1. Σαρ ατσσιλέ πιστοί κο Ιεχωβά ανταλά τριν Μάρτυρες;

ΑΝΕΝ τουμαρέ γκοντιάτε ακαλά τριν παραδείγματα. (1) Εκ ντιβές, εκ χουρντί τσσάι ισί κο σχολείος κάνα η δασκάλα βακερέλα σαρέ κο μαθητές τι τζαν σε εκ γιορτή. Η τσσάι τζανέλα ότι ο Ντεβέλ να μανγκέλα οντιά γιορτή, οτθάρ βακερέλα με σεβασμός ότι να κα τζαλ. (2) Εκ τερνό σο ισί λατζανό βακερέλα ο λατσσέ αμπέρια κχερ κχερέστε. Αγαβέλα ότι κο γιαβέρ κχερ μπεσέλα εκ συμμαθητής σο πρασάλα ι Μαρτυρέν. Αλλά ο τερνό τζάλα ντα μπασκιαρέλα ι πόρτα. (3) Εκ μουρς κερέλα ο πιο λατσσό πι μπουτιάτε για τι ανέλ ο αναγκαία κι φαμιλί. Εκ ντιβές, λέσκο αφεντικός μανγκέλα λέσταρ τι κερέλ εκ παρανομία. Παρόλο σο μπορεί τι χασαρέλ πι μπουτί, βακερέλα λέσκε ότι πρέπει τι αβέλ τίμιος ντα τι ντελ καν κο νόμοι κι τθεμέσκε σόσκε ανταβά μανγκέλα ο Ντεβέλ πι υπηρετόνταρ.​—Ρωμ. 13:​1-4· Εβρ. 13:18.

2. Καλά ερωτήσεις κα ντικχάς, ντα σόσκε;

² Ανταλά τριν τζενέ τθερένα ιδιότητες σαρ ισί ο θάρρος ντα η τιμιότητα. Αλλά κάτι ατζέ πιο σημαντικός ισί ότι τθερένα σαστό πουμαρό γκι κο Ντεβέλ. Ο τριν-ντα ισί αφοσιωμέ κο Ιεχωβά. Ο τριν-ντα ντένα καν κι Ντεβλέσκε κανόνες. Κερένα-λες ανταβά σόσκε ατσσικιαρένα σαστό πουμαρό γκι κο Ιεχωβά, ντα βοβ σίγουρα ισί περήφανος λένγκε. Αμέν-ντα μανγκάσα τι κεράς περήφανος αμαρέ Νταντές σο ισί κο ουρανός. Οτθάρ, κα ντικχάς τριν ερωτήσεις: Σαρ υπηρετίνασα ι Ντεβλές σαστέ γκίσαρ; Σόσκε πρέπει τι αβέλ σαστό αμαρό γκι; Ντα σαρ κα μανγκάς ατζέ πιο μπουτ τι ατσσικιαράς σαστό αμαρό γκι ανταλέ δύσκολε ντιβεσέντε;

3. (α) Σαρ σικαβάσα ότι τθεράσα σαστό αμαρό γκι κο Ντεβέλ; (β) Καλά παραδείγματα βοηθίνενα-αμέν τι αγαβάς σο μανγκέλα τι βακερέλ τι υπηρετίνας ι Ντεβλές σαστέ γκίσαρ;

³ Αμαρό γκι ισί σαστό κο Ιεχωβά, άμα μανγκάσα-λες σαρέ  αμαρέ γκίσαρ ντα τθεράσα μπαρί αφοσίωση λέστε. Ανταβά κερέλα-αμέν τι σκεφτίνας πρώτα σο μανγκέλα βοβ κάθε φαρ σο τραμπίνασα σο κα κεράς. Για παράδειγμας, ο Ισραηλίτες θυσιάνενας ζώα ι Ιεχωβάσκε ντα ο Νόμος βακερέλας ότι οντουλά ζώα έπρεπε τι αβέν υγιή. * (Λευιτ. 22:​21, 22) Ο Ντεβέλ να μουκχέλας τι ανέν εκ ζώος σο λειπίνελας λέσταρ εκ τσανγκ, εκ καν ή εκ γιακχ, ούτε εκ νασφαλό ζώος. Ι Ιεχωβάσκε ισινέ σημαντικός ο ζώος τι αβέλας σαστό, μα τι λειπίνελας λέσταρ τίποτα. (Μαλ. 1:​6-9) Αγαβάσα σόσκε ισί μπουτ σημαντικός ανταβά ι Ιεχωβάσκε. Κάνα κινάσα κάτι, σαρ ισί εκ φρούτος, εκ βιβλίος ή εκ εργαλείος, να μανγκάσα τι τθερέλ γούρνες ή τι λειπίνελ λέσταρ κάτι. Μανγκάσα-λες σαστό. Αντικάς μανγκέλα ο Ιεχωβά τι αβέλ η αγάπη σο τθεράσα λέσκε ντα αμαρί αφοσίωση. Πρέπει τι αβέν σαστέ.

4. (α) Σόσκε μπορίνελα εκ ατελής τζενό τι τθερέλ σαστό γκι; (β) Σο μανγκέλα αμένταρ ο Ιεχωβά σαρ βακερέλα κο Ψαλμός 103:​12-14;

⁴ Μήπως ανταβά μανγκέλα τι βακερέλ ότι πρέπει τι αβάς τέλειοι για τι τθεράς σαστό αμαρό γκι κο Ντεβέλ; Μπορεί τι αβέλ αμαρέ γκοντιάτε ότι κεράσα μπουτ λάθη. Ντικχέν ντούι πράγματα σο σικαβένα σόσκε να χρειαζίντιβελα τι νταράς. Πρώτον, ο Ιεχωβά να ατσσόλα αμαρέ λαθίντε. Η Γραφή βακερέλα αμένγκε: «Γιαχ, άμα κα ντέας σημασία κο λάθη, σοράν, Ιεχωβά, κον κα μπορίνελας τι ατσσόλ;» (Ψαλμ. 130:3) Βοβ τζανέλα ότι ισινάμ ατελείς, αμαρτωλοί τζενέ, ντα συγχωρίνελα-αμέν αντράλ πι γκίσταρ. (Ψαλμ. 86:5) Δεύτερον, ο Ιεχωβά τζανέλα αμαρέ όρια ντα να μανγκέλα αμένταρ τι κεράς πράγματα σο ναστί κεράσα. (Διαβάνεν Ψαλμός 103:​12-14) Άρα, σαρ ισινάμ σαστέ λέσκε γιακχίντε;

5. Σόσκε ο υπηρέτες ι Ιεχωβάσκε χρειαζίντιβενα αγάπη για τι υπηρετίνεν-λες σαστέ γκίσαρ;

⁵ Ο υπηρέτες ι Ιεχωβάσκε χρειαζίντιβενα αγάπη για τι υπηρετίνεν-λες σαστέ γκίσαρ. Αμαρί αγάπη ι Ντεβλέσκε ντα η αφοσίωση σο τθεράσα λέσκε σαρ Ντατ σο ισί κο ουρανός, πρέπει τι ατσσόν σαστέ. Άμα αμαρί αγάπη ατσσόλα αντικάς ατζέ-ντα κάνα τθεράσα δοκιμασίες, αμαρό γκι ισί σαστό κο Ντεβέλ. (1 Χρον. 28:9· Ματθ. 22:​37) Ντεν-τουμέν γκοντί ι τρινέ Μαρτυρέν σο βακερντάμ λένγκε κι αρχή. Σόσκε κερντέ οντουβά σο κερντέ; Μήπως η τσσάι να μανγκέλα τι νακχέλ λατσσές κο σχολείος; Μήπως μανγκέλα ο τερνό τι νιωθίνελ μπέτι κάνα ισί κο έργος κχερ κχερέστε; Ή μήπως μανγκέλα οντουβά ντατ τι χασαρέλ πι μπουτί; Σίγουρα όχι. Βον τζανένα ότι ο Ιεχωβά τσσουβέλα δίκαιους κανόνες ντα οντουβά σο τθερένα πουμαρέ γκοντιάτε ισί τι κερέν λέσκο γκι. Η αγάπη σο τθερένα λέσκε κερέλα-λεν τι σκεφτίνεν πρώτα σο μανγκέλα βοβ κάνα ισί τι τραμπίνεν σο κα κερέν. Αντικάς, σικαβένα ότι λένγκο γκι ισί σαστό κο Ντεβέλ.

6. (α) Σόσκε πρέπει τι τθερέν σαστό γκι; (β) Σαρ σικαντέ ο Αδάμ ντα η Εύα ότι λένγκο γκι να ισινέ σαστό κο Ντεβέλ;

⁶ Σόσκε πρέπει σαρέ τι τθεράς σαστό γκι; Επειδή ο Μπενγκ κατηγοριντάς ι Ιεχωβάς, αλλά κατηγοριντάς ι κάθε τζενές-ντα. Κο κήπος της Εδέμ, οντουβά άγγελος αβιλό Σατανάς, σο μανγκέλα τι βακερέλ «οντουβά σο τζάλα κόντρα». Μανγκλάς τι χαλαβέλ ο λατσσό ναβ ι Ιεχωβάσκο κάνα κερντάς ι γιαβερέν τι πακιάν ότι ο Ντεβέλ ισί γκεραλό, ντικχέλα σάντε πες ντα να κυβερνίνελα λατσσές. Δυστυχώς, ο Αδάμ ντα η Εύα τσσιντιντέ κατά Μπενγκ ντα γκιλέ κόντρα ι Ιεχωβάσαρ. (Γέν. 3:​1-6) Κάνα τζουβντιόνας κι Εδέμ, τθερένας μπουτ ευκαιρίες τι μπαριαρέν πουμαρί αγάπη ι Ιεχωβάσκε. Αλλά κάνα ο Μπενγκ πουταρντάς ανταβά ζήτημας,  σικάντιλο ότι λένγκι αγάπη να ισινέ σαστί. Πιο σοράν, έπρεπε τι ντιντιόλ απάντηση ακαλέ ερωτησιάτε: Κα υπαρχίντιβενας τζενέ σο κα ατσσόνας αφοσιωμέ κο Ιεχωβά επειδή μανγκένας-λες; Γιαβερέ λαφίντζαρ, αβέλα-πες τι τθερέν ο τζενέ σαστό πουμαρό γκι κο Ντεβέλ; Η απάντηση ντιντιλί κάνα τζουβντιόλας ο Ιώβ.

7. Καγιά άποψη τθερέλας ο Ιεχωβά ντα καγιά ο Μπενγκ για τον Ιώβ σαρ βακερένα ο εδάφια Ιώβ 1:​8-11;

⁷ Ο Ιώβ τζουβντιόλας κάνα ο Ισραηλίτες ισινέ κι Αίγυπτος. Αζομάν, καέκ γιαβέρ να ισινέ αζόμ πιστός. Ο Ιώβ ισινέ ατελής, σαρ αμέν. Κερέλας λάθη. Αλλά ο Ιεχωβά μανγκέλας-λες σόσκε λέσκο γκι ισινέ σαστό. Ντικχίντιβελα ότι ο Μπενγκ πρασαντάας πιο τζανγκλέ-ντα ι Ιεχωβάς ντα βακερντάας ότι ο τζενέ να κα ατσσικιαρένας σαστό πουμαρό γκι άμα κα δοκιμάντιβενας. Οτθάρ, ο Ιεχωβά σικαντάς κο Μπενγκ τον Ιώβ. Η ζωή οντουλέ τζενέσκι σικαβέλας ότι ο Μπενγκ ισινέ ψεύτης! Ο Μπενγκ μανγκλάς τι δοκιμάντιβελ ο Ιώβ για τι σικάντιβελ άμα λέσκο γκι ισί σαστό. Ο Ιεχωβά ντέλας μπέσα πι αμαλέστε κο Ιώβ, οτθάρ μουκχλάς ι Μπενγκές τι δοκιμάνελ-λες.​—Διαβάνεν Ιώβ 1:​8-11.

8. Σο κερντάς ο Μπενγκ κο Ιώβ;

⁸ Ο Μπενγκ ισί γκεραλό, ισί δολοφόνος. Λιντάς κατά Ιώβ σαρέ οντουλά σο τθερέλας, μουνταρντάς λέσκε υπηρετόν ντα χαλαντάς λέσκο λατσσό ναβ. Κερντάς κακός λέσκε φαμιλιάτε κάνα μουνταρντάς λέσκε ντεσέ αγαπημέ τσσαβέν. Σοράν, κερντάς κακός κο Ιώβ κάνα ντινάς-λες εκ μπέτι νασφαλιπέ μπαρέ πουκνίντζαρ σο πφερντέ λέσκο σώμας ντα κερντέ-λες τι ντουκχάλ μπουτ. Η ρομνί του Ιώβ ισινέ απελπισμέ ντα μπουτ στεναχωριμέ. Βακερντάς λέσκε τι παρατίνελ-λεν, τι ντελ αρμανιά ι Ντεβλές ντα τι μερέλ. Ο Ιώβ-ντα  βακερντάς ότι μανγκέλας τι μερέλ, αλλά λέσκο γκι ατσσιλό σαστό κο Ιεχωβά. Αζομάν ο Μπενγκ κερντάς κάτι γιαβέρ-ντα. Αντάς προβλήματα κο Ιώβ αντράλ λέσκε τρινέ αμαλένταρ. Βον ισινέ λέσαρ μερικά ντιβεσά, αλλά αντίς τι κοβλιαρέν λέσκι ντουκχ, κατηγοριντέ-λες σκληρέ λαφίντζαρ. Βακερντέ ότι ο Ντεβέλ αντάας λέσκε ο προβλήματα ντα ότι να χάλας-Λες ανάγκη άμα τθερέλας σαστό πο γκι Λέστε. Βακερντέ ατζέ-ντα ότι ο Ιώβ ισινέ πφιρνό ντα ότι αξίνελας τι τσσίντελ σαρέ οντουλά μπέτι πράγματα!​—Ιώβ 1:​13-22· 2:​7-11· 15:4, 5· 22:​3-6· 25:​4-6.

9. Σο να κερντάς ο Ιώβ παρόλο σο τθερέλας δοκιμασίες;

⁹ Σο κερντάς ο Ιώβ κι δοκιμασία ανταγιά; Να ισινέ τέλειος. Κερντάς λάφι χολιάσαρ οντουλέ ψεύτικε αμαλέντζαρ ντα, σαρ παραδεχτιντάς πιο σοράν, κερντάς λάφι χωρίς τι σκεφτίνελ. Μανγκέλας τι σικαβέλ πιο μπουτ ότι βοβ τθερέλας δίκιος παρά ο Ντεβέλ. (Ιώβ 6:3· 13:4, 5· 32:2· 34:5) Αλλά ατζέ-ντα κάνα νακχέλας μπουτ δύσκολα, να γκιλό κόντρα ι Ιεχωβάσαρ. Να πακιαντάς ο λάφια οντουλέ αμαλένγκε σο χουχαβένας. Βακερντάς: «Ναστί νακχέλα μι γκοντιάταρ τι βακεράβ ότι ισινέν δίκαιοι! Μέχρι τι μεράβ κα ατσσικιαράβ σαστό μο γκι κο Ντεβέλ!» (Ιώβ 27:5) Ανταλά λάφια ισί μπουτ σημαντικά. Ο Ιώβ ισινέ αποφασισμέ τι ατσσικιαρέλ σαστό πο γκι κο Ιεχωβά σο-ντα τι αβέλας-πες, ντα ανταβά μπορίνασα τι κεράς αμέν-ντα.

10. Σαρ επηρεάνενα-τουμέν ο κατηγορίες σο τσσουντάς ο Μπενγκ κο Ιώβ;

¹⁰ Ο Μπενγκ βακερέλα ο ίδιες κατηγορίες ι κάθε εκχέσκε αμένταρ. Σαρ επηρεάνελα-τουμέν ανταβά; Κι πραγματικότητα, ο Μπενγκ βακερέλα ότι να μανγκένα μπαγιά ι Ιεχωβάς, ότι κα τσσιναβένας τι υπηρετίνεν-λες για τι γλιτώνεν τουμαρί ζωή ντα ότι να κα ατσσικιαρέν σαστό τουμαρό γκι λέστε! (Ιώβ 2:4, 5· Αποκ. 12:​10) Να ντουκχαβένα τουμαρό γκι ανταλά κατηγορίες; Αλλά σκεφτίνεν ακαβά: Ο Ιεχωβά ντέλα τουμένγκε μπουτ μπέσα, ντα οτθάρ ντινάς-τουμέν εκ μπουτ σουκάρ ευκαιρία. Μουκχέλα ι Μπενγκές τι δοκιμάνελ άμα τουμαρό γκι ισί σαστό. Ισί σίγουρος ότι μπορίνενα τι ατσσικιαρέν σαστό τουμαρό γκι ντα τι σικαβέν τουμέν-ντα ότι ο Μπενγκ ισί ψεύτης. Ντα ντέλα πο λάφι ότι κα βοηθίνελ-τουμέν τι κερέν-λες ανταβά. (Εβρ. 13:6) Σο μπαρό προνόμιος ισί τι ντελ τουμένγκε μπέσα ο πιο Μπαρό σαρό κο σύμπαν! Αγαβένα σόσκε ισί μπουτ σημαντικός τι αβέλ σαστό αμαρό γκι; Αντικάς μπορίνασα τι τζας κόντρα κο ψέματα κι Μπενγκέσκε ντα τι υποστηρίνας εμ ο λατσσό ναβ αμαρέ Νταντέσκο, αλλά εμ ο τρόπος σο κυβερνίνελα. Σαρ κα ατσσικιαράς αμαρό γκι σαστό κο Ιεχωβά;

11. Σο σικλιάσα κατά Ιώβ;

¹¹ Ανταλέ δύσκολε “τελευταίε ντιβεσέντε”, ο Μπενγκ τζάλα πιο μπουτ κόντρα κο υπηρέτες κι Ντεβλέσκε. (2 Τιμ. 3:1) Σαρ κα αβάς πιο ζουρανέ για τι ατσσικιαράς σαστό αμαρό γκι κο Ντεβέλ; Πάλι, σικλιάσα μπουτ πράγματα κατά Ιώβ. Μπουτ μπρεσά πριν τι αβέν λέσκε δοκιμασίες, ο Ιώβ ατσσικιαρντάς σαστό πο γκι κο Ιεχωβά μπουτ φαρ. Ντικχέν τριν πράγματα σο σικλιάσα λέσταρ για τι αβάς πιο ζουρανέ ντα αντικάς τι ατσσικιαράς σαστό αμαρό γκι κο Ντεβέλ.

12. (α) Σαρ μπαριαρντάς ο Ιώβ πι εκτίμηση ντα πο σεβασμός ι Ιεχωβάσκε σαρ βακερέλα κο Ιώβ 26:7, 8, 14; (β) Σαρ κα πφεράς αμαρό γκι εκτίμηση ι Ιεχωβάσκε;

¹² Η αγάπη σο τθερέλας ο Ιώβ ι Ιεχωβάσκε αβέλας πιο ζουρανί, επειδή εκτιμίνελας μπουτ σαρέ ο πράγματα σο κερντάς ο Ιεχωβά. Ο Ιώβ αρακχέλας χρόνος για τι σκεφτίνελ ο μπουτ σουκάρ πράγματα σο λατσσαρντάς ο Ιεχωβά. (Διαβάνεν Ιώβ 26:7, 8, 14) Πφερντιόλας εκτίμηση κάνα σκεφτίνελας ι πφουβ, ο ουρανός, ο σύννεφα ντα ο βροντές, αλλά αγαβέλας ότι τζανέλας μπουτ χάνικ πράγματα οντουλένγκε σο  λατσσαρντάς ο Ιεχωβά. Επίσης, εκτιμίνελας ι Ιεχωβάσκε λάφια. Βακερντάς: «Γκεραντόμ αντρέ μάντε λέσκε λάφια». (Ιώβ 23:​12) Η εκτίμηση ντα ο σεβασμός σο τθερέλας ο Ιώβ ι Ιεχωβάσκε κερένας-λες τι μανγκέλ ι Ιεχωβάς ντα τι μανγκέλ τι κερέλ λέσκο γκι. Οτθάρ, μανγκέλας ατζέ πιο μπουτ τι ατσσικιαρέλ πο γκι σαστό κο Ιεχωβά. Αμέν-ντα πρέπει τι κεράς σο κερέλας ο Ιώβ. Αμαρέ ντιβεσέντε, τζανάσα πιο μπουτ ι σουκάρ πραγματένγκε σο λατσσαρντάς ο Ιεχωβά. Ντα τθεράσα σαρί ι Γραφή σο βοηθίνελα-αμέν τι σικλιάς μπαγιά ι Ιεχωβάς. Σαρέ οντουλά σο σικλιάσα πφερένα αμαρό γκι εκτίμηση ντα σεβασμός ι Ιεχωβάσκε. Ανταβά κα τσσίντελ-αμέν τι μανγκάς-λες ντα τι ντας-λες καν ντα κα κερέλ-αμέν τι μανγκάς ατζέ πιο μπουτ τι ατσσικιαράς αμαρό γκι σαστό λέστε.​—Ιώβ 28:28.

13, 14. (α) Σαρ σικαντάς ο Ιώβ ότι ντέλας καν σαρ βακερέλα κο Ιώβ 31:​1; (β) Σαρ κα μοιάζας κο Ιώβ;

¹³ Ο Ιώβ ντέλας καν σαρέ κο πράγματα, οτθάρ ατσσικιαρέλας σαστό πο γκι κο Ντεβέλ. Ο Ιώβ τζανέλας ότι για τι τθερέλ σαστό πο γκι κο Ιεχωβά, έπρεπε τι ντελ-λες καν. Ισί μπαγιά ότι κάθε φαρ σο ντάσα καν, μανγκάσα ατζέ πιο μπουτ τι ατσσικιαράς σαστό αμαρό γκι. Ο Ιώβ κερέλας σο νακχέλας λέσκε βαστέσταρ για τι ντελ καν ι Ντεβλές κάθε ντιβές. Για παράδειγμας, προσοχίνελας σαρ συμπεριφερίντιβελας κο τζουβλιά. (Διαβάνεν Ιώβ 31:1) Σαρ παντριμέ μουρς, τζανέλας ότι δεν έπρεπε τι ντελ προσοχή γιαβερέ τζουβλιάτε εκτός πι ρομνιάταρ. Αντιβές, τζουβντιάσα εκχέ ντουνιάστε σο ισί πφερντό λουμνικανέ πραγματέντζαρ. Κα βοηθίνελ-αμέν ο παράδειγμας σο μουκχλάς ο Ιώβ μα τι ντας λάθος προσοχή εκχέ τζενέστε σο να ισινάμ παντριμέ λέσαρ; Κα αβάς αποφασισμέ μα τι ντικχάς λουμνικανέ πράγματα ή πορνογραφία; (Ματθ. 5:​28) Άμα ατσσικιαράσα-αμέν αντικάς κάθε ντιβές, κα αβάς πιο ζουρανέ για τι ατσσικιαράς αμαρό γκι σαστό κο Ντεβέλ.

¹⁴ Επίσης, ο Ιώβ ντέλας καν ι Ιεχωβάς κο τρόπος σο ντικχέλας ο υλικά πράγματα. Αγαβέλας ότι, άμα κα τθερέλας εμπιστοσύνη πι πραγματέντε, κα κερέλας εκ μπαρί αμαρτία  ντα κα χρειαζίντιβελας τι τιμωρίντιβελ. (Ιώβ 31:​24, 25, 28) Αντιβές τζουβντιάσα εκχέ ντουνιάστε σο μανγκέλα μπουτ ο υλικά πράγματα. Άμα ντικχάσα ο λοβέ ντα ο υλικά πράγματα με το σωστός τρόπος, σαρ βακερέλα αμένγκε η Γραφή, κα μανγκάς ατζέ πιο μπουτ τι ατσσικιαράς σαστό αμαρό γκι κο Ντεβέλ.​—Παρ. 30:8, 9· Ματθ. 6:​19-21.

15. (α) Καγιά ευλογία σο μπεκλεντίνελας ο Ιώβ βοηθιντάς-λες τι ατσσικιαρέλ σαστό πο γκι κο Ντεβέλ; (β) Σόσκε κα βοηθίντιβας άμα κα τθεράς αμαρέ γκοντιάτε ο ευλογίες σο κα ντελ ο Ιεχωβά;

¹⁵ Ο Ιώβ ατσσικιαρέλας σαστό πο γκι κο Ντεβέλ σόσκε τθερέλας πι γκοντί κο ευλογίες σο κα ντέλας-λες. Πακιάλας ότι ο Ντεβέλ εκτιμίνελας-λες μπουτ σο τθερέλας σαστό πο γκι λέστε. (Ιώβ 31:6) Παρόλο σο τθερέλας δοκιμασίες, ισινέ σίγουρος ότι ο Ιεχωβά κο τέλος κα ευλογίνελας-λες. Ανταγιά σιγουριά βοηθιντάς-λες τι ατσσικιαρέλ σαστό πο γκι λέστε. Ο Ιεχωβά χαιρισάλο αζόμ μπουτ ανταλέσκε σο ευλογιντάς-λες μπουτ παρόλο σο ισινέ ατζέκ ατελής! (Ιώβ 42:​12-17· Ιακ. 5:​11) Ντα κο ντιβεσά σο κα αβέν, ο Ιώβ κα τθερέλ ατζέ πιο μπαρέ ευλογίες. Ισινέν τουμέν σίγουροι ότι ο Ιεχωβά κα ευλογίνελ-τουμέν σο υπηρετίνενα-λες σαστέ γκίσαρ; Αμαρό Ντεβέλ να αλλαξάλο. (Μαλ. 3:6) Άμα να μπιστράσα ότι ο Ιεχωβά εκτιμίνελα οντουλέν σο υπηρετίνενα-λες σαστέ γκίσαρ, κα κεράς ο πιο λατσσό για τι ατσσικιαράς σαστό αμαρό γκι λέστε ντα κα αβάς σίγουροι ότι κα ευλογίνελ-αμέν μπουτ.​—1 Θεσ. 5:8, 9.

16. Σο πρέπει τι αβάς αποφασισμέ τι κεράς;

¹⁶ Οτθάρ, τι αβέν αποφασισμέ τι ατσσικιαρέν πάντα τουμαρό γκι σαστό κο Ιεχωβά! Μπάζιμα, μπορεί τι νιωθίνεν ότι σάντε τουμέν κερένα-λες ανταβά, αλλά ποτές να κα αβέν κορκορέ. Κα αβέν γιεκ εκατομμύρια πιστέ τζενέντζαρ σαρό κο ντουνιάς σο ατσσικιαρένα σαστό πουμαρό γκι κο Ντεβέλ. Ντα κα αβέν σαρ οντουλά πιστά μουρσά ντα τζουβλιά σο ατσσικιαρντέ σαστό πουμαρό γκι κο πουρανέ μπρεσά, ατζέ-ντα ανγκλάλ κο μεριπέ. (Εβρ. 11:​36-38· 12:1) Μακάρι σαρέ τι αβάς αποφασισμέ τι υπηρετίνας ι Ντεβλές σαστέ γκίσαρ σαρ ο Ιώβ, σο βακερντάς: «Κα ατσσικιαράβ σαστό μο γκι κο Ντεβέλ!» Ντα μακάρι αμαρό σαστό γκι τι δοξάνελ για πάντα ι Ιεχωβάς!