1. Olsem wanem 3-pela Witnes i soim olsem ol i stap gut long Jehova?

PIKSAIM ol dispela samting i kamap long ol Witnes Bilong Jehova. (1) Yangpela gel i stap long skul na tisa i askim olgeta sumatin long selebretim wanpela holide. Yangpela gel i save olsem God i no orait long dispela holide, olsem na long pasin rispek em i tok em i no inap selebretim holide. (2) Yangpela man i gat pasin bilong sem, tasol em i go autim tok. Em i luksave olsem wanpela wanskul i stap long neks haus—wanskul i bin tok bilas long ol Witnes Bilong Jehova. Tasol dispela yangpela man i no larim pasin bilong sem i stopim em long autim tok long wanskul. (3) Famili man i wok hat long kisim mani bilong lukautim famili. Wanpela taim bos i tokim em long mekim giaman pasin na brukim lo. Sapos famili man i no mekim olsem, bos inap pinisim em long wok. Tasol famili man i tokim bos olsem em i mas mekim onest pasin na bihainim lo bikos God i laik bai ol wokman bilong em i mekim olsem.—Rom 13:1-4; Hib. 13:18.

2. Yumi bai skelim wanem ol askim? Bilong wanem?

² Wanem pasin bilong dispela 3-pela Witnes i stap ples klia? Ating yu luksave long onest pasin na pasin bilong ol long strongim bel. Tasol wanpela pasin i stap ples klia moa—ol i stap gut long Jehova. Ol i no brukim lo bilong em. Jehova i amamas tru long ol. Yumi tu i laik bai Papa bilong yumi long heven i amamas tru long yumi. Olsem na yumi ken skelim ol dispela askim: Olsem wanem yumi inap i stap gut long God? Bilong wanem yumi mas i stap gut long God? Hau bai yumi inap strongim pasin bilong yumi long i stap gut long God long dispela taim bilong hevi?

3. (a) Ol wokman bilong God i mas mekim wanem bilong soim olsem ol i stap gut long em? (b) Wanem ol eksampel i soim olsem yumi mas givim bel olgeta long i stap gut long God?

³ Yumi ol wokman bilong God, olsem na sapos yumi laik stap gut long em, yumi mas givim bel olgeta long laikim tru Jehova na pas gut wantaim em, na oltaim yumi mas tingim em taim yumi laik mekim ol disisen. Yumi ken skelim tokples ol i bin yusim bilong raitim tok bilong Baibel long pastaim. Tok Hibru ol i trensletim olsem “stap gut long God” i gat dispela mining: olgeta, o gutpela. Lain Israel i save givim animal olsem ofa long Jehova, na Lo i tok ol i mas givim ol gutpela animal. * (Wkp. 22:21, 22) Ol manmeri bilong God i no ken tru givim animal em wanpela lek, yau, o ai i bagarap, na tu, ol i no ken givim animal i gat sik. Em i bikpela samting long ol i mas givim animal em olgeta hap bilong bodi bilong en i gutpela. (Mal. 1:6-9) I stret long Jehova i laikim sakrifais i gutpela olgeta. Taim yumi laik baim wanpela prut, buk, o tul, yumi no laik bai planti hul i stap long en o sampela hap bilong en i no stap. Yumi laikim prut, buk, o tul i gutpela na i no gat bagarap long en. Jehova i pilim wankain long pasin bilong yumi long stap gut long em. Yumi mas givim bel olgeta long mekim olsem.

4. (a) Olsem wanem na yumi save olsem yumi inap i stap gut long God? (b) Buk Song 103:12-14 i soim olsem Jehova i holim wanem tingting long yumi?

⁴ Yu ting yumi no inap tru long i stap gut long God? Em tru olsem yumi save mekim planti popaia. Tasol skelim 2-pela samting. Namba 1: Jehova i no save putim ai long ol popaia bilong yumi. Baibel i tok: “O Ja, sapos yu save putim was long olgeta sin bilong mipela, orait, Jehova, husat inap winim kot bilong yu?” (Sng. 130:3) Em i save olsem yumi sinman na yumi save mekim ol popaia, na em i redi oltaim long fogivim yumi. (Sng. 86:5) Namba 2: Jehova i save long skel bilong yumi, na em i no ekspektim yumi long mekim ol samting i winim skel bilong yumi. (Ritim Buk Song 103:12-14.) Hau bai yumi inap givim bel olgeta long em na stap gut long em?

5. Olsem wanem pasin laikim i kirapim yumi long i stap gut long Jehova?

⁵ Pasin laikim bai kirapim yumi long i stap gut long Jehova. Yumi mas givim bel olgeta long laikim tru na stap gut long Papa bilong yumi long heven. Sapos yumi holim yet dispela pasin laikim bihain long hevi i painim yumi, dispela i soim olsem yumi stap gut long God. (1 Sto. 28:9; Mat. 22:37) Tingim gen eksampel bilong 3-pela Witnes yumi stori long ol long kirap bilong dispela stadi. Wanem samting i stiaim pasin ol i mekim? Yu ting yangpela gel i no laikim pasin bilong kisim amamas long skul? O, yu ting yangpela man i laik bai wanskul i semim em? O, yu ting famili man i laik bai bos i pinisim em long wok? Nogat tru. Ol i save olsem Papa bilong ol, Jehova, i gat ol stretpela lo, na ol i holim wanpela tingting tasol long mekim em i belgut. Ol i laikim em tru, olsem na oltaim ol i tingim ol lo bilong em paslain long ol i mekim disisen. Dispela i soim olsem ol i stap gut long em.

6. (a) Bilong wanem yu mas i stap gut long God? (b) Olsem wanem na Adam na Iv i no stap gut long God?

⁶ Bilong wanem em i bikpela samting tru long yumi olgeta wan wan i mas i stap gut long God? Wanpela ensel i bin sutim tok long Jehova na em i sutim tok long yu tu. Dispela ensel i bikhet, na long gaden Iden em i mekim em yet i kamap Satan, o  “Birua.” Em i bagarapim gutnem bilong Jehova na sutim tok olsem God em man nogut, na em i tingim laik bilong em yet tasol, na em i no mekim stretpela wok bos. Adam na Iv i sapotim Satan na ol i bikhet long Jehova. (Stt. 3:1-6) Taim tupela i stap long Iden, ol i gat planti rot long strongim pasin bilong ol long laikim Jehova. Tasol taim Satan i sutim tok long God, Adam na Iv i no givim bel olgeta long stap gut long God. Yumi laik save: Pasin laikim bai i gat strong long kirapim ol manmeri long i stap gut long God Jehova? Ol manmeri long graun inap i stap gut long God? Dispela askim i kamap long taim bilong Jop.

7. (a) Olsem Jop 1:8-11 i kamapim, Jehova i pilim olsem wanem long pasin bilong Jop long i stap gut long em? (b) Satan i pilim olsem wanem?

⁷ Long taim bilong Jop, lain Israel i stap long Isip. Jop i stap gut tru long God na i no gat wanpela man long taim bilong em i mekim olsem. Jop em i sinman olsem yumi. Em i mekim ol popaia. Tasol Jop i stap gut long Jehova, olsem na Jehova i laikim Jop. I luk olsem Satan i sutim tok pinis olsem ol man i no inap stap gut long Jehova. Tasol Jop i stap gut long Jehova, na dispela i soim klia olsem Satan em man bilong giaman! Satan i tokim God long larim em i kamapim sampela hevi bilong traim Jop. Jehova i trastim pren bilong em Jop, na Em i larim Satan i traim em.—Ritim Jop 1:8-11.

8. Satan i kamapim wanem ol hevi long Jop?

⁸ Satan i gat hatpela pasin na em i kilman.  Em i kirapim ol birua long stilim ol animal bilong Jop, kilim i dai ol wokman bilong em, na bagarapim gutnem bilong em. Satan i kamapim bagarap we i kilim i dai olgeta 10-pela pikinini bilong Jop. Na tu, em i kamapim ol strongpela boil nogut long bodi bilong Jop, kirap long het na i go daun olgeta long lek. Meri bilong Jop i bel hevi na bel sori wantaim, olsem na em i tokim Jop long givap, na tok nogut long God na bai em i ken i dai. Jop i pilim olsem em i laik dai, tasol em i stap gut yet long God. Olsem na Satan i yusim narapela rot bilong traim Jop. Em i yusim 3-pela pren bilong Jop. Ol i visitim Jop, na inap sampela de ol i sindaun tasol na ol i no mekim wanpela tok. Ol i no pilim hevi bilong em. Ol i kros na sutim tok long em. Ol i tok God i kamapim ol dispela hevi na em i no tingim pasin bilong Jop long i stap gut long em. Ol i tok Jop em man nogut na i stret long ol dispela hevi i painim em!—Jop 1:13-22; 2:7-11; 15:4, 5; 22:3-6; 25:4-6.

9. Maski ol hevi i kamap, Jop i mekim wanem?

⁹ Jop i mekim wanem taim olgeta dispela hevi i kamap? Em i no gutpela olgeta. Em i krosim ol pren bilong em na stretim tingting bilong ol, na em i tok em i no tingting gut, olsem na em i toktok nabaut. Em i laik bai ol manmeri i luksave olsem em i stretpela man, na em i no tingting long kamapim klia olsem God i gat stretpela pasin. (Jop 6:3; 13:4, 5; 32:2; 34:5) Maski bikpela hevi tru i kamap, Jop i no givim baksait long God Jehova. Em i no bilipim tok giaman bilong ol pren. Jop i tok: “Mi no inap tru long tokaut olsem yupela i stretpela man! I go inap long taim mi dai, mi no inap lusim pasin bilong mi long i stap gut long God!” (Jop 27:5) Dispela tok i soim klia olsem Jop i tingting strong long i stap gut yet long God. Jop i no laik lusim dispela pasin; yumi tu inap i stap gut long God.

10. Hau na yu tu i insait long tok em Satan i sutim long Jop?

¹⁰ Satan i sutim wankain tok long yumi olgeta wan wan. Hau na yu tu i insait long dispela tok? Em i tok yu no laikim God Jehova, na yu bai tingim yu yet na givim baksait long em, na yu no givim bel olgeta long stap gut long em! (Jop 2:4, 5; Rev. 12:10) Yu pilim olsem wanem long dispela tok? Ating dispela tok i bagarapim tru bel bilong yu, a? Tasol tingim: Jehova i trastim yu, olsem na em i larim Satan i traim pasin bilong yu long i stap gut long God. Em i save tru olsem yu inap stap gut long Em na soim klia olsem Satan em man bilong giaman. God i tok promis olsem em bai strongim yu. (Hib. 13:6) King bilong heven na graun i trastim yu—dispela em gutpela blesing tru! Ating yu luksave nau olsem em i bikpela samting tru long yumi mas i stap gut long God! Dispela bai daunim ol tok giaman bilong Satan, na sapotim gutnem na stretpela wok bos bilong God. Yumi ken mekim wanem na bai yumi inap stap gut yet long God?

11. Stori bilong Jop bai skulim yumi long wanem samting?

¹¹ Satan i birua moa yet long yumi long dispela taim bilong “las de,” em taim nogut bilong planti hevi. (2 Tim. 3:1) Olsem na yumi ken mekim wanem na bai yumi inap i stap gut yet long God? Stori bilong Jop i skulim yumi long planti samting. Jop i stap gut long God inap planti yia na bihain traim i painim em. Stori bilong Jop bai skulim yumi long 3-pela samting we inap strongim yumi long i stap gut yet long God.

12. (a) Olsem Jop 26:7, 8, 14 i kamapim, wanem samting i kirapim Jop long rispektim Jehova? (b) Yumi mas mekim wanem na dispela inap kirapim yumi long rispektim God?

¹² Jop i pilim tru ol wok bilong Jehova  na dispela i kirapim em long laikim Jehova moa yet. Jop i lusim sampela haptaim long tingim tingim ol wok bilong Jehova. (Ritim Jop 26:7, 8, 14.) Em i kirap nogut tru taim em i skelim graun, skai, klaut, na tanda, tasol em i luksave olsem save bilong em long ol dispela samting i liklik tru. Em i pilim tru ol tok bilong Jehova. Jop i tok: “Mi laikim tumas ol tok bilong em.” (Jop 23:12) Jop i pilim tru na rispektim ol wok bilong Jehova. Em i laikim tru Papa na mekim ol samting na bai Papa i belgut long em. Dispela i strongim moa yet tingting bilong em long i stap gut long God. Yumi mas bihainim pasin bilong Jop. Long nau yumi gat bikpela save moa long ol samting em God i bin wokim. Na tu, yumi gat Baibel we i stori gut long ol pasin na ol wok bilong Jehova. Taim yumi kisim gut save long God na ol samting em i wokim, dispela inap kirapim yumi long rispektim em na pilim tru ol gutpela wok bilong em. Dispela bai kirapim yumi long laikim Jehova moa yet, bihainim tok bilong em, na strongim pasin bilong i stap gut long em.—Jop 28:28.

13, 14. (a) Olsem Jop 31:1 i kamapim, Jop i bihainim tok bilong God long wanem ol samting? (b) Olsem wanem yumi inap bihainim eksampel bilong Jop?

¹³ Jop i bihainim olgeta tok bilong God na dispela i strongim em long i stap gut long God. Jop i save olsem em i mas bihainim tok na bai em inap i stap gut long God. Taim yumi bihainim tok, dispela i strongim tingting bilong yumi long i stap gut long God. Jop i wok hat tru long bihainim tok bilong God long olgeta samting em i mekim. Em i was gut long pasin em i mekim long ol meri. (Ritim Jop 31:1.) Em i maritman, na em i save olsem i no stret long aigris long ol narapela meri. Long nau, kain kain samting inap pulim yumi long insait long pasin pamuk. Olsem wanem? Bai yumi bihainim pasin bilong Jop na sakim pasin bilong aigris long narapela husat i no poroman marit bilong yumi? Bai yumi sakim ol piksa bilong pasin doti o ponografi? (Mat. 5:28) Sapos yumi bosim gut bel long olgeta de, yumi bai strongim pasin bilong i stap gut long God.

¹⁴ Jop i bihainim tu tok bilong Jehova long tingting em i holim long mani kago. Jop i save olsem  sapos em i bilip olsem mani kago bai lukautim em, em bai mekim bikpela rong na em inap kisim strafe. (Jop 31:24, 25, 28) Long nau, ol manmeri i laikim tumas mani kago. Sapos yumi bihainim tok bilong Baibel na holim stretpela tingting long mani kago, dispela bai strongim tingting bilong yumi long i stap gut long God.—Prov. 30:8, 9; Mat. 6:19-21.

15. (a) Jop i bilip long wanem samting na dispela i strongim em long i stap gut yet long God? (b) Wanem gutpela samting bai kamap sapos oltaim yumi tingim ol blesing yumi bai kisim?

¹⁵ Jop i putim tingting i go long ol blesing God bai givim. Em i stap gut long God, na em i bilip olsem God i luksave long pasin em i mekim. (Jop 31:6) Jop i bilip tru olsem Jehova bai blesim em, na dispela i strongim em long i stap gut yet long God. Jehova i amamas tru long pasin bilong Jop long i stap gut long em, olsem na em i givim planti blesing long em maski Jop i sinman! (Jop 42:12-17; Jems 5:11) Jop bai kisim planti moa blesing. Olsem wanem? Yu bilip tru olsem Jehova bai blesim pasin bilong yu long i stap gut long em? God bilong yumi i no senis. (Mal. 3:6) Sapos oltaim yumi tingim olsem God i laikim pasin bilong yumi long i stap gut long em, yumi bai tingim yet ol blesing yumi bai kisim.—1 Tes. 5:8, 9.

16. Yu mas strongim tingting long mekim wanem?

¹⁶ Yu mas strongim tingting olsem oltaim yu bai stap gut long God! Sampela taim yu inap pilim olsem yu wanpela i mekim olsem. Tasol yu no stap wanpis. Long olgeta hap bilong graun, planti milion manmeri i stap gut long God. Long bipo, planti manmeri i holimpas bilip na stap gut long God maski ol inap lusim laip bilong ol. (Hib. 11:36-38; 12:1) Yumi olgeta i mas strongim tingting long mekim wankain samting olsem Jop i bin mekim. Em i tok: “Mi no inap lusim pasin bilong mi long i stap gut long God!” Taim yumi stap gut long God, yumi laik bai dispela i givim glori long God inap oltaim oltaim!