1. Kodi Mboni za Yahova zitatu zidalongwa pa ndima zapitiriza tani kukhala zakukhulupirika kwa Yahova?

NYEREZERANI pidacitikira Mboni za Yahova zitatu. (1) Ntsikana m’bodzi akhali kuxikola, buluka penepo mpfundzisi aphemba anyakupfundzace onsene toera agumanike pa phwando ya firiyadu. Mwacilemedzo, ntsikana akhonda thangwi akhadziwa kuti Mulungu nkhabe komerwa na mafiriyadu. (2) M’phale wakuti ndi wamanyadzo akumwaza mphangwa nyumba na nyumba. Buluka penepo, iye adzindikira kuti panyumba yakutowerera ndi panakhala ndzace wakuxikola wakuti asasingirira Mboni za Yahova. Ngakhale tenepo m’phale unoyu aenda kamwaza mphangwa panyumba ineyi. (3) Mamuna asaphata basa mwaphinga toera kutsalakana banjace, mbwenye ntsiku inango patrau wace am’phemba toera acite pinthu pyakuti nee pisabverana na mwambo peno pyakusowa ulungami. Maseze mamuna unoyu akhadziwa kuti kukhonda kucita pidalonga patrau wace mbukudancitisa kuluza basa, mbwenye iye anfokotozera kuti Mulungu asafuna kuti atumiki ace akhale akhulupirika, pontho abvere pinalonga mautongi.—Aroma 13:1-4; Aheb. 13:18.

2. Ndi mibvundzo ipi inafuna ife kutawira mu nsolo uno, pontho thangwi yanji?

² Ndi makhaliro api adapangiza anthu anewa atatu? Panango imwe mwanyerezera makhaliro mazinji, ninga cipapo na ulungami. Mbwenye kusiyapo makhaliro anewa, iwo apangiza n’khaliro unango wakufunika kakamwe, kukhulupirika. Onsene akhali akukhulupirika kuna Yahova. Onsene akhonda kuswa midida ya Mulungu. Cifuno cawo cakukhala akukhulupirika ndi cidaaphedza toera kucita pinthu pyenepi. Yahova atsandzaya kakamwe pidaona iye kuti iwo apangiza n’khaliro unoyu. Ife tisafunikambo kutsandzayisa Babathu wakudzulu. Cincino tendeni tione mitawiro ya mibvundzo mitatu yakufunika: Kukhulupirika ninji? Thangwi yanji tisafunika kukhala akukhulupirika? Pontho tinacitanji toera tipitirize kukhala akukhulupirika mu ntsiku zino zakumalisa?

3. (a) Atumiki a Yahova asapangiza tani kuti ndi akukhulupirika? (b) Ndi pipi pitsandzo pyakuti pinatiphedza kubvesesa fala yakuti kukhulupirika?

³ Kodi atumiki a Mulungu asapangiza tani kuti ndi akukhulupirika? Iwo asapangiza kuti ndi akukhulupirika angatumikira Yahova basi, mbawangisira ndzidzi onsene kucita pinafuna iye. M’Bhibhlya fala Yacihebheri yakuti “kukhulupirika” isapangiza makhaliro a cinthu cakusowa cilema, caungumi wadidi, peno cakusowa midonthi. Mwacitsandzo, Mwambo ukhalonga kuti pinyama pikhafuna kupereka Aizraeli ninga ntsembe kuna Yahova, pikhafunika kukhala pyakusowa cilema * na pyaungumi wadidi. (Lev. 22:21, 22) Atumiki a Mulungu nee akhatawiriswa kupereka ntsembe ya cinyama cakusowa mwendo, khutu, diso peno cakuduwala. Yahova akhafuna kuti anthu apereke ntsembe ya cinyama cakusowa cilema, caungumi wadidi, peno cakusowa midonthi. (Mal. 1:6-9) Toera tibvesese kuti thangwi yanji Yahova asafuna anthu a makhaliro adidi akuti asawangisira kucita pinafuna iye, tendeni tinyerezere pinacita ife tingafuna kugula nsapo peno feramentu. Ife nkhabe gula nsapo wakubvunda peno feramentu yakudinganyika. M’mbuto mwace, ife tisagula cinthu cadidi na cakusowa cilema. Yahova asadikhira kuti ticitembo pibodzi pyene pakupangiza ufuni peno kukhulupirika kwathu kuna iye. Iye asafuna kuti tikhale akhulupirika mu pinthu pyonsene.

4. (a) Tisadziwa tani kuti anthu akusowa ungwiro anakwanisa kukhala akukhulupirika? (b) Mwakubverana na Masalmo 103:12-14, Yahova asadikhiranji kwa ife?

⁴ Kodi tisafunika kukhala aungwiro toera tikhale akukhulupirika? Kusiyapo pyenepi, panango ife tinakwanisa kupibva kuti tisadawa kazinji kene. Mbwenye tisafunika kukumbuka pinthu piwiri pyakufunika. Cakutoma, Yahova nee asayan’gana madodo athu. Bhibhlya isalonga: ‘Yahova, mbadayang’ana basi ene madado athu, mbani akhafuna kuntumikira?’ (Masal. 130:3) Iye asadziwa kuti ndife anthu akusowa ungwiro na akudawa, ndi thangwi yace asatilekerera na ntima onsene. (Masal. 86:5) Caciwiri, Yahova asadziwa pinthu pinacimwana ife kucita, pontho nee asadikhira kuti ticite pinthu pizinji pyakuti nee tinapikwanisa. (Lerini Masalmo 103:12-14.) Mphapo, ndi munjira ipi iye asadikhira kuti tikhale akukhulupirika peno akutawirika pamaso pace?

5. Thangwi yanji atumiki a Yahova asafunika kukhala na ufuni toera akhale akukhulupirika?

⁵ Kuna atumiki a Yahova, cinthu cinaacitisa kukhala akukhulupirika ndi ufuni. Ufuni wathu kuna Mulungu na kuperekeka kwathu kwa iye ninga Babathu wakudzulu kusaticitisa kukhala akukhulupirika kwa iye peno akusowa midonthi. Tingakhala na ufuni maseze tithimbane na pinentso tisakhala akukhulupirika. (1 Pya Dziko. 28:9; Mat. 22:37) Nyerezerani pontho pidacitikira Mboni zitatu zidalonga ife pakutoma. Thangwi yanji iwo akhala akukhulupirika? Kodi ntsikana nee akhafuna kusendzeka na andzace? M’phale akhafuna kuti apaswe manyadzo na ndzace wakuxikola? Kodi mamuna akhafuna kuti aluze basa yace? Nkhabe. M’mbuto mwace, iwo akhadziwa kuti Yahova ali na midida ya makhaliro adidi, ndi thangwi yace iwo akhafuna kunkomeresa. Ufuni wawo waacitisa kunyerezera Yahova mbadzati kucita cisankhulo. Munjira ineyi iwo apangiza kuti akhali akukhulupirika.

6. (a) Thangwi yanji tisafunika kukhala akukhulupirika? (b) Ninji pinapangiza kuti Adhamu na Eva nee akhali akukhulupirika?

⁶ Thangwi yanji ife tonsene tisafunika kukhala akukhulupirika? Ife tisafunika kukhala akukhulupirika thangwi Sathani apokanya Yahova, pontho apokanyambo kukhulupirika kwathu. Anju unoyu adakhonda kubvera apasika ekha dzina yakuti Sathani peno “Mpingizi,” m’munda mwa Edheni. Iye apswipisa dzina yadidi ya Yahova mbalonga pinthu pyakuipa thangwi ya iye, mukulonga kuti iye ndi Ntongi wakusowa ulungami. Mwakutsukwalisa Adhamu na Eva aphedzera Sathani mbapandukira Yahova. (Gen. 3:1-6) Umaso m’munda mwa Edheni ukhapasa Adhamu na Eva miyai mizinji toera kuwangisa ufuni wawo kuna Yahova. Mbwenye mu ndzidzi udapokanya Sathani utongi wa Mulungu, iwo nee akhalibve akukhulupirika kuna iye. Pyenepi pisacitisa mbvundzo unango: Kodi anthu anakwanisa kufuna Mulungu mbapitiriza kukhala akukhulupirika kwa iye? M’mafala anango, anthu anakwanisa kukhala akukhulupirika? Mbvundzo unoyu wacitwambo mu ndzidzi wa Yobe.

7. Mwakubverana na Yobe 1:8-11, kodi Sathani na Yahova akhali na maonero api akusiyana thangwi yakukhulupirika kwa Yobe?

⁷ Yobe akhala maso mu ndzidzi ukhali Aizraeli ku Ejito. Iye basi ndi akhali wakukhulupirika. Iye akhalimbo wakusowa ungwiro ninga ife, pontho Yobe akhadodoma. Mbwenye, Yahova akhafuna Yobe thangwi yakukhulupirika kwace. Pisaoneka kuti Sathani akhadapanga kale Yahova kuti nkhabe munthu anafuna kukhala wakukhulupirika kwa iye. Natenepa, toera kupangiza kuti Sathani akhalonga uthambi, Yahova aphatisira Yobe ninga citsandzo ca munthu wakukhulupirika. Pidacita Yobe pyapangiza kuti Sathani akhalonga uthambi! Nakuti Yahova akhanyindira kukhulupirika kwa Yobe, Iye atawirisa Sathani kuti ayesere kukhulupirika kwace.—Lerini Yobe 1:8-11.

8. Kodi Sathani athabusa tani Yobe?

⁸ Sathani ndi wakuipa, pontho ndi phanga. Iye athabusa Yobe, mbam’phera anyabasace, mbapswipisa makhaliro ace. Athabusa banjace, mbam’phera anace khumi. Ampasa utenda wakugopswa m’manungo mwace monsene. Nkazi wa Yobe atsukwala kakamwe mbakakamiza mamunace kuti atikane pyace Mulungu toera afe. Yobe ene akhafuna kakamwe kufa, mbwenye apitiriza kukhala wakukhulupirika. Buluka penepo Sathani aphatisira njira zizinji toera kucitisa Yobe kuti akhale wakukhonda khulupirika. Iye aphatisira amuna atatu akuti akhali axamwali a Yobe. Amuna anewa akhaenda kamuona ntsiku zonsene, mbampasa uphungu wakuipa. Iwo akhamulonga mwakuipa thangwi yakukhulupirika kwace, pontho akhalonga kuti Mulungu nee akuona nyatwa zace, pontho nee akhatsalakana kukhulupirika kwace. Iwo akhalonga kuti Yobe ndi munthu wakuipa na athema kucitikirwa nyatwa zenezi!—Yobe 1:13-22; 2:7-11; 15:4, 5; 22:3-6; 25:4-6.

9. Mwakukhonda tsalakana mayesero, kodi Yobe apitiriza kucitanji?

⁹ Kodi Yobe acitanji pakati pa nyatwa zenezi zonsene? Iye nee akhali waungwiro. Ndi thangwi yace, mukupita kwa ndzidzi iye atsumbikika thangwi ya pinthu pidalonga iye kuna axamwali ace. Iye atsidzikiza makhaliro ace ene kupiringana pikhafuna Mulungu. (Yobe 6:3; 13:4, 5; 32:2; 34:5) Maseze Yobe athimbana na makhaliro anewa akunentsa, mbwenye iye akhanyindira Yahova Mulungu. Iye akhonda kukhulupira pinthu pyauthambi pidalonga axamwali ace. Iye alonga: “Mphyakucimwanika kuti ine ndikucemereni akulungama! Mpaka ine kufa nkhabe kudzasiya umumphu wanga!” (Yobe 27:5) Mafala anewa a Yobe ndi akufunika kakamwe. Iye apitiriza kukhala wakhulupirika, ife tisafunikambo kucita pibodzi pyene.

10. Kodi imwe musaphatanizwa tani mu uthambi udalonga Sathani thangwi yakukhulupirika kwa Yobe?

¹⁰ Sathani nee apenula basi ene kukhulupirika kwa Yobe, mbwenye apenulambo kukhulupirika kwa ife tonsene. Mwandimomwene iye alonga kuti mungathimbana na nyatwa, imwe munasiya kutumikira Yahova Mulungu, thangwi munsafuna basi ene toera kukwanirisa pifuno pyanu. (Yobe 2:4, 5; Apok. 12:10) Musapibva tani thangwi ya pyenepi? Mwakukhonda penula kupambizirwa kusapha kakamwe. Mbwenye Yahova asakunyindirani kakamwe, ndi thangwi yace asatawirisa Sathani toera ayesere kukhulupirika kwanu. Yahova asadziwa kuti imwe munakwanisa kukhala akukhulupirika, pontho munam’phedza toera kupangiza kuti Sathani ndi wauthambi. Iye asapikira kuti anakuphedzani kucita pyenepi. (Aheb. 13:6) Ndi mwai ukulu kakamwe kunyindirwa na Ntongi wakudzulu na dziko yonsene yapantsi! Kodi imwe musaona kuti thangwi yanji kukhulupirika ndi kwakufunika kakamwe? Kukhulupirika kusatiphedza toera kupangiza kuti Sathani ndi nyauthambi mbatiphedzera kuceneswa kwa dzina ya Babathu na njira yace yakutonga. Mphapo tinacitanji toera tipitirize kukhala akukhulupirika?

11. Tisapfundzanji na citsandzo Yobe?

¹¹ Sathani akuthimizira mayesero ace mu ‘ntsiku zino zakumalisa.’ (2 Tim. 3:1) Kodi tisafunika kucitanji mu ntsiku zino zakunentsa toera tipitirize kukhala akukhulupirika? Ife tinakwanisa kupfundza pizinji na citsandzo ca Yobe. Mbadzati kutoma kuyeserwa, Yobe akhali kale munthu wakukhulupirika. Cincino tendeni tione pinthu pitatu pidaphedza Yobe toera akhale wakukhulupirika pyakuti pinatiphedzambo lero.

12. (a) Mwakubverana na Yobe 26:7, 8, 14, ninji cidaphedza Yobe toera apitirize kufuna na kulemedza Yahova? (b) Tinacitanji toera tilemedze Mulungu na ntimathu onsene?

¹² Yobe athimizira kufuna kwace Yahova Mulungu thangwi yakuona makhaliro ace. Yobe akhamala ndzidzi uzinji mbakayang’ana na kunyerezera pinthu pyakudzumatirisa pidacita Yahova. (Lerini Yobe 26:7, 8, 14.) Ndzidzi onsene iye akhadzumatirwa anganyerezera pya dziko yapantsi, kudzulu, makole na kulira kwa njazi. Ngakhala tenepo, iye adzindikira kuti Yahova acita pizinji pyakuti iye adzati kupidziwa. Kusiyapo pyenepi, Yobe akhadzumatirwa na pikhalonga Yahova. Ndi thangwi yace iye alonga. ‘Ine ndakoya mafalace muntima mwanga.’ (Yobe 23:12) Kudzumatirwa kwa Yobe kwancitisa toera alemedze kakamwe Yahova. Iye akhafuna Babace, pontho akhafuna kunkomeresa. Ninga nkhombo, Yobe apitiriza kukhala wakukhulupirika. Ife tisafunikambo kukhala akukhulupirika ninga Yobe. Ife tisadziwa pizinji thangwi ya pinthu pyakudzumatirisa pidacita Mulungu kupiringana anthu a mu ndzidzi wa Yobe. Pontho ife tiri na Bhibhlya yamumphu toera kutiphedza kudziwa mwadidi Yahova. Pyonsene pinapfundza ife pisatiphedza toera kudzumatirwa na mabasa a Yahova. Kudzumatirwa na kulemedza kwathu Yahova kunaticitisa kunfuna, kumbvera na kukulisa cifuno cathu cakupitiriza kukhala akukhulupirika.—Yobe 28:28.

13-14. (a) Mwakubverana na Yobe 31:1, kodi Yobe apangiza tani kuti akhali wakubvera? (b) Ifembo tinatowezera tani citsandzo cace?

¹³ Kubvera kwa Yobe mu pinthu pyonsene kwam’phedza toera apitirize kukhala wakukhulupirika. Yobe akhadziwa kuti kukhulupirika na kubvera ndi kwakufunika kakamwe. Ndzidzi onsene unabvera ife Mulungu, tisawangisa cifuno cathu cakupitiriza kukhala akukhulupirika. Yobe akhawangisira toera kubvera Yahova mu umaso wace wa ntsiku na ntsiku. Mwacitsandzo, iye akhacita mphole-mphole na njira ikhatsalakanira iye akazi. (Lerini Yobe 31:1.) Ninga mamuna wakumanga banja, iye akhadziwa kuti mphyakuipa kupangiza mabvero akufuna kuna nkazi wakuti nee ndi wako. Lero ife tikukhala n’dziko yakudzala na pinthu pyaulukwali. Tingafuna kutowezera citsandzo ca Yobe, tisafunika kucalira kupangiza mabvero akufuna munthu wakuti nee tamanga naye banja. Tisafunikambo kucalira kuona pithundzithundzi pinapangiza ucipezipezi. (Mat. 5:28) Tingawangisira toera kukhala akudzitonga mu umaso wathu wa ntsiku na ntsiku, tinapitiriza kukhala akukhulupirika.

¹⁴ Yobe abverambo Yahova munjira ikhaonera iye pinthu pyakumanungo. Iye akhadziwa kuti si pyakuthema tayu kuikha pinthu pyakumanungo pa mbuto yakutoma, pontho mbadatongwa thangwi yakucita pyenepi. (Yobe 31:24, 25, 28) Cincino, tikukhala n’dziko yakuti anthu asafuna kakamwe pinthu pyakumanungo. Ndi thangwi yace tisafunika kubvera midida ya m’Bhibhlya inalonga pyakufunika kwa kukhala na maonero akulinganira thangwi ya kobiri na mpfuma. Tingacita pyenepi, tinawangisa cifuno cathu cakupitiriza kukhala akukhulupirika.—Mis. 30:8, 9; Mat. 6:19-21.

15. (a) Kudikhira nkhombo kwaphedza tani Yobe toera kupitiriza kukhala wakukhulupirika? (b) Thangwi yanji kunyerezera nkhombo za ntsogolo kunatiphedzambo lero?

¹⁵ Yobe apitiriza kukhala wakukhulupirika thangwi yakunyerezera nkhombo zikhafuna kupaswa iye na Mulungu. Iye akhadziwa kuti Mulungu asaona kukhulupirika kwace. (Yobe 31:6) Mwakukhonda tsalakana mayesero akhathimbana na iye, Yobe akhanyindira kuti Yahova mbadampasa nkhombo. Kunyindira kwace Yahova kwam’phedza toera apitirize kukhala wakukhulupirika. Yahova akomerwa na kukhulupirika kwa Yobe mbampasa nkhombo zizinji maseze iye akhali munthu wakusowa ungwiro! (Yobe 42:12-17; Tiya. 5:11) Kusiyapo nkhombo zenezi, Yobe akudikhira nkhombo zinango zizinji ntsogolo. Kodi imwe musadikhira kuti Yahova anakupasanimbo nkhombo ninga pidacita iye na Yobe? Mulungu wathu nkhabe cinja. (Mal. 3:6) Tingakumbuka kuti iye asakomerwa thangwi yakukhulupirika kwathu, tinakwanisa kupitiriza kudikhira tsogolo yadidi.—1 Ates. 5:8, 9.

16. Kodi tisafunika kukhala akudzitonga toera kucitanji?

¹⁶ Natenepa, ndzidzi onsene tisafunika kukhala akudzitonga toera tipitirize kukhala akukhulupirika! Midzidzi inango, tinapibva ninga tiri tekha, mbwenye unoyu si undimomwene tayu. Ife tiri pakati pa anthu azinji akuti ndi akukhulupirika. Ife tinacitambo khundu ya amuna na akazi adakhala akukhulupirika mu ndzidzi wakale, maseze akhathimbana na nyatwa. (Aheb. 11:36-38; 12:1) Yobe alonga: ‘Ine ndinapitiriza kukhala wakukhulupirika!’ Natenepa, tendeni tonsene tipitirize kukhala akukhulupirika ninga Yobe. Tingacita pyenepi, tinapasa mbiri Yahova kwenda na kwenda!