1. Mashahidi watatu waliotajwa katika fungu hili walionyeshaje kwamba wao ni washikamanifu kwa Yehova?

FIKIRIA hali hizi tatu za kuwaziwa zinazohusisha Mashahidi wa Yehova. (1) Msichana mdogo yuko shuleni na mwalimu anawaomba wanafunzi wote darasani washerehekee sikukuu fulani. Msichana huyo anajua kwamba sikukuu hiyo haimpendezi Mungu, hivyo kwa heshima anakataa kuisherehekea. (2) Ndugu kijana mwenye haya anahubiri nyumba kwa nyumba. Anajua kwamba mwanafunzi mwenzake anaishi nyumba inayofuata na mwanafunzi huyo amewahi kuwakejeli Mashahidi wa Yehova. Ingawa hivyo, kijana huyo anabisha mlango wa nyumba hiyo. (3) Ndugu mmoja anafanya kazi kwa bidii ili kuiandalia familia yake, lakini siku moja mwajiri wake anamwambia afanye jambo fulani la udanganyifu au linalovunja sheria. Ingawa anajua kwamba anaweza kufutwa kazi kwa kukataa kufanya hivyo, ndugu huyo anamweleza mwajiri wake kwamba ni lazima awe mnyoofu na atii sheria kwa sababu Mungu anawataka watumishi wake wafanye hivyo.—Rom. 13:1-4; Ebr. 13:18.

2. Tutazungumzia maswali gani, na kwa nini?

² Umetambua sifa gani ambayo Mashahidi hao watatu walionyesha? Huenda umeona sifa kadhaa, kama vile ujasiri na unyoofu. Lakini kuna sifa moja yenye thamani sana inayojitokeza—sifa ya utimilifu. Kila mmoja wao alikuwa mshikamanifu kwa Yehova. Na kila mmoja wao alikataa kuvunja viwango vya Yehova. Sifa ya utimilifu ndiyo iliyowachochea kutenda kama walivyotenda. Tuna hakika kwamba Yehova angemwonea fahari kila mmoja wao kwa kuonyesha sifa hiyo. Sisi pia tunataka Baba yetu aliye mbinguni atuonee fahari. Hivyo, acheni tuzungumzie maswali haya: Utimilifu ni nini? Kwa nini tunahitaji kuonyesha sifa ya utimilifu? Na tunaweza kufanya nini ili tuimarishe azimio letu la kudumisha utimilifu katika nyakati hizi ngumu?

3. (a) Inapohusu watumishi wa Mungu, utimilifu unamaanisha nini? (b) Ni mifano gani inayoweza kutusaidia kuelewa maana ya utimilifu?

³ Inapohusu watumishi wa Mungu, utimilifu unamaanisha kumpenda Yehova kwa moyo wetu wote na kushikamana naye kabisa, hivi kwamba tunatanguliza mapenzi yake katika maamuzi yetu yote. Fikiria jinsi neno hilo linavyotumiwa katika Biblia. Maana moja ya msingi ya neno “utimilifu” katika Biblia ni: kamili, bila kasoro, au nzima. Kwa mfano, Waisraeli walimtolea Yehova dhabihu za wanyama, na Sheria ilisema kwamba wanyama hao walipaswa kuwa bila kasoro. * (Law. 22:21, 22) Watu wa Mungu hawakuruhusiwa kutoa mnyama asiye na mguu, sikio, au jicho; wala hawakupaswa kutoa mnyama mgonjwa. Yehova alitaka mnyama huyo awe kamili, bila kasoro, au ugonjwa wowote. (Mal. 1:6-9) Tunaweza kuelewa kwa nini Yehova alitaka Waisraeli wamtolee dhabihu isiyo na kasoro au iliyo kamili. Tunaponunua bidhaa fulani, iwe ni tunda, kitabu, au kifaa, hatungependa kununua tunda lililooza au kitabu kisicho na kurasa zote au kifaa ambacho hakina sehemu zote. Tungependa kununua bidhaa iliyo kamili, isiyo na kasoro, au nzima. Yehova anahisi vivyo hivyo inapohusu upendo na ushikamanifu wetu kwake. Ni lazima upendo na ushikamanifu wetu kwake uwe kamili, bila kasoro, au upungufu wowote.

4. (a) Kwa nini mtu asiye mkamilifu anaweza kuwa mtimilifu? (b) Kulingana na andiko la Zaburi 103:12-14, Yehova anatarajia nini kutoka kwetu?

⁴ Je, tunapaswa kufikiri kwamba ili tuwe watimilifu ni lazima tuwe wakamilifu? Huenda tukahisi kwamba tumepungukiwa au tuna kasoro nyingi sana. Hata hivyo, hatuhitaji kuwa na wasiwasi. Fikiria sababu hizi mbili. Kwanza, Yehova hakazii fikira kasoro zetu. Neno lake linatuambia hivi: “Ikiwa ungekuwa unatazama tu makosa, Ee Yah, basi ni nani, Ee Yehova, angeweza kusimama?” (Zab. 130:3) Yehova anajua kwamba sisi si wakamilifu, sisi ni wanadamu wenye dhambi, naye hutusamehe mara nyingi. (Zab. 86:5) Pili, Yehova anajua uwezo wetu, naye hatarajii tutimize mambo yanayopita uwezo wetu. (Soma Zaburi 103:12-14.) Basi ni katika maana gani tunaweza kuwa kamili, bila kasoro, na bila upungufu wowote machoni pake?

5. Kwa watumishi wa Yehova, ni katika njia gani upendo ni siri ya kuwa watimilifu?

⁵ Kwa watumishi wa Yehova, siri ya kuwa watimilifu ni upendo. Ni lazima upendo wetu kwa Mungu na ujitoaji wetu mshikamanifu kwake akiwa Baba yetu wa mbinguni uwe kamili, bila kasoro, au upungufu wowote. Ikiwa upendo wetu kwake utadumu ukiwa hivyo hata tunapojaribiwa, basi sisi ni watimilifu. (1 Nya. 28:9; Mt. 22:37) Wafikirie tena Mashahidi watatu waliotajwa mwanzoni. Kwa nini walitenda kama walivyotenda? Je, yule msichana mdogo anachukia kufurahia maisha akiwa shuleni, au je, yule ndugu kijana angependa kuaibishwa anapohubiri nyumba kwa nyumba, au yule ndugu mwenye familia je, angependa kupoteza kazi yake? Bila shaka, hapana. Badala yake, wanajua kwamba Yehova ana viwango vya uadilifu, na wamekazia akilini mwao kumpendeza Baba yao wa mbinguni. Upendo wao kwake huwachochea kumtanguliza katika kila uamuzi wanaofanya. Hivyo, matendo yao yanathibitisha kwamba wao ni watimilifu.

6. (a) Kwa nini unahitaji kusitawisha sifa ya utimilifu? (b) Adamu na Hawa walishindwa kuwa watimilifu jinsi gani?

⁶ Kwa nini ni muhimu sana kwa kila mmoja wetu kusitawisha sifa ya utimilifu? Unahitaji kusitawisha sifa ya utimilifu kwa sababu Shetani alizusha madai fulani yasiyo ya kweli  kumhusu Yehova na kudai kwamba wewe huwezi kuwa mtimilifu kwa Yehova. Katika bustani ya Edeni, malaika huyo mwasi alijifanya mwenyewe kuwa Shetani, au “Mpinzani.” Alilipaka matope jina zuri la Yehova kwa kudai kwamba Mungu ni mwovu, mbinafsi, na Mtawala mwongo. Kwa kusikitisha, Adamu na Hawa walimuunga mkono Shetani na kumwasi Yehova. (Mwa. 3:1-6) Maisha katika bustani ya Edeni yalikuwa yamewapa fursa tele za kuimarisha upendo wao kwa Yehova. Lakini kufikia wakati ambapo Shetani alizusha madai yake, upendo wao kwa Yehova haukuwa kamili, ulikuwa umepungua, au ulikuwa na kasoro. Swali lingine likazuka: Je, kuna mwanadamu yeyote ambaye angeweza kuendelea kuwa mshikamanifu kwa Yehova Mungu kwa sababu anampenda? Kwa maneno mengine, je, wanadamu wana uwezo wa kuwa watimilifu? Swali hilo lilijitokeza katika kisa cha Ayubu.

7. Kama andiko la Ayubu 1:8-11 linavyoonyesha, Yehova alihisije kuhusu utimilifu wa Ayubu? Shetani alihisije kuhusu utimilifu wa Ayubu?

⁷ Ayubu aliishi katika siku ambazo Waisraeli walikuwa nchini Misri. Utimilifu wake ulikuwa wa pekee. Kama sisi, yeye pia hakuwa mkamilifu. Alifanya makosa. Ingawa hivyo, Yehova alimpenda Ayubu kwa sababu ya utimilifu wake. Inaonekana kwamba tayari Shetani alikuwa amemdhihaki Yehova kuhusu utimilifu wa wanadamu. Hivyo, Yehova akaelekeza fikira za Shetani kwa Ayubu. Maisha ya mwanamume huyo yalifunua wazi kabisa kwamba Shetani ni mwongo! Shetani alitaka utimilifu wa Ayubu ujaribiwe. Yehova alimwamini Ayubu, rafiki yake, hivyo alimruhusu Shetani amjaribu.—Soma Ayubu 1:8-11.

8. Shetani alimshambuliaje Ayubu?

⁸ Shetani ni katili, na ni muuaji. Alishambulia mali za Ayubu, akamnyang’anya utajiri wake,  watumishi wake, na kumpotezea heshima yake katika jamii. Alishambulia familia ya Ayubu, na kuwaua watoto wake kumi wapendwa. Kisha alishambulia mwili wa Ayubu, akadhoofisha afya yake kwa kumsababishia majipu yenye maumivu makali yaliyoenea kotekote kuanzia kichwani hadi miguuni. Mke wa Ayubu alifadhaika na kulemewa na huzuni; alimwambia Ayubu amtukane Mungu afe. Ayubu mwenyewe alitamani kufa, lakini bado aliendelea kuwa mtimilifu. Kisha Shetani akatumia mbinu nyingine kumshambulia. Alitumia wanaume watatu ambao walikuwa marafiki wa Ayubu. Wanaume hao walimtembelea Ayubu na kukaa naye kwa siku kadhaa, lakini hawakumfariji kwa njia yoyote. Badala yake walimkosoa bila huruma. Walidai kwamba Mungu ndiye aliyekuwa akisababisha matatizo yake na hakujali kuhusu utimilifu wake. Hata walidokeza kwamba Ayubu alikuwa mwovu na alistahili kupatwa na mambo mabaya aliyokuwa akikabili! —Ayu. 1:13-22; 2:7-11; 15:4, 5; 22:3-6; 25:4-6.

9. Ayubu alikataa kufanya nini hata alipokabili majaribu?

⁹ Ayubu alitendaje baada ya kukabili mateso hayo yote? Ayubu hakuwa mkamilifu; aliwakemea kwa hasira wafariji wake bandia, na baadaye alikiri kwamba maneno yake yalikuwa mazungumzo ya ovyoovyo. Alitetea uadilifu wake mwenyewe kuliko uadilifu wa Mungu. (Ayu. 6:3; 13:4, 5; 32:2; 34:5) Ingawa hivyo, hata hali yake ilipokuwa mbaya sana, Ayubu hakumwacha Yehova Mungu. Alikataa kuamini maneno yasiyo ya kweli ya marafiki wake wa uwongo. Alisema hivi: “Ni jambo nisiloweza kamwe kuwazia kuwatangaza ninyi kuwa waadilifu! Mpaka nitakapokufa, sitaukana utimilifu wangu.” (Ayu. 27:5) Hayo ni maneno muhimu sana. Ayubu alikataa kuvunja utimilifu wake; na tunaweza kufanya vivyo hivyo pia.

10. Suala ambalo Shetani alizusha kumhusu Ayubu linakuhusuje?

¹⁰ Shetani anazusha mashtaka hayohayo kuhusu kila mmoja wetu. Wewe unahusikaje? Kwa maneno mengine, Shetani anadai kwamba humpendi Yehova Mungu kwa dhati, kwamba utaacha kumtumikia ili ujiokoe mwenyewe, na kwamba utimilifu wako si wa kweli! (Ayu. 2:4, 5; Ufu. 12:10) Unahisije kuhusu jambo hilo? Linaumiza sana, sivyo? Lakini fikiria kuhusu hili: Yehova anakuamini sana hivi kwamba amekupatia fursa ya pekee sana. Yehova anamruhusu Shetani ajaribu utimilifu wako. Yehova ana hakika kwamba unaweza kuendelea kuwa mtimilifu na kuthibitisha kwamba Shetani ni mwongo. Naye anaahidi kwamba atakusaidia kufanya hivyo. (Ebr. 13:6) Ni pendeleo lililoje kwamba Mwenye Enzi Kuu ya ulimwengu wote anakuamini! Je, umetambua kwa nini sifa ya utimilifu ni muhimu sana? Inatusaidia kuthibitisha kwamba madai ya Shetani ni ya uwongo, inatusaidia kutetea jina zuri la Baba yetu na kuunga mkono njia yake ya kutawala. Tunaweza kusitawisha sifa hiyo muhimu jinsi gani?

11. Tunajifunza nini kutoka kwa Ayubu?

¹¹ Shetani amezidisha mashambulizi yake katika ‘siku hizi za mwisho’ zenye misukosuko. (2 Tim. 3:1) Katika nyakati hizi ngumu, tunaweza kuimarishaje azimio letu la kudumisha utimilifu? Kuna mambo mengine mengi tunayoweza kujifunza kutoka kwa Ayubu. Muda mrefu kabla ya kukumbwa na majaribu, tayari Ayubu alikuwa ameonyesha utimilifu wake kwa Yehova mara nyingi. Fikiria mambo matatu tunayoweza kujifunza kutoka kwake kuhusu jinsi ya kuimarisha azimio letu la kudumisha utimilifu.

12. (a) Kama andiko la Ayubu 26:7, 8, 14 linavyoonyesha, ni nini kilichomwezesha Ayubu kumheshimu Yehova zaidi na kustaajabia jinsi alivyo? (b) Tunaweza kufanya nini ili mioyo yetu ichochewe kumheshimu Yehova na kustaajabia jinsi alivyo?

¹² Kadiri Ayubu alivyostaajabia matendo ya Yehova, ndivyo upendo wake Kwake  ulivyoongezeka. Ayubu alitumia wakati kutafakari kuhusu uumbaji wa Yehova wenye kustaajabisha. (Soma Ayubu 26:7, 8, 14.) Alistaajabu alipotafakari kuhusu dunia, anga, mawingu, na ngurumo, hata hivyo alitambua kwamba hakujua mengi kuhusu vitu vyote ambavyo Yehova aliumba. Pia, alistaajabia maneno ya Yehova. Ayubu alisema hivi kuhusu maneno ya Mungu: “Nimeyathamini maneno yake kama hazina.” (Ayu. 23:12) Ayubu alimstaajabia Yehova na kazi zake na alimheshimu sana. Mambo hayo yalimchochea kumpenda Baba yake na kutamani kumfurahisha. Kwa sababu hiyo, Ayubu aliimarisha azimio lake la kuendelea kuwa mtimilifu. Tunahitaji kufanya kama Ayubu alivyofanya. Leo, tunajua mengi zaidi kuhusu kazi za uumbaji zenye kustaajabisha kuliko watu wa siku za Ayubu. Na tuna Biblia nzima iliyoongozwa na roho ya Mungu inayotusaidia kujua Yehova ni nani hasa. Mambo yote tunayojifunza yataifanya mioyo yetu imstaajabie Yehova na kazi zake. Kisha heshima tuliyo nayo kwa Yehova na kazi zake itatuchochea kumpenda, kumtii, na kuimarisha azimio letu la kutoka moyoni la kudumisha utimilifu wetu kwake.—Ayu. 28:28.

13-14. (a) Kama tunavyosoma kwenye Ayubu 31:1, Ayubu alionyeshaje kwamba alikuwa mtiifu? (b) Tunaweza kumwigaje Ayubu?

¹³ Ayubu aliimarisha azimio lake la kuendelea kuwa mtimilifu kwa kuwa mtiifu katika mambo yote. Ayubu alijua kwamba ili awe mtimilifu alihitaji kumtii Yehova. Kwa kweli, kila tunapotii tunaimarisha azimio letu la kuendelea kuwa watimilifu. Ayubu alifanya yote awezayo kumtii Mungu kila siku maishani mwake. Kwa mfano, alikuwa mwangalifu kuhusu jinsi alivyoshughulika na watu wa jinsia tofauti. (Soma Ayubu 31:1.) Kwa kuwa alikuwa amefunga ndoa, alijua kwamba lilikuwa kosa kumwonyesha mwanamke mwingine upendezi wa kimahaba isipokuwa mke wake. Leo, tunaishi katika ulimwengu uliojaa vishawishi vingi vinavyotushinikiza kufanya ngono. Kama Ayubu, je, sisi pia tunakataa kumwonyesha upendezi wa kimahaba mtu mwingine yeyote isipokuwa mwenzi wetu wa ndoa? Je, tunakataa kutazama picha chafu au ponografia, popote zinapopatikana?  (Mt. 5:28) Ikiwa kila siku tutajitahidi kujidhibiti, tutaimarisha azimio letu la kuendelea kuwa watimilifu.

¹⁴ Pia, Ayubu alimtii Yehova kwa kusitawisha mtazamo mzuri kuhusu vitu vya kimwili. Ayubu alielewa kwamba ilikuwa dhambi nzito kuweka tumaini lake kwenye mali alizomiliki, na jambo hilo lingefanya astahili kuadhibiwa. (Ayu. 31:24, 25, 28) Leo, tunaishi katika ulimwengu unaotanguliza ufuatiaji wa vitu vya kimwili. Ikiwa tutasitawisha mtazamo unaofaa kuhusu pesa na vitu vya kimwili kama tunavyohimizwa na Biblia, tutaimarisha azimio letu la kuendelea kuwa watimilifu.—Met. 30:8, 9; Mt. 6:19-21.

15. (a) Ni thawabu gani ambayo Ayubu alitarajia kupata iliyomsaidia adumishe utimilifu wake? (b) Kwa nini kukazia akilini tumaini ambalo Yehova hutoa ni jambo litakalotusaidia?

¹⁵ Ayubu alidumisha utimilifu kwa kukazia akilini mwake tumaini la kwamba Mungu angemthawabisha. Aliamini kwamba Yehova alichukulia kwa uzito utimilifu wake. (Ayu. 31:6) Licha ya majaribu aliyokabili, Ayubu alikuwa na uhakika kwamba mwishowe Yehova angemthawabisha. Uhakika huo ulimsaidia sana kushikamana na utimilifu wake. Yehova alifurahishwa mno na utimilifu wa Ayubu hivi kwamba akamthawabisha sana licha ya kuwa alikuwa mwanadamu asiye mkamilifu! (Ayu. 42:12-17; Yak. 5:11) Na bado Ayubu atapokea thawabu nyingi zaidi wakati ujao. Je, una tumaini hakika kwamba Yehova atakuthawabisha kwa sababu ya utimilifu wako? Mungu wetu hajabadilika. (Mal. 3:6) Ikiwa tutakumbuka kwamba anathamini utimilifu wetu, tumaini letu zuri ajabu la wakati ujao litaendelea kuwa halisi mioyoni mwetu.—1 The. 5:8, 9.

16. Tunapaswa kuazimia kufanya nini?

¹⁶ Hivyo basi, azimia kudumisha utimilifu wako sikuzote! Huenda nyakati nyingine ukahisi kwamba ni wewe tu unayedumisha utimilifu, lakini hauko peke yako; kuna mamilioni ya watu waaminifu ulimwenguni pote wanaodumisha utimilifu kama wewe. Wewe pia ni miongoni mwa wanaume na wanawake wenye imani waliodumisha utimilifu wao nyakati za zamani, hata walipotishwa kwamba watauawa. (Ebr. 11:36-38; 12:1) Acheni sisi sote tuazimie kudumisha utimilifu wetu kama Ayubu, aliyesema hivi: “Sitaukana utimilifu wangu!” Utimilifu wetu na umtukuze Yehova milele!