1. Kumbi Akaboni atatu wo azumbulika mu ndimi iyi, anguchita wuli kuti alutirizgi kuja akugomezgeka kwaku Yehova?

ŴANAŴANIYANI vakuchitika vitatu ivi vakukwaskana ndi Akaboni aku Yehova. (1) Msungwana we kusukulu ndipu asambizi apempha ŵana wosi mu kilasi kuti achiti phwandu lakukondwere holidi. Msungwana uyu waziŵa kuti holidi iyi yitumbika Chiuta cha. Mwaviyo, wakana mwaulemu. (2) Mnyamata munyaki wasoni wapharazga nyumba ndi nyumba. Iyu waziŵa kuti nyumba yo wakhumba kuchipharazgaku kuja mnyamata yo wasambira nayu sukulu. Nyengu yinyaki mnyamata uyu wangunyoza Akaboni aku Yehova. Kweni mubali wachinyamata uyu waluta mbwenu kunyumba iyi ndi kuchigogoda. (3) Mubali munyaki walimbikiya ntchitu kuti waphwere banja laki. Zuŵa linyaki bwana waki watimupempha kuti wachiti vinthu mwachinyengu pamwenga vo boma likana. Chinanga kuti waziŵa kuti ntchitu yingamala, mubali uyu wakambiya bwana waki kuti watenere kuchita vinthu mwakugomezgeka kweniso kuvwiya marangu nga boma chifukwa ndivu Chiuta wakhumba kuti ateŵeti ŵaki achitengi.—Aro. 13:1-4; Ahe. 13:18.

2. Kumbi tikambiskanengi mafumbu nanga, ndipu ntchifukwa wuli tikambiskanengi mafumbu yanga?

² Kumbi ndi jalidu nili lo muwona mu ŵanthu atatu yaŵa? Tikayika cha kuti mwawona mijalidu yinandi nge chiganga ndi kuchita vinthu mwauneneska. Kweni wosi angulongo jalidu lakukhumbika ukongwa la kugomezgeka. Wosi atatu angulongo kugomezgeka kwaku Yehova. Weyosi wangukana kuswa marangu ngaku Chiuta. Kugomezgeka ndiku kunguŵawovya kuti achiti viyo. Yehova watenere kuti wangukondwa ukongwa ndi weyosi waku yiwu chifukwa chakuti angulongo jalidu lenili. Nasi tikhumba kukondwesa Ada ŵidu akuchanya. Mwaviyo,  tiyeni tikambiskani mafumbu yanga: Kumbi kugomezgeka kung’anamuwanji? Ntchifukwa wuli tikhumbika kuja akugomezgeka? Nanga tingachita wuli kuti tilutirizgi kuja akugomezgeka mu nyengu zinu zakusuzga?

3. (a) Kumbi kugomezgeka kung’anamuwanji kwaku isi ateŵeti aku Yehova? (b) Kambani vakuyeruzgiyapu vo vingatiwovya kuvwisa vo mazu ngakuti kugomezgeka ngang’anamuwa.

³ Kwaku isi ateŵeti aku Chiuta, kugomezgeka kung’anamuwa kwanja Yehova ndi mtima wosi kweniso kujipereka kwaku iyu pe. Ndipu venivi vititiwovya kuti timukondwesengi. Tiyeni tikambiskani mo mazu ngakuti kugomezgeka ngagwiriskikiya ntchitu mu Bayibolu. Mazu ngakuti “kugomezgeka,” mu Bayibolu ngang’anamuwa champhumphu pamwenga chambula kalema. Mwakuyeruzgiyapu, Ayisirayeli aperekanga sembi ya nyama. Dangu lakambanga kuti aperekengi nyama yambula kalema. * (Ŵale. 22:21, 22) Ŵanthu aku Chiuta akhumbikanga cha kupereka nyama yambula lundi, gutu, jisu pamwenga yakutama. Yehova wakhumbanga kuti aperekengi nyama yamphumphu pamwenga yambula kalema. (Mala. 1:6-9) Tingavwisa chifukwa cho Yehova wakhumbiyanga nyama yaviyo. Mwakuyeruzgiyapu, asani tigula chinthu chinyaki kwali ntchipasu, tingagula cha chakuvunda parwandi pamwenga asani tikhumba kugula buku tingagula cha lo lilivi mapepala nganyaki. Tigula chinthu champhumphu pamwenga kuti chakukwana. Yehova nayu wakhumba kuti timuyanjengi ndi kumugomezga mwakuyanana ŵaka. Chanju chidu chitenere kuja champhumphu pamwenga chambula kalema.

4. (a) Ntchifukwa wuli tikamba kuti munthu wambula kufikapu wangaja wakugomezgeka? (b) Mwakukoliyana ndi Sumu 103:12-14, kumbi Yehova wakhumbanji kwaku isi?

⁴ Kumbi titenere kuja akufikapu kuti tije akugomezgeka? Nyengu zinyaki tingajiwona kuti tibudiska vinthu vinandi ukongwa. Tiyeni tikambiskani vifukwa viŵi vo tikhumbikiya cha kuŵanaŵana kuti titenere kuŵa akufikapu kuti tije akugomezgeka. Chakwamba, Yehova waŵanaŵaniya vo tinangisa cha. Mazu ngaki ngatitikambiya kuti: “Yimwi Ya, mukaŵengi kuti muwonesesa maubudi, kumbi ndiyani yo watingi wamengi A Yehova?” (Sumu 130:3) Yehova waziŵa kuti te akubuda ndipu watitigowoke ndi mtima wosi. (Sumu 86:5) Chachiŵi, Yehova waziŵa vo titondeka kufiska ndipu wakhumba kuti tichitengi vo tingafiska. (Ŵerengani Sumu 103:12-14.) Mwaviyo, kumbi titenere kuja amphumphu pamwenga ambula kalema mu nthowa wuli?

5. Kumbi chanju chitiŵawovya wuli ateŵeti aku Yehova?

⁵ Chanju ndichu chitovya ateŵeti aku Yehova kuti aje akugomezgeka. Kugomezgeka kwidu kweniso kwanja Chiuta kutenere kuŵa kwambula kalema pamwenga kuti kwamphumphu. Asani chanju chidu chileka kumala chinanga ndi po titeseka ndikuti te akugomezgeka. (1 Miko. 28:9; Mate. 22:37) Ŵanaŵaniyani so Akaboni atatu wo taŵazumbuwa kukwamba kwa nkhani iyi. Ntchifukwa wuli anguchita vinthu mwakugomezgeka? Kumbi msungwana yuwa wakhumbanga cha kukondwa ku sukulu? Kumbi mubali wachinyamata wakhumbanga kuti wakalengeseki kunyumba yo wanguluta kuchipharazga? Nanga mubali yo wagwiranga ntchitu, kumbi wakhumbanga kuti ntchitu yimali? Awa! Mumalu mwaki, aziŵanga kuti marangu ngaku Yehova nga urunji ndipu aŵanaŵaniyanga ukongwa vo vingakondwesa Awisewu akuchanya. Chifukwa chakuti ayanjanga Yehova, vinguŵawovya kuti asankhi vinthu vo vingamukondwesa. Ivi vingulongo kuti ŵenga akugomezgeka.

6. (a) Ntchifukwa wuli titenere kuja akugomezgeka? (b) Ntchifukwa wuli Adamu ndi Heva angutondeka kuja akugomezgeka?

⁶ Ntchifukwa wuli tosi tikhumbika kuja akugomezgeka? Tikhumbika kuja akugomezgeka chifukwa chakuti Satana wakamba vinthu vaboza vaku Yehova ndi isi. Mungelu wakugaruka mwenuyu wangujisambusa yija kuja Satana pamwenga kuti “Wakususka” mumunda wa Edeni. Iyu wangunyoza zina laku Yehova chifukwa wangukamba kuti walamuliya uheni, waŵanaŵaniya vaki pe ndipuso wachita vinthu mwauneneska cha. Chakupaska chitima ntchakuti Adamu ndi Heva anguja kuchigaŵa chaku Satana ndipu angugarukiya Yehova. (Chiya. 3:1-6) Vinthu venga umampha ukongwa mumunda wa Edeni ndipu ivi vatingi viŵawovyengi kuti amuyanjengi ukongwa Yehova. Kweni ŵati aja kuchigaŵa chaku Satana, chanju chawu chenga champhumphu cha pamwenga kuti chenga ndi kalema. Vo Adamu ndi Heva anguchita vingwambisa fumbu lakuti: Kumbi walipu yo wangaŵa wakugomezgeka kwaku Yehova chifukwa chakumuyanja? Mu mazu nganyaki tingafumba kuti, kumbi ŵanthu angafiska kuja akugomezgeka? Fumbu lenili ndilu Satana wangwambisa mu nyengu yaku Yobu.

7. Nge mo pakambiya pa Jobu 1:8-11, kumbi Yehova wanguchita wuli ndi kugomezgeka kwaku Yobu, nanga Satana wenga ndi maŵanaŵanu wuli?

⁷ Yobu wengaku pa nyengu yo Ayisirayeli ŵenga ku Ijipiti. Pa nyengu iyi pengavi munthu wakugomezgeka nge iyu. Nge mo viliri ndi isi, nayu wenga wambula kufikapu ndipu wanangisanga. Kweni Yehova wamuyanjanga Yobu chifukwa cha kugomezgeka kwaki. Viwoneka kuti Satana ndipu wamunyoza kali Yehova kuti ŵanthu angaja cha akugomezgeka kwaku iyu.  Yehova wangukambiya Satana kuti Yobu wenga muteŵeti waki wakugomezgeka. Kugomezgeka kwaku Yobu kungulongo kuti Satana ngwaboza. Satana wangukamba kuti Yobu wayeseki. Yehova wamugomezganga mubwezi waki Yobu ndipu wangumuzomereza Satana kuti wamuyesi.—Ŵerengani Jobu 1:8-11.

8. Kumbi Satana wangumuyesa wuli Yobu?

⁸ Satana ngwankhaza ndipuso ngwakubaya. Iyu wangunanga katundu yosi waku Yobu, wangubaya ateŵeti ŵaki ndipuso wangunanga mbiri yaki. Satana wangubaya so ŵana 10 aku Yobu. Pavuli paki wangutamisa Yobu ndi vilonda vakuŵaŵa ukongwa kutuwa kumutu mpaka kusi ku phazi. Muwolu waku Yobu wangusuzgika maŵanaŵanu ndipuso wenga ndi chitima. Iyu wangukambiya Yobu kuti watuki Chiuta kuti wafwi. Yobu nayu wakhumbanga kufwa kweni wangulutirizga kuja wakugomezgeka. Pavuli paki Satana wangugwiriskiya so ntchitu nthowa yinyaki. Wangugwiriskiya ntchitu ŵanthu atatu wo ŵenga anyaki aku Yobu. Ŵanthu yaŵa ŵati aluta kwaku Yobu, pengavi yo wangumupembuzga. Mumalu mwaki, akambanga kuti Chiuta ndiyu wanguchitiska kuti Yobu wakumani ndi masuzgu ndipu watoliyangaku kanthu cha kuti wenga wakugomezgeka. Akambanga so kuti Yobu wenga munthu muheni ndipu penga pakwenere kuti vinthu ivi vimuchitikiyi.—Jobu 1:13-22; 2:7-11; 15:4, 5; 22:3-6; 25:4-6.

9. Kumbi Yobu wangukana kuchitanji chinanga kuti wangukumana ndi masuzgu?

⁹ Kumbi Yobu wanguchita wuli ndi masuzgu ngo wangukumana nangu? Iyu wenga wambula kufikapu. Yobu wangukwiya ndipu wanguŵasuska anyaki wo anguza kuzimupembuzga. Iyu wangukamba vinthu vo pavuli paki wanguzomereza kuti wangukambiya ŵaka mu luŵi. Yobu wangukamba ukongwa va urunji waki mumalu mwakukamba ukongwa va urunji waku Chiuta. (Jobu 6:3; 13:4, 5; 32:2; 34:5) Chinanga mphanyengu yo vinthu venga umampha cha pa umoyu waki, wangukana kugarukiya Chiuta. Wangukana kugomezga vinthu vaboza vo anyaki atatu angukamba. Yobu wangukamba kuti: “Ini ndingachita cha kukamba kuti mwaŵanthu yimwi mwe arunji! Ndipu mpaka po ndifwiyengi, ndilekengi cha kuja wakugomezgeka!” (Jobu 27:5) Mazu yanga ngalongo kuti Yobu wakhumbisiskanga kuja wakugomezgeka mwemosi mo vinthu venge. Yobu wangukana kuthera ndipu nasi tingachita so viyo.

10. Kumbi nkhani yaku Yobu yo Satana wangwambisa yititikwaska wuli?

¹⁰ Kumbi nkhani yaku Yobu yo Satana wangwambisa yititikwaska wuli? Satana wakamba kuti Yehova titimuyanja ndi mtima wosi cha, tingaleka kumuteŵete ndi kwamba kujiteŵete tija ndipuso kuti tingaleka kuja akugomezgeka. (Jobu 2:4, 5; Chivu. 12:10) Kumbi mutuvwa wuli ndi vo Satana wakamba? Tikayika cha kuti vitikukwiyisani ukongwa. Kweni ŵanaŵaniyani ivi: Yehova watitigomezga ukongwa lekani wakutipaska mwaŵi wakulongo asani tingalutirizga kuja akugomezgeka. Iyu wazomereza Satana kuti wayesi kugomezgeka kwidu. Yehova we ndi chigomezgu kuti tingaja akugomezgeka ndi kulongo kuti Satana ngwaboza. Ndipu wakutilayizga kuti watiwovyengi kuja akugomezgeka. (Ahe. 13:6) Ndi mwaŵi ukulu ukongwa kuti Fumu ya chilengedu chosi yititigomezga. Kugomezgeka nkhwakukhumbika ukongwa. Kutitiwovya kususka maboza ngaku Satana ndi kukankhuska zina lamampha la Awusefwi kweniso kovya ulamuliru wawu. Kumbi tingachita wuli kuti tilutirizgi kuja akugomezgeka?

11. Kumbi tingasambiranji kwaku Yobu?

¹¹ Satana walimbana ukongwa ndi ateŵeti aku Chiuta mu ‘mazuŵa nganu ngakumaliya’ kuphara kali. (2 Timo. 3:1) Kumbi tingachitanji kuti tilutirizgi kuja akugomezgeka mu mazuŵa  nganu ngakusuzga? Tingasambira vinandi kwaku Yobu. Wechendayeseki, ndipu ngwakugomezgeka kali kwaku Yehova. Tiyeni tikambiskani vinthu vitatu vo tingasambira kwaku iyu vo vingatiwovya kulutirizga kuja akugomezgeka.

12. (a) Nge mo pakambiya pa Jobu 26:7, 8, 14 kumbi Yobu wachitanganji kuti watumbikengi Yehova ndi kuzukuma ndi vo wakulenga? (b) Kumbi nasi tingachita wuli kuti titumbikengi ndi kuzukuma ndi vo Chiuta wakulenga?

¹² Yobu wazukumanga ndi vosi vo Yehova wakulenga ndipu venivi vingumuwovya kuti wamuyanjengi ukongwa. Iyu wasaniyanga nyengu yakuŵanaŵaniya vo Yehova wakulenga. (Ŵerengani Jobu 26:7, 8, 14.) Yobu wanguzukuma ukongwa pa nyengu yo waŵanaŵaniyanga va charu chapasi, kuchanya, mitambu ndi malimphezi. Iyu wanguwamu kuti waziŵa vinandi cha vakukwaskana ndi vinthu vosi vo Yehova wakulenga. Yobu wawonanga kuti mazu ngaku Yehova ngakukhumbika ndipu wanguti: “Ndasunga mazu ngaki mwakuphwere.” (Jobu 23:12) Yobu wazukumanga ndi vo Yehova wakulenga ndipu ivi vingumuchitiska kuti wamupaskengi ulemu. Iyu waŵayanjanga ukongwa Awisi a Yehova ndipu wakhumbanga kuŵakondwesa. Ivi vinguwovya Yobu kuti wakhumbisiskengi kuja wakugomezgeka. Nasi titenere kuchita nge mo Yobu wachitiyanga. Isi tiziŵa vinandi ukongwa vakukwaskana ndi vo Yehova wakulenga kuphara ŵanthu a mu nyengu yaku Yobu. Kweniso te ndi Bayibolu losi lo lititiwovya kumuziŵa umampha Yehova. Vosi vo tisambira vingatiwovya kuti timutumbikengi. Asani titumbika Yehova vitiwovyengi kuti timuyanjengi, timuvwiyengi ndi kukhumbisiska kuja akugomezgeka.—Jobu 28:28.

13-14. (a) Nge mo pakambiya pa Jobu 31:1, kumbi Yobu wangulongo wuli kuti wenga wakuvwiya? (b) Kumbi tingachita wuli nge Yobu?

¹³ Kuvwiya kunguwovya Yobu kuti walutirizgi kuja wakugomezgeka. Iyu waziŵanga kuti wakhumbika kuvwiya Yehova kuti walutirizgi kuja wakugomezgeka. Ndichu chifukwa chaki asani tivwiya, vititiwovya kuti tikhumbisiskengi kuja akugomezgeka. Yobu wayesesanga  kuvwiya Yehova pa vosi vo wachitanga. Mwakuyeruzgiyapu, waphweriyanga pakuchita vinthu ndi anthukazi. (Ŵerengani Jobu 31:1.) Pakuti wanguto, waziŵanga kuti mbumampha cha kukhumbira munthukazi yo wenga muwolu waki cha. Mazuŵa nganu, tija mucharu cho muchitika vinthu vo vititiyesa kuti tichiti ureŵi. Nge Yobu, kumbi tikanengi kukhumbira munthu yo tikutorana nayu cha pamwenga kuwonere vinthu vakusikuwa? (Mate. 5:28) Asani tijikongi pa vinthu venivi, tikhumbisiskengi kuja akugomezgeka.

¹⁴ Yobu wavwiyanga so Yehova pa nkhani ya mo wawoniyanga vinthu vakuliŵavu. Iyu waziŵanga kuti kuthemba ndalama ndi katundu kwatingi kumuchitiskengi kuti wachiti ubudi ukulu ndi kulangika. (Jobu 31:24, 25, 28) Mazuŵa nganu, tija mucharu cho chichiska ŵanthu kuŵika mtima wawu wosi pa kupenja ndalama ndi katundu. Asani tiwona ndalama ndi katundu mwakwenere nge mo Bayibolu lititikambiya, tikhumbisiskengi kuja akugomezgeka.—Nthanthi 30:8, 9; Mate. 6:19-21.

15. (a) Kumbi ntchinthu wuli cho chinguwovya Yobu kulutirizga kuja wakugomezgeka? (b) Kumbi kukumbuka vo Yehova wakutilayizga kungatiwovya wuli?

¹⁵ Yobu wangulutirizga kugomezgeka chifukwa waŵanaŵaniyanga mphotu yo Chiuta wangumulayizga. Iyu wagomezganga kuti Chiuta wawonanga kugomezgeka kwaki. (Jobu 31:6) Chinanga kuti wangukumana ndi mayeseru, Yobu wagomezganga kuti Yehova wazakumupaska mphotu pakumaliya. Ivi vingumuwovya kuti walutirizgi kuja wakugomezgeka. Yehova wakondwanga ukongwa ndi kugomezgeka kwaku Yobu mwakuti wangumutumbika ukongwa chinanga kuti wenga wambula kufikapu. (Jobu 42:12-17; Yako. 5:11) Ndipu kunthazi Yehova wazakumupaska vitumbiku vinandi ukongwa. Kumbi mwe ndi chigomezgu kuti Yehova wazakukutumbikani chifukwa cha kugomezgeka kwinu? Chiuta widu wasintha cha. (Mala. 3:6) Asani tikumbuka kuti Yehova wawona kugomezgeka kwidu, tikayikengi cha kuti kunthazi tazamulonde vinthu vamampha.—1 Ate. 5:8, 9.

16. Kumbi titenere kusimikiza mtima kuchitanji?

¹⁶ Titenere kusimikiza mtima kuti tilutirizgengi kuja akugomezgeka. Nyengu zinyaki mungaŵanaŵana kuti ndimwi pe muchita vinthu mwakugomezgeka. Kweni mwe mwija cha. Mwe mu gulu la abali ndi azichi anandi akugomezgeka pacharu chosi chapasi. Muŵengi so mu gulu la ŵanthu achivwanu wo anguja akugomezgeka chinanga mphanyengu yo umoyu wawu wenga pangozi. (Ahe. 11:36-38; 12:1) Mwaviyo, tiyeni tosi tisimikizi mtima kuchita vinthu mwakukoliyana ndi vo Yobu wangukamba. Iyu wangukamba kuti: “Ndilekengi cha kuja wakugomezgeka.” Tiyeni tilutirizgi kuja akugomezgeka kuti tithamiki Yehova mpaka muyaya!