1. Kon e tres Testigunan di Yehova menshoná den e paragraf akí ta mustra ku nan ta leal na Yehova?

IMAGINÁ bo e siguiente tres situashonnan: (1) Un mucha muhé ta na skol i su yùfrou ta pidi henter e klas pa partisipá den un dia di fiesta religioso òf patriótiko. E mucha muhé sa ku e selebrashon akí no ta agradá Dios, pues ku rèspèt e ta bisa yùfrou ku lo e no partisipá. (2) Un mucha hòmber ta prediká di kas pa kas. E ta ripará ku un mucha di su skol, ku a yega di hasi bofon di Testigunan di Yehova, ta biba na e siguiente kas. Aunke e mucha hòmber ta tímido, tòg e ta bai prediká na e kas ei. (3) Un tata ta traha duru pa perkurá pa su famia. Un dia su doño di trabou ta pidié pa hasi algu desonesto òf ilegal. Aunke e por pèrdè su trabou, e ta splika su doño di trabou ku e ta un persona onesto ku ta kumpli ku lei pasobra esei ta loke Dios ta ferwagt di su sirbidónan.—Rom. 13:1-4; Heb. 13:18.

2. Kua ta algun pregunta ku nos lo analisá, i dikon?

² Ki kualidat e tres Testigunan ei a desplegá? Kisas bo ta pensa riba kurashi i onestidat. Pero nan a demostrá un otro kualidat tambe ku ta hopi importante, esta, integridat. Kada un di nan a hasi esfuerso pa keda leal na Yehova i obedesé su normanan. Integridat ta loke a motivá nan pa hasi esei. I nos ta sigur ku Yehova ta orguyoso di kada un di nan pasobra nan a demostrá e kualidat ei. Nos tambe ke pa nos Tata den shelu ta orguyoso di nos. Pues, laga nos analisá e siguiente preguntanan: Kiko ta integridat? Dikon integridat ta importante? I kon nos por ta mas determiná pa mantené nos integridat den e tempu difísil akí?

3. (a) Kon Dios su sirbidónan ta demostrá integridat? (b) Duna algun ehèmpel ku ta yuda nos komprondé dikon Yehova ke pa tur loke nos ta dun’é ta kompleto òf sin defekto.

³ Un sirbidó di Dios ku ta demostrá integridat ta stima  Yehova ku henter su kurason, ta keda semper leal na dje i ta tene kuenta ku loke Dios ta pensa promé ku e tuma un desishon. Den Beibel, e palabra hebreo tradusí komo “integridat” ta nifiká: kompleto òf sin defekto. Por ehèmpel, e israelitanan tabata ofresé bestia komo sakrifisio na Yehova, i e Lei a bisa ku e bestia mester tabata sin defekto. * (Lev. 22:21, 22) Yehova su pueblo no tabatin mag di ofresé un bestia ku tabata falta pia, orea òf wowo, ni un bestia ku tabata malu. Pa Yehova, tabata importante pa e bestia ta kompleto i sin defekto. (Mal. 1:6-9) Dikon Yehova ke pa tur loke nos dun’é ta kompleto i sin defekto? E siguiente ehèmpel ta yuda nos komprondé esei. Ora nos kumpra algu, sea un fruta, buki òf hèrmènt, nos no ke pa e tin buraku òf ta falta un pida. Nos ke pa e ta kompleto i sin defekto. Esei ta loke Yehova tambe ke ora ta trata di nos amor i lealtat p’e. E mester ta kompleto i sin defekto, sí, íntegro.

4. (a) Kon nos por sa ku nos no mester ta perfekto pa mantené nos integridat? (b) Segun Salmo 103:12-14, kiko Yehova ta spera di nos?

⁴ Komo ku nos sa ku nos ta imperfekto i ku nos ta kometé hopi eror, kisas nos ta puntra nos mes: ‘Esei ke men ku nos mester ta perfekto pa nos por mantené nos integridat?’ Klaru ku no! Laga nos analisá dos motibu dikon no ta asina. Di promé, Yehova no ta enfoká riba nos defektonan. Su Palabra ta bisa nos: “Si abo, SEÑOR, tuma inikidatnan na kuenta, o SEÑOR, ken lo por a keda para?” (Sal. 130:3) Yehova sa ku nos ta hende imperfekto i pekadó i ta pordoná nos generosamente. (Sal. 86:5) Di dos, Yehova sa nos limitashonnan i no ta spera mas di loke nos por hasi. (Lesa Salmo 103:12-14.) Pues, den ki sentido nos por ta kompleto i sin defekto den su bista?

5. Dikon Yehova su sirbidónan mester tin un amor profundo pa Yehova pa nan por mantené nan integridat?

⁵ Pa un sirbidó di Yehova mantené su integridat, e mester tin un amor profundo pa Yehova. Si nos amor i lealtat pa nos Tata selestial keda kompleto i sin defekto, asta ora nos ta bou di prueba, e ora ei nos tin integridat. (1 Kró. 28:9; Mat. 22:37) Pensa atrobe riba e tres Testigunan di Yehova menshoná den e promé paragraf i riba e desishonnan ku nan a tuma. Akaso e mucha muhé no gusta pasa bon na skol? E mucha hòmber ke pasa bèrgwensa den sirbishi? E tata di famia ke pèrdè su trabou? Klaru ku nò! Mas bien, nan sa ku Yehova su normanan ta hustu, i e kos di mas importante pa nan ta di agradá nan Tata selestial. Komo ku nan ta stima Yehova, nan ta pensa semper riba dje promé ku nan tuma un desishon. Di e manera ei nan ta demostrá nan integridat.

6. (a) Dikon integridat ta importante pa kada un di nos? (b) Kon Adam ku Eva a demostrá ku nan no tabatin integridat?

⁶ Dikon ta importante pa kada un di nos mantené nos integridat? Pasobra Satanas a akusá Yehova i tambe kada un di nos. Den Hòfi di Eden, e angel rebelde ei a purba daña Yehova su reputashon. Na e momento ei, el a bira Satanas, ku ta nifiká “Opositor.” El a insinuá ku Dios ta un mal Gobernante i tambe ku e ta egoista i desonesto. Lamentablemente, Adam ku Eva a djòin Satanas i a rebeldiá kontra Yehova. (Gén. 3:1-6) Miéntras ku  nan tabata biba den Eden, nan tabatin masha hopi oportunidat pa hasi nan amor pa Yehova mas fuerte. Pero, ora Satanas a rebeldiá, e amor ku Adam ku Eva tabatin na e momento ei no tabata kompleto ni sin defekto. Mas despues, den tempu di Yòb, un otro kuestion a presentá: Tin hende ku lo keda leal na Yehova Dios pasobra nan stim’é? Ku otro palabra, hende ta kapas di mustra integridat?

7. Segun Yòb 1:8-11, kiko Yehova a pensa di e integridat di Yòb, i kiko Satanas a pensa di e integridat di Yòb?

⁷ Yòb a biba tempu ku e israelitanan tabata na Egipto, i niun hende no tabatin integridat manera esun di dje. Klaru ku e tabata imperfekto i a kometé eror, meskos ku nos. Sinembargo, Yehova tabata stima Yòb pa su integridat. Ta parse ku Satanas a yega di akusá Yehova kaba ku hende no por mantené nan integridat. P’esei, Yehova a puntra Satanas si el a tuma nota di Yòb, un hòmber di gran integridat. E manera ku Yòb tabata biba a demostrá ku Satanas ta un gañadó! Pues, Satanas a eksigí pa Yehova permitié tèst Yòb su integridat. Yehova tabatin konfiansa den su amigu Yòb, p’esei El a permití Satanas tèst e.—Lesa Yòb 1:8-11.

8. Kon Satanas a ataká Yòb?

⁸ Satanas ta kruel, i e ta un asesino. El a kita tur loke Yòb tabatin for di dje, mata su sirbidónan i daña su reputashon. El a ataká Yòb su famia i a mata su dies yunan stimá. Despues, el a ataká Yòb su salú. El a laga Yòb su kurpa saka blufein ku ta hasi masha doló, for di su plant’i pia te na su korona di kabes. Yòb su kasá tabatin asina tantu angustia i tristesa, ku el a bisa Yòb pa  entregá, maldishoná Dios i muri. Yòb mes tabatin gana di muri, pero tòg el a mantené su integridat. P’esei, Satanas a purba di atak’é di un otro manera. El a usa tres amigu di Yòb. E hòmbernan ei a keda vários dia serka Yòb pero nan no a dun’é niun konsuelo. Al kontrario, nan a skual e i kritik’é sin miserikòrdia. Nan a pretendé ku ta Dios a kousa su sufrimentu i ku Dios no tabatin kunes si e mantené su integridat òf nò. Nan a asta insinuá ku Yòb tabata un hòmber malbado i ku e tabata meresé e kosnan horibel ku tabata pasa kuné!—Yòb 1:13-22; 2:7-11; 15:4, 5; 22:3-6; 25:4-6.

9. Apesar di tur loke a pasa, kiko Yòb a nenga di hasi?

⁹ Kon Yòb a reakshoná ora el a hañ’é ku tantu prueba asina? E no tabata perfekto. El a rabia i a skual su supuesto amigunan, i despues e mes a atmití ku e no a kontrolá su mes i a papia sin pensa. El a defendé su propio hustisia mas ku esun di Dios. (Yòb 6:3; 13:4, 5; 32:2; 34:5) Sinembargo, asta ora Yòb su situashon tabata sumamente difísil, el a nenga di bira lomba pa Dios. E no a kere e mentiranan di su supuesto amigunan. El a bisa: “Nunka di mi bida lo mi bisa ku boso tin rason; te na mi morto lo mi no bandoná mi integridat.” (Yòb 27:5) E palabranan akí ta mustra ku Yòb tabata determiná pa mantené su integridat i ku e no a entregá, sin importá kiko a pasa. Nos por sigui su ehèmpel.

10. Kon abo ta enbolbí den e akusashon ku Satanas a lansa kontra Yòb?

¹⁰ Kon abo ta enbolbí den e akusashon ku Satanas a lansa kontra Yòb? Wèl, el a lansa e mesun akusashonnan ei kontra kada un di nos. Den un sentido, Satanas ta bisa ku bo no ta stima Yehova Dios di bèrdat, ku lo bo stòp di sirbié pa salba bo bida, i ku lo bo no mantené bo integridat! (Yòb 2:4, 5; Rev. 12:10) Kon esei ta laga bo sinti? Sin duda, esei ta duel bo hopi. Pero pensa riba esaki: Yehova ta permití Satanas tèst bo integridat. E tin asina tantu konfiansa den bo ku e ta duna bo un oportunidat maravioso pa mantené bo integridat i mustra ku Satanas ta un gañadó. Yehova tin sigur ku bo por hasi esei, i e ta primintí bo ku lo e yuda bo. (Heb. 13:6) Ta un gran privilegio ku e Soberano di universo ta konfia bo! Bo ta mira dikon ta asina importante pa bo mantené bo integridat? Esei ta permití nos mustra ku Satanas su akusashonnan no ta bèrdat i a la bes nos ta defendé Yehova su bon nòmber i apoyá su manera di goberná. Kiko nos por hasi pa mantené nos integridat?

11. Kiko nos por siña for di Yòb?

¹¹ Den e “último dianan” difísil akí, Satanas su atakenan a bira mas fuerte i mas frekuente. (2 Tim. 3:1) Kon nos por fortalesé nos mes pa mantené nos integridat? Atrobe, nos por siña hopi for di Yòb. Hopi tempu promé ku Satanas a tèst Yòb, ya kaba el a demostrá na vários okashon ku e tabata un hòmber di integridat. Laga nos wak tres kos ku Yòb a hasi i kon nos por imit’é.

12. (a) Segun Yòb 26:7, 8 i 14, kon Yòb a kultivá un atmirashon i rèspèt profundo pa Yehova? (b) Kon nos por kultivá un atmirashon profundo pa Dios?

¹² Yòb a kultivá un atmirashon profundo pa Yehova, i asina el a hasi su amor pa Yehova mas fuerte. Yòb a tuma tempu pa meditá riba Yehova su kreashon maravioso. (Lesa Yòb 26:7, 8, 14.) El a keda masha impreshoná ora el a meditá riba tera, shelu, nubia i e zonido di dònder, pero asina mes el a realisá ku e  tabata sa masha poko di tur loke Yehova a krea. Ademas, el a duna gran balor na e deklarashonnan di Yehova, p’esei el a bisa: “Mi a stima e palabranan di su boka.” (Yòb 23:12) Yòb tabatin un atmirashon i rèspèt profundo pa Yehova. E tabata stima su Tata i kier a agrad’é. Komo resultado, Yòb tabata mas determiná pa mantené su integridat. Nos tin ku hasi meskos ku Yòb. Awe, nos sa muchu mas tantu tokante Yehova su maravioso kreashon ku hende den tempu di Yòb. I nos tin e Beibel kompleto pa yuda nos konosé ken Yehova ta realmente. Tur loke nos siña ta yuda nos kultivá un atmirashon profundo den nos kurason. Na su turno, e atmirashon i rèspèt ku nos tin pa Yehova lo motivá nos pa stim’é, obedes’é i ta mas determiná pa mantené nos integridat.—Yòb 28:28.

13-14. (a) Segun Yòb 31:1, kon Yòb a demostrá ku el a obedesé Yehova? (b) Kon nos por imitá Yòb su ehèmpel?

¹³ Yòb a hasi esfuerso pa obedesé Yehova den tur kos. Yòb tabata sa ku pa e mantené su integridat, e mester a obedesé Yehova. De echo, kada bes ku nos obedesé Yehova, nos ta bira mas determiná pa mantené nos integridat. Yòb a hasi su bèst pa obedesé Dios den su bida diario. Por ehèmpel, e tabata kouteloso den su manera di trata hende muhé. (Lesa Yòb 31:1.) Komo un hòmber kasá, e tabata sa ku tabata inapropiá pa mustra interes romántiko den un hende muhé ku no tabata su kasá. Awe, nos ta biba den un mundu ku konstantemente ta eksponé nos na tentashon pa kometé inmoralidat seksual. Nos lo imitá Yòb i nenga di mustra interes romántiko den un persona ku no ta nos kasá? Nos lo nenga di wak potrèt òf plachi sensual òf pornográfiko den kualke forma ku nan ta disponibel? (Mat. 5:28) Si nos ehersé dominio propio tur dia, nos lo fortalesé nos mes pa mantené nos integridat.

¹⁴ Ademas, Yòb a obedesé Yehova den su punto di bista di kos material. Yòb a komprondé  ku si el a pone su konfiansa den su rikesa, lo el a kometé un eror grave ku meresé kastigu. (Yòb 31:24, 25, 28) Awe, nos ta bibando den un mundu hopi materialista. Si nos kultivá un punto di bista balansá di plaka i kos material, meskos ku Beibel ta animá nos pa hasi, nos lo ta mas determiná pa mantené nos integridat.—Pro. 30:8, 9; Mat. 6:19-21.

15. (a) Ki speransa a yuda Yòb mantené su integridat? (b) Dikon nos tin ku keda kòrda riba e speransa ku Yehova ta ofresé nos?

¹⁵ Yòb a enfoká riba e speransa ku Dios lo a rekompens’é. E tabata konvensí ku Dios tabata interesá den su integridat. (Yòb 31:6) Apesar di su pruebanan, Yòb tabatin sigur ku al final Yehova lo a rekompens’é. E konfiansa ei siguramente a yud’é mantené su integridat. Yehova tabata asina kontentu ku Yòb su integridat ku el a rekompens’é rikamente miéntras ku e tabata imperfekto ainda! (Yòb 42:12-17; Sant. 5:11) I den futuro Yòb lo risibí rekompensa mas grandi ainda. Bo tin e speransa firme ku Yehova lo rekompensá bo integridat? Nos Dios no a kambia. (Mal. 3:6) Si nos keda kòrda ku Yehova ta rekompensá hende ku ta mantené nan integridat, nos lo hasi nos bèst pa mantené nos integridat i nos por tin sigur ku nos lo tin un futuro maravioso.—1 Tes. 5:8, 9.

16. Kiko nos mester ta determiná pa hasi?

¹⁶ Pues, sea determiná pa semper mantené bo integridat! Tin biaha bo por sinti ku ningun otro hende no ta mantené nan integridat, pero bo no ta bo so. Bo ta entre e miónes di fiel sirbidónan di Dios rònt mundu ku ta mantené nan integridat. Ademas, lo bo djòin e lista di e hòmber- i muhénan fiel di pasado ku a mantené nan integridat, asta bou di menasa di morto. (Heb. 11:36-38; 12:1) Laga nos tur ta determiná pa sigui e ehèmpel di Yòb i bisa: “Lo mi no bandoná mi integridat.” I laga nos integridat glorifiká Yehova pa semper!