуй. Зонуй ӕй, ци хӕдзарӕмӕ фӕххӕстӕг кӕнунцӕ, уоми ӕ къласи биццеу ке цӕруй. Еци биццеу ба Йегови Ӕвдесӕнтӕбӕл ходгӕ фӕккӕнуй. Фал ӕнсувӕр уӕддӕр еци хӕдзари дуар бахуаста. 3) Ӕнсувӕр хъиамӕт кӕнуй, цӕмӕй ӕ бийнонтӕ фӕддара. Еу бон ба ин ӕ кусти хецау зӕгъуй, цӕмӕй, закъон ка ихалуй, уӕхӕн гъуддаг бакӕна. Ӕнсувӕр ӕй лӕдӕруй, ӕ куст фесафунӕй ин тӕссаг ке ӕй, фал уӕддӕр не ’сарази ӕй. Е хецауӕн балӕдӕрун кодта, Хуцауи уотӕ ке фӕндуй, цӕмӕй ӕ лӕггадгӕнгутӕ рӕстӕй архайонцӕ ӕма хецауади закъӕнттӕ нимайонцӕ (Ром. 13:1–4; Дзиуит. 13:18).

2. Цӕхуӕн фарстатӕмӕ ӕркӕсдзиан ӕма цӕмӕн?

² Дӕумӕ гӕсгӕ аци ӕртӕ адӕймаги цӕхуӕн ӕнцӕ? Ка ’й зонуй, зӕгъдзӕнӕ, нифсхаст ӕма рӕстзӕрдӕ. Фал ма уомӕй уӕлдай, се ’ртемӕ дӕр адтӕй, устур аргъ кӕмӕн ес, уӕхӕн менеуӕг. Се ’ртӕ дӕр разиндтӕнцӕ еузӕрдон. Еу дӕр си ӕ зӕрдӕ Хуцаубӕл не ’сӕййивта ӕма ин ӕ уагӕвӕрдти сӕрти нӕ рахизтӕй. Раст куд ӕй, уотӕ бакӕнунмӕ сӕ сӕ еузӕрдондзийнадӕ баразӕнгард кодта. Ке зӕгъун ӕй гъӕуй, Йеговӕ еци Ӕвдесӕнтӕй хъӕбӕр сӕрустур ӕй, ӕма мах дӕр фӕндуй, цӕмӕй ни Йеговӕ сӕрустур уа. Мадта ӕркӕсӕн аци фарстатӕмӕ: Хуцаубӕл еузӕрдон ун ци нисан кӕнуй? Еци менеуӕг уотӕ ӕхсидзгӕ цӕмӕн ӕй? Ци нин банхус кӕндзӕй, цӕмӕй аци зин рӕстӕгути нӕ зӕрдӕ Хуцаубӕл ма ’сӕййевӕн?

3. а) Хуцаубӕл еузӕрдон адӕймаг цӕхуӕн фӕууй? б) Дзурдтӕ ӕнхӕст ӕма ӕнаййепп куд лӕдӕргӕ ’нцӕ, е цӕхуӕн цӕветтонтӕй зиннуй?

³ Мах кой ку кӕнӕн, гъома Хуцауи лӕггадгӕнгути кой, уӕд аци менеуӕг кӕмӕ ес, е Йегови ӕгас зӕрдӕй уарзуй ӕма цийфӕнди унаффӕ хӕсгӕй дӕр уой фӕндонмӕ гӕсгӕ архайуй. Дзиуиттаг дзурд «еузӕрдондзийнадӕ» Библий амонуй ӕнхӕст ӕма ӕнаййепп цӕмӕдӕр. Зӕгъӕн, израилӕгтӕ нивондӕн ке ӕрхӕссиуонцӕ, еци фонс закъонмӕ гӕсгӕ гъӕуама «ӕнӕсахъат» кенӕ ӕнаййепп адтайуонцӕ (Лев. 22:21, 22) *. Ӕндӕр загъдӕй, ӕнӕкъах, ӕнӕгъос, ӕнӕцӕстӕ кенӕ сӕйгӕ фонс нивонди хӕссӕн н’ адтӕй. Йеговӕн хъӕбӕр ӕхсидзгӕ адтӕй, цӕмӕй еци нивонд ӕнаййепп адтайдӕ (Мал. 1:6–9). Ӕма е дессаг дӕр нӕй. Махӕй дӕр неке бафӕндадтайдӕ ӕмбуд рӕзӕ, скъудтӕ киунугӕ кенӕ саст косӕндзаума балхӕнун. Алкедӕр ни ести дзаума ӕлхӕнгӕй фӕккӕсуй, цӕмӕй маци гъӕуагӕ уа. Йеговӕ дӕр нин нӕ уарзондзийнадӕ ӕма нӕ еузӕрдондзийнадӕмӕ уӕхӕн цӕстӕй кӕсуй, гъӕуама алцӕмӕйдӕр ӕнхӕст ӕма ӕнаййепп уонцӕ.

4. а) Уотӕ зӕгъӕн цӕмӕн ес, ӕма ӕнӕнхӕст адӕймаги бон ӕй ӕнаййепп ун? Ба ’й лӕдӕрун кӕнӕ. б) Псалом 103:12–14 куд финст ӕй, уомӕ гӕсгӕ нӕмӕ Йеговӕ цӕмӕ ӕнгъӕлмӕ кӕсуй?

⁴ Цума раст адтайдӕ уотӕ сагъӕс кӕнун, ӕма ӕнаййепп ӕрмӕстдӕр ӕнхӕст адӕймаги бон ӕй ун? Алкӕмӕдӕр ни цӕхуӕндӕр гъӕндзийнӕдтӕ ес. Фал уӕддӕр уотӕ сагъӕс кӕнун раст цӕмӕн н’ адтайдӕ, уомӕ ӕркӕсӕн. Фиццагидӕр уой туххӕй, ӕма нин Йеговӕ нӕ гъӕндзийнӕдтӕ ӕма нӕ рӕдудтитӕмӕ ӕгӕр устур ӕргом не ’здахуй. Библи зӕгъуй: «О Йаг, ду адӕймагӕн ӕ рӕдудтитӕмӕ лӕмбунӕг ку кастайсӕ, уӕд ка бафӕразтайдӕ, о Йеговӕ?» (Пс. 130:3). Е ӕй зонуй, ӕнӕнхӕст ӕма тӕрегъӕдгун ке ан, уой ӕма нин зӕрдиагӕй хатир кӕнуй (Пс. 86:5). Дуккаги ба ’й Йеговӕ зонуй, цӕбӕл исхъаурӕ кӕндзиан, цӕбӕл ба – нӕ, ӕма нӕ бон ци нӕй, уой ни нӕ агоруй. (Бакӕсӕ Псалом 103:12–14.) Мадта уӕд Хуцауи цӕсти ӕнхӕст кенӕ ӕнаййепп ун ци нисан кӕнуй?

5. Цӕмӕй ӕнаййепп уӕн, уой туххӕй Хуцауи уарзун цӕмӕн гъӕуй?

⁵ Цӕмӕй Хуцауи цӕсти «ӕнаййепп» уӕн, уой туххӕй ӕй гъӕуама уарзгӕ кӕнӕн. Гъӕуама ин нӕ зӕрдӕ ӕгасӕйдӕр раттӕн ӕма алли гъуддаги дӕр ӕвдесӕн, еузӕрдон ибӕл ке ан, уой. Кӕд фӕлварӕнти рӕстӕги дӕр еци уарзондзийнадӕ нӕ исӕфуй, уӕд, зӕгъӕн ес, ӕма Хуцауи цӕсти ӕнаййепп ан (1 Анз. 28:9; Матф. 22:37). Нӕ зӕрдӕбӕл ӕрлӕуун кӕнӕн, райдайӕни ке кой кодтан, еци ӕртӕ Ӕвдесӕни. Цума уотӕ цӕмӕн архайдтонцӕ? Гӕрр, еци ӕригон хуӕри ӕ къласи хӕццӕ игъӕлдзӕгӕй рӕстӕг рарветун нӕ фӕндадтӕй? Ӕригон ӕнсувӕрӕн ба ӕ къласи биццеуи гиризтӕмӕ игъосун хъӕбӕр ӕхцӕуӕн адтайдӕ? Кенӕ, бийнонтӕ кӕмӕн ес, еци ӕнсувӕр ӕппундӕр нӕ тухстӕй, ӕ куст ке фесафдзӕй, уобӕл? Етӕ Йегови раст уагӕвӕрдтӕ зонунцӕ ӕма сӕ сӕ уӕларвон Фиди зӕрдӕ рохс кӕнун фӕндуй. Сӕ уарзондзийнадӕ сӕ разӕнгард кӕнуй, цӕмӕй унаффитӕ хӕсгӕй фиццагидӕр сагъӕс кӕнонцӕ, Йеговӕ ци гъуди кӕнуй, уобӕл. Уотемӕй ӕвдесунцӕ, Хуцауи цӕсти ӕнаййепп ке ’нцӕ, уой.

6. а) Ӕнаййепп цӕмӕн гъӕуама уӕн? б) Адам ӕма Евӕ Хуцаубӕл еузӕрдонӕй цӕмӕннӕ байзадӕнцӕ?

⁶ Хуцауи лӕггадгӕнгутӕ ӕнаййепп цӕмӕн гъӕуама уонцӕ? Уомӕн ӕма еу изӕд Йегови рази не ’гасей кой дӕр ракодта. Еци изӕд Едеми дзӕхӕрадони Хуцауи нихмӕ рацудӕй ӕма иссӕй Сайтан, гъома «Нихмӕлӕууӕг».  Сайтани дзубандитӕй уотӕ уадӕй, ӕма Йеговӕ лӕгъуз, ӕнӕраст ӕма, айдагъ ӕхе сагъӕс ка кӕнуй, уӕхӕн Хуцау ӕй, ӕма ин уомӕй ӕ ном фегадӕ кодта. Гъигагӕн, Адам ӕма Евӕ дӕр Сайтани фарс ислӕудтӕнцӕ, ӕма Хуцауи нихмӕ рацудӕнцӕ (Райд. 3:1–6). Едеми цӕргӕй син берӕ фадуӕттӕ адтӕй Йегови никки хъӕбӕрдӕр бауарзунмӕ. Фал Сайтан Йегови нихмӕ ку рацудӕй, уӕд рабӕрӕг ӕй, етӕ дӕр Йегови ӕгас зӕрдӕй ке нӕ уарзтонцӕ. Фӕстӕдӕр Иови дзамани исӕвзурдӕй еу ма дзурддаг фарста: адӕймаг Хуцаубӕл еузӕрдонӕй байзайдзӕй, уарзгӕ ’й ке кӕнуй, уой туххӕй? Ӕндӕр загъдӕй, адӕни бон ӕй Хуцауи цӕсти ӕнаййепп ун?

7. Иов 1:8–11 финст дзурдтӕй куд зиннуй, Йеговӕ Иови еузӕрдондзийнадӕмӕ цӕхуӕн цӕстӕй кастӕй ӕма имӕ Сайтан цӕхуӕн цӕстӕй кастӕй, е?

⁷ Иов цардӕй, израилӕгтӕ Египети ку цардӕнцӕ, еци рӕстӕг. Уӕди рӕстӕги Хуцаубӕл уой хузӕн еузӕрдон неке адтӕй. Иов дӕр мах хузӕн ӕнӕнхӕст адӕймаг адтӕй ӕма рӕдуйгӕ дӕр кодта. Фал ӕй Йеговӕ уарзта, уомӕн ӕма ӕнаййепп адӕймаг адтӕй. Сайтан уой разӕй дӕр, ӕвӕдзи, Йеговӕн уайдзӕфтӕ кӕнидӕ, зӕгъгӕ, адӕн дӕбӕл еузӕрдон нӕ уодзӕнцӕ. Уомӕ гӕсгӕ ин Йеговӕ е ’ргом Иовмӕ раздахта. Иови цардӕй бӕрӕг адтӕй, Сайтан мӕнгӕттӕ ке дзурдта. Йеговӕ бауагъта, цӕмӕй Сайтан Иови еузӕрдондзийнадӕ бафӕлвардтайдӕ. Йеговӕ ӕ еузӕрдон ӕмбалбӕл ӕппундӕр нӕ гурусхӕ кодта. (Бакӕсӕ Иов 1:8–11.)

8. Сайтан Иови басӕттунбӕл куд архайдта?

⁸ Сайтан тӕрегъӕд кӕнун нӕ зонуй. Е ӕй лӕгмар. Иовӕй байста, цидӕриддӕр имӕ адтӕй, уой: ӕ мулк, ӕ лӕггадгӕнгути ӕма ма сауӕнгӕ ӕ хуарз ном дӕр. Нӕ байаурста ӕ бийнонтӕбӕл дӕр. Ӕ дӕс сувӕллони ин бабун кодта, ӕхебӕл ба ин бацӕфсун кодта уӕззау  нез – къахӕй сӕрмӕ гъӕдгинти буни ниццӕй. Ӕ бийнойнаг ба ин еци мастӕйдзагӕй загъта: «Ралгъетӕ Хуцауи ӕма рамӕлӕ!» Иов ӕхуӕдӕг дӕр уотӕ бацӕй, ӕма ӕхецӕн мӕлӕт агурдта, фал уӕддӕр Йегови цӕсти адтӕй ӕнаййепп. Уӕд Сайтан исфӕндӕ кодта Иови ӕндӕрхузи бафхуӕрун – е ’мбӕлтти цъухӕй. Етӕ имӕ ӕрбацудӕнцӕ ӕма ӕ фарсмӕ берӕ бӕнттӕ фӕцӕнцӕ. Фал си Иов уодӕнцойнӕ нӕ фӕууидта, ӕрмӕстдӕр ин зундамонӕн ӕма нифссӕттӕн дзубандитӕ кодтонцӕ. Еци мӕститӕ, дан, дин Хуцау бавзарун кодта ӕма, дан, дӕ еузӕрдондзийнадӕ уомӕ нимади дӕр нӕй. Уотӕ дӕр ма ин загътонцӕ, ӕвӕдзи, дан, тӕрегъӕдгун гъуддӕгтӕ кодтай, ӕма дӕ Хуцау бафхуардта (Иов 1:13–22; 2:7–11; 15:4, 5; 22:3–6; 25:4–6).

9. Иов фӕлварӕнти ку бахаудтӕй, уӕд ци нӕ бакодта?

⁹ Цума Иов ӕхе куд бадардта? Е дӕр ӕнӕнхӕст адӕймаг адтӕй ӕма ӕ нецӕййаг ӕмбӕлтти хӕццӕ дӕр карзӕй дзурдта. Уомӕн сӕйрагдӕр иссӕй ӕхе рӕстдзийнадӕ исбӕлвурд кӕнун, Хуцауи рӕстдзийнадӕ нӕ, фал (Иов 6:3; 13:4, 5; 32:2; 34:5). Фал цийфӕнди зиндзийнӕдтӕ ма бавзурстайдӕ, уӕддӕр Йеговӕй нӕ раидард ӕй. Е ’мбӕлттӕ ин цитӕ дзурдтонцӕ, уобӕл нӕ баууӕндтӕй, ӕма син загъта: «Уотӕ некӕд уодзӕй, цӕмӕй ӕз сумах рӕстгӕнгутӕбӕл банимайон! Цалинмӕ ӕгас уон, уӕдмӕ Хуцаубӕл мӕ зӕрдӕ не ’сӕййевдзӕн!» (Иов 27:5). Аци дзурдти арф гъуди ес. Иов кӕронмӕ дӕр Хуцаубӕл еузӕрдонӕй байзадӕй, ӕма мах бон дӕр ӕй.

10. Сайтан Иови рӕстӕг ци гъуддаг исдзурддаг кодта, е махмӕ куд хауй?

¹⁰ Сайтан Иови туххӕй ци загъта, е абони махмӕ дӕр хауй. Сайтан нур дӕр ма нӕ сабур кӕнуй, ӕма мах туххӕй дӕр зӕгъуй, Хуцауи, дан, ӕцӕгӕй нӕ уарзӕн, нӕ еузӕрдондзийнадӕ кӕнгӕ миутӕй ӕндӕр неци ӕй, удта, дан, нӕ цард багъӕуай кӕнуни туххӕй Йеговӕн дӕр нӕбал лӕггадӕ кӕндзиан (Иов 2:4, 5; Рарг. 12:10). Уӕхӕн цӕмӕдӕрти ӕнцон игъосӕн кӕцӕй ӕй. Фал расагъӕс кӕнӕ еу гъуддагбӕл: Йеговӕ бауадзуй, цӕмӕй нин Сайтан нӕ еузӕрдондзийнадӕ бафӕлвара. Е нӕбӕл ӕууӕндуй ӕма нин фадуат дӕттуй, цӕмӕй ибӕл еузӕрдон ке ан, уой бавдесӕн, ӕма Сайтан мӕнгӕттӕ ке дзурдта, уой исбӕлвурд кӕнӕн, удта нин зӕрдӕ ӕвӕруй, ке нин банхус кӕндзӕй (Дзиуит. 13:6). Расагъӕс кӕнӕ: Дун-дуйней Хецау нӕбӕл ӕ зӕрдӕ даруй! Мадта ’й лӕдӕрис, Хуцауи цӕсти ӕнаййепп ун ӕхсидзгӕ цӕмӕн ӕй, уой? Уомӕн ӕма уотемӕй нӕ бон ӕй бавдесун, Сайтани фауӕн дзубандитӕ мӕнгӕттӕ ке ’нцӕ, удта Хуцауи ном дӕр исрохс кӕндзиан ӕма, уой фарс ке ан, уой бавдесдзиан. Ци гъӕуй кӕнун, цӕмӕй Хуцауи цӕсти идарддӕр дӕр ӕнаййепп уӕн?

11. Иови хабарӕй цӕбӕл ахур кӕнӕн?

¹¹ Аци «фӕстаг бӕнтти» Сайтан Хуацауи адӕни нихмӕ никки карздӕрӕй цӕуй (2 Тим. 3:1). Мадта Хуцауи цӕсти ӕнаййепп цард кӕнунмӕ хъауритӕ кӕцӕй гъӕуама есӕн? Ами дӕр бабӕй Иови хабарӕй берӕ цӕбӕлдӕрти ахур кӕнӕн. Фӕлварӕнтӕбӕл ку нӕма исӕмбалдӕй, уӕддӕр ӕ гъуддӕгтӕй ӕвдиста, Хуцаубӕл еузӕрдон ке ӕй. Ӕ хабарӕй ахур кӕнӕн, еузӕрдонӕй байзайунмӕ нин ка банхус кӕндзӕй, ӕртӕ уӕхӕн гъуддагебӕл. Гъӕйдӕ сӕмӕ ӕркӕсӕн.

12. а) Иов 26:7, 8, 14 куд финст ӕй, уомӕ гӕсгӕ Иови ци разӕнгард кодта Йеговӕн ӕгас зӕрдӕй кадӕ кӕнун? б) Мах бон ба ци ӕй кӕнун, цӕмӕй нӕ ӕгас зӕрдӕй фӕндӕуа Хуцауӕн кадӕ кӕнун?

¹² Иов Хуцауи гъуддӕгтӕбӕл сагъӕс кодта, ӕма ’й уой фӕрци никки хъӕбӕрдӕр уарзта. Иов Хуцауи гъуддӕгтӕбӕл расагъӕс кӕнунмӕ рӕстӕг рахецӕн кӕнидӕ. (Бакӕсӕ Иов 26:7, 8, 14.) Зӕнхӕ, арв, мегътӕ ӕма арви гӕбар-губурбӕл ку сагъӕс кодта, уӕд ӕ десӕн кӕрон н’ адтӕй. Фал ӕй уӕддӕр лӕдӕрдтӕй, Хуцауи сфӕлдистади туххӕй хъӕбӕр минкъий ке зонуй. Уомӕй уӕлдай ма дес кодта  Йегови дзурдтӕбӕл ӕма загъта: «Ӕ дзурдтӕ ин хӕзнай хузӕн мӕ зӕрди ӕвӕрун» (Иов 23:12). Иов Йеговӕн ӕгас зӕрдӕй кадӕ кодта. Е ӕ уӕларвон Фиди уарзта ӕма ӕй фӕндадтӕй, ӕ зӕрдӕн ӕхцӕуӕн ци ӕй, уой кӕнун. Уой фӕрци Йеговӕбӕл еузӕрдон адтӕй. Мах дӕр гъӕуама Иови фӕнзӕн. Иови рӕстӕг ка цардӕй, уонӕй мах дзӕвгарӕ фулдӕр зонӕн, Йеговӕ ци сфӕлдиста, уой туххӕй. Уомӕй уӕлдай ма нӕмӕ ес, Хуцауи Дзурд Библи, ӕма ’й ку кӕсӕн, уӕд Йегови хуӕздӕр базондзиан, ӕма нӕ е разӕнгард кӕндзӕй, цӕмӕй ин ӕгас зӕрдӕй кадӕ кӕнӕн. Уой фӕрци ба Йегови никки фулдӕр уарздзиан, игъосдзиан имӕ ӕма нӕ никки хъӕбӕрдӕр фӕнддзӕй алкӕддӕр ӕ цӕсти ӕнаййепп ун (Иов 28:28).

13, 14. Иов 31:1 куд финст ӕй, уомӕ гӕсгӕ Иов Хуцаумӕ ке игъуста, е цӕмӕй бӕрӕг адтӕй? б) Нӕ бон куд ӕй Иови фӕнзун?

¹³ Иов Хуцаумӕ ке игъуста, уой фӕрци адтӕй ӕнаййепп. Е ӕй зудта, ӕнаййепп цӕмӕй уа, уой туххӕй ӕй Хуцаумӕ игъосун ке гъӕуй. Алли гъуддаги дӕр, Йеговӕ куд зӕгъуй, уотӕ ку архайӕн, уӕд нӕ никки хъӕбӕрдӕр фӕнддзӕй ӕ цӕсти ӕнаййепп ун. Иов алли гъуддаги дӕр Хуцаумӕ игъуста. Зӕгъӕн, силгоймӕгти хӕццӕ ӕхе ӕгъдаугин дард кодта. (Бакӕсӕ Иов 31:1.) Иов ӕй зудта, ӕ бийнойнагӕй уӕлдай ӕндӕр ескӕмӕ е ’ргом ’здахун раст ке нӕй. Абони Сайтани дуйне куд ихӕлд ӕй, уотӕ некӕдма, ӕма махӕн дӕр ӕнӕгъдаудзийнади скъӕппӕги бахаунӕй тӕссаг ӕй. Мадта мах дӕр гъӕуама Иови хузӕн нӕхе гъӕуай кӕнӕн, цӕмӕй нӕ цардӕмбалӕй уӕлдай, ӕндӕр ескӕмӕ нӕ зӕрдӕ дзорун ма райдайа. Уомӕй уӕлдай ма ихӕлд хузтӕ кӕми фӕууинӕн, уоми си гъӕуама нӕ цӕститӕ уайтагъд райеуварс кӕнӕн (Матф. 5:28). Алли бон дӕр ку архайӕн, цӕмӕй еци гъуддаги нӕхебӕл хуӕцӕн, уӕд нин ӕнцондӕр уодзӕй Хуцауи цӕсти ӕнаййепп ун.

¹⁴ Иов Хуцаумӕ ке игъуста, е ма бӕрӕг адтӕй, мулкмӕ ци цӕстӕй кастӕй, уомӕй дӕр. Иов ӕй лӕдӕрдтӕй, ӕ мулкбӕл ӕ зӕрдӕ ку дардтайдӕ, уӕд тӕрхони аккаг тӕрегъӕд ке искодтайдӕ (Иов 31:24, 25, 28). Аци дуйне  адӕймаги мулк ӕмбурд кӕнунмӕ разӕнгард кӕнуй. Библий уагӕвӕрдтӕмӕ гӕсгӕ ку цӕрӕн, удта ӕхца ӕма мулкмӕ раст цӕстӕй ку кӕсӕн, уӕд Хуцауи цӕсти уодзиан ӕнаййепп (Ӕмб. 30:8, 9; Матф. 6:19–21).

15. а) Иов федарӕй ци зудта ӕма ин е еузӕрдонӕй байзайунмӕ куд ӕнхус кодта? б) Махӕн ба е куд банхус кӕндзӕй, Йеговӕ ци нифс дӕттуй, уой нӕ зӕрдӕбӕл дарун?

¹⁵ Иовӕн ма еузӕрдонӕй байзайунмӕ ӕнхус кодта, Йегови хуӕрзеуӕгмӕ ке ӕнгъӕлмӕ кастӕй, е. Иов ӕй федарӕй зудта, Хуцау ин ӕ еузӕрдондзийнадӕмӕ цийфӕнди цӕстӕй ке нӕ кӕсуй (Иов 31:6). Ӕма кӕд уӕззау фӕлварӕнтӕбӕл исӕмбалдӕй, уӕддӕр ӕй зудта, Йеговӕй имӕ хуӕрзеуӕг ке ӕнгъӕлмӕ кӕсуй. Еци нифс ин ӕнаййепп цард кӕнунмӕ хъауритӕ лӕвардта. Йеговӕн е уотӕ ӕхцӕуӕн адтӕй, ӕма е ’нӕнхӕст лӕггадгӕнӕгӕн рӕдауӕй райарфӕ кодта! (Иов 42:12–17; Иак. 5:11). Федӕни ба имӕ никки фулдӕр арфӕдзийнӕдтӕ ӕнгъӕлмӕ кӕсуй. Ду ба федарӕй ӕууӕндис, Йеговӕ дин дӕ еузӕрдондзийнади туххӕй ке райарфӕ кӕндзӕй. Йеговӕ не ’ййевуй (Мал. 3:6). Нӕ еузӕрдондзийнадӕн Хуцауи цӕсти устур аргъ ке ес, уой ку нӕ иронх кӕнӕн, уӕд нин федӕнӕй ци нифс ес, е никки федардӕр исуодзӕй (1 Фес. 5:8, 9).

16. Нӕ федар фӕндӕ ци гъӕуама уа?

¹⁶ Хуцауи цӕсти ӕнаййепп ун, дӕ федар фӕндӕ уӕд. Хатгай дӕмӕ уотӕ дӕр кӕсдзӕй, ӕма Хуцауи надбӕл еунӕгӕй цӕуис, фал е уотӕ нӕй. Йегови цӕсти ӕнаййепп ка ӕй, уӕхӕн лӕггадгӕнгутӕ цалдӕр милиуани ’нцӕ, ӕма ду дӕр сӕ хӕццӕ усхъӕй-усхъӕмӕ лӕггадӕ кӕнис. Рагидзаманти си беретӕ еузӕрдонӕй байзадӕнцӕ, кӕд син мӕлӕтӕй тӕссаг адтӕй, уӕддӕр (Дзиуит. 11:36–38; 12:1). Мадта, нӕ зӕрдӕбӕл дарӕн Иови дзурдтӕ: «Ӕз... Хуцаубӕл мӕ зӕрдӕ не ’сӕййевдзӕн!» Ӕма нӕ еузӕрдондзийнадӕ Йеговӕн кадӕ хӕссӕд ӕносмӕ!