1. Unfa dee dii Kotoigi u Jehovah dee u taki u de a di palaklafu aki bi lei taa de ta hoi deseei a Jehovah?

PAKISEI dee dii woto aki luku. A nama ku dii sëmbë di dë Jehovah Kotoigi. (1) Wan mujëë mii dë a siköö, nöö di mësitë ta hakisi dee mii u di kalasi u seeka soni sö taa de sa hoi wan u dee piizii daka u di köndë. Di mujëë mii sabi taa di soni aki an ta kai ku Gadu. Fëën mbei an o du di soni di di mësitë hakisi ën. (2) Wan njönku kijoo dë ta peleiki a sëmbë pisi, hën a ko fusutan taa wan sëmbë di hën ku ën nango a di wan siköö ta libi a di wosu ka a musu go peleiki. Di sëmbë da wan mii di bi lo’ u mbei dee Jehovah Kotoigi fa. Ma tökuseei di njönku kijoo aki nango naki di döö u di wosu aki. (3) Wan womi ta wooko taanga faa sölugu dee sëmbë fëën wosudendu. Ma wan daka, hën di basi fëën hakisi ën faa du wan soni di an fiti, nasö di ta pasa lanti wëti. Hii fa a sa lasi di wooko fëën, tökuseei di womi ta piki di basi fëën taa an o sa du di soni di a hakisi ën, u di a musu hoi dee wëti u lanti, söseei u di Gadu ta kë u dee dinima fëën hoi dee wëti aki.​—Lom. 13:1-4; Heb. 13:18.

2. Fuun soni woo taki a di woto aki, nöö faandi mbei woo taki u de?

² Un pei fasi dee dii Jehovah Kotoigi aki lei taa de abi? Wë, a sa dë taa i si taa de abi degihati, söseei taa de an ta ganjan sëmbë. Ma hii dee dii Kotoigi aki tuu bi lei möön gaanfa taa de ta hoi deseei a Jehovah. Hii de tuu bi lei taa de an bi kë pasa Gadu buka. U di de bi kë hoi deseei a Jehovah, mbei de bi du soni a di lö fasi aki. U sa dë seiki taa Jehovah bi wai ku hii de tuu, u di de ta hoi deseei nëën. Useei kë u di Tata fuu di dë a liba ala wai ku u tu. Boo taki u dee soni aki: Andi a kë taki u hoi iseei a Gadu? Faandi mbei a dë fanöudu fuu hoi useei a Gadu?  Söseei unfa u sa möön hoi useei a Gadu hii fa di ten ta ko möön taanga?

3. (a) Unfa dee dinima u Gadu ta lei taa de ta hoi deseei nëën? (b) Un woto ta heepi u fuu fusutan andi a kë taki taa wan sëmbë ta hoi hënseei a Gadu?

³ Unfa dee dinima u Gadu ta lei taa de ta hoi deseei nëën? Wë de ta du di soni aki te de ta lei taa de lobi Jehovah ku hii de hati, nöö di soni dë ta heepi de u de ta du soni di ta kai ku ën. Boo luku andi Bëibel ta taki u di hoi di wan sëmbë musu ta hoi hënseei a Gadu. Wan u dee fasi fa di Bëibel ta puu di soni aki, da te wan soni dë telutelu nasö gösöntu. Dee Isaëli sëmbë bi musu ta tja mbeti go tjuma da Jehovah, nöö di wëti bi taki taa dee mbeti bi musu ta dë gösöntu. * (Leif. 22:21, 22) Dee sëmbë u Gadu an bi musu tja wan mbeti go tjuma da Gadu ee a bi makei wan futu, wan jesi, wan wojo nasö ee a bi suwaki. Jehovah bi ta si ën kuma wan fanöudu soni taa di mbeti bi musu ta dë gösöntu nasö telutelu (Mal. 1:6-9). U sa fusutan faandi mbei Jehovah ta kë taa soni musu dë telutelu nasö gösöntu. Te u ta bai wan soni, kandë wan fuuta, wan buku nasö wan wookolai, nöö wa ta kë taa a abi baaku nasö taa pisi fëën ta makei. U ta kë wan soni di dë telutelu söndö föutu. Sö nöö Jehovah ta kë fuu lei taa u lobi ën ku hii u hati, söseei taa u kë hoi useei nëën tuutuu.

4. (a) Faandi mbei u sa taki taa wan zöndu libisëmbë sa hoi hënseei a Gadu? (b) Andi Jehovah kë taa u musu du te u luku di soni di sikifi a Psalöm 103:12-14?

⁴ U musu ta pakisei taa u musu u dë wan sëmbë di an ta mbei föutu fuu sa hoi useei a Jehovah u? U sabi taa u ta mbei hia föutu. Ma boo luku tu soni di sa heepi u fuu ko si taa wa abi fu dë sëmbë di an ta mbei föutu fuu sa hoi useei a Gadu. Di fosu soni, hën da Jehovah an ta buta pakisei a dee föutu fuu. Di Wöutu fëën ta taki taa: „Jehovah, ee föutu hën i bi ta luku, nöö ambë seei bi o sa taanpu a i fesi?” (Ps. 130:3) Jehovah sabi taa u da zöndu libisëmbë, nöö a dë kabakaba u da u paadon (Ps. 86:5). Di u tu soni da, Jehovah sabi andi u sa du ku andi wa sa du, nöö an ta hakisi u fuu du soni di wa sa du. (Lesi Psalöm 103:12-14.) Na un fasi u sa dë telutelu a Gadu wojo?

5. Faandi mbei dee dinima u Jehovah musu lobi ën u de sa lei taa de ta hoi deseei nëën?

⁵ Te i lobi Jehovah ufö i sa hoi iseei nëën. U musu lobi di Gadu fuu di dë a liba ala, söseei u musu ta hoi useei nëën ku hii u hati. Te u ta lei taa u lobi Jehovah a di fasi dë aluwasi tesi ta miti u, hën da u ta hoi useei nëën (1 Klon. 28:9; Mat. 22:37). Boo taki u dee dii Kotoigi dee u bi taki u de a bigi u di woto. Faandi mbei de bi du soni a di lö fasi dë? A dë taa di mujëë mii an ta kë piizii a siköö u, nasö taa di njönku kijoo bi kë u de dëën sen u? Nasö a dë sö taa di womi bi kë lasi di wooko fëën u? Wë nönö, na seei. De sabi taa Jehovah abi wëti di de musu hoi, nöö de kë du soni di ta kai ku di Tata u de di dë a liba ala. U di de lobi ën, mbei hii juu de ta pakisei ën ufö de du wan soni. A di fasi aki de ta lei ën taa de ta hoi deseei nëën.

6. (a) Faandi mbei i musu hoi iseei a Gadu? (b) Andi Adam ku Eva bi du di bi lei taa de an bi hoi deseei a Gadu?

⁶ Faandi mbei a dë fanöudu fuu hoi useei a Gadu? Wë a dë fanöudu, u di Saatan taki hogi u Jehovah, söseei a taki hogi fii tu. Di ëngëli dë bi hopo fia ku Gadu a di djai u Eden, nöö sensi di ten dë, hën a ko toon Saatan. Di në dë kë taki „Felantima nasö Fiama”. A bi kë poi di bunu në u Jehovah u di a bi taki soni di bi  lei taa Gadu abi hogihati, a ta pakisei hënseei nöö, söseei taa an dë wan bunu tiima. A tjali taa Adam ku Eva bi tei Saatan së, hën de hopo fia ku Jehovah (Ken. 3:1-6). Di de bi ta libi a di djai u Eden, nöö sömëni okasi bi dë di bi sa heepi de u de ko lobi Jehovah möön gaanfa. Ma di Saatan bi ko pooba de, nöö de an bi lei taa de lobi Jehovah ku hii de hati. Bakaten, hën wan woto hakisi bi musu kisi piki. Di hakisi dë da: Wan libisëmbë o ta hoi hënseei a Gadu, u di a lobi ën hedi ö? Libisëmbë sa lei taa de ta hoi deseei a Gadu ö? Di soni aki Saatan bi hakisi Gadu a di pisiten di Jöpu bi dë a libi.

7. Te u luku dee soni dee sikifi a Jöpu 1:8-11, nöö unfa Jehovah bi ta pakisei u di fasi fa Jöpu bi ta hoi hënseei nëën, nöö unfa Saatan bi ta pakisei u di soni aki?

⁷ Jöpu bi ta libi a di pisiten di dee Isaëli sëmbë bi dë a Egepiti. A di ten dë, sëmbë an bi dë di bi ta hoi deseei a Gadu kumafa Jöpu bi ta du ën. Jöpu bi dë wan zöndu libisëmbë leti kuma u. A bi ta mbei föutu. Ma Jehovah bi lobi ën u di a bi ta hoi hënseei nëën. A djei kuma Saatan bi piki Jehovah kaa taa libisëmbë an o hoi deseei nëën u di de lobi ën. Fëën mbei Jehovah bi lei ën fa Jöpu ta libi. Di fasi fa Jöpu bi ta libi bi ta lei gbelingbelin taa Saatan da wan mindisonima! Saatan bi kë u Jehovah dëën pasi faa pooba Jöpu. U di Jehovah bi ta futoou di mati fëën de kai Jöpu, mbei a bi dëën pasi faa poobëën.​—Lesi Jöpu 1:8-11.

8. Andi Saatan bi du ku Jöpu?

⁸ Saatan abi hogihati, nöö a dë wan kiima. A tei hii dee soni dee Jöpu bi abi puu nëën, söseei a poi Jöpu në. A kii dee teni mii u Jöpu di Jöpu bi lobi gaanfa seei. Bakaten, hën a mbei Jöpu ko siki gaanfa seei u di a bi  mbei boi kisi ën hii hën sinkii. Jöpu mujëë bi fii bookosaka, nöö a bi ta tjali gaanfa seei. A bi piki Jöpu faa bia baka da Gadu. A bi piki ën faa siba Gadu nöö a dëdë. Jöpu seei bi ta kai dëdë, ma tökuseei a bi hoi hënseei a Gadu go dou. Bakaten, Saatan suku wan woto fasi faa kisi Jöpu. A bi tei dii womi di bi dë mati u Jöpu, u de go luku Jöpu. Sömëni daka longi dee womi aki bi go dë makandi ku Jöpu, ma de an bi ta dëën kötöhati. De bi ta piki ën soni u hati ën, söseei de bi ta kuutu ën. De bi piki ën taa Gadu hën bi ta sitaafu ën, söseei taa Gadu an ta booko hën hedi ku di hoi di a ta hoi hënseei nëën. De bi taki seei taa Jöpu da wan hogihatima, nöö a bi fiti u kisi dee sitaafu dë!​—Jöpu 1:13-22; 2:7-11; 15:4, 5; 22:3-6; 25:4-6.

9. Andi Jöpu an bi du hii fa fuka bi ta miti ën?

⁹ Andi Jöpu bi du di hii dee soni aki bi miti ën? Wë Jöpu bi dë wan zöndu libisëmbë. Fëën mbei a bi bai dee mati fëën, söseei a bi taki soni di bi hati ën bakaten. Jöpu bi taki möön gaanfa u di fasi fa a bi ta libi bunu tjika, möön fa a bi taki u di fasi fa Gadu ta libi bunu (Jöpu 6:3; 13:4, 5; 32:2; 34:5). Ma hii fa soni bi taanga da Jöpu gaanfa seei, tökuseei an bi bia baka da Jehovah Gadu. An bi biibi dee poipoi soni di dee mati fëën bi taki dëën. A bi taki taa: „Ma sa taki wan daka seei taa un dë limbohati sëmbë! Mi o ta hoi miseei a Gadu u te böö u mi koti!” (Jöpu 27:5) Dee soni dee Jöpu taki aki ta lei taa a bi dë kabakaba u hoi hënseei a Gadu aluwasi andi ta pasa. Wë useei sa du di wan seei soni tu.

10. Na un fasi useei dë a dendu u di soni di Saatan bi taki u Jöpu?

¹⁰ Na un fasi useei dë a dendu u di soni di Saatan bi taki u Jöpu? U sa taki taa Saatan ta taki taa ja lobi Jehovah Gadu tuutuu, nöö ja o dini ën möön ee di dini di i ta dini ën ta mbei hogi miti i, söseei ja o hoi iseei nëën tuutuu! (Jöpu 2:4, 5; Ako. 12:10) Unfa i ta fii u di i ko sabi di soni aki? An toobi i ö? Hoi di soni aki a pakisei: Jehovah ta futoou i sö tee taa a ta da i di okasi fii lei Saatan taa i ta hoi iseei nëën aluwasi andi ta pasa. Jehovah dë seiki taa i sa hoi iseei nëën u nöömö, söseei taa iseei sa lei tu taa Saatan da wan mindisonima. Nöö a paamusi i taa a o heepi i fii du di soni aki (Heb. 13:6). Wan gaandi seei di Kaba Heiwan u mundu da u aki! I ta si faandi mbei a dë fanöudu fuu lei taa u sa hoi useei a Gadu ö? A ta heepi u fuu lei taa Saatan ta mindi soni, a ta heepi u fuu hei di në u Gadu, söseei fuu dë a di tii fëën basu. Andi u sa du fuu sa ta hoi useei a Gadu?

11. Andi u sa lei u Jöpu?

¹¹ Saatan ta möön du ku dee dinima u Gadu a dee „lasiti daka” u di goonliba aki (2 Tim. 3:1). Wë unfa u sa ko ta möön hoi useei a Gadu a dee taanga ten aki? Wë u sa lei sömëni soni a di woto u Jöpu. Ufö dee fuka bi miti Jöpu, nöö a bi ta lei gaanduwe kaa taa a bi dë wan sëmbë di ta hoi hënseei a Gadu hii juu. Boo luku dii soni di u sa lei a di woto u Jöpu di o heepi u fuu du soni di sa mbei u ko ta möön hoi useei a Gadu.

12. (a) Te u luku dee soni dee sikifi a Jöpu 26:7, 8, 14, nöö andi bi mbei Jöpu bi ko ta tei dee soni dee Jehovah du u bigi, söseei unfa a du ko ta lesipeki ën? (b) Nöö unfa u sa du di wan seei soni?

¹² Jöpu bi mbei möiti faa ko ta möön lobi Gadu. Jöpu bi ta tei ten u luku dee waiti soni dee Jehovah mbei. (Lesi Jöpu 26:7, 8, 14.) A bi foondo seei di a bi ko sabi soni u di goonliba, di fa liba ala mbei, dee bundji, ku di fasi fa gaangadu ta bai. Ma tökuseei a bi ko fusutan taa an bi sabi hii dee soni dee Gadu mbei. A bi lobi dee soni di Jehovah bi taki. Jöpu bi taki taa: „Mi du möön fa a bi hakisi mi u mi  du” (Jöpu 23:12). Jöpu bi ta tei dee soni di Jehovah bi ta du u bigi seei, nöö a bi ta lesipeki ën tu. A bi lobi di Tata fëën, nöö a bi kë du soni di ta kai ku ën. Di soni aki mbei Jöpu bi kë ta hoi hënseei a Gadu möön gaanfa. Useei musu du kumafa Jöpu bi du tu. A di ten aki u sabi möön soni u dee soni di Gadu mbei, möön leki fa dee sëmbë u di ten u Jöpu bi sabi soni u de. Söseei u abi hii di Bëibel u heepi u fuu ko sabi ambë Jehovah dë tuutuu. Hii dee soni dee u ta lei sa heepi u fuu ko ta tei dee soni di Gadu du u bigi. Di tei di woo ta tei dee soni Jehovah ta du da u u bigi, söseei di lesipeki di woo ta lesipeki ën, o mbei woo lobi ën, woo ta piki hën buka, söseei woo kë du möön soni u lei taa u ta hoi useei nëën.​—Jöpu 28:28.

13, 14. (a) Te u luku di soni di sikifi a Jöpu 31:1, nöö unfa Jöpu bi lei taa a ta piki Gadu buka? (b) Unfa u sa djeesi Jöpu?

¹³ Di piki di Jöpu bi ta piki Gadu buka a hii soni, bi heepi ën faa hoi hënseei a Gadu. Jöpu bi sabi taa ee a bi kë ta hoi hënseei a Gadu, nöö a bi musu ta piki Gadu buka hii juu. An dë u taki taa hii juu te u ta du andi Gadu taki, nöö u ta du wan soni di ta heepi u fuu ko ta möön hoi useei nëën. Jöpu bi ta du hii soni di a bi sa du faa ta hoi hënseei a Gadu hiniwan daka. A bi ta köni ku di fasi fa a bi ta libi ku mujëë sëmbë. (Lesi Jöpu 31:1.) U di a bi dë wan womi di tööu, mbei an bi ta buta pakisei a woto mujëë a di së u manu ku mujëë soni. A di ten aki, sömëni soni dë a di goonliba di de ta buta u hai sëmbë pakisei a di së u manu ku mujëë soni. Woo mbei möiti fu wa ta buta pakisei a wan mujëë di an dë mujëë fuu leti kumafa Jöpu bi ta du ën u? Woo köni tu ku hiniwan soni di bi o sa weki dee manu ku mujëë fii fuu ö? (Mat. 5:28) Ee u ta duwengi useei hiniwan daka fu wa ta buta pakisei a dee soni aki, nöö a o heepi u fuu sa ta hoi useei a Gadu nöömö.

¹⁴ Jöpu bi ta piki Jehovah buka tu te a bi nama a di fasi fa a bi ta si gudu. Jöpu bi fusutan  taa ee a bi buta futoou a dee gudu dee a bi abi, nöö a bi o du wan gaan zöndu di bi o mbei a kisi sitaafu (Jöpu 31:24, 25, 28). U ta libi a wan goonliba ka sëmbë ta biinga u de ko gudu. Ee u ta libi ku dee mama wëti u Bëibel di ta heepi u fuu si möni ku gudu a di soifi fasi, nöö a o heepi u fuu ko ta möön hoi useei a Gadu.​—Nöng. 30:8, 9; Mat. 6:19-21.

15. (a) Andi bi heepi Jöpu faa hoi hënseei a Gadu? (b) Faandi mbei u sa taki taa di soni aki ta heepi u fuu ta dë ku di mëni taa Jehovah o du dee soni dee a paamusi u?

¹⁵ Jöpu bi ta hoi hënseei a Gadu, u di a bi ta biibi taa Gadu bi o mbei a feni gaan bunu. A bi ta biibi taa Gadu bi ta tei ën u bigi taa a bi ta hoi hënseei nëën (Jöpu 31:6). Hii fa fuka bi ta miti Jöpu, tökuseei a bi dë seiki taa te u kaba fëën Jehovah bi o mbei a feni gaan bunu. Di soni aki bi heepi ën faa hoi hënseei a Gadu. Jehovah bi lobi di fasi fa Jöpu bi hoi hënseei nëën sö tee taa a mbei Jöpu feni gaan bunu seei, hii fa a bi dë wan zöndu libisëmbë! (Jöpu 42:12-17; Jak. 5:11). Ma Jöpu o feni möön gaan bunu a di ten di ta ko. I ta biibi taa Jehovah o mbei i feni gaan bunu u di i ta hoi iseei nëën u? Wë di Gadu fuu an tooka (Mal. 3:6). Ee u ta hoi a pakisei taa Gadu ta tei di hoi di u ta hoi useei nëën u bigi, nöö hii juu woo ta dë ku di mëni taa dee soni dee Gadu paamusi u o pasa tuutuu.​—1 Tes. 5:8, 9.

16. Andi u musu dë kabakaba u du?

¹⁶ Hoi dou! Na mbei na wan soni tapa i fu ja hoi iseei a Gadu möön! So juu a o ta djei kuma ju wanwan ta hoi iseei a Gadu, ma na sö a dë. Joo dë makandi ku milionmilion woto dinima u Gadu a hii së u goonliba, di ta hoi deseei nëën. Söseei iseei o ko dë wan sëmbë di hoi iseei a Gadu kumafa dee womi ku dee mujëë fu awooten bi hoi deseei a Gadu, hii fa de bi sa lasi de libi (Heb. 11:36-38; 12:1). Be hiniwan fuu dë kabakaba u du di soni di Jöpu bi taki. A bi taki taa: „Mi o ta hoi miseei a Gadu!” Be di hoi di u ta hoi useei a Jehovah tja gafa ko dëën u teego!