1. Oinsá mak Testemuña ba Jeová neʼebé temi iha parágrafu neʼe nafatin laran-metin ba Jeová?

IMAJINA toʼok situasaun neʼebé Testemuña ba Jeová naʼin-tolu hasoru. (1) Feto joven ida iha eskola no loron ida mestre husu estudante hotu iha klase laran atu hola parte iha loron-boot ida. Nia hatene katak Maromak la gosta loron-boot neʼe, entaun ho respeitu nia hatete katak nia lakohi hola parte. (2) Mane joven ida neʼebé moedór haklaken husi uma ba uma. Nia hatene katak ninia kolega eskola ida hela iha uma tuirmai, no uluk kolega neʼe goza Testemuña ba Jeová. Maibé mane joven neʼe la taʼuk atu haklaken iha uma neʼe. (3) Mane ida serbisu makaʼas atu tau matan ba ninia família, no loron ida ninia patraun husu nia atu halo buat neʼebé ilegál ka la hatudu laran-moos. Maski mane neʼe karik sei lakon ninia serbisu, maibé nia esplika katak nia tenke hatudu laran-moos no halo tuir lei tanba Maromak hakarak ninia atan sira atu halo nuneʼe.​—Rom 13:1-4; Ebr 13:18.

2. Pergunta saida deʼit mak ita sei koʼalia hamutuk? Tanbasá?

² Hahalok saida mak Ita bele nota iha ema naʼin-tolu neʼe? Karik Ita nota hahalok oioin, hanesan aten-brani no laran-moos. Maibé iha hahalok folin-boot ida neʼebé sira hatudu, neʼe mak integridade ka laran-metin. Sira ida-idak hatudu laran-metin ba Jeová no lakohi kontra ninia prinsípiu sira. Integridade book sira atu halo nuneʼe. Jeová sente orgullu tebes ho sira ida-idak tanba sira hatudu hahalok neʼe. Ita mós hakarak halo ita-nia Aman iha lalehan sente orgullu. Entaun mai ita koʼalia kona-ba pergunta tolu: Saida mak integridade? Tanbasá mak ita presiza integridade? No oinsá mak ita bele hametin ita-nia hakarak atu kaer metin ba integridade iha tempu susar sira-neʼe?

3. (a) Oinsá mak Maromak nia atan sira hatudu integridade? (b) Ezemplu saida deʼit mak bele ajuda ita komprende signifikadu husi integridade?

³ Oinsá mak Maromak nia atan sira hatudu integridade? Sira halo nuneʼe hodi kontinua hatudu domin no laran-metin ba Jeová ho laran tomak no domin neʼe book sira atu halo nia kontente. Mai ita haree oinsá Bíblia uza liafuan integridade. Signifikadu simples husi liafuan integridade iha Bíblia laran mak kompletu, la iha moras, ka tomak. Porezemplu, Ukun-Fuan hatete katak bainhira ema Izraél hasaʼe sakrifísiu animál ba Jeová, sira tenke hasaʼe animál neʼebé la iha moras. * (Lev 22:21, 22) Maromak nia povu labele hasaʼe animál neʼebé ain ida, tilun ida ka matan ida la iha, no mós labele iha moras. Jeová hakarak animál neʼebé kompletu, la iha moras, ka tomak. (Mal 1:6-9) Ita komprende tanbasá Jeová hakarak buat neʼebé la iha moras ka kompletu. Bainhira ita sosa buat ruma, maski neʼe mak livru ka ekipamentu ruma, ita lakohi neʼe iha kuak ka lakon parte ruma. Ita hakarak buat neʼebé kompletu ka tomak. Jeová mós sente hanesan. Nia hakarak ita hatudu domin no laran-metin neʼebé kompletu ka tomak.

4. (a) Tanbasá ema neʼebé la perfeitu bele hatudu integridade? (b) Tuir Salmo 103:12-14 Jeová husu saida husi ita?

⁴ Ita tenke sai perfeitu atu bele hatudu integridade ka lae? Lae duni, tanba ita hotu la perfeitu no halo sala beibeik. Hanoin toʼok razaun rua tanbasá mak ita la presiza sai perfeitu hodi hatudu integridade. Primeiru, Jeová la fokus deʼit ba ita-nia sala. Ninia Liafuan hatete ba ita: “Oh Jah, oh Jeová, sé mak bele tahan se Ita hateke deʼit ba sala sira?” (Sal 130:3) Nia hatene katak ita la perfeitu no sala-naʼin, no nia prontu atu perdua ita. (Sal 86:5) Segundu, Jeová hatene ita iha limite, no nia la husu ita atu halo liu fali ita-nia kbiit. (Lee Salmo 103:12-14.) Entaun, oinsá mak ita bele sai kompletu ka tomak tuir ninia haree?

5. Tanbasá mak Jeová nia atan sira presiza domin hodi hatudu integridade?

⁵ Domin mak xave atu Jeová nia atan sira hatudu integridade. Ita tenke hatudu domin no laran-metin neʼebé kompletu ba ita-nia Aman iha lalehan. Se ita kontinua hatudu domin hanesan neʼe maski ita hetan koko, neʼe katak ita hatudu integridade. (1 Krón 28:9; Mt 22:37) Hanoin fali Testemuña naʼin-tolu neʼebé temi ohin. Tanbasá mak sira halo desizaun hanesan ita haree ona? Feto joven neʼe lakohi kontente iha eskola ka lae? Mane joven neʼe hakarak ema hamoe nia ka lae? Família nia ulun neʼe hakarak lakon serbisu ka lae? Klaru katak lae. Maibé sira hatene Jeová nia prinsípiu mak loos, no sira fokus deʼit atu halo sira-nia Aman iha lalehan kontente. Domin ba nia book sira atu sempre hanoin uluk ninia hakarak antes sira halo desizaun. Nuneʼe sira hatudu katak sira iha integridade.

6. (a) Tanbasá mak ita presiza integridade? (b) Tanbasá mak Adão no Eva la hatudu integridade?

⁶ Tanbasá mak ita hotu presiza integridade? Ita presiza integridade tanba Satanás duun Jeová no mós Ita. Anju neʼe halo nia an sai Satanás ka “Kontradór”  iha jardín Eden. Nia hafoʼer Jeová nia naran hodi halo Adão ho Eva sente katak Maromak mak Ukun-Naʼin neʼebé aat, hanoin an deʼit, no la laran-moos. Triste mak Adão ho Eva apoia Satanás, hodi kontra Jeová. (Gén 3:1-6) Sira iha oportunidade barak atu hametin sira-nia domin ba Jeová iha jardín Eden. Maibé iha momentu neʼebé Satanás hasaʼe lia, sira-nia domin la kompletu ka la tomak. Entaun, mosu pergunta seluk: Ema bele laran-metin nafatin ba Maromak Jeová tanba hadomi nia ka lae? Ka, ema bele hatudu integridade ka lae? Pergunta neʼe mosu iha Job nia tempu.

7. Tuir liafuan neʼebé hakerek iha Job 1:8-11, oinsá mak Jeová no Satanás haree Job nia integridade?

⁷ Job moris iha tempu neʼebé ema Izraél hela iha rai-Ejitu. Ninia integridade ka laran-metin mak úniku. Job mós la perfeitu hanesan ita. Nia halo sala. Maibé, Jeová hadomi Job tanba ninia integridade. Karik Satanás sadik ona Jeová katak ema labele hatudu integridade. Tan neʼe, Jeová dada Satanás nia atensaun ba Job. Job nia moris hatudu katak Satanás bosok-teen! Satanás husu atu koko Job nia integridade. Jeová iha konfiansa ba ninia belun Job, tan neʼe nia husik Satanás atu koko Job.​—Lee Job 1:8-11.

8. Iha dalan saida deʼit mak Satanás koko Job?

⁸ Satanás mak laran-aat, no ohodór. Satanás koko Job hodi halakon buat hotu neʼebé Job iha, oho Job nia atan sira, no hafoʼer Job nia naran diʼak. Nia oho Job nia oan doben naʼin-sanulu. Tuirmai nia hamosu fisur aat ba Job husi ulun toʼo ain. Job nia feen sai triste tebes,  toʼo nia obriga Job atu rende an no hatete aat Maromak no mate. Job mós hakarak atu mate deʼit, maibé nia kaer metin nafatin ba ninia integridade. Tuirmai Satanás koko dalan seluk. Nia uza Job nia kolega naʼin-tolu. Mane sira-neʼe vizita Job ba loron barak, maibé sira la fó kmaan ba nia. Sira ho laran-aat kritika nia makaʼas. Sira dehan katak Maromak mak hamosu ninia susar sira-neʼe no la hanoin kona-ba ninia integridade. Sira mós dehan katak Job mak ema aat no merese hetan susar neʼebé akontese daudaun ba nia!​—Job 1:13-22; 2:7-11; 15:4, 5; 22:3-6; 25:4-6.

9. Bainhira Job hasoru susar, saida mak nia lakohi halo?

⁹ Saida mak Job halo bainhira nia hasoru susar hotu neʼe? Tanba nia la perfeitu, nia siʼak kolega sira neʼebé finje fó kmaan ba nia, no hasai liafuan neʼebé ikusmai nia rekoñese katak liafuan arbiru. Nia defende ninia hahalok loos duké Maromak nian. (Job 6:3; 13:4, 5; 32:2; 34:5) Maibé Job lakohi fila kotuk ba Maromak Jeová maski hasoru susar sira-neʼe. Nia lakohi fiar ninia kolega falsu sira-neʼe nia lia-bosok. Nia dehan: “Haʼu nunka bele fó sai katak imi mak ema neʼebé loos! Toʼo haʼu mate, haʼu sei kaer metin nafatin haʼu-nia integridade!” (Job 27:5, nota) Liafuan sira-neʼe hatudu katak Job hakarak atu hatudu nafatin integridade. Nia lakohi rende an; ita mós bele halo hanesan.

10. Oinsá mak Ita mós envolve iha lia neʼebé Satanás hasaʼe kona-ba Job?

¹⁰ Oinsá mak Ita mós envolve iha lia neʼebé Satanás hasaʼe kona-ba Job? Satanás mós duun ita ida-idak. Tuir loloos, Satanás dehan katak Ita ladún hadomi Jeová, Ita sei para serbí nia hodi bele salva Ita-nia moris, no Ita sei la kaer metin ba Ita-nia integridade. (Job 2:4, 5; Apok 12:10) Ida-neʼe hakanek Ita-nia laran, loos ka lae? Maibé, hanoin toʼok kona-ba neʼe: Jeová konfia Ita hodi fó Ita oportunidade furak ida. Jeová husik Satanás koko Ita-nia integridade. Jeová iha konfiansa katak Ita bele kaer metin ba Ita-nia integridade no hola parte atu hatudu katak Satanás mak bosok-teen. Maromak promete atu ajuda Ita hatudu integridade. (Ebr 13:6) Ita iha priviléjiu boot tanba Ukun-Naʼin Boot Liu konfia Ita! Ita komprende ona tanbasá mak integridade importante ka lae? Neʼe ajuda ita atu hatudu katak Satanás mak bosok-teen no ita tane aas ita-nia Aman nia naran no apoia ninia dalan atu ukun. Oinsá mak ita bele haburas hahalok importante neʼe?

11. Saida mak ita bele aprende husi Job?

¹¹ Satanás hakaʼas an liután atu ataka Maromak nia povu iha “loron ikus sira”. (2 Tim 3:1) Iha tempu susar neʼe, oinsá mak ita bele hametin ita-nia hakarak hodi kaer metin ba integridade? Dala ida tan, ita bele aprende buat barak husi Job. Antes Job hetan koko, nia hatudu ona integridade beibeik. Hanoin toʼok lisaun tolu neʼebé ita bele aprende husi nia kona-ba oinsá ita bele hametin ita-nia hakarak atu kaer metin ba integridade.

12. (a) Hanesan temi iha Job 26:7, 8, 14, oinsá mak Job haburas respeitu no hafolin Jeová? (b) Oinsá mak ita bele haburas respeitu no hafolin Jeová?

¹² Job hametin ninia domin ba Jeová hodi admira buat hotu neʼebé Jeová halo. Job uza tempu atu medita kona-ba  Jeová nia kriasaun furak. (Lee Job 26:7, 8, 14.) Nia hafolin liután Jeová bainhira nia hanoin kona-ba mundu, lalehan, kalohan, no rai-tarutu, maibé nia rekoñese katak nia seidauk hatene buat hotu kona-ba kriasaun. Nia mós hafolin Jeová nia liafuan sira no hatete: “Haʼu hafolin ninia liafuan sira.” (Job 23:12) Job admira buat hotu neʼebé Jeová halo no hatudu respeitu kleʼan ba Jeová, neʼe book nia atu hadomi no halo kontente ninia Aman. Tan neʼe, Job hakarak liután atu hatudu integridade. Ita mós presiza halo hanesan Job. Ita hatene buat barak liu kona-ba kriasaun duké ema iha Job nia tempu. No ita mós iha Bíblia kompletu neʼebé bele ajuda ita atu hatene Jeová. Buat hotu neʼebé ita aprende bele halo ita hafolin liután Jeová. Bainhira ita hafolin no respeitu Jeová nia hakarak, neʼe sei book ita atu hadomi, halo tuir no hametin hakarak atu kaer metin ba ita-nia integridade.​—Job 28:28.

13-14. (a) Tuir Job 31:1, oinsá mak Job hatudu katak nia halo tuir? (b) Oinsá mak ita bele banati-tuir Job nia ezemplu?

¹³ Job halo tuir Maromak no neʼe ajuda nia hatudu integridade. Job hatene katak atu iha integridade, nia tenke halo tuir. Bainhira ita halo tuir Maromak, ita hametin ita-nia hakarak atu hatudu integridade. Job hakaʼas an atu halo tuir Maromak loroloron. Porezemplu, nia kuidadu kona-ba ninia hahalok ho feto sira. (Lee Job 31:1.) Nuʼudar kaben-naʼin, Job hatene katak la diʼak atu hatudu sentimentu romántiku ba feto neʼebé laʼós ninia feen. Ohin loron, ita moris iha mundu neʼebé nakonu ho tentasaun seksuál. Hanesan Job, ita lakohi hatudu sentimentu romántiku ba ema neʼebé laʼós ita-nia kaben ka lae? Ita mós lakohi haree pornografia ka lae? (Mt 5:28) Se ita kontrola an loroloron, ita sei hametin ita-nia hakarak atu nafatin hatudu integridade.

 ¹⁴ Job mós halo tuir Jeová nia hanoin kona-ba rikusoin. Job hatene katak se nia tau fiar ba rikusoin, nia sei halo sala boot neʼebé merese atu hetan kastigu. (Job 31:24, 25, 28) Ohin loron, ita moris iha mundu neʼebé buka deʼit rikusoin. Bíblia anima ita atu iha hanoin neʼebé loos kona-ba rikusoin, se ita halo nuneʼe ita sei hametin ita-nia hakarak atu hatudu integridade.​—Prov 30:8, 9; Mt 6:19-21.

15. (a) Atu kaer metin ba integridade, Job tau fokus ba esperansa saida? (b) Oinsá mak hanoin-hetan kolen neʼebé Jeová sei fó ba ita bele ajuda ita?

¹⁵ Job kaer metin ba integridade hodi tau fokus ba ninia esperansa katak Maromak sei fó kolen ba nia. Nia fiar katak Maromak hafolin ninia integridade. (Job 31:6) Maski hasoru susar, maibé Job iha konfiansa katak Jeová sei fó kolen ba nia, no neʼe ajuda nia atu kaer metin ba ninia integridade. Jeová kontente tebes ho Job nia integridade, tan neʼe Jeová fó kolen barak ba Job maski nia la perfeitu! (Job 42:12-17; Tgo 5:11) Job mós sei hetan kolen neʼebé diʼak liu iha futuru. Ita fiar metin katak Jeová sei fó kolen ba Ita-nia integridade ka lae? Maromak la troka. (Mal 3:6) Se ita hanoin-hetan katak Jeová sei fó kolen ba ita, neʼe sei ajuda ita kaer metin ita-nia integridade no hametin ita-nia fiar ba futuru neʼebé kapás.​—1 Tes 5:8, 9.

16. Saida mak ita hakarak halo?

¹⁶ Hakaʼas an atu kaer metin ita-nia integridade! Dala ruma, karik ita sente katak ita deʼit mak hatudu integridade, maibé ita nunka mesak. Ita hamutuk ho ema rihun ba rihun iha mundu tomak neʼebé kaer metin ba integridade. Ita mós parte husi fiar-naʼin sira iha tempu uluk neʼebé kaer metin ba integridade, maski ema koko atu oho sira. (Ebr 11:36-38; 12:1) Mai ita hotu hakaʼas an atu moris tuir Job nia liafuan: “Haʼu sei kaer metin nafatin haʼu-nia integridade!” No ita-nia integridade fó glória ba Jeová nafatin!