1. Ne tumau pefea a Molimau a Ieova e tokotolu konei i te fakamaoni ki a Ieova?

MAFAUFAU aka la ki fakaakoakoga e tolu konei e aofia i ei a Molimau a Ieova. (1) Se tamaliki fafine e nofo atu i te akoga i te aso e tasi, kae fakamolemole atu te faiakoga ki tama‵liki katoa i te vasega ke ‵kau atu ki te fakamanatuga o se aso malō‵lo. E iloa ne te tamaliki fafine tenei me i te aso malōlō tenei e se fiafia ki ei a te Atua, tela la, e āva eiloa a ia ke sē kau atu ki ei. (2) Se tamataene mata mā e talai atu mai fale ki fale. E iloa ne ia me e isi se tamaliki mai tena akoga e nofo i te suā fale i te koga talai tenā—se tamaliki akoga telā ne fakaitaita sāle ne ia a Molimau a Ieova. Kae tiga eiloa te feitu tenā, ne loto toa eiloa te talavou tamataene tenei o talai atu ki te fale tenā. (3) Se tagata e galue malosi ke tausi atu ki tena kāiga, kae i te aso e tasi, ne fai atu tena pule ke fai ne ia se mea sē ‵lei io me sē fakamaoni. E tiga eiloa e mafai o fakatea a ia, e fakamatala atu ne ia ki tena pule me e ‵tau mo ia o fakamaoni kae fakalogo ki te tulafono me tenā te fakatonuga a te Atua ki ana tavini.—Loma 13:1-4; Epe. 13:18.

2. Ne a fesili ka sau‵tala tatou ki ei, kae kaia?

² Se a te uiga e lavea ne koutou i a latou konei tokotolu? Kāti e aofia i ei a nāi uiga e pelā mo te loto malosi mo te faipati ki te mea tonu. Kae e tasi te uiga telā e tu ‵kese kae tāua ‵ki eiloa—ko te fakamaoni. Ne fakaasi mai ne te tokotolu konei a te fakamaoni ki a Ieova. Ne seki ofa ne latou a tulafono a te Atua. E fakamalosi latou ne te fakamaoni ke fai penā. E mautinoa eiloa me e fakamatamata a Ieova me ne fakaasi mai ne latou taki tokotasi a te uiga tenā. I se auala tai ‵pau, e ma‵nako foki tatou o fakafiafia a te ‵tou Tamana i te lagi. Tela la, ke na sau‵tala nei tatou ki fesili konei: Se a te fakamaoni? Kaia e manakogina ei ne tatou a te fakamaoni? Kae e mafai pefea o fakamalosi aka ne tatou a ‵tou fakaikuga ke tumau i te fakamaoni i taimi faiga‵ta konei?

3. (a) Se a te uiga o te fakamaoni ki a tatou? (e) Ne a fakaakoakoga e fakaasi mai me i te katoatoa, te ‵lei mo te kātoa e tāua ki a tatou?

³ E fakaasi atu pefea ne tavini a te Atua a te fakamaoni? Mai te fakaasi atu o te alofa ki te Atua mo te loto kātoa kae ke tumau i ei, mai te fai faeloa a te mea telā e fiafia a ia ki ei. Mafaufau aka la ki nisi fakamatalaga o te pati fakamaoni kolā ne fakaaoga i te Tusi Tapu. I te Tusi Tapu, a te pati Epelu telā ne ‵fuli ki te “fakamaoni” e fakauiga penei: katoatoa, ‵lei, io me kātoa. E pelā me se fakaakoakoga, ne ofo atu ne te kau Isalaelu a manu e pelā me ne taulaga ki a Ieova, kae ne fai mai te Tulafono me e ‵tau o ofo atu a manu ‵lei. * (Levi. 22:21, 22) Ne seki talia ke ofo atu ne tino o te Atua se manu telā e galo te vae e tasi, taliga, io me se mata; e se mafai foki o ofo atu ne latou se manu telā e masaki. Ne tāua ‵ki eiloa ke ofo atu ki a Ieova se manu telā e katoatoa, e ‵lei io me kātoa. (Mala. 1:6-9) E malamalama tatou i te pogai e tāua ei ki a Ieova a te ‵lei io me ko te katoatoa. Kafai e ‵togi ne tatou se mea mai te sitoa, kāti se fuagalakau, se tusi, io me se mea faigaluega, e se ma‵nako tatou ki se mea telā e pakia, io me sē katoatoa. E ma‵nako tatou ki se mea telā e katoatoa, e ‵lei io me kātoa. Kae e penā foki a lagonaga o Ieova e uiga ki te ‵tou a‵lofa mo te ‵tou fakamaoni ki a ia. E ‵tau o katoatoa, ‵lei io me fakaasi atu mo te loto kātoa.

4. (a) Kaia e mafai ei ne se tino sē ‵lei katoatoa o fakamaoni? (e) E ‵tusa mo te Salamo 103:12-14, se a te mea e fakamoemoe a Ieova ke fai ne tatou?

⁴ E mata, e ‵tau o fakaiku aka ne tatou me e ‵tau o ‵lei katoatoa tatou ko te mea ke mafai o fakamaoni? E tonu, e mafai o mafau‵fau tatou i a tatou e se ‵lei io me e fai foki ne tatou a mea ‵se e uke. Mafaufau la ki pogai e lua e se ‵tau ei o ma‵taku tatou. Muamua la, e se onoono mai faeloa a Ieova ki ‵tou mea ‵se e fai. E fai mai tena Muna ki a tatou, penei: “Kafai koe e onoono ki mea ‵se, e Ioa, ko oi la e mafai o tu, e Ieova?” (Sala. 130:3) E iloa ne ia i a tatou e se ‵lei katoatoa, ne tino agasala, kae e loto fiafia a ia o fakamagalo tatou. (Sala. 86:5) Te lua, e iloa ne Ieova ‵tou tapula, kae e se fakamoemoe a ia ke fai ne tatou a mea kolā e se mafai ne tatou o fai. (Faitau te Salamo 103:12-14.) Kae i te auala fea e ‵tau ei mo tatou o katoatoa kae ‵lei i tena kilokiloga?

5. Kaia e tāua i ei te alofa ke fakamaoni a tavini a Ieova?

⁵ Mō tavini a Ieova, a te kī ki te fakamaoni ko te alofa. A te ‵tou a‵lofa, ‵tou fakamaoni mo te tapuaki katoatoa atu ki a Ieova te ‵tou Tamana faka-te-lagi, e ‵tau o katoatoa, ‵lei kae fai mo te loto kātoa. Kafai e tumau tatou penā i taimi o tofotofoga, ko fakaasi atu ei ne tatou te fakamaoni. (1 Nofo. 28:9; Mata. 22:37) Toe mafaufau aka la ki Molimau e tokotolu kolā ne fakamatala atu i te kamataga. Kaia ne fai ei latou penā? E mata, e se fiafia te tamaliki fafine ke aofia a ia i fakafiafiaga i te akoga, io me e mata, e manako te tamataene talavou tenei ke masiasi a ia i te mataloa, io me manako te tagata tenei ke fakatea a ia mai tena galuega? Ikai, e se penā loa. I lō te fai penā, e iloa ne latou a tulaga amio‵tonu o Ieova, kae ne ‵saga tonu atu latou ki te faiga o te mea telā e fakafiafia atu ki te lotou Tamana faka-te-lagi. E fakamalosi aka ne te alofa ki a Ieova ke fakamuamua ne latou a ia i fakaikuga e fai ne latou. E fakaasi mai i ei a te lotou fakamaoni.

6. (a) Kaia e manakogina ei ke fakamaoni tatou? (e) Ne seki mafai pefea ne Atamu mo Eva o fakaasi atu te fakamaoni?

⁶ Kaia e manakogina i ei ne tatou katoa a te fakamaoni? E ma‵nako katoa tatou o fakamaoni me i a Satani ne taua atu ki a Ieova, kae e taua mai foki ki a tatou. Ne fai ne te agelu ‵teke tenā a ia eiloa ke fai pelā me ko Satani, io me se “Tino ‵Teke,” i te fatoaga o Etena. Ne fakamasei ne ia te igoa ‵lei o Ieova mai te fai atu me i te Atua se  pule masei, kaimanako, kae sē fakamaoni. Se mea fakafanoanoa me ne ‵lago atu a Atamu mo Eva ki a Satani, kae ne ‵teke atu ki a Ieova. (Kene. 3:1-6) Ne maua ne lāua a avanoaga e uke i te fatoaga o Etena ke fakamalosi aka te lā a‵lofa ki a Ieova. Kae i te taimi ne fakasae aka ne Satani te kinauga, ne kamata ei o se katoatoa, sē ‵lei io me sē kātoa te lā a‵lofa ki te Atua. Ne sae aka ei se isi fesili: E mata, e mafai ne so se tino o tumau i te fakamaoni ki a Ieova te Atua mai te a‵lofa ki a ia? I nisi tugapati, e mata, e mafai eiloa ne tino o fakaasi atu te fakamaoni? Ne sae aka foki te fesili tenā i te mea ne tupu ki a Iopu.

7. E pelā mo te mea ne fakaasi mai i te Iopu 1:8-11, ne pefea a lagonaga o Ieova mo Satani e uiga ki te fakamaoni o Iopu?

⁷ Ne ola eiloa a Iopu i te taimi ne ‵nofo atu ei a tino Isalaelu i Aikupito. Ne tu ‵kese eiloa tena fakamaoni. A ia se tagata sē ‵lei katoatoa, e penei mo tatou. Ne fai ne ia a mea ‵se. Kae tiga te feitu tenā, ne fiafia a Ieova ki a Iopu ona ko tena fakamaoni. E foliga mai me ne fakaitaita ne Satani a Ieova e uiga ki te fakamaoni o tino. Tela la, ne fai atu a Ieova ki a Satani ke kilo atu ki a Iopu. Ne fakaasi faka‵sau mai ne te olaga o Iopu me i a Satani se tino loi! Ne ‵losi atu a Satani me e ‵tau o tofotofo aka te fakamaoni o Iopu. Ne talitonu a Ieova ki tena taugasoa ko Iopu, kae ne talia ne Ia ke tofotofo ne Satani a Iopu.—Faitau te Iopu 1:8-11.

8. Ne oso atu pefea a Satani ki a Iopu?

⁸ A Satani se tino masei kae tatino. Ne fakaseai ne ia a mea katoa a Iopu, ana koloa, tavini, mo tena igoa ‵lei. Ne oso atu a ia ki te kāiga o Iopu, mai te tamate ne ia ana tama‵liki fagasele e toko sefulu. Kae oti aka, fai ei ne ia ke maua ne Iopu se masaki matagā, puke katoa ana maumea kae fai ne ia ke ‵fonu te foitino o Iopu i fakafoa mai luga eiloa i tena ulu ke oko ki lalo i ana vae. Ne  kaitaua kae fanoanoa ‵ki te avaga a Iopu; ne fakamalosi ne ia tou tagata ke muna masei ne ia te Atua kae mate. Ne manako a Iopu ko ia ke na mate atu, kae ne tumau eiloa a ia i te fakamaoni. Kae ne toe taumafai a Satani o tofotofo aka se isi auala ke oso atu ki a Iopu. Ne fakaaoga ne ia a tāgata e tokotolu kolā ko taugasoa o Iopu. Ne āsi atu a tāgata ki a Iopu i nāi aso, kae ne seki tuku atu ne latou a pati fakamafanafana. I lō te fai penā, ne ‵sala atu fua latou ki mea ‵se kae kaitaua atu ki a ia. Ne ‵losi atu latou me ko te Atua ne māfua mai i a ia a fakalavelave katoa o Iopu kae ne seki fia saga atu ki te fakamaoni o Iopu. Kae ne fai atu foki latou i a Iopu se tagata masei telā ne ‵tau o maua ne ia a mea fakalogo‵mae penā ki a ia!—Iopu 1:13-22; 2:7-11; 15:4, 5; 22:3-6; 25:4-6.

9. I te taimi ne fakafesagai atu a ia ki mea faiga‵ta, se a te mea ne seki manako a Iopu o fai?

⁹ Ne saga atu pefea a Iopu ki tulaga faiga‵ta konā? A ia se ‵lei katoatoa. Ne kaitaua ‵ki eiloa a ia ki tino fakamafanafana ‵loi konā, kae ne fai atu ne ia a pati kolā ne iloa fakamuli ne ia me ne pati sē aoga. Ne ‵pulu ne ia a tena amiotonu i lō te amiotonu o te Atua. (Iopu 6:3; 13:4, 5; 32:2; 34:5) Kae faitalia eiloa te tulaga matagā ne oko a ia ki ei, ne seki manako lele a Iopu o fulitua atu ki a Ieova te Atua. Ne seki manako a ia o talitonu ki loi o ana taugasoa ‵loi konā. Ne fai mai a ia: “E seki mafaufau eiloa au ke taku koutou ne tāgata amio‵tonu! Ke oko ki te taimi e mate ei au, ka se tiaki eiloa ne au toku fakamaoni!” (Iopu 27:5) Ko oko eiloa i te tāua o pati konei. Ne seki loto vāivāi a Iopu; e mafai foki o fai tatou penā.

10. E aofia pefea koe i te kinauga telā ne fakasae aka ne Satani e uiga ki a Iopu?

¹⁰ E fai ne Satani a ‵losiga tai ‵pau penā ki a tatou taki tokotasi. E aofia pefea koe i ei? A te ‵tonuga loa, e fai mai a ia me i a koe sē alofa tonu ki a Ieova te Atua, ka fakagata tou tavini atu ki a ia māfai e manako koe ke sao, kae ka sē fakamaoni koe ki a ia! (Iopu 2:4, 5; Faka. 12:10) E pefea ou lagonaga? E logo‵mae, i ne? E tiga te feitu tenā, mafaufau ki te mea tenei: E talitonu eiloa a Ieova ki a koe ko ala ei o tuku atu ne ia se avanoaga gali penā ki a koe. E talia ne Ieova ke tofotofo ne Satani a tou fakamaoni. E talitonu a Ieova me e mafai ne koe o tumau i te fakamaoni kae fesoasoani atu ke fakatalitonu atu i a Satani se tino loi. Kae tauto mai a Ia me ka fesoasoani mai a ia ki a koe. (Epe. 13:6) Se tauliaga eiloa ke tali‵tonu ki te Pule Sili o te iunivesi! E mata, e lavea ne koe te pogai e tāua ‵ki eiloa i ei a te fakamaoni? E fesoasoani mai ke mafai ne tatou o fakatalitonu aka a loi o Satani kae ke fakamaluga aka a te igoa ‵lei o te ‵tou Tamana kae ‵lago atu ki tena pulega. E mafai pefea o ati aka ne tatou a te uiga tāua tenei?

11. Se a te mea e mafai o tauloto ne tatou mai i a Iopu?

¹¹ Ko fakauke ne Satani ana osomaiga ki a tatou i taimi faiga‵ta konei o “aso fakaoti.” (2 Timo. 3:1) I vaegā taimi penei o te pouliga, e mafai pefea o fakamalosi aka ne tatou a tatou eiloa ke tumau i te fakamaoni? E mafai o tauloto tatou ki mea e uke mai i a Iopu. A koi tuai o tofotofogina a ia, kae ko leva eiloa ne fakaasi atu ne ia tena fakamaoni ki a Ieova i aso mua. Ke onoono tatou ki akoakoga e mafai o tauloto ne tatou mai i a ia e uiga ki te auala e fakamalosi ne tatou a tatou eiloa ke tumau ‵tou fakamaoni.

12. (a) E pelā mo te mea ne fakaasi mai i te Iopu 26:7, 8, 14, ne ati aka pefea ne Iopu a tena ofo mo te āva ki a Ieova? (e) E mafai pefea o ‵fonu ‵tou loto i te ofo i a Ieova?

¹² Ne fakamalosi ne Iopu a tena alofa ki te Atua mai te ati aka o te loto fakafetai ki mea fakaofoofogia a Ieova ne faite. Ne fakamāumāu ne Iopu a taimi e uke ke mafaufau ‵loto ki mea fakaofoofogia a Ieova ne faite. (Faitau te Iopu 26:7, 8, 14.) Ne ofo malosi a ia i te taimi ne mafaufau ei ki te lalolagi, te lagi, kaumana mo fa‵tili, kae ne malamalama a ia me ne foliki fua tena mea ne iloa e uiga ki mea katoa a Ieova ne faite.  Ne fakatāua foki ne ia a muna katoa a Ieova. “Ne tausi ne au ana pati,” ne fai mai a Iopu e uiga ki pati a te Atua. (Iopu 23:12) Ne ofo kae āva malosi a Iopu ki a Ieova. Ne alofa a ia ki tena Tamana kae ne manako o fakafiafia a ia. Ona ko te mea tenā, ne gasolo aka ei o malosi tena fakaikuga ke tumau tena fakamaoni ki a Ieova. E ‵tau o fai ne tatou a te mea ne fai ne Iopu. E uke atu ‵tou mea e iloa e uiga ki mea fakaofoofogia ne faite i lō a tino i taimi o Iopu. Kae ko maua ne tatou a te Tusi Tapu kātoa ke fesoasoani mai ke iloa ‵lei ne tatou a Ieova. E mafai o fesoasoani mai a mea katoa e tauloto ne tatou ke ‵fonu ‵tou loto i te fiafia. A te ofo mo te āva o tatou ke fai te loto o Ieova, ka fakamalosi ei tatou ke a‵lofa kae faka‵logo ki a ia kae ke fakamalosi aka ‵tou manakoga ke tumau i te fakamaoni.—Iopu 28:28.

13-14. E pelā mo te mea ne fakamau i te Iopu 31:1, ne fakatalitonu mai pefea ne Iopu a tena fakalogo? (e) E mafai pefea o tau‵tali tatou i te fakaakoakoga a Iopu?

¹³ Ne fakamalosi ne Iopu a ia eiloa ke tumau i te fakamaoni e auala i faifaiga o te fakalogo. Ne iloa ne Iopu me ke fakamaoni, e ‵tau mo ia o fakalogo ki a Ieova. A te ‵tonuga loa, a te fakalogo e fakamalosi aka ei ‵tou fakaikuga ke fakatumau a te ‵tou fakamaoni. Ne galue malosi eiloa a Iopu ke fakalogo ki te Atua i tena olaga i aso takitasi. E pelā me se fakaakoakoga, ne seki ‵tau o ati aka ne ia a manakoga sē ‵lei ki se fafine. (Faitau te Iopu 31:1.) E pelā me se tagata avaga, ne iloa ne ia me e se ‵tau o fakaasi atu ne ia a manakoga sē ‵lei ki so se fafine kae ke saga fua a ia ki tena avaga. I aso nei, ko ola tatou i se lalolagi telā ko ‵fonu i fakaosoosoga e uiga ki faifaiga fakatauavaga sē ‵tau. E pelā mo Iopu, e mata, e se ‵tau o fakaasi atu ne koe a manakoga sē ‵lei ki se tino telā e se avaga mo koe? E mata, ka ‵teke atu koe ke onoono ki ata ma‵sei i vaegā auala kese‵kese? (Mata. 5:28) Kafai e fakagalue ne tatou te loto pulea i aso katoa, ka fakamalosi aka eiloa ne tatou a tatou eiloa ke tumau i te fakamaoni.

¹⁴ Ne fakalogo foki a Iopu ki a Ieova i te auala ne kilo atu ei a ia ki koloa faka-te-foitino. Ne malamalama a Iopu me kafai e fakamuamua ne ia ana koloa, ka iku atu a ia ki te faiga o se agasala  kae ‵tau o fakasala. (Iopu 31:24, 25, 28) I aso nei, e ola tatou i se lalolagi fia maumea. Kafai e ati aka ne tatou se kilokiloga tonu e uiga ki tupe mo koloa, e pelā mo te mea e fakamalosi mai i te Tusi Tapu ke fai ne tatou, ka fakamalosi aka ei ne tatou a ‵tou fakaikuga ke tumau i te fakamaoni.—Faata. 30:8, 9; Mata. 6:19-21.

15. (a) Se a te fakamoemoega ne fesoasoani atu ki a Iopu ke fakatumau tena fakamaoni? (e) Kaia e mafai ei o fesoasoani mai ke masaua ne tatou a te fakamoemoega telā e tuku mai ne Ieova ki a tatou?

¹⁵ Ne tumau te fakamaoni o Iopu mai te saga tonu atu ki te fakamoemoega me ka fakamanuia a ia ne te Atua. Ne talitonu a ia me ne lavea ne te Atua a tena fakamaoni. (Iopu 31:6) Faitalia ana fakalavelave, ne talitonu a Iopu me ka fakamanuia fakamuli a ia ne Ieova. E mautinoa eiloa me ne fesoasoani atu te loto talitonu tenei ke tumau a ia i te fakamaoni. Ne fiafia a Ieova ki te fakamaoni o Iopu, me ne fakamanuia ne Ia a tou tagata ke maumea i te taimi foki loa koi sē ‵lei katoatoa ei a ia! (Iopu 42:12-17; Iako. 5:11) Kae ka uke atu ana fakamanuiaga koi ‵moe mai i ana mua. E mata, e fakamoemoe malosi koe me ka fakamanuia koe ne Ieova ona ko tou fakamaoni? Ne seki ‵fuli eiloa te ‵tou Atua. (Mala. 3:6) Kafai e masaua ne tatou me e fakatāua ne ia ‵tou fakamaoni, ko mafai ei o tausi i ‵tou loto a te ‵tou fakamoemoega mō se olaga gali i aso mai mua.—1 Tesa. 5:8, 9.

16. Se a te mea e ‵tau o fakaiku aka ke fai ne tatou?

¹⁶ Tela la, ke na fakaiku aka ke tumau faeloa ‵tou fakamaoni! I nisi taimi, e mafai o mafaufau koe me seai se tino i ou tafa e tumau i te fakamaoni, kae ka se fai eiloa koe penā, me e aofia koe i te fia miliona o tino kolā e tumau i te fakamaoni i te lalolagi kātoa. Ka aofia koe i tāgata mo fāfine kolā ne tumau i te fakamaoni i aso ko ‵teka, faitalia me ne ‵tu atu olotou ola i se tulaga fakamataku ke oko ki te mate. (Epe. 11:36-38; 12:1) Ke na fakaiku aka ne tatou katoa ke ola e ‵tusa mo pati a Iopu: “Ka se tiaki eiloa ne au toku fakamaoni!” Kae ke fai ne te ‵tou fakamaoni ke ‵viki atu tatou ki a Ieova ki te se-gata-mai!