1. Olombangi vitatu Via Yehova via tukuiwa vocinimbu cilo, via lekisa ndati okuti via pua etondelo ku Yehova?

SOKOLOLA kovindekaise evi vitatu okuti muakongela Olombangi Via Yehova. (1) Manji umue ufeko o kasi kosikola kuenje ulongisi waye o pinga kolondonge viosi oku linga ocipito coloneke viohusa. Manji wa kũlĩha okuti ocipito caco ka ci sanjuisa Suku kuenje lesumbilo lialua o likala oku panga onepa. (2) Manji umue ukuenje okuti o kuete osõi o kunda konjo lanjo. Eye ivaluka okuti umue pokati kakamba vaye vo kosikola o kasi konjo yi kuãimo okuti kosimbu wa enda oku pembula Olombangi Via Yehova. Pole, ukuenje ka kuata usumba enda pepito kuenje o totola. (3) Manji umue ulume o kasi oku likolisilako oku talavaya oco a sange eteku liepata kuenje eteke limue cime caye u pinga oco a linge cimue ka ca sungulukile. Ndaño manji wa kũlĩha okuti oku likala ci pondola oku u pumbisa upange, eye o lombolola okuti o sukila oku kala ukuacili loku pokola kocihandeleko, momo oco Suku a yongola kafendeli vaye.—Va Rom. 13:1-4; Va Hev. 13:18.

2. Apulilo api tu konomuisa kuenda momo lie?

² Olombangi evi vitatu Via Yehova via lekisa ovituwa vipi? Citava okuti wa limbuka ovituwa via litepa ndeci, utõi kuenda oku kala ukuacili. Pole, vosi yavo va lekisa ocituwa cimue ca velapo okuti, oku pua etondelo. Katatu kavo va lekisa okuti vakuacili ku Yehova. Omunu lomunu pokati kavo wa likala oku lueya olonumbi via Suku. Omo lioku pua etondelo, ca va vetiya oku kuama olonumbi viaco. Yehova wa sanjikila calua omo lomunu pokati kavo omo lioku lekisa ocituwa caco. Cimuamue haico okuti, tu yongolavo oku sanjuisa Isietu wokilu. Omo liaco, tu konomuisi apulilo akuãimo ndeci: Nye ci lomboka oku pua etondelo? Momo lie tu sukilila oku pua etondelo?  Kuenda tu amamako ndati oku pua etondelo koloneke vilo viohali?

3. (a) Nye ci lomboka omunu wa pua etondelo? (b) Nye ci tu kuatisa oku kũlĩha eci ci lomboloka oku pua etondelo?

³ Omunu wa pua etondelo yuna okuti o sole Yehova lutima wosi kuenda ukuacili. Omunu waco o kakatela lika ku Yehova kovina viosi a linga. Kũlĩhĩsa vali elomboloko likuavo. Vembimbiliya ondaka “oku pua etondelo” yi lomboloka okuti: Cimue ca sokapo, ale ka ci kuete etime. Ndeci, va Isareli va enda oku lumba ovinyama ku Yehova kuenda ocihandeleko ca popele okuti ovinyama via sukilile oku pua etondelo. * (Ovis. 22:21, 22) Ka ca tavaile okuti afendeli va Suku va eca ndocilumba ocinyama ci kuete okulu kumosi, etũi ale iso limosi; kuenda ka ca tavelevo okuti va eca ocinyama ci vela. Ku Yehova ca velelepo ocinyama ca sokapo okuti ka ci kuete etondelo. (Mal. 1:6-9) Tu pondola oku kuata elomboloko lieci Yehova a sanjukila cimue ca pua etondelo, haico ca sokapo. Eci tu landa cimue ndeci, epako, elivulu, ale ocimalẽho cimue, ka tu yongola cimue ca nyoleha. Pole, tu yongola cimue ca sokapo, haico ka ci kuete etondelo. Yehova o yongola okuti tu lekisavo ocisola cocili kokuaye. Ocisola caco ci sukila oku sokapo loku pua etondelo.

4. (a) Anga hẽ omunu ka lipuile o pondola oku pua etondelo? (b) Ndomo Osamo 103:12-14 yi lekisa, nye Yehova a lavoka kokuetu?

⁴ Anga hẽ oku pua etondelo ci lomboloka okuti te tua lipua? Pamue tu liyeva ndu okuti ka tu kuete esilivilo, ale tua siata oku lueya calua. Tu kũlĩhĩsi asunga avali eci ka tu sukilila oku kuata usumba. Tete, Yehova ka luluvalela kakulueya etu. Ondaka yaye yi tu sapuila hati: “A Yehova, nda ove o patekela olongole, helie o talama, a Yehova?” (Osa. 130:3) Eye wa kũlĩha okuti ka tua lipuile, tuakuakandu kuenda o tu ecela lutima wosi. (Osa. 86:5) Vali, Yehova wa kũlĩha okuti tua hongua kuenda ka lavoka kokuetu ovina ka tu tẽla oku linga. (Tanga Osamo 103:12-14.) Oco hẽ, tu lekisa ndati okuti, tua sokapo kuenda tua pua etondelo kovaso aye?

5. Elitokeko lipi li kasi pokati kocisola loku pua etondelo?

⁵ Ocisola oco ci kuatisa afendeli va Yehova oku pua etondelo. Ocisola tu kuetele Isietu wokilu loku u kolela lutima wosi, ci tu kuatisa oku sokapo kuenda oku pua etondelo. Nda ocisola cetu camamako ndaño ceci tu setekiwa, tu lekisa okuti tua pua etondelo. (1 Asa. 28:9; Mat. 22:37) Tu kũlĩhĩsi vali ovindekaise vitatu via tukuiwa ale kefetikilo liocipama. Momo lie ovo va nõlelapo oku ci linga? Anga hẽ, manji ufeko wa suvuka olomapalo vi lingiwa kosikola, manji ukuenje o yongola oku kutisiwa osõi pepito a kundila, ale isia yepata o yongola oku pumba upange? Sio, hacoko. Ovo va kũlĩhĩle olonumbi vi kola via Yehova kuenje ovisimĩlo viavo, va vi tiamisila ku Isiavo wokilu. Ocisola va kuetele Yehova, oco ca va vetiya oku sokolola kokuaye osimbu ka va nõlele onjila va kuama. Poku ci linga va lekisa okuti va pua etondelo.

6. (a) Momo lie o sukilila oku pua etondelo? (b) Nye ci lekisa okuti Adama la Eva va tokoka koku pua etondelo?

⁶ Momo lie omunu lomunu a sukilila oku lekisa okuti wa pua etondelo? Ove o sukila oku lekisa okuti wa pua etondelo omo okuti Satana wa lingila usuanji Yehova kuenda wa ku lingilavo usuanji. Ungelo waco ocisuanji, wa lilingisa Satana, ale “Ukuakutamãlala,” vocumbo Cedene. Eye wa vĩhisa onduko yiwa ya  Suku poku popia hati, Yehova ka sungulukile, ukuepela kuenda Ombiali yimue ka yi koleliwa. Adama la Eva va likongela kusuanji wa Satana kuenje va sinĩla Yehova. (Efet. 3:1-6) Omuenyo Vedene wa va ĩhile epuluvi lioku pamisa ocisola cavo ku Yehova. Kuenje omo liusuanji wa Satana, ocisola cavo ca tepuluka kuenda va tokoka. Epulilo likuavo li sukila oku tambuluiwa lieli: Anga hẽ omunu umue o pondola oku amamako oku kolela Yehova Suku omo liocisola o kuetele? Handi vali, omanu va pondola muẽle oku amamako oku pua etondelo? Apulilo a-a eya oku limbukiwa eci Yovi a kala oku liyaka lovitangi.

7. Ndomo ca lekisiwa kelivulu lia Yovi 1:8-11, Yehova wa liyeva ndati poku mola epandi lia Yovi? Kuenda Satana wa tenda ndati epandi liaco?

⁷ Yovi wa kala kotembo eci va Isareli va kala Kegito. Koloneke viaco, Yovi eye lika wa lekisa okuti wa pua etondelo. Eye ka li puilevo ndeci etu. Wa enda oku lueyavo. Pole, Yehova wo solele calua omo wa puile etondelo. Citava okuti koloneke viaco Satana wa sapuilile ale Yehova okuti omanu ka va pondola oku pua etondelo. Omo liaco, Yehova wa sapuila Satana catiamẽla ku Yovi. Kuenje epandi lia Yovi lia lekisa okuti Satana ohembi! Yehova wa ecelela okuti Satana o seteka epandi lia Yovi. Yehova wa kolelele Yovi ekamba liaye kuenje wa ecelela okuti Satana u seteka.—Tanga Yovi 1:8-11.

8. Ovitangi vipi Satana a kokela Yovi?

⁸ Satana ongangala kuenda omondi. Eye wa nyõla cosi Yovi a kuata, wa ponda apika vaye kuenda wa vĩhisa ekalo liaye. Wa pondavo omãla vosi va Yovi ci soka ekũi okuti wa va solele calua. Noke Satana wa lamba Yovi ketimba, poku u kokela apute ãvi tunde  pomãi toke ponumbutue. Ukãi wa Yovi wa sumũile calua omo liovitangi kuenda wa sapuila Yovi hati ku ka kolele vali, siñala Suku kuenje fa. Yovi wa yonguile muẽle oku fa, pole, wa amamako oku kolela ku Yehova. Kuenje Satana wa seteka onjila yikuavo yoku u yapuisa. Wa tuma akamba vatatu va Yovi. Alume vaco va kala la Yovi oloneke vialua, pole, ka va ecele elembeleko lalimue. Ovo vo sapuila lika olondaka vio sumuisa. Vo sapuila okuti Suku eye o kasi oku ku kokela ovitangi kuenda ka kapeleko epandi liove. Handi vali, va sapuila Yovi okuti o sesamẽla ohali yaco omo wa kala ukuakandu!—Yovi 1:13-22; 2:7-11; 15:4, 5; 22:3-6; 25:4-6.

9. Ndaño lovitangi Yovi a liyaka lavio, nye a likala oku linga?

⁹ Ocituwa cipi Yovi a lekisa kovitangi evi? Ocili okuti eye ka lipuile. Yovi wa yeva onyeño yalua omo liovina akamba vaye vo sapuila. Noke wa limbuka okuti ovina a popia ka via sungulukile. Eye wa teyuila ño esunga liaye okuti lia Suku ci sule. (Yovi 6:3; 13:4, 5; 32:2; 34:5) Ndaño okuti ovitangi via Yovi via luile enene, eye wamamako oku kolela Yehova Suku. Eye ka tavele kovohembi akamba vaye vesanda. Kuenje wa popia hati: “Oku tava okuti ondaka [yene] yocili, ku kale kupãla lame. Toke fa si liweka kesunga liange.” (Yovi 27:5) Olondaka evi, vi lekisa okuti Yovi wa nõlelepo oku pandikisa ndaño lovitangi. Yovi ka liwekelepo oku pandikisa, tu sukilavo oku u setukula.

10. Ove wa kongeliwa ndati kusuanji Satana a lingila Yovi?

¹⁰ Satana o lundilavo omunu lomunu pokati ketu. Ove wa kongeliwa ndati vusuanji Satana a lingila Yovi? Eye o ku sapuila okuti ku kuetele ocisola cocili Yehova Suku kuenda eci kuiya ovitangi o liwekapo oku u vumba, ku ka amamako oku lekisa epandi! (Yovi 2:4, 5; Esit. 12:10) O liyeva hẽ ndati? Ocili okuti ci vala kutima siti? Pole, ivaluka okuti: Yehova wa ku kolela calua kuenje eca kokuove epuluvi lioku lekisa okuti wa pua etondelo. Yehova ecelela okuti Satana o seteka epandi liove. Yehova wa kolela okuti ove amamako lepandi loku kuatisa koku eca etambululo liokuti Satana ohembi. Eye wa likuminya okuti o ka ku kuatisa. (Va Hev. 13:6) Esumũlũho linene oku kolela Kombiali yoluali luosi! Ove hẽ wa limbuka esunga lieci epandi li kuetele esilivilo? Eci ci tu ĩha epuluvi lioku situlula ovohembi a Satana kuenda oku teyuila onduko yiwa ya Yehova loku kuatisa kuviali waye. Nye tu sukila oku linga oco tu amameko lepandi?

11. Nye tu lilongisa ku Yovi?

¹¹ Satana “koloneke via sulako” o kasi oku vokiya elambalalo kafendeli va Suku. (2 Tim. 3:1) Koloneke vilo vĩvi, tu pondola oku lipamisa ndati oco tu amameko lepandi? Kuli vali ovina vikuavo tu pondola oku lilongisa kulandu wa Yovi. Osimbu ovitangi Yovi a liyaka lavio ka vieyile eye wa enda ale oku lekisa epandi ku Yehova olonjanja vialua. Kũlĩhĩsa asunga atatu tu pondola oku lilongisa kokuaye catiamẽla koku li pamisa etu muẽle oco tu amameko oku kala omanu va pua etondelo.

12. Ndomo ca lekisiwa kelivulu lia Yovi 26:7, 8, 14, Yovi wa lekisa ndati eliketiso lesumbilo ku Yehova? (b) Tu pondola oku lekisa ndati esumbilo ku Suku?

¹² Yovi wa pamisa ocisola caye ku Yehova poku lekisa eliketiso Kokuaye. Yovi wa pita otembo oku luluvalela loku sokolola koviluvo via Yehova. (Tanga Yovi 26:7, 8, 14.) Eye wa komõha ndomo ongongo, ilu, alende kuenda ocikẽlu via pangiwa kuenje wa limbuka okuti ka kũlĩhile ovina vialua viatiamẽla koviluvo viosi Yehova a lulika. Yovi wa kapelekovo olondaka via Yehova. Kuenje wa popia  hati, “Olondaka viomẽla waye nda vi soleka”. (Yovi 23:12) Yovi noke lioku limbuka ovina via lulikiwa wa vetiyiwa oku lekisa eliketiso ku Yehova. Eye wa solele calua Isiaye Yehova kuenda wa yonguile oku u sanjuisa. Kuenje eci co kuatisa oku kala omunu wa pua etondelo. Tu pondolavo oku setukula ovituwa via Yovi. Etu tua kũlĩha ovina vialua viatiamẽla koviluvo okuti, omanu kotembo ya Yovi ci sule. Etu cilo tu kuete Embimbiliya okuti, li tu kuatisa oku kũlĩha ovituwa via Yehova. Ovina viosi tu lilongisa, vi pondola oku vetiya utima wetu oku lekisa esumbilo. Kuenje eliketiso kuenda esumbilo tu kuetele Yehova vi tu vetiya oku u sola kuenda oku pokola kokuaye loku pamisa onjongole yetu yoku amamako oku pua etondelo.—Yovi 28:28.

13, 14. Ndomo ca lekisiwa kelivulu lia Yovi 31:1, Yovi wa lekisa ndati epokolo? (b) Tu setukula ndati ongangu yaye?

¹³ Epokolo Yovi a lekisa kovina viosi, lio kuatisa oku pua etondelo. Yovi wa kũlĩhĩle okuti oco a pue etondelo wa sukilile oku pokola ku Yehova. Ocili okuti epokolo lietu li tu kuatisa oku amamako oku pua etondelo. Yovi wa likolisilako oku pokola ku Suku vomuenyo waye wosi. Ndeci, eye wa lekisa utate ndomo a linãlisa lakãi. (Tanga Yovi 31:1.) Yovi omo okuti wa kala ohueli, wa kũlĩhĩle okuti ka ca sungulukile oku lekisa ocisola kakãi vakuavo lovisimĩlo viukahonga. Koloneke vilo, oloseteko vioku linga ukahonga vi kasi kolonepa viosi. Anga hẽ tua nõlapo oku yuvula oku lekisa ocisola komunu umue okuti ahueli yetuko lovisimĩlo viukahonga, ndeci ca linga Yovi? Anga hẽ tua nõlapovo oku yuvula oku tala oviluvialuvia viomanu va kasi oku linga umbondo? (Mat. 5:28) Nda tua lekisa esuluviko kovina viosi, tu ka kala omanu va pua etondelo.

¹⁴ Yovi wa lekisavo epokolo ku Yehova konjila ndomo a tendele ovokuasi. Yovi wa kuatelevo elomboloko liokuti, nda wa kolelele kovipako viaye, nda wa linga ekandu li sesamela  oku yambuiwa. (Yovi 31:24, 25, 28) Koloneke vilo, omanu va pitisa lika kovaso ovokuasi. Nda tua tenda olombongo kuenda ovokuasi lonjila yimue ya sunguluka, ndomo Embimbiliya li tu vetiya oku linga, tu ka lekisa okuti tua pua etondelo.—Olosap. 30:8, 9; Mat. 6:19-21.

15. (a) Nye ca kuatisa Yovi oku pandikisa? (b) Momo lie tua kolelela okuti Yeova o ka tẽlisa ohuminyo yaye?

¹⁵ Yovi wa pandikisa omo wa tiamisilile utima kelavoko liokuti Suku wa ponduile oku u sumũlũisa. Eye wa kolelele okuti Suku wa kapako epandi liaye. (Yovi 31:6) Yovi ndaño lovitangi vialua a liyaka lavio, wa kolelele okuti Yehova wa ponduile oku u sumũlũisa. Ekolelo liaco, lio kuatisa oku kala omunu wa pua etondelo. Yehova wa sanjukila epandi lia Yovi kuenje wo sumũlũisa calua, ndaño okuti ka li puile! (Yovi 42:12-17; Tia. 5:11) Yovi handi o ka kuata asumũlũho a velapo. Anga hẽ, ove wa kolela muẽle okuti Yehova o ka ku sumũlũisa omo lioku kala omunu wa pua etondelo? Suku yetu ka pongoloka. (Mal. 3:6) Nda tua ivaluka okuti eye wa kapako epandi lietu, tu ka amamako oku tiamisila utima kelavoko li komõhisa liokovaso yoloneke.—1 Va Tes. 5:8, 9.

16. Nye tua nõlapo oku linga?

¹⁶ Ku ka liwekepo oku lekisa epandi! Ocili okuti, pamue o sima okuti ove lika o kasi oku liyaka lovitangi, pole, kolela okuti haveko lika. Ove o kasi pokati kolohuluwa viomanu vakuekolelo va kasi oku amamako oku lekisa epandi koluali luosi. O kasivo kulala walume lakãi vakuekolelo okuti, kosimbu va pandikisa ndaño okuti omuenyo wavo wa kala kohele. (Va Hev. 11:36-38; 12:1) Vosi yetu tu tava kolondaka via Yovi viokuti: “Si liweka kesunga liange.” Omo liaco, nda tua lekisa okuti tua pua etondelo, tu ka sivaya Yehova otembo ka yi pui!